لما بتحس إن في حاجة غلط بيكون فعلاً في حاجة غلط، لما بتحس إن اللي قدامك بيكدب وانت مش مصدقه يبقى فعلاً بيكدب، لما بتحس إن حد متغير من ناحيتك مهما بررلك بيكون فعلاً متغير ، كل لحظة قلبك مابيبقاش مرتاح فيها بيبقى وراها حاجة أنت ماتعرفهاش بس حاسس بيها..

"مفيش أصدق من احساس قلبك مهما لفيت و دورت"

شخص واحد بس ممكن يسعدك و يعوضك عن أى حاجه إنت محتاج لها ، لكن نفس الشخص هو اللى ممكن يأذيك و مستحيل أى حاجة وقتها تعوضك او حتى تسعدك ، ‏سوء الإختيار للأشخاص حواليك هى أكتر حاجة ممكن فى النهاية تأذيك و تستنفذ كل طاقتك و مشاعرك .. لما تختار شخص تأكد إنه يستاهل كل شيء هتقدمه له.

" طول ما انت عايش هتفضل تتعلم "

هتتعلم إن مش كل حاجة حلوه لازم تدوم... هتتعلم إن في ناس هتكون مراحل في حياتك هتيجي لغرض يعلمه الله وهتمشي ..هتتعلم مين إللي تبكي على كتفه وهتتعلم إن سعات لازم تمسح دموعك بإيدك انت وبس..

هتتعلم تحب وهتتعلم تفارق وتفقد جزء من روحك وتكمل.. هتتعلم من الناس إللي جرحتك وخذلتك وهتتعلم من إللي إنت جرحتهم..وهتشوف الدنيا وهي بتدور وتعلمك إن الشيء الوحيد الأكيد إن مفيش حال بيدوم..

هتتعلم يعني إيه ثقة ويعني إيه جدعنه واصول والدروس دي هتتعلمها من الخاين والندل وقليل الاصل قبل الصاحب الجدع ابن الاصول.. هتتعلم إنك تعيش بشوية تشوهات جوا نفسك بس عادي ،مش عادي !! كله خير..

هتتعلم إنك لسه قدامك كتير ولازم تفضل تربي نفسك..وكل ما تتعلم ، هتدرك إنك أمام علم الله قليل جدًا..

هتتعلم إن في ناس في حياتك مينفعش تسيبها لازم تتبت فيهم بإيدك وسنانك علشان الناس دي مبتتعوضش..وهتتعلم إنك سعات لازم تفتح الطريق للي عايز يمشي..وإنت قلبك راضي وماشي في سكتك..

هتتعلم من الأحياء وهتتعلم من الأموات..هتتعلم من العالم وهتتعلم من الجاهل..هتتعلم من راجل مسن وهتتعلم من طفل صغير...هتتعلم من تجارب إللي حواليك ولكن هتتعلم أكتر في نفسك..

ومن أكبر الحاجات الي لازم تتعلمها إنك تسامح نفسك وتسامح إللي حواليك..وتتعلم إن أكبر كنز لك هي أعمالك الخالصة لله..وإن كان اتكتب عليك تعافر..ف ربنا يكتب لك إنك تعافر في السكة الصح ومع الناس الصح وعلشان الهدف الصح !!

الخطوة الأولى في سبيل خفة الروح وهناء الحياة أن تتخلص من الأشياء التي تشكل عبئاً عليك وأنت في الحقيقة غير ملزم بها، أماكن، أشخاص، علاقات سامة، مشاعر سلبية.
أن تحيط نفسك بما تحب، وتحلق في العوالم التي تهوى، وتقترب من الذين يفتحون نوافذ البهجة لقلبك.

