اخشّ اسمك عن اطراف الحديث وتفضحه دعواي
‏وتهتف له عروق القلب وتجدّد له البيعة
- عبدالله السبيعي

منطفي والله ماهي هدأة سكينه
‏حتى هذا الأمر يدعو للغرابه

‏لو أغيّر ناس،وشعور، ومدينه
‏الرحابه نفسها بحاجة رحابه

‏ليت من ينفض هذا الحزن بيدينه
‏مثل ما ينفض غبارٍ عن ثيابه

‏يوم أشوف أعباء الأشياء الحزينه
‏لي حزن وباقي الحزن يتشابه

‏حاجةٍ تبقى وراء النفس الرصينه
‏ما تروح إلا بدعوه مستجابه
- ماجد النفيعي

ياربّي أنا ضعفت وضعف الإنسان شين
‏وتعبت من حاجةٍ " تسلبني إرادتي "

‏اعتقني مْن الشُعور الي ماهو فـاليدين
‏ومن دمعةٍ ما شهدها غير " سجّادتي "
- سمو

يارب غصنٍ بـ صدري لو لمسته وقع
‏أرسل لي مْن الغمايم ما يبلّه وأعيش..
‏ٓ
‏وأزرع بصوتي سوالف ما سقاها وجع
‏من ضحكة الغيم، والا من حمامٍ وريش
‏ٓ
‏لو يلمح الصبح دمعٍ في كلامي، رجع.
‏لو يرجع النور، ليلٍ في خيالي يطيش!
- بدور

مرحبا آل قصيدة♥️

كعادتنا كل عيد نتشارك ابياته

ابعيد تحويل القديم من الأبيات واشارككم الجديد منها، شاركوها من تحبون♥️

‏اضحكي.. يعلنون العيد حوطة سدير
‏زيحي الجمر عن دِرّه، يهل الهلال

‏لجنة الرصد ، ترقب طلّتك من عصير
‏مالهم لا تجلّيتي عذر ، يا دلال!

‏انثري الملح ويذوب الشذى بالعبير
‏علّمي جاهلين الغيّ معنى الجمال

‏باديٍ من خلاف الشال بدرٍ منير
‏مشعل النور ما يحجب سناه الجلال

‏بين رمشٍ شطير وبين طرفٍ خدير
‏كم من عقل خَف، وكم من قلب سال؟

‏يستريح الفرزدق كثر راحة جرير
‏عينك أفصح حديث العُرب "شعر ومقال"

‏انتي الدهشة اللي مالها حَد أخير
‏وامتزاج الحقيقة في محال الخيال

‏يبتدون العذارى حولك الحكي، مير
‏ينتهي لا لفحتي بالجديل .. الجدال
- مناحي

تجديد عهد بمحبوبتي هذه♥️
ياحظ كل دلال بها

‏" عيد رد الإعتبار "

‏اسلمي " ياخدره العين " من شر العيون
‏و إستبيحي نشوه العيد من وجه النهار

‏كل عيدٍ قبل ما اعرْفك يجيب الغبون
‏اجعلي عيد الفطر " عيد رد الاعتبار "

‏كنت اعاني من لهيب الخطايا والطعون
‏واستلذّيت الخطا يوم صرتي الاعتذار

‏خلي اللي ماتعرفك على احسن مايكون
‏تشعر بـ حاله من الضيق ومْن الانهيار

‏مارِسي حدِة غرورك على اللي يحترون
‏التواضع مرحله ضعف و بْداية دمار

‏انتي عيونك تخطف الرذاذ من المزون
‏علّمي اللي تحسب ان خطف الانظار ابتكار

‏طلةٍ ماهيب منّك ! تساورها الضنون
‏اكثر اللي ناسب العيد ؟ وجهك بـ ختصار

‏عسجديّات القوافي وعذبات اللحون
‏حطّها شاعرك في معصمك مثل السوار

‏كل بيتٍ ينكِتب فيك يالغض الفتون
‏تكتبه طرّادة الحب في عرض الجدار
- حشان بن مصلح

كل عيدٍ قبل ما اعرْفك يجيب الغبون
‏اجعلي عيد الفطر " عيد رد الاعتبار " ♥️

‏على الله رجعة اللي مقرن حجاجه هلال العيد
‏تهلّي بي عيونه لا يغيب ولا يوادعني

‏يهيم اللول ويهيم القصيد لمثل هذا الجيد
‏وياسعني لو حدود الفضا ماعاد تاسعني

‏على زينة حياة وفتنة ألباب ومليحة غيد
‏ابيع العمر واروح أشتريه إن كان بايعني

‏لو اخشّ اسمك اللي يستحق الشعر والتمجيد
‏تمحور حولك المعنى ويدرون أنك المعني

‏تعذر لي وسق مزن الغرام لجرهدي البيد
‏و اعذْرك حتى لو ان العذر ماكان مقنعني

‏تغانم مابقى لك قبل تاخذني الدروب بعيد
‏وانا مثل العمر لا رحت ما تقدر ترجعني
- محمد الكريدي

"على زينة حياة وفتنة ألباب ومليحة غيد
‏ابيع العمر واروح أشتريه إن كان بايعني"♥️

كل عام وضحكتك حلوة وأيامك سعيدة
‏حتى لو مرت ليالينا وأنا ماني معاك

‏يا ضيا الدنيا وسناها يا عسى أعوامك مديدة
‏كل دعواتي قبالك ..كل آميني وراك

‏القصيد بدون وجهك ليه نقراه ونعيده؟
‏والزمن يبهت شعوره لو حرمته من هواك

‏اذكريني لا سمعتي أغنية وإلا قصيدة
‏لو نسيتي من يحبك من يحبك ما نساك
- عبدالملك الخربوش

"القصيد بدون وجهك ليه نقراه ونعيده؟
‏والزمن يبهت شعوره لو حرمته من هواك" ♥️

واللي تمـرّه ضحكتينك يباهي..
نور الصباح وطلة الورد والعيـد"

‏" والله إن العيد دكة خطاك
‏والفايزين عيونك وتبسامك "

أعايدك من قبلهم " شيّ مرغوب "
‏وأعايدك من ضمنهم " شيّ كايد "

‏قبل نهار العيد مع جِدّة الثوب
‏والطيب ، والحنّة ، ولبس القلايد

‏نوبٍ أقول إليا طْلعت شمسه ونوب
‏أقول لو غيري سبقني وعايد ؟!

‏" مْباركٍ عيدك "ولا هو بماجوب
‏الواجب أكبر من كلام وقصايد
- سمو

" ما هوب عيد ٍ ما سمح لي بلاماك
‏عزي لعين ٍ .. شوفها ما يحوفك
‏يعتادني عيد الشقاء .. يوم فرقاك
‏و يعتادني عيد الفرح .. يوم أشوفك "

‏"دخيل العيد وأفراح القلوب وشوفه الغالين
‏على كثر إزدحام البال خليني على بالك"

‏"مساء العيد الأول يا عيونٍ مالها إلا العيد
‏طويت لشوفها كل الدروب وجيت ضاميها"