‍ ▫️قوجالیق

تنهالیق باشلاییر بوردان اویانا،
کئچدیکجه کئچیلمز، آتام بالاسی!
چایلاری، چؤللری توتسان بویونا،
آیلاری، ایللری توتسان بویونا،
اؤلچدوکجه اؤلچولمز، آتام بالاسی!

داها چوخلاری‌یلا آرام سرینلر،
چوخلاری بویوما سئوینمَز داها.
۲۳ یاشیمدا منی سئونلر،
۳۳ یاشیمدا سئوَنمز داها.

من آخی نه یولام، نه چؤل، نه کوچه،
من آخی هامینین اولا بیلمه‌رم.
منی سئونلردن اؤترو، اؤلونجه-
۲۳ یاشیمدا قالا بیلمه‌رم.

نه قدر سؤزلر وار سؤزومدن جاوان،
داها چیغیرماغا نفسیم گلمیر.
داها بو دونیادا اؤزومدن جاوان،
شعرلر یازماغا هوسیم گلمیر.

کیریییر، یومشالیر شعرلریم ده،
قوجالیر میصراعلار، سؤزلر منیمله.
دوستلار جاوان قالیر شعرلریمدن،
قوجالماق ایسته‌میر دوستلار منیمله.

ايلاهی! قوجاليق بويموش دئمه‌لی،
دوستلاردان سس‌سيزجه قيريلير آدام.
عؤمور بير بولانيق سويموش دئمه‌لی،
عؤمور آزالديقجا دورولور آدام.

ایچیمین، چؤلومون یویولور پاسی،
سطیرلر گؤیَریر بو آغ واراقدا.
نه چوخموش اورَکله الین آراسی،
نه یاخشی اؤلمه‌دیم بو آرالیقدا.

سؤزلر اوره‌ییمدن الیمه یئتدی،
بیر آزجا سولوخدو، سولدو؛ نه اولار؟
بیر آزجا شاخلیغی، شوخلوغو ایتدی،
هئچ کس قیناماسین، یولدو؛ نه اولار؟

داها بالتا کسمز عاغلیم کسنی،
دونیانین دادینی بیلیرم داها.
بو قوجا دونیادا هر نفسیمی،
آغاجدان مئیوه‌تک دریرم داها.

سون نفس دونیادا هر شئیدن شیرین،
شاعیر ده قوجالیر، اؤلور، بیلیرم.
سؤزوندن قان اییی گلن شاعیرین،
آغزیندان سود اییی گلیر، بیلیرم.

بو دونیا بیر قاینار قازانمیش دئمه،
سؤندورمز اودونو نه قار، نه یاغیش.
دونیایلا دالاشماق آسانمیش دئمه،
چتینی دونیایلا باریشماق‌ ایمیش...

#رامیز_رؤوشن
#شعر_اوجاغی
@SheirOcagi

▫️روحوملا صؤحبت 1

گؤزه‌گؤرونمزیم، جان توتالجاغیم!
سالام روحوم، سالام، سالام دوستاغیم!
هردن اؤزوم کیمی بویلانیب گؤیه،
قیشقیرما ایچیمده «آزادلیق» دئیه!

سنی بوراخمارام، یالوارما، یئتر!
طاقتی، مایاسی سنسن جانیمین.
«سانما بیرجه لحظه کئشیکچی‌م یاتار!
فیکری قالیب منده نیگاهبانیمین»

بوتون گوندوزومده گئجه‌مده اوخو،
آیاغیم کئشیکچی، دیلیم کئشیکچی.
اولماز کی، نه‌یه‌سه اعتیبار ائدیم،
اؤزومو یوخ ائدیب سنی وار ائدیم.

قیشقیرما ایچیمده «آزادلیق» دئیه!
آزادلیق نه گزیر بو یئر اوزونده؟!
آزادلیق گزیرم ائله اؤزوم ده..‌.

#موسی_یعقوب
#شعر_اوجاغی
@SheirOcagi

▫️بوتون حیاتیم خیاللاردان عیبارت ایدی. هئچ واخت یاشامامیشام من، همیشه خیال قورموشام...

