▫️باشا دوشولمک اوچون، باشا دوشمه‌یه چالیش!

#خودو_ممدوو
#شعر_اوجاغی
@SheirOcagi

▫️خیاوان تک یؤنلو اولسا دا، یئنه ساغیمی-سولومو گؤزَتله‌ییرم؛
چونکی من هم دوستدان ضربه یئمیشم، هم دوشمندن.

#بهروز_وثوقی
#شعر_اوجاغی
@SheirOcagi

‍ ▫️ییخیلا-ییخیلا

سن نئجه سئویرسن منی؟
ساحیللرده، سینما قاپیلاریندا، یاغیشدا، گؤزلرینده، زئیتوندا، اللرینده، پامبیق تارلالاریندا،
گولوشونده، اویناق ماهنیلاردا،
ییخا-ییخا سئویرسن منی،
من ییخیلا-ییخیلا.

دوشونجه‌مین یورغون قالابالیغیندا،
اومیدیمین چیخماز کوچه‌لرینده،
سنه باغلانمانین دریا دنیزی،
ساچلارینا توخونمانین عاصی‌لیگی،
چاره‌سیزلیگینده، حسرتینده ایتمه‌نین
بئله سئویرم سنی،
قلبیمدن قان آخا-آخا،
بئله ییخیلا-ییخیلا.

یالنیزلیغیمین قوشلاریندا اوچاری،
فیکریمین زیندانیندا محبوس،
دوغوم گونومون اؤلوم اِعلانینداسان.
عؤمورلوک حبس گئیمیش بیر عشق‌دیر بو.
اینفاذی* یانمیش،
یاخشی حالی قالمامیش،
سون اومید صهباسیز کؤنلونون دارآغاجیندا.
بئله سئویرم سنی،
بئله، ییخیلا-ییخیلا.

بوتون ثوابلاریمی، گئدرکن یانیندا گؤتورن گوناهیمسان.
سن نئجه لئیلاسان بئله؟
هپ ییخا-ییخا،
من ییخیلا-ییخیلا.

«خوشجا قال» دئیینجه، آخشامی پنجره‌لریمه ائندیرن،
داغلاریمین یالنیز قوردلارینی کوسدورن،
چکیب گئدینجه.
قاتار-قاتار کؤنول دورنالاریمی هورکودن،
گولونجه. 
اومید تارلالاریمین قوراقلیغیندا،
بیر اورمان بؤیویور سن گلینجه.
قیامتیم اولور،
نفَسین نفَسیمه دَیینجه.
بیر شئی یئریییر ایچیمین عاصی نهریندن قیزیل دنیزینه،
سنی بئله سئوینجه.
بئله سن یاندیرا-یاندیرا،
من ییخیلا-ییخیلا.

آرتیق ساده‌جه یاریسی ییرتیق بیر فوتوقرافدا سببیمه دلیل‌سن،
سن آنلامایا-آنلامایا،
من ییخیلا-ییخیلا.

یالنیزلیغیمین قوشلاریندا اوچاری،
فیکریمین زیندانیندا محبوس،
دوغوم گونومون اؤلوم اعلانینداسان.
بوتون ثوابلاریمی، گئدرکن یانیندا گؤتورن گوناهیمسان.

سن نئجه لئیلاسان بئله؟
هپ ییخا-ییخا،
من ییخیلا-ییخیلا...

#ابراهیم_صدری
* بیر قراری، بیر یارغینی یئرینه یئتیرمک، اویغولاما
#شعر_اوجاغی
@SheirOcagi

دیالوق

▫️یالنیزلیق، سئودیگین آدامین یانیندا اوتوروب اؤزونو یالنیز حیسّ ائتمکدن یاخشی‌دیر.

📽 Before Sunset
2004 آمریکا
#ریچارد_لینکلیتر
#شعر_اوجاغی
@SheirOcagi

▫️بو دونیا تله‌دیر، یئمی ده ایستک‌دیر.

#مولانا_جلال‌الدین_رومی
#شعر_اوجاغی
@SheirOcagi

▫️بوتون یئنیلیک‌لر، خیال کیمی گؤرونن دوشونجه‌لرین آرخاسینجا گئدیلرکن تاپیلیب.

#خودو_ممدوو
#شعر_اوجاغی
@SheirOcagi

▫️اولمادی.

یوز دفعه اؤلدوم-دیریلدیم،
بو آدام، آدام اولمادی.
چیراق اولدوم، ایشیغیمی-
سالماغا بیر دام اولمادی.

