انا نغشيت بيك وجان عندي اسباب
عيونك هاي مو مالت بشر جذاب
اذا ينجاب طاريك اصير بخير
جا شيصير اذا تنجاب ؟
طلعنا ثنينا ومحد طلع حسه
مثل الخذوا صورة و بيهه ملتمين
بذيج اللحظة كلمن باوع لنفسه
انا كلش صعب لمن احب انسان
لان لمن احب كلش صعب انسى
اذا انته ورحت شيسوي غيرك جاي ؟
كلي شغيرك هسه
اخر فتره ساکت لان حجيي هواي
على الكتمان هم تتعود الخرسه
وشينسيني وجهك ذاك
انا تمنيتك بيوم النويت انساك
ولان كايلي روح وسوي اليفيدك
بقيت وياك ..!
لحد اليوم ما متخطي ذاك اليوم.
رجعت لبيتنا وليهسه كلبي هناك

كافي شبيك تضحك لليجرحونك ؟
كافي تضل حنين ويستغلونك
من عثروا فرشتلهم عيونك گاع
ولمن طحت محد گلك شلونك
كافي
الطيبة اذا زادت سذاجة تصير
انت الوصلت دمعتك لمتونك
غالي وحاط روحك وسط ناس رخاص
طبعا ما يثمنونك !

مو وكت الحرب صدگوني ياناس
بعدني لهسه ماجامع مهرها
بعدني لهسه جاي اتمنى الي تصير
بعدني لهسه مامشتم عطرها
چانت وین من چنت اطلب الموت
حربكم هاية لازم يرسا برها
شني كل حلمي عود يدفنة صاروخ ؟
شني ما ننجمع واظفر شعرها
وكفوها الحرب واستهدو بالله
هاي افكاركم چفونا شرها

وشنو عيون الغزال عيونك احلى
چنهن بلم يمشي بنهر دجلة
لا والمشكلة مادري يا لون
تضربهن شمس ويصيرن احلى
اني اعرف الدولة حدود واعلام
اول مرة اشوف عيون دولة

ماتنهي الزعل تكبيرة العيد ؟

هي شامة
وعدها شامة
والربيع تجيبه گوه
تگعده من هودج منامه
وتجني منه الورد الاحمر
وتاخذه تصوغه ابتسامة
الليل لو رادت تودعه
وتحدي شمعتها بظلامه
يتعب المراية مشطها
ويكضي صبره
ويصعد لتل الشعر
لحگ السلامة
وهي لو بالعيد طلعت
يضحك العيد على روحه
وبالشتا يصير الدخول
وينشگ الطليع هامه
وهي حلوة
وچنها مهرة
وعابرة الشط وبشهامة
چنها مهرة
رچابها يغني لرسنها
وتامة وفوگ التمامة
ولف سرجها بضوه حزامه
وهي واحة
كلها ماي وكلها راحة
وگمرة ويا الصبح عدها
وما نفرزن
ضي گمرها من صباحه
وهي حلوة
وتامة وفوگ التمامة !

وكل عام
وتبقى انت الملاذ الأمن
واني الخلص عمري على عينك صافن
انت المجرة
وكل الكواكب بالكون
تدور حولك وانت وحدك ساكن
ماخذ صدارة گلبي انت بكلشي
بصف الكريات الحمر من تمشي

ماتَجين
هذا عيد الله اجه
والناس لمت كل شملهة
وانتِ شملج مدري وين

أنت من كالولك تبيع ارتخيت
واني اذا ساموك كدامي اختنك
أنت ماعفت الذبحني من الوريد
وأني لاجلك عفت أبو عيون الزرگ

من تبچي السما
وينزل مطرها دموع
خدود الگاع بهداي يتلگنها
چنت احزن لحزنك
وانگلب عاشور
وروحك بس على احزاني ضحك سنها

انتي مو بس وحدة حلوة
انتي مدري شلون اوصفج
ليش ما جيتي من الاول؟
هسة شفت الدنيا حلوة
جنت ما عايشها گبلج
واني ما عايشها لاحد
اني عايش حتى احبج

شوصفها الـ بصدره شامة ؟ تينه ؟
حضنته وما يهمني شامتينه
شفت بالخصر ذني شامتينه
وصلتهن والحرام استقر بية

ولگيت فيّ وعطر
عند الشعرها فرگ
بس مالگيت الوفه !
والله عشگنا عشگ

انتي عذبه شلون دجلة
ويمج تحوم النوارس
والله لو كلها بجمالج
ما يضل ليل الله دامس
الناس حلاها لبسها
وانتي حليتي الملابس .

وداعة عيونج الاعزها
يومية اكتب رسالة وما ادزها

حيرة هاي العشرة حيرة
ضعت يمك
شعرة ملفوفة بظفيرة
والچبيرة ؟
عاجبك غيري ورضيت
وصرت تحجيلي عليه
وگتلك احجيلي عليّة
وما حجيت
واني مرجوحة قديمة
وبمحرم
لا مشيت ولا بقيت
واگف الموس بلهاتي
وطلع من عيني الكلام
تمددت فوگ السيوف
وطاحت بعيني السهام
وانت بطران وتگلي
ليش ماتكدر تنام ؟
بالله گلي شلون انام ؟

بس كوليلي يبنية شنو معرسة ؟
حرت هذا جمالچ لو رسم نفسه ؟
شني الاسود عليج لخاطر الاسلام
يالمحليته هذا اعلان لل لبسة ؟
الله يساعد الـ بالمنطقة يشوفوج
تجمديهم سفينة ونزلت المرسى
هذا التجي عيونه بعينج تشلي
منيته وجابته على عيونج الشرسة
من يصفن عليج يتيه المطلوب
يجي يحاچيچ بس عیونچ تخرسه
اذا اريد بجمالج وحدة ادور وين ؟
ما الكة بجمالج حتى بالنمسا

امس بالليل
مدري منين
مهرة مسودنة وتركض
نست حافرها بصفاحي
امس
مامش عظم بالروح ضل صاحي

شمالني وما كمت احس
وحتى يومي لهسة ما بادي من امس
هاي اول مرة غرگني حنيني
انا يمك بس ضعت ما ادري ويني
أشتدت الصدمة علية
وبمكان اخر لقاء البال چتفته بأيديا
كلشي يخنگني احسه
وراسي متروس بصفك جنح الخفافيش من المسه
يا ضوى الـ بالباب روح الليلة خرسة
ويا نجم ضم روحك بنص غيمة سودة
ويا نخل ضم الگمر بس ع موده
چنها هل مره صدك ما بيها عودة
شلون اعبرك يالصبح ؟
وان افز من نومي بس حتى ارد اشوفك
هسه افز من نومي ركضه على الجرح
ضمني بين احشاء جثة من الحزن
تنهش براسي الطيور
وشكو ليش الدنيا سوت من اون
انا مخذول
المشاعر والله ما بيها أنجماد
انا اذا تحچيني هسه
هويه وتمر برماد
ما تلمني شما بعد بيه احتويت
انا بين اچفوفك اذكر وانتهيت
وعيني بعيونك لمن رحت وعفتني
هلكثر عندك رخيص ؟
حتى لو حالوب واكع من سما
هم چا شلتني

الْوَيْلُ وَاللَّيْلُ وَالدُّنْيَا كُلُّهَا تَعْرِفُنِي
أَنَا الْعِرَاقُ، يَوْمَ الثَّأْرِ لَا أَمِيلُ وَلَا أَرْحَمُ