وردًا عليها قلت :
- فدا وجهك - سنينٍ في ثراها تزهر الاعوام
انا ايامي على مْشاهد سنا ضحكتك مرتجله

كفاك الهمّ ، والتأنيب مهدور فـ رجا الأوهام
اكيد لجرحك الدامي مصير ويلتقي باجله

اعرف انّك تحنّينه وقلبك عن وصاله صام
ولكنّ الحياة اجمل من وصاله ومن دَجله

عسى من جار في حقك تجور بحقّه الايام
ويجي بابك يدوّر في قصيدك بيت ينسج له

ولو اني بالجفا انلام ، انا في رفقتك ما انلام
رفاقة .. كنّها نهر الفرات لـ صاحبه دِجله
- مها

‏اشيل الجرح لو شلته أخاف إن الزمان يدور
‏على وجهٍ ذخر فرحة شبابه .. ما تكاثرها

‏"نذر باقي العمر لهفةْ : ليالي شعرها المنثور
‏على شبّاك غرفتها .. تعوّد في مسامرها

‏كره ضيّ الصباح اللي شرق مع زغردة عصفور
‏يحسّ إن العمر يوقف .. معَ سدلة ستايرها

‏تجيك بودّ رغم اللي لحقها من ورا الديجور
‏زوايا البيت ما تشهد سوا خوفٍ محاصرها!

‏أرقّ من الندى واسمى من عيون البنات الحور
‏يا وسع الكون لو إنك لمحته في ... نواظرها

‏كأن القلب من صفوه خَلقْه الله من البلّور !
‏رغم إن الزمن ولّى بماضيها ... وحاضرها "

‏شوارع نلتقي فيها تحت ظلمة زوايا الدور
‏كرهت آمرّها مجبور .. من اوّلها إلى اخرها

‏دخيل الشعر وبحور القصيد وصفقة الجمهور
‏رجف وزن القصيدة : بَرد ! .. مابه من يدثّرها

‏عداك اللوم يا وجهٍ قبل لا يعتذر ... معذور
‏يعرف إن الخطا ينحل .. مع حلّة ظفايرها
- حنيّة

" كأن القلب من صفوه خَلقْه الله من البلّور !
‏رغم إن الزمن ولّى بماضيها ... وحاضرها "

الله الله

‏صوّبت في صدري من سهامك سهام
‏من وين ماسجيت .. لاقيت طيفك

‏ابني معه قصة جميلة .. واوهـام
‏حتى ذبل زهر الشباب بـ خريفك

‏والله لاقتل حبك الحيّ مادام :
‏ما مرني بردك ولا شفت صيفك

‏إما تجي كنّك ذعاذيع الانسام
‏ولا على ارض الهجر سِلّ سيفك

‏مرّت علي سنين والقلب منضام
‏كن الزمن ماشي بامرك وكيفك !
- أميرة

‏" حتى ذبل زهر الشباب بـ خريفك "

‏راسي من الافكار دايم من زحامٍ في زحام
‏وافكاري احطبها لنارٍ وسط صدري تستعِر

‏وليا بغيت اوصلك ياللي بين ميم وبين لام
‏طريق تعبيري غرق ولا اندفن ولا وعِر

‏مشاعري يطمس بصيص النور عنهن الظلام
‏وابيعها على جماهير القصيد بلا سعِر

‏اعرف اعبّر بالشعر ماعرف اعبّر بالكلام
‏الظاهر اني ما أجيد بهالحياة إلا الشعِر
- محمد الذيابي

سيرة ذاتية :
‏" اعرف اعبّر بالشعر ماعرف اعبّر بالكلام
‏الظاهر اني ما أجيد بهالحياة إلا الشعِر "

ليلةٍ فيها على قلبي زبنتي
‏ليتني غايب هذاك اليوم عنها
‏َ
‏كنت أحبّك واستلذّك يوم كنتي
‏مهرةٍ ما ضاع من كفي رسنها
‏َ
‏إن وزنتي منطقك وإن ما وزنتي
‏ما لـ عبرات العيون إلاّ وطنها
‏َ
‏الزمن وقّف على ذكراك وانتي
‏غلطةٍ عيّا العمر يدفع ثمنها
- ناصر مناحي

ما انت حاسدني على ما اعطاني الله
لو عرفت اللي خذاه الله منّي
- محمد جارالله السهلي

هذا البيت لامسني جدًا ، و في هذه المقاله الرائعه للأستاذ أحمد التويجري اختصر لكم حقيقة الحسد https://atharah.com/about-envy-1/

‏ميّاسة القد وش يرضي غرورك من دلال
‏أنا لك مِشعل كفوفي تشوفين الكفوف؟

‏خاطرٍ من وراها وقف ما تفيّا فالظلال
‏والله إنك لا ضحكتي له تسوين مْعروف

‏سريت ليلك ما عدى وجهك رفيق وطال
‏ليلك.. عسى صبح عينك يبشِّر بالقنوف

‏أيه أكتبك، والقصيد لغيرك أنتي ما يقال
‏ومن عداك اللي عليها بالي السارح يطوف؟

‏لو أنا قدام حسنك.. كل ما جاء له مجال
‏ضيعتي ماهيب لا ضاعت من لساني حروف!