📚 دایینین یوخوسو
#فئودور_داستایئوسکی
#شعر_اوجاغی
@SheirOcagi

▫️منی دینله‌مک سنی تنگه گتیرمه‌سین! من کی، بوتون حیاتیم بویو سنی سئومکدن اوسانیب یورولمامیشام...

📚 یاد قادینین مکتوبو
#استفان_زوییگ
#شعر_اوجاغی
@SheirOcagi

‍ ▫️گئتدی

(ترافیک قضاسیندا حیاتینی ایتیرن تک اوغلو، «عاریف» اوچون یازدیغی شعر)

بیر گول بیتیرمیشدی ایلک باهار منه،
آخشامدان صاباحا دورمادی، گئتدی.
بیر اورک وئرمیشدی روزگار منه،
حیاتدا بئشجه گون وورمادی، گئتدی.

شیمشک تک هاوادا چاغلاییب کئچیب،
اؤلوم شربتینی غفیلدن ایچیب،
اؤزونه بیر کؤنول همدمی سئچیب-
بیر شادلیق ییغناغی قورمادی، گئتدی.

هامییا محبّت بسله‌ین «عاریف»
«داریخدیم، یانیما گل!» دئین «عاریف»
منی هامیدان چوخ ایسته‌ین «عاریف»
بو دفعه حالیمی سورمادی، گئتدی.

بیر بوداق آیریلیب قوپدو آغاجدان،
باغریمدان باغریمین پاراسی گئتدی.
آلدیغیم یارانین، چکدیگیم دردین،
طبیبی، درمانی، داواسی گئتدی.

نه یامان اولورموش اوغول حسرتی!
هئچ آتا گؤرمه‌سین بو موصیبتی!
کؤنلومدن کؤنلومون سؤزو-صؤحبتی،
گؤزومدن، گؤزومون قاراسی گئتدی.

«حسین» خسته‌دی غم یاتاغیندا،
بولودلار توققوشور قاش-قاباغیندا.
یاشیمین، اللینی آشان چاغیندا،
آرخامین داغ کیمی آرخاسی گئتدی...

#حسین_عاریف
سس: شاعیرین قیزی «زؤهره حسین‌زاده»
#شعر_اوجاغی
@SheirOcagi

اؤیکوجوک

▫️اَمک‌لی

بیر الینده چلیگی، اوبیریسینده بوش بیر توربا وار ایدی. ساققالینی اؤنونه وئرمیش، دیزلری تیتره‌یه‌-تیتره‌یه یئریییردی‌. یئریمه‌سی ده بازارین قالابالیغی ایچینده بیر نئچه آددیم آتیب دورماق ایدی. هر سرگینین اؤنونده دوروب درین بیر نفس آلیب سونرا آغریلاردان فورصت تاپیرسا، ساتیجیدان سوروشوردو:
- نئچه‌دی بو پورتاغاللار بالا؟
+ سنین اوچون یوز‌ اللیدن... بونلار دا ایکی لیرادان بَی بابا.
- گؤزل ... گؤزل ... یاخشی پورتاغالدیلار.

تورباسینی قولتوغونون آلتیندا قیسدیریب جیبینی قاریشدیریب یئنه یئریییب یئنه دوروردو:
- بو آلمالارین کیلوسو نئچه‌دی بالا؟
+ سنین اوچون ایکی ایگیرمی بئشه اولار، بَی بابا!
- چوخ یاخشی...چوخ گؤزل آلمالاردی...

یئنه یئریییردی... یئنه دوروردو... یئریییردی، دوروردو.  دوروردو، یئریییردی بازارین قایناشان قالابالیغی ایچینده...

#صمیم_قوجاگؤز
#شعر_اوجاغی
@SheirOcagi

‍ ▫️اؤلمک ایسته‌میرم بو آخشام‌اوستو،
قیزلار لامپا کیمی ایشیقلی، ایستی.
کاش بیر لامپا یانا باشیمین اوسته،
بیر قیزین دیزینه قویام باشیمی.

