Бугун Тошкентда “Одил судловни амалга оширишнинг долзарб масалалари” мавзусидаги Судьялар миллий конференцияси ўз ишини бошлади

Олий суд, АҚШ Халқаро тараққиёт агентлиги (USAID) ҳамда “East-West Management Institute” (EWMI) нодавлат нотижорат ташкилотининг Ўзбекистондаги филиалининг “Суд тизимини мустаҳкамлаш” (JSSA) қўшма лойиҳаси билан ҳамкорликда ташкил этилган ушбу икки кунлик анжуманда Олий суд, Судьялар олий кенгаши ва Судьялар олий мактабининг вакиллари, Қорақалпоғистон Республикаси, вилоятлар ва Тошкент шаҳрининг барча судларидан юздан зиёд судьялар иштирок этмоқда.

Тадбирнинг очилиш маросимида сўзга чиққан Олий суд раиси Бахтиёр Исломов, USAIDнинг Ўзбекистондаги Миссияси раҳбари Дэвид Хоффман, Судьялар олий кенгаши раисининг ўринбосари Алишер Жалилов ва JSSA лойиҳаси раҳбари, EWMIнинг Ўзбекистондаги филиали директори, судья Соня Простран бу каби конференцияларнинг ўтказилиши одил судловни амалга оширишнинг долзарб масалаларини ҳамда амалиётда юзага келаётган муаммоларни кенг муҳокама қилиш учун яхши имконият ва қулай майдон эканлигини таъкидладилар.

Қайд этилганидек, замонавий дунёда мамлакатнинг ривожи – жамиятда айнан қонун ва адолат устуворлиги таъминланиши, мустақил ва адолатли суд мавжудлиги билан ўлчанади.

“Биз судьялар ва барча суд ходимлари катта жамоа – муҳим ҳамжамият сифатида давлатимизнинг ривожи ва юксалиши учун ўз ҳиссамизни қўшишимиз керак. Бу эса бизнинг адолатли, қонуний ва асосли қарорларимиз орқали ифодаланади. Агар ҳар қандай қонунбузилиши ёки адолатсизлик юзасидан ўз вақтида ва тўғри муносабат билдирсак, давлат органлари ҳамда мансабдор шахсларни қонун асосида ишлашга ўргатиш орқали фуқаролар ҳуқуқларини ҳимоя қилишга эришамиз. Бундай имкониятдан кенг фойдалансак, айнан шу, мамлакат ривожига ҳиссамиз бўлади”, - деди Б. Исломов.

Шу билан бирга Олий суд раиси: “Бугунги кунда, суд тизимини мутлақо янги босқичга олиб чиқиш, фуқароларнинг судга мурожаат қилиш имкониятларини янада кенгайтириш мақсадида муҳим чора-тадбирлар амалга оширилмоқда. Мазкур ислоҳотлардан кўзланган асосий мақсадлар – судьяларнинг масъулиятини ошириш, ишларнинг сифатли ва ўз вақтида кўрилиши таъминлаш, суд қарорларини қайта кўришда вилоят судларининг имкониятларидан самарали фойдаланиш, фуқароларнинг шикоят қилиш имкониятларини кенгайтириш, муаммоларини жойида ҳал қилиш ва ортиқча сарсонгарчиликларга йўл қўймасликдир. Шундай экан, ушбу ўзгаришларни мазмун-моҳиятини чуқур англаган ҳолда, уларни ҳаётга татбиқ этиш учун сиз-у биз ҳозиргидан-да кўпроқ ғайрат ва шижоат билан меҳнат қилишимиз лозим”, - дея таъкидлади.

Бугунги кун мобайнида анжуман иштирокчилари бир неча тегишли сессиялар доирасида маъмурий, фуқаролик, жиноят ва иқтисодий судларда одил судловни амалга оширишнинг долзарб масалалари юзасидан ўзаро тажриба алмашиб, мавжуд муаммо ва вазифаларни атрофлича муҳокама қилдилар.

Жумладан, судьялар суд қарорларининг қонунийлиги, асослилиги ва адолатлилигини текшириш институти такомиллаштирилиши муносабати билан процессуал қонунчиликка киритилган ўзгартириш ва қўшимчалар мазмун-моҳияти, судларда конституциявий нормаларни тўғридан-тўғри қўллаш амалиёти ҳамда судлар амалиётида гендер дискриминацияси ва зўравонликнинг олдини олиш бўйича ҳалқаро стандартларни жорий қилиш каби масалалар юзасидан фикр-мулоҳаза юритдилар.

Конференциянинг эртанги кун тартибидан суд корпуси вакилларига судларда ахборот-коммуникация технологияларини жорий этишга бағишланган асосий тадбирларнинг тақдимоти, электрон суд ишларини юритиш имкониятларидан фойдаланган ҳолда одил судлов самарадорлигини ошириш бўйича кейинги қадамлар тўғрисида маълумот берилиши ўрин олган.

Иштирокчилар судьянинг маънавияти, одоби ва масъулияти юзасидан ҳам фикр алмашадилар.

Telegram | Facebook | Instagram | Youtube | Медиабанк

Президент Шавкат Мирзиёевнинг “Навоий кон-металлургия комбинати” акциядорлик жамияти ва “Навоийуран” давлат корхонаси жамоаларига табриги

Telegram | Facebook | Instagram | Youtube | Медиабанк