رديف الشهامه


دامكم عابرين ديار سمح المحيّا
نزلوني بشمّ القاع ، واروي ضماها ..

نفسي اللي مداوي شوقها ما تهيّا
كنها " نجد " لامن كدّر الله سماها

الجسد راح ساري ، مير قلبي هنيّا
طاف كل الديار اللي سكنها وسعاها

هو رديف الشهامه؟ او رديف الحميّا ؟
او شبيه السحاب اللي روى القاع ماها ؟

ما تعرفون كفه يوم ذا الوقت عيّا !
يوم كانت عيون القلب خايب رجاها

ما تعرفون قلبه يوم همي تِفيّا ..
سِدرة ٍ وسط صدري كان قلبي جناها

فَتّح أبواب صدره لي ... و هَلّا وحيّا
ورحت قدام حزني افتخر واتباها

مُذّ توارى وعيني لَمْ ترى قَطُّ .. ضَيّا
لو يشوف الضرير شْموس نجد وضياها

كان حباً بثوب ِ الرشدِ .. ماكان غيّا
كان أُولى الأماني كان لي مـُنتهاها

والله اني لأحبّه حيل .. ما دُمتُ حيّا
لا وأحب امه اللي شالته في حشاها

ولو خَذ الله عيوني عقب سَمح المحيّا
اعصبوها بثوبه ، يشفي الله عماها
- بشاير المقبل

" لو خذ الله عيوني عقب سمح المحيّا
اعصبوها بثوبه ، يشفي الله عماها "

رااااائعه يا بشاير

قصيدة ( الذاهبه )

