▫️بیر اؤلکه‌وار، خالق اونو فقط ماهنی‌لاردان تانیییر. اورادا، اورانین یولونو تاپیب بیر ده هئچ واخت گؤرونمه‌ین کیشی و قادینلار یاشاییر. او اؤلکه‌ده اؤلوم و زاوال یوخدور؛ درد و سولغونلوق تانینان بیر شئی دئییل؛ نیفرت و آج‌لیغین آنلامی یوخدور. هامی کؤنول راحاتلیغیلا بیر-بیریله یاشاییب آرخایین‌لیقلا و سیخینتی‌سیز، چوخ شئی‌لر اله گتیریرلر. آنجاق اورادا، غم یوخدور دئیه، خوشلوق دا یوخدور...

📚 کولک‌له گئتمیش
#مارگارت_میچل (۱۹۰۰-۱۹۴۹)
آمریکالی یازیچی
#شعر_اوجاغی
@SheirOcagi

▫️بئش-اون گونلوک ایمکان دوشوب الینه،
آمان کؤنول، احتیاطلا یاشا ها!
پول حؤرمتی، عقیده‌نی، مسلکی،
بو دونیادا چوخ ووروبدو داشا ها!

دوشوردویون یوکو یاددان چیخارما،
علاجسیزی، تکی یاددان چیخارما،
«دو»نو یاددان، «یئک»ی یاددان چیخارما،
آخیراجان دوشمه‌یه‌جک قوشا ها!

گؤزونو یومماسین ایکی‌اوزلو گردیش!
چوخ مطلبی ایشاره‌دن باشا دوش!
مجلیسده یئرینی ائل گؤسترمه‌میش،
تله‌سیییب تئز دیرماشما باشا ها!

اَیری یوللا گئتمه‌میسن، گئتمه ده!
خئیر-شرده ایتمه‌میسن، ایتمه ده!
ازل گوندن ائتمه‌میسن، ائتمه ده-
تاماه سنی تَزدن سالار قیشا ها!

«شوجاعت»م بوتؤو ده من، تالان دا،
آچیلان دا، سارالان دا، سولان دا.
غملنَنده، قوی بیلمه‌سین بالان دا،
سئویننده دوست-تانیشلا قوشا ها...!

#شوجاعت_احمدلی
کؤچوردو
#شعر_اوجاغی
@SheirOcagi

▫️بعضی آداملار جوشان حب کیمی‌دیرلر؛ سو لیوانینا آتیلاندا، داشیب-تؤکولنه قدر جوشوب کؤپوکلنیرلر؛ آنجاق بیر آز دؤزسن، گؤره‌جکسن لیوانین یاریسیندان دا آزدیلار...

#دکتر_علی_شریعتی
#شعر_اوجاغی
@SheirOcagi

▫️آغلاتدی منی

آغلامازدیم، زامان آغلاتدی منی،
دوز یولوندان آزان آغلاتدی منی.
گؤردوم حسرتدی هومالر سوموگه،
ایشله‌ییر شاختا سوموکدن ایلیگه،
دوزوموز ده اَییلیر اَیری‌لیگه،
قالدی قانماز، قانان آغلاتدی منی،
آغلامازدیم، زامان آغلاتدی منی.

تک صبیر گلدی، دئدیم ایش دوزه‌لر.
قار گئدر، بوز اَرییَر، یاز دا گلر.
نه بیلیم یاز دا بوران باغری دلر،
یوخا چیخمیش گومان آغلاتدی منی،
آغلامازدیم، زامان آغلاتدی منی.

دئدیلر بیر گون اولار ساز حالیمیز،
قیتلیق اولسا واریمیز یاغ بالیمیز.
ایندی کی اون تک اولوب ساققالیمیز-
بو یالان سؤز یامان آغلاتدی منی،
آغلامازدیم، زامان آغلاتدی منی.

ظنّ ائدیردیم آغیر اولسا یارالار،
یارالار آغریسین آنجاق یار آلار.
نه بیله‌یدیم اوره‌یی یار یارالار،
بیلمه‌مزلیکدی، قان آغلاتدی منی،
آغلامازدیم، زامان آغلاتدی منی.

ارّه‌لر دوشدو کی جنگل جانینا،
تولکولر تور توخودو آسلانینا
ترلانین اووچو باتیرجاق قانینا-
اوخدان آرتیق کامان آغلاتدی منی،
آغلامازدیم، زامان آغلاتدی منی.

اریمز قالدی بئیینده بوزوموز،
گؤیده سایریشمادی بخت اولدوزوموز،
نه قویون قالدی، نه املیک قوزوموز.
قوردا بنزر چوبان آغلاتدی منی،
آغلامازدیم، زامان آغلاتدی منی.

