عندما تجتمع المروءه والجزاله تخلق هذه القصيدة

" فيك شعر الوصف غير قابل للنشر "

يا الله يا الله ! احب شعور هالغيره جدًا

من زمان ما جاني شعور الرضا بعد قراءه قصيدة

‏الثبات معلّق الدمع وجفوني وشاح
‏ميّلوني يمكن يفيض حزني واسكبه !

‏الحروف ان طالها الصمت تنسى الارتياح
‏والشعور ينادم الحرف لين يرتّبه

‏يامساعد معْك الافكار ماكانت شحاح
‏وحدك ان صار الندا شعر لازم ينتبه

‏راح شعرك فالبساطه لما بعد النجاح
‏ولامس أعمق ماتشيل القلوب وتتعبه

‏التعازي ماروتنا .. بعد مالفقد لاح
‏في وصل يبكي جفافه على معشوشبه

‏الهدوء اللي نسيمه على السلوة رماح
‏فضّ جمع الصبر فينا وطوّل مغربه

‏إنطفى فوق القصايد بعد فقدك صباح !
‏واشتعل حرفٍ من الحزن ضيّع منسبه !

‏الشجر مامال غصنه من كفوف الرياح
‏البحر ما هام موجه ، وغرّق مركبه !

‏البروق تخيّط الغيم من عُمق الجراح
‏والنزيف يشرّق الارض لاجت تشربه !

‏الحكي مابين الاحباب جافاه الصلاح
‏ما لسيف العشق سلّة عشان يأدّبه !

‏والشعر طفلٍ متمتم بعد ماغبت صاح
‏كل ماقلنا قصيدة .. تعيّي تعجبه

‏مانت بس اللي يسيّل نغم حرفه قراح
‏لكن أكثر من تراقص على شفاك أعذبه

‏ينتظر من خمسة سنين صوتك ماستراح
‏فيه أمل لو طال نومك .. تقوم وتكتبه !
- أيمن الرويلي في رثاء مساعد الرشيدي

" والشعر طفلٍ متمتم بعد ماغبت صاح
‏كل ماقلنا قصيدة .. تعيّي تعجبه " ياااه

ياسلاام

صبحكم الله بالخير 🤍

صاحين ؟ عندي قصيدة جديدة :(

هذه القصيده للغايبه الحاضره ؛ جدتي

للمكان اللي تحفوى بالليال المدلهمّه
سارت اقدامي ونفسي تاقت لرؤية أثرها

غرفةٍ اهرب إليها كلّما لاقيت غمّه
علمتني صاحبتها كيف تستقبل كدرها

تحمد الله واتّباشر بالصبر يبلغ متمّه
لو غيوم الحزن سالت ! فكّت يْديها لمطرها

خلّدت سيرة واثر ما تلحق الراحل مذمّه
اسمها احيا الديار وذكرها الطيّب عمرها

للموادع إنكساره ؛ مثلما للقبْر ضمّه
والمواجع تتبع المحزون لو قلبه دحرها

من كثر جيّات حزني احسبوني بنت عمّه
كلّما جاني قلط فالغرفة اللي ما هجرها

عادتي اكرام ضيفي لو نفث فالروح سمّه
البلا انه مـ استحى من جود يمناي وبترها

مابقى لي غير ثوبٍ لا طغى شوقي اشمّه
فيه ريحة ذكرياتٍ ما تسنّى لي زهرها

احسب ان الوقت لملم ما عجز قلبي يلمّه
والمشاعر دفنت بليله محد غيري سهرها

لين ما طاح نْظري عالدفتر وناديت : يمّه
مادريت الا وانا آصيييح واعانق صورها
- مها

‏قد قلت لك مقدر على النسيان وش فاد الكلام
‏كم راح من صوتي نحيب وما وصل صوت الصدى

‏باقي ترى .. فيني رجا ترجع ويرجع لي السلام
‏إن كان ما جيت بْـ نهار اليوم ترجع .. لي غدا

‏عندي أمل تشرق مع الشمس وتنوّر هالظلام
‏عقْب الظما ألقى السما تمطر على قلبي ندى

‏حلق النداء ماعاد له نبره على بعض الملام
‏صمتي خنق صوتي "تعَب" والعزم من عمري غدى

‏متى متى .. ترجع متى ؟ محتاج يلتمّ ، الحطام
‏محتاج ابشّر خطوتي ، وآقول للدرب "إهتدى

‏حبيب قلبي إهتدى" بعد المفارق والخصام
‏أثر الغياب اللي .. طرا كابوس في ليله عَدا

‏واقبل يغنّي جيت لك طيرٍ مع اسراب الحمام
‏جيتك نعيد اللي مضى مقدر على ظُلم المدى

‏ما زلت اعيشك بالخيال اليا عجز جفني ينام
‏وكثير اعاتب "غيبتك" ياليت لـ عْتابي جدا !

‏ما علّمك غدر الزمان انّ الكبر شيٍّ حرام !
‏من كان في قلبه كبر ، ما يعترف فيه الهُدى

‏قبلك ولا مرّه توقّعت الهوى ... فيه انهزام
‏بعدك عرفت انّ الفراق اوّل عدوّ مْن العدا

‏تعال واحضنّي أبي من بعض ذاك الإهتمام
‏يكفيني البعض اوعدِك بس لا تخلّينا وْحدا

‏تعال ما عندي على غْيابك ملام و لا انتقام
‏فدا فدا لو جيت اغنّي لك على الغيبه فدا

‏كنت اسمع بـ شيّ ويسمّونه أثَر مسك الختام
‏وانا اشوف انّ الأثَر حزنٍ .. على وجهي بدا

‏تعبت من طول انتظار ، الليل يغمره الغمام
‏وش حيلتي بأمر القدر لو تبّت اشواقي يدا !
- فيصل القاضي

" قبلك ولا مرّه توقّعت الهوى ... فيه انهزام
‏بعدك عرفت انّ الفراق اوّل عدوّ مْن العدا "

‏" تعال ما عندي على غْيابك ملام و لا انتقام
‏فدا فدا لو جيت اغنّي لك على الغيبه فدا "

يا سلام :(

اللهم صلِّ وسلم على نبينا محمد

مبارك عليكم الشهر يا آل قصيدة 🤍

مرحبا آل قصيدة
رتبتوا جدول لشهر رمضان ؟
جددتوا النيه ؟ عزمتوا على ترك ذنوب لازمتكم لمده طويله ؟ نصيحه لا يمر هالشهر الفضيل مرور عادي ، اسعوا ، جاهدوا الله ، اعقدوا النيه واعقلوها وتوكلوا

أوقات الانتظار هي أوقات ضايعه تنتظر عند إشاره مرور ، زحمه ، تنتظرين عند الفرن الخ من هالأوقات والأغلب معه جواله افتحوا على اي تطبيق تعتمدونه بهالشهر للختمه واقرؤوا ما تيسر لكم ، لاحظت القراءه من الجوال اسهل وايسر لأن المصحف يستلزم طهاره وجلوس بعكس الجوال ، استعينوا بالله واستغلوا كل دقيقه