#ورد_القرآن
#أذكار_الصباح
#أذكارك_حصنك_الحصين
لاتنسوا الدعاء لـ إخواننا في أهل غزه والسودان

"كلّ ما يؤلم النُّفوس، ويشقّ عليها؛ فإنه كفّارةٌ للذنوب"

- ابن رجب الحنبلي

وإن ألجم الحزن شفتيك..
فإن ربك يسمع تمتمات قلبك المكلوم
" إن ربي لسميع الدعاء "💛

لما تجيبي واحده تنظفلك الشقة..
خليكي رحيمة بيها واكرميها واتعاملي معها بلطف..
اوعي تقسي عليها أو تهينيها..
اديها كوباية عصير تبل ريقها.. ثمرة فاكهة.. ومتنسيش تفطريها أو تغديها اوعي تمشيها جعانة..
ارحمي ضعفها ومتتقليش عليها بزيادة.. هو اه شغل بس مش انتقام..
الأعمال الشاقة أوي أطلبي اتنين يجوا يساعدوا بعض أو اقفي انت ساعديها..
لكن مش معقولة الفلوس اللي هتديهالها تروح تتعالج بيها بعد ما تنزل من عندك..
ربنا رحم امرأة زانية لمجرد انها رحمت الكلب وشربته مايه.. فمابالك لما ترحمي بشر من لحم ودم زيك بالظبط..

#رسايل

قصة كليم الله7️⃣
وفي يوم الزينة ...
كان الموعد المتفق عليه لأكبر مناظرة بين موسى عليه السلام وسحرة فرعون
واجتمع الناس من كل مكان عشان يشوفوا مين اللي هينتصر
طبعا الساحر ده كائن وصولي فالسحرة حبوا يستغلوا الموقف وقالوا لفرعون:
يعني لو انتصرنا هيبقى لينا ايه؟؟!!
فرعون قالهم ليكم المناصب والفلوس والوجاهة ..بس نخلص من الورطة اللي احنا فيها😄
أما سيدنا موسى أول ماشاف السحرة قالهم أوعوا تفتروا على ربنا الكذب وخوّفهم من عقاب الله
السحرة أول ماسمعوا الكلام ده اترددوا وبعدين جمعوا نفسهم وقالوا:
مين هيلقي سحره الأول احنا ولا انت؟؟!!
سيدنا موسى قالهم : ألقوا إنتم الاول
وبالفعل رمى السحرة العصيان بتاعتهم وبقت بسبب تخييلهم وسحرهم لعيون الناس تعابين
سيدنا موسى حس بالخوف لما شاف المنظر بس ربنا طمنه وقاله :
"لا تَخَفْ إِنَّكَ أَنْتَ الْأَعْلَى وَأَلْقِ مَا فِي يَمِينِكَ تَلْقَفْ مَا صَنَعُوا"
يعني ارمي العصاية وهتبتلع كل اللي انت شايفه قدامك
وهو ده اللي حصل بالفعل..
سيدنا موسى رمى العصاية اتحولت لثعبان كبير جدااا بلع كل الحيات بتاعة السحرة
السحرة شافوا اللي حصل وفي ردفعل تلقائي من غير أي ترتيب
نزلوا كلهم يسجدوا ويقولوا ده مش سحر آمنا برب هارون وموسى
فرعون شاف المنظر اتجنن وقال :
مستحييييل يكون ده حقيقي ، أكيد متفقين عليا
أكيد ده الكبير بتاعكم اللي معلمكم السحر مع انه متربي في بيته وبعدها كان بره مصر🤭
وفضل فرعون يتوعد للسحرة:هقتلكم وهصلبكم على الشجر وهعذبكم
لكن السحرة كانوا اخدوا قرار نهائي وقالوا اعمل اللي تعمله احنا ثابتين على ديننا
"رَبَّنَا أَفْرِغْ عَلَيْنَا صَبْرًا وَتَوَفَّنَا مُسْلِمِيْنَ"
طبعا فرعون مش هيسكت ..
ايه اللي هيحصل بعد كده ؟؟!!!
يتبع ...،،،