الله اللي راد والعقده قضاها اللي عقدها
لاعلى الدنيا سلام ولالباقي العمر زينه

الفضا ماكنه الا خيمةٍ طاحت عمدها
والفرح ماكنه الا شيخٍ انقصت يدينه

والعمر قطعه زجاج انكسرت ولاطال امدها
والعرب في العيد بدموع اليتامى مستهينه

والشوارع لفها ثوب الظلام اللي هجدها
والبيوت اطلال من عقب المحبه والسكينه

والشتا والليل والبرد وسما يصرخ رعدها
والعيون اللي ورا الشباك مذعوره حزينه

طولوا بالكهف الاصحاب وبقت روحي وحدها
كنها في كوكبٍ ثاني خلا من ساكنينه

الوداع اللي بعلم العين يعبر من رمدها
والوداع اللي بلا علم الفا في صدري غبينه

والوداع اللي بلا رجعه علي امر وادها
والله انه غرغرت سم وسكاكينٍ سنينه

والعنود اللي جفيت الناس والدنيا بعدها
مدت الفرقا لغاليها وهي تعطي الثمينه

وينها كيف تركتني ليه ماجت في وعدها
والقمر لا طل وخابرها تجي بيني وبينه

رحت انادي واتلمس في مهب الريح يدها
كني حصانٍ بلا صاحب طوى البيدا حنينه

رحت اصيح الصبح وينه والعرب مارد احدها
ماسمعت الا صدى صوتي يقول الصبح وينه

كلهم من يوم ذيك الشمس غابت عن بلدها
طلعوني بالنفود وصكوا ابواب المدينه

كلهم من يوم ذيك الذاهبه محدٍ وجدها
كل رجال من الشرهه قلع في الدرب عينه

اثرها ماتت وماتت كل فرحه في مهدها
والربيع اقفت به اللي كانت التاج لجبينه

جاورت عقب الحدايق حفرةٍ ماقسى لحدها
حفرةٍ ماني مصدق كيف ضمت ياسمينه

للحزن فيني مثل ما للطهاره في جسدها
ويش اسوي لافتشت اللي لها وسط الخزينه

زخرفت حلم وبنت له مسكن وسمت ولدها
آه لو غرت ولدها في خميله والدينه

عاهدتني وقفرت بيمينٍ اقوى من عهدها
والصبي لاخير فيه ان كان مانفذ يمينه

ماتثقا عن رثاها عرقٍ اقتض بشهدها
ولا تبقى خلف قضبان الجفن عذرى سجينه

كيف عند العالم ايام العزى ماحصى عددها
ولا انا طالت شبوره والله اعلم كم سنينه

لا الثرى فيها نبات ولا المشيخ اخفف نكدها
لا السما فيها طيور ولا البحر يمه سفينه

لا القمر هذا مساه ولا الاسي هذا ارغدها
لا الزهر هذا شذاه ولا الذهب هذا رنينه

قالوا الشيخ الفلاني مرجع القوم وسندها
قال لي ابشر بالعوض والعلم جيناه ناقلينه

ساق لك بدر البدور اللي نشدها من نشدها
جادلٍ هزت عروش وخيبت روسٍ ذهينه

قسمها في رسمها في جسمها الا في رشدها
واسمها ان جا للغضب قومه على الالسن رطينه

اترك الناي وعطيه شيخنا غنى لسعدها
وانبسط ياعم وانسى اللي ورا التربه دفينه

قلت ولصدري تناهيد تروع من شهدها
آه واويلاه من يجلب على قلبي ظنينه

خلوا اغلى ذاهبه ترعى ربيع اللي فقدها
والعطا راعيه محدٍ صوبه الله لايهينه

لو ضمنت الجنه تفاحه القلب وشهدها
قلت من بكره عسى مجنونها تاقف سنينه
- ناصر القحطاني في رثاء زوجته

اشتاق لك واصبر على الفرقى جلَد
كذبة رجوعك ازرعت فيني اليقين

صدق الأمل من رحم عطفي إنولَد
يحيا على الذكرى ويجرحه الحنين

استاحشت دنيا .. و تدمّر لك بلَد
وطالت ليالي وحشتي وطال الأنين

يا حلم عشته أم لبنتين و ولَد
ماصرت أب لحلمي الخالد سنين !

كم انخلق لك من شعور وكم خلَد ؟
كم عين هلّت دمعها وكم حال بين ؟

طال الزمان .. وعيّت الفرحه تلَد
وملّت رجولي تسلك الدرب الحزين
- مها

اهلًا 🥰

‏وين أروح ؟ و كل وجهه للغياب ..
‏كيف أنام ؟ وكل ما فيني حزن

‏ممتلي زحمة معاناة ، وعتاب
‏لـمّني يالصبر : محتاج لـ حضن

‏ودّي أبكي مثل ما يبكي السحاب
‏ليييين أبلّ الأرض من دمع و شجن

‏كم تبعتك ما دريت إنك سراااب !
‏للمدى .. لـ ااااخر محطات الزمن

‏يا حبيبي رحت وبِعادك / عذاب
‏وين الاقي من بعد بُعدك وطن

‏ليه ؟ أذوق بـ موطني طعم إغتراب
‏لييييه؟ أحس ان ثوبي الأبيض كفن

‏يا ثقل دم الطواري ... والجواب !
‏لا غشى الليل / الشوارع و المُدن

‏شمعدان الصبر ولّع لين ذاب !
‏والطموح، الشامخ / العازم "وهن"
- عبدالعزيز هلال

رااائعه

على النسيان ما مرّ الطريق ولا كساك إنصاف
‏مثل ما آواجه ( أقدار العمر ) ذكراك أواجهّها

‏تبيِن بْـ كل غيمه ما تضرّ ، وكل غصنٍ جاف !
‏أشوفك فـ الوجيه اللي أحب وفـ اللي أكرهها
- صالح بن حمد

‏تعبت أجامل أيامي .. ولو ورّتني .. الأهوال
‏تعبت أقول عن حملٍ ثقيل .. أتفه من الأتفه

‏تعبت أهزّ راسي غيظ ! والقى في يديّ أغلال
‏تعبت أسير خلف الوهم.. لو غيري ركض خلفه