بفتكر كلام حسين البرغوثي "على ألا أصارع الناس في دنياهم، سأعزل نفسي في قوقعة من علاقات قليلة مع بشر استثنائيين فقط بأقل عدد ممكن. وسأتجنب أي صراع لا جدوى منه. سأتجنب كشبح لا يخرج من بيته إلا بعد منتصف الليل ماشياً في الأزقة الخلفية. وكل ما أرجوه ألا ينتبه أحد لمروري !" وأنا نازل متأخر من البيت، بغيّر الشوارع اللي اتعودت امشي فيها، ورايح مكان هادي محدش يعرفني فيه ولا أعرف حد، خفيف ومتخفف من كل توقع ومن كل التزام أو اجتماعيات فائضة عن الحاجة

ليا صديق اللي هو انا بردو كان كل سنة يقطع علاقته بكل الناس اللي عرفهم خلال السنة ويغير دوايره وأماكن قعدته، وبيطلع بشخص او اتنين بالكتير أوي كأصدقاء أو معارف أو مايطلعش بحد خالص ماعندوش مشكلة، وكنت بستغرب وأقوله ياعم انت كده بتسطح كل شيء وده ليه تمن، وبتخسر فرصة إنك تختبر عمق العلاقات الإنسانية بشكل كامل، فقالي: عارف، بس هو ده المناسب ليا الفترة دي من حياتي.

أنا بقالي سنة فاهم شعوره ده، وببعد عن قصد إلا عن ناس بعينها، وقطعت من حياتي ناس ودواير كتير عن طيب خاطر، وعندي إني أنام في بيتي حاطط رجليا على الحيط ومابعملش حاجة ولا إني اكون مضطر اصطنع حاجة، وجربت إني أعمل زي الأول واختلط وأنزل مع ناس ماعرفهمش ورغم إن كل شيء كان لطيف لكن بعد نص ساعة بالكتير حسيت إنه كان غلط إني جيت، مش ده المناسب ليا دلوقتي، ومش مهم هيبقى مناسب امتى، أيا يكن الشكل اللي هرتاح فيه، طالما بالفعل مرتاح فهو ده الهدف والغاية.

" كل واحد فينا فيه حته حزن مستخبية "

احداثها كلها محفورة جواه بألمها ووجعها وتفاصيلها ، بيضحك ويتكلم وبيعدي يومه بس اول ما يكون لوحده، كل الوجع اللي في الدنيا يطلع دموع تنزل تغسل قلبه. الأشخاص اللي اتوجعت كتير في حياتهم تلاقيهم مختلفين كتومين عندهم صبر وطوله بال ، بيحبوا الوحدة جدا ، ضحكتهم مالية وشهم بس مطفيه ، بيحاولو يخبو بيها وجعهم لو بصيت في عينهم هتلاقي دموع محبوسة ، الغريب بجد انهم بيكونوا سند لناس كتير حواليهم ، عندهم قدره علي تطيب الخاطر ،ويفرحو الزعلان ويراضو المقموص جدعين مع كل الناس ، بيكونوا مصدر بهجه وسعادة للكل الا نفسهم.

" الخلاصة "
مش كل اللي بيضحك مبسوط.

حاول تدرب روحك إنك متتعشمش كتير في الناس.. كسرة النفس والإحساس بالخذلان ، وكل الأحاسيس الموجعة دي أصلها هو العشم والتوقعات الجيدة المسبقة في التعامل مع البشر.. توقع السئ زي ما بتتوقع الكويس عشان متتكسرش.

كسرة النفس صعبة ومبتتعوضش وبتفضل معلمة في روحك حتى بعد ما تتجاوز الموضوع كله.. حافظوا على أرواحكم؛ هي اللي باقيالكم.

هتقابل أنت بقى في حياتك التالي:

هتقابل ناس ما بتعرفش تفكر، وما بتعرفش تعبر.

تخيل أنت شخص لما هتقول له حاجة أو هيحصل قدامه موقف، هو هيفهمه غلط، وكمان الغلط اللي فهمه ده هيعبر عنه بطريقة غلط، مش هيعرف حتى يشرحه، الناس دي بيبقى أغلبها من اللي بيحدفوا دبش، أو من اللي بياخدوا ردود أفعال كبيرة أوي على مواقف ما تستاهلش، ودايما قطتهم جمل، وما بيترددش أنه يأذيك لو فهم من وجهة نظره أنك أذيته.

