‏حالة مزاجية ترتب لك البيت
‏حسب أمزجتها تنكتب لك قصيدة

‏مره يجيك البيت إليا تمنيت
‏ومره يضيع البيت ولا هو فقيدة

‏يا اللي تسب الحب وشلون سبيت ؟
‏هذا نعيمٍ بالحياة الشديدة

‏ينْسِيك همك كن ماهم لاقيت
‏وتعيش في ظله حياتك سعيدة

‏الحب ماهو عيب ان كان حبيت
‏العيب كل اسبوع عاشق جديدة
- عبدالله الحربي

القفله قصيدة ثانيه

‏غاب القمر واللي غيابه شحني
‏قبل القمر غايب ولا قلت له وين

‏ياليت صوتي زين ودي اغني
‏ياليل يا جامع على الود قلبين

‏تدرين يا اغلى من عرفت وطعني
‏ان طعنك اقسى من طعون السكاكين

‏قلتي لي انك بس ما قلتي اني
‏اللي تساوا عنده الزين والشين

‏اول طريق الحب ما يمتحني
‏الامتحان الصعب في الحب بعدين

‏نفس الشعور اللي فتني .. غبني
‏ ونفس الكلام العذب صار الامرين

‏وشلون عينك شافت الذيب جني
‏رغم العداوه دايماً بين الاثنين

‏اوسع من حدود الخيال التمني
‏واصبر ما شفته فالحياه المحبين

‏ماصار فيني صار فيني ومني
‏حتى على خيبة ظنوني .. تمونين

‏لو اني ازعل كل ماخاب ظني
‏ماكان قلتي عني اللي تقولين

‏واجد علي … اللي تقولين عني
‏وواجد عليك اني معك لين هالحين
- جطلي بن فهد

‏" نفس الشعور اللي فتني .. غبني " :(

" يارب لا تترك على الأرض هذي فقير
‏ولَا تخلّي الصدور الطيّبة.. ضايقة "
- آميين

قصر بال، وشح وصل، وقل دبره
‏والسؤال اجاوبه بـ "ادري" و "مدري"

‏والله اني حاسدٍ مثقاب الابره
‏يومه اوسع للهواء من ضيق صدري
‏- محمد البندر

آوتش

‏يا شعور الليل هذا الحزن كافي
‏كم جرحٍ قبل نور الفجر نازف؟

‏العروق أوتار و جروحي قوافي
‏صارت أيامي مواويل و معازف

‏من مشيت بسكة الخذلان حافي
‏داري إن الهجر لو كابرت..آزف

‏يا حبيبي دام هذا الجرح غافي
‏قلت أغني وانكسار الصوت عازف

‏لو أجازف راحت دياري منافي
‏وأنت منفى لو بقيت ولو أجازف :(
- عبدالملك الخربوش

يووووه

قصيدة تحتاج وقفة تأمل

" كلمات حقيقية"

من فضل ربي عليك إنك تصلّي
‏فيه غيرك رااح عمره ما ركعها

‏و الله إنها مكسب العمر الموّلي ..
‏و السعاده و الفرج و الخير معها
- محمد العزام

‏لكن الليل هذا... اصدقه أكذبه
‏ان جهلني يقينه صحت بالشك فيه
‏اعرفه قبل احرث الذاكرة واكتبه
‏قبل افلّ الجروح بسرمديّه واتيه
‏من طويله عرفت ان القصايد هبه
‏من قصيره عرفت الفرْح ماله شبيه
‏في سكونه حنين يرد لي اعذبه
‏ صوت لـ أمي ويلبسني نعاس ارتجيه
‏في تهاويدها كان الزمان اصعبه
‏مايكفكف دموعي في دفا راحتيه
‏كنت طفلٍ قناديل السما موكبه
‏كـل مـالاح نجـم ٍ قلـت يُمه أبيه
‏يضحك العمر وسنين الصبا معشبه
‏واضحك احيان والذكرى عذاب النبيه
‏آتتبع شريـط الـذاكـرة و انتبـه
‏ماعرفني وانا اللي انتهي وابتديه
‏كم تهدج على درب الكلام أنسبه
‏صوتي اللي ذخرته للسؤال الوجيه
‏كان بيني وبين الطفل هذا شبه
‏ ما غدا من تشابهنا تعبت احتريه
‏شيطنته وهدوءه فضته وذهبه
‏حلم غضٍ تلالا في دجى مقلتيه
‏اذكره مثل طيفٍ ماقطفت عنبه
‏ واتبعه مثل دربٍ مارجيت اهتديه
‏المرايا تحاشى سيرة الأجوبة
‏في تفاصيل وجهٍ حيرته تحتويه
‏ليه تطفِي مفازة عمري المجدبة
‏روح طفلٍ تهادت في صبا العمر تيه
‏آه .. ياوجهه اللي ماقدرت اجذبه
‏ من غيابات جب الذاكرة وأرتديه
- عبدالعزيز المخلّفي

" كنت طفلٍ قناديل السما موكبه
‏كـل مـالاح نجـم ٍ قلـت يُمه أبيه "

جميلة جدًا

كيف اخبّي الجرح لا طوّل سكوتي
‏واتظاهر بالفرح لامن بغيت ؛

‏وامي تْعَرف الحزن باطراف صوتي
‏ونجد تعرف ضيقتي لامن سريت
- صالح الهويملي

اوهمتني ان الحب زادي وشربي
‏عشان تسلب مهجتي لذة العيش ؟

‏ما دام لك نيه على رد قلبي
‏شرّعت بيبان الهوى كلها ليش ؟
- صبح

‏سرجت الروح عن صدر المكان ولا لقيت إعتاد
‏تحت جدب السنين اللي تمثنت ساقها داري

‏عن الصوت اتمادى وأخذ بلاد الظنون بلاد
‏عزاي إن خاطري قوسٍ يملّ ولا لقى باري

‏شفيف الخلد ماجادت يدينك والثياب حداد
‏جداك الصد عن سيفٍ قديم وخنجرٍ فاري

‏بعد ناديت ضحكات الحياة وجازت الأضداد
‏سكبت الريح؛ في كف الظلام وجيتها عاري

‏يجوز إن التعب.. ليلٍ يعنّ الواردات جياد
‏بعد طول الطريق اللي شعم في قبلته ناري

‏بعد وجهٍ خذا ريمه؛ وخلاها بدون شداد/
‏ضريرٍ لو يبيع الوصل ماجاك النوى شاري

‏حبيبي عادك النجم القديم إن صد ليل وْعاد
‏تحت جنحك أردد ضحكتي وأرتب اعذاري

‏خذيتك عن هزال الناس ويدين الظلام عناد
‏وكم مرت شهورٍ مانشدت بْها عن أخباري؟

‏ضميت الود وعيونك مناهل والسنين سهاد
‏على وين اتجه لو ضاع في سود الهدب ثاري؟

‏على وين أخذك برقٍ اشوفه عن ظماي قناد؟
‏_على قلبٍ عن عيون التجافي ماهو بْـ داري

‏على غيمٍ يمرره التعب لاجف حلق الواد
‏قبل لايسبر اغوار الصحاري، يسبر أغواري

‏على الطاري اقولك كذبةٍ بيضاء ولاتعتاد
‏ولاتعتاد اقولك كذبةٍ بيضاء على الطاري

‏تبعتك عن جفافي وابلٍ مقفي ولا الله راد
‏عسى لك عودةٍ فيها المزون تْبلّل؛ دياري
- محمد السلطان