من دئدیم، باغلاسا یادلار قولومو،
دایاغیم وار قورویا ساغ-سولومو.
قوپدو بیر چن، کی ایتیردیم یولومو،
داغا باخدیم دومان آغلاتدی منی،
آغلامازدیم، زامان آغلاتدی منی.

وای بیزه اؤلدو پوزولماز یازیمیز،
میضراب اود توتدو، قیریلدی سازیمیز.
قالدی قیشلانمادا «عاصم!» یازیمیز،
یازی گولسوز یازان آغلاتدی منی،
آغلامازدیم، زامان آغلاتدی منی...

#عاصم_اردبیلی
@SheirOcagi

▫️اللریندن باشلاندی یوللار
اینسان دنیزینین
ساحیلینده بوغولورکن خیابان،
اللریندن کؤرپو سالدیم دونیامیزا
کؤرپه سئوگیلر یاغیشی
شوشه‌نین اوزه‌رینه یاغارکن...

ال-اله باشلاندیق،
قیرمیزی چیراق آرخاسینین شئه قوناقلیغیندا
شوشه بوخاریندا یول چکرکن؛
پولیس فیشقاسیندا
ال بیر اولان قورخولاریمیزین گؤزوندن اوزاق،
آیاق قابیسی گؤیرمیش
گول ساتان قیز-اوغلانین کبین آیه‌سینده باشلاندیق...

ال‌لریندن باشلاندی حیات
یاغیشلی آخشام اوستونون شئه ترافیکینده
ال‌لرین، الیمین گلین‌لییینده
اوره‌یی یاماقلی قیز اوشاغی‌نین
رُز چیچک‌لریندن باشلاندی باهار...
و
یوز مین جریمه‌یه باخدی
قیرمیزی چیراق آرخاسیندا رومانتیک‌لنمه‌میز...

#ایلقار_موذن‌زاده
@SheirOcagi

▫️آدام کیتاب دئییل، ۱۵۳-جو صحیفه‌یه نیشان قویوب گئدیب سونرالار قاییتدیغیندا هله ۱۵۳-جو صحیفه‌ده قفسه‌نین اوستونده سنی گؤزله‌یه. آدام گئدیر، آدام دَییشیلیر...

#سیامک_قاسمی
#شعر_اوجاغی
@SheirOcagi

▫️مودئرن قادین، عشقینه باشاریلی بیر ائولی‌لیکله سون قویولان نجیب بیر قیز دئییل؛ ارینین خیانتلریندن دالدادا آجی چکن قادین دئیل؛ جاوانلیغینین سونوجسوز عشقینین حسرتینده یانان یاشلی بیر قیز دئییل؛
او تاپدالانمیش فیطرتینین آجیناجاقلی دورومونا قوربان گئدن دئییل.
مودئرن قادین حیاتدان، باغیمسیزلیقلا طلب ائدن بیر قهرمان‌دیر. اؤز گؤونی وار؛ دؤولت، ائو و توپلومون قارشیسیندا قادینلارین دونیالیق اسارتلرینه قارشی دایانیر؛ هم جینسلرینین نوماینده‌سی اولاراق، حاقلارینا گؤره ساواشیر...

#الکساندرا_کولونتای
#شعر_اوجاغی
@SheirOcagi

▫️کیم، روحومومون چاتلاق‌لارینی گؤره‌جک قدر یاخین اولا بیلر منه...؟

#معین_دهاز
#شعر_اوجاغی
@SheirOcagi

▫️کئچدی

بولود قیسیر، گؤیلر سوسور
بیر داملا یوخ، نه‌دیر بو سیر؟
یایلاقلارا یاغان یاغیش،
گلدی بیزدن ایراق کئچدی.

چمنده‌کی قیزیل لاله،
اوره‌ییمجه آچیلمادی.
ائله بیلدیم گؤزلریمده،
اوجاق سؤندو، چیراق کئچدی.

او داغلارا یاغیش یاغیر،
بو داغلارین خبری یوخ.
یاخینلارین یانغیسیندان،
اوزاقلارین خبری یوخ.
یانان کیمدی، یاندیران کیم-
بولاقلارین خبری یوخ.
بلکه آغیر سوچوموز وار
ایچیمدن بیر سازاق کئچدی.

سانکی گؤیده شیمشک، اؤلوب-
بولودلاری قامچیلامیر.
سحر واختی سرین اولوب-
آخشام اوستو نم چیله‌میر.
یئر قوورولور، گؤی سوورولور،
بیرجه داملا دامجیلامیر.
قوراق کئچدی قارداش! بو ایل،
مووسوم یامان قوراق کئچدی...

