يا إلهي .. لا تدع قلبي رهين ذنوبي
‏ولا تذرني فرد بين العالم المنجنه

‏ولا تكلني نفسي .. اللي ماتدل دروبي
‏كل ما ارشدها لدرب الرشد ، صدّت عنه !

‏إلطف بحالي لا حط ابليس دوبه دوبي
‏ياما صدقته و انا اكثر من تعوذ منه

‏لو اقصر بـ الفروض و لو اطوّل ثوبي ؟
‏ان نسيت النار ؟ عمري مانسيت الجنه !
- بدر بن ذنبوح

مرحبا

جعل عمرٍ راح مني يعود ولا يغيب
‏يوم تغريني قصيدة ويجذبني صدى

‏قبل أطيح من السحابة على بطن القليب
‏وأتمادى من سكوني ولا أعيّن: مدى

‏مايحرّك غافي الغصن صوت العندليب
‏ولا تريّح هجعة الليل بالٍ ما هدى

‏لو لقيت لطعنة الروح ياقلبي: طبيب
‏ما لقيت لمخطي الدرب ياعقلي: قدى
- مشاري محمد

الغياب اجزل من اعذارٍ تجيب اسمنها
خلك اللي كمل غياب .. ومكانه خالي

حاشمك من رجعةٍ ماضيك اجمل منها
من متى والغالي اللي راح يرجع غالي !
- عبدالله ال لزيوح

لا دنا الليل ودنت من ظلمته قسوْ الطواري
‏اوكِل الله روحي الوجعى عسى تلقى فرجها

‏آتضايق.. واقلب الدنيا..واعيش بْدمّ ناري
‏ما تقول إنِّي على قاعٍ موسعةٍ فججها !

‏وشهي الرُّوح الخفيفة،والحنونة،والمِداري..
‏عند روحٍ كل ماتطري علي م اونس غنجها؟
- نوف العثمان

‏أنا عهد حبّك ما ذكرته عشان أنساه!
‏هذا عذري اللي ماله أخوان كالعادة

‏مساري دروبي موحشة، والنجوم أشباه
‏تغرّبت و بطون الصواديف ولّادة

‏غدا الصبر عودٍ شِيْخته ورث من مجناه
‏ولا شافها.. لا في عياله ولا أحفاده

‏بدا الشاعر اللي قبل يبدا تقول: الله
‏جماهيره، اللي كانوا العام حسّاده

‏يعوّد مداه أقرب من يدينه لمخباه
‏لا عوّد هواه أوفى من الموت لزناده

‏ما يشبه يقينه بين مسباحه ومركاه
‏ يقينه وهو ما بين مصحف وسجّادة

‏نِديم الهوى لو ما يسرّك مسير خِطاه
‏ كثر ما تزلّ خْطاه ما زلّ ميعاده

‏ياذات القوام اللي تجيب الهبوب أقصاه
‏لا قام يتوامى عودك أوماية قلادة

‏تقولين: "قلبك" يوم صديت عن مشهاه
‏ جرحني، وأقول السيف ما يجرح غماده!

