"لو يحتضن شوفتك صبح الدوام الملول
يسعد صباح الدوام اللي عليه الكلام " ❤️

حبيبتي يا وجه أعرفه قبل أعرفه واجهله
جيتك سنيني ترتجف لأحلى مواعيدي حضرت

جيتك خطاوي شوق لأحلام السنين المقبله
لأكثر مسافات الطريق اللي يقرّبك اختصرت

أمشي واسابق خطوتي حتى الزمان أستعجله
واليوم بأوصف لك شعوري يوم شفتك ما قدرت

عيني تبي تسبق زغاريد الرموش بهلهله
والاَّ فؤادي تدري إنك فيه ساكن لو ذكرت

يدفعني لشوفك عذاب ارض السنين الممحله
لو شفتني قدّام وجهك صلب قاسي ما انكسرت

من غاب عن عيني بدون أسباب كيف أستقبله
باعاتبك يا نور لدروبي تعنّيت وظهرت

هاك الشقى ملّيت أشيله في عيوني وأحمله
أخاف يسرق ضحكتي وأيام عمري ما شعرت

هاك السهر عن قصتي وياك تقدر تسأله
لأجلك رضيت برفقته يوم إنت غافل ما سهرت

فدوة سنيني من عرفتك بالجروح مسربله
وإذا شكالي منك جرحي عنك بالدمع اعتذرت

فدوه لو إن أصغر جروحي من غرامك مرجله
أنا أشهد إني عن بلوغ اهداف غيري ما قصرت

فدوه يا عمري كان قلبك عزتي هي مدخله
أموت يا عمري وأنا داخل عيونك ما صغرت

إنسان أنا عمري مراحل وإنتي أعذب مرحله
فيها العذاب استعذبه واقول رابح لو خسرت

حبيبتي صبري على بعض المواجع مهزله
جيتك سنيني ترتجف لاحلى مواعيدي حضرت
- نايف صقر

" إنسان أنا عمري مراحل وإنتي أعذب مرحله
فيها العذاب استعذبه واقول رابح لو خسرت "

" سنيني ترتجف " يا لطيف

هذي العذوبه تليق بهذا الصباح

أنا أدري إني ما تحلويت دنياي
‏وإني رغم حِلو ابتسامي أعاني

والله يا عندي احساس ما يملكه ناي
‏وعندي حزن إن ما بكيته بكاني

‏وبالليله الي ما بها حد وياي
‏أسمع دوي حطام بين المحاني

مشيت ودموعي تسابق مع خطاي
‏والوقت ينزف من ايديني ثواني

‏ملّيت أعيد جروح واجد بشكواي
‏حتى جرحت بـ عز صمتي لساني

‏عايش ولكن ماتت أشياء جوّاي
‏الله لا يجعل عدوي مكاني
- عبدالله العوني

وش الدنيا اذا ما عشتها برؤياك ؟
تضيق أرضي وتذبل فالمدى ذاتي

انتصرنا انتصرنا :)

صبحكم الله بالخير 🤍

"ولتعلم أن النضوج الذي تتحلّى به اليوم هو حصاد تلك الأيام التي ظننتها لن تمضي"

حلمي عنيد وفيه مني تشابه
‏اليا قسى لقيتني مثله أقسى

‏غريب، لكن باكر بيحتذى به
‏كم من عظيم بغيهب الغربة أمسى

‏اخترت صعبٍ يستحق الشقا به
‏ما للسهل في بحر الامجاد مرسى
- معاذ بن عبدالعزيز

فمان الكريم وفرصة العمر ماهي دوم
‏يادار ربت روح الغلا في مشارفها

‏آجيها وانا متشتت وضايق و مهموم
‏واعود وكبدي جاير الشوق ناصفها

‏آذكر دمعها وآخر كلامي وتالي يوم
‏وبيت كتبته بعد كثرت مخاوفها

‏انتي عند رجال سنافي ومقدم قوم
‏وانا غرة بيوت الرياجيل ماكشفها
- عابر

عند اجتماع المرجله والجزاله :

أشّري و اشعل لك الدنيا صباح

خذاك الوقت من يد الشعور وصادق التحنان ..
ووداك لغياهيب الظلام اللي هجره النور ..

على أول مفرق لصوت المعاتب مالقيت لسان
يعد الحق ويصون الغرام ومايطيع الشور ..

أمر دياركم مرة حسايف والضمير أحيان ..
يصبّر قلبي بقولة مصير إن الزمان يدور ..

عرفت الدرس من واقع هروب وذاكرة خذلان
فهمته زين .. قبل اجبر عزاي بقلبي المكسور ..

تروح لوين ؟ ماعندك بدوني وجهه وعنوان ..
ولا كل الغياب غياب .. ولا كل الحضور حضور ..

تروح لوين ؟ من قلبٍ رقيق وصادق وماخان !
وانا دور الضحية مايحبه قلبي المغدور ..

ولا ترسل رسايل عن ندمْك وقلبك الولهان ..
ترى منت بعلى هدم السنين الباقية مجبور ..

سلام الله على صدري من الضيقات والاحزان..
وضحكة كنّها غيمة ووجهٍ ما عليه قصور ..

قليلة حظ لكني أبد ماني قليلة شان ..
على كفي منابت ورد وبصدري شجر وطيور ..

على قلبي قريت (الناس والإخلاص والرحمن)
وعلى عيني قريت ( الفاتحة والمائدة والنور )

ياربي ما معاي الا أنت وأنت القادر السلطان
وطبعٍ مايعرف الكيد والظلم وعهود الزور ..

طريقي لو عثى فيه الحنين وردته بيبان ..
خذ بْيَدي ياربي للطريق الطيّب الميسور .
- أشواق الخليفة

وش عاد ابخلي و وش عاد ابقول
‏يا نفس من كثر التغاضي ، تغاضي

‏من كثر ما اشوفه .. لا قوه ولا حول
‏حتى لو ان القاضي احيان قاضي

‏عند الردي ما هو مهم انك مقبول
‏اهم شي ان الكفو عنكّ راضي

‏قل لـ الكفو ( فاضي ولاني بمشغول )
‏وقل لـ الردي ( مشغول ماني بـ فاضي )
- خالد بن طفلان

ما كنت اعرف ان المكان اللي يضمّك موطني
وان البلاد الخاليه منّك .." محطات انتظار " :(
- مها

خلوا الهايم يهوجس ويتمتع في هيامه
‏كل ماعادت به الذكرى وليل الحزن هوّد

والحبيب اللي كلام عيونه أكثر من كلامه
‏ودي أمسك كل لحظه في وصاله واتجوّد

‏في غيابك جالس أدوّر على نص إبتسامه
‏قال خايف قلت أخاف إنك تروح ما تعوّد
- فهد بن سهل

):

صبحكم الله بالخير 🤍