سسله‌دیم، حاق «لالام» دئدی،
«کئچمه، چتین یولام» دئدی.
یوزو منه «بالام» دئدی،
هئچ بیری آنام اولمادی.

بو یاش مندن نه‌لر چکدی!
بو توی مندن نمَر* چکدی.
سئوینج، آخشام گله‌جکدی،
گؤزله‌دیم، آخشام اولمادی.

دوست الینده گوللـه توتدوم،
گوللـه‌سینی گوله توتدوم.
اؤلومو چوخ دیله توتدوم،
ظالیم اوغلو خام اولمادی.

#علیزاده_نوری
* خالق عادتینجه تویدا، نیشاندا پایلانان شیرنی، پول و...
#شعر_اوجاغی
@SheirOcagi

▫️آداملارین بوش اینانجلاریندان، چوخ فایدالانماق اولار.
بو میلّت، دئمک اولار کی بیر-بیرینه بنزه‌ییرلر؛ نه یاخشی‌دیرلار، نه پیس. ساده‌جه آخماق‌دیرلار.

#آگاتا_کریستی
#شعر_اوجاغی
@SheirOcagi

▫️ایکی حؤکمدار 13

... خان گؤزله‌دی، گؤزله‌دی،
چاتمادی آرزوسونا.
قیزین عینادکارلیغی،
چوخ آغیر گلدی اونا.
چوخ دوشوندو، نهایت-
حیله‌لره ال آتدی،
بیر گئجه قول گوجونه،
مقصدینه او، چاتدی.

سارای اهلی جار چکیب
خبر یایدی هر یئره:
لئیلا سورگون ائدیلمیش،
بغداددان یاد ائللره.
او گوندن ده فضولی،
دره آشدی، داغ آشدی،
اوبالاری، ائللری،
اویماق-اویماق دولاشدی.
شعیر دئدی، اینله‌دی،
او «لئیلا...لئیلا» دئیه.
یارالی آهو کیمی،
باش ووردو هر شنلیگه.
کئچدیگی هر اوبادان،
لئیلانی خبر آلدی.
او، اؤز محبّتی‌یله،
اوجالدی، هئی اوجالدی.
او گؤردو قاسیرغا دا،
گؤردو شاختا دا، قار دا.
«گؤردوم» دئین اولمادی،
لئیلانی بیر دیاردا.
گونش سارالدی گئتدی،
گویلره دالدی گئتدی.
آیی لئیلاسی بیلدی،
او دا یان آلدی گئتدی.
«اورک وورور، یورولمور،
کؤنول یانیر، قور اولمور.
سنه باخان گؤزلریم،
نییه سنسیز کور اولمور؟»

فضولی اوبالاری،
گزمکدن یورولمادی.
آنجاق اونون سسینه،
بیر سس وئرن اولمادی.
محبّتی اورکده،
غزل‌لری سینه‌ده.
کور-پشیمان قاییتدی،
او، بغدادا یئنه ده.
اوره‌یینده بوغولدو،
فضولی‌نین حاق سسی،
بولبول‌لرین ناله‌سی،
کولک‌لرین نغمه‌سی.
آهنگ توتدو عاشیقین،
«ناله‌ی دلسوز»ونا.
دالدی دوشونجه‌لره،
خیاللارا او، یئنه.
اونون سونسوز دردلری،
یئتیشمه‌دی داوایا.
او قاییدیب ائوینه،
چکیلدی اِنزوایا.
گئجه-گوندوز دوشونمک،
اونا بیر عادت اولدو.
تسلّیسی بیر خیال،
بیر ده عیبادت اولدو.
او، چوخ معنالار وئریب-
دونیا قیل‌وقالینا،
گؤیلردن جاواب اومدو،
یئرلرین سؤالینا.

فلک‌لر گؤیده چین-چین،
یاندی اونون آهیندان.
آرزوسونون چیراغی،
آلیشمادی بیرجه آن.
اوره‌یینین ناله‌سی،
«آمان» سسی، «آه» سسی،
یانانلاری اویاتدی،
بختینی اویاتمادی.

آهی گؤیلره چاتدی،
ظالیم خان'ا چاتمادی.
آلنیندا ایزلر آچدی،
عذابلاری خیش کیمی.
اینله‌دی چؤلده بیتن،
یارالی قامیش کیمی.

#بختیار_واهابزاده
#شعر_اوجاغی
@SheirOcagi
داوامی وار.

▫️گونشین قابیرغالارینین
سینماق سسلری
قالدی بیزه.