‏شيٍ أقرب ما يكون أنسى يميني من شمال
‏زين عاد إن كانني واقف على حيلي وأشوف

‏مالي جدى لا تثنى عودك المترف ومال
‏ولا قد خبرته بقلبي ليا من تثنى.. يروف

‏منك أشتكى البدر في ليلة تمامه لليال
‏إن بدى في حضورك كنّه يمرّ بخسوف

‏كيف عاد اللي يشوفك واقع أجمل من خيال
‏في عيونه قليلة ليا لحفّك ضلعينه بجوف
- عبدالله

والله إنك لا ضحكتي له تسوين مْعروف

"منك اشتكى البدر في ليلة تمامه لـ الليال
‏إن بدى في حضورك .. كنّه يمرّ بخسوف "

صبحكم الله بالخير 🤍

‏كم سهرت وكم دفنت الصوت بالقلب وصبرت
‏خايف احكي تصرخ احلامي خسرت اللي تبيه

‏وخايف اسرف بالسكوت و تكتب ايّامي كبرت
‏راح سنّ الطيش صعبه تفرض احساسك عليه

‏حيرة الأفكار بين اصبر ، واخاف اليا انتظرت
‏ينتهي العمر القصير و ما يجيني ولا أجيه

‏ما انْتصر وقتي علي و لا على الوقت انتصرت
‏شايلٍ حمل الحنين وحمل خوف وقلب تيه

‏ما وصلت و لا وقفت و لا فرحت و لا انْقهرت
‏غامض الدرب لـ وصاله .. وكل بدايه تنتهيه

‏والسؤال الواضح بخوف الكلام اللي سترت
‏كيف ضامن ما يروح العمر كله ، تحتريه ؟

‏وثارت النبضات في عمق الشعور وما قدرت
‏اكتم اصوات الحشود اللي تبي موطن نزيه

‏ما استخرت وما شعرت ، الا واثاريني جهرت
‏قلت احبّك قال صادق قلت صادق قال ليه !

‏ليه ساكت ليه خايف ليه ما جيت ونصرت
‏الشعور اللي يبيك .. و عايفٍ كلّ الوجيه

‏قلت قلبي قال قلبي قلت لو داري اختصرت
‏هالمسافات الطويله والسنين و جيت فيه

‏مو مهم اللي مضى كل المهم انك حضرت
‏يا حبيبٍ عفت دونه كلّ شي .. لجل التقيه
- فيصل القاضي

" خايف احكي تصرخ احلامي خسرت اللي تبيه "

‏" وخايف اسرف بالسكوت و تكتب ايّامي كبرت "

"ما انْتصر وقتي علي و لا على الوقت انتصرت
‏شايلٍ حمل الحنين وحمل خوف وقلب تيه " :(

‏يقبل الليل بانواع الملل والرتابه
‏ويستفز الشعور من اوله لين اخيره

‏مامع الشاعر اية حل غير الكتابه
‏واغلب الشعر ما ودى هل الشعر ديره

‏من يحسب الشعر شي يكبر جنابه
‏اضعف من انه بنفسه يحدد مصيره

‏نايف الضلع مايذري على اللي رقابه
‏يذري اللي جلس بالقاع ماحث سيره

‏بين قال الله وقال النبي للصحابة
‏ودي ان قلبي معلق وعيني سهيره

‏ضاقت الارض واللي في عيونه رحابه
‏جودوه وبغا يكفخ وعيا جريره

‏اسر ياليل مالك في رقبتي طلابه
‏ان تعجلت خير وكانك ابطيت خيره

‏ماتزعزعني الدنيا وانا راس لابه
‏تشهد لفعلهم حكام شبه الجزيره

‏يوم خلوا جنيّح شدةٍ من حرْابه
‏مابقا مجد ماخلوا لهم فيه سيرة

‏اشرس البدو واقواهم عزوم وصلابه
‏لكن نخاف من فرقا العشير لعشيره

‏خايف اموت من زود الجوى والصبابه
‏خايف اموت شوق وخايف اموت غيره

‏خايف اصبح يزيد ان كان غابت حبابه
‏رغم فرق الظروف امشي بنفس الوتيره

‏وين وجهك يابو وجهٍ ذبحني غيابه
‏ودي ابيع ماتملك يدي واستعيره

‏وجهٍ يخلي وجيه الاوادم تشابه
‏يضحك ..وكن مايضحك من الناس غيره

‏مايس القد وان حاكاك قوس الربابه
‏اعرف انه لقى باقواسك اللي يثيره

‏وان مشى مشيت هريرة وصبّت سحابه
‏مانبت عشب الارض الا بمشية هريره

‏جيت وانت الغريب ورحت الاكثر غرابه
‏اجوبتك اسئله واكثر سوالفك حيره

‏ماذبحني نهار السبت قدام بابه
‏غير تلويحته والنظرة المستجيره

‏يوم شح الكلام وضاع منه عتابه
‏عنه عاتبتني لين انه اشفى ضميره
- بندر الدويش

‏" اشرس البدو واقواهم عزوم وصلابه
‏لكن نخاف من فرقا العشير لعشيره "