▫️اوینایان اؤلوم

بو اؤلوم منی ده یولدان چیخاردی،
گؤزویله، قاشی‌یلا اوینایان اؤلوم.
بالامی الیمدن آلیب آپاردی،
گؤزومون یاشی‌یلا اوینایان اؤلوم.

مین آدام ایچینده منی ساغ تاپان،
آختاریب منه ده «دار اوتاق» تاپان،
باغریمین باشیندا «اویونجاق» تاپان،
باغریمین باشی‌یلا اوینایان اؤلوم.

امانت وئریلن، ابدی اولماز،
عؤمور، غم یوکلَنن دوه‌دی، اولماز.
هئچ کسین «تویونا» دعوتی اولماز،
گلیب اؤز خوشویلا اوینایان اؤلوم.

#علیزاده_نوری
#شعر_اوجاغی
@SheirOcagi

▫️- ان چوخ آختاردیغین نه‌دیر؟
+ اؤزوم... کیم اولدوغومو، اصلینده نه ایسته‌دیگیمی آنلاماق ایسته‌ییرم.

📚 آرت و خائوس
#قاراقان
#شعر_اوجاغی
@SheirOcagi

▫️بعضیلری «سئویرم» دئیر، چونکی ازبرله‌میشدیر.
بعضیلری دئیه بیلمز، چونکی گئرچکدن سئومیشدیر.

#جان_یوجل
#شعر_اوجاغی
@SheirOcagi

▫️ساپی اؤزوموزدن اولان بالتالار

هانی بو مئشه‌نین یاشیل قاتلاری،
دمیر آغاجلاری، شاه پالیدلاری؟
ساپی اؤزوموزدن اولان بالتالار،
یامان کسدی بیزی، اوغرادی بیزی،
آلیب اؤزوموزدن، دوغرادی بیزی.

اؤز آغریلاریمیز، آجی‌لاریمیز،
بالتا ساپی اولان آغاجلاریمیز،
بلکه پاسیمیزدان، پاخیریمیزدان،
بلکه نفسیمیزدن، پاخیلیمیزدان،
بیر آغاج یالاقدان¹، بیر ترس جالاقدان²،
بلکه ایچیمیزه دوشن عالاقدان،
گؤیریب، چوخالیب گونون بیرینده،
ایچیب سویوموزون دورو یئریندن،
یامان سیخدی بیزی، قوروتدو بیزی،
بیری-بیریمیزدن سویوتدو بیزی.
پالیدی، چیناری سیفته دوغرادی،
بیزی کؤتویوموز اوسته دوغرادی،
ساپی اؤزوموزدن اولان بالتالار.

ساپیمیزا کئچن بوغازیمیزدی،
باشیمیزا دیَن قاپازیمیزدی،
یولوموزو کسن دوققازیمیزدی،³
ساپی اؤزوموزدن اولان بالتالار.

آمان، قیچیمیزی سیخان منگنه!
آمان، دؤشوموزو دؤین خالتالار!⁴
بو نه‌دیر؟! دوشموشوک کیمین فئلینه؟
بو ساپی وئرمیشیک نامرد الینه،
بو ساپی وئرمیشیک اؤزگه الینه،
الیمیز کسیلیر اؤز الیمیزله،
دیلیمیز کسیلیر اؤز دیلیمیزله.
ساپینین اوجوندا قیزیل اؤرتوگو،
تییه‌سی⁵ آلتیندا جلّاد کؤتوگو،
کسدی باشیمیزی، یاشیلیمیزی،
ساپی اؤزوموزدن اولان بالتالار.

گرک اؤز کؤکونده قایناسین قانین،
گئدیب اؤزگه‌سینه تاپینماق اولمور.
ساپی اؤزوموزدن اولان بالتادان،
هئچ جور قاچماق اولمور، ساقینماق اولمور.
دوشمن اسکیک اولمور قاپیدان، هارای!
ساپی اؤزوموزدن اولان بالتانین،
تییه‌سیندن هارای، ساپیندان هارای!
هارای دردلریمیز، آجیلاریمیز،
بالتا ساپی اولان آغاجلاریمیز!