دردیم داملا-داملا اریینه‌جن،
گؤزلریم آغلاییب کیریینه‌جن،
آلنیمی قیریشلار بوروینه‌جن،
بیر قیزین دیزینه قویام باشیمی.

دونیا اومیدیمی قیراندا بئله،
منی الدن سالیب یوراندا بئله،
لاپ جلّاد بوینومو ووراندا بئله،
بیر قیزین دیزینه قویام باشیمی...

#رامیز_رؤوشن
#شعر_اوجاغی
@SheirOcagi

▫️بوتون حیاتیم بویو گؤردوگوم، آنجاق اصلا تانییا بیلمه‌دیگیم نه چوخ آدام وار ایمیش...
قورخونج‌دور بو...

📚 قایغیلاریمیزین قیشی
#جان_اشتاین‌بک
#شعر_اوجاغی
@SheirOcagi

▫️اینسانلار هئچ واخت، هئچ نه‌یی دئمک‌له اؤیرنمیرلر،
اونلار اؤزلری اؤیرنمه‌لی‌دیرلر....

📚 ورونیکا اؤلمه‌یه قرار وئریر
#پائولو_کوئیلو
#شعر_اوجاغی
@SheirOcagi

▫️روحوملا صؤحبت 2

لاپ دئیَک خیال‌تک اوچوروم سنی،
الیمده قوش کیمی قاچیریم سنی.
قارتال جایناغیندا قوش آزاد دئییل،
سارای دیواریندا داش آزاد دئییل.
بئله قئیل-قالدا باش آزاد دئییل،
آزادلیق نه گزیر بو یئر اوزونده؟

مئشه آزاد دئییل شر بالتاسیندان،
ساحیل‌لر قورتولماز سئل خاطاسیندان.
لاپ دئیَک بولبول‌لر قفسده دئییل،
آخی اونلارین دا باشقا آهی وار.
پتَکده آزادلیق یوخدو، شاهی وار.
صؤحبت شاهدا دئییل، نفسده دئییل.
پتَک‌لر، شانالار نه‌دن اؤترودور؟
آزادلیق نه گزیر بو یئر اوزونده؟
قیشقیرما ایچیمده «آزادلیق» دئیه!...

#موسی_یعقوب
#شعر_اوجاغی
@SheirOcagi

▫️آیی و سیچان

بیر آیی یاتمیش ایدی راحتله،
اوزانیب خیلی استراحتله.

بیر سیچان آیی اوستدن ائتدی گُذار،
اولدو اول آیی خوابدن بیدار.

ال آتیب موشو ائیله‌دی نخجیر،
دوردو یالوارماغا اونا او فقیر.

دئدی کی «سن منی گل ائیله رها،
یئر دوشر، ائیلرم عوض پیدا».

آیی گولدو، اونو رها قیلدی،
سیچانین مطلبین روا قیلدی.

بیر زامان اووچو قورموش ایدی دام،
دوشدو دام ایچره اول قَوی‌اندام.

نه قدر زور قیلدی اول مغرور،
دامی قیرماقلیق اولمادی مقدور.

باغیریب ناله و فغان ائتدی،
گؤز یاشین سئیل تک روان ائتدی.

آیینین ناله‌سین ائشیتدی سیچان،
بیلدی کیم، دامٍ دردده‌دیر پیچان.

گلدی کسدی دیشی‌یله اول دامی،
آیی‌یا ائیله‌دی سرانجامی.

دئدی آیی کی: «قالمادیم غمده،
یاخشیلیق ایتمز ایمیش عالمده»...

#سیدعظیم_شیروانلی
#شعر_اوجاغی
@SheirOcagi

▫️دونیادا بعضی شئیلر، وار-دؤولتدن چوخ داها دیَرلی‌دیر؛ اونلارین بیری ده ساده شئیلرله خوش اولماق باجاریغی‌دیر...

