الأيام اللي أنت عايزها تمر دي عمرك ، النوم اللي بتجري عليه عشان اليوم يخلص ده حياتك ، الساعات اللي بتعدي ما بترجعش ، الوقت اللي بتقضيه وأنت بتتأمل في السقف الأولى إنك تستمتع بيه ، الحاجات اللي عمال تأجلها ومكسل تتحركلها ممكن وقتها يفوت وماتلحقش تنفذها ، عيد ميلادك اللي بتعمله count down ده هيزودك سنة وهياخد من شبابك.. اعمل اللي انت عاوزه دلوقتي متأجلش.

عايز تشوف حقيقة الناس اللي حواليك بجد ، أقع ، إتعب ، إبعد ، شوف كام واحد هياخد باله من وقوعك وهيحس بتعبك وهيلاحظ بعدك ، وقتها بس هتعرف حقيقة شعور كل حد حواليك ، هتشوف وشوش الناس على حقيقتها ، الناس بتبان وشوشها الحقيقية في البعد و الزعل والخصام ، سيبك من اللي يفضل يقولك أنا بحبك ومليش غيرك والرغي ده كله !!

كل ده كلام فاضي ، هتعرف أصل كل واحد أما تحطه تحت ضغط معين ، أما تعتمد عليه ويخذلك ، وقتها بس هتعرف كل إنسان على حقيقته ، وعلى قد ما هتتعب من معرفة الحقيقة دي على قد ما هتكون مبسوط إن ربنا بعد الناس دي عنك.

Accept him/her for what they are..

إزاي أي علاقة بين اتنين بتنتهي؟
لما بتحب حد بتحبه عشان اللي هو بيعمله، هو طيب، جدع، حنين، بس مواعيده مش مظبوطة، أول يوم هي بتعمل فيه مشكلة عشان مواعيده بيبقى أول يوم لنهاية العلاقة، هي دمها خفيف، مثقفة، قعدتها ما يتشبعش منها، بس ما بتعرفش تتأخر عن صحباتها لما واحدة فيهم تطلب منها حاجة، أول يوم هيخيرها بين أنها تروح معاه أو تروح لواحدة صاحبتها محتاجة حاجة هيبقى أول يوم في نهاية العلاقة.

أحنا بننبهر ببعض في البدايات عشان اللي بنعمله لبعض مش عشان اللي ما بنعملوش، واليوم اللي بنسيب فيه كل حاجة اللي قدامنا بيعملها عشان يحاول يسعدنا ونحاسبه أنت ليه ماعملتش كده بيبقى بداية النهاية، اليوم اللي بتبقى كل حاجة حلوة في اللي قدامنا واللي حبناها عشانه ما بقتش كفاية، حتى لو حاولت ترضي اللي قدامك وتيجي على نفسك، هتستحمل يوم، شهر، سنة، عشر سنين، وهيجي يوم مش هتقدر.

Because you can't be better, you can't do more, because that's what you are.

وبعد نهاية العلاقة مش هتندم على حاجة على قد ما هتندم على الحاجات اللي جيت على نفسك فيها، واللي يفهمك أنك لو بتحب حد هتحاول تعمله أي حاجة يبقى ما بيفهمش حاجة، هو حبك ف الأول عشان اللي أنت بتعمله، وأفتكر دايما أن الحب هيفضل to accept him/her for what they are

عايز أقول إن في الأول وفي الآخر محدش عارف ولا مُدرك كمية المحاولات اللي بتحاولها مع نفسك طول اليوم عشان بس تعديه ولا حد عارف عن زقك للأحداث عشان تعدي
وإن تركيزك ف تفاصيلها بيتعبك أكتر ويبوظ كل حاجة عدتها بصعوبة وخدت من وقتك وطاقتك اللي باقي منها.

أكبر مشكلة بتواجه الشخص الكتوم اللي مابيحكيش إن الناس بتتعامل معاه على إن حياته ساكنة خالية من المشاكل والمشاحنات وكأنه بعيد عن الضغوط وبيتمتع بسلام داخلي مع نسبة برود وقال مش داري بالنزاعات اللي حواليه يعني وقادر يستقبل الناس ويتقبل كل كلامهم وسخافتهم في أي وقت.