#موسی_یعقوب
¹- یالتاق (Yalaq)
²- پئیوند، قلمه (Calaq)
³- حیَطین، باغین... حاصاریندا بیر-بیرینه کئچیریلن آغاجلاردان عیبارت اولان ساده قاپی (Doqqaz)
⁴- حئیوانلارین بوینونا کئچیریلن قاییش (Xalta)
⁵- کسیجی آلَت‌لرین کسن طرفی (Tiyə)
#شعر_اوجاغی
@SheirOcagi

▫️نئجه ده آمانسیز، یوخ ائدیجی بیر وارلیق‌دیر بو اینسان! اؤز حیاتینی داوام ائتدیره بیلمک اوچون نه چوخ جانلی وارلیغی، بیتکینی یوخ ائدیر!

📚 حاجی موراد
#لئو_تولستوی
#شعر_اوجاغی
@SheirOcagi

▫️افغانستاندا اوشاق چوخدور، آمّا اوشاقلیق یوخدور. دونیادا دا اینسان چوخدور، آمّا اینسانلیق یوخدور.

📚 چرپلنگ اوچوران
#خالد_حسینی
#شعر_اوجاغی
@SheirOcagi

▫️منده چوخ شئیلر ویران اولار،
سنی الدن وئرسم.

#غسان_کنفانی
#شعر_اوجاغی
@SheirOcagi

▫️بو عشق حسرت ایله گؤزَلدی بلکه.

ایلاهی، «سؤز» آدلی داش-قاشی* گؤندر!
گؤندر کی، دفینه بیر شعیر یازیم.
ایلاهی، گؤیلری گؤی واراق ائیله!
سنین شرفینه بیر شعیر یازیم.

یوخوشا دیره‌نیب یولوم، ایلاهی!
بو یولو من نئجه یوروم، ایلاهی؟!
بو عشقه بیر هئیکل یونوم، ایلاهی!
بو عشقین نفعینه بیر شعیر یازیم.

بو یارپاق دیریلمیش خزل‌دی، بلکه،
بو عشق حسرت ایله گؤزَلدی بلکه.
دئییرم، بو دونیا دوزَلدی بلکه،
اَیری طرفینه بیر شعیر یازیم.

#علیزاده_نوری
* قیمتلی داشلار، جواهرات (Daş-Qaş)
#شعر_اوجاغی
@SheirOcagi

▫️هر گون بیر نئچه اینسان «ائولیسن یوخسا سوبای؟ ایشین وار، یوخسا بئکارسان؟» دئیه سورغولاییر آدامی؛ آمّا کیمسه «سئوینجلی‌سن، یوخسا دئییلسن؟» سوروشمور.
حالبوکی مومکون اولان ان اؤنملی شئی بودور.

#هیث_لجر
#شعر_اوجاغی
@SheirOcagi

▫️مسَله‌نین ان قورخونج طرفی بودور: اونلار فابریکالارین، اداره‌لرین، بیلیم یوردلارینین قاپیسینی قادینلارا آچیرلار، آمّا یئنه ده اینانجلارینا گؤره «بیر قادین اوچون ائولنمک ان یاخشی پئشه‌دیر».