#دیل_کارنگی
#شعر_اوجاغی
@SheirOcagi

▫️اصیل قوجالیق یاشلا اؤلچولمور. حیاتدا مقصدی اولمایان اینسان قوجالیر. بیر اینسانین مقصدی وارسا، دئمه‌لی یاشینین نئچه اولماسیندان آسیلی اولمایاراق، هله جاواندیر...

📚 دئیوید رومانوو
#رفسان_نوروز
#شعر_اوجاغی
@SheirOcagi

▫️اونوتموشام سنی.

آیلار اؤتدو، ایللر کئچدی،
آیری یوللار بیزی سئچدی.
آختارمیسان، آمّا گئج‌دی،
هئچ آختارما، سورما منی!
چوخدان اونوتموشام سنی.

سن گئده‌لی چؤندو دونیام،
جهنّمه دؤندو دونیام،
کوله دؤندو، سؤندو دونیام.
اوزاق دولان، یورما منی!
چوخدان اونوتموشام سنی.

سن عؤمرومده قارا لکه،
داشیییرام چؤکه‌-چؤکه،
پارالاندیم تیکه-تیکه.
بسدیر داها، قیرما منی!
چوخدان اونوتموشام سنی.

یولداش اولدوم غمه-آها،
یئنه باتما بیر گوناها،
سن ده اونوت منی داها،
گل آختارما، سورما منی!
چوخدان اونوتموشام سنی...

#نریمان_اوزئییراوغلو
#شعر_اوجاغی
@SheirOcagi

▫️یاد

همیشه ائوینده بیر یاد دولانا،
همیشه بیر یادا قاپی آچاسان.
بیردن آنلایاسان اولوب-بیتنی،
باشینی گؤتوروب اوزاق قاچاسان.

گئده‌سن دونیانین دؤرد طرفینه،
اطرافین مین بئله یاد آدام ایله.
سونرا آنلایاسان کیمسه یاد دئییل،
دئیه‌سن «هامیدان من یادام ائله».

داها اللریمین اووجوندان توتموش،
ساچیمین تئلینه قدر من یادام.
هر سحر آچیلان گونومه من یاد،
هر گئجه یاتدیغیم یئریمه یادام.

اوره‌ییم ان بؤیوک یاددیر اؤزومه!
نه سؤز کار ائله‌ییر، نه ده بیر نفس.
بوز کسیب گؤزلریم اؤزوم-اؤزومه،
سانکی گؤز‌ ببه‌ییم بوزلوقدان قفس‌.

آدام هئچ بئله ده یادا دؤنرمیش؟!
او قدر یادام کی، هئچ سوروشمورام.
اینسان اؤز جانیندا بئله اؤلرمیش؟!
یاد اولموش دونیاما هئچ قاریشمیرام.

#آیسئل_فیکرت
#شعر_اوجاغی
@SheirOcagi

▫️روحوملا صؤحبت 3

بیز قیصاص آدامی، زور آدامی‌ییق،
بیز قارماق آدامی، تور آدامی‌ییق.
بس قایدا-قانونلار، فرمانلار نئجه-
حؤکم‌لر، دیوان‌لار نه‌دن اؤترودو؟
ایلانی هرله‌ییب جیزدا ساخلایان،
آییق پاسیبانلار نه‌دن اؤترودو؟
آزادلیق نه گزیر بو یئر اوزونده؟

سورونون اؤروشو، آتین اؤرویو¹،
یئتن هر اوتلاغی اوتلایا بیلمز.
نه قدر قورد آغزی، شیر پنجه‌سی وار،
جویورلر قیچینی قاتلایا بیلمز.

هره‌نین باشیندا بیر جوره هده،
ذیروه‌لر، توفانلار الینده، گیرینج.²
آغاج وار باشینین اوستونده رنده،
زیندان³ وار باشینین اوستونده چکیج.