#قصة_موسى
#كليم_الله
#رسايل

المهاجرين والبداية من الصفر 🤏
الصحابة المهاجرين لما دخلوا المدينة كانوا في مرحلة الصفر..
لأن مكة كانت فيها أموالهم وتجارتهم وبيوتهم وأملاكم وحتى أهلهم.. وهم طبعاً تركوا كل ده وطلعوا من مكة بطولهم..
يعملوا إيه ؟ يستسلموا؟ يعيطوا على اللبن المسكوب؟ لا..
أومال عملوا ايه؟ بدأوا من الصفر..
طلبوا من إخوانهم الأنصار يعرفوهم أماكن الأسواق ونزلوا يبحثوا ويصنعوا فرص عمل وكسب جديدة في بلد جديدة..
ممكن اللي كان شغال في مكة تاجر كبير له إسم بقى في المدينة بائع صغير على أده.. واللي كان رائد أعمال بقى عامل.. واللي كان في بقه معلقة ذهب بقى ماشي حافي..
مكنش عندهم مشكلة ينزلوا كل الطبقات الاجتماعية دي فجأة.. وتخلوا عن كل أساسيات الحياة العادية مش بس الرفاهية..
كل واحد فيهم غير عقليته وتأقلم سريعاً مع نمط الحياة الجديدة في المجتمع الجديد..
انت كمان.. مهما خسرت في تجارتك.. سقطت في كليتك.. مجبتش المجموع اللي كنت بتحلم بيه.. اترفدت من وظيفتك.. فشلت في علاقة زواج او خطوبة.. فقدت كل أهلك وأحبابك..
متستسلمش.. ابدأ من الصفر.. اتقفل في وشك باب رزق افتح بداله ألف باب..
والشغل مش عيب مهما كان طالما شغلانة شريفة..
وماهي إلا سنوات معدودة وأصبح المهاجرين رواد في المنطقة كلها..

#فوائد_من_الهجرة
#رسايل_الهجرة1446هـ

💕 يا بني..

من غير مقدمات كثيرة أنا عارف إن حواليك ضوضاء شديدة وزحمة كبيرة وإنك زي السلعة والجميع بيحاول أن يخرج منك بأي مكسب!!..

عارف كويس حجم المغريات اللي حواليك.. وأرى أبواب الفتن والمغريات مفتحة وعلى كل باب مندوب مبيعات شاطر في مجاله بيحاول يزين لك الدخول في طريقه:

أغاني ومهرجانات

مواقع إباحية

علاقات محرمة

فيب وتدخين

عربيات وسفر

لبس و سهر

سوء خلق

كل دي ضغوط كبيرة وحقيقية..

لكن مع كل ده عارف أيضا إن من لجأ لله حماه.. يحميه من نفسه ومن شيطانه وهواه ومن المفسدين ومن المغريات والشهوات والمحرمات..

عارف إن زي ما فيه خطوات علشان الإنسان يبا فاسد غير صالح وفاشل.. كمان فيه خطوات إنك تكون محترم وخلوق ومتدين وناجح..

عارف إن كل واحد مسئول عن قراراته وخطواته واللي هايمشي في طريق هايشوف نتايجه..

والدك ووالدتك نفسهم تكون أحسن وأسعد وانجح واحد في الدنيا.. ممكن يحاولوا يخلوك كدا لكن بطريقة مش صح قوي.. بس نيتهم تشفع لهم..

انت مش صغير فكر واختار وتحمل نتيحة اختيارك..

اللهم ألهم أولاد المسلمين رشدهم🤲

- نادر السقا

#رسايل

ثم...
يا بني! ليس أضرُّ ذنبك أوّله ولا آخره ، ولا دِقَّه أو جِلَّه .. وإنما مَقتلك عند أول ذنب لم تتوجع له نفسك ، ولم يستوحش منه قلبك ؛ بل ألِفه واعتاده ، ولم تجد فيه تلك الكسرة التي تحملك على التوبة.

يا بني لو أحسنّا التفتيش في أيامنا لاستخرجنا ذنوبًا كثيرة ، وقد صارت من عادات الحياة ، فما عادت تنتبه لحرمتها القلوب.

يا بني : إنما أضرُّ ذنبك عليك = ما خدَّرك.