📚 ایکینجی جنس
#سیمون_دوبووار
#شعر_اوجاغی
@SheirOcagi

▫️ایکی حؤکمدار 11

..‌گولور گؤزلرینده لئیلانین جاهان،
دئییر: بئله اولار سئوَنلر، ائی خان!
اونون هر کلمه‌سی عشقین سسی‌دیر،
عاشقین سولطانی، معشوقه‌سی‌دیر.
حؤکمدار، بو سیرّی یاخشیجا بیل سن:
سئوگی دونیاسیندا هله طیفیلسن!
خان: سوس!
فضولی: «سوسا بیلرمی هئچ دولو اورک‌لر؟
زنجیر گؤتورمه‌ییر آزاد دیلک‌لر»
دئیه جاوان شاعیر قالخیر عوصیانا،
بوتون غضَبینی یاغدیریر خانا:
- ائشیت سؤزلریمی، ائی خان، ایندی سن،
من ده سنین کیمی بیر حؤکمدارام.
سن اؤز حؤکمون ایله گلدی-گئدرسن،
من اولو سئوگیمله همیشه وارام.
سن ده شاه، من ده شاه... سن اؤلکه‌لری،
منسه کؤنوللری فتح ائدیرم، خان!
قیلینج‌دیر، نیزه‌دیر سیلاحین سنین،
منیم سیلاحیم‌سا سؤزدور هر زامان.
قیلینج بو گون وارسا، صاباح پاس توتار،
سؤزونسه قیلینجی همیشه پارلار.
قیلیجلا، میضراقلا سن دانیشیرسان،
من نشه دوغوران سؤزلرله، ائی خان!
ایندی کی بئله‌دیر، گل مندن ال چک!
آخی چکیشن‌لر تای اولسون گرک!
گل منیم لئیلامی آلما الیمدن!
اونسوز نفَسی یوخ قورو جانام من.

خان: منه ده، ائی شاعیر، باخ بو گرک‌دیر.
سنی عؤمرون بویو اینله‌ده‌جکدیر،
بو گون حوضورومدا دئدیگین سؤزلر.
گرک حسرت قالا سنه او گؤزلر!
اؤلوم بئله آزدی  سیزه، دایانین،
ایکینیز بیر اودا یاندیقجا یانین!...

#بختیار_واهابزاده
#شعر_اوجاغی
@SheirOcagi
داوامی وار

▫️سنینله سفَره چیخدیغیم ایلک گوندن قاییغینین دلیگینی گؤردوم؛ بونونلا بئله، «عشق مؤعجوزه ائده‌جک» دوشونجه‌سی‌یله سنینله دنیزه ووردوم اؤزومو.

#فئودور_داستایئوسکی
#شعر_اوجاغی
@SheirOcagi

▫️آشکار بو گونومدن...

آشکار بو گونومدن دونَنه باخدیم،
گاه اؤزومه باخدیم، گاه سنه باخدیم.
باخدیم او اختیار صاحیب‌لرینه،
همین صاحیب‌لرین راهیب‌لرینه.
او اطاعت‌لره، او حؤکوم‌لره،
کیچیک «آللاه»لارا، او حاکیم‌لره.
باخدیم... یاخشی کی او ییخدی-ییخدیدا،
ائله بوغ‌هابوغدا، گؤزوم‌چیخدیدا،
گورمک وردیشینده گؤزوموز قالیب.

او قدر دولاشیق یوللار ایچینده،
نه یاخشی بیزه ده یول قویوبدولار،
منده یاشاماغا حال قویوبدولار.
واللاه قویمازدیلار، قویماسایدیلار،
هردن اؤزلرینه اویماسایدیلار.
من او شاهلاریمدان یامان راضییام،
او «آللاه»لاریمدان یامان راضییام.

گؤی بوتون، یئر بوتون، مملکت بوتون،
اویموشدو ابلیسه بو میلّت بوتون.
یاخشی کی منه بیر یووا وئریبلر،
هاوایی آلماغا هاوا وئریبلر.
واللاه، وئرمزدیلر، وئرمه‌سه‌یدیلر.

او گونون قیرمیزی یالان‌لارینا،
ایچی بوش او هاوا بالون‌لارینا،
او تعریفچی‌لره، تلطیفچی‌لره،
باخدیم کی دیلیمین تعریفی یوخدو،
اوزومون ایکینجی طرفی یوخدو.
دیلیمده اونلارا تعریف اولمادان،
اوزومده او بیری طرف اولمادان،
یاخشی کی قالمیشام تلف اولمادان.

اونون غضبیندن، بونون زوروندان،
او حیله توروندان یامان راضییام.
داها نه‌لریمدن وَ کیملریندن،
او حاکیملریمدن یامان راضییام.

فقط چوخوموزو ییخدی او دردلر،
آمان او هده‌لر، آمان او حدلر!
«منم-منم»لرین، او «منیم»لرین،
هر جور آزادلیغا او قنیم‌لرین،
زوروندان چیخدیم‌می من بیردن-بیره.
ان هوندور آغاجدان دیَنده یئره،
پئنجه‌ییم ایلیشیب هاچا بوداغا،
ساللانیب تزه‌دن قالخدیم آیاغا.

