Samarqand viloyati delegatsiyasi AQShda

Shu kunlarda AQSHda bo‘lib turgan viloyat hokimi Adiz Boboyev boshchiligidagi delegatsiya Missuri shtatidagi Tadbirkorlar klubiga aʼzo bo‘lgan “Sangita Capital Partners” hamda ushbu tashkilot bilan hamkorlikda ishlovchi qator kompaniyalar vakillari bilan uchrashuv o‘tkazdi.

Muloqot davomida kompaniya rahbari Anthony Sansone asosiy faoliyat yo‘nalishlari, aktivlar va investitsiya portfellarini samarali boshqarish, shuningdek, biznesni strategik rivojlantirish jarayonlarini qo‘llab-quvvatlash borasidagi faoliyati haqida gapirdi.

Uchrashuvda Adiz Boboyev Samarqandda xorijiy investorlar uchun yaratilgan qulay shart-sharoitlar, olib borilayotgan islohotlar hamda mavjud investitsiyaviy imkoniyatlar, istiqbolli yo‘nalishlar haqida maʼlumotlar berdi.

Muzokaralar yakunida tomonlar investitsiyalarni faol jalb qilish, qo‘shma loyihalarni ilgari surish va uzoq muddatli hamkorlikni yo‘lga qo‘yish yuzasidan dastlabki kelishuvlarga erishdilar.

✅@Zarnews_uz