- منقول
#رسايل

هل يُعقل إن الدين يكون عمل تشريع لدخول الخلاء.. لكن جعل مسألة تعليم الحجاب للصغيرات اجتهاد شخصي وحرية؟!
مش معقول أكيد..
قال النبي ﷺ: "مروا أولادكم بالصلاة لسبع.."
زي ما الصلاة محتاجة تعليم وتعويد وتدريب.. كذلك الحجاب والستر..
سن سبع سنوات سن مناسب جدا لتدريب البنات ع الحجاب والملابس الساتره..
كتير من البيوت المتدينة والمحافظة بتظن ان طول ما البنت صغيرة تلبس مكشوف وضيق وقصير وع الموضة.. وأول ما تحيض أو تبلغ هوب مرة واحدة إلبسي حجاب وكذا وكذا..الموضوع فعلا بيبقى صعب ع البنت ..
وأوقات كتير عدم التهيئة بيسبب رفض من البنت ويضطر الأهل يجبروها فتتوتر العلاقة ويحصل نفور من البنت تجاه التدين وأهله..
زي بالظبط طفل لم يتعود ع الصلاة وأول اما بلغ بقى مطلوب منه يصلي ٥ فروض بالإجبار..
طيب ما احنا في غنى عن المشاكل دي كلها ونسهل الأمر على بناتنا وأولادنا وعلى أنفسنا كمربين..
نساعدهم على الخروج الآمن من مرحلة الطفولة والانتقال لمرحلة البلوغ والتكليف بسلاسة ومرونة ..

جزء كبير من أزمة التبرج والسفور هتتحل لو الأهالي انتبهوا لتعويد البنات على الحجاب الشرعي من الصغر..

#رسايل

#ورد_القرآن
#أذكار_الصباح
#أذكارك_حصنك_الحصين
لاتنسوا الدعاء لـ إخواننا في أهل غزه والسودان

‏إن مُحمَّدًا له في القلبِ حُبًا؛
فَـ صلّوا عليه كي يزيد الحُبّ حبًا ﷺ ♥ ‎
اللهم صل وسلم وبارك على سيدنا محمد ❤️

#ورد_القرآن
#أذكار_الصباح
#أذكارك_حصنك_الحصين
لاتنسوا الدعاء لـ إخواننا في أهل غزه والسودان

قصة كليم الله8️⃣
بعد ظهور معجزة سيدنا موسى وتأكد نبوته قدام الناس جميعا
بدأ فرعون يعذب السحرة اللي آمنوا ويعذب بني إسرائيل عشان الكل يخاف يؤمن
ولكن وصل الإيمان جوه قصر فرعون وآمنت زوجة فرعون نفسها وربنا جعلها قدوة لأي حد بيعتذر بالأسباب اللي مانعاه انك مش هتلاقي أصعب من جوه قصر فرعون
وآمنت كمان ماشطة بنت فرعون (هيرستايلست يعني😅)
طبعا فرعون عذبهم وقتلهم لكنهم انتصروا في النهاية الحقيقية ببيوت ومكانة عظيمة في الجنة على صبرهم ده

في الوقت ده ...
ربنا بعت لفرعون وقومه آيات تانية غير اللي شافوها مع سيدنا موسى
فسلط عليهم مرة المطر الغزير اللي أهلك كل الثمار عندهم
ولما شافوا ده بيحصل راحو يجروا على سيدنا موسى ادع لنا ربك لو كشف عنا العذاب ده هنؤمن
سيدنا موسى يدعي ربنا فيصرف عنهم العذاب فيرجعوا تاني لطغيانهم ويقولوا أصلا عادي🙃
كان ده دايما بيحصل مع آباءنا ومالهاش علاقة بموسى
فربنا يسلط عليهم جراد ياكل كل الزروع وسوس يدخل للحبوب والغلة اللي سايبنها وحشرات تيجي في شعرهم
فيروحوا لسيدنا موسى ويتكرر نفس الموقف
فيسلط عليهم الضفادع تدخل في كل أكلهم وشربهم ويحكى ان بس اللي يفتح بوقه كانت تدخل فيه الضفادع
ويكرروا تااااني ومايتعظوش
فربنا يحول كل المياه اللي يشرب منها اللي على دين فرعون لدم
لكن اللي اتبع سيدنا موسى يشربها مياه صافية نقية
آيااااات كتييير كتيييير لكن مااتعظوش
وكل مرة كانوا يروحوا لسيدنا موسى ويدعيلهم ربنا فيصرف عنهم وبرضو العمى ملا قلوبهم
ساعتها سيدنا موسى رفع إيده ودعا عليهم:
"رَبَّنَآ إِنَّكَ ءَاتَيْتَ فِرْعَوْنَ وَمَلَأَهُۥ زِينَةً وَأَمْوَٰلًا فِى ٱلْحَيَوٰةِ ٱلدُّنْيَا رَبَّنَا لِيُضِلُّواْ عَن سَبِيلِكَ ۖ رَبَّنَا ٱطْمِسْ عَلَىٰٓ أَمْوَٰلِهِمْ وَٱشْدُدْ عَلَىٰ قُلُوبِهِمْ فَلَا يُؤْمِنُواْ حَتَّىٰ يَرَوُاْ ٱلْعَذَابَ ٱلْأَلِيمَ"
وأجيبت دعوة سيدنا موسى اللي كان سيدنا هارون بيأمن عليها معاه🤲
وأصبح العذاب مسألة وقت بقى
هيحصل امتى وازاي ؟؟!!!
يتبع ...،،،

