▫️بیزه، سؤزلریمیزدن چوخ، اوره‌ییمیزدن آنلایان گرک‌...

#جاهید_ظریف‌اوغلو
#شعر_اوجاغی
@SheirOcagi

▫️ائله اینسانلار گؤره‌جکسن کی قوزونو یئمک اوچون، تولکو ایله پلان قوراجاقلار... قوردلا بیرلیکده اؤلدوره‌جکلر... چوبانلا بیرلیکده یئیه‌جکلر... یئیه‌سی‌یله بیرلیکده یاس توتاجاقلار...

#Dursun_Fakih
#شعر_اوجاغی
@SheirOcagi

▫️آیاغیم

نئیلیرم، باخمیر سؤزومه،
الیمدن چیخیر آیاغیم.
هردن گوج وئریب دیزینه،
یولومدان چیخیر آیاغیم.

من تکم، آیاغیم قوشا،
دئییر: دایان، یورولموشام.
بو یوللاری سحر-آخشام،
باشیما قاخیر آیاغیم.

یوللارین یوخوشون چکیر،
ائله بیل قورغوشون چکیر.
نه چکیرسه، باشیم چکیر،
بس نییه قورخور آیاغیم...؟

#رامیز_رؤوشن
#شعر_اوجاغی
@SheirOcagi

▫️نه اؤلمک نفس‌سیز قالماقدیر، نه ده یاشاماق نفس آلماقدیر...
یاشاماق، سئویلمه‌یه لاییق اولان بیرینه یاشامینی صرف ائتمک‌دیر...

#اوغوز_آتای
#شعر_اوجاغی
@SheirOcagi

▫️بیر شئیدن چوخ امین ایدیم: اؤزومو اینجیتدیییم قدر، کیمسه‌نی اینجیتمه‌دیم حیاتدا...

#فئودور_داستایئوسکی
#شعر_اوجاغی
@SheirOcagi

▫️سنین اسیرین اولماق،
آزادلیق‌دیر.
درین اوقیانوسلارین آلتیندا،
باغلی گؤزلرله،
هئچ نفس آلمادان بئله...

#سهام_الشعشاع (سوریه‌لی شاعیر)
#شعر_اوجاغی
@SheirOcagi

▫️عمل دیشیندا، یالاندان باشقا بیر شئی یوخدور. تک عمل یالان دانیشمیر.
اینسانلاری هر یئرده عمل‌لری‌یله یارغیلاماق گرک...

📚 وورغون جان
#رومن_رولان
#شعر_اوجاغی
@SheirOcagi

▫️«دده شمشیر!»، مزاریندا سوموکلرین سیزلادی،
قانلی یاغی گوللـه‌سی‌یله بالان گئتدی گودازا.
«گوللو ننه» ناله چکیب، لایلا دئییب نازلادی،
یئر آغلادی، گؤی آغلادی آی‌بنیزلی «چیمناز»ا.

دده شمشیر! غوروب چاغی داغلار قانا بویاندی،
سال قایالار، یوخوسوندان هارای چکیب اویاندی.
قوجا «ترتر» اودا دوشدو، ها چیرپیندی، ها یاندی،
ایبلیسلرین فیتواسی‌یلا قیرغین دوشوب قافقازا.

دده شمشیر! سن گؤرمه‌دین شهید اولان جانلاری،
قویاریق‌می یئرده قالا او موقدّس قانلاری؟!
آزغینلارین، قودوزلارین تئز یئتیشر سونلاری،
سسین چاتیب چنلی‌بئلده کوراوغلویا، ائیوازا.

دده شمشیر! سینه‌نده‌دیر زمانه‌نین یوز داغی،
نادانلارین، نامردلرین، خائین‌لرین سؤز داغی.
اوغول داغی چکن دونیا بیر ده چکدی قیز داغی،
«دلی‌داغ»ین گؤز یاشلاری آخدی «کور»ه، «آراز»ا.

دده شمشیر! یولدان آزیب؛ یؤنه دوشمور بو دؤوران،
اودو سؤنن اوجاقلارین باشی کسیک، باغری قان.
اوخودوغو نه تؤورات‌دیر، نه اینجیل‌دیر، نه قورآن،
بیز نه قدر قولاق آساق مکیرلی بیر آوازا؟!

دده شمشیر! زامان کئچر، قارا دومان آچیلار،
عیبرتلی بیر تاریخ اولار چکدیگیمیز آجیلار.
ال ووراندا، تئللریندن قانلی یاشلار ساچیلار -
«کورداوغلو»یا گوله-گوله بخش ائتدییین گور سازا...