الناس اللي بتقعد مع نفسها كتير هما أكتر ناس القعدة معاهم مريحة .. الناس الشجاعة اللي مابتهربش من نفسها ، ولا بتملى يومها بمليون حاجة مالهاش لزمة ، و تقابل ده و ده عشان يملوا وقت و بس ، هما أكتر ناس فاهمين نفسهم ، متصالحين معاها ، عارفين هما عاوزين أيه وواضحين في اللي عاوزينه و عمرهم ما بيلفوا ويدوروا.

فيه ناس بتكلم نفسها بصوت عالي ، و بيكتبوا أسئلة مش تقليدية لنفسهم ويجاوبوها ، بيقعدوا لوحدهم بالساعات مش لأنهم انطوائيين ولا سوشيوفوبيك ، لكن عشان حبوا يقفوا على أرضية ثابتة و يرتبوا الزحمة اللي جواهم قبل ما يتعاملوا مع زحمة العالم الفوضوي اللي حواليهم.

لو مش عارف تبقى منهم حاول على الأقل تتعرف عليهم و تطول القعدة معاهم ، مهما كانوا صادمين في وضوحهم أو مبادئهم و مختلفين عنك ، هتشوف فيهم جمال هادي مش هتملك معاه إلا انك تحبهم.

إحنا حياتنا حلوة أوي والله ورزق ربنا مغرقنا مغرقنا بزيادة بس إحنا بناخد بالنا من الفسفوسة اللي مش معانا ونعملها مصدر سعادة ومش بنقدَّر اللي معانا

أسوأ إحساس ممكن توصله لإنسان قريب منك هو الاستهانة بزعله، بإنك تكرر نفس الأخطاء والتصرفات اللي أنت عارف إنها بتجرحه، مفيش أسوأ من إنك تخلي إنسان يحس إنه مالوش قيمة عندك بعد ما كان يظن نفسه غالي، إحنا مبنخسرش علاقاتنا عادة بمشاكل كبيرة حاسمة، بس بنخسرها بتراكم الخيبات.

لو ركزنا في أغلب المشاكل النفسية هنلاقي ان تمركز الانسان حول ذاته عامل مهم في المشاكل دي ..
واحد حياته اتدمرت عشان حس للحظة انه تم استبداله !
واحدة حياتها انهارت عشان مرت بمشاعر الرفض !
واحد محبوس في حالة إكتئاب عشان أتصد في المدرسة او الكلية او اجتماع شغل او لحظة مهمة في حياته !
واحدة حصلها عقدة نفسية عشان تم تهميشها و اهمالها في علاقة عاطفية !
و حالات تانية كتير من نفس الفكرة...

لا ده عادي جداً ، بيحصل و هيحصل !
عادي جداً تترفض في المقابلة او يتقل من تعبك .
عادي جداً يتقال لك "سوري مش بفكر فيك " او "انتي زي اختي".
عادي جداً جداً يتقال لك " لأ " و بكل وضوح و صراحة من غير تذويق او اعتبار لتأثير ال " لأ " دي عليك او على نفسيتك.

هي دي الدنيا و لو كل مرة الانسان اتوتر و اتشنج عشان الـ ego بتاعه اتجرح ! يبقى لسه عيل صغير وهيفضل في سلاسل لامنتاهية من البهدلة و التشنجات و الاوهام الوردية.
فمفيش اي الزام كوني على اي حد انه يبص لنا بشكل مميز او خاص.. فبعيد عن الصراعات و القناعات و التخيلات و الحاجات الكتيرة اللي جوانا.. بعيد عن كل المشاعر و الادراكات العميقة اللي عايشة فينا .. بعيد عن جوهرنا و معرفتنا الحقيقة بنفسنا .. احنا مجرد اجسام مادية بتشكل جزء من الفراغ.
فتكيف مع الحقيقة دي بمزاجك ، بدل ما العالم هيكيفك عليها غصب عنك .

