يمـّـه من سنين ماضرّوا ولآ سرّو
‏وأنا لي سنين كاشخ فيهم أحبابي

‏برّيت فيهم سنين العمر ما برّو
‏وكظمت غيظ السنين و قسوة عتابي

‏هبـّـت رياح الليالي ( همّ ) وأتعرّو
‏وقمت أنتخي بـ المواجع وأفصخ ثيابي

‏وأرمي بها ألبسوها ( عز ) و أتورّو
وأنا اببعد بعيد هناك لــ ( غيابي )

‏يمـّـه أبسألك أحبابي إذا ( ذرّو )
‏الملح في جفن عيني أعذر أهدابي ؟

‏أنا أعذره ع الدموع الزرق لآ خرّو ؟
‏وإلا ألوم الحبايب وأحسب حسابي ؟

‏البارحة كنت ضايق حيل ما ( طرّو )
ولآ حسبو لي حساب ولآ نشدوا مابي !

‏قعدت أراجع سنين العمر كم غرّو ؟
‏مافيهم اللي ركض لي ( يهوّن أتعابي )

‏يمــّـه .. إذا في صباح الجرح مامرّو !
‏متى يمرّون يا يمــّـه على بابي ؟

‏أجل حبايب ولآ ضرّوا .. ولآ سرّو ؟
‏وأنا لي سنين كاشخ فيهم [ أحبابي ]
- نواف الفهاد

‏" يمه إذا في صباح الجرح مامرّو !
‏متى يمرّون يا يمّه على بابي ؟ "

آوتش :(

اعجبتني القافيه متفرده وأول مره تمر علي

صباح الخير 🤍

‏معزوفة الطيش عزْفك لو هو إسلامي
‏قطَفْت من جنّة الإحساس تفاحة

‏الوقت شخبَط على كراسة أحلامي
‏وما في حقيبة حظوظي أيّ مسّاحة

‏مَكيَجْت وجه الآمال بْريشة آلامي
‏والصبر قبل أبلَعه بلَعت مفتاحه

‏مراية الحزن تعكس صورة أيامي
‏وعيون الأقدار : سرّاقة و مزّاحة

‏الماضي من العمر ما زال قدّامي
‏في مسرح البال يعرض سيرة أفراحه

‏للذكريات الجديدة : عقل متعامي
‏وللذكريات القديمة : عين لَمّاحة

‏في سكّة التّيه أدَوِّر قِبْلة أقدامي
‏والليل سادِن يِلفّ الأرض بُوشاحه

‏يا ما رشَفْت الوعي من كأسة أوهامي
‏ويا ما بْحضن التعب حسّيت بالراحة

‏أبوس عين الجروح بْشفّة إلهامي
‏وأقتل شعور الخجل وأرقص على جْراحه

‏شاعر نزَعت الثقة حتى من أقلامي
‏أرتِّل من الشعر وأنفث على الساحة

‏من قبل يجرح ضميري مشْرط أحكامي
‏مُؤمن بْأنّ " التسامح " للعمر واحة

‏أكسر رماح الظنون بْصبري السّامي
‏وُبِيض النوايا " مباخِر " روح فوّاحة

‏على كثر ما سقى غيم السفر ظامي
‏لقيت " فالعزلة " أصدَق وآمَن سياحة

‏ومن بصمة العقل ماهي بصمة إبهامي
‏يكسب حروب الحكي من صمْته سلاحه
- خالد القصيِّري ⁦ @kkkaliddd⁩

قصيدة صباحية من العيار الثقيل :)

اللهم صلِّ وسلم على نبينا محمد

‏كل ما لميت فكره تنتثر بـ الصدر فكره
‏وكل ما غنيت قاف يرد فيني قاف ثاني

‏لين مليت المكان اللي بـ عيني ضاق كبره
‏واستلمت العزله وسلمت لـ الداله مكاني

‏كم مشيت ولا لقيت بـ دربي الملعون دبره
‏كم سهرت وكم عطيت الليل لكن ما عطاني

‏من يعالج خوفي من اليوم والليله وبكره ؟
‏من يرجع لهفتي ؟ ويردني لـ اول زماني ؟

‏في عيون الصمت دمع وفي كلام الضيق نبره
‏ومن على لساني ملامه تربط بخوفي لساني
- جزاء الغيداني

