نصف حزنك يأتي من شعورك بأنك لم تكن تستحق ذلك، نصف حزنك هو شعور بالشفقة على نفسك.

‏أسوأ العلاقات هي التي تخرج منها وأنت تشعر بالذنب لأنك اهتممت كثيرا وسألت دائما وأعطيت كل ما لديك، العلاقات التي تجعلك تشعر بأنك كنت تفعل كل هذا لشخص لا يهتم وأنك ناقص ولا تستحق الحب والاهتمام، أنك تعاني من خطبٍ ما يجعل الآخر لا يريدك كما تريده أنت. هذه هي العلاقات التي تدمرك

‏قريت جملة بتقول فيما معناها "إن اللي هتديله أكتر من قيمته وهتكبره هينسى قيمته الحقيقية لحد لما يكبر عليك شخصياً" ودي حاجة حقيقة جداً وانا عشتها مع ناس كتير ، وحقيقي أكبر غلطة ممكن تعملها في حق نفسك إنك تكبر حد عليك أو عن مكانته الطبيعية ، الناس دايماً بتتنمرد في الآخر وبتحس بقيميتها الوهمية اللي خلقنهالهم لحد ما بينسوا قيميتنا احنا.

أنا ممتن جداً للمواقف اللي خلتني أقطع علاقتي " مُجبر " بناس كنت مستحيل أفكّر أسيبهم أو أبعد عنهم، لإعتقادي الخاطيء أنهم أهم من راحتي النفسية، بس الحقيقة إنهم طلعوا مش مهمين ولا حاجة، وإنهم مجرد عبء وضغط وتعب أعصاب مش أكتر، فكرة إنك بتحب حاجة معينة أو شخص معين ماتمنعش أبداً إنه ممكن يكون أكتر حاجة بتدمّرك و بتأذيك نفسيا وعاجلاً او أجلاً كان لازم تتخلص منها .

ناس كتير أوي بيزعجها كونك عندك شخصية مستقلة، كونك ملكش دعوة بأى حاجة بتحصل و ماشي على مزاجك. عايزينك طول الوقت زيهم، مالكش لزمة.

انطوائيتي على هذا العالم كأن شيء ولد بجانبي منذ صغري ، كنت لا احب الغرباء او الحديث معهم افضل الجلوس بالزاوية دوماً ، انا ذلك الطفل الذي لا يعرف معنى ان يكون طفل ، كنت احدق بالجميع وبعدها العب بالرمال مع نفسي ، حتى انني كنت اخشى ان يقترب طفل ويحادثني ، على ما مررت به بالسنين اصبح المنزل السرير، تحت الغطاء هو ذلك المكان المناسب فعلاً لطفل يكره الغرباء.

الشخص اللى مش مقتنع بيه هتفضل دايماً مش مقتنع بيه مهما كذبت على نفسك ، الشخص اللى مش مرتاح معاه هيتعبك أكتر مع الوقت حتى لو قُريب منك ، حاجات كتير فى حياتك بتكملها لمُجرد إنك اتعلقت بيها بس لكن مش حاببها ، بتبعد كل الفرص لوجود ناس جديده لإحساسك بالتقيد و إنك مربوط بشخص مُعين ، أوقات بُعدك مُمكن يفتح لك مليون باب تانى ، و قتها حكم عقلك من البداية إذا كانت الحاجه أو الشخص يستاهل إنك توقف حياتك عليه و تتعلق بيه أو لأ.

ماتخليش حد يضحك عليك و يقولك إن النهايات لازم تبقى أخلاق و خليك أحسن و الكلام ده، في نهايات محتاجة إنك تطلع عين أم اللي قدامك و توصلّه قد ايه هو شخص عِرّة و مؤذي و مش متزن، عشان الكلام اللي هتسيبه جواك ده هتحتاج تقوله بعدين بس هيبقى مالوش قيمة.
مع كامل إحترامي للنهايات الخلوقة بردو

مش عيب خالص على فكرة تعيد أولوياتك كل فترة ..و مش عيب تكتشف إنك كنت بتتصرف غلط ف تتغير وتتصرف صح …مش عيب تعترف إنك كنت بتتحشر في اللي مالكش فيه ….متحكم بزيادة ….عصبي بزيادة …..عايز الدنيا تمشي على مزاجك بزيادة….مش عيب تقول أنا كنت حمار لما تكتشف إنك كنت حمار …صدقني إعترافك بالحقيقة أحسن مليون مره من إنك تبقى شايف نفسك برنس في الوقت اللي كل الناس شايفاك فيه حمار

صباح الخير، أنا بس عايز اقول ان مافيش مخلوق بشري اتخلق من طين زيك يستحق انك تدوس علي نفسك عشانه، و ان الحاجة الوحيدة اللي الانسان بيفضل عمره كله عايش عشانها هي انه يحافظ علي كرامته، ف لما تقبل انك تتهان من حد مش مقدر أي حاجة انت بتبذلها عشانه، ف انت مجرد شخص ساذج وغبي، ومتستحقش اي تعاطف.