انك تقابل حد شبهك.. وشبهه تفكيرك وعقلك.. وميوله للاشياء اللى بتحبها قريب منك.. انك تقابل شخص فاهمك وقادر يستوعبك.. بيفهمك من غير ما ترهق نفسك.. دى كلها مقدمات فى الحُب.. لان الحب حلو مفيش كلام ولا خلاف عليه.

- لكن اعلى درجات الحب هى إن الشخص اللي أنت مرتبط بيه، يخليك تحب نفسك، مش إنك تحبه هو وبس.

يخليك تتقبل نفسك بكل حاجة فيك، من كتر ماهو متقبلك وبيحبك كدا زي ما أنت.

إنه يزود ثقتك بنفسك، إنه دايماً يدفعك لقدام ويساعدك تكوّن أحسن نسخة من نفسك.

انه يخليك فخور وعارف قيمتك كويس.. اللى زعلك عنده لو حصل ما يبقاش عادى ابداً..ده اسمهُ حب.. غير كدا ابعد وعيد حساباتك من جديد.

الأسوأ من المشكلة، عدم الإحساس بيها، والتماشي مع الوضع القائم مع تفادي أي تغيرات جديدة قد تُحدث الأفضل أو الأسوء، وتعيط

‏فيه ناس فاهمة ان الحب اهم حاجة في العلاقة ودي فكرة غلط تماماً ، الأهم هو الأمان والراحة انك تطمن انك مش هيتغدر بيك وانك هتنام وتصحى والشخص اللي بتحبه هيفضل معاك زي ماهو وميتغيرش عليك ولا يقلب عليك ، ده بالدنيا وما فيها.

أعتقد إن معيار اللطف الحقيقي في أي علاقة أياً كانت إيه هي، إنك تُحسِن للشخص اللي بتحبه وهو مش كويس، وهو سخيف وكل حاجة في الدنيا تقيلة على قلبه، إنك تصبر على كلامه السخيف وقتها، ومتاخدش الموضوع عِند وكرامة في وقت ميتحملش الكِبر المُتبادل، الحِنيّة مبتبانش في وقت الصفا وكل حاجة ماشية تمام، الشخص الليّن فعلًا مش اصطناعًا هو اللي بيطبطب على قلب اللي بيحبه في وقت غضبه، ويسمع منه حتى وهو عارف إن مضمون الكلام غلط، الحساب والعتاب بعدين، ده وقت ميتحملش نقف لبعض. معتقدش إن فيه سلوك ألطف من كده ممكن يحسس الإنسان بالحب.

هي المشكلة ان دوامة جلد الذات اللي انت عايش فيها مش هتقف ، خلاط الافكار اللي شغال ليل نهار زي السكاكين في دماغك بيقول لك " لو كنت عملت كذا كان هيبقي احسن " او "ازاي يحصل معاك انت كدا ؟" بردو مش هيبطل ، حالة الشلل المعنوي اللي انت عايشه مش هيتغيير ، كل الحاجات اللي ساحبه من عمرك و طاقتك مش هتهدى لمجرد انك عاوزها تهدى و خلاص !
فيه جملة عظيمة بتقول..
forgive yourself for not knowing what you didn't know before you learned it .

تسامح نفسك على كل الحاجات اللي عملتها و مكنتش راضي عنها ، على كل القرارات اللي خدتها بعد تفكير و بردو مطلعتش صح ، كل العلاقات اللي داخلتها بكل قلبك و كيانك لكن مكلمتش زي ما انت عايز ، سامح نفسك على اي حاجة عملتها قبل ما تعرف عنها كل اللي اتعلمته ، و اللي بالمناسبة عمرك ما كنت هتعرف او تتعلم من غير ما تعملها.

فانت خلاص مش حتعرف ترجع الزمن لورا و لا تمنع موقف خلاص اتاخد ، بس علي الاقل غير نظرتك للماضي ، متفضلش تقاوم حقيقته و تنكر علي نفسك حتميه تقبله..

بص لنفسك دلوقتي ، انت مش زي قبل كدا، انت بقي عندك مخزون يحترم من الخبرة ، دفعت تمنه غالي اوي من مشاعرك و احلامك ، بس التمن ده انت اشتريت بيه مناعه و مصل لاي سموم تانية جايه لقدام ، اشتريت بيه ادراك واعي قادر يميز لك كل الحاجات التافهه اللي كانت ممكن تضيع من وقتك و تستهلك من روحك قبل كدا ..اشتريت بيه النضوج ، و ما ادراك دا غالي قد ايه .