آلوودان چیخانا، اوددان چیخانا،
آغاج کوغوشوندا یاددان چیخانا،
یاماندان قاچانا اوخشاییرام من.
اؤلچو-بیچی‌لرین ایتدیگی یئرده،
دؤورون ایلان یولو گئتدیگی یئرده،
ایلاندان قاچانا اوخشاییرام من،
یالاندان قاچانا اوخشاییرام من.

یاخشی کی او آغاج کوغوشو وارمیش،
منه گؤز قویانین یاخشیسی وارمیش.
او بویدا اختیار صاحیب‌کارلاری،
یاخشی کی بیزه بیر یول قویوبدولار،
منده یاشاماغا حال قویوبدولار.
واللاه قویمازدیلار، قویماسایدیلار،
هردن اؤزلرینه اویماسایدیلار.
من او شاهلاریمدان یامان راضییام،
او «آللاه»لاریمدان یامان راضییام.

#موسی_یعقوب
#شعر_اوجاغی
@SheirOcagi

▫️داها یاز دا بایرام گتیره بیلمیر.

گول آچیر یارالار، سولور یارالار،
سؤزلریم آغزیمدا قابار چالیرلار.
دیلیم زنجیرله‌نیب دوستاق ایچینده،
شعرلر ایچیمده محبوس قالیرلار.

دوداق‌سیز دانیشیر گؤزلرده سؤزلر،
گؤزلردن تؤكولور سؤز شلاله‌سی.
باخیش وار مین کیتاب سؤز وار ایچینده،
باخیش وار نئی‌ده‌دیر حزین ناله‌سی.

آغلاییر باخیشلار، گولور باخیشلار،
جهنّم یارانیر، جنّت یارانیر.
دویون دوشور بیردن دوداغا دوداق،
هردن یاش دا یانیر، قورو دا یانیر.

گؤیده بیر اولدوز وار گونش‌سیز، آی‌سیز،
داغلار دا نیسگیلین گؤتوره بیلمیر.
گؤزلر بولود-بولود یالقیزلیق یاغیر،
داها یاز دا بایرام گتیره بیلمیر.

داریخیر سؤزجوکلر دیلی-دوداغی،
ایچیمده هارایلار آتش پوسکورور.
ایللردیر بیر محبوس قارا داخمادا،
بایاتی-بایاتی قابار اؤسکورور.

#میرحسین_دلداربناب
#شعر_اوجاغی
@SheirOcagi

▫️بعضاً هر شئیی اونودوب ساده‌جه سیم‌سیخی ساریلماق ایسترسن،
آما بیر شئی همیشه انگل اولار،
آدی نه‌دیر؟
غورور.

#جان_یوجل
#شعر_اوجاغی
@SheirOcagi

دیالوق

▫️- ایره‌لی گئدین، قورخمایین! آللاه بیزیمله‌دیر.
+ آللاه بیزیمله‌دیرسه، بس کیم اونلارلادیر، بیزی بئله تیکه-پارا ائدنلرله؟! 

📽 Saving Private Ryan
1998 آمریکا
#شعر_اوجاغی
@SheirOcagi

▫️منده
کئچمه‌ین
بیر کئچمیش وار.

#ریحان_کریمی
@SheirOcagi

▫️ایندی ده شکلیندن آیریلیرام من.

گئتدین اؤگئی عشقین آناسی اولدون،
ایندی خیال‌لاردا دوغماسان منه.
من سنی گؤزومده اوجالتمادیم کی-
چیخیب یوخاریدان باخاسان منه.

بلکه ده هئچ سنین گوناهین دئییل،
بلکه ده اودوزدوم عاغیلدا سنه.
من سنی گؤزومده ائله بؤیوتدوم،
گؤزلریم دار گلدی آخیردا منه.

ایندی ده شکلیندن آیریلیرام من،
بو دا سئوگیدندی، نیفرتدن دئییل.
اوزونو اؤزگه‌سی اؤپن بیر قیزین،
شکلینی اؤپمک ده غئیرتدن دئییل.

