كن ما لـ الليل غيري على الدنيا صديق
يوم يجعلني نديمه و يغتاب الصباح

مْتوتر كني اللي يبي ينقذ غريق
ما عرف وشلون ينجيه و ادواه الصياح

انتظر صبحٍ شعاعه على صدري يويق
واغتنيت بـ فضل ربي بـ برقٍ يوم لاح

قامت الوديان من وبله النافع تضيق
و من مصبّه ينبت العشب حتى في البراح

الزمان ظروفه ارهاق نفس و نشف ريق
كم غشيمٍ ساق ظنه و را حلمه و راح

كيف بذخر لـ الليالي و شدتها رفيق
وانا داري ان الليالي على مثلي شحاح

تتعب اقدام الرياجيل لـ المجد العريق
مثل ما الفرّيس تتعب على زرق الرماح

واحدٍ واجه و کافح و واصل في الطريق
كل خطوة ترفعه عزم و تزیده کفاح

من يقابل وجه الايام بـ الوجه الطليق
الخساره عنده اقرب وسيله لـ النجاح
- فهد بن خشمان

‏اناظر فـ السما و اقول يارب السما و القاع
‏عسى اللي صار .. تكفيرة ذنوب و فاتحة توبه

‏غريبه كيف راودك الندم يابنادم الطمّاع
‏يادوب النفس نالت ماتبي و القلب يادوبه

‏صحيح ان الحكي بـ الفايته مايبري الاوجاع
‏لكن .. اقل شي يذكّر النسّاي بذنوبه

‏همومي واجد .. و زلّاتي كثيره .. و عمري ضاع
‏وصبري .. لا يزال يطارد الآمال بـ اعجوبه

‏تقول ان الوحيد اليا تضايق مالقى فزاع
‏وصدقتك و كثّرت اصدقاي و صاروا عقوبه

‏عزاي اني حفيد اللي عزاويهم على المطلاع
‏معاصير الدول .. يوم الإمام يجيّش شعوبه

‏ياكم مرّه يضيّعني التواضع .. لكن الاوضاع
‏ترد الطيّب اللي مستحيل يغيّر اسلوبه

‏واذا طاح المطر و البرق لاح و قرّب المرباع
‏ذكرت اللي تجيني راضيه و تروح مغصوبه

‏سلام الله على وجهٍ .. عليه الخاطر الملتاع
‏مايبرد لو نسانيس الشمال ملاعبه ثوبه

‏وجودي يوم راحت من يدي و انا طويل ذراع
‏وجود الشايب اللي برّ بعياله و باروا به !
- بدر بن ذنبوح

مساكم الله بالخير

على جرة الذكرى تهب الهبوب شحاح
‏بقت خطوة يتوه الغريب بـ مواجعها

‏لو أني بـ أرجع لذة الماضي اللي راح
‏بقايا الأمور الباقية من يرجعها

‏خذيني مابين جفونك ورمشك الذباح
‏وعيونٍ تقول أن السهوم بـ مطالعها

‏أحس بـ مشاعر نبرتك لا بغيت ارتاح
‏وأنا والله أني ما أعرف وين سامعها

‏ما قبلك حدٍ عوّد لـ عيني بعد ماطاح
‏ولا بعدك إلا الضحكة اللي مضيّعها

‏إذا أن الحياة اللي معك هم ماينزاح
‏أبعيشها بـ همومها و بـ مدامعها

‏تمادى السكوت اللي دفنته ورا الأفراح
‏هذي ضحكتي لي عام و أنا أتصنعها

‏دفعت الثمن في لحظةٍ عشتها مرتاح
‏أبضيع فيها و ضاع كل العمر معها
- علي حامد

أسافر على متن السحَابة، وأدفّ الريح
‏ورى غربتك، وآخر منازلك، وبلادك

‏وأمر الليالي بالطواريق والتجرّيح
‏لا جاد الزمان بكل طعنة.. ولا جادك

‏أعرفك وأعرف انّك عمر مايبي توضيح
‏يطول المدى ماخانت البيد ميعادك

‏عسى ليلةٍ فيها من الشكّ والتبريح
‏فدا ليلةٍ فيها مجيّك ومعوادك
- مشاري محمد

معي قلب لا هبّت عليه الهبوب يحنّ
‏ياويل القلوب القاسية من عذاب الله

‏يقولون لي هذي حياتك وعيش وغنّ
‏وأنا أقول: كيف أعيش والقدس محتلّه
- مشاري محمد

اللهم صلِّ وسلم وبارك على نبينا محمد

مساكم الله بالخير

" الليالي تطلق عنان الحزن وتعنّه
‏والصدوف تحدّ بـ أسباب الفرح شلفاها

‏ما حداني لـ القصيد ولـ السهر والونّه
‏غير حزنٍ ما خذا روحي ولا خلّاها "
‏- محمد ال شواي

