صبحكم الله بالخير🤍

في خيارات عمري مالقيتك متاحه
‏قلت ابسرقك واخلي وهمنا حقيقه

‏في مساحة نحرك اوجد لنفسي مساحه
‏ومن غدى فيك جعله مايعين طريقه

‏منهكتني ظروف الوقت واحتاج راحه
‏وفي محياك نورٍ كم جذبني بريقه

‏وجه الله خلقه من الرضا والسماحه
‏كيف اشوفه مثل باقي وجيه الخليقه؟
- بندر الدويش

ارحبي يا اللي تزاحم لك اسراب القلوب
‏كنها تزاحم الناس في مشعر مِنى
‏
‏اشكريني يوم احنّك من كبار الذنوب
‏واعذريني يوم أزيدك مع العنوة .. عنا
‏
‏الضمير الحيّ نوعٍ من أنواع الحروب
‏" يا ضمير مدور المصلحة نوم الهنا "
‏
‏ما قدر يكسب محبّتْك يا الظبي اللعوب
‏غير أنا وأعوذ بالله من كلمة أنا
‏
‏ان تركتيني قتيلٍ على مفرق دروب
‏اكتبي فتّانة العصر مرّت من هنا
‏
‏واحفري قبرك وزاني وطيحي دوب دوب
‏ودي أقابلْلك لا قمت في دار الفنا
‏
‏والله لا وجهك بعادي ولا قلبي بطوب
‏مير ميلي لين اشوف المنايا والمُنى
‏
‏لا تشكّلتي مع الريح وانسام الهبوب
‏ما لقيت مْن العبارات غير الله لنا
- جمال بندر

‏"ما قدر يكسب محبّتْك يا الظبي اللعوب
‏غير أنا وأعوووذ بالله من كلمة أنا :) "

"اكتبي فتّانة العصر مرّت من هنا " ااالله

انتي على الثوب الأبيض ما انتي من البنات
‏من بطن غيمه تشبّ الشمس بأطرافها

‏تكلّمي ،يمكن يكون الكلام أُغنيات
‏ترقص لها الارض مشتاها ومصيافها

‏والا أضحكي لين اشوف ان الاماني شتات
‏واقول للضحكه اللي عاااش من شافها

‏اما اطلبيني عمر ولا اطلبيني ممات
‏يمكن تخفّف على نفسي تلهافها
‏- ناصر مناحي

صبحكم الله بالخير🤍

‏ما انست في غربتي من جانب الطور نار
‏( اجِد عليهاااا هُدى / ولـا ااعود بقبس )

‏في زمهرير الشقى ، و الخوف و الانتظار
‏محـتاج جذوه و اشب فـ كل حلمٍ يبس )

‏سـنـيـن و القلب يـتـبـع كل بسمة نهار !
‏و يدوّر مْن النـوايـا البـيـض : ما ينلـبـس

‏ظن البشر دايماً ماااا بين ( ذُل و وقـار )
‏و ابئ يكون فـ خيـارات البشر : منحبس

‏ونادت جناحينه مزون السحايب و طار :
‏للي لها وجه يضحك له : ولاا قد عبس )

‏مستودع الارض غروٍ لـو هَرج بـ اختصاار
‏كنك تذوّق من الـخَرّوب : طعم الدبس )

‏منّه نسيم الصِبـاء / قبل الصبايا / يغااار
‏من شرق حاول يجااري رقته : و احتبس

‏له من ( جِنان الجنون ) استبرق الابتكار
‏و عنقود / من ندّر ابيات الخلود ارتبس

‏كم مرة'ن في وسع عينه : اجوب المدار
‏و اجيب نجمة بكر / و اشوفهاا تُقتبس )
- مشعل بن مرزوق

نحسب الأيام وش ناقف عليه و وش نطوفه
‏ودورة الأيام ماتحسب على الرجال صبره

‏القوي مايقبل التقصير حتى من ظروفه
‏والضعيف اقل ثوبٍ يلبسه ماهوب كبره

‏كان جات الله لا يفتّنا ويشملنا مروفه
‏قدرته ولا الاوادم شين علم وقل دبره

‏وكان راحت مالحقناها ملام ولا حسوفه
‏قد خذينا اللي قصر عنها طويل الشبر شبره
- مزيد الوسمي

بين الغياب وبين خيبة حضوري
‏كان الحزن بين القسا .. والمبرّة !