‏مافيش إنسان يستاهل إنه يكون كل اللي بيربطك بيه هو مجرد إحساس بالشفقه او إنه هيزعل او حياته هتبوظ من غيرك، لان الناس تستاهل يا تتحب فعلاً يا لأ، بشكل قاطع ومحسوم. ف إنك تبقى مع حد ومش عايز تسيبه عشان شعور بالشفقه وشايف إن ده كرم اخلاق منك يبقى انت كده شخص مؤذي حقيقي ، ‏البقاء لشعور بمسئوليه او شفقه ده شيء بشع، مش بس ليك لكن للشخص اللي قدامك بشكل اكبر، لإن انت عايش معاه فعلاً وبتشاركه بس لا بتحس ب اي حاجه ولا مبسوط وهو بيبقى فاكر إن انت مبسوط او حاسس وانت ف عالم تاني اصلاً ، ‏حقيقي ده خداع مهما بررته إنه شعور بالمسئوليه او إنسانيه.. لإن كل إنسان مهما كان يستاهل يتحب لذاته فسيبهم للي يحبهم وهيتعبوا شوية من غيرك لحد مايتأقلموا بس هيكون أفضل ليهم من الخداع اللي هتعيشهم فيه.

- الناس مش هتشوفك شخص لذيذ ولطيف وبسيط وواضح الا لما تحكيلهم تفاصيل شخصية عنك وعن حياتك والا احتمال تكون شخص معقد ، رخم ، غامض ، مغرور ، بخيل ، ولما تبدأ تحكى وتحكى هيسمعوا وتتحول لشخص لطيف وبسيط وبعدين هيزهقوا فتتحول تانى لشخص رغاى وأى صفات تانية وحشة.

يعنى ما ينفعش تكون ساكت لو معندكش كلام ، وما ينفعش تكون رغاى لو جواك كتير !

مش معنى انك اتخطيت مشكلة ما ونجحت فى انك تتكيف مع نتايجها انك هتتعامل على الأساس ده.. لو سكت هيتفهم انك بائس حزين ويتبصلك بشفقة ولو اتكلمت وحكيت عن اللى مريت بيه ببساطة من غير وجع من غير تقمص لدور الضحية هيتشاف برضو انك بارد أو يا عينى مصدوم وفى حالة انكار!

كل واحد بيشرح المشكلة من وجهة نظره بطريقته.. يتغاضى عن أحداث ويبروز غيرها.. بيكون عنده حق وهو الضحية والمظلوم وغيره الظالم.. يعنى كلنا ضحايا وكلنا جناة!

الواحد أحياناً بسبب كلمة حلوة ممكن يصدّدق إن الدنيا فعلاً حلوة، بسبب قعدة رايقة مع ناس بيحبهم ممكن ينسى كل المشاكل اللي غرقان فيها، بسبب كلمة تشجيع ممكن يجي على نفسه ويكمل برغم إنه كان خلاص مش لاقي نفس زيادة، بسبب نصيحة صادقة ممكن مسار حياته يختلف، بسبب نظرة تقدير ممكن يثق في نفسه من جديد .. محدش يستهون أو يبخل بكلمة حلوة أو تشجيع، أو نظرة تقدير أو حتى سؤال عن الحال .. كلنا عندنا فترات صعبة، وكلنا محتاجين اللي يعمل معانا كدا بـصِدق من فترة للتانية.

أصعب خُسارة مُمكن يتعرض لها الراجل إنّه يخسر ست بتحبّه بجد، وللأسف إحنا على ما بنُدرك دا بيكون فات الأوان ومهما حاولنا نصلّح غلطتنا ما بنعرفش، لإن وقتها الطرف التاني ما بيسمحش بأي فُرصة.. والست عمومًا لما بتقرر تقفل الباب بتقفله فعلًا لإنها بتبقى قدمت كُل الفُرص وكُل التضحيات المُمكنة وإحنا كُنا مُغفلين وراهنّا على ضعفها وإنها مش هتقدر تبعد مهما حصل، وأكبر غلطة مُمكن يرتكبها الإنسان إنّه يراهن على وجود شخص ويشوف إنّه مهما قصر في حقه برضو هيفضل موجود، ودا غباء مننا للأسف!

