▫️بیز هامیمیز دونیایا گلنده عاغیلسیز گلیریک؛ بیر چوخوموز ایسه، ائله عاغیلسیز دا قالیر.

📚 «گودو»نو گؤزلرکن
#ساموئل_بکئت
#شعر_اوجاغی
@SheirOcagi

▫️ منه

دونیاما تزه‌دن گل،
یاشات بیر ناغیل منه!
عاغلیمی الیمدن آل،
قالماسین عاغیل منه!

ائله بو یاشیما دوش،
شاختاما، قیشیما دوش،
گویلردن باشیما دوش،
بوس‌بوتون داغیل منه!

محبّته ارک ائله،
اوشوینده کورک ائله،
اؤز ائوینی ترک ائله،
کؤچ منه، ییغیل منه!

گؤللریمده صونا اول،
درددن، غمدن یانا اول،
گل سن ده بیر آنا اول،
گتیر بیر اوغول منه!

#والئه_قوجا
#شعر_اوجاغی
@SheirOcagi

▫️جاماعاتی بوش-بئکار ساخلاماق اولماز، جاماعاتین باشی نه‌یه‌سه قال اولمالیدیر، اونلارین باشلارینی نئجه اولورسا بیر جور سارسیدیجی، گرگین اَیلنجه ایله قاتماق لازیمدیر. جاماعاتی اوشاق کیمی گؤردویوندن دولایی بایرام، یاس، ساواش، هم ده دوغرو-دوزگون ساواش یوخ - جینایت، قوتلاما، آجلیق، سوسوزلوق، فیتنه، وبا، طاعون کیمی اویونجاقلارلا مشغول ائتمه‌یی مصلحت گؤروردو. هر زامان جاماعاتی انتظاردا ساخلاماق گرک،‌ اونلارا لازیم اولان آنجاق یئکه-یئکه دانیشماقدیر، اؤزو ده باشلارینا چیمخیراراق دانیشماق، هم ده اونلارا دانیشان کیشی‌لر و قادینلار اَن گوجلو، اَن توتوملو، اَن گؤزل گوُر سسه مالیک اولمالیدیر. بو جاماعات فخر ائتمه‌یی، گؤزل سسلی کیشی‌لر و قادینلارین سؤزلرینی بئیینلرینه یئریتمه‌یی باجارمالیدیر، ایستر تاریخین بیر بوجاغیندا، ایسترسه دونیانین دؤرد بیر یانیندا هم اؤزلرینه، هم ماحمیدا فخر ائتمه‌یی باجارمالیدیرلار.

📚 آیاز آغانین قارا گونلری
#رضا_براهنی
چئویرن:
#نیگار_خیاوی
@SheirOcagi

▫️بیرینی سئوه‌جکسن‌سه، اونو هر شئیینله سئومه!
چونکی بیتدیگینده، اونو اونودا بیلمه‌مه‌یینه دئییل،
اونودا بیلمه‌یه‌جک قدر چوخ سئودیگینه یانارسان.

#جان_یوجل
#شعر_اوجاغی
@SheirOcagi

▫️صاباحدان بوتون جینایتکارلار منم.

دیکتاتور اولاجاق جوجوقلاری آنالار دوغمورلار.
دیکتاتور اولاجاق جوجوقلاری،
قادینلار قوسورلار اؤز بطن‌لریندن.
سحَرین گؤزو آچیلمامیش،
اغتشاشدان سونرا،
کوچه‌لرده تؤکولوب قالمیش داش-کسه‌یی سوپورن بو قاری،
ائله بیل گئجه‌نین اؤزونو سوپوروب بیر یئره توپلاییر.
و قارانلیغی بوغماغین داها بیر یولونو کشف ائدیر اؤز یورغون سوپورگه‌سی‌یله.