‏يحزنّي اللي .. ما يقدّر شعوري
‏واللي يظنّ انّي أحاول أضرّه .!
- سند الهليل

تتسارع الخطوة و تتزاحم أنفاس
‏فـ الشارع اللي فيه ودعت ذاتك

‏تْظن هذا الصوت من ضجة الناس
‏ما تدري ان الصوت من ذكرياتك !
- راكان

صبحكم الله بالخير🤍

يقول فهد الحمّاد وكأنه يصف سجيتي :
" وش خذيتي من ألوان الشعور وتركتي ؟
‏هذي انتي وضحكاتك هذا حالها

‏إن رضيتي ضحكتي وإن زعلتي ضحكتي
‏آه يالضحكة اللي ما عرفنا لها "

وفي روايةٍ أخرى:
" حبيبي كيف أمرّ بشارعك ماتدري اني جاي ؟
‏وانا اعرف الصباح اللي يجيبك من ذعاذيعه "

انت يوم انك تسلهم وتغضي بالعيون
‏تحسب اعصابي حديده وقلبي من حجر؟!
‏
‏صوتك الخاثر موسيقى وشي من الجنون
‏وفذة خلاص ٍ من الخرج والا من هجر
‏
‏تدري انك مسوي النون واللي يعلمون
‏مير لا اخطيت الجميلة فلا تخطي الاجر

انتزعني من يدين الحسايف والظنون
‏انت بعد الليله المظلمة طلعة فجر
‏
‏من سمع منك المراحب ولبيه وتمون
‏كنه اللي جرب الفقر والعوز وتجَر
- ناصر الحمادين

"انتزعني من يدين الحسايف والظنون
‏انت بعد الليله المظلمة طلعة فجر" ااالله

صبحكم الله بالخير🤍

‏

‏ودعتك الله يا عنود المزايين
‏وداع ما ظنّي بعده مْتعافي

‏يا احبّ من ورّد على وجهي البين
‏و اعزّ من ضيّق علي المنافي

‏يا اغلى وجع استشعرته الشرايين
‏و اوجع غلا عشته بخير وعوافي

‏لو كنت ادري بنيّتك يوم تقفين
‏عطّرت من ريحة لحافك لحافي

‏بها اتذرّى لا غدا البرد بردين
‏وْلا عادت اطرافه تدفي اطرافي

‏لا شك لو ان الخوافي لنا تْبين
‏ما روّحت مجمل حياتي خوافي

‏اعطيتك من الاربعه والثلاثين
‏ثمانية .. كانت ضفافك ضفافي

‏بها على شانك نظمت الدواوين
‏وابدعت في حبك الشعر والقوافي

‏وبها على شانك تحديت الادنين
‏ما بين مقفي وبين مقبل ولافي

‏تلفين واعدك علي يوم تلفين
‏غيمة تبدد عن جفافي .. جفافي

‏معي شعرتي ان منتي من الطين
‏ومعي اقتنعتي بالشعور الخرافي

‏وابراي لله ابهتك يا اريش العين
‏حتى ولو ماني معاك متصافي

‏لقيت بك مالا لقوه المحبين
‏اللي نهايتهم مجافى وجافي

‏اجي وجوي عمس واقفي ومن حين
‏ما اقفي وجوي من محياك صافي

‏ومن الغلا لو صفوا الناس صفين
‏محدن يصف من الغلا في مصافي

‏ورغم اختلافي عنك مع طبعي الشين
‏ما غيّرك طبعي وشين اختلافي

‏كنا قبل نلقى بعضنا من سنين
‏قبل اعترافك بالغلا واعترافي

‏عشاق؟ لا والله الا اكثر ثْنين
‏عليهم هندام العشاشيق ضافي

‏ما كنت احبك حب نزوه وتدرين
‏بالخافي اللي عنك ماهوب خافي

‏جيتك على وضح النقا والوعد دين
‏والحر لا منه وعد كود يافي

‏تبعت بك هدي الرسل والنبيين
‏وافي وادور لولدي خال وافي

‏اثري تبعتك بس مدري على وين
‏مار الوكاد اني تبعتك و كافي

‏طلبتك من اخوك مره وثنتين
‏والثالثة جيته على الشوك حافي

‏الين عيا بك قبل لا تعيين
‏وانا العزيز اللي ما اقبل اسفافي

‏لكن عليك الله وامانه لا تنسين
‏لا ضاقت رحاب السماء والفيافي

‏ما دامنا فوق الوسيعه وحيين
‏ووجيهنا تطرق لحاها السوافي

‏مكانك الدافي بصدري من الحين
‏لين ما الله ياخذ الروح دافي

‏واليا نويتي عقب حبي تحبين
‏امانتك حبي الشجاع السنافي

‏على الاقل يوم اخسرك من حمر عين
‏اهون علي من اخسرك عند هافي
‏-فهد الربوض

قصيدة هذا الصباح

"تلفين واعدك علي يوم تلفين
‏غيمة تبدد عن جفافي .. جفافي" :(

عن الحبّ الطاهر العفيف:
"ما كنت احبك حب نزوه وتدرين
‏بالخافي اللي عنك ماهوب خافي

‏جيتك على وضح النقا والوعد دين
‏والحر لا منه وعد كود يافي

‏تبعت بك هدي الرسل والنبيين
‏وافي وادور لولدي خال وافي" :(