طيّب الراس ان حضر وان غاب له قدر ومهابه
في ميادين الكرم والجود له صوله وجوله

تعرفه…لو ما عرفت اسمه ولا دقيت بابه
صيته السابق على اسمه شابه الما في هطوله

بيّض الله وجهه اللي شاب في بادي شبابه
من بياض مْواقفه بانت على وجهه فعوله

ان عطى؟ ما تعرف يدينه وش انفق من حسابه
ما يباريه فكرم يمناه غير ظْلال زوله

من عرف -زيد- يتمنى بينه وبينه قرابه
فالقبال السمح آيه ترجمت معنى قبوله

لا ضحَك ولّا زعَل ولّا تمادى فـ كتئابه
صاحب الوجه السموح تْحبّه بأربع فصوله

احمد الله كلّما لبّى نداي اللي انتخى به
وآتعزوى بخوّته لا ضامني الوقت بعذوله

لا استضاقت دنيتي في يوم؟ كان اكثر رحابه
يبتسم كوني معاه وينشرح صدري بْسهوله

منطقه عذب وسواليفه مثل وبل السحابه
في قساه ولينه الكلمة من شفاه مْعسوله

اشهد انه دعوةٍ قيلت فـ توقيت استجابه
جامعٍ طيب الخصال من الشهامه والرجوله

من خبرته وهو الاكثر بأس والاكثر صلابه
والمراجل لاعبه في حسبته منذ الطفوله

مورقٍ غصنه لكلّ الناس بحضوره وْ غيابه
جعلني يوم اشهد إزهار الغصن ما اشهد ذبوله

توقف الكلمات من تقديرها لحضرة جنابه
وينتهي كل المديح بكلمةٍ عجزت تطوله
- مها

مساكم الله بالخير

اللهم صلِّ وسلم وبارك على نبينا محمد

مساكم الله بالخير♥️

احن القصيد الذرب من سوء الاستعمال
‏الا. عدّه الي ما يثمٰنـة .. في جمعة

‏اغبط الي يحبكه مثل حبك بن هذال
‏ومن ينحته مثل الشمـالي ف ابن جمعة

‏انا الي يحدونه معادينه . . ولا زال
‏يحاضي دموعة .. كنه يحاضي ، السمعة

‏بغوا طيحة الرجال من دمعة الرجال
‏وطاحوا معادينه ولا طاحت الدمعه

‏تزين النفوس ان شافوا البدر عاد هلال
‏وتشين النفوس اليا طلع لـ النجم لمعه

‏سقوط النبي فالجب مدة ثلاث ليـال
‏دوافع سبايبها .. من الحسد والطمعة

‏اميّز شعور الحاسد .. ان قال وان ماقال
‏تغيضه حروف اسمي لا مرت على سمعه

‏لو ان الحسد مثل الورم طبّه استئصال
‏ عرفنا دوا الي فيه الاورام مجتمعه

‏عيون العدو مثل السهم والذكر سربال
‏تحايل يصيب القلب ، واحتلت في قمعة

‏غزاني لجل يكسر طموح و يهد امال
‏ونطحته بـ ترتيـل الفلق و انفلق جمعه

‏بعد كنت اسهّل عقدة الحبل لـ الحلال
‏حداني وصرت اصعب من اللغز و الرمعة

‏وجدت الخلل فـالحِل والحَل فالترحال
‏عن العالم الي لا استسيغه ولا استمعة

‏من يلومني يوم اطوي الدرب طي حبال
‏وانا خابر ان عمر البنادم عمر شمعه

‏محد سالم من الحسد حتى فقير المال
‏يحسده غني المال في موتة الجمعة
- خالد بن طفلان