صاباحدان من ده «باکی» کوچه‌لرینده قان تؤکه‌جه‌یم،
قان، توکولدویو یئرین تکجه رنگینی دَییشمیر،
هم ده آدینی دَییشیر.
قان، معناسیز آخان زامانی ساخلاییر، تاریخه چئویریر.
صاباحدان من ده «باکی» کوچه‌لرینده قان تؤکه‌جه‌یم.
پولیس مأمورونون ائوینه سوخولاجاغام،
(ائویمه سوخولاجاق پولیس مأمورو)
آروادینین یانیندا قانینا غلطان ائده‌جه‌یم اونو،
(آروادیمین یانیندا قانیما غلطان ائده‌جکلر منی.)
اوره‌ییم، بالاجا اوشاغین نعلبکی‌یه تؤکوب اوفوردویو ایستی چای کیمی سویویاجاق.

صاباحدان من ده «باکی» کوچه‌لرینده قان تؤکه‌جه‌یم.
جیبیمده قتله یئتیره‌جه‌ییم آداملارین لیستی.
آرتیق اوستومده قانسیز بیر بیچاق گزدیریرم.
آدام اؤلدوره‌جه‌یم و بیر داها ثوبوت ائده‌جه‌یم کی،
پیس آداملار هئچ واخت یاخشی اؤلمورلر.
اؤلمه‌مه‌لی‌دیلر ده!

صاباحدان بوتون جینایتکارلار منم.

#آقشین_یئنی‌سئی
#شعر_اوجاغی
@SheirOcagi

▫️منیم گؤزل آیدام!
سنله اولماغین آنلامی منیم اوچون، شاهلیغا یئتیشمک‌دیر...
نه قدر غورورلویام سنین یانیندا!....

#احمد_شاملو
#شعر_اوجاغی
@SheirOcagi

▫️ائششک قوجالماق‌لا طؤوله-باشی اولماز!

#آتا_بابا_سؤزو
@SheirOcagi

"سیز ده بیر اونودولموش آتا بابا سؤزونو آرتیرین👇"

‍ ▫️ائی سئوگیلی!

«لئیلا»یا «لئیلا» دئمک،
«مجنون»لوغا طالیب‌لیک ایمیش.
ایندی منه «لئیلا»دان کئچمک دوشر.
بو، آیریلیغین تک چاره‌سی‌یمیش.

گئتمه‌لی بورالاردان!
بو سو اؤزونو چوخالدیر سنی خاطیرلادیقجا.
هر تشکّورده سن موحقّق قارشیمداسان.
بوتون شاعیرلر سنی تانیییر سانکی،
هپ سنی یازیرلار.
آغزیمدا دنیز قوخوسو،
بو گمی ده سنه بوشالیر، ائی سئوگیلی!

سن، اونودولدوغون قدر سئوگیلیسن.
«ابراهیم»ین اوره‌یینه اود اوفله‌یر نفَسین.
باخ! بو قاریشقا دا چاتلادی مرحمت یولوندا.
سنی هانسی قووما توفان اولاراق گؤندردیلر؟
آه‌ه، لئیلا! ائی آدم‌اوغلونون ان بؤیوک امتحانی!
سن و گئجه، سیاه اوستونه سیاه.
بو جئیران دا قان قوسار، ائی سئوگیلی!

بورالاردان گئتمه‌لی دئییرم‌سه سن البت،
بیاض اولان هر شئیدن،
عاغلیمدان، بو چیی دوشموش کیپریک‌لریمدن یعنی.
بو یاغیش سنی خاطیرلاتمالی!
بو دنیز، بو چای‌باغچاسی باشقالارینین اولمالی!

بوتون مزارلیقلاردا کئچرلی‌دیر تاپشیریغین،
بو شهر ده سن کیمی آرتیق.
گئتدیکجه اونودولدو اؤلولر،
گئتدیکجه سیرادان‌لاشدی عشق،
آنالار بئله وازکئچدی اوشاقلاریندان.
دوزدن، من نه‌سی‌یدیم بو عشقین، ائی سئوگیلی؟!