متبنیش تعافيك الذاتي من تجربة معينة مريت بيها في حياتك و إتأذيت منها إن الشخص دا يجي يعتذرلك، لأ كمل ، لإن الشخص اللي ممكن يكون أذاك دا خلق لنفسه مبررات و فضل يقنع بيها نفسه " و بمساعدة الناس اللي حواليه اللي هما اساساً شبهه تماماً " لغاية ما المبررات دي بقت حاجز بينه وبين انه يشوف حقیقه نفسه و خلاص صدق انه هو اللي مظلوم..

حلو أوي انك تكون عارف قيمتك ، بلاش تتعشم أوي إنك مهم وواخد مكان كبير في قلب حد لدرجة إن يومه هيقف من غيرك ، ماتبنيش لنفسك أوهام إنك مؤثر في حياة حد ، ماتحطش نفسك في خانات فارغة وإنت مفكر إنها مليانة بحبهم وتقديرهم ليك ، هما بيحبوك وبتحبهم بس لو غيبت يوم إثنين هيتأثروا وبعدين هيتعودوا على غيابك زي ما كانوا متعودين على وجودك بالظبط، شخص واحد هو اللي هيتأثر بغيابك من كل اللي تعرفهم هو ده الشخص اللي في الغالب هيكون بيحبك بالمعنى الحرفي للكلمة ويومه مش هيكمل غير بوجودك، هو ده اللي يستحق لو غيبت عن الدنيا كلها ماتغيبش عنه ، ولو الشخص ده مش موجود فتأكد إنك شخص وحيد بالمعنى الحرفي للكلمة ، ف إعرف قيمتك وماتتعشمش ، لأن نهايته إنت شخص غير مهم في حياة حد ف خليك دايما متصالح مع نفسك وعندك الإيمان التام إنك لو غيبت عن أي حد مع الوقت هيتعود وهيعيش حياته عادي وبلاش العشم والثقة الفارغة عشان ماتتصدمش، كل اللي بدورك تعمله إنك تنقي قلبك وتتمنى للكل حياة سعيدة ، إن كانوا لسه جنبك أو بعدوا عنك ، إن كانوا فاهمينك وحاسين سبب غيابك أو مش فارق معاهم وناسيينك ، إن كانوا لسه حاضنينك بكلامهم أو حتى السلام إنقطع منهم.

‏للأسف في اشخاص بتحطنا تحت مسمى "وقت الفراغ" وقت مايكونوا مش لاقيين حد حواليهم يرجعولنا وعشان هبلنا بنصدق وبنرجع ولما حياتهم ترجعلهم ينسونا ويرجعوا تاني يفتكرونا وللأسف احنا اللي غلطانين مش هما ، ‏أحنا اللي دايماً بنسامح وبنسكت عشان *بنحب* عشان قلبنا بيحن لناس قلبهم عمره ما حن لينا في الوقت اللي كنا فيه مكسورين بسببهم لأنهم سابونا لوحدنا حسسونا إن احنا مجرد وقت في حياتهم ، ‏وفي عز ما أحنا بدأنا ننساهم يرجعوا بكلمة *محتاجك معايا* فنرجع تاني ونقف جنبهم مع إننا عارفين ان مسيرهم يمشوا من تاني لكن من جوانا أحنا احسن منهم لأن عمرنا ما اتخلينا عن حد احتاجنا حتى لو كان اللي احتاجنا كسرنا في يوم ، ‏بنحاول في كل مرة نقسى على نفسنا ونكسر اللي جوانا بنفسنا عشان مايجيش حد يكسرنا وبتفضل جوانا نقطه بيضه بتخلينا نرجع من تاني، نقطه أسمها مابعرفش اكره حد بحبه واسيبه وقت احتياج لأنه مش من طبعي.