تركت للريح ما يطفي ضيا.. شمعتين
‏متعلقه في طرف ليله بسلسالها

‏مثلي وانا نازحٍ من غربة المحبطين
‏تردني قهوةٍ سمرا - بفنجالها

‏عليك من خفقة الطير امنيات السنين
‏وعليّ من دعوة امي، ريحة اجلالها
- عبدالعزيز الدوسي

شعوري أطول من مدى الأيام يالترف الغيور
‏يالله بصبح تزفّه أنسامك و شمسٍ مشرقه

‏آخايل اللهفة على لاماك و سنيني دهور
‏و على ثمانك جيتك اسابق ظلالي و اسبقه

‏أنظرلك بعين العمى و اصونك بصمت الوقور
‏بس الغريب آمرّك بضيقة و آعوّد بغلقة

‏عن حاجتي لو اهرج للناس بالصوت الجهور
‏يمكن يعوّد حبل صوتي مثل حبل المشنقة
- متعب البقيلي

على الله يا اول دروب المساري و اخر المشراف
‏تحت ليلٍ : تغشاه الملام .. و عبّر بـ نوده

‏يدف من الجروح اللي تحرك كل وزن و قاف
‏و يرشد كل كلمه تايهه و تروح مقصوده

‏من سيوف الكلام الحاد والموجع ماكنت اخاف
‏وصرت .. اللي لو يمره كلامٍ عادي .. يكوده

‏لا ضاقت في عيون المنجرح متراميّة الاطراف
‏تساوت عنده ايام الزمان بـ بيضه و سوده

‏يانوره و ان تغنى نايح الورقا على الصفصاف
‏لقيتك في زوايا البال مشكوره و محموده

‏تماديتي على قلبٍ تحسبينه ماهو بـ إعاف
‏بعد ما اسقاك من وافر أحاسيسه ومن جوده

‏لقاك احلا محطاته و حلمه و أول الاهداف
‏و عرف قيمة حياته في يديك و قيمة وجوده

‏تغرّب معك و اروى في تواجدك الشعور الجاف
‏و تغرّب عنك و جف شعوره ومات وذوى عوده

‏لو ان ما بينا بعد و مشاريه و زعل و خلاف
‏مصير المغترب لا ابطت عليه الغيبه العوده

‏اثر الارواح جند مجنّده للكره و الميلاف
‏احايلها و هي في دبرة الرحمن معقوده

‏احبك و اكره التهميش و التقليل و الاجحاف
‏احبك و الشعور ابعد من التعبير و حدوده

‏ذكرتك بـ الدروب اللي ماجرى خوضها الخواف
‏ونسيتك يوم يقبل لك بـ مأذونه و بـ شهوده
- ناصر بن يحيى

مساكم الله بالخير♥️

يـ البعيده و الله إن مالي على البعد إستطاعه
قلبي اللي كان متقوي له أيام متهالك

لا تحسبين الدموع الزرق من قل الشجاعه
و الله إن الشوق ما عمره رحم (وانتي كذلك)

ما يليق الضعف في خال الرسول من الرضاعه
مير ما باقي بـ عيني دمعه إلا سقتها لك

"عنتر " اللي تجفل الفرسان من سطوة ذراعه
يبكي اليا طرّوا السمّار " عبله بنت مالك "

لا تخليني : ترى ما فيه أشر من القطاعه
لا تخليني و مريني ليا مريت بالك

تسألين تحبني؟ مدري جهل و لا لكاعه
أبك أنا اللي شفت حبة خالك وحبيت خالك !

راح حبك لين تفنی فانیه و تقوم ساعه
ما تعوضني خصال الناس عنك و عن خصالك

أنتي النسوه و نون النسوه و واو الجماعه
أنتي أعجوبه و لا يعجب (جمال) إلا جمالك

ف القلوب الخضر حبك ينتشر مثل الإشاعه
لين كثرتي محبينك وقللتي وصالك

لا وقفتي كنك تقولين قل : سمعاً وطاعه
و لا مشيتي كنك تقولين بشر: كيف حالك؟

من يشوفك لا تحدينه على كنز القناعه
و الله انه ما هو بـ قانع قبل يقعد قبالك
- جمال بندر

مساكم الله بالخير

اللهم صلِّ وسلم على نبينا محمد

‏من أجلِّ معاني المحبة للرسولﷺ، ذكرهُ في يومٍ يحبه، واليوم جمعة، وهو من أجلِّ الأيام استحبابًا في ذكره، وكثرة الصلاة عليه، وإن أردت امتحان حبك له، فسأل نفسك، كم تصلي عليه في هذا اليوم الفضيل!؟
‏وكلما زادت محبتك له؛ زاد ذكرك له، وصلاتك عليه، أفضل الخلق لا مثله ولا قبلهﷺ.

مساكم الله بالخير

مرحبااااا ، ماهي بـ مررة ولا عشرين مررة
لين يقطع صوتي ويبتدي ترحييب عيـني

من ثلاث سنين مـال الفرح مثقـال ذررة
انقطعنا عن بعضنا .. و قفّت بي سنيني

ودي ارحّب و اهلّي واعاتب و اتشررّه
وودي اقبّل جبينك واصافحك بـ يميني

آصلك والوصل كنه على العاتق مبّرره
مثل ما ابّر فـ خواني و ابرّ فـ والديني

كنت احسب الصوت ماهو يرد الروح مررّه
و اثر صوتك لا سمعته يرد الروح فيني
- خالد بن طفلان

حبيبي، وش مصير الشعر لولا طلَّة محيَّاك؟
دخيل الله لا تقتل هواي، وتجرَح مزوحي!

