واللي تمـرّه ضحكتينك يباهي..
نور الصباح وطلة الورد والعيـد"

‏" والله إن العيد دكة خطاك
‏والفايزين عيونك وتبسامك "

أعايدك من قبلهم " شيّ مرغوب "
‏وأعايدك من ضمنهم " شيّ كايد "

‏قبل نهار العيد مع جِدّة الثوب
‏والطيب ، والحنّة ، ولبس القلايد

‏نوبٍ أقول إليا طْلعت شمسه ونوب
‏أقول لو غيري سبقني وعايد ؟!

‏" مْباركٍ عيدك "ولا هو بماجوب
‏الواجب أكبر من كلام وقصايد
- سمو

" ما هوب عيد ٍ ما سمح لي بلاماك
‏عزي لعين ٍ .. شوفها ما يحوفك
‏يعتادني عيد الشقاء .. يوم فرقاك
‏و يعتادني عيد الفرح .. يوم أشوفك "

‏"دخيل العيد وأفراح القلوب وشوفه الغالين
‏على كثر إزدحام البال خليني على بالك"

عيدك مبارك وكل عام المشاعر تجري
‏ما توّقفها الظروف ، ولا قليل الجيّة

‏والله إنْك أوّل من أبارك له ومن يطري
‏ووالله إنّك ما أنت حول العالم المنسيّة

‏العيادي منّك " صْوّرٍ " تفرّح صدري
‏خذْتها منّك وأنا الي ما اخذ العيديّة ..
- سمو

اذا خانك التعبير وما عرفت كيف تمدح هالأبيات تنقذك :

"على كثر القصيد وكثر ماجاب الخيال أفكار
تعبت ومالقيت الا ثمان اشياء تشبه لك

نور الشمس،لون الغيم،طهر الما، وصمت النار
لين الورد ، فجر العيد ، ملَك وإنسان ياسهلك"

" من جعل نظرة عيونك عيد وإن لدّت مضرّة؟
‏من سرق دهشة عباد الله واختصك لحالك "

خيار آخر لفارس فايح يقول فيه :
قالوا لي ، ان العيد لمة حبايب
‏وانا بدونك : ما اعرف لذة العيد

ومن باب الأعذار المقبولة بالعيد أقول :

‏تعال وطشّ في صدري عناك وزيدني غربال
‏أنا حتى قساك أحس به لين وحسن نيّة !

‏تعال العاشق اللي مدّ خطواته مسا واغلال
‏تعال وزاحم أكتاف الحنين وردّني .. حيّة
- رزان العتيبي

ما عبس وجه الزمان و ما جفاك و ما تولّى
‏صدفتك لذة صباح العيد و دموع البشارة

‏قبل أعرفك كنت أخاف الحلم و اخاف اتجلّى
‏و من عرفتك صرت أعيش العمر و ارد اعتباره

‏أنتِ لا منك رحلتي ما أحس بصدري إلا :
‏صمت موطن ما بقى به ناس و آثار و حضارة
- عبدالملك الخربوش

"اضحكي خلي الفقير يفهم وش يعني غِنى
‏اشرحي للّي يئس .. كيف يخلق امنيات"
- هذا التوددّ آااسر ❤️‍🩹

كل عام ووجهك يزف التهاني
‏تبتديه وتنتهي منه الأغاني
‏كل عامٍ حكوة الحاكين عنّه
‏كل عامٍ تشرق الدنيا على عيدين لأنّه،
‏من فرحه، وبهجته، وإفراط حسنه:
‏عيد ثاني ..
- ماجد النفيعي

" عرفت إن السعادة بسمة الأحباب
‏ولمست إن البلاد عيون غاليني "

كل عام وانتم بخير آل قصيدة ❤️
الله يتقبل منّا ومنكم صالح الأعمال

نور صبح العيد ظلما من كسوفك
‏كل عام يمر .. من هالحال و اردا

‏صورتك صوتك هداياك وطيوفك
‏ما تخلي " لهفة الولهان " تهدا !

‏يكتمل عيدي اذا اكتملت وصوفك
‏انا الاحوج للتهاني .. و انت الأبدا

‏لا دريت اني ما راح اقدر اشوفك
‏ادري ان العيد خلّص .. قبل يبدا
- فيصل العطاوي

موحشة كل الليالي في غيابك
‏مثل صبح العيد ببيوت اليتامى
‏- عبدالملك الخربوش

الحزن لو له اعراف و تقاليد
‏مابكت في صباح العيد عيني

‏لك ثلاث سنوات وانت ياعيد
‏كلما جيت جبت العيد فيني
- سعيد بن فارع

حنا نخيط جروحنا طيلة العام :
‏و حضرة جناب العيد لا جا فتقها
- سمار

آخ

مادامهم في خير ، يالعيد لا باس
‏اصواتهم تجبر خواطر لقانا

‏حنا حبايبنا معانا ، بالإحساس
‏لو مرّ صبح العيد ماهم معانا
- وارفه