‏"أنا هويت وما دريت ان الهوى طفلٍ حزين
‏بكى من اول ما حكى، ما تم كل السالفة"

الصمت بعد العتب واللوم يِبْكيني
لاترجع شفاي وتّمتم مواعظها !

ياغالية .. ردّي لدربك عناويني
أتعبتي العين من كثرة مْلاحظها

خذلت باسمي معاك اللي مسمّيني
ماظلّ للعقل معْك آراء يفرضها

لو يفتل الحب حبل يديك بسنيني؟
مايقدر الحظ بالكفّين ينقضها !

مرّيني أفراح ولاّ أحزان ، مريني
اللي تجي من عيونك؟ ماقدر أرفضها

وعيونك اللي على الضيعة تمشّيني
لاطاح ساق الجفون شلون ينهضها ؟

تعيش فيها الدموع اللي تعنّيني
مدري وش مسويّه لله وحظّظها !

عطيني أصعب معاركها وخلّيني
واخوضها من قبل ينقال لي خضها

ولا تخافين شي .. ولاتخافيني
طعناتك تْمرّ صدري ماتعرّضها

وشلون أضيّع يديك وتغفل يديني ؟
وانا كرامة ردي النفس حافظها !

والفرصة اللي معك كانت تْجرّيني
والله ماضيّعتها من شان أعوّضها !

مدري هكاليوم وش ضحّك معاديني
حتى الليالي بدت تنسى مروّضها

زعلْك هز السماء والارض في عيني
وارتاب لون الغروب ونام فـ أبيضها !
- أيمن الرويلي

أجاهر بك،
لأنك ما أنت ذنبٍ يرهق اللي تاب
أنا عبدٍ يخاف الله ولا قد جاهر ذْنوبه

أنا عبدٍ لقى فْـ قلبك سكينه كنّها المحراب
وكبّر به قبل يذنب.. وسلّم معلن التوبة

أحسب أن السنين أن طوّلت تستأذن الغيّاب
وتبدا تمحي آثار السوالف نوبه.. ونوبه

وعرفت أن الزمن ما يستحي وأن الأمل كذّاب
إذا ما هان جرح الآدمي؛ ما هان محبوبه
- صالح بن حمد

ماشاء الله تبارك الله 🤯

المدح خلص

الله يرحم مها

صباح الخير يا وجهٍ معاه انسى عنا الدنيا
معاه الكون يضحك لي كأنه ماجرحني بيوم
- مها

.

على ضفّة مشاوير السنين تْقول ميّت حي

:(

عرفت أن الفرح بعدك وهم و أن الأمل كذّاب
و غدا سيفي قصيد إن غارت الأوهام أستله
- محمد منيف

ابرحل .. مثلما يرحل حمام الدار
وعلى اكتافي مخاوف تشرح اسبابي

أخاف من الحرام و دربه المكّار
وأخاف من المعاصي تصبح زهابي

أخاف من الشعور الصادق المحتار
وأخاف من الندامه تطرق ابوابي

أخاف من الصبابة .. والحنين البار
يباغتني - بلحظه - يفتضح مابي

كثر مَـ اشتاق للجنة - أخاف النار -
وأخاف من الجزا يستوفي حسابي

حيا قلبي مَـ بين المُكره المختار
على قيد المخاوف عاش مرتابي

تعلّمت اسرد اسبابي بدون اعذار
ولا أخلق من الأعذار - أسبابي -

لو ان الناس صاحت بي سخط وانكار !
فـ انا في وجه أعدائي و -أحبابي-

مثل ماغبت غيبه ما لحقها العار
صدقت بجيّتي واخلصت بغيابي

واذا اجبرني البرد لرجوع الدار
تزمّلت الشعر لين اصبح -ثيابي-
- مها

- مخاوف على هيئة قصيدة -

.

قالت العالم تقدم وابصمي بالميه
‏ماحدٍ غيرك بقى في هالسواد وحرّه

‏قلت انا ما هي عوايدنا وشيخ الهيّه!
‏ذي قناعاتي ولانيب إمعه منجرّه

‏هذا انا حره ولااشوف بعباتي سيّه
‏ما لبست الطرحه وبي من شكوكك ذره

‏كان ديني والحشيمه والحيا رجعيه
‏الله يتمّي على رجعيتي يا " الحره "
- بشاير المقبل

‏لو كان قلبي في الهوى رحّال
‏بيغيّر الوجهة .. ويتّجْهك

‏لك حسن وجهٍ من يشوفه قال :
‏أنا بوجهك من حسن وجهك
- مشعل الزعبي

" كم قلت يا دمع هلّ وقلت يا ظن خيب
‏إلى متى و أمنياتي عایشه في سجن ؟ "

ياوسيع البال ضيّقت الصدور
رحت ماعلّمتنى وين أنت ساري

فى غيابك مال خلق الله حضور
وفى حضورك مالهم بالبال طاري

ليه ماتختال يابدر البدور
والقصايد لك وصيفات وجواري

لك بنات الفكر ربات الخدور
يكشفن لثامهن والجرح عاري

جعل قلبٍ ماملاه الصدق نور
عند وجه الريح مايلقى مزاري

التغاضى عجز لاطال القصور
ليه أدارى وأنت بالوضع داري

الزمان (ا ) قصير والدنيا تدور
كل يوم يضيق فى عينى مداري

صاحبى محتاج لك شعر وشعور
وإحتياجى شى ماكان اختياري

من متى والغصن يختار الطيور
من متى والبال يختار الطواري

لاتسمى صمتى البارح غرور
انكسارى خلف هالصمت متواري

فى غياب الشمس وش ذنب الزهور ؟
والمطر لاشح وش ذنب الصحاري ؟

اللقا لحظات والغيبه شهور
تقصر الخطوات ويطول انتظاري

لو قريت المنكتب وسط السطور
ماكتبت لغلطة العمر اعتذاري

صمت هالمينا مثل صمت القبور
مارسى مركب ولا لاحت صواري
- متعب التركي

يا الله جميلة جدًا

"من متى والغصن يختار الطيور
من متى والبال يختار الطواري ؟ "