سیزدن تؤکولمه‌یه باشلادی
یاغیشین یارالاری.

یئره گؤمولموش گؤی
اللرينيزدن ایشه‌دی اوستوموزه.

آغلی باشیندان آلینمیش آی
«آپارتاید»ینیزا ایشیق چکدی.

تانرینین اینتحار گئجه‌سینده
بارماقلارینیز وار.

سیلاحلارینیزین شیشدی لوله‌سی.
شیشدی،
شیشدی،
دئشدی «مارکس»ین ««کاپیتال» دوشونجه‌سینی.

سومسوک راکئتلری آغلادی
رومانلار.

ساواشینیز غالیب گلدی
«تولوستوی»ون باریشینا.

اوزایدان آخدی
شرقده اؤلن‌لرين شكيلی.

يئنه اللری بوش قالدی
گؤیرچینلرین.
اؤیره‌نه بیلمه‌دیلر
سیزین دیلینیزی.

#اسماعیل_خرمی
@SheirOcagi

دیالوق

▫️اومید، قورخو'دان داها گوجلو اولان تک شئی‌دیر.

📽 The Hunger Games- Catching Fire
2013 آمریکا
#فرانسیس_لارنس
#شعر_اوجاغی
@SheirOcagi

▫️بیر شئیی و هر شئیی بیلن، هئچ بیر شئی بیلمیر.

#خودو_ممدوو
#شعر_اوجاغی
@SheirOcagi

‍ ‍ ▫️ائتمه‌گیل!

اوزونو مندن نیهان ائتمک دیلرسن، ائتمه‌گیل!
گؤزلریم یاشین روان ائتمک دیلرسن، ائتمه‌گیل!

برگ نسرین اوزره میشکین زولفونو سن داغیدیب،
عاشیقی بی‌خانیمان ائتمک دیلرسن، ائتمه‌گیل!

قاشلارین قؤوسونده موژگانین خدنگین گیزله‌ییب،
ائی گؤزو مستانه، قان ائتمک دیلرسن، ائتمه‌گیل!

جانیمی وصلین شرابیندان آییردین، ائی گؤزوم!
عئینیمی گؤوهرفشان ائتمک دیلرسن، ائتمه‌گیل!

قویموشام عشقینده من کؤون و مکانین وارینی،
جان نه‌دیر کیم، قصد جان ائتمک دیلرسن؟ ائتمه‌گیل!

بورقعی اوزدن آچارسان... سن مگر نامحرمه-
گیزلی اسراری عیان ائتمک دیلرسن؟ ائتمه‌گیل!

یاندیریرسان کؤنلومو عشقینله، معلوم اولدو کیم،
آنی روسوای جهان ائتمک دیلرسن، ائتمه‌گیل!

دوغرویام عشقینده، اوخ‌تک کیپرییین تانیق دورور،
قددیمی نئیچون کامان ائتمک دیلرسن؟ ائتمه‌گیل!

چونکی عشقین مسکنی‌دیر کؤنلومون ویرانه‌سی،
حسرته آنی مکان ائتمک دیلرسن، ائتمه‌گیل!

چون یقین بیلدی «نسیمی» عشقینی اولدو غنی،
اول یقینی سن گومان ائتمک دیلرسن، ائتمه‌گیل...!

شعر:
#عمادالدین_نسیمی
سَس:
#ائلشن_بؤیوک‌وند
#شعر_اوجاغی
@SheirOcagi

▫️گؤزلرین آددیم-آددیم
بومبالارا قوناق گئدیر، کابُل!
قوجاغین تالانا قالیب،
اینتحار سپه‌له‌نیر آدینا،
آدینلا زنجیرله‌نیر اورتادوغو،
آدینا داش یاغیر،
باشینا داش یاغیر،
آه، گوللـه‌لر یوردو!
آه، یارامین ائکیز تای باجیسی!
تانرییا باخ!
گوزگو دالیندا،
قان دنیزینده شپه‌له‌نیر،
و شیطانلار اؤلوم سمفونیاسی چالماقدادیر.
لای‌لای، ائی دوستاغا تاپشیریلمیش باجیم!
سیلاحلارین قیرجانان زاغاسیندا قورتولان!

#سیاوش_اکبری
@deltaie_khon
@SheirOcagi

▫️منیم خیال ائتدیگیم سئوگی، ایکی اینسانین بیر-بیرینی صاحیبلَنمک ووروشماسیندان داها اوستون بیر شئی‌دیر...