#زلیمخان_یعقوب
کؤچوردو
#شعر_اوجاغی
@SheirOcagi

▫️حیطین بوجاغیندا
سو کؤپوجوک‌لرینین آراسیندا
بیر نئچه کول قیزیل گول،
اؤز عطرینین یوکو آلتیندا اَییلیب.
همن، هئچ کیمسه اونلاری قوخولامایان قیزیل گوللر...

هیچ بیر یالنیزلیق
کیچیک دئییل...

#یانیس_ریتسوس
#شعر_اوجاغی
@SheirOcagi

▫️قیسا بیر گئجه‌له‌مه‌دیر دونیا،
گوناه و جهنّم آراسیندا.
گونش،
بیر سؤیوش کیمی دوغور
و گوندوز،
اؤده‌نیلمز بیر اوتانج‌دیر.
آه...
گؤز یاشیمدا بوغولمادان،
بیر شئی سؤیله...!

#احمد_شاملو
#شعر_اوجاغی
@SheirOcagi

▫️بو آخشام...

بو آخشام دونیانین اَن آغیر باشی،
داریخیب، سیخیلیب گؤزلریم اوسته.
بو آخشام آللاهین گوناه یولداشی،
اللی‌ یول کاریخیب، یوزلریم اوسته

یاساقلیق اودوندا ایسته‌یین خاچی،
قیوریخیب؛ اوتولوب سئوگیمین ساچی.
اوینورام قوربت‌له "گیزله‌نیم قاچی"*
چورویور آرزی‌لار دیزلریم اوسته.

خاطیره دامیمین حسرت دیره‌یی،
چرتیلیب، قیریلیب "یورقون" اوره‌یی.
سئوگیلیم بیشیرن خیال چوره‌یی،
بو آخشام یئیه‌جم سؤزلریم اوسته...

او یاندا بیر وطن باشسیز، تومانچاق
بوشالمیش دریسین، جؤهودو پیچاق
سویوب لاپ او، قویروغوندا قویاجاق...
بودور کی یاتیرام کؤزلریم اوسته...

*گیزله‌نیم قاچ: بیر اوشاق اویونلارینین آدی‌دیر. اردبیل‌ین ویلکیج ماحالیندا "گیزدیلیم پاچ" آغیزلانیر...

#علی‌_محمدی_یورقون ۱۳۹۹/۵/۲۲
@SheirOcagi

▫️مخالیف‌لردن قورخمایین، اوچورتما(بادبادک) مخالف یئل ایله گویه قالخار.

#چرچیل (سیاستچی)
@SheirOcagi

▫️حیاتین قاپیسینی قاپاتماییبلار‌؛
بیر نؤقطه‌ده قالماق اولارمی؟ مگر مومکوندور؟
هاچاناجان و نه قدر بیر دؤیولموش ایت کیمی یووانین ایچینده بوزوشوب قالا بیلرسن؟
بو بؤیوک دونیادا سنین اوچون ده آخی بیر یئر وار؛ سنین اوچون ده آخی بیر یول وار...
حیاتین قاپیسینی قاپاتماییبلار کی...

📚 سُلوچون بوش یئری
#محمود_دولت‌آبادی
#شعر_اوجاغی
@SheirOcagi

▫️گؤزله منی!

گله‌جه‌یم، گؤزله منی!
هاردا اولسام گله‌جه‌یم،
قوهوم کیمی، قونشو کیمی،
قارداش کیمی گؤزله منی!

بیر-بیر یادا سالاجاغام،
نه‌لر اولوب، نه‌لر کئچیب.
عؤمور کیمی، تاریخ کیمی،
یادداش کیمی گؤزله منی!

سن اؤزونو مندن آیری،
نه یئتیم بیل، نه آرخاسیز!
آرخا کیمی، دایاق کیمی،
سیرداش کیمی گؤزله‌ منی!

حیاتینا گلَنمه‌سم،
اؤلومونه گله‌جه‌یم.
مزارینین باشینداکی-
بیر داش کیمی گؤزله منی...!

#زلیمخان_یعقوب
@SheirOcagi

▫️گئدیرم

قارا یوللاردی اولان دردیمه اورتاق؛ گئدیرم.
چکیرم سنلی اولان مکتوبا چاخماق؛ گئدیرم.

دئ، قارانلیق شهَرین بَت-بره‌سیندن نه اوموم؟
اوزون اولسون گئدیشیمدن هله‌لیک آغ! گئدیرم.

سن کی هئچ سئزمه‌دین آنجاق نه‌دی سئودا قورالی
بیلمه‌دین بیردیر اوزوک اون سایا بارماق؛ گئدیرم.

بسدی، دیندیرمه منی! داغ یارام آرتیق اوجالیر
اوجا داغسان، آشیرام داغ سنی داغ-داغ؛ گئدیرم.

من یالان دونیادا سس‌سیزجه بیتن دوز جیزیغام،
اولا دونیان بئله‌سی حوققا فیریلداق! گئدیرم.