أتحرى مجيّك وأتشوّق لقاك
‏والمُتيّم عقارب ساعته تقرصه

‏كيف ضحّيت في قلبٍ يدوّر رضاك ؟
‏الذهب ما يفرّط فيه من يبخصه

‏ليه تجبرني اكره كل ذكرى معاك
‏من ملك في الحياة أحباب وش ينقصه ؟

‏لا تراهن على الحُب ويغّرك غلاك
‏قلبي أثمن من إن إنسان يسترخصه
- سعود مهدي

أنا أحق بـ انسام الهوا من غصون الراك
‏لو أني ما اميل أن هبت النود بزياده

‏معي من بعد هذا الغياب الطويل ادراك
‏ادراك اللي يدري بـ الخطا كل ماعاده

‏افك الستاير و انتظر من ورا الشباك
‏متى الليل يجبر خاطري واكسر سهاده

‏حبيبي من الـ لبيه لا يا عساه فداك
‏ماعندي لك الا قلبٍ بما نبض جاده

‏يناديني النسيان و اسمعّه ذكراك
‏على صوت فيروز وعلى القهوة الساده

‏يازين الحظوظ اللي رمتني على مرماك
‏عنودٍ تقود الصيد و اليوم منصاده

‏لا تستغرب اللهفه على ضحكتك ورضاك
‏رضاك السحاب و ضحكتك صوت رعاده

‏تماديت في قلبٍ جبره الحنين و جاك
‏و معجبني انه فيك مسلوب الإراده

‏تمادى علي أكثر ، مادام الغلا ولاّك
‏لك القلب منقاد و لك النفس منقاده

‏أحبك ، قبل لا أختار في وصلك و فرقاك
‏ولا فيه احد يختار موته و ميلاده

‏وش الورد و ليال الهوى و الشعر لولاك ؟
‏يا فرحة ملذات العمر و اجمل أعياده

‏انا لو دريت اني بـ احبك قبل لا القاك
‏ماعشت آتمنى حظ " ليلى و ولادّه "

‏وانا لو عرفت أسمك قبل طلة محياك
‏تبي تشوف حرف "الباء" على عنقي قلاده
- العنود الواصلية