كن ما لـ الليل غيري على الدنيا صديق
يوم يجعلني نديمه و يغتاب الصباح

مْتوتر كني اللي يبي ينقذ غريق
ما عرف وشلون ينجيه و ادواه الصياح

انتظر صبحٍ شعاعه على صدري يويق
واغتنيت بـ فضل ربي بـ برقٍ يوم لاح

قامت الوديان من وبله النافع تضيق
و من مصبّه ينبت العشب حتى في البراح

الزمان ظروفه ارهاق نفس و نشف ريق
كم غشيمٍ ساق ظنه و را حلمه و راح

كيف بذخر لـ الليالي و شدتها رفيق
وانا داري ان الليالي على مثلي شحاح

تتعب اقدام الرياجيل لـ المجد العريق
مثل ما الفرّيس تتعب على زرق الرماح

واحدٍ واجه و کافح و واصل في الطريق
كل خطوة ترفعه عزم و تزیده کفاح

من يقابل وجه الايام بـ الوجه الطليق
الخساره عنده اقرب وسيله لـ النجاح
- فهد بن خشمان

‏اناظر فـ السما و اقول يارب السما و القاع
‏عسى اللي صار .. تكفيرة ذنوب و فاتحة توبه

‏غريبه كيف راودك الندم يابنادم الطمّاع
‏يادوب النفس نالت ماتبي و القلب يادوبه

‏صحيح ان الحكي بـ الفايته مايبري الاوجاع
‏لكن .. اقل شي يذكّر النسّاي بذنوبه

‏همومي واجد .. و زلّاتي كثيره .. و عمري ضاع
‏وصبري .. لا يزال يطارد الآمال بـ اعجوبه

‏تقول ان الوحيد اليا تضايق مالقى فزاع
‏وصدقتك و كثّرت اصدقاي و صاروا عقوبه

‏عزاي اني حفيد اللي عزاويهم على المطلاع
‏معاصير الدول .. يوم الإمام يجيّش شعوبه

‏ياكم مرّه يضيّعني التواضع .. لكن الاوضاع
‏ترد الطيّب اللي مستحيل يغيّر اسلوبه

‏واذا طاح المطر و البرق لاح و قرّب المرباع
‏ذكرت اللي تجيني راضيه و تروح مغصوبه

‏سلام الله على وجهٍ .. عليه الخاطر الملتاع
‏مايبرد لو نسانيس الشمال ملاعبه ثوبه

‏وجودي يوم راحت من يدي و انا طويل ذراع
‏وجود الشايب اللي برّ بعياله و باروا به !
- بدر بن ذنبوح

مساكم الله بالخير

على جرة الذكرى تهب الهبوب شحاح
‏بقت خطوة يتوه الغريب بـ مواجعها

‏لو أني بـ أرجع لذة الماضي اللي راح
‏بقايا الأمور الباقية من يرجعها

‏خذيني مابين جفونك ورمشك الذباح
‏وعيونٍ تقول أن السهوم بـ مطالعها

‏أحس بـ مشاعر نبرتك لا بغيت ارتاح
‏وأنا والله أني ما أعرف وين سامعها

‏ما قبلك حدٍ عوّد لـ عيني بعد ماطاح
‏ولا بعدك إلا الضحكة اللي مضيّعها

‏إذا أن الحياة اللي معك هم ماينزاح
‏أبعيشها بـ همومها و بـ مدامعها

‏تمادى السكوت اللي دفنته ورا الأفراح
‏هذي ضحكتي لي عام و أنا أتصنعها

‏دفعت الثمن في لحظةٍ عشتها مرتاح
‏أبضيع فيها و ضاع كل العمر معها
- علي حامد

أسافر على متن السحَابة، وأدفّ الريح
‏ورى غربتك، وآخر منازلك، وبلادك

‏وأمر الليالي بالطواريق والتجرّيح
‏لا جاد الزمان بكل طعنة.. ولا جادك

‏أعرفك وأعرف انّك عمر مايبي توضيح
‏يطول المدى ماخانت البيد ميعادك

‏عسى ليلةٍ فيها من الشكّ والتبريح
‏فدا ليلةٍ فيها مجيّك ومعوادك
- مشاري محمد

معي قلب لا هبّت عليه الهبوب يحنّ
‏ياويل القلوب القاسية من عذاب الله

‏يقولون لي هذي حياتك وعيش وغنّ
‏وأنا أقول: كيف أعيش والقدس محتلّه
- مشاري محمد

اللهم صلِّ وسلم وبارك على نبينا محمد

مساكم الله بالخير

" الليالي تطلق عنان الحزن وتعنّه
‏والصدوف تحدّ بـ أسباب الفرح شلفاها

‏ما حداني لـ القصيد ولـ السهر والونّه
‏غير حزنٍ ما خذا روحي ولا خلّاها "
‏- محمد ال شواي