‏محدش ضامن مشاعر حد للأسف، المشاعر بتتقلَّب من يوم وليلة وممكن يوم تبقى نايم على حب ومبسوط جداً وتصحى اليوم اللي بعده متلاقيش الحد ده أصلاً

أسوأ إحساس ممكن توصله لإنسان قريب منك هو الاستهانة بزعله، بإنك تكرر نفس الأخطاء والتصرفات اللي أنت عارف إنها بتجرحه، مفيش أسوأ من إنك تخلي إنسان يحس إنه مالوش قيمه عندك بعد ما كان يظن نفسه غالي، إحنا مبنخسرش علاقاتنا عادة بمشاكل كبيرة حاسمة، بس بنخسرها بتراكم الخيبات.

مينفعش تطلب من حد انه يهتم بيك او يخاف عليك او يفكر فيك او يسال عنك، مينفعش تقوله كلمني او حبني او حس بيا، مينفعش تعاتب حد علي حاجات هو مقصر فيها وهو مش حاسس بيها، مينفعش تعاتبه علي حاجات مش مهمة بالنسبة له علي انها مهمة جداً بالنسبة ليك، في حاجات لو اتطلبت تهينك قبل ما تفرحك.

اتعلمت حاجة حلوة جداً مؤخراً ..
اللي هو انا مش هفضل أحرق نفسي واستهلك في روحي واستنزف في طاقتي علي اي حد او اي حاجه ، مش هوصل تاني لمرحلة ان كل حاجه تهون عشان خاطركم ، عشان لما بوصل للمرحلة دي مابتلاقش غير ، صفر اهتمام ، صفر تقدير ، مافيش اي نوع من انواع الاحتواء ولا التقدير ولا الاهتمام ولو حتي كلمة بسيطة تفرح مافيش ، ف انا بطلت ابيع نفسي وانتو كمان ياجماعة والله بلاش تبيعوا نفسكم ل اي حد عشان الناس بتتنمرد فالاخر ويحسوا انهم حاجه وهما فالأصل ولا ليهم اي تلاتين لازمة ، اشتروا نفسكم ياجماعة وماتعملوش ف نفسكم كده انتو حقيقي تستاهلوا حد احسن من كده بكتير اوي ، تستاهلوا حد يحترمكم ، حد يقدركم حد يبقي باقي عليكم ، حد يبقي مشتريك ويحسسك بقيمتك مش حد يكسر فيك ب المنظر ده ولا حد يقلل منك بالمنظر ده ، الوقت بيعدي بسرعه ومفيش خساير الا لروحك و نفسك ، انت اللي بتنطفي ونفسيتك انت اللي بتدمر ، ف طلع نفسك من الجو ده ، اه كده كده في خساير بس المهم انك تطلع وتبعد ، اشتري نفسك بقي وغليها اوي علي اي حد مايقدرهاش ، متخليش معاك حد غير اللي فعلاًا يستحق انه يبقي موجود خلي معاك اللي يقدرك بس مش اللي يقل منك ، بطل تبقي فيك حتة اللي هو يعمل اللي يعمله وهترجع تكلمه عشان انت بتعزه وبتحبه، الشخصيه اللي قدامك دي ملهاش عزيز ولا غالي ف تجنبها بكل هدوء ، واهم حاجه نفسك ، البشر اكتر حاجه موجودة فالكوكب ومابتخلصش اللي مايقدركش يغور وهيجي مكانه مليون ..

- أنا مبسوط بكل التجارب اللي عديت بيها، و كل حاجة اخترت أعملها و كل وقت حسيت فيه إني مرتاح، مرتاح مع أفكاري أو مع التوهة أو مع الاستقرار أو إني مش محتاج أشوف إني سابق الناس عشان أحس إني شخص أحسن.
راضي عن كل الأوقات الصعبة اللي كنت حاسس إني مش هعرف أعديها و خرجت منها شخص كويس و مش مؤذي.
و حابب كل مرة كان عندي فيها طاقة و اخترت اشاركها مع اللي حواليا بأني أساعد حد ولو بكلمة صغيرة.
أنا مش بستنى حاجة من التجربة على قد ما بعيشها زي ما هي بكل مراحلها.