📚 نیچه آغلایاندا
#ایروین_یالوم
#شعر_اوجاغی
@SheirOcagi

▫️بیر میلّتین دیلی، وارلیغینین ان پارلاق قانیتی‌دیر.

#حسین_جاوید
#شعر_اوجاغی
@SheirOcagi

‍ ▫️دئمک گئدیرسن.

دئمک گئدیرسن،
منیم حاقّیم بو دئییلدی.
عشقه و جسارته داییر نه وارسا،
بئلینه آلیب-
او بؤیوک یانغینین‌لا گئدیرسن دئمک.
گئت!
اویسا... اویسا سن اؤیرتمن چیخدیغین ایل،
ووروب آلنیما قارغاشانی،
سیم‌سیاه بیر سود کیمی،
یارپاق تؤکموشدو دارآغاجیم،
آخشاملاریم اولموشدو،
و قودوز گئجه‌لریم.
گؤزیاشلاریم آغلارکن،
بیر اوزون یولجولوق دوشموشدو آرخاما.
او گون بوگوندور، تتیکده بیر عؤمرون سون گوللـه‌سی‌سن.
هئچ عاغلیما گلمزدی، گولوم!
بو دا منه درس اولسون،
بو دا منه درس اولسون!

دئمک گئدیرسن.
بئله اولماسینی ایسته‌مزدیم اویسا،
حزین و داغلارین بو باش دؤنمه‌سی،
جلّاد قیرمیزیسی بیر خَسران ایدی یوللاردا.

سن اؤیرتمن چیخدیغین ایل،
تام چیلغین بیر آغاجا سویونموشدو ایشلم‌لر.
ائیواه!
اسمر بیر توردا بیر ائیله‌میشم‌سه،
جنّتین اوجونو یاندیرمیشام‌سا بیر دفعه،
جهنّمین نظامیّه قاپیسیندایام‌سا،
آتشدن بیر نهره دؤنن بو عوصیان،
هپ او گول یانغینینا قاناد چیرپار.
و ان یاساق ماهنیلار،
اوزونو شارابلا یویار.

گئدیرسن دئمک.
منیم حاقیم بو دئییلدی
عشقه و جسارته داییر نه وارسا،
بئلینه آلیب-
او بؤیوک یانغینین‌لا، گئت!
هایدی، دورما!
گنج‌لیگیمین وبالینی،
و سئوگیسیز حیاتیمیزین بدلینی اؤده‌مه‌دن گئت!

بو شعری سنه ارمغان ائتدیم،
یانینا آلماغی اونوتما، ساقین!
سس‌سیز گئجه‌لرده اوخویوب آغلارسان!
کیمسه‌لر گؤرمه‌سه ده،
قانارسان، گولوم!
نه‌لر چکدیگیمی او گون آنلارسان!

سون باهار یاغیشی‌یلا ایسلاندیم کوچه‌لرده،
آغلادیم ایکیمیزه، سندن چوخ اوزاقلاردا.
ایندی، حوزون موغامیندا بوتون ماهنیلار.
بو یورغون سس،
بو کور لامپا،
بو آتشی سؤنموش بوخاری،
تانیغی‌دیر یالنیزلیغین،
پئشمانلیغین تانیغی‌دیر.
چونکی... چونکی منیم کیتابیمدا،
عشق بیر دفعه یاشانار.

دئمک گئدیرسن.
گئت!
بیر یاندا اؤلومون آلنینداکی تر،
بیر یاندا سویا دوشن شامدان گولو.
و صاباحین‌ ساچلارینداکی قیروو قدَر اوشویورسن.
هایدی، دورما!
بئلینه آلیب او بؤیوک یانغینین وبالینی،
و سئوگیسیز‌ بیر حیاتین بدَلینی اؤده‌مه‌دن، گئت!
بیلیرسن گئجه‌نین ان قارانلیق اولدوغو آن، صاباحین ان یاخینلاشدیغی زاماندیر،
و‌ هئچ‌بیر شئی حاقّیندا بیلدیگیمیز هر شئی، اصلینده یالاندیر.

دئمیشدیم یا:
سن اؤیرتمن چیخدیغین ایل،
ووروب آلنیما قارغاشانی،
سیم‌سیاه بیر سود کیمی،
یارپاق تؤکموشدو دارآغاجیم،
حوزون ساریسی یارپاقلارینی.
آخشاملاربم اولموشدو،
و قودوز گئجه‌لریم.
گؤز یاشلاریم آغلامیشدی،
بیر اوزون یولجولوق دوشموشدو آرخاما.
تام چیلغین بیر آغاجا،
سویونموشدو ایشلم‌لر.