أتحرى مجيّك وأتشوّق لقاك
‏والمُتيّم عقارب ساعته تقرصه

‏كيف ضحّيت في قلبٍ يدوّر رضاك ؟
‏الذهب ما يفرّط فيه من يبخصه

‏ليه تجبرني اكره كل ذكرى معاك
‏من ملك في الحياة أحباب وش ينقصه ؟

‏لا تراهن على الحُب ويغّرك غلاك
‏قلبي أثمن من إن إنسان يسترخصه
- سعود مهدي

أنا أحق بـ انسام الهوا من غصون الراك
‏لو أني ما اميل أن هبت النود بزياده

‏معي من بعد هذا الغياب الطويل ادراك
‏ادراك اللي يدري بـ الخطا كل ماعاده

‏افك الستاير و انتظر من ورا الشباك
‏متى الليل يجبر خاطري واكسر سهاده

‏حبيبي من الـ لبيه لا يا عساه فداك
‏ماعندي لك الا قلبٍ بما نبض جاده

‏يناديني النسيان و اسمعّه ذكراك
‏على صوت فيروز وعلى القهوة الساده

‏يازين الحظوظ اللي رمتني على مرماك
‏عنودٍ تقود الصيد و اليوم منصاده

‏لا تستغرب اللهفه على ضحكتك ورضاك
‏رضاك السحاب و ضحكتك صوت رعاده

‏تماديت في قلبٍ جبره الحنين و جاك
‏و معجبني انه فيك مسلوب الإراده

‏تمادى علي أكثر ، مادام الغلا ولاّك
‏لك القلب منقاد و لك النفس منقاده

‏أحبك ، قبل لا أختار في وصلك و فرقاك
‏ولا فيه احد يختار موته و ميلاده

‏وش الورد و ليال الهوى و الشعر لولاك ؟
‏يا فرحة ملذات العمر و اجمل أعياده

‏انا لو دريت اني بـ احبك قبل لا القاك
‏ماعشت آتمنى حظ " ليلى و ولادّه "

‏وانا لو عرفت أسمك قبل طلة محياك
‏تبي تشوف حرف "الباء" على عنقي قلاده
- العنود الواصلية

مساكم الله بالخير

عليك الغلا والشوق ينساق لك بإهدار
أساس المشاعر انت يا سيّد اشواقي

فدا طلّتك قدامي الدار واهل الدار
ابيع العمر كلّه فدا حْضورك الراقي

أنا كلّما شفتك نبت فـ ضلوع ازهار
دخيل العيون الناعسه ترخي وثاقي

وش الحب لولا طلةٍ تخطف الانظار
من المبسم الآسر مغيبي ومشراقي

أملّ الاماكن والبشر واكره التكرار
ومعاك اعشق صغار التفاصيل باعماقي

سريتك عمر ماقلت يا طول هالمشوار
على جرتك سقت الخطى وانكسر ساقي

كبير القدر دايم جروحه تصير كْبار
وانا مابكيت إلا على هونت فراقي

عقوقك دمَحْها الحبّ لانّه الابن البار
عداك الملام وشرهتي واشين اخلاقي

عذرتك جعل عذري فدا كذبة الاعذار
اذا ماتت الاعذار؟ ظلّ العمر شاقي

عسى قلبك الخيّر يخالف هوى الاشرار
وترجع على خبري وعلى هقوة الهاقي

عرفتك كريم ومجلسك مدهل الخطّار
جعل دكّة خطاهم فدا صيتك الباقي

أمانه تشحّ بضحكتك كبْر واستهتار
بلا ضحكتك وشلون ينشاف برّاقي؟

اببقى على عهدك مدام الغلا مدرار
لنا ماضيٍ لاجله رميت آخر اوراقي

خطاطيبي الواجد رفضت ايهم اختار
أنا ما أبي إلا -انت- يا كلّ عشاقي

يهون الفراق وسيفه الدامي البتّار
اذا ان الوفا ما وقّف بوجه خفّاقي
- مها

مساكم الله بالخير♥️