هتقابل ناس ما بتعرفش تفكر، بس بتعرف تعبر.

ودول بقى اللي هيلبسوك، هو غبي فشخ، بس كلامه منطقي، الناس دي غالبا ما بتبقاش بتخدعك، هي المشكلة إنهم بيبقوا بيخدعوا نفسهم، هو حمار، بس بيعرف يقنع اللي حواليه باللي هو شايفه، وبيبقى كلامهم ما شاء الله زي السحر، بيخش من ودنك يلاقي طريقه لعقلك لحد ما تكتشفهم.

فيه كمان اللي بيعرف يفكر بس ما بيعرفش يعبر.

دول أغلبهم من الإنطوائيين، وفاقدي الثقة في أنفسهم، كل حاجة ف دماغه بتبقى حلوة أوي، شايفها واضحة، بس يجي يحاول ينقلها يبوظ كل حاجة، لدرجة أنه لو حب يوصل لحد أنه بيحبه ممكن يكرهه فيه، الناس دي غالباً بتقفل على نفسها لما ما بتلاقيش اللي يفهمها، بيشوفوا اللي حواليهم أغبيا مش فاهمينهم بدل ما يشكوا أن هما اللي مش مفهومين.

وأخيراً فيه بقى اللي بيعرف يفكر وبيعرف يعبر.

دول معاهم بقى أنت ونيتهم، لو طيبين هتستفيد من وجودك معاهم، ولو أشرار يبقى مبروك عليك خازوق جديد في الحياة.

الشر غالباً بيقي ناعم ، ذوق وبيعرف يقول كلام حلو ، جذاب وبيعرف يلم الناس حواليه ويكسب تعاطفهم ، شيك وواجهة كويسة ، بيعرف يعيش دور المظلوم ويقلب الترابيزة ، ويعيط لما يلزم الأمر عشان اللي حواليه يصدقوه ، لحد ما تشك 100 مرة أنت في روحك.. المؤذي بيكون له وش کويس ، ممكن يسندك مرة وأنت في شدة عشان يكسبك ، وبيعرف يجيب هدايا أحيانا ويجامل.. كل ده لحد ما الوش الأصلي يبان ، مرور الأيام وبس هي الميزان اللي هيكشفلك صدق الوشوش من حواليك ، لا عشرة ولا عيش وملح بيفرقوا وقت الجد ، البدايات دايما حلوة وخداعة.. دلوقتي مفيش أصعب من إنك تلاقي قلب صادق.

الأيام اللي أنت عايزها تمر دي عمرك ، النوم اللي بتجري عليه عشان اليوم يخلص ده حياتك ، الساعات اللي بتعدي ما بترجعش ، الوقت اللي بتقضيه وأنت بتتأمل في السقف الأولى إنك تستمتع بيه ، الحاجات اللي عمال تأجلها ومكسل تتحركلها ممكن وقتها يفوت وماتلحقش تنفذها ، عيد ميلادك اللي بتعمله count down ده هيزودك سنة وهياخد من شبابك.. اعمل اللي انت عاوزه دلوقتي متأجلش.

عايز تشوف حقيقة الناس اللي حواليك بجد ، أقع ، إتعب ، إبعد ، شوف كام واحد هياخد باله من وقوعك وهيحس بتعبك وهيلاحظ بعدك ، وقتها بس هتعرف حقيقة شعور كل حد حواليك ، هتشوف وشوش الناس على حقيقتها ، الناس بتبان وشوشها الحقيقية في البعد و الزعل والخصام ، سيبك من اللي يفضل يقولك أنا بحبك ومليش غيرك والرغي ده كله !!

كل ده كلام فاضي ، هتعرف أصل كل واحد أما تحطه تحت ضغط معين ، أما تعتمد عليه ويخذلك ، وقتها بس هتعرف كل إنسان على حقيقته ، وعلى قد ما هتتعب من معرفة الحقيقة دي على قد ما هتكون مبسوط إن ربنا بعد الناس دي عنك.

Accept him/her for what they are..

