س/ هو عاشوراء المفروض نفرح فيه بنجاة سيدنا موسى ونصومه شكر لله على النعمة دي
ولا ....نحزن فيه ونعمله مأتم زي ماالشيعة بيعملوا لان في اليوم ده اتقتل الحسين ابن بنت رسول الله ؟؟
........................
ج/
_مبدأيا عندنا حديث صحيح النبيﷺ بيشجعنا فيه على صيام يوم عاشوراء وكمان اننا نصوم اليوم اللي قبله عشان نخالف اليهو_د وقالنا ((نحن أولى بموسى منهم ))
غير كمان إن أجر صيام اليوم ده مش زي أي يوم ..ففي الحديث الصحيح "صِيَامُ يَوْمِ عَاشُورَاءَ أَحْتَسِبُ عَلَى اللَّهِ أَنْ يُكَفِّرَ السَّنَةَ الَّتِي قَبْلَهُ "..
كل الأحاديث دي تعرفنا فضل اليوم ده مهما كان اللي حصل فيه فلازم نطبق هدي النبيﷺ ونصومه

_اما فكرة اننا نعمله مأتم زي الشيعة مابيعملوا ...فهل ده حاجة وردت عن النبيﷺ ؟؟
رغم انه توفي في عهده كل أولاده هل عمل مأتم لحد فيهم ؟؟
قتل في حياته عمه حمزة واتمثل بجثته من الكفار وحزن النبيﷺ على وفاته جدااااا لكن هل اتخذ يوم وفاته مأتم ؟؟
قتل في حياته ابن عمه جعفر بن أبي طالب ...هل سمعتوا عن مأتم عمله النبيﷺ لابن عمه ؟؟
كل دول من آل بيت النبيﷺ اللي ماتوا في حياته ومنهم اللي اتمثل بجثته والنبي ﷺ حزن عليهم جداااا لكن مااقامش يوم للطم الخدود وشق الجيوب من الحزن عليهم
بالعكس ده نهى عن كده في وقت نزول المصيبة ...فطبيعي في ذكرى المصيبة هيكون النهي أشد

🚫الخلاصة ..
احنا بنتحرك بوحي مش بمزاجنا
وحي قالنا مطلوب في عاشوراء صيام وشكر على ان نجى الله موسى
ونهانا عن أي لطم للخدود او شق للجيوب في كل وقت ومنها طبعا يوم عاشوراء
فالمطلوب مننا ...
نمشي على طريق الوحي وبس 👍

#عاشوراء #رسايل
#رسايل_عاشوراء1446هـ

الإثنين إن شاء الله تاسوعاء والثلاثاء عاشوراء لازم نصومهم ياجماعة عشان أجرهم الكبير ..
ولازم نعّرف الدنيا كلها عشان كل اللي يصوم يكون في ميزانك ويُكتب لك أجر صيامه

هنصوم ليه ؟؟!!

1️⃣ هنصوم عاشوراء لأن صيام يوم عاشوراء يُكفر ذنوب السنة اللي فاتت ..
يعني كل المعاصي والذنوب اللي عملتها السنة اللي فاتت تتمسح بصيام ١٦ ساعة بس ‼

2️⃣ هنصوم تاسوعاء لأن دي كانت وصية النبيﷺ وأمنيته اللي مالحقش يحققها لانه مات ....((لئِنْ بَقِيتُ إلى قابِلٍ، لأَصومَنَّ اليومَ التاسِعَ))...انت بقى حقق امنيته ووصيته🧡

3️⃣ هنصوم عاشوراء ولاء لسيدنا موسى وحب ليه وفرح بنجاته من فرعون وجنوده ...

في اليوم ده ربنا شق البحر الأحمر لسيدنا موسى عليه السلام وقومه، وجعل نفس البحر هلاك وعذاب لفرعون وجنوده اللي طغوا في البلاد
وهو وحده القادر على نجاتك من كل مهلك
وهو وحده القادر ان ينجيك من كل همومك
انت بس ...ارجعله بالتوبة وتوكل بقلبك عليه زي ماسيدنا موسى عمل ....و ساعتها بس هتكون نجاتك👌

