اللهم أنر قبور موتانا و موتى المسلمين وإجعل ملائكة الرحمه تطوف عليهم من كل جانب اللهم ارحمهم في باطن الأرض واسترهم في يوم العرض يارب أنت خلقتهم و أنت أخذتهم وأنت الرحيم فليس غيرك ارحم بهم و اغفر لهم واجعل قبرهم روضه من رياض الجنة ، يارب اجبر هذا الكسر باللقاء في الجنة .

مساء الخير آل قصيدة الغالين ❤️

وحشتوني مره :(

هاليوم المميز لازم ناخذ حيّز منه 🇸🇦🤍
#اليوم_الوطني

الله يديم علينا الأمن والأمان ويحفظ ولاة أمرنا من كل شرّ
ألف الحمدلله على نعمة السعودية 🤍🤍

وطنا ما نبيعه مثل من باعوا ولا نعطيه
أسامينا على صحراه مرسومه و مطبوعه
صبرنا فيه يوم انه دهور وهالك ظاميه
شحيح الماء هماج ولا يبل الكبد قرطوعه
صبرنا فيه حفيا والخلا باقدامنا نطويه
وحزمنا البطون ولا ذبحنا الجوع في جوعه
تخيلنا المهار ومن نطحنا بالثرى نرميه
نهوش لمن جديلتها على المتنين منسوعه
ومنا من ركب فوق الخشب موج البحر غاطيه
يحول بالحبال وياخذ المحار من قوعه
رجال البر ورجال البحر محد ٍ ترك عانيه
كرام من كرام وخلة الأجواد مرقوعة
يجيك الرجل وجهه مبتسم للضيف ويعشيه
لو انه في الحطب يضرب بمسحاته وفاروعه
صبرنا فيه وافلحنا وقلنا ياوطن لبيه
تطمن لا تخاف وحارسك يرعاك بدموعه
- خلف بن هذال

وطن..خفاقك الأخضر يرفرف مع هبوب النود
‏رفـعنا رايـة أمجـاد الجزيرة و ارتفـع شانك🇸🇦
- عبدالملك الخربوش

شرع الله قلادتك وزمامك الضاد
ورملك مزعفر وهملولك فضيله
- فيصل مهنا

دارنا دار الأماني .. والأمان .. المستديم
‏والسلامه والأمن والنور والمجد المسطّر

‏موطني دمت الذخر والعز للشعب العظيم
‏كل ما قالوا نجاح يرفرف الخفاق الاخضر

‏كل عام و موطن النهضه على العليا يقيم
‏ودام عزك يا بلادٍ عِزّها .. "بـ اللهُ أكبر"
- فيصل القاضي

خضار وسيف عدل ولا إله إلا الذي سوّاك
‏ترفرف رايتك .. وتنكس الدنيا بيـارقها 🇸🇦
- مساعد الرشيدي

تنعّمي في ظل حكّامك و باهي بـ أهلك
‏يا دار واللي ما يحب ترابك أنتِ وش يحبّ؟
- ماجد النفيعي

‏على جمر نار القريحة فاح عود
‏يطِيب منه ختام قافي والمشد
‏الشعر ممّا ورثوه لنا الجدود
‏عمود بيته وزن و القاف الوتد
‏ في صدر بيتي تقلط البكر الشرود
‏وفي عجزه تحط السمن على الشهد
‏رقّيتها و انا رقيت بها سنود
‏من بعد توفيقٍ من الله وسدد
‏قصيدتي موضوعها فيه الصعود
‏أسمى من اللي بنيت بليّا عمد
‏ارضٍ مواطنها على الاسم محسود
‏و الله مذريها عن عيون الحسد
‏ما كنّها الا مهرةٍ غرّاً مرود
‏طول الزمن يزيدها حسن ومرد
‏لبست فذكراها عقود من العقود
‏تسعة على لبة نحرها من زرد
‏ تختال وتسطّر تواريخ الوجود
‏أربع قوايمها على الارض الجرد
‏خيّالها اللي كل ما زادت يزود
‏عزالله ان امه مخلفةٍ ولد
‏بعنانها للعز والعلياء يقود
‏حبلٍ من الجنّة وحبلٍ من مسد
‏لها ينير الدرب من قدح الزنود
‏ويرسم لها الافاق من حبر الرغد
‏في رؤيته شاف الحدود بلا حدود
‏وشاف السعد للمملكة وجه السعد
‏المجد روحه كل ما ماتت تعود
‏وتلقى فذخر معزّي الاوّل جسد
‏المملكة في ظل بشت ابن سعود
‏اعلى سما واطهر ثرى واطيب بلد
- محمد الذيابي

نفرح بـ مهد الرسالة وميراث الجدود
‏دارنا اللي دونها المستحيلة تنجعِل

‏في حراوي يوم توحيدها الفرحة تسود
‏نحتفل فيها .. ويمكن نطيش وننفعِل

‏لكن اللي دون داره ، مرابط فـ الحدود
‏يفرح بـ ( راسٍ يفكّر ) ، وعينٍ تشتعِل

‏في "فعاليات يوم الوطن" ماله وجود
‏ودّه يبرهن وجوده لا جا "وقت الفعِل"
- عبدالله السراهيد

والمملكة في حمانا حيث ما كنا
‏بالدم نسقي ثـراهـا وانتحضنها

‏فرضٍ علينا وعهدٍ قد مضى منا
‏انرد بالنار هجمات العدا عنها
- خلف بن هذال‏

أما انا عن الوطن قلت :

الديار اللي تفيّت ظلّها -كل الشعوب-
في قلوب الناس تملك بيت من أرض وسما

من شمال الدار لين آخر مسافات الجنوب
والسعودية وطن يشعر -غريبه- بانتما

في رياض المملكة نحيا على انسام الهبوب
وفي صحاريها محد عانى من شعور الظما

شعبها ينسج لها من أعظم الأفعال ثوب
ويوقف بوجه العدو وقفة تُراق لْها الدما

والمليك اللي فتح للشعب آفاق الدروب
يكتب التاريخ وقفاته ويشهدها العمى

من نجح في وحدة بْلاده وتوحيد القلوب
واستعان بمنهج الدين اشهد بْـ أنّه رمى

دارنا؛ دار العطا..مهد الكرم..وامّ الشعوب
دارنا اللي في ذراها كلّ مكروب -احتمى-

تشرق امجاد الوطن فينا لو الدنيا غروب
والأكيد فـ سلمنا ما تستريبه ربّما

في تفاصيل المشاعر حبّ ما عنّه نتوب
نشرحه بالإنتماء .. وبالولاء .. وبالحِمى
- مها