اینسان یونولمالی، اَییلمه‌لی‌دیر.
یونولا-یونولا «ممنونام» دئیه-
ازَنه تعریفلر دئییلمه‌لی‌دیر.
توپلار، توپخانالار نه‌دن اؤترودو؟
یالان آیاق توتوب یئریمه‌لی‌دیر،
چاپلار، چاپخانالار نه‌دن اؤترودو؟
ایچیمده قیشقیرما «آزادلیق» دئیه!
آزادلیق نه گزیر بو یئر اوزونده؟...

#موسی_یعقوب

¹- اوتلاق (Örü)
²- گیره کئچمیش
³- اوزرینده مئتال دؤیمک اوچون دمیرچی آلتی

#شعر_اوجاغی
@SheirOcagi

▫️یوخ، من بیر ایش گؤره بیلمرم،
سنین ده الیندن بیر ایش گلمز.
یارا،
ایچینده‌کی بیچاقلا نه ائده بیلر کی؟!...

#نزار_قبانی
#شعر_اوجاغی
@SheirOcagi

▫️اینسانین دینجلیک و بوللوغو کناردا دئییل، اؤز ایچینده‌دیر...

📚 6 نؤمره‌لی پالاتا
#آنتون_چئخوو
#شعر_اوجاغی
@SheirOcagi

▫️اونوتقانلیق (آلزایمر)

اونوتقان اولموشدو، بیلمیردی کیمدی،
ایتیرمیشدی بوتون یادداشلارینی.
یادینا گلمیردی هئچ کیمین سسی،
اؤزگه‌دن سئچمیردی یولداشلارینی.

باخیشلار وئریردی اوگئی‌لیک اییی،
اوزلرده گؤرموردو تانیشلیق ایزی.
من کیمم؟ هاردایام؟ گئدیرم هارا؟
گؤسترن یوخ نییه بیزیم ائومیزی؟

اوزونه باخمیردی گئتدیگی یوللار،
دوماندا ایتمیشدی آشدیغی داغلار.
نه قدر چالیشدی یادینا سالسین،
یادینا دوشمه‌دی گؤردویو داغلار.

نه ائشی، نه ایشی، نه یازی-پوزو،
نه دوستاقدا هرگون چکدییی عذاب،
یادیندا دئییلدی هئچ بیری یقین،
اؤزللیکله سوندا یازدیغی کیتاب.

بیر نفس اولموشدو، بیر قفس داها،
باخاندا، بیر خیال گلیردی گؤزه.
الینده بیر چلیک، دوشموشدو یولا،
الینی ایستیردی دونیادان اوزه...

#میرحسین_دلداربناب   
@SheirOcagi                          

‍ ▫️کیم بیلیر؟

ائل گؤزونده دردسیز-غمسسز بیری‌یم،
منیم نه‌لر چکدیگیمی کیم بیلیر؟
من یئنی کؤزلَنمیش یانغین یئری‌یم،
منیم نه‌لر چکدیگیمی کیم بیلیر؟

سینه‌مده‌دیر منیم دردیم، داغلاریم،
من یارامی گیزلی ساریب باغلارام.
من گوندوزلر گولوب گئجه آغلارام،
منیم نه‌لر چکدیگیمی کیم بیلیر؟

من کیمینه یازام، کیمینه قیشام،
عاریفه دوغرویام، جاهیله بوشام.
من قولسوز، قانادسیز، بدنسیز باشام،
منیم نه‌لر چکدیگیمی کیم بیلیر؟

من «مقصود»ام، اوره‌ییمده یانغین وار،
بو یانغینی سؤندورمه‌دی بوران، قار.
منیم سسسیز-سسسیز آه‌ و زاریم وار،
منیم نه‌لر چکدیگیمی کیم بیلیر؟...

#آشیق‌مقصود_فریادی
#شعر_اوجاغی
@SheirOcagi

▫️اونوتقانلیق،
اینسانین آجی و جان‌سیخیجی سفرینده ایجاد ائتدیگی ان یاخشی علاج‌دیر.
بونونلا بئله، اونوتمایاجاغام سنی...

#غسان_کنفانی
#شعر_اوجاغی
@SheirOcagi