بعد سنين من المقاوحة اقتنعت إن فعلا حتى لو بتتكلم ف الصح مش كل الصح يتقال.
لأنه مش دايما هتكون بتكلم بني آدم عقله قادر يدرك إن ده الصح ولا دايما هيكون عنده شجاعة تصحيح المفاهيم والتخلي عن معتقداته الغلط أو حتى الاعتراف بده..
و أنك تعرف تاخد كل واحد على قد عقله و تكلمه باللغة للي يفهمها هو ده الصح ، في مواقف كتير بتطلب الحكمة أكتر من الذكاء حفاظاً على هدر الطاقات ..

عارفين جملة “الدم عمره ما يبقى مية”
اللي هي أصلها
Blood is thicker than water.

إحنا بنستخدمها أن الأهل أهم من الأصحاب، و إن مهما أهلك عملوا فيك، فالدم عمره ما يبقى مية

بس هي أصلها قبل ما يختصروها كانت:
The blood of the covenant is thicker than the water of the womb.

يعني الناس اللي بينك و بينهم ميثاق دم (وقفوا معاك في محنتك، دافعوا عنك، حاربوا عشانك، اتأذوا عشان يحموك ) دمهم اللي نزل عشانك ده أهم من المية اللي حامتك و انت في رحم أمك (كناية عن الأهل يعني)
يعني المثل بقى بيتقال بالعكس دلوقتي.

العلاقات الإنسانية بتكمل بالتقدير، إنك تحس إن قيمتك محفوظة عند اللي قدامك في غضبه قبل أوقات الرضا، لما بتلاقي مجهودك متصان وله قيمة ومتشاف مش مهدور في الأرض ، الإنسان ممكن يقدم أجمل ما عنده، ويطلع من جواه ألطف من الصورة اللي كان يتخيل بيها روحه، بس لو حس بالتقدير، والأمان، وإنه مش هيتساب ببلاش في أي لحظة.

العلاقة بين أي أتنين بيجي عليها فترات تأثير في حق بعض أو إنعدام شغف و رغبة في إنك تفصل فترة، ممكن تتعرض لمشاكل كبيره و فترة خذلان و زعل ، بس في النهاية إختيارك للشخص ده و إنك متقدرش تستغنى عنه مهما حصل هو اللي بيغلب ، حبك و مشاعرك الحقيقة إتجاهه بتغلبك ، و ده بيقوي العلاقة أكتر، ‏مفيش حب المشاكل مقوتهوش و لو حصل العكس فا دي علاقة مش قويه كفايه بين الطرفين ، المشاكل بتخليك تعدي بتجربة إحساس إنك هتخسر الشخص ده و ساعتها بتترعب فا بتجري عليه من تاني تحاول تصلح ، تحاول تعوضه كل لحظة وحشه أو يعوضك اللي كان ناقصك.. مفيش حاجه هتبعدك إلا لو أنت فعلاً بطلت تحب الشخص ده .

من أهم الحاجات اللى دايمًا بتحافظ على استمرار العلاقات بين الأشخاص مهما كان نوع العلاقة بينهم هو تقديرهم لمشاعر بعض و إحترامهم للعلاقة نفسها ‏ابعدوا عن الردود المتأخرة ، عن التبريرات و الأعذار طول الوقت، احترموا الأشخاص اللى بتختار تكون معاكم لإن اللى بيروح صعب جداً يكون له بديل .

مش قادر أقتنع إزاي ممكن حد يقدر ينسى سنين و مشاعر ويحط نقطة ويبدأ من أول السطر عادي كده وهو سايب وراه حد تايه مش حاطط خط لأي طريق لحياته غير معاه .. إزاي بيقدر يسيب وراه حد يواجه الحياة وهو تايه كده بسببه .. الناس دي فعلًا مابشوفهاش غير بعين الشفقة على افتقادهم للمشاعر و الإنسانية.. وماعرفش بيقدروا يكملوا حياتهم بالشكل ده إزاي؟
ازاي ممكن استحمل اني اسيب حد قلبه وافكاره بياكلوا في جسمه ودماغه كل يوم وهو مليان بخيبة الامل ، ربنا يلطف بحال الناس دي ويعينهم على نفسهم والله.