#علیزاده_نوری
#شعر_اوجاغی
@SheirOcagi

▫️بعضاً چتین‌دیر دؤنمک،
یا دا هر شئیی اونودوب گئتمک.
آنلادیم کی:
اینسانی ان آغریدان شئی،
سئویلمه‌دیگینی بیلدیگی حالدا،
دلی‌جه‌سینه سئومک.

#جان_یوجل
#شعر_اوجاغی
@SheirOcagi

▫️ایکی حؤکمدار 12

...بو احوالاتدان سونرا،
هله بیر نئچه آی دا،
ساخلادیلار لئیلانی،
محبوس کیمی سارایدا.
لئیلا سولدو، سارالدی،
خزان ووران باغ کیمی.
سیزلادی گئجه-گوندوز،
یاغسیز بیر چیراق کیمی.

اوره‌یینین دردینی،
دئدی او بختی قارا،
گوندوزلر بولودلارا،
گئجه‌لر اولدوزلارا.
یوخوسو دا گئجه‌لر،
اوچوب عرشه چکیلدی،
صوبحه قدر گؤزلری،
شام چیراغا دیکیلدی.
دئدی: - سن ده یانیرسان،
منده... بیر فرقیمیز وار.
یانغی ائله یانغی‌دیر،
بو فرق بیزی آییرار:
سن گئجه‌لر یانیرسان،
منسه، منسه، ائی چیراق!
هم گئجه‌لر یانیرام،
هم گوندوزلر... درده باخ!

ظولم‌لر، ایشگنجه‌لر،
سارسیتدی آنجاق اونو.
فضولی‌نین وئردیگی-
او قیزیل مئدالیونو،
سینه‌سینه باساراق،
هیچقیریر صوبحه قدر.

فضولی‌نین یازدیغی،
کؤنول یاخان غزل‌لر،
سارای دیوارلارینی،
دلیب کئچیر بیر آندا،
بو غزل‌لر گول آچیر،
قیزین دوداقلاریندا:

«آشیانِ مرغِ دل، زلفِِ پریشانیندادیر،
هاردا اولسان، ای پری، کؤنلوم سنین یانیندادیر.
عشق دردی‌یله خوشام، ال چک علاجیمدان، طبیب!
قیلما درمان، کیم هلاکیم زهرِ درمانیندادیر..
بس کی، هجرانیندادیر خاصیّتِ قطعِ حیات،
اول حیات اهلینه حئیرانام کی، هجرانیندادیر»

موغام اوسته اوخویور،
لئیلا بو سطیرلری،
حئیران قویور سسینه،
او، گؤیلری، یئرلری.
بو سس اریدیر قیشین،
شاختاسینی، قارینی،
بو سس دیله گتیریر،
سارای دیوارلارینی.

دردی آغیر دئییلدیر،
دردینی بیلمه‌ینین.
دردی یامان آغیردیر،
سئویب-سئویلمه‌ینین!
دردینه درد چاتارمی،
هم سئویب، هم سئویلیب،
عشقی یئتیم قالانین-
هم اؤزو، هم عاشیقی،
بیر آلچاغین الینده،
غول اولوب آلچالانین؟...

#بختیار_واهابزاده
#شعر_اوجاغی
@SheirOcagi
داوامی وار.

▫️مین نغمه نوتو وار بیر قوش سسینده..

نه غملی اوخویور بو بولبول، آللاه!
مین نغمه نوتو وار بیر قوش سسینده.
بلکه ده عؤمرومده بیر شیرین آن وار،
یقین او دا گلر سون نفَسیمده.

اؤلوم مله‌یینین قارا اللری،
سئیرک ساچلاریم‌لا اَیله‌نیر، آنا!
سولاردا اوزمه‌یی اؤیره‌نن آدام،
هم ده بوغولماغی اؤیره‌نیر، آنا!

قورخورام بو یاغیش ایسلادا منی،
او قیز دا الینده چتیر گلمه‌یه.
سئوگینین دادینی بیلمه‌یه آدام،
اؤلمک ده آداما چتین گلمه‌یه.

#علیزاده_نوری
#شعر_اوجاغی
@SheirOcagi