#عاشوراء #عاشوراء
#رسايل_عاشوراء1446هـ

قصة كليم الله 3️⃣
كبر سيدنا موسى في بيت عدوه وهو اللي رباه بنفسه
بس طبعا سيدنا موسى كان من بني إسر$ائيل اللي كانوا مستضعفين وكان القبط بستعبدوهم
القبط دول هم الطبقة العليا في الوقت ده واللي كان بيطلع منهم الوزراء وأصحاب المناصب
لكن وجود سيدنا موسى في قصر فرعون كان مخليه ليه قدر عالي حتى لو مش من القبط
وفي يوم من الأيام سيدنا موسى يلاقي اتنين بيتخانقوا
واحد من بني إسرا$ئيل اللي هم أهله وجماعته الأصلية والتاني من القبط أصحاب الدرجة الأولى في البلد
وبعد استغاثات الراجل ده
سيدنا موسى حاول يبعد الراجل اللي من القبط فلكمه بايده👊
لكن كان سيدنا موسى قوي وكانت اللكمة دي كفيلة إنه تقتل الراجل ده
تاني يوم نفس الراجل اللي من بني إسر$ائيل بيتخانق مع واحد تاني من القبط وبيستغيث بسيدنا موسى
سيدنا موسى قاله لا كده إنت اللي غوي مبين يعني كتير المشاكل وشديد الضلال
وساعتها الإسرائيلي ده افتكر إنه هيقتله وقاله إنت عاوز تقتلني زي ماقتلت الراجل امبارح
سمع الكلام ده الراجل اللي من القبط وطار الخبر في المدينة إن موسى قتل واحد من القبط
وكان سيدنا موسى خايف ومترقب ياترى إيه اللي هيحصل بعد الحادثة دي؟؟!!
يتبع....،،،

#قصة_موسى
#كليم_الله
#رسايل

((نحن أولى بموسى منهم ))
أيوة ..احنا المسلمين أولى بموسى عليه السلام من اللي بدلوا وحرفوا في دينه ..
احنا أولى بحب موسى عليه السلام والفرح بنجاته من اليهو_د
وكمان احنا المسلمين أولى بعيسى عليه السلام من النصارى اللي جعلوه إله أو ابن اله
وكذلك احنا المسلمين أولى بإبراهيم عليه السلام من كل طائفة بتنسب نفسها ليه

ليه احنا أولى بيهم ؟؟؟
لأننا بنؤمن بكل الأنبياء ونحبهم ونعظمهم وفي ديننا اللي يكفر بنبي واحد يبقى كفر بكل الأنبياء مش زي اللي بيزعموا انهم اتباع موسى عليه السلام ويسبوا أنبياء تانية
ولا زي اللي بيزعموا انهم اتباع عيسى عليه السلام فيكفروا بمحمدﷺ

_في عاشوراء ....بنجدد معاني الحب لسيدنا موسى عليه السلام وبنفرح بنجاته وبنجاة المؤمنين
_بنفرح بالأنبياء الفرحة اللي النبيﷺ قالنا عليها مش احنا اللي بنقرر نفرح ونحتفل ازاي
مش احنا اللي نقرر نحتفل بالكريسماس ونقول أصله ميلاد سيدنا عيسى ❌
ولا بالمولد النبوي ونقول أصله مولد سيدنا محمد ﷺ واحنا قررنا نحتفل كدة ❎
نفرح ونحتفل صح بس زي ما النبيﷺ عمل بالظبط
والنبيﷺ فرح بيوم مولده بصيام كل اثنين يبقى نعمل كده ✅
وفرح بيوم عاشوراء بصيامه ...فمطلووووب اننا نصووووم يوم عاشوراء اللي هو يوم الثلاثاء القادم ✅

#رسايل_عاشوراء1446هـ
#عاشوراء
#رسايل

مش عاوزه تهاجري ؟؟!!
بجد والله ..ايه رايك تهاجري بس مش لأمريكا وكندا
تهاجري لربنا.. تسيبي الحاجة اللي ماترضيش ربنا وتاخدي أجر المهاجر ؟؟!!
ايه رأيك تتحجبي وتكوني زي المهاجرين
ايه رأيك تسيبي اللبس الضيق أو القصير وتلاقي في ميزانك أجر الهجرة
النبي بيقولنا:
"والمُهَاجِرُ مَن هَجَرَ ما نَهَى اللَّهُ عنْه"
يعني كل ماتسيبي حاجة ماترضيش ربنا ...تبقي إنتي كده مهاجرة
حتى لو هتبقي وحيدة في وسط اصحابك لما تعملي كده
خدي الخطوة وخدي مش بس أجر المهاجر
لا ..كمان خدي أجر 50شهيد من الصحابة بثباتك وصبرك
زي ماالنبي بشرك وقالنا
"إنّ مِنْ ورائِكُم زمانُ صبرٍ ، لِلْمُتَمَسِّكِ فيه أجرُ خمسينَ شهيدًا منكم"

#رسايل_الهجرة1446هـ
#كاريكاتير_رسايل

#ورد_القرآن
#أذكار_الصباح
#أذكارك_حصنك_الحصين
لاتنسوا الدعاء لـ إخواننا في أهل غزه والسودان