#حسین_کورداوغلو
#شعر_اوجاغی
@SheirOcagi

▫️بیرینی سئویرسن‌سه بوراخ گئتسین! قاییتسا همیشه‌لیک سنیندیر، قاییتماسا اوّلدن ده سنین دئییلمیش...
بو همیشه‌لیک بیر قانون‌دور: عشق، درینلیگینی ساده‌جه آیریلیقدا آنلاییر...

#جبران_خلیل_جبران
#شعر_اوجاغی
@SheirOcagi

▫️آنامین

دئیین: دوستاقلاری بوراخاجاقلار،
قوی غم بوزارتماسین اوزون آنامین!
دئیین: قیریلاجاق ظولمون زنجیری،
بیر تهر باشینی یوزون آنامین!

زهر گیزلَنیبمیش آشیمین آلتدا،
بیر دریا وار ایمیش قاشیمین آلتدا.
یاستیق داشا دؤنور باشیمین آلتدا،
بوردا هاردان آلیم دیزین آنامین؟

طالعی شیل-شیکست، فیکری ساغ اولدوم،
سئوینجی بیر ذرّه، دردی داغ اولدوم.
گاه عسگر، گاه خسته، گاه دوستاق اولدوم،
قویمادیم قورویا گؤزو آنامین.

تالانمیش عؤموردو، گوندو؛ نئیله‌ییم؟
باختیمین چیراغی سؤندو؛ نئیله‌ییم؟
سئوینجی فغانا دؤندو، نئیله‌ییم -
صؤحبتی نغمه‌دن حزین آنامین؟

«شوجاعت!» ائتدیلر یالان عؤمرومو،
کور اولسون داشلارا چالان عؤمرومو‌!
تالانان تالانیب؛ قالان عؤمرومو -
عؤمرونون اوستونه یازین آنامین...!

#شوجاعت_دلی‌داغلی
#شعر_اوجاغی
@SheirOcagi

▫️من بیر عرب قادینام،
«جاهلیّت» چؤللرینین آلتیندا دیری-دیری قویولانمیشدیم‌.
آی کوره‌سینه آیاق باسیلان عصرده،
من هله ده،
منه ایرث چاتان آلچاقلیق قومساللیق‌لاریندا،
دیری-دیری قویولانیرام.

عشق آختارماغا قالخمیرام من.
الیمی الینه وئرمک اوچون،
بیر قادین آختاریرام؛
منیم کیمی یالنیز و دردلی بیر قادین...
بیز ایکیمیز ده، یالنیز دوغولوروق تیکانلیقلاردا.
و قبیله‌نین اوشاقلارینی دونیایا گتیریریک؛
همن اوشاقلار کی،
یاخیندا بیزی آشاغیلاماغی اؤیره‌ده‌جکلر اونلارا...

#غادة_السمان
#شعر_اوجاغی
@SheirOcagi

▫️سسین رنگی اولسایدی، اونون سسی گؤی‌قورشاغی‌یدی...

#زاهی_وهبی (لُبنانلی شاعیر )
#شعر_اوجاغی
@SheirOcagi

▫️سئوگی اسارت زنجیری دئییل؛ سئوگی بیزی بیر-بیریمیزه غول ائتمک اوچون دئییل...

📚 داغلار آرخاسیندا اوچ دوست
#ایلیاس_افندی‌یئو
#شعر_اوجاغی
@SheirOcagi

▫️آیریلیق یئنی ائویمیز؛
آجیدان و سئوگیدن وار اولموش
گؤزل‌لیییک بیز...

#شوکرو_ارباش
@SheirOcagi

▫️دوستلار! باغیشلایین، دورا بیلمیرم،
یان اوسته قالمیشام، داش آلتیندایام.
اوستونده گزردیم قارا تورپاغین،
ایندی ده من اونون باش آلتیندایام.

قبریمی بئل-دوسر¹ قازیب چوخ درین،
مرد نئجه گؤسترسین بوردا هونرین؟
چؤکموشم آلتینا ائله بیر نرین،
ترپنمز بیر داغین دؤش آلتیندایام.

جانانیم هاردادیر، من ایسه هاردا!
عاشیق مغشوش قالیب بئله دیاردا.
بیر قورو قفسم دار بیر مزاردا،
کفنه غم یاغیب، یاش آلتیندایام.

دئ، هانی قلمیم، هانی دفتریم؟!
نه یازیم، دونیادان نه وار خبریم؟
یئتیشسین دادیما کرّارِ کریم،
سؤالا جاوابسیز ایش آلتیندایام.

قارداش یوخ بورادا الیمدن توتا،
نه آنام، نه باجیم؛ تاپیلماز آتا.
گلیب چاتدیم بو قارانلیق ظولماتا،
بالا اوچورمایان قوش آلتیندایام.