إزاي أي علاقة بين اتنين بتنتهي؟
لما بتحب حد بتحبه عشان اللي هو بيعمله، هو طيب، جدع، حنين، بس مواعيده مش مظبوطة، أول يوم هي بتعمل فيه مشكلة عشان مواعيده بيبقى أول يوم لنهاية العلاقة، هي دمها خفيف، مثقفة، قعدتها ما يتشبعش منها، بس ما بتعرفش تتأخر عن صحباتها لما واحدة فيهم تطلب منها حاجة، أول يوم هيخيرها بين أنها تروح معاه أو تروح لواحدة صاحبتها محتاجة حاجة هيبقى أول يوم في نهاية العلاقة.

أحنا بننبهر ببعض في البدايات عشان اللي بنعمله لبعض مش عشان اللي ما بنعملوش، واليوم اللي بنسيب فيه كل حاجة اللي قدامنا بيعملها عشان يحاول يسعدنا ونحاسبه أنت ليه ماعملتش كده بيبقى بداية النهاية، اليوم اللي بتبقى كل حاجة حلوة في اللي قدامنا واللي حبناها عشانه ما بقتش كفاية، حتى لو حاولت ترضي اللي قدامك وتيجي على نفسك، هتستحمل يوم، شهر، سنة، عشر سنين، وهيجي يوم مش هتقدر.

Because you can't be better, you can't do more, because that's what you are.

وبعد نهاية العلاقة مش هتندم على حاجة على قد ما هتندم على الحاجات اللي جيت على نفسك فيها، واللي يفهمك أنك لو بتحب حد هتحاول تعمله أي حاجة يبقى ما بيفهمش حاجة، هو حبك ف الأول عشان اللي أنت بتعمله، وأفتكر دايما أن الحب هيفضل to accept him/her for what they are

عايز أقول إن في الأول وفي الآخر محدش عارف ولا مُدرك كمية المحاولات اللي بتحاولها مع نفسك طول اليوم عشان بس تعديه ولا حد عارف عن زقك للأحداث عشان تعدي
وإن تركيزك ف تفاصيلها بيتعبك أكتر ويبوظ كل حاجة عدتها بصعوبة وخدت من وقتك وطاقتك اللي باقي منها.

أكبر مشكلة بتواجه الشخص الكتوم اللي مابيحكيش إن الناس بتتعامل معاه على إن حياته ساكنة خالية من المشاكل والمشاحنات وكأنه بعيد عن الضغوط وبيتمتع بسلام داخلي مع نسبة برود وقال مش داري بالنزاعات اللي حواليه يعني وقادر يستقبل الناس ويتقبل كل كلامهم وسخافتهم في أي وقت.

الناس اللي بتقعد مع نفسها كتير هما أكتر ناس القعدة معاهم مريحة .. الناس الشجاعة اللي مابتهربش من نفسها ، ولا بتملى يومها بمليون حاجة مالهاش لزمة ، و تقابل ده و ده عشان يملوا وقت و بس ، هما أكتر ناس فاهمين نفسهم ، متصالحين معاها ، عارفين هما عاوزين أيه وواضحين في اللي عاوزينه و عمرهم ما بيلفوا ويدوروا.

فيه ناس بتكلم نفسها بصوت عالي ، و بيكتبوا أسئلة مش تقليدية لنفسهم ويجاوبوها ، بيقعدوا لوحدهم بالساعات مش لأنهم انطوائيين ولا سوشيوفوبيك ، لكن عشان حبوا يقفوا على أرضية ثابتة و يرتبوا الزحمة اللي جواهم قبل ما يتعاملوا مع زحمة العالم الفوضوي اللي حواليهم.

لو مش عارف تبقى منهم حاول على الأقل تتعرف عليهم و تطول القعدة معاهم ، مهما كانوا صادمين في وضوحهم أو مبادئهم و مختلفين عنك ، هتشوف فيهم جمال هادي مش هتملك معاه إلا انك تحبهم.