من اولماسام دا، گمی ساعاتیندا قالخاجاق،
«کادی‌کؤی» تاسالی، «اوسکودار» محزون قالاجاق.
او کیتابچی بیر باشقا موشتری‌یه «خوش گلدین» دئیه‌جک.
آرتیق باشقا بدنلره ایشتاه‌لاناجاق بو یانغین، ائی سئوگیلی!

سن باشقالارینا حاضیرلانارکن،
ایشده او گون گؤزلریم گؤزلرین اولاجاق.
بیر بولود، یوکونو داشییا بیلمه‌یه‌جک.
قان آخاجاق او زامان، قان.
کئچدیگیم بوتون یوللاردان کئچه‌جکسن.
ذهنینده مندن قالما منقبت‌لر،
گؤزلرینده رسم ائدیلمیش قارشیلیق‌سیز بیر سئودا،
بوتون چابالاریندان سییریلیب.
بیر آددیم داها «اوسکودار»،
بیر آددیم داها آیریلیق.
آرتیق بو اؤلونو خاطیرلاماغین واختی گلمیشدیر، ائی سئوگیلی!

#نعمان_آرمان
#شعر_اوجاغی
@SheirOcagi

دیالوق

▫️- آرخاداشلاریم دا منله دانیشماق ایسته‌میرلر داها.
+ آرخاداشین اولدوقلارینا امین‌می‌سن؟!

📽 On The Waterfront
1954 آمریکا
#الیا_کازان
#شعر_اوجاغی
@SheirOcagi

▫️قوشلار دن‌له‌یه‌جک گؤیده سسیمی!

ایندی شر واختی‌دیر، نئیلر شر منه؟
گئت او گؤی آغاجدان اومید در منه!
حالال اولسون دئیه بو کدر منه،
کبینه-طالاغا بوکورم اونو.

بیر جان ایسته‌دیلر سؤز عوَضینه،
گؤز یاشی وئردیلر گؤز عوضینه،
اؤلدو بو قلم ده... بئز عوَضینه-
بو کفن واراغا بوکورم اونو.

سسیمی دن‌له‌ین قوشلار جمع اولا،
سسیم آج قوشلارا بیر انجام اولا.
قورخورام کی، بالام ستَلجم اولا،
بو قارا تورپاغا بوکورم اونو.

#علیزاده_نوری
#شعر_اوجاغی
@SheirOcagi

🔹تحکییه ادبی درنه‌یی(413-جو جلسه)
🔹حئکایه: امنیت کئشیکچیسی – جان استاین بک (John Ernst Steinbeck)
🔹اورمیه-چهارراه آپادانا- مجتمع فرهنگی هنری اورمیه
🔹سه شنبه-19 اردیبهشت ماه 1402
🔹ساعت:17-19:30
@tahkie
Butajournal.com
#ادبییات #آذربایجان_تورکجه‌سی #داستان #مودئرن_نثر #تحکییه #اورمو #جان_استاین_بک #آمریکا_نثری #John_Steinbeck #حئکایه #

▫️بیر اینسانا زورلا سئودیره بیلمزسن اؤزونو،
«منه گووَن!» دئیه بیلمزسن.
او بونو حیسّ ائتمیرسه،
تک بیر سؤز سؤیله‌یه بیلرسن:
«اؤزون بیلرسن!»

#جان_یوجل
#شعر_اوجاغی
@SheirOcagi

▫️داش، یانیرمیش ایچینده.

داش آلتیندا قالان توملار یانیرمیش،
بوز صحرادا قارا قوملار یانیرمیش.
بو اوجاغی، سؤنموش بیلن یانیلمیش،
کول اود توتوب داش یانیرمیش ایچینده.

آمان آللاه، هاردان چیخدی بو آخین؟!
قاباغینی توتماق اولماز، بوراخین!
هله ایندی اود پوسگورن بو داغین،
میلیون ایللیک یاش، یانیرمیش ایچینده.

سن هر شئیین اصیل بویاسینا باخ!
یومورتانین ساری مایاسینا باخ!
اوستو قورو پامبیق تایاسینا باخ!
توستوله‌نیب یاش، یانیرمیش ایچینده.

