للأسف
مو كل القصص بالدنيا لازم تنجح
الدنيا بيع ومشترى
وذاك من ذاك اليربح
صح اني بيك تعلقت
بس الظرف ما يسمح
وبالتالي لميت الجنط
ثاري المشاعر مو خطط
مشكلتي بالوقت الغلط
حبيت الانسان الصح

نصي صوتك !
ديربالك يعلى صوت
انت زلمة !
ولازم بسكتة تموت
نصي صوتك
حتى لو مجروح كلبك
لبيتك اضحك من تفوت

والله عجبة شلون عبروهن عليك ؟
وانت ذاك الماتفوتك فايتة
ما تحطها بحلگك الما تچوي ايديك
وكلوك شلون خبزة البايتة ؟

وبعدك خايف ؟
بعدك تنعاف وما عايف
يا رخص الضحكة التحبسها
ومتخليها بين شفايف
راجع ايامك
احلامك
خليهن كلهن كدامك
هو شضايف ؟
تتذكر من كتلك انسى ؟
وكلمن خل يحتار بنفسه
عاجبتك وضعيتك هسة ؟
وكل لحظة تفوت تبجيني
تذكرهم وتاذيني وتخلي الدمعات بعيني
يا گلبي شسوالك حبهم ؟
مو ساكت ليش تحجيني

سالفة تجر سالفة وطاريك فات
واني واليمي وگفت شيبة بعصف
وبهدوء الي يخط قطعة وفاة
چنت اخاف وياك اغلطلي بحرف
عنك انشد ، ناس شمرتني على ناس
انت تدري بحالتي ؟
سائل عليّ ؟
تدري فوگ مخادي ماخليت راس ؟
تدري خير من الله جوه عيوني فيّ ؟
جنت خايف لا يجي لعيني النعاس
خاف توگع صورتك من ترخى ايديّ
من كثر كضها الصفاح مثلمات !
شلون درهم بالهوا وما ينلگف
دلني بابك خلي ادگه بمستحاة
بهيدا تشبه دگة اصبع ع الگطف
سلني سل موادعك لو تدري بيه
ساعة بس شعري السواد البيه نقص
عشت اول ليلة الكاتل بأيديه
ارجف وتعبني ليلي وما خلص
الطير يسهر بالحبس غصبا عليه
النوم اكثر شي يطير من القفص
وين اروح ؟ الغرفة صحرة ذكريات
عيوني والدخان حدهن للسگف
وهم عدت نفس الحجي ، شك بصلاة
واني والمرسال مرينا بظرف
ادري راح يروح كل واحد مچان
دمعة وتقسمنا شامة ونفترگ
خفت من حسيت كلشي عليك هان
التوه غافي بصفي يصحى من الخفگ
بينا الله ضلوعي طگهن صوته چان
شلون صوت الحطب لمن يحترگ
ماخذ غيابك مكان الحاضرين
انا ذاك الـ انت اعز من روحه
اني ماشي وياك للمادري وين
والك فاتح عيني جية وروحه
تعرف بموت الحرس تعويد عين
سولة تبقه عيونهم مفتوحة
ودعت بالروج صندوگ امنيات
وحالي حال ام موسى اتاني على الجرف
ها وعود نورلي على عينك مفردات
شما احطها ببيت يطلع بيه ضعف

الرسايل مارضن يرحن ووديهن
يخافن جفك الغايب يأذيهن،
ولك هنه ورق بيهن كلام أنسان
عاد اقراهن وبعدين شك بيهن
بيض أوراقهن بس الحبر بي لون
مابيهن مشاكل مثل راعيهن
و رسايل منك لحد هسه اداريهن،
مثل نومة طفل بالليل اهز بيهن

قالوا اقرأ القرآن كي تنسى التي
تركت سنينك من بعدها مهجورة
ف توضأت روحي لاقرأ سورة
فأذا اسمها اسم لتلك السورة
"وحگ الي بعث رسلة لأنسة
مراد انطي لجفن عيني لأنسه
گلت اقرا كتاب الله لأنسه
فتحته وشفت اسم الگطع بية"

العراق

أولست أنت بلد الرافدين
بلد دجلة والفرات؟
ولست أنت بلد أرض السواد
بلد الخيرات والكرم؟
أولست أنت مأوى للكرما،
ومنبع الجود والسخاء؟
ولست أنت أحضان التاريخ
ومهد الحضارات الأولى؟
فسلام على خيراتك يا عراق
وسلام على شعيك ومحبيك،

يا عِراقاً تلوحُ به الشمسُ فجراً
وتُغنّي دجلةُ عشقاً سرمدا
يا بَواباتِ بابلَ، يا مهدَ حُلمٍ
وحكاياتُ نينوى تأبَى الردى
فيكَ كُتِبتْ أولُ الحُروفِ فخَطّتْ
من ضفافِ الفُراتِ عِلمَ الهُدى

سؤال مدوخ الدنيا بكبرها
اكو واحد يحب واحد يكرهة ؟
والله انطيته ايدي ، وعافها وراح
يلا الحمد لله ما كسرها