گؤرونمور اویلاقلار، گزدیییم داغلار،
آختاریب هئی منی یاریم، قان آغلار.
گؤزوندن ایچدیگیم سرین بولاقلار!
بیلین، کؤکسونوزون توش آلتیندایام!

تویلاردا چالدیغیم صدفلی سازیم،
ائللره یادیگار قالدی آوازیم.
مزار زیمیستان‌دیر، آچیلماز یازیم،
بوران-ی سنگیمز² قیش آلتیندایام.

اوغول هایاندادیر، قیز هایاندادیر؟
داغلارا باخدیغیم گؤز هایاندادیر؟
«شمشیر» هایاندادیر، ساز هایاندادیر؟
فیکره غرق اولموشام، هوش آلتیندایام...

#عاشیق_شمشیر

¹- بیر طرفی بالتا، او بیری طرفی کولونگ اولان آلت (Düsər)
²- یاواشیماق- آزالماق (Səngimək)

#شعر_اوجاغی
@SheirOcagi

▫️سن بوردا دئییلسن،
ایتیبسن؛
آنجاق گولوشون بوردادیر هله؛
اؤنومده،
صندلی‌نین اوستونده اوتوروب...

#شیرکو_بیکس
#شعر_اوجاغی
@SheirOcagi

▫️تئز-تئز کدرلی و معناسیز فیکیرلر منه قوناق گلیر. من ایسه همیشه‌کی کیمی اونلاردا معنا تاپماغا چالیشیرام. تک اونلاردا یوخ؛ اؤزومله باش وئرن‌لرده، اطرافیمدا، حیاتیمدا آختاریرام بو معنانی...
نه‌یه گؤره حیاتین معناسینی آختاراسان؟ بلکه، حیاتین معناسی ائله بو جور تکرارلی و یوروجو یاشاماقدادیر: سحر تئزدن دوروب ایشه گئده‌سن، آخشام ائوه گلیب یورغون حالدا ییخیلیب یاتاسان. گلیب-گلمه‌دیگین کیمه ماراقلی‌دیر سانکی؟! سحر ده هر شئیی تزه‌دن باشلایاسان....

📚 بو شهرده کیمسه یوخدور‌
#رؤوشن_عبدالله‌اوغلو
#شعر_اوجاغی
@SheirOcagi

▫️حتّی بو عادی ژئستلریندن، اونون چوخ یورغون اولدوغو بیلینیردی. ضعیف گولومسه‌مه و ظارافاتی، ایچینده‌کی عذاب و یارالاری گیزلَده بیلمیردی. دوداغی گولسه ده، اوندا مغلوبیّت و آلدانمیش اومیدلرین آجیسینی حیسّ ائتمک اولوردو...

📚 مین مؤحتشم گونش
#خالد_حسینی
#شعر_اوجاغی
@SheirOcagi

▫️عشقینی یاشا،
عشقین نه اولدوغونو بیلمه!
دوغروسو، بو دؤوراندا، بیلمک پیچاق‌دیر...

#مظفر_النواب (عراقلی شاعیر)
#شعر_اوجاغی
@SheirOcagi

▫️«آسیا» اؤزونو -میلّت‌لرین بئلینه مینیب اونلاری ظفره دوغرو آپاران بیر دیکتاتورلوغون آیاغی آلتدا ازیلمه‌یی، سورولرینی اوندا اوتلاماغا زورلاییب آجلاریندان اؤلومه بوراخان یالانچی بیر دموکراسی چرچئوه‌سینده یاشاماقدان- داها آزاد حیسّ ائدیردی...

📚 وورغون جان
#رومن_رولان
#شعر_اوجاغی
@SheirOcagi

▫️قلم

اؤز قلم‌داریندان آلمیش، نااومید گؤرکم قلم.
دردینی عرض ائیله‌مکدن قدّین ائتمیش خم قلم.

حاق کلامین یازماق اوچون تانری بخش ائتمیش منه،
خئیلِ ظالیم قارشیسیندا، سینماز، ان مؤحکم قلم.

وصفی دیلدارین توکنمز؛ حتّی اوندان یازماغا -
اولسا دریالار مورکّب، توم آغاجلار جمع قلم.

من «Qələm»دن ال (əl) گؤتورسم، غم «qəm» قالار یالنیز منه،
هم ده منسیزکن، چکر یقین‌کی من‌تک غم قلم.

ائی دئیَن کس ««پرویز»ه: «گئت خیدمته!»، بیلمزمیسن؟
توتدوغوم اشیا الیمده هم سیلاحدیر، هم قلم...

#پرویز_عاریف
#شعر_اوجاغی
@SheirOcagi