اوته‌جک ثانیه‌لر، قیرمیز ایشیقلار سؤنه‌جک،
یولچویا بسدی، یاراشماز داها دورماق؛ گئدیرم...


#اسماعیل_سالک_یانغین
@SheirOcagi

▫️زامان منی سئورمی هئچ؟
نه بؤهتانام، نه شرَم من.
بیر مرد اودا دوشوب یانسا،
اوندان بئتر بیشَرم من.

بو دونیانین خسته حالین،
گلین مندن خبر آلین!
حاق دالینجا آیاق‌یالین،
دیار-دیار دوشرم من.

«شوجاعت»م بیر بوداقدا،
هر شئی یالان، هر شئی ساختا.
نه گؤرموشم دوز اولماقدا؟
نه عاغیلسیز بشرم من...!

#شوجاعت_احمدلی
کؤچوردو
#شعر_اوجاغی
@SheirOcagi

▫️آیریلاق

من یانیب سویوموش بیر پیلانئتم
منی بلَکله‌مه، مهربان غنچه‌م!
داها او گليشلر، او گونلر يئتر
چتین بیر ده سنه من اورک آچام

آنجاق او سئوگیمده وارام همیشه
یاغیش یوخ، اوستومه یاغان قوشمادير
من ياشلی سئوگیدن صبر اؤیرنمیشم
جاوانلار اؤزونو منه اوخشادير

منی سئویندیردین بو سون گؤروشله
داها آرامیزدا سویویوب ایللر
شیرین نوازیشله، خوش دينديريشله
منه خئير دوعا وئریر گؤزللر

گل سنی، گل سنی سون‌کره اؤپوم
سون اؤپوش، سون يولا سون باغیشلاما
تاباقلى قالاجاق گئجه‌لر قاپیم
ای گؤزل، تا مني سن قارغیشلاما

#سؤهراب_طاهیر
📚سئوگی آزادلیقدیر
@SheirOcagi

▫️نه قدر چوخ بیلیب معریفت اله گتیرسک، داها آز باشقاسیلا یاشاماغا گوجوموز چاتاجاق.
نه قدر چوخ اؤیرنیریک، داها چوخ، یالنیز و بوش بیر یاشامی گؤزله‌مه‌لیییک...

📚 سونسوزلوغا دوغرو بیر کؤرپو
# ریچارد_باخ
#شعر_اوجاغی
@SheirOcagi

▫️کیچیک پرنس، ایکینجی گزه‌گنه گئتدی...
اوردا یالنیز بیر کرال، یاشاییردی فقط.
قیسا بیر گؤروشدن سونرا، کیچیک پرنس گزه‌گندن گئتمک ایستدی. آنجاه کرال کی اونو ساخلاماق ایسته‌ییردی، اونا، «گئتمه! سنی عدلیّه باخانی ائده‌ریک» دئدی.
کیچیک پرنس دئدی: «بوردا یارغیلاناجاق بیری یوخدور کی»
شاه دئدی: «اولسون، اؤزونو یارغیلا! بو ایش، دونیانین ان چتین ایشی‌دی -اؤز باره‌نده دوغرو حؤکم وئریب اؤزونو عادیل‌جه‌سینه یارغیلایاسان- ».

📚کیچیک پرنس
#آنتوان_دوسنت_اگزوپری
#شعر_اوجاغی
@SheirOcagi

▫️اسیر سؤز

ائله سؤز وار دیل‌له دئمک چتیندی،
دیله گلسه آغیزلاری یاندیرار.
یازان اولسا کوله دؤنر واراقلار،
قلم‌لری، کاغیذلاری یاندیرار.

دیل‌له دئیه بیلمه‌دییین بیر سؤزو،
قاش‌لا دئمک، گؤزله دئمک چتیندی.
داغ یارماغا، داش چاپماغا نه وار کی؟
سؤز وار، اونو سؤزله دئمک چتیندی.

ایچیمده بیر داش زیندان وار، داش قفس.
قیرخ ایل اوردا دوستاق اولان سؤزوم وای.
نه‌لر چکدیم من او سؤزون الیندن،
ایراده وای، دیانت وای، دؤزوم وای.

او دوستاغین کئشیکچی‌سی اؤزومم،
اورییمده سؤز گیروودو، سؤز اسیر.
جانیم چیخیر، او سؤز چیخمیر دیلیمدن،
دوداغیمدا یارپاق کیمی سؤز اسیر.

سؤز، جانیندا دوستاق اولان شاعیری،
اؤزو سالیب مشقّته، عذابا.
هر شاعیرین قلبینده بیر قبیر وار،
هر شاعیرین ایچینده بیر خارابا...

#زلیمخان_یعقوب
کؤچوردو
#شعر_اوجاغی
@SheirOcagi