الله وياه لان راح بطريقه
وكل الذكريات تعدي وتهون
اني الكاتلتني اخر دقيقة
لحد الان ما مستوعب الصار
احس روحي بمسلسل مو حقيقة
بس منتظره منا للمنية
ولو كل ما اكبر يصعب علية
زين اني بشبابي وهيج تعبان
اذا اكبر بعد شيصير بية ؟

ساكت مثل اليرسمون
الموقف هيج خلاني
شفتك يمه واحد غازل الثتني
وما ادري ضحكت انت ضحك هو
الاتذكره بچيت اني
وطولك من صغر بالممشى بچاني
وراك امشي على كيفي
دم المصوب بس تندار تلگاني
ومثل الحارس النعسان
ردت واحد يجي مچاني
اليغرگ واليطلعله هدومهم الثنين
مابيهن الماي الشفته برداني
ولو ما گلبي ؟ ما اجيتك
بلم شايلة جثة ، بكيفه وداني
الوجع شضا العظام وكلشي ماخله
واني وچفي حرنا شلون نوصله
لو هو چبير نمشيله
لو كتال نندله !
وداع عيونه هدني وداعة عيونه
ودرب الرجعة شيكمله ؟
ومشكلته بعد اليوصل السكران
بعد غصبا عليه كل ثكله يتحمله
مرات التضمه من التگوله احلى
وصدك مرات البيت الينشطب
احلى من الي تكمله
بحرگك دمعك المضموم
اكثر من الي تنزله
انا الكسرتني هاي البچية الگبالك
اثاري اليبچي ما يرتاح ، مو الا
وچانت طلعتي من البيت
عكس الرجعة مو سهلة
رجعت مثل الاسير اسأل
متيه بيتنا البانيه
ضياعيش على بيتك واحد تسأله ؟
المسافة شوية من الباب للغرفة
ومشيت هواي !
چانت ظلمة چفك گوه تندله
بيا شمعة كرامة تضوي ع الذلة ؟
وصح صوت الاكسرهن چان عالي هواي
بس صوت الـ انكسرن بية چان اعلى
مثل ما بالغراض يطيح المحروگ
السويته بغرفتي من فتت مثله
چانت صورتك يم راسي بس اليوم
نيشان وعلية بعيد تتخلى
وكت خلاني وجهك گوه اباوعله
هذا الچنت ارسمه
وچنت راسلمه !
بعيد الخوف عني چنت أأشرله
ردت امشي گلت بس لا
هالتايه كسر گلبي
ما اوصفله ، اروح وياه
اليرجع بارد يخوف
اليرجع خايف احسنله

هـلي گلولي لا تقرين
ذكرهم يورث النسيان
وقريت اسماء مقبرة
النجف مرتين
كلها وما نسيت فلان

لا سفرة شمس واتناها يمتى تموت
ولا تگضي بدمع واعبرها واتعدا

لو ادري تحب تموت كلشي بي روح
چا ضيعت روحي ويا المچاتيل

وانا مشمر وانت طفلة تقلد امها
وابد ماعرفت تلفه
النوب شدتني برجلها وبية تسحل
شمس هجرك تحرگ بروحي
صريفة معلگ عليها حصير
وانا سعفة وملختني جفوف جناية حمام
تريد مني عشوش اصير
اخ كون اكدر اوخرك
وانت منقوش على لب عيوني ذني
اخ كون الگالي غيرك
حتى لو فانوس بالظلمة واگصده
واگعد بصفه ونغني
اخ كون اكدر افرط روحي بيدي
وبيدي الگط كلشي يوجع وانسى وني
التفت علية النوايب
لفة لفاف الجنازة
لهثة وعيوني روازين وعجاجة وانت عازة
وانا چني طوير تايه
بين جنحانه گزازه

من باب كسرت حاجز المستحى
امريني حتى اصرخلج تدللي
خلگي اطول من الليل اليمر عليّ
يم حاجب اطول منهن تمندلي
وتمايلي بممشاچ مثل السعف
بس يمي ، يم الوادم تعدلي
سود الشرايع بيج يتبيضن
كثرت بروحي الظلمة ، شمس اجبلي
كليلي "چا" والهور اسحله واجي
او "لعد" گولي واني اگلج بلي

جاءَ تشرينُ، إنَّ وجهَكِ أحلى بكثيرٍ
ما سرَّهُ تشرينُ؟
جاءَ تشرينُ، يا حبيبةَ عُمري،
أحسنُ وقتٍ للهوى تشرينُ.

الله لا ينطيچ
مدري الله كريم
گلبي مكسور من اجيتج حتى اطيب
يعني مو بطران اجيت
ومو غشيم !
ولمن طيبتيه
كسرتي من جديد !
يابه لو عايفته ع الكسر القديم

جاي ادفع ثمن اشياء
مو اني المسويهة
وجاي احظى بمشاعر خوف
متتعده ، واعديها
جاي اظلمني واني انسان
يكره عيشة الظالم
تايه جاي اخلص الليل
باجي وباجي ، ما حالم
انه الكاسرلي ظهري جروح
مو مني واداويها