‏شاعرٍ ما عاد يغريه شرب السلسبيل
‏حاجتينٍ تخلفه كل ما اجتمعًا سوى

‏البروق تلوح وانتي تفلين الجديل
‏منظرٍ منه الهواوي يطير مع الهوى

‏الهلال اللي تعلى على الطرف الكحيل
‏أستحى منه الهلال السماوي وانزوى

‏لو تشيلين الغطا من على الوجه الجميل
‏أعلنوا لـ العيد والعيد باقي ما ضوى
- عبدالله السيحاني

‏خلابة العيد يا دهشة عيون الحضور
‏تشابه الحسن وأنتِ حسنك اللي فرق

‏يصيب رمشك قلوب مشاهدينك سرور
‏ويمطر على جباه حسادك سحايب عرق

‏وفستانك الزاهي اللي صممته الزهور
‏اتعب تفاصيله الصعبة غلاف الورق

‏يا فتنة العيد شمسي والضحى والبكور
‏غابو عن الصبح .. لاكن وجهك اللي شرق

‏عيدك مبارك وأنا عيدي غرام وشعور
‏مايوصفه شعري اللي لباب قلبك طرق
- عبدالله السرحاني

‏" العيادي منّك " صْوّرٍ " تفرّح صدري
‏خذتها منّك و أنا اللي ما أخذ العيديّه "

‏يعْرفك هذا النهار وتعْرفك حسرات غِيده
‏مثل ما تعْرف ليالي الشوق شرهات المنادي

‏لا رماكِ النور في درْب النهايات السعيده
‏تستحي منك الحياديه ويخشاك الرمادي

‏أنتِ ما زدتي على إنّك جيتي بحلّه جديده
‏بعدها صار الحضور المحتفى فيه اعتيادي
‏
‏كلّ عام الحسن يفرض كلمته ويعيد عيده
‏مشهدٍ ثابت مثل فرحة طفل من "العيادي"

‏تقبلين ويضحك الدمع في عيونٍ مستفيده
‏قبل ما تنْبس شفاه الريح عن غامض مرادي

‏قبْل حتى تغْزل الشمس بسناها لك قصيده
‏من تشفّاق العيون، إلين لهفات الأيادي

‏كم يكلّفني الحضور الصاخب بلذّة وعِيده
‏يوم أحاول أظهِر إني هادي ومانيب هادي

‏مشهدٍ -عادي يفوت العمر كلّه يوم أعيده-
‏العمر ما يرخص إلاّ لمشهدٍ ما هوب عادي
- ماجد النفيعي

‏يافرحة العيد خلّيني على بالك
‏الطفل في صدري المقفول ما عيّد

‏ألقيني بـ بضحكة عيونك وبلقالك
‏ضحكة قديمة بعزّ الحزن تتسيّد
- نواف التركي

‏" عيد رد الإعتبار "

‏اسلمي " ياخدره العين " من شر العيون
‏و إستبيحي نشوه العيد من وجه النهار

‏كل عيدٍ قبل ما اعرْفك يجيب الغبون
‏اجعلي عيد الفطر " عيد رد الاعتبار "

‏كنت اعاني من لهيب الخطايا والطعون
‏واستلذّيت الخطا يوم صرتي الاعتذار

‏خلي اللي ماتعرفك على احسن مايكون
‏تشعر بـ حاله من الضيق ومْن الانهيار

‏مارِسي حدِة غرورك على اللي يحترون
‏التواضع مرحله ضعف و بْداية دمار

‏انتي عيونك تخطف الرذاذ من المزون
‏علّمي اللي تحسب ان خطف الانظار ابتكار

‏طلةٍ ماهيب منّك ! تساورها الضنون
‏اكثر اللي ناسب العيد ؟ وجهك بـ ختصار

‏عسجديّات القوافي وعذبات اللحون
‏حطّها شاعرك في معصمك مثل السوار

‏كل بيتٍ ينكِتب فيك يالغض الفتون
‏تكتبه طرّادة الحب في عرض الجدار
- حشان بن مصلح

شعور الحنين اللي يجي كل ليلة عيد
‏ يلخبط شعور الفرحه اللي نصايدها

‏اللي فاقد ٍ له بنت اكابر وشيخة غيد
‏ و قبل ما يعايد نص ربعه يعايدها

‏يصوّت ضميري فـ الحشا كنه بن مهيد
‏على الطلّه اللي فـ اول العيد فاقدها

‏حلالاه ياذاك المعنّق و ذاك الجيد
‏اليا علّقت فستانها و نقشت يدها :)
- جراح العتيبي

لامحرقٍ جوفي ولا الدمع نازل
‏لو دمعة العاشق مافيها مناقيد

‏عن كل حاجة من طرفك متنازل
‏حتى السلام اللي من العيد للعيد
- بندر الدويش

ترى عادك على بالي وفارق فالحسّن والجيد
‏وعاد الحب في صدري وعاد القلب هو دارك

‏حبيبي كيف ما مريت في بالك صباح العيد ؟
‏وانا اسمي تسمعه لا عايدوك بـ "عيدك مبارك"
- مبارك بن وافي

" على وجهك أنا و أكبر مطاليب الحياة ندور
‏وش العيد بدونه يا أعذب أشيائي و أوّلها؟ "

"مساء العيد الأول يا عيونٍ مالها إلا العيد
‏طويت لشوفها كل الدروب وجيت ضاميها"

"عايديني في بهاك، وضحكتك، وأسلوبك
‏لا يمر العيد واحساسي معه عالفاضي!"

