دخيلك ليا من جابني طاري وحنيت
‏لاتذخر من احساس الوله شي لعيوني
- حمد السعيد

‏اتصبّر واقول إني على البعد قاوي
‏والله أعلم بقلبٍ فيه الأشواق حيّه
‏- خالد الفيصل

صباح الخير 🤍🤍

مع بداية هذا اليوم نقول :
" يالله بحظٍ يطيب العمر من طيبه
‏يجبر كسور الزمن ويشيل عثراته "

مع كامل الأسف :
‏"ما تعبت من السعي بين الشوارع والحواري
‏أتعبتني عند بيبان الأمل .. لحظة وقوفي"

" يا ربي تدري اني لا جزوع ولا قليل جاه
‏ما دام الجاه جاهك و انت تمنعنا و تعطينا "

‏"كل عسرٍ لا دارت الدنيا يلين
‏وكل ضيقٍ يلقى بأمر الله سعه"

ايه اعرفك وأعرف اني من غلاك أجهلك
مرات اضمك وأخاف اني مشبه عليك

ما قلت لك عمر سيف العشق ما يقتلك
ما تشوفني حي قدامك وأنا أموت فيك

اشتقت لك قبل أجيك وجيت واشتقت لك
البارحة طول ليلي بين هذي وذيك

مليت جمر انتظارك واستحيت اسألك
وحسبتني ما بعد جيتك وفكرت اجيك

اثرك بقلبي من البارح وانا استعجلك
واثري نسيتك من الفرحة وقمت احتريك
- مساعد الرشيدي

" ليه ماكنتي على قد الحنين
‏كيف طاح الحلم وانتي واقفه

‏اجرحيني بالعتب لاتسكتين
‏اجرحيني وادري انّك آسفه "

‏" حطني في وجه الأقدار وكبار الظروف
‏واسترح في ظل وجهي وسنّدها علي "

ما أمل ابدًا من قراءتها

في دربكم يا راحلين مناكيف
تالي ليالي القيظ وأول خريفه

ردوا سلام أهل القلوب المواليف
على الوليف اللي نشد عن وليفه

لعذوق النخيل المهانيف ردوه
وعلى القصور اللي بوادي حنيفة

دارٍ لها بالقلب عشق وتكاليف
يا عل عين ما هوتها كفيفه

طبنا وشبنا وأتعبتنا المشاريف
والمرقب العالي هبوبه عنيفه

يا واردين العد كفوا المغاريف
اللي بقى دمع هماج ذريفه

والله لو دمعي يغيث الملاهيف
قطعت عرقي لين يصفى نزيفه

ياحظ من لاعرف منهو ولا شيف
إن طاب يحمد وإن تردى بكيفه

حنا ورثنا المجد عظم وغضاريف
لا ما ورثنا المجد تاج وقطيفه
- البدر

دارٍ لها بالقلب عشق وتكاليف
يا علّ عينٍ ما هوتها كفيفه🤍 🇸🇦

عليك الشوق والندب الكبير وسلطة الأوهام
‏أنا من فارقت عيني عيونك كثرت آلامي

‏تمر الناس عاديّة.. بعد كمّل فراقك، عام
‏وأنا اللي قلت لك عادي و راح أنساك بأيامي

عرفتك من ثمان سنين صادق..مغترب..منضام
‏كبيييير وشرهتك من جات ما شالتني عظامي

‏علي ما استاهلك تفرك يديك، وتلعن الأيام
‏أنا اللي المفترض تبكي على فقدانك السامي
- مرام القحطاني

‏"دثريني بالمحبة وزمّليني بالصداقة
‏و أذبحيني ألف مرة واحضنيني ‏بس ليلة"

‏"في غبّة الحب خلاني سواة الغريق
مالي وسيلة نجاة الا مواصيله
‏ٰ
‏لو أطوي الأرض لازم يطوي البال ضيق
‏ولا ينشرح بالي الا في مداهيله
‏ٰ
‏تقول ما الله ممهّد للسعاده طريق
الا الطريق الوحيد اللي يودّي له"

نصيحة :
"أضحك على الجرح حتى تقهر الجارح
‏والى تطرّفت وحدك في طريق ؟ ابكه"

على مهلك ترى كل الجروح الغافية تنعاد
‏أبي تمشي على أطراف العروق ولا تصحيها

‏و إذا عطرك سرا ليله ولا علّم متى الميعاد
‏أنا لي ذاكرة تجرح فؤادي كيف أبمحيها ؟
- عبدالملك الخربوش

"نبني بيوت أحلامنا .. وأثرها ثلج
أليا أشرقت شمس الضحى ذوّبتها"

‏" دوّروا لي مرقبٍ مايجيه الا النسيم
‏مايذبّه كون انا و الطيور الحايمه

‏فيه تصفيقة حسايف وتنهيتة يتيم
‏وفيه عينٍ تشرب الما وكبدٍ صايمه

‏داخلٍ دوامةٍ لا دخل فيها السليم
‏عوّد يجر الهزيمه وحمله ضايمه

‏والشّفيا والرجاوي على شيٍ قديم
‏حرقةٍ من بين حدب المحاني دايمه ! "

بين شوقي فـ الغياب و بين فقدان الشعور
‏ذكرياتٍ مُرّها طاغي .. على القِل الجميل

‏لو رجعت البعد أهون لي كثير من الحضور
‏ولو اببعد تثقل الخطوه على درب الرحيل

‏ايه تخيّل هـ التناقض كلّه بـ الخاطر يدور
‏كلّ يوم بـ هالقيود يزيد هالحمل الثقيل
- فيصل القاضي