آیاغیندا سارماشیقدان بوخووو،
لاله‌لرین یئنه یانیر آلووو.
ائی قفسیم، آل جانیمدان بو خوفو!
قفسده ده قوش، یانیرمیش ایچینده.

بو گلن سئل یا داغیدا، یا دوزه،
قالان عؤمروم، گل اوزومه گولومسه!
بو قاپازلی باش دیکه‌له بیلیبسه،
اؤز-اؤزونه باش، یانیرمیش ایچینده.

بو موطیع‌لیک بلکه قاندا قالمادی،
درد اورَکده، یانغی جاندا قالمادی،
آخیر کی، بو قیلینج قیندا قالمادی،
قین آلیشیب... قاش، یانیرمیش ایچینده.

گور'و یاندی، چات-چات اولدو چوخ مزار،
نئچه‌سینین دئییلمه‌میش سؤزو وار.
چوخ دئمیشیک، غئیرتدن بوش آداملار،
سن دئمه کی، بوش یانیرمیش ایچینده.

جان بوغازدا، دیل آغیزدا دؤزدومو؟
سؤز دئییرم، بو آزاده سؤزدومو؟
آخان یاشلار یاناقلاردا گؤزدومو؟
گؤزوموزون یاش یانیرمیش ایچینده.

کؤتویوندن پؤهره‌لندی چوخ ولَس*
لال دانیشدی، کار ائشیتدی، الغرض.
من دئمیشدیم بو قارا داش  گؤیَرمز،
قار آلتیندا قیش، یانیرمیش ایچینده،
کول آلیشیب... داش، یانیرمیش ایچینده.

#موسی_یعقوب
* اودونجاغی برک، قوللو-بوداقلی هوندور مئشه آغاجی (Vələs)
#شعر_اوجاغی
@SheirOcagi

▫️بیر تیکه آدام دوشوب اورگیمین باشینا؛
قرام-قرام،
اوووج-اوووج،
دنیز-دنیز سانجیلادیر منی.

#سیاوش_اکبری
@deltaie_khon
@SheirOcagi

▫️ایکی حؤکمدار 9

...زیندانا سالدیلار «لئیلا»نی او گون،
دونیا زیندان اولدو «محمد» اوچون.
لئیلا راضی ایدی اؤز عملیندن،
او، زهَر ایچمیشدی عشقین الیندن.
محبّت یولوندا چکدیگی عذاب،
اونا کدر دئییل، ووقار گتیردی.
او، اؤز حیاتینی، جاوان عؤمرونو،
اوغورسوز طالعین حؤکمونه وئردی.

او دئدی: ظولمون‌له، ائی چرخِ دؤوران!
جیگریم قان اولدو، یارالانمیشام.
آنجاق دئمه‌رم کی سن وفاسیزسان،
وئردیگین جفانی وفا سانمیشام.

اونون عذابینی چکدی محمّد،
سفارش گؤندَردی دال‌بادال خانا.
اوره‌یینده آغری، گؤزونده حسرت،
او، لعنت یاغدیردی چرخِ دؤورانا.
یازدی: تانیمیرام نه خان، نه قانون.
یازدی: دوشمن قَوی، طالعیم زبون.
یازدی: قییارلارمی گوله؟ قایدادیر-
بولبولو سالارلار قفسه، ائی خان!
حؤکمون کی اؤلکه‌ده هر یئره چاتیر،
چکینمه بولبولون آه-فغانیندان!
گووَنمه حؤکمونه، تخت و تاجینا!
زامانین یوللاری دویون-دویون‌دور.
ظولمون قیلینجینی گؤتور، سال قینا!
گوله ال قالدیرماق گوجسوزلوگون‌دور.
قورخمورام ظولموندن، سیاستیندن،
شاعیرم، قارایا آغ دئمه‌رم من‌.
سنده ذرّه قدر انصاف وار ایسه،
گولو یوخ، بولبولو سال او محبسه!...

#بختیار_واهابزاده
#شعر_اوجاغی
@SheirOcagi
داوامی وار.