#قصة_موسى
#كليم_الله
#رسايل

دايما عود نفسك إنك تكون على وضوء خصوصا وانت نازل الشغل أو مشوار ممكن يطول ، لأن كتير بيكسل عن الصلاة في وقتها بسبب انه مابيكونش متوضي ..

"فلا تبرَحوا مَكانكُم "

وصية النبيﷺ للصحابة يوم غزوة أحد لما قالهم أوعوا تسيبوا مكانكم ده تحت أي ظرف..انتم صمام أمان
"فلا تبرحوا مكانكم "
نفس الوصية دي بقولها لكل واحدة اتقالها كلام يضايقها على حجابها ،اتقالها مش هتتجوزي ولا مش هتلاقي شغل
بقولك ..
اوعي تسيبي حجابك ،اوعي تحسي انك ضعيفة أو وحيدة ،اوعي تضعفي بسبب أي كلام تسمعيه
على فكرة ربنا قال للنبي ﷺ
"وَإِن تُطِعْ أَكْثَرَ مَن فِي الْأَرْضِ يُضِلُّوكَ عَن سَبِيلِ اللَّهِ ۚ"....يعني مش معنى انهم كتير يبقى هم صح بالعكس ده الطبيعي أصلا ان اللي بيعملوا الغلط هم الكتير
أما الصح فطبيعي انه قليل زي ماربنا قال "إِلَّا الَّذِينَ آمَنُوا وَعَمِلُوا الصَّالِحَاتِ وَقَلِيلٌ مَّا هُمْ ۗ"

لكل محجبة بقولك ..."لا تبرحي مكانك "
اوعي تسيبي مكانك تحت أي ظرف اوعي تخلعي حجابك أو نقابك،اوعي تقولي أكيد مش كل دووووول غلط ...لا هم غلط
فاثبتي فإنك على الحق💪

#كاريكاتير_رسايل

كل ترند بيطلع جديد بيأكد لنا إن 👇🏻

الصمت و حفظ اللسان من الخوض في سيرة الناس و الحكم عليهم = نعمة كبيرة جدًا يوفق الله لها من يشاء.

تعرف أطراف المشكلة شخصياً = لا
شوفت الأحداث كلها و التفاصيل الظاهرة و ما وراء الكواليس = لا
طيب كنت عايش معاهم = لا
طيب اتأكدت بنفسك مين صادق و مين كاذب = لا

و بعد كل اللاء دي بردو خوضت و اتكلمت = آه

ما سلككم في سقر ؟! وكنا نخوض مع الخائضين 💔
كيف يبيع الناس أجسادهم لچهنم بكلمة في عرض إنسان ؟!

الكلام في عرض الناس و في سمعتهم بقي أسهل و أرخص حاجة.

لذلك 👇🏻
"ألا إن سلعة الله غالية ، ألا إن سلعة الله الچنة" 🍀

امسك عليك لسانك ، و انشغل بنفسك و دينك ، والله ما في حرف بتنطقه إلا و يُكتب.

- منقول

#رسايل

بلغوا عني ولو آية