الا يالله لا تقطع رجا داعيك يا رحمن
يا علاّم الامور الخافية والضيق.. والشده

على بابك واناشدك العفو يارب ..والغفران
وفيضٍ من عطاك ورحمةٍ ماهيب منرده

خذتني لوعة الوقت الصعيب مفرق الخلان
وقلبي ضامته سود الليال وبيحت سده

انادي بالوصال احيان وادعي بالفراق(احيان)
واخفي غايةٍ في داخل الوجدان منضده

احسب ان الخطا مردود والاحسان (بالاحسان)
واحسب الجرح يبرى والسنين تقصر المده

واحسب ان العهد بيتٍ قوى شامخ البنيان
عسير الوقت لو هد الجبال الصم ماهده

واحسب البعد تجفاه القلوب ويسكن الاوطان
واحسب ان المفارق يتعب المشتاق (ويرده)

واليا مريت يالصوت البعيد وجابك التحنان
معك قلبٍ يتوق ومعك قلبٍ (مخلفٍ وده)

تواعدني مواعيد السراب لخافق الضميان
و تتل الروح مني والنظر فدروبك الده

واجيك بخاطرٍ يشري رضاك بغالي الاثمان
وعنك والله اني.. ماعرف الهجران والصده

ابد ماكن به غيرك على وجه البلاد انسان
عليك الروح توله والنوايا معك منشده

الين ارخصتني ياصاحبي فالموقف( الخسران)
وذقت الغدر منك بطعنةٍ فالصدر ممتده

عسى ربي حسيبك كيف قلبي في يدينك (هان ).؟
وانا مثل اليتيم اللي نثر دمعه على خده

خذاك الزود واعماك الغرور وجابك النقصان
تقول الحق .؟ ولاّ تنكره .؟ ولاّ تجي ضده .؟

على ماتشتهي روّح ركابك والعذر له شان
مثل ماقيل كلٍ يلبس ثيابه على قده

عسى لي منك مسرا يقتفيه البعد والنسيان
وهجرٍ ماتجي له فالضلوع النايحة ( رده)

وعسى قلبٍ (يميل) وينتزع لك داخل الوجدان
تمثناه الرماح النافذه فالصدر ... (وتلده)
- أبعاد التركي

كل بيت أوقف عنده بـ اااالله :(

أبعاد العذبة جدًا

" واحسب ان المفارق يتعب المشتاق (ويرده) "
والمشكله حتى الشوق مااا ردّه

" وعسى قلبٍ يميل وينتزع لك داخل الوجدان
تمثناه الرماح النافذه فالصدر ... وتلده " آمين

مساكم الله بالخير 🤍

‏" يتعالى المرء على أحزانه يقينًا بأن الحياة تمضي ولا تعبأ بالقاعدين، فما يزعجك اليوم سيغدو لاحقًا محض قصاصة عارضة بين صفحات عمرك، وستدرك أخيرًا أنّ من حقّ نفسك عليك أن تتدارك الزمان بالسّعي فيما يرفع وينفع، لا بتحبير القصاصات المهترئة "

"لو إنك غصن من كثرة هبوبي كان حس ومال
لكنك بين زفرات الشعور ولهفتي .. شلفا"
- عبدالملك الخربوش

"أنا يا بنت حوّى وإن كمل قدري مع الأَشناب
‏أكمّل فيك قطعة من حشاي ونص من ديني"

طبعًا هذا بيت شعري لا يُصدّق ولا يعتدّ به فقط للـ ااالله و الـ يااا سلااام :)

صبحكم الله بالخير 🤍

" الليل دمعة حزن والشوق برد شديد
‏وش يبعْد النوم غيرك يالشديد القوي
‏
‏أخاوي الليْل واسمر نجمته من بعيد
‏وأمنته ⁦ سنين⁩ عٌمري واثر ماله خوي
‏
‏الصمت يرسم على وجهي حياة السعيد
‏والصبر يخفي ملامِح حزني الملتوي "

" أحلامنا رهن الليالي، من سنين
‏وظروفنا تكذب لو إنها حقايق

‏ياااالله عسى الأيام تضحك لنا ليييين
‏ماعاد نذكر وجهها اللي يضايق " آميين

لما قال سليمان المانع :
" وزّعي عمري لك اخوان وقرايب
‏بـس لا تشكين من قولـة وحيدة

‏لا حداك الوقت ماني عنك غايب
‏عاندي بي جور دنياك العنيدة "
ابي اعرف المرأه المقصوده هنا ما اغترت بعد هالأبيات ؟ مثل انها اكثر بنت محظوظه بهالدنيا ، شيء من هذا القبيل

فيها نوع من الدلال اللذيذ

‏يعرّيني الشوق، وتعشمني الأحلام
‏لا لبّسني التفكير ثوبٍ ماهو ثوبي

‏على يمِّتك من وين تبعد بك الأوهام !
‏ما دام أعرْفك، ماني بـ ناشد عن دْروبي

‏مثل ما تدارَك في المطر خطوة الأقدام
‏تداركت في وابل مشاريهك عيوبي

‏وش أقول لو وجهك توارى مع الأيام؟
‏وأنا الضحكة اللي في وجْه غيرك ذنوبي
- صالح بن حمد

وإن حارت الكلمة و صارت تناهيد
‏سيف الحكي من غمد الأفكار سِلّه

‏ذاخر حياتي غيث يا طاري البيد
‏ما به قفار إلا شعوري يبلّه

‏اللي يبي زلة يحب المناقيد
‏على هوامش باقي العمر خلّه

‏أبيك صدفة عن جميع المواعيد
‏غلاك لين الحين خابر محلّه
- عبدالملك الخربوش

" فإنَّ الهُموم إذا ترادفتْ في القَلْب ضاقَ بها، فإنْ لم يفضْ منها شيءٌ باللِّسان، ولم يَسترِحْ إلى الشَّكوى، لم يلبثْ أنْ يهلكَ غمًّا، ويموتَ أسفًا "

يا حادي الدمع .. صب من الفناجيل
الليلة الجفن ، ما يشره على النوم

واللي على خاطري ما يشبه الليل
لكن تنامى : ظلام ، وصمت ، ونجوم

قلت أفرش العين في درب المناديل
يوم المطر .. ما لقى في صدري غيوم
- بدر الحمد

-

لولا الحيا لاصيح خمسين صيحة
صيحة يتيم ضايمينه عمامه

ابوه من بين النصايب طريحه
وامه توفت قبل يبلغ فطامه
- مفرح الظمني