#قصة_الهجرة [ 5 ]

النهاية السعيدة 💙
وأخيرااأاااا....وصل رسول الله ﷺ وابوبكر إلى المدينة اللي كان أهلها بيخرجوا كل يوم ينتظروا النبيﷺ من ساعة ماعرفوا إنه في طريقه ليهم
وفي اليوم ده ....
خرجوا فعلا في انتظاره لحد مااشتد حر الشمس عليهم فرجعوا ، لكن ومع أول خطوات النبيﷺ في المدينة شافه واحد من اليهو-د اللي نادى بأعلى صوووت "يا معاشر العرب، هذا جدكم الذي تنتظرون"
وأخيرااااا..اللقاء المرتقب لقاء الأحبة ❤
خرجت المدينة كلها في استقبال الحبيب اللي وصلهم بعد شوووق ، الكل طمعان في نظرة أو كلمة من رسول الله ﷺ
لقاء الأحبة ده بيهيج أشواقنا إلى اللقاء المرتقب التاني اللي هيكون على حوضهﷺ وإما أن تشرب من حوضه شربة هنيئة لا ظمأ بعدها لأنك مشيت على هديه بالظبط
أو تكون من اللي يتقالهم سحقا سحقا لمن بدل....ودول اللي مامشوش على طريقته ...فاختار لقاءك من دلوقتي
وبعد اللقاء التاريخي ده ...
بنى النبيﷺ مسجد قباء ثم المسجد النبوي
وبقت المدينة مقر لدعوة الإسلام ودعا لها النبيﷺ بقوله "اللهم حبب إلينا المدينة كحبنا مكة أو أشد"
وأخيرااااا ...بقى للمسلمين دولة قدرت تقف في وش أعدائها وتنتصر وتغير مجرى التاريخ
النهاية ...،

#رسايل_الهجرة1446هـ

يوم عاشوراء 💙
اليوم اللي هلك فيه أكبر طاغية عرفته البشرية ..الطاغية اللي كان بيقول ((أنا ربكم الأعلى ))
وكانت نهايته ...((بشوية مياه ))
متخيل كل الطغيان ده في الآخر ((شوية مياه )) يخلصوا عليه
عشان نتعلم احنا كمان مانحسبهاش بالأسباب بس ..
لكن دايما نتوكل على الله ونصبر ونعرف ان ربنا مش هيضيعنا أبدًا
_لكل واحد بيحبط لما يشوف أهل الباطل بيطغوا ويزودوا في طغيانهم ....شوفت فرعون كان نهايته ايه !!
_لكل واحد فكر انه يلجأ للحرام سواء ربا ولا رشوة ...عشان المصاريف زادت ومش عارف يعيش منين ....انت كده بتحسبها غلط❌
المطلوب منك تاخد بالأسباب الحلال اللي ربنا شرعها ...وتتوكل على الله وحده زي سيدنا موسى ماواجه البحر قدامه وفرعون من وراه بيقين ((كلا ان معي ربي ))💪
_لكل بنت فكرت تخلع حجابها ..عشان حاسه انها غريبة لوحدها ...قولي لنفسك ..((كلا إن معي ربي ))

خليكم واثقين ان ربنا مش هيضيعكم وان قدرته سبحانه فوق كل الاسباب وتوكلوا عليه بصدق ....ساعتها بس هيحصل الفرج❤

#رسايل_عاشوراء1446هـ
#عاشوراء #رسايل

‏يظل مشهد غرق فرعون عالقا في الأذهان
محفورا في جبين التاريخ ..
مسطرا في كتاب الله ..
لنعلم أن الباطل مهما انتفش ورغي وأزبد
ضعيف ..
كشجرة خبيثة اجتثت من فوق الأرض ..
ولكن الله يمهل ..
وأن الحق مهما خبا نوره وخفت ..
باق مستمر حتما سينتصر ..
كشجرة طيبة أصلها ثابت وفرعها في السماء ..

- د.رامي النحراوي

#عاشوراء #رسايل
#رسايل_عاشوراء1446هـ

﴿ فأسرِ بعبادي ليلًا إنكم متّبعون ﴾..

"‏في مثل هذه الليلة؛ خرج موسى بقوم خائفين ضُعفاء خارجين بنفسية ((إنا لمدركون ))

وفي الصباح.. تغير العالم ! وانشق البحر بنفسية ((كلا إن معي ربي ))

ثق بالله وتوكل عليه ...وماتنساش ...
بكرة صيام #عاشوراء 💜

اللهم كما أنجيت موسى من فرعون.. نجِّ غزة وأهلها من بطش اليhود..
اللهم كما أهلكت فرعون أهلك اليhود..