تضحكين و تمتلي الدنيا رحابه
‏و تزعلين و ينكسر خاطر سنيني

‏يوم مريتي على هيئة سحابه
‏كنت أحاول أجمعك داخل يديني

كيف أبلجأ للقصاید و الكتابه ؟
‏و أنتِ أجمل ما رأيت بأم عيني

‏يالسؤال اللي كسر ظهر الإجابه
‏یا صدى صوتي و أنا ما قلت ويني

استحلي خاطرٍ ما صك بابه
‏اعتبرتك بالهوى منّي و فيني

‏نختلف في كل حاجة و نتشابه
‏وش أبي أكثر لو إنك تحضنيني ؟

كان هذا العمر يفنى بالكآبه
‏وش أسوي و الزمن يسرق حنيني

‏لو لمستي الشمس ما غابت مهابه
‏عاد کیف إن جيتي مرة تلمسيني ؟

مرّ طيفك .. قال قلبي : يا هلا به
‏أنت أكثر شك يستاهل يقيني

‏سامحيني .. و العطش يلحق سرابه
‏و إن قدرتي طول عمرك سامحيني

دايم أهرب و أختبي خلف الكتابه
‏العتب لـ مرايتك و إلا لـ يديني ؟
- عبدالملك الخربوش

"كملت دوني وعشت باقي حياتك
‏وانا هقيتك لي بترجع من الشوق
‏
‏في غيبتك ما تنقص الا غلاتك
‏الدنيا ما توقف على فراق مخلوق"

‏أسرق لك مْن أوّل علاقتنا شغف !
‏واللي إلين الحين لك قلبه شغوف ؟

‏خلّي الظروف لْياشتهى القلب يْعْرف
‏ماكانت تردّك عن الوصل الظروف

‏ياما سرقت الشوف من عين الغُرف
‏وياما على الشبّاك جيتي لاجل أشوف

‏واللّي ماوقّف عند بيتك يرتجف
‏ماجرّب شْعور الأمان بحضن خوف !

‏كم قلت مايوصِل وقوف المنتصف ؟
‏لكن وانا قلته تعمّدت الوقوف !

‏ليت الملام يْجبّ خيبات الطرف
‏الأيسر بصدري ، بزفرات الحسوف !

‏رزين ، لكنّه قبالك ؟ يستخف
‏قاسي ، ولكنّه على عينك ؟ يروف

‏والله لو ان الحب في قلبك وقف
‏يكفي يردّك طيف من كلّ الطيوف

‏اللي جنيت مْن التعب؟ مع الاسف
‏من نفسه ورب المقادير مْخلوف

‏أكبر من إبرة جرحي خيوط الصدف
‏اللي على حجم إبرتي خيط الصدوف !

‏حتى القصيد مْن الجروح لْيانزف
‏حسب الوجع ماهو على حسب الحروف !
- أيمن الرويلي

‏" لك الله ياقلبٍ ليّا ذعذع النسناس
‏مايطري عليه إلا مداهيل خلّانه "

صباح الخير 🤍

الفجر يمحي بقايا ليلة البارح
‏ياخذ من الليل لا حاسب ولا سمّا

‏شرد المعاني تذوب بسكرة السارح
‏لو إنها بالسوالف صخرةٍ صمّا

‏للمنجرح ملكوتٍ يغبن الجارح
‏والليل يتلو عليهم من جزء عمَّ
- عبدالملك الخربوش

‏" قم نمسك النور، نتهجّاه من أوّله
‏ونقرا ملامحك فجر ٍ ما يمرّه عتيم"

‏"لو شلت هم المسافة لا تكمّل معاي
‏أنا دروبي طويلة، وأنت حافي قدم"

"‏يارب نفسٍ نديه لو تجففها الحسايف ماتجف"

‏تشبه لـ صبحٍ تمادى و وردٍ ما ذبل
‏و شجرةٍ من طيب خاطر تظلل فاسها
‏- محمد السلطان