" مثل المطر
‏مثل الرذاذ اللي ملا صدر الزهر
‏جيتك ظما
‏واقف على اطراف السحاب
‏الكل من حولي ارتوى
‏الا انا
‏كني سراب ! "

لو شاورتني الشمس تشرق على مين؟
‏قلت اشرقي فوق الديار الحزينه

‏حنا عطانا الله ياشمس شمسين
‏انتي وشمسً في وسط منكبينه

‏لا قال: صبحك الولي بالرياحين
‏تنفست روحييي وروح المدينه

‏وان قال مساك برضى قلت راضين
‏مدام حسك بالمسا سامعينه
- بشاير المقبل

‏الليل موحش يامها والصمت طال
‏وانا احتري ليلة .. تعوض غيابه

‏إلى متى والقلب في رجوى وصال ؟
‏والى متى والروح تتبع سرابه ؟

‏وإلى متى والحال مرهون السؤال
‏حالي نحل والبعد زود عقابه

‏هذا العشق محتاج ياخلي نِضال
‏وقلبٍ على الصدة قويٍ يجابه !

‏صايبني من البعد ياخلي جفال
‏وقلبي من اللهفة بيفقد صوابه

‏اسهر بدونك كيف !لايمكن!محال
‏حتى السهر عقبك ياخلي " اهابه "

‏في صدري من الهم حملٍ مايشال
‏وفي داخلي عقب العماير خرابة

‏معاي قلبٍ ماعرف معنى الدلال
‏من يوم يومه للشقى ولعذابه

‏انا ادري انه يحتري مني " تعال "
‏و مجهز اعذار الغياب وعِتابه

‏لا يحتري مني وصل والا سؤال
‏اموت ما يرجي لساني جنابه

‏اموت من قيضي ولااعده ظِلال(:
‏وتذبل كفوفي ما رجيته سحابه
- نوران

" اموت من قيضي ولااعده ظِلال
‏وتذبل كفوفي ما رجيته سحابه "

هجرت ارض الجروح ابغى عن تراب الجروح تراب
‏عساي انساك ..وانسى رجعتك والجرح.. وترابي

‏مهب

‏سمّار، وان هز المساء ركض المهب
‏واقبل يذر الصبح بعروق السما

‏يحمل سلام الشيح و اوجاع القصب
‏وحكاية النعناع و فصول الظما

‏صب السوالف زعفرانه للرطب
‏متهيّل اعياد الخريف وما ارتما

‏فجره هطل من صوت ابويه وانسكب
‏مثل السحاب اللي نثر طهر ونما

‏يقرأ على الاطلال … ويفز العنب
‏ويستمطر الريحان زمزم وايهما

‏يسقي عصافير القُرى ذكرى الطرب
‏لين المروج ترفرف لـطفل الحمى

‏تستبشر النخلة وينساب المصب
‏ويهيجن النوير لـ احساسٍ زما

‏يسأل عن الاحباب وخيار العرب
‏وعن ساكنين الحي والشيخ العمى

‏يسال عن اوطان الربيع المغترب
‏وعن روضة الاشعار وفياض الكما

‏يا غايبي من بسمتك رف الهدب
‏رف الهدب يا غايبي دمع ودما

‏طال التأمل وابتهج ركض المهب
‏واقفى يذر الحلم بعيون السما
- وليد بن مانع

يا نديمه واشعل الصمت الكلام
‏دام صبري في تناهيدي شَرق

‏كان قلبي في دهاليز الظلام
‏شاعر وغاوي، تدَثره الأرق

‏وكانت، اقلامي اذا كَبْر الملام
‏تشكي ' آثار الثماله لـ للورق '

‏واكتبك، واعانق حدود الغمام
‏وارتوي، واضماك، واهوى واغرق
- محمد منيف

خلف قضبان التوهّم والتمنّي
ما حزنت إلا على غيبة نهاري

ترقّى أخو الشاعرة يمام وبشرها بالخبر قبل الكل وكتبت في هذا الموقف أبيات عذبه جدًا تقول فيها :

دام صدرك على الأمجاد والعز ضاري
‏سِق بشايرك ، في جوفي تطيح برديّه

‏لاهوت نجمة لكتفك .. يفزّ إنتصاري
‏ويشتعل برقٍ بصدري تباطيت ضيّه

كنّي أتلّ من هزايم العمر ثاري
‏يوم أعد إنتصاراتي ويطري عليّه

‏لو نصيته ليا غاب الضيا عن نهاري
‏طش مافي يده وأقبل وأخذ في يديّه

‏أعذب من السحابه واكرم من الذواري
‏إن ضحك وان زعل وان صد له قابليّه

أحبّ هذا النوع من الأبيات جدًا ❤️

‏واذا يعني رحلْت، وتاه قلبي، واقفوا الجلّاس؟
‏وطاح الليل في كبد العصر، والشوق ولّعني؟
‏عسى تلحقني الشرهه، مصير الدمع للقرطاس
‏يبلّل بيت فرقاها، وأغنّي له، ويوجعني !

‏تداعيت المزوح وكانت أيامي تحدّ اليأس
‏بعد كنت اليقين اللي يدين الشكّ تقطعني !
‏أمَرّ الذكريات؟
‏- اللي تمرّ الخاطر الحسّاس
‏تبدّد كلّ وقفة كبرياء كانت تجمّعني !

‏تهادى يا "سجين البال" زعفر دلّة الهوجاس
‏وحرّر قيد تمتمتي، وقنّد حزني المعني !
‏عرفتك قبل مالغطوة يلاعبها هوى النسناس
‏وقبل ما تكتبين: "الخوف وجهاته تروّعني" !
‏وكثر ما يلعن الشاعر ضياعه بين جمْع الناس
‏وكثر ما نادت أمي فـ المسافة لا تضيّعني !

‏حسافة، ليه تسري بي وأنا تخنقني الأنفاس ؟
‏وتتركني "رهين الصمت" والذكرى تنازعني ؟
‏أقلّ اللي تمنّيته: تسيّل مهجة الوسواس !
‏أو إنّك قبْل ما ترحل، أقل حاجة توادعني !

‏وإذا يعني رحلْت، وتاه قلبي، وانطفى نبراس؟
‏ مصير الليل يتشرّه على كلمة "وإذا يعني"؟
‏- ياسر المفرّج

- أقل حاجه توادعني -

الله الله الله

" عرفتك قبل مالغطوة يلاعبها هوى النسناس "

" وكثر ما نادت أمي فـ المسافة لا تضيّعني ! "

دقة الوصف آسره جدًا والله

اللهم صلِّ وسلم على نبينا محمد

اللهم ارحم الراحلين ورد الغائبين واشف المتعبين

الأبيات التالية مجاراة لهذا البيت رائع :

" طفلتي طاح الكلام وعيّت تشيله عظامه
‏كل ما عكّزته اقلامي يهب الصمت منا "

القصيد اللي نذرته لك تناثر مع حطامه
ليت صمتك ماهدم بيت القصيد اللي حضنّا

مدّي كْفوفك وصيري للوصال اطهر حمامه
لا تشحّين الرسايل والورق بيدك تثنّى

اسعفي شاعرْك قبل يطيح في فوضى كلامه
شاعرٍ من حرّ ما به .. دندن حروفك وغنّى
⁃ مها

صبحكم الله بالخير 🤍