‏ارسم الذكرى واغنيها قصيد
‏لين تكتبني على وجهي عذاب

‏التهي فيها .. وتاخذني بعيد
‏اتقي عنها .. وتسرقني شباب

‏وكل ما قلت ( ابتديني ) من جديد
‏تخنق حبال الخطا ارقاب الصواب

‏وتصرخ افواه التعب .. هل من مزيد
‏يا جناب الحاضر وماضي الجناب
‏
‏العتاب اللي بـ صدري مايفيد
‏حتى لو ماهو بـ حي الله عتاب
- جزاء الغيداني

جميلة جدًا

من ذكريات التلاقي لين وقت الرحيل
‏كم سافرت ضحكةٍ ما ينتظرها بلد ؟

‏يا جرهد الروح لا تنشد عن السلسبيل
‏و الغيم قفّى .. و همّال الليالي جحد

‏أنا الوعد والليال السمر دربٍ طويل
‏إذا ابتسم مشرق الليلة يبان الوعد

‏قلتي محد راح يرجع وأنت عابر سبيل
‏من يومها صرت واقف وأنتظر لي محد
- عبدالملك الخربوش

يووووه :(

صباح الخير 🤍

"من أكثر العبارات التي تؤثر بي وتلامس شيء في نفسي: «أحببتُ الله حُبًا هوّن عليّ عبور الطريق»
إيّ والله لطالما كانت محبّة الله طوق النجاة في أيّامنا الثقيلة، لطالما كانت المؤنّسة والجابرة أمام الملذات الباهتة، لطالما كانت محبّة الله هي الدافع الأقوى الذي يمدّنا بالصبر في كل بليّة "

‏من تربة الدهشة ولدت، بلا اسم وبلا .. بلاد
‏استنطق الدمعة من عيون الزمان الأجودي

‏استلهم شعوري ليا هب الهوى و اغوى سُعاد
‏ما املك الا سبحة التفكير و .. الحظ الردي

‏استبصر الواقع و اشوف الخوف فـ وجيه العباد
‏واستطعم الضحكة من وجيه الفقارى واهتدي

‏قديسة الفوضى تراني ممتلي هم و .. عناد
‏رغم انتشار الصوت في بطن المدى عشت وْحَدِي

‏حطبت للعزلة من غصون التساؤل و السهاد
‏واشعلت ضو الذاكرة، للذاكرة سقت جْهَدي

‏استوقف دموعي على الأطلال و يهب البراد
‏تمرجح ايام العمر من بين اصابع مشهدي

‏طفلٍ كبر يستقبل الزوار من حضن المهاد
‏له في عيون امه منابت ورد والصبح الندي

‏طفلٍ عشق ريح المطر و الخيل و ليال العياد
‏طفلٍ يغني للملأ (مرتاح احبك) و يْعَدي

‏كبرت ليه اكبر؟ وانا مقبل على ثعول السواد
‏كبرت ارتب خطوة المرتاع و أشيل جْسدي

‏كبرت اودّع نصفي المفتوق و الم الحصاد
‏زهرة شبابي رتلّي للطيش،للطيش انشدي

‏حمامة الشوق انزعي عن جسمي ثياب الحداد
‏لين اتسيل في عروق الحلم و اخطف مقصدي

‏هذي ثلاثين العمر متبعثرة مثل .. الرماد
‏ما كنها الا ليلةٍ بين النضوج و مولدي

‏يا موطن الدهشة متى بضحك وتضحكلي سُعاد
‏ونغني لكل الملأ (مرتاح احبك) ونْعدي
- وليد بن مانع

قصيدة صباحية من العيار الثقيل كالمعتاد :)

أنا خبري بهالورده وهي بيضا قبل ما أجيك
و لكن من خجلها جيت أقدمها لك أحمّرت

يفزّ العشب من صحرا لها جاب البدو طاريك
ومن يقدر يلوم أرضٍ وطيتيها لو أخضّرت

حبيبي والجبل وادي وقف بقدوم يحييك
حبيبي والكلام أطفال هابت حسنك وفرّت

أحبك والسما بحرٍ سما يومه غسل رجليك
ولو ماأنك لمست الشمس مأشتعلت ولا أحترّت
- عبدالمحسن بن سعيد