#ورد_القرآن
#أذكار_الصباح
#أذكارك_حصنك_الحصين
لاتنسوا الدعاء لـ إخواننا في أهل غزه والسودان

‏" من أبلغ ما قيل في الحُبِّ :

‏"إني أخافُ أن يمسَّكَ عذابٌ من الرَّحمن"
‏فالحبُّ أن تخافَ على من تُحب
من النار ..🥺

‏كُنْ على يقين :
‏من لا يهتمُّ بآخرتك
‏لا يهتمُّ بك ..❗☝️

قصة كليم الله4️⃣
في الوقت اللي كان فيه سيدنا موسى خايف ومترقب اللي هيحصل بعد خبر قتله للقبطي ...
جاله راجل من آخر المدينة بيجري ومعاه الخبر اليقين
قاله إن فرعون وجنوده في حالة استنفار تام عشان يقتلوك ولازم تخرج من مصر حالا
سيدنا موسى خرج من مصر مش عارف يروح فين عمره ماخرج منها
فضل يمشي ويبعد ولازالت عمليات البحث عنه جارية
وبعد مدة ربنا يعلمها وصل سيدنا موسى لمكان اسمه مدين
وهناك ...
لقى مجموعة من الناس بيسقوا غنمهم لكن كان فيه بنتين بيبعدوا غنمهم عن الناس
سيدنا موسى صاحب المرؤة سألهم عن سبب إنهم حاجزين أغنامهم عن الناس وكان الرد
إنهم ضعاف وأبوهم شيخ كبير في السن فبينتظروا الناس تمشي عشان أغنامهم تشرب
وكان رد الفعل الفوري من كليم الله إنه أخد أغنامهم وسقاها وسابهم
وراح تحت شجرة يرتاح من تعب المشي ومن تعب قلة الأكل
ورفع إيديه للسماء وقال: "رب إني لما أنزلت إلي من خير فقير" يارب محتاجك
وصل البنتين لأبوهم وحكوا له اللي حصل فبعت واحدة منهم لسيدنا موسى تقوله إنه عاوز يحاسبه على المعروف اللي عمله معاهم
وبالفعل ..
سيدنا موسى راح والشيخ الكبير ده طمنه وقاله إنك هنا في مدين بره مكان سيطرة الناس اللي انت خايف منهم
وعرض عليه إنه يتجوز واحدة من بناته بس يشتغل هو أجير لمدة 8 أو 10 سنوات وده مهرها
وافق سيدنا موسى على العرض ع طول
وفي نفس الليلة اللي رفع ايديه للسماء وهو جعان وخايف وتعبان وبيقول يارب فقير لخيرك
في نفس الليلة بات مطمن شبعان وكمان متجوز وعنده شغل
كل ده بكرم الكريم سبحانه
لكن لسه ماخلصتش قصته ...هيحصل ايه بعد كده؟؟!!
يتبع....،،،،

#قصة_موسى
#كليم_الله
#رسايل

#حقيقة_التوكل إن معي ربي سيهدين

"كَلَّا ۖ إِنَّ مَعِيَ رَبِّي"
قولها لنفسك لما تقولك هتسيب الشغل اللي فلوسه حرام وتصرف منين ؟؟!!
رددها على قلبك لما يقولك هتعيش ازاي من غير الفوايد الربوية
او هتتصرف ازاي من غير القرض الربوي ؟؟!!
لما يقولك لازم تبيع سجاير عشان تشتغل
ولازم تركبي ضوافر اكليريك اصل ده اللي شغال دلوقتي
قولوا لنفسكم....لا
"كَلَّا ۖ إِنَّ مَعِيَ رَبِّي"
معايا ربي فمش هيضيعني لما أسيب الحرام
حتى لو عدت عليا لحظات فيها كرب ..
واثقين في إن ربنا مش هيضيع اللي لجأ ليه وساب الحرام
وأهم عوض ليك هي الجنة خد بالك
مش لازم يكون العوض فلوس كتير ..لا
بس ربنا هيعينك ع ابتلائك وقادر يشق لك طريق رزق واسع جديد
زي ماشق لسيدنا موسى البحر
بس حتى لو ده ماحصلش في الدنيا خليك واثق إن عوضه ليك جاي جاي
لو مش في الدنيا يبقى في الجنة اللي حياتها ونعيمها مش بيخلصوا

#كاريكاتير_رسايل
#رسايل_عاشوراء1446هـ
#رسايل #عاشوراء

#ورد_القرآن
#أذكار_الصباح
#أذكارك_حصنك_الحصين
لاتنسوا الدعاء لـ إخواننا في أهل غزه والسودان