مساكم الله بالخير

عليك الغلا والشوق ينساق لك بإهدار
أساس المشاعر انت يا سيّد اشواقي

فدا طلّتك قدامي الدار واهل الدار
ابيع العمر كلّه فدا حْضورك الراقي

أنا كلّما شفتك نبت فـ ضلوع ازهار
دخيل العيون الناعسه ترخي وثاقي

وش الحب لولا طلةٍ تخطف الانظار
من المبسم الآسر مغيبي ومشراقي

أملّ الاماكن والبشر واكره التكرار
ومعاك اعشق صغار التفاصيل باعماقي

سريتك عمر ماقلت يا طول هالمشوار
على جرتك سقت الخطى وانكسر ساقي

كبير القدر دايم جروحه تصير كْبار
وانا مابكيت إلا على هونت فراقي

عقوقك دمَحْها الحبّ لانّه الابن البار
عداك الملام وشرهتي واشين اخلاقي

عذرتك جعل عذري فدا كذبة الاعذار
اذا ماتت الاعذار؟ ظلّ العمر شاقي

عسى قلبك الخيّر يخالف هوى الاشرار
وترجع على خبري وعلى هقوة الهاقي

عرفتك كريم ومجلسك مدهل الخطّار
جعل دكّة خطاهم فدا صيتك الباقي

أمانه تشحّ بضحكتك كبْر واستهتار
بلا ضحكتك وشلون ينشاف برّاقي؟

اببقى على عهدك مدام الغلا مدرار
لنا ماضيٍ لاجله رميت آخر اوراقي

خطاطيبي الواجد رفضت ايهم اختار
أنا ما أبي إلا -انت- يا كلّ عشاقي

يهون الفراق وسيفه الدامي البتّار
اذا ان الوفا ما وقّف بوجه خفّاقي
- مها

مساكم الله بالخير♥️

تعال ارقد على كف الحنان وودع الترحال ..
يلـمّـك ساعدٍ لـمّه عذابٍ ماهو بـ قده

تعال وركّد وصالك على جال الضلوع دلال
ولحّق باقي ضلوعي ونار الشوق ممتده

بقهوي لمة جروحي واصب لخاطري فنجال
وأمدّه للخفوق اللي غدا ندّي وأنا ندّه

تكسَّر خاطر الفرحه وأنادي للجفا بوصال ..
أثاري هالجفا سيفٍ غرس في هالحشا حده

أنا حروة نذير الموتْ بدا في خافقي يجتال
طفقت أخصف على عورة ذنوبي من ورق وده

تعالي لعنبوا وقتٍ يدنِّي قيمة الرجّال ..
يمد لخافقه موته ولا يقوى على رده

تعالي وامسحي دمعٍ على خد الشهامة سال ..
نزف من قوة الرجّال ضَعفٍ باح لك سده

تعالي شوفي قليبي على حطة يدك لازال ..
على حد الشعور اللي تفارقنا على حده

- فواز المقبل
" خمرة فاء "

ساد غيم ولاح برق وطاح دمع وسال وادي
يا عيوني وش بقى من دمعك اللي تذرفينه

بين (لا تبحث خفاك) و (لا حياه لـ من تنادي)
أنقطع حبل الرجا المربوط في النفس الحزينه

لا نويت أسلى عن الحزن بـ طويلات المبادي
قامت الذكرى وراي تقول:جعل الله يعينه

من كثر ما تضغط الدنيا علي وأقول عادي
صرت أواجه وقتي الغلاب وأصافح يمينه

الهجر يقدر يسوي ما تسويه الأعادي
والوصل يقدر يعيش صاحبه وضع السكينه

يا حفيدٍة متعبين الخيل مروين الهنادي
كل بيت فيك يلبس له عن الأبيات زيِنه

لا تلوميني ليا جيت لك كلي مفادي
من يشوفك مستعد يسوق لك عمره رهينه

في وصوفك يعجز لساني ولا يعجز فؤادي
يوصلك شعري من الأعماق كنّك تخطفينه

أتعذّر كل ليله بـ الشعور اللا إرادي
كن ما ذا بـ الشعور اللي من أول تعرفينه

لا يهمّك لو يقولون البحر ما هو بـ هادي
المهم أن البحر ما طيّر شراع السفينه

أطلبيني كل شي إلا التهاون في المبادي
من تهاون في المبادي يا عسى ربي يهينه

عاشقً غادي بـ حبك والله أن ماهو بـ غادي
لو ورا حبك يبيع العمر و يضيّع سنينه
- فهد بن خشمان

مرحبا

- متعب البقيلي

‏سقى الله يوم خطواتي قصايد و المدى قرطاس
‏تحت ليلٍ ،تحته يضحّي العاشق بمعشوقه

‏يابوي ، الشاعر الي حطّ حتى فالجماد إحساس
‏يشوف ان كل فكرة تنحني لرضاك مطروقه

‏لكسرك ليت مالي ذاكرة ، و اسلى مع الجلّاس
‏نديم الذكريات تقطّع الانفاس معلوقه

‏لي أكثر من ثلاث سنين وضلوعي وكر قرناس
‏متى و الحرّ من كسر الهداد يوالف سبوقه !

‏خليل الجود من عاد الزمن جوع و ظما و عماس
‏علامه شحّ دوني بمرضه و عروقي عروقه !

‏لا حنّه من مجاهيم الليالي كل طيّب ساس
‏شلون اصدّ و انا اول حفيد يشيل طاروقه

‏رغم ما به لا زالت مرحباه تسابق النسناس
‏ لو ان باقي كلامه ينجرح من ثقل منطوقه

‏لا مرّ اسمه و شفت ونعم ماتسبق عسى ما باس
‏ تقف روحي وقوف الدمعة الي في طرف موقه

‏اشوف الموت يوم اشوف ضعفه في عيون الناس
‏وجودي ليت كبدي من حيود الأرض مخلوقه

‏ آحايل خطوته و ادرى تعب ساقه من المجلاس
‏لااخذ منه الكْبر حيله وهو ماتوخذ حقوقه

‏اسولف له بوقع الرايح الي يجذب العسّاس
‏و لو ما عاد يجذبه الحيا لا لاحت بروقه

‏عليّ ارضيه و احرر يدينه من قيود الياس
‏و لا ايّس منه دام الأرض تحته و السماء فوقه
- متعب البقيلي

مساكم الله بالخير♥️