-أُمّ الشعوب-

الديار اللي تفيّت ظلّها -كل الشعوب-
في قلوب الناس تملك بيت من أرض وسما

من شمال الدار لين آخر مسافات الجنوب
والسعودية وطن يشعر -غريبه- بانتما

في رياض المملكة نحيا على انسام الهبوب
وفي صحاريها محد عانى من شعور الظما

شعبها ينسج لها من أعظم الأفعال ثوب
ويوقف بوجه العدو وقفة تُراق لْها الدما

والمليك اللي فتح للشعب آفاق الدروب
يكتب التاريخ وقفاته ويشهدها العمى

من نجح في وحدة بْلاده وتوحيد القلوب
واستعان بمنهج الدين اشهد بْـ أنّه رمى

دارنا؛ دار العطا..مهد الكرم..وامّ الشعوب
دارنا اللي في ذراها كلّ مكروب -احتمى-

تشرق امجاد الوطن فينا لو الدنيا غروب
والأكيد فـ سلمنا ما تستريبه ربّما

في تفاصيل المشاعر حبّ ما عنّه نتوب
نشرحه بالإنتماء .. وبالولاء .. وبالحِمى

23/9/2022

سارعي لـ المجد مـ انتي بـ مسبوقه
‏خالقك .. ربي على المجد سباقه

‏دونك .. دمي المعادين مدفوقه
‏ورايتك في كل الاحوال خفاقه

‏من نواها ساقه الله على عوقه
‏وان نجى ماعاد وقف على ساقه

‏دونك رجالٍ على الموت مطفوقه
‏من مضى منهم على العهد ماباقه

‏من نظر في رايتك وطرخت فوقه
‏لازم يقول الشهاده من اعماقه

‏فارقك ربٍ عطى حسنك فروقه
‏قبل لاترسم حدودك على ناقه

‏والله ان كنك من الغيم مسروقه
‏لو سواتك ماهي .. بتوخذ سراقه

‏فيك شعر المدح ينقاد طاروقه
‏وانتي .. بدون الطواريق عملاقه

‏كل بيت يجث قلبي من عروقه
‏الله .. اللي .. رابطٍ فيك ميثاقه
- صالح النشيرا

مرحبا

يا موطني واللي خلق دمّي الحار
فيني على مشراف حبّك حميَّة
- عامر بن مبشر

‏وطن جوّد حبالك يا وطن لأحلامك، ومبداك
‏ترى ما ضاع بك حقّ المواقف، وأنت دافعها

‏كبرت فـْ حضْنك، ومرَّت حياتي في دواك وداك
‏وعدت أغنّي.. فـ صحراء ظماك، وفي مرابعها

‏أشوفك جنةٍ خضرا، وغصن، ونسْمة، وشبَّاك
‏وأعرْفك.. غصَّةٍ ذابت عيوني من مدامعها

‏وطن وش يعذر أبيات القصايد يا وطن وأسماك
‏كثيرة لو تناقلها الليالي كيف أبى أجمعها

‏أقدِّم لك ولاي، ورأس مالي وقلمي، وإعداك:
‏أدوس رقابها، وأغرز سيوفي بين أضالعها

‏تغيب الناس، وتجف الحلوق.. ولا حياة إلَّاك
‏معك مرْبط خيْول جدودنا.. وأطيَب مقالعها

‏معك سلمان بن عبد العزيز العاقد الفكَّاك
‏وسيفه، وفرِسه، وآل سعود، وطيب مَرْجعها

‏شف عيالك، وشعبك وبلدك يا سيدي يفداك
‏ترحّب بك حيود جبالها.. وأعذب منابعها

‏لو إنك ترفع لـ عرض السماء ونجومها، يمناك
‏ما يسبقنا على خطف النجوم إلا مطالعها

‏عسى وقفة محمّد في مداك وضحكة محياك
‏وعسى كلمتك تبقى فـ العقول وفي مسامعها

‏وأنا يا هامة العزّ الرفيع.. ودورة الأفلاك
‏أعرف أنه عيون رجالها، وأكبر مطامعها

‏وأعرف إنه محمّد فعل، ومحمّد نبا، وإدراك
‏ومعه رأيٍ يشدّ رحاب نجد، ونور مَفْرِعها