▫️یوخسوللوغون سسی اولماز.

یوخسوللوغون سسی اولماز، قاداسی!
ائشیدیلمز یوخسوللارین صداسی.
قیریش اولار، ائرکن دوشَر اوزونه،
حالقا ووروب سورمه چکَر گؤزونه.

سیقار-سیقار آلیشارسان فیکیردن،
گورَن اولماز بوروق-بوروق توستونو.
گاه قیزدیریب اوشودَرسن نَکیردن،
بیر اَدیال‌لا چکن اولماز اوستونو.

یوخسوللوغون سسی اولماز، قاداسی!
پینه-پینه اَللرینده سیزلایار.
آرزولارین اوره‌یینده چورویوب-
نوبار ایکن شاخاسیندا بوزلایار.

گاه بویلانار حسرت دولو گؤزونده،
گاه گؤرونر پوزغون، غملی اوزونده،
آغیز آچار شالوارینین دیزینده،
یوخسوللوغون سسی اولماز، قاداسی!

بوش الینده اوتانج اولار ترله‌یَر،
شیمشک کیمی اوره‌یینده گورله‌یَر،
آتا اولار خجالتدن چرله‌یَر،
یوخسوللوغون سسی اولماز، قاداسی!

بایرام چاغی گئیینَنده اوشاقلار،
یوخسول اوشاق دیزلرینی قوجاقلار.
دؤزگینن ده، دؤزه بیلسن بو چاغلار!
یوخسوللوغون سسی اولماز، قاداسی!

دابانیندا چارتلاق سالیب قانایار،
آغلار سنله صوبحه کیمی کور فانار.
ائشیتمزسه حاکیم، سنی کیم قانار؟!
یوخسوللوغون سسی اولماز، قاداسی!

بو کوچه‌نین آج ایت‌لری سیرداشین،
زیبیل‌‌لیکده پیشیک‌لردیر یولداشین.
والایلیرسان؛ ایچمه‌دن ایتمیش باشین.
یوخسوللوغون سسی اولماز، قاداسی!

یاشام دئییل، ذرّه-ذرّه اؤلومدور،
بؤیله یاشام اینسانلیغا ظولومدور.
قالخ آیاغا، حاق سسینی بیلیندیر،
یوخسوللوغون سسی اولماز، قاداسی!

آل حاقّینی بو تورپاقدان، بو سودان!
دای گیزلَنمه، چیخ قارانلیق پوسودان!
یالنیز اینان! سؤکوله‌جک بیر ده دان.
یوخسوللوغون سسی اولماز، قاداسی!

آلین‌یازی، قیسمت بوشدور، عبث‌دیر،
آلداتمادیر، اویدورما‌دیر، قفس‌دیر،
آییلماغین سنه یئنی نفس‌دیر.
یوخسوللوغون سسی اولماز، قاداسی!

#سحر_خیاوی
@SheirOcagi

دیالوق

▫️آلین‌یازیسی آدیندا بیر شئی یوخدور. حیاتیمیز اؤز الیمیزده‌دیر و هانسی یولو سئچمه‌یه اؤزوموز قرار وئریریک.

📺 Dark
(2017-2020) آلمان
#باران_بو_ادار
#شعر_اوجاغی
@SheirOcagi

▫️اینسانلار دونیایا حاکیم اولاندان سونرا، حیات باشدان-آیاغا عدالتسیزلیکلرله دولو اولسا دا، حیاتین بیر گؤزل قانونو وار: بومرَنگ قانونو: «نه ائتسن، اوّل-آخیر فیرلانیب گلیب قارشینا چیخاجاق.»

📚 یالنیزلیقدان شیزوفرئنیایا
#Oar
#شعر_اوجاغی
@SheirOcagi

▫️بیلمه‌لیسن کی:
گئرچک آرخاداشلارین آراسینا مسافه گیرمز،
گئرچک عشقلرین ده.

#جان_یوجل
#شعر_اوجاغی
@SheirOcagi