هي حلوة
واني اسمر وجهي حارگته الشمس
هي لؤلؤ بالمتاحف
كاتبين عليها ممنوع اللمس
انا صوتي شكد خشن فززله ميت
وهي صوت العندليب
من الصبح تهمس همس
اني طالب
مدري احير بخدها افكر
مدري احيرن بالدرس
من تطب للقاعة ؟ ارجف
هاي عود اني الشرس

هسة اصعب صارت الدنيا علية
الوعي مُتعب !
جنت اكره اي شخص جذاب طبعه
وگمت اچذب !
اليغلط بحقلي اتركه
بسرعة من دائرتي يطلع
وهي تنحل اذا اعتب
بس گمت ما اعرف اعتب

اني مو ثقيت بيك
و ع الجرف كتلك بكيفك
وين ما تبحر وراك
ليش خليت السفينة بكيف موج البحر تمشي
وهذا يا قارب خذاك ؟
مشتريك بروحي اني
الماخذك بيش اشتراك ؟
شكد جنت عندي ثقة بيك واحبك
والله هسة بگدها شاك !

فرعون وحرملة
والچذب القرآن
والطگ امه الفجر
وايتام ظل يكتل
يزيد وابن ملجم
والشمر وابليس
اذا دخلوا الجنة
انت ما تدخل !

معناها انتهت والراح خل يروح
معناها انتهينة وفضت العشرة
اعرفك ما ترد بس ما طبكت الباب
مثل ميت عزيزة يعود ينتظرة
سهل من تبتعد بس صعب
تلكة انسان شايل طيبتي ويهواك عل فطرة
باجر من ترد ماتلكة شي موجود
تلكى الورد ذابل والارض صحره

اجرع المر مستعد
بس الحچيته علي لو اموت ماجرعه
شكد بية غصة وعتب
وهنانه كل الحجي عارض بزردومي
ومو طبعي اشكي لبشر
انه من اطب لصحن ماسولف همومي
بس انه بية الغلط
ياخي وصلتك لمرحلة تختارلي هدومي

رجعتني للشعور الچنت ما اتمنى اعيده
حسستني مالي داعي
من جوابك كلمة صار
واني كاتبلك جريدة

فارگني بس بأدب
لا تحچي يمهم علي
وتحرف الواقع !
من التقينا ترى
من حضن امي الك
ما جيت من الشارع

لا تحاججني بوعد بي ما وفيت
انت هم واعدني تبقالي ورحت
بيش راجع حتى اقنع روحي بيك
ولو ملت من كثر ما قنعت

مو گتلي اوخر الحزن عنك
واترسك فرح ؟
شو وخرت عني ؟
تذكر بالاول لمن گتلك تريد الصدك
خايف تمل مني
ظنيت ، وانت سبع !
ما خيب ظني
امنيتي ما استحي
چا هسة اسمعك حجي
يخليك تبچي تجي
مو تعتذر مني !
مصدوم بيك وابد ما اكدر اجرعها ..

الامراض الخبيثة تحاول تتطيب
چا هاي الخباثة العندج منين ؟
تكلي منين غيرك نحبل نجيب
وحبلت هسة صاروا عدها طفلين

ليش الحنين ويا ما فاد ؟
ردة وكلامه وياي شو حاد ؟
گوة اكدر اقراله مراسيل
وانشمر من حروفه ليغاد
يا بلوة الملچوم بلوة
والزاد يوصل حلگي گوه
كلش ثگيل البية سوه
الحدر ضلعي عافه يتلوة
قصرت بيمن شنهو سويت ؟
ويضيگ بية هلگد البيت
اكل بروحي هواي ظليت
كل هذا چي گمت انا حبيت
انا شحلاتي تعوفني تراب ؟!
كون ادري والعباس ما حاب

انه الچنت الم اهلي واضحكهم
وانه المنعزل هسة
واكثر كلمة جاي اسمعها هالايام
تحمل تكبر وتنسى

چنك ميل ساعة وما الك رفگة
كل واحد بدربك واگف تشبگه
وروحك روح جاهل ، صح بريء هواي
لكن ما تميز چذبه من صدگه

تفهم ، متفهم ، مو مهم
بس ردت تعرف ذني
تك عين اباوع للبشر
وانت من اباوعلك جنت
عينين ميكفني !

انت وينك ؟
فكلي ايدينك
هذا اني
انت نفس الموت
فد تتشابهون !
ثنينكم محد خذاني

عشت فرحة الجندي الفكو اصفاده
وبقه معصبة عيونه وصبعه بزناده
ومن گلوله نفذ لا انفذ بيك
رمه ، ومن فتح عينه مكتل اولاده !

انت من القهر مابيك حتى تنام
واهلك عبالهم مرتاح چي تسهر
لا تكدر تكمل عيشتك تعبان
وتكول انتحر ؟ بس صعبة ماتكدر
مو زين وعشت ليهسة ؟ كلش زين
حايط بيتكم مو مثلك مفطر
يلتمن على عيونك رعب بالليل
كل الدنيا تلتم وانت تتطشر
وبكد ما اكو براسك ونين وصوت
تحس البيت كله براسك تفجر
السواد الجوه عينك هذا اجاك منين ؟
لا تسألني ، بس چان ابيض الدفتر

دضيعوني بعد !
هو اني بية شضال ؟
من بطن النساوة شماخذه الشامة
اليستفتح بظهره السوط والجلاد
بعد يا عمر هذا الخايف اوهامه ؟
غير الينحكم من يصعدونه اعدام
يحضرله اليخسره ، اليعض ببهامه
بس الـ مو عزيز وللحبل ينگاد
يا غربة عيونه بساعة اعدامه !

رحتي سكتة بليلة متروسة ونين
قاسي گلبج واني مو قاسي حنين
بعت كل ناسي علمودج حتى اجيج
كلبي رادج واشتراج !
وانتي بعتي المشتريج

اني تغيرت
مو بيدي مجبور
شفت گلوبهم محد هواني
چنت اتمنى واحد يسأل شبيك
والله لوحدي ظليت اعاني
الي بگلبه حجي وينام مكسور
من يگعد يصير انسان ثاني !