‏عسى الأحلام لا شدَّت خطاك، وطوّلت مسعاك
‏ما ترجع يا ولد عبد العزيز إلَّا السعد معها.
- محمد السلطان

"كبرت فـ حضنك، ومرَّت حياتي في دواك وداك
‏وعدت أغنّي.. فـ صحراء ظماك، وفي مرابعها "

ما احدٍ يعلّمنا نحب الوطن كيف !
‏ و لافيه احد يملي علينا ، ولانا

‏جَمّ الشرف مالين منه المغاريف
‏ و لا نقص من وارد الجمّ ، مانا

‏على وطنّا ، ما حسبنا التكاليف
‏ دونه تروح ارواحنا مع دمانا .

‏مازورته مجد ، و فَخَرنا مراجيف
‏ و نصفّ من جزل القصايد هوانا

‏ديرة هل العوجا و الامجاد و السيف
‏ معشوقة العزّ ، و خصيمة ضمانا

‏نحبها من دون كثر المعاريف
‏ والله يقدّرنا نبرهن وفـانا ..

‏ حنّا رقينا باسمها للمشاريف
‏ عهدٍ علينا ما نمنّ بـ عطانا

‏الله ياقاها ، الفتن و الصواديف
‏ و اللي عن دروب الحقيقة توانى
- وارفه

‏⁧ #اليوم_الوطني

تباهي بحسنك على كل الديار
‏وامشي كِبر بين السماء و مزونها

‏سيفك يقيم العدل ويعدل المسار
‏ونخلتك كل الخير في عرجونها

‏وعَلمك لونه لوّن الدنيا خضار
‏وهي من اوّل كان باهت لونها

‏يا حرّةٍ ما تنجبين الا حرار
‏تشيل هم المسلمين متونها

‏دار الفخر قصر السطر بيت القرار
‏لا شبّت الجمرة على غليونها

‏من وحّد حدودك على قب المهار
‏سلّمك لـ رجالٍ تعرف تصونها

‏لا دقّت اجراس الخطر والعج ثار
‏بـ اللي ما يشرى بالذهب يفدونها

‏محبتك ورث الصغار من الكبار
‏الله على اللي حافظٍ مكنونها

‏ما فيه مغرض شافك بعين احتقار
‏الا وتنزع من عيونه نونها
- فارس عايض

"الوطنية.. أن تخلق وظيفة، أن تُطعم مسكين، أن تكسي محتاج، أن تُنير عقل، أن تفتح شباك أمل، أن تنشر المعرفة، أن تبني أسرة، أن تزرع فسيلاً، أن تصدق مع ولي الأمر، ألّا تتاجر براية التوحيد، ألا يتقيك الناس مخافة التخوين"

‏— محمد عصام الخميس -رحمه الله-

يكفنك السحاب وميّ زمزم يغسلك والروح
‏تسابقها ملايكة السما وتهلّي الجنة

‏أبارك للوطن في يوم توحيده وهو مجروح
‏وأقول ان الفرح واجب علينا وحزننا سنة

- غانم الشراري

غفر الله له ورحمه وجعل ما أصابه كفارة له وجزاه عنا وعن المسلمين خير الجزاء.

