‏صديقة عمري ان جاد الكلامُ وْما سرابه ريح
‏أمانه، وجه صدّك قدم وجهي .. لا تلدّينه

‏سئمت مْن الشعور اللي مابين الصمت والتلميح
‏قريب العام .. احس ماني على قلبك وتخمينه

‏وانا اللي لا تضايقتي ماكنت احتاج للتوضيح ..
‏وانا اللي لوّ ما قلتي أعرْف اللي بْتقولينه ..

‏ثمان سنين ماشفت بْـ عيونك حدّة التجريح
‏" كلام البارحة ، كم صار لك وانتي تحدّينه؟ "
- نوف العثمان

خطا..خطا..صح..لكن صح ماهو صحيح
حسبتها الف مره.. والف تطلع خطا

الصمت شاهد على قبر الكلام الذبيح
كانت عيونك فشق بندق وشعري قطا

سكت..والشعر يصرخ والقصايد تصيح
والقلب عاري وانا صمتي فراش وغطا

لوبعض الايام مرتني بوجهٍ فليح
جتني الليالي تشيل الجرح حتى سطا

ياليتني قبل اعرف اركض تعلمت اطيح
لاجل اتقي شر عثراتي واعاف الوطا

ياليتني قبل اعرف اتعب عرفت استريح
عشان ماتوجع دروبي ثقيل الخطا

جيتك جريح الكلام وكان صمتك جريح
بين المجاريح ماحاجة دخول أو سطا

تدري وش اللي عجبني فيك غير المديح
تنسى التفاصيل في كذبك وتنسى العطا

خطاي مايستره صمتك وعذري شحيح
وخطاك ماتدمحه وحشتك عقب البطا

هذا انت ناسي من انت ومابقى للصحيح
الا اني ارجع وانا جيتك وهذا خطا
- سعد الحريص

رفيف التعب قد مره الليل والترحال
على وجهة؛ الأيام، ساري ومتخفي

قديمٍ يشوف إن المساعي طويلة بال
مثل ليلةٍ؛ فيها التعاليل ماتصفي

سماك التحايا والتباشير، والآمال
وثراك المدى اللي فـ أخره شايفٍ حتفي

يجوز إنك أول ضحكةٍ.. للزعل تختال
معك مبسمٍ عن جرهد البال مايقفي

تجردت عن قيض المسافة لْـ ظلٍ مال
وتفردت في قولة:"هوى بالي وشفي"

أنا مالي بْـ "حمل التعب" والدروب طوال
مابدّد ظمى بالي.. ولا قلت له يكفي

رتيب الهقاوي.. عاد لك صبح مايحتال
تمر الليالي.. ماتمادى على طرفي

قريتك بْـ صوتي، بالمشاوير، بـ الأطلال
ويا كم مرّةٍ؛ اقرأ تفاصيلك.. بْـ كفي؟

أنا خايف أكون المسافات، والرحـال
واخاف إن عمري قبل اواجهك؛ مايكفي
- محمد السلطان

" أجتمعنا بكل شيّ .. وْما تجمّعنا بصوره
‏ليت ماقفت بك الدنيا على عكس اتجاهي

‏عادك الثابت لو ان الوقت له " وقفه ودوره "
‏وعادك بْـ قلبي قبل مـ تْكون في وجهي وجاهي

‏مالفتني صاحب المظهر ، ولا عقله ، وشوره
‏والله ماغيرك لفت عقلي ولا شد انتباهي "

- والله ماغيرك لفت عقلي ولا شد انتباهي -

والله اني مااتجاوز دموعه لين اموت
‏فوق خد ٍ كن في ورده الابيض ندى

‏دمعة اللي قام يذكر ذنوبه في القنوت
‏واسمعوا لبكاه بمكبّر المسجد صدى

‏وش يموّتنا من الجوع دام الوصل قوت؟
‏وش يضيعنا وخطواتنا على قدا ؟

‏قال : انا فرصة عمر كيف تتركها تفوت ؟
‏قلت : لاصارت لمصلحتك الدنيا فدا ..!
- سلطان بن بتلاء

" وتهرب من دهاليز الحياه لْمحكم التنزيل
‏هو اللي عن رتابة خيبتك ترتاح في قربه "
القفله نبراس الحياة

حادي الوجد وان ضاقت عيون المدى
خل صدرك مثل صدر الشمال أجودي!

لاتموت الأماني والأغاني سدى
ما للأحلام بـ قلوب الأوادم ودي

شوفني كل ما اهتزّ الحنين وبدا
ينزح النوم ويزور السهر مرقدي

آتململ و أروح لما طرالي فدى
و اتذكر و انا جرح المفارق ندي

صبحه الي توضى من كفوف الندى
ليله الي مثل طيبة هله سرمدي

دنّة النجر، صوت الفجر، بُعد الردى
ريحة الهيل قلبٍ للسهر محتدي

ماني اوّل غريبٍ عن حنينه بدى
مرقب الليل يسجع بـ الغنا و يحتدي

لو تشتّت بـ ارض الله بليّا جدى
لو تضيق الدروب بضيقتي و تعدي

لو غدوا ربعي الأدنين همّ العدى
ماتكاثرت فزعاتي ومدّت يدي

صاحبي صاحبي ياصاحبي ما هدى
قلبي اللي تحن ضلوعه لـ مولدي

صرت وحدي ينادمني حديث الصدى
صار مالي عدوّ إلّا الزمان الردي

كل ذنبٍ قدرت استغفره ما عدا
ضحكةٍ ينبلج عنّابها بـ بردي !

جارة القلب وبيوت الوصال إحددا
قبل ما تنقب الفرقى و أهيم وحدي

عقبها ماعرفت ألقى لقلبي هدى
بعدها ما بذلت لـ وصل بنت إجهدي

صاحبي صاحبي ياصاحبي ما غدى
من بـ طهر الشمال ونجمته يهتدي

المدى ضاق والحادي جفاه الحدى
و النهايات مكتوبه.. قبل نبتدي
- نواف التركي

الندم لو له ملامح ؟ بانت فـ وجهي جروح
مثلما بانت محبتْك - فـ حلايا مبسمي -

"لقيتك سكةٍ تاخذ قصيدي لأبعد الترحال
علامك كلما يزهر شبابي تكسر غصونه؟"

لو دمحت الزلّه وغضيت طرفي
‏من يرجّع ضحكه شفاهي اليتيمه ؟

ذبحني الشوق يا رباه وين المفر 💔
بعض العرب حيها ميت على ميتها
- ناصر القحطاني

صباح الخير

14 فبراير عيد الفلتانين وشكرًا

شاركوني قصايد انزلها ، نرحب بأبيات الهجاء فقط وغيره لن ولن ولن ينزل

اي شخص يحتفل اليوم او يعطي ردة فعل بسيطة ، هو شخص منسلخ الهويه

+ ويستحق من الجميع التنمر عليه لانه انسان كريه وكخه

‏" على المسلم أن يكون عزيزًا بدينه وأن لا يكون إمعه يتبع كل ناعق "

-

قصيده ماعندها اليوم الا هجاء

مرّ طاريك والله يكرم السامعين
كنّ ما في قواميس الكلام "ونعم"
- ظافر الأحمري