دئمک گئدیرسن.
گئت!
بو شعری سنه ارمغان ائتدیم،
یانینا آلماغی اونوتما!
بلکه بوخاری‌ن سؤنموش،
کیتابین سونا چاتمیش.
بلکه دیزلرینده‌ پتو،
یالنیزلیغین ایچ چکیشمه‌سینی دویارسان.
پاکتده‌کی سون سیقارا'ن،
و تیترک بیر شام آلووو‌ حوزنویله کئچمیشه قاپیلارسان.
کیمسه‌لر گؤرمه‌سه ده،
قانارسان، گولوم!
سن ده یانارسان.

#فاتیح_قیسابارماق
#شعر_اوجاغی
@SheirOcagi

▫️اوتوروب سحردن ایچیرم ائله.

وطن قفسینه دوشموشم اسیر،
قفسه سالماغا قوشون یوخدومو؟
باشیما دوشمه‌یه داشین منتظر،
ائویمی هؤرمه‌یه داشین یوخدومو؟

اوتوروب سحردن ایچیرم ائله،
غم سوزن قهردن ایچیرم ائله،
وئردیگین زهردن ایچیرم ائله،
وئردیگین زهره نوشون یوخدومو؟

منم، یئلین اسسه، بیر نانه اولان،
سؤنموش شامینا دا پروانه اولان،
بو منم، دردیندن دیوانه اولان،
منی تانیمادین. هوشون یوخدومو؟!

#علیزاده_نوری
#شعر_اوجاغی
@SheirOcagi

دیالوق

▫️سنین، کئچمیش‌له ایشین قوتارا بیلر، آما کئچمیشین ایشی سنله هئچ واخت قوتارماز.

📽 Magnolia
1999 آمریکا
#پل_توماس_اندرسن
#شعر_اوجاغی
@SheirOcagi

▫️ایکی حؤکمدار ۱۴

... شاعیر آچیب قلبینی،
دئدی: یانان منم، من.
گونشه، اولدوزلارا،
آیلارا دوشمنم من.
اونلار اؤز تئللرینی،
ائله کی یئره سریر،
منه مین جور فلاکت،
فاجیعه‌لر گؤستریر.

سیز مندن سوروشمایین،
من نه‌لری سئویرم.
ائنسین یئره بولودلار،
ائنسین یئره قارانلیق!
الم‌لری، دردلری،
من گورمه‌ییم بیر آنلیق!

اه، او ظالیم اووچولار،
آه، او ظالیم اووچولار!
اونلاردا اینصاف‌می وار؟
یوواسینی داغیتدی،
منیم بولبول‌لریمین.
یوخوسونو قاچیرتدی،
یوخولو چؤللریمین.

بو دونیایا گله‌لی،
اوزوم گولمه‌دی بیر گون.
دونیادان ذؤوق ایسته‌ین،
دونیادان ال گؤتورسون؟!
من بیر ذؤوق گؤره‌ممه‌دیم،
نه قدر دونیادایام.
غم دنیزی ایچینده،
یالقیز قالان آدایام.

نه قلبیمین آهلاری،
نه گؤزومون قان یاشی،
سؤندوره‌ بیلمیر منیم،
سینه‌مده‌کی آتشی.

اریدیرم اودوما،
اوره‌یی ده، جانی دا.
قورخورام کی، یاندیرام،
اودوما دونیانی دا.

دلی کولک‌لر ایله،
دیله گلیب نئی کیمی،
ایسته‌رم کی، طبیعت،
چالسین منیم غمیمی.

یئرده اودلار قالانسین،
دریالار دالغالانسین،
هایقیرسین عوصیانیمی.
گوروب ائشیتدیکجه، من،
اودا یاخدیم جانیمی.

نئجه دؤزوم بو درده،
مگر داشام، دمیرم؟
من گؤرمک ایسته‌میرم،
ائشیتمک ایسته‌میرم.

گؤروب ائشیتدیکجه من،
آرتیر سینه داغلاریم،
اتدن گؤزوم اولایدی،
داشدان دا قولاقلاریم!

#بختیار_واهابزاده
#شعر_اوجاغی
@SheirOcagi
داوامی وار.

▫️بیر میلّتین یوکسلیش و یا ائنیشینی بیلمک اوچون، اونون اوخوللارینی گؤرمک یئتر.

#حسین_جاوید
#شعر_اوجاغی
@SheirOcagi