تخيّرتك وأنا ماني بـ جاهل وجهك، ومبداك
أشوفك ديرةٍ ضمَّت مداي، ونصف من روحي
- محمد السلطان

مساكم الله بالخير

طيّب الراس ان حضر وان غاب له قدر ومهابه
في ميادين الكرم والجود له صوله وجوله

تعرفه…لو ما عرفت اسمه ولا دقيت بابه
صيته السابق على اسمه شابه الما في هطوله

بيّض الله وجهه اللي شاب في بادي شبابه
من بياض مْواقفه بانت على وجهه فعوله

ان عطى؟ ما تعرف يدينه وش انفق من حسابه
ما يباريه فكرم يمناه غير ظْلال زوله

من عرف -زيد- يتمنى بينه وبينه قرابه
فالقبال السمح آيه ترجمت معنى قبوله

لا ضحَك ولّا زعَل ولّا تمادى فـ كتئابه
صاحب الوجه السموح تْحبّه بأربع فصوله

احمد الله كلّما لبّى نداي اللي انتخى به
وآتعزوى بخوّته لا ضامني الوقت بعذوله

لا استضاقت دنيتي في يوم؟ كان اكثر رحابه
يبتسم كوني معاه وينشرح صدري بْسهوله

منطقه عذب وسواليفه مثل وبل السحابه
في قساه ولينه الكلمة من شفاه مْعسوله

اشهد انه دعوةٍ قيلت فـ توقيت استجابه
جامعٍ طيب الخصال من الشهامه والرجوله

من خبرته وهو الاكثر بأس والاكثر صلابه
والمراجل لاعبه في حسبته منذ الطفوله

مورقٍ غصنه لكلّ الناس بحضوره وْ غيابه
جعلني يوم اشهد إزهار الغصن ما اشهد ذبوله

توقف الكلمات من تقديرها لحضرة جنابه
وينتهي كل المديح بكلمةٍ عجزت تطوله
- مها

مساكم الله بالخير

اللهم صلِّ وسلم وبارك على نبينا محمد

مساكم الله بالخير♥️

احن القصيد الذرب من سوء الاستعمال
‏الا. عدّه الي ما يثمٰنـة .. في جمعة

‏اغبط الي يحبكه مثل حبك بن هذال
‏ومن ينحته مثل الشمـالي ف ابن جمعة

‏انا الي يحدونه معادينه . . ولا زال
‏يحاضي دموعة .. كنه يحاضي ، السمعة

‏بغوا طيحة الرجال من دمعة الرجال
‏وطاحوا معادينه ولا طاحت الدمعه

‏تزين النفوس ان شافوا البدر عاد هلال
‏وتشين النفوس اليا طلع لـ النجم لمعه

‏سقوط النبي فالجب مدة ثلاث ليـال
‏دوافع سبايبها .. من الحسد والطمعة

‏اميّز شعور الحاسد .. ان قال وان ماقال
‏تغيضه حروف اسمي لا مرت على سمعه

‏لو ان الحسد مثل الورم طبّه استئصال
‏ عرفنا دوا الي فيه الاورام مجتمعه

‏عيون العدو مثل السهم والذكر سربال
‏تحايل يصيب القلب ، واحتلت في قمعة

‏غزاني لجل يكسر طموح و يهد امال
‏ونطحته بـ ترتيـل الفلق و انفلق جمعه

‏بعد كنت اسهّل عقدة الحبل لـ الحلال
‏حداني وصرت اصعب من اللغز و الرمعة

‏وجدت الخلل فـالحِل والحَل فالترحال
‏عن العالم الي لا استسيغه ولا استمعة

‏من يلومني يوم اطوي الدرب طي حبال
‏وانا خابر ان عمر البنادم عمر شمعه

‏محد سالم من الحسد حتى فقير المال
‏يحسده غني المال في موتة الجمعة
- خالد بن طفلان

كن ما لـ الليل غيري على الدنيا صديق
يوم يجعلني نديمه و يغتاب الصباح

مْتوتر كني اللي يبي ينقذ غريق
ما عرف وشلون ينجيه و ادواه الصياح

انتظر صبحٍ شعاعه على صدري يويق
واغتنيت بـ فضل ربي بـ برقٍ يوم لاح

قامت الوديان من وبله النافع تضيق
و من مصبّه ينبت العشب حتى في البراح

الزمان ظروفه ارهاق نفس و نشف ريق
كم غشيمٍ ساق ظنه و را حلمه و راح

كيف بذخر لـ الليالي و شدتها رفيق
وانا داري ان الليالي على مثلي شحاح

تتعب اقدام الرياجيل لـ المجد العريق
مثل ما الفرّيس تتعب على زرق الرماح

واحدٍ واجه و کافح و واصل في الطريق
كل خطوة ترفعه عزم و تزیده کفاح

من يقابل وجه الايام بـ الوجه الطليق
الخساره عنده اقرب وسيله لـ النجاح
- فهد بن خشمان