اسرفي بالسلهمه يام المظاليل الوساع
كلّ نظره من عيونك كنّها تجديد بيعه

يا نعيمي فالحياة وجنتي واغلى متاع
يوم قلبي مهلكه برد الشتا صرتي ربيعه

من خلالك عشت لهفه ورّدتني للضياع
انتي اكثر شخص ادلّ دروبه وأرجع اضيعه

يوم كنت اخشى المفارق صرت لعيونك شجاع
وعمري اللي تفتدينه؟ مستعدّ اني ابيعه

والله اني من بعدْك انسان يغريه الوداع
وكلّ تلويحه موادع جعلها لْفقدك شفيعه

تحلّين الحياة بعين من حاله طواه الياس
‏أجل وشلون لبسٍ تلبسينه ما يصير أحلى؟
- ناصر مناحي

" علّقت ثوب العيد الأول وعلّقت
‏بقيَّة أحلامي على ثاني العيد "

كل ما في جعبتي: عيد مبارك
وانك اطهر من على الدنيا تعيّد
- عبدالملك الخربوش

لو تبسَّم في الوجيه أصحاب وأعَدا
‏ما تناست ضحكة العمر مْعروفك !

‏لا ندى فوق الغصون، وعودك أندى
‏ولا رحيل، ولا وقوف ـــ؛ ألَّا وقوفك

‏مزعجة هذي الوجيه ووجهك أهدَا
‏طِلّ ــ، وأعتقني من مْكابد ظروفك

‏عن معايد غيرك ــ؛ أنت أحقّ وأبَدا
‏صاحبي، وأبدَا من مْعايدك؛ شوَفك
- صالح بن حمد

بنت الشعر يا سلسبيل الحسن وايات الجمال
لدّي عيونك وانثري من مترف احساسك شعر

حيكي جراحك بالقصايد تبرى ياعين الغزال
لا تتركين بداخلك احساس ينهش بالصدر

وانا اعتذر عن كلّ جرحٍ كانت آلامه جزال
خلّا قلمْك -ينوح حزنه- للملا بْليّا ستر

عدّي قصيده من هجا ولا عتب ولا جدال
استرسلي تبرى الجراح وينبت فـ قلبك زهر

منتي من اللي يكتب ابيات القصايد باعتلال
مسترسله، ابعد من الشعر الثقيل المنكسر

كنّ الحروف تراقص يْدينك وتُكتب باعتدال
تخاف لا توطى على اطراف الشعور المنتثر

عدّي قصيدك واسرفي بالقول يا أصعب منال
مابي أفوّت من ثوان العمر -ساعه- واخسر

حتى سكوتك .. لو تحاليتيه واسرفتي الدلال
-لجلك فقط- قادر اعيش العمر كلّه انتظر

يا مذهله، لو غايتك ابعد من شعور انذهال
الناس تسأل كيف قمرا تكتب احساس البدر؟

سبحان من جمّع مزايا الخلق في أكمل مثال
اعجوبةٍ فالحسن والمنطوق واعجوبة فكر

يانجمةٍ جارت على الصبح وتجلّت باختيال
قولي لنور الشمس لا يقهر عصافير الفجر

زال الضيا ومشراق وجهك غير قابل للزوال
ثابت مثل دهشة قصيدة كتبت لاخر شطر

يانجمةٍ شعشع سناها وابلجت منها الليال
جودي لسمّار الليالي من تعاليل السمر

لدّي النظر يام العيون اللي نهايتها احتلال
ملامحك لا شافها المخطي يبادر بالعذر

انتي اليقين الراسخ اللي ما يشوبه احتمال
وانتي الثواب اللي تجلّى لي بعد شدّة صبر

من حقّق الله حلمه ونالك رغم أنف المحال
يستاهل يعيش الحياه وبداخله نشوة نصر

يامترفه، كلّ الكلام اللي على البال.. ارتجال
ما ضاعت علومي، ولكن يوم شفتك؟ انهمر

في ذمّتك انتي قصيدة صافحت كفّ الخيال؟
ولّا قصيدة صادقة خلقت على هيئة بشر؟

منطوقك العذب المعتّق فيه من وجهك خصال
كنّ القصيد مقاسمك نصف العذوبة والسحر

وجهك غواية للهدى؟ مدري هداية للضلال!
محتار فيك انسان ما قد حار بين أمر وأمر!

يا غاية السائل ويا أعذب إجابات السؤال
تدرين بانّ الشعر في حضرة جنابك منتصر؟

-تجديد عهد-

وانا اللي كل ماشيّدت للنسيان دونك ســور
‏جرى في خافقي سيل الحنين الجارف وهدّه
‏
‏عساك الحِّل ياحلم الوصال وموعدٍ مهجور
‏تلاشى كنّــه أصحاب الرخـا في حزّة الشِـدّة
- محمد العايد