" خذتك الاقدار وانا صرت بعدك وحيد
‏ياوجد روحي عليك وفطر كبدي فطر

‏انا على شان احس انك معي كل عيد
‏اخرج زكاتك لاجيت اخرج زكاة الفطر "

يا بيارق ضحكةٍ من دونها هوش، وْعَزاوي
‏في رجاها ما لحق وجهي ملام ولا مضرّة
- محمد السلطان

صرت اشك ان كانهم فعلا حبايب
‏او مجرد ضيق في حُلّة أنيقة

‏ان بغوا فرقاي حطّو بي سبايب
‏وان بغوا وصلي يعَرفون الطريقه

طبت فيهم .. ليتني ماكنت طايب
‏لين طابت نفسي فـ ساعة حقيقة

‏لو ضحكت القاهم بـ جنبي قرايب
‏لو بكيت : انا ودموعي في حريقة !

غير ذاك اللي سندني في النوايب
‏كان صدري يوم كانوا الناس ضيقة

‏دق صدره فـ الغروب وكان جايب
‏شمس ضحكاته فـ ليلٍ ما أطيقه
- سعد يحيى

):

-

نفرت من الجفا ومن الوداع المرّ والتلويح
‏وجزت من السنين اللي ماهي ويّاك محسوبة

‏انا ماقلت أحبك بالعلن لكن بالتلميح
‏بتقراها بطيّات القصايد فيك مكتوبة

‏وتلقاني معك رغمًا عن الآلام و التجريح
‏يروح العمر مالي عنك لا صدة ولا توبة
- محمد الكريدي

‏على الله رجعة اللي مقرن حجاجه هلال #العيد
‏تهلّي بي عيونه لا يغيب ولا يوادعني

‏يهيم اللول ويهيم القصيد لمثل هذا الجيد
‏وياسعني لو حدود الفضا ماعاد تاسعني

‏على زينة حياة وفتنة ألباب ومليحة غيد
‏ابيع العمر واروح أشتريه إن كان بايعني

‏لو اخشّ اسمك اللي يستحق الشعر والتمجيد
‏تمحور حولك المعنى ويدرون أنك المعني

‏تعذر لي وسق مزن الغرام لجرهدي البيد
‏و اعذْرك حتى لو ان العذر ماكان مقنعني

‏تغانم مابقى لك قبل تاخذني الدروب بعيد
‏وانا مثل العمر لا رحت ما تقدر ترجعني
- محمد الكريدي

يا سلاااام

هب الغنج من ثَغَرك ومال عود الكلام
‏والقلب يروى ترفك وتنتشي دهشته

‏مدي يدين النظر ويسيل شِعره غرام
‏ايه ازحميه بعيونك واذبحي رعشته
- صالح الهويملي

بين هبّة نسيم، وبين هَلّ العباري
‏لي عنودٍ بقايا شعرها في يديّه

‏ارحلت كنّ ما به خلف الأيّام ساري
‏وتركتني ورى قضبان نجد العذيّة
- محمد السلطان

‏اضحكي.. يعلنون #العيد حوطة سدير
‏زيحي الجمر عن دِرّه، يهل الهلال

‏لجنة الرصد ، ترقب طلّتك من عصير
‏مالهم لا تجلّيتي عذر ، يا دلال!

‏انثري الملح ويذوب الشذى بالعبير
‏علّمي جاهلين الغيّ معنى الجمال

‏باديٍ من خلاف الشال بدرٍ منير
‏مشعل النور ما يحجب سناه الجلال

‏بين رمشٍ شطير وبين طرفٍ خدير
‏كم من عقل خَف، وكم من قلب سال؟

‏يستريح الفرزدق كثر راحة جرير
‏عينك أفصح حديث العُرب "شعر ومقال"

‏انتي الدهشة اللي مالها حَد أخير
‏وامتزاج الحقيقة في محال الخيال

‏يبتدون العذارى حولك الحكي، مير
‏ينتهي لا لفحتي بالجديل .. الجدال
- مناحي

حظ دلال بهالقصيدة

أي فرصة تسمح انك تلتقي بي اغتنمها
ما ورانا إلا القبور اللي ما ندري وش وراها
- عبدالرحمن بن جزا

يوووه :(

مثل نور الصبح لامزّع خيوط الظلام
‏الحقيقه في دجى الزور نارٍ تشتعل

‏اجتماعٍ مايجي فيه تقوى واحترام
‏كان جاله رايق البال عوّد منفعل

‏الظروف احيان سمحه وممشاها تمام
‏وفي بعض الاحيان عوجاً مثل قرن الوعل

‏ينخفض سعر المواقيف في سوق الكلام
‏ويرتفع سعر المواقيف في سوق الفعل
- عايض العاطفي

ياا مرحبااا بالهزيمه في طريق النصر

"أنا لا لاح لي زولك نبت حول الطريق أشجار
‏ولو إني أمشي بصحرا ربيع الوقت جافيها"
اي والله

فيك غيم من السماء الدنيا دنا
‏وأستقر بوجنتك لين استراح

‏- طالما وجهك يصبّحني فأنا:
‏"سارق البهجة من إيدين الصباح"
- فارس فايح

أظلم الشارع اللي كل ما أختليه
فزّ وسطه يحاكيني عليك الجماد

‏ودي آقول له من راح ما أحتريه
بس لاصار لاحلامي وعمري بلاد؟

‏وين أحصّل مثل وجهك لياقلت أبيه
بعد ماقْفى به عنادك وجاب البعاد

‏كلّ ضحكة بوجهك ؟ أكبر من الوجيه
وأكبر الروس ؟ أصغر من هذاك العناد

‏انت حتى المكان اللي تعوّد تجيه
تنحسب ليلتك وسطه ليالي عياد

‏من كثر ماتردّ الروح لاجيت فيه
يشعر ان مانْت طين أحيان : نسمة براد !

‏أرسم الحد من شان نتمرّد عليه
ماحسب قبله ان بعد الحدود الحداد

‏هاك قلبي لو لباس الوجع يكتسيه
لو تفكّر تحطّ لكل جرح امتداد

‏التعب فيه ماياكل من اللي يليه
مختلط فيه من بعد البياض السواد

‏كم لي أزرع حياة بداخله وارتجيه
والسنين تْعدّا مابيدها حصاد

‏أشعر اني بقايا والبقى مايبيه
مابه الا دموع وممتطيها الرقاد

‏وانت تطري على بالي وبالي شبيه
جمرةٍ عايشة مابين كومة رماد !

‏يمكن تْحنّ ، يمكن لا ، او يمكن ايه
آه ياثقل تعليق الأمل بـ العباد

‏ماتعلّقت فيك الاّ لأنّك نبيه
والنباهة فـ بعض أحيان قلّة رشاد !

‏والرشاد اللي مجنّب محاكيك ليه؟
ردّه يْقول : ردّ ، وغيبتك لاتعاد !
- أيمن الرويلي

‏" انت حتى المكان اللي تعوّد تجيه
تنحسب ليلتك وسطه ليالي عياد "