إحنا حياتنا حلوة أوي والله ورزق ربنا مغرقنا مغرقنا بزيادة بس إحنا بناخد بالنا من الفسفوسة اللي مش معانا ونعملها مصدر سعادة ومش بنقدَّر اللي معانا

أسوأ إحساس ممكن توصله لإنسان قريب منك هو الاستهانة بزعله، بإنك تكرر نفس الأخطاء والتصرفات اللي أنت عارف إنها بتجرحه، مفيش أسوأ من إنك تخلي إنسان يحس إنه مالوش قيمة عندك بعد ما كان يظن نفسه غالي، إحنا مبنخسرش علاقاتنا عادة بمشاكل كبيرة حاسمة، بس بنخسرها بتراكم الخيبات.

لو ركزنا في أغلب المشاكل النفسية هنلاقي ان تمركز الانسان حول ذاته عامل مهم في المشاكل دي ..
واحد حياته اتدمرت عشان حس للحظة انه تم استبداله !
واحدة حياتها انهارت عشان مرت بمشاعر الرفض !
واحد محبوس في حالة إكتئاب عشان أتصد في المدرسة او الكلية او اجتماع شغل او لحظة مهمة في حياته !
واحدة حصلها عقدة نفسية عشان تم تهميشها و اهمالها في علاقة عاطفية !
و حالات تانية كتير من نفس الفكرة...

لا ده عادي جداً ، بيحصل و هيحصل !
عادي جداً تترفض في المقابلة او يتقل من تعبك .
عادي جداً يتقال لك "سوري مش بفكر فيك " او "انتي زي اختي".
عادي جداً جداً يتقال لك " لأ " و بكل وضوح و صراحة من غير تذويق او اعتبار لتأثير ال " لأ " دي عليك او على نفسيتك.

هي دي الدنيا و لو كل مرة الانسان اتوتر و اتشنج عشان الـ ego بتاعه اتجرح ! يبقى لسه عيل صغير وهيفضل في سلاسل لامنتاهية من البهدلة و التشنجات و الاوهام الوردية.
فمفيش اي الزام كوني على اي حد انه يبص لنا بشكل مميز او خاص.. فبعيد عن الصراعات و القناعات و التخيلات و الحاجات الكتيرة اللي جوانا.. بعيد عن كل المشاعر و الادراكات العميقة اللي عايشة فينا .. بعيد عن جوهرنا و معرفتنا الحقيقة بنفسنا .. احنا مجرد اجسام مادية بتشكل جزء من الفراغ.
فتكيف مع الحقيقة دي بمزاجك ، بدل ما العالم هيكيفك عليها غصب عنك .

انك تقابل حد شبهك.. وشبهه تفكيرك وعقلك.. وميوله للاشياء اللى بتحبها قريب منك.. انك تقابل شخص فاهمك وقادر يستوعبك.. بيفهمك من غير ما ترهق نفسك.. دى كلها مقدمات فى الحُب.. لان الحب حلو مفيش كلام ولا خلاف عليه.

- لكن اعلى درجات الحب هى إن الشخص اللي أنت مرتبط بيه، يخليك تحب نفسك، مش إنك تحبه هو وبس.

يخليك تتقبل نفسك بكل حاجة فيك، من كتر ماهو متقبلك وبيحبك كدا زي ما أنت.

إنه يزود ثقتك بنفسك، إنه دايماً يدفعك لقدام ويساعدك تكوّن أحسن نسخة من نفسك.

انه يخليك فخور وعارف قيمتك كويس.. اللى زعلك عنده لو حصل ما يبقاش عادى ابداً..ده اسمهُ حب.. غير كدا ابعد وعيد حساباتك من جديد.

الأسوأ من المشكلة، عدم الإحساس بيها، والتماشي مع الوضع القائم مع تفادي أي تغيرات جديدة قد تُحدث الأفضل أو الأسوء، وتعيط

‏فيه ناس فاهمة ان الحب اهم حاجة في العلاقة ودي فكرة غلط تماماً ، الأهم هو الأمان والراحة انك تطمن انك مش هيتغدر بيك وانك هتنام وتصحى والشخص اللي بتحبه هيفضل معاك زي ماهو وميتغيرش عليك ولا يقلب عليك ، ده بالدنيا وما فيها.