‏وصلتك غريبٍ ساد حزنه على منفاه
‏يطالع بك آخر ما تبقّى من بلاده
- متعب البقيلي

بدون ال ليش والحسرات وعتابك
فمان الله بدون الآه والتأنيب

تعدّاك الملام وشرهة احبابك
حقرتك فالردى وشلون فعل الطيب

خبيثٍ لو تحب يدين من جابك
بتبقى يالمنافق في محل الريب

تعيّبك الشيم حتى الردى عابك
وجودك في ميادين الرجوله عيب

تذكر والندامه تطرق ابوابك
انا لما نخيتك؟ استجاب الذيب
- مها

ماظن لك فرصة تقدمك الاشناب
‏الا على صْفوف المصلِّين جثه
- طلال العازمي

الملامة على الجينات ياهل الملامة
‏ لحدٍ يقول بنيان المراجل تهاوى

‏ ماورث من هله غير الصلع والرخامة
‏ وحدةٍ ماتعيب ووحدةٍ ماتداوى.
‏- بندر الدويش

كيف بستغرب رداك وكيف اعدّك
‏واحدٍ يتنومس الجمع بـ كلامه

‏شف من انت وشوف ابوك وشوف جدّك
‏والله ان مالك مصدّ من الرخامه !
- منصور السبيعي

سولف إن جا مجال الهرج دقه وجلّه
‏ساعدتك الظروف تعيش دور البطولة

‏فـ التفاصيل .. وغياب الحجج والأدلّة
‏كل من زاد فيه النقص ، يشعب ذلوله

‏ودّي إنّك تطيب وتاخذ المدح !.. كلّه
‏لكن الطيب .. شيٍ ما يجيك بـ سهولة

‏أوسع من الطريق الضيّق .. اللي تدلّه
‏وأعمق من الكلام الفاضي اللي تقوله
- عبدالله السراهيد

راس بلا نوماس ما يعتبر راس
‏كومة عظام جمعتها الرخامة
- سعيد بن راشد

صباح اليوم حافل بالهجاء
المعذره منكم

اكتبوا في البحث هجاء ويطلع لكم المحفوظ بالقناة :)

الطموح الأولي مايعرف استسلامي
لا أزال اخطي خُطاي وهامتي مرفوعه

تشهد دروب المشقّة سعيي ودرهامي
-كلّ خطوة سيّرتني للحلم مدفوعه-

كلّما اكبر سنَه تكبر معاي احلامي
حالها حال الفجر ما قد حجبت طلوعه

وانت ياشخصٍ معاه الحلم يصبح سامي
من غلاك الجمّ صاير لإفتقادك لوعه

فيني من الشوق ما يملا فراغ أيامي
تفضح المشتاق لك تنهيدةٍ مسموعه

آتوجّد كلّما لاح السراب لظامي
ياوجودي لا استطبت الحاجه الممنوعه

عن جنون العاطفه صار العقل متعامي
وقلبي اللي بين ضلعيني خرَج عن طوعه

الحبيب اللي يضحّي في سبيل هيامي
كم على باب الرجاوي احتريت رجوعه

آتحلوى كلّ هاجس يجلبه قدّامي
وآتفدّا ضحكته لي وآتفدّا دموعه

يدري اني اكتبه وانه سبب فإلهامي
وادري انه حافظٍ حبّي مابين ضلوعه
- مها

صبحكم الله بالخير

اللهم صلِّ وسلم وبارك على نبينا محمد

قال الإمام ابن القيم رحمه الله :

‏وكان الصّحابة رضي الله عنهم يستحبّون إكثار الصلاة علىٰ النبي ﷺ يوم الجمعة .
‏قال ابن مسعود: يا زيد بن وهب لا تدع إذا كان يوم الجمعة أن تصلّي على النبيّ ألف مرة .


اللهم صلِ وسلم على نبينا محمد 🤍

انا يارب لو اجرا على الذنب وتزل خطاي
عظايم مغفرتك اكبر من ذنوبي ومن زلّي

إلهي وانت بي أدرى من اسراري ومن نجواي
إلهي وانت لي أقرب من انفاسي ومن ظلّي

من اقصى ديره لـ بيتك سريت وجيتك مْن اقصاي
ادلّك؛ لو تضيعني مشاويري واجي كلّي

ملاذي من مقادير الحياة وداري وملجاي
أمامك يُكشف ستاري واقول لدمعتي هلّي

على بابك وقفت ادعيك طالبتك تجيب دْعاي
إليك المشتكى ياربّ في ترحالي وحلّي

اعرفك فاتحٍ بيبان عفوك ما تردّ الجاي
وجيتك راجيه عفوك، اذا ما جيت لك من لي؟
- مها