‏لي سنة خطوتي عجله وصدري سناوي
‏ياعيون المها اللي بين ضلع وعدامه

‏يوم أشدّ الركاب ويوم أحثّ الخطاوي
‏كنّ عيني تشوف الأرض فوق الغمامه

‏يالله بصبح يومٍ ينتصر للهقاوي
‏مثل نصر الإمام اللي بيوم الرغامه

‏أتركيني تحت نجمٍ على الليل ضاوي
‏وش تبين بكلام اللي تثاقل كلامه

‏مابقى لي من دروب الليالي سلاوي
‏غير صوتٍ يصحّيه الشعر من منامه

‏قد غدا الحلم في عين الدريك الهواوي
‏أبعد من المدى في عين زرقا اليمامه

‏يوم أشوف الوجيه اللي بعضها حياوي
‏ودّي انه مايبقى فالوجيه إبتسامه

‏سمّعيني قصيدة من قصيد العطاوي
‏ولا طرقٍ من طروق الهلالي سلامه

‏دبلت كبودنا من كل شاعر وغاوي
‏وملّت سموعنا من كثر نوح الحمامه

‏أشربي من قراح الشعر شرب القهاوي
‏وأقربي من مضارب محتمين الجهامه

‏في حما قايد العنّه بعيد النحاوي
‏وفي ذرا كل شغمومٍ خواله عمامه

‏جيشهم كل ماحان الطلب ما يراوي
‏فوق وسق الذلول وفوق سرج النعامه

‏لو تموت النفوس ولو تموت الرجاوي
‏التخاذل هزيمه والتقاعس رخامه

‏العرب نصرة الدين الحنيف السماوي
‏صفوة الخلق وأكثرهم وقار وكرامه

‏كل ذيبٍ يغنّي للعروبة حمّاوي
‏من طوارف طريف إلين ساحل تهامه

‏يحتمون الدخيل وينطحون البلاوي
‏تحت رأي الزعيم اللي زهته الزعامه

‏أصوّكٍ كل ما هاز الطويله رهاوي
‏تذعن ملوك الأرض لهيبته ولمقامه

‏سيّد الشرق الأوسط في جميع الدعاوي
‏قبل يلبس عقال وقبل يبلغ فطامه

‏طلعته في سماء التاريخ نجمٍ سماوي
‏والسعودي على طاريه يذبح كرامه

‏عاش راس المواطن تحت حكمه غناوي
‏وعاشت المملكة في بشته وفي حزامه

‏يابو سلمان ماننشدك ويش أنت ناوي
‏حط لك درب وتشوف السعودي امامه

‏يتكل بالله الواحد على كل قاوي
‏ويحتزم بالحزام ويعتصب بالعمامه

‏أضرب الأرض ويطيح الجميع متساوي
‏أنت كفّك شداد وكفّ غيرك مسامه

‏ما لجرح العروبة غير فعلك مداوي
‏ولا يبشّر سعدها غير قصر اليمامه

‏عاشت العزوة اللي في نهار العزاوي
‏ترفع الراية الخضرا ليوم القيامه
- مشاري محمد

مرحبا ♥️

كُتبت الأبيات على لسان محمَّد الكبير إلى محمَّد الصغير:


سمّوك يا محمَّد علي واستبشر العالم معاي
من جيت للدنيا وانا بحضن السعادة أرتمي

عشت الفرح في جيّتك كنّي مبشّر في ضناي
و من بشروني بك وقلبي من شعوره معتمي

اغليك من حبّي لابوك اللي من آعز اصدقاي
حتى لو ان ما بيننا عرق ودمك خالف دمي

كان الأمل اللي يبدد ضيقة أيامي وراي
و لا ضاقت الدنيا علي شفته دواي ومحزمي

خوّتْه تشرى بالعمر كله ولا يكفي غلاي
ابوك يا محمَّد فخر يا بخْت من له تنتمي

من جيت يا أغلى ولد والبسمة تعانق شفاي
جعلك تعيش بعزّ ابوك الغالي يا أغلى سمي

صبحكم الله بالخير♥️

اللهم صلِّ وسلم وبارك على نبينا محمد

وأثاري الرخوم رخوم خلقة بدون جدال
‏لو إن معهم قصور ولو إن معهم أباعر

‏ترى الشاعر الرجّال همه يجي رجااااال
‏ما همّه يجي مشهور .. ولا يجي شاعر
- مهمهيَّه

صبحكم الله بالخير