‏" كنّ قلبي فـي وصالك وابـل ٍلحظـة نزولـه
‏وفي فراقك مثل دمعة تنحدر من عين شايب "

"ياغصن الغرام اللي سقاه القصيد ومال
‏مامرّك سحاب الوصل في يوم عصريه"

" انا الماشي على درب الرضا مهزوم
‏تعشّمت بخيـالي وامطر الواقع "

‏" يا رب اللي من البارح يدوّر للفرج شباك
‏تبطّل له شبابيكك وترسل له الفرج نسمة "

‏"أعيشك مشاعر والظروف اتحدّاها
‏تحدّيت بك قلبٍ ثقيل على الكتمان

‏تجي منك الصدّة ... وأنا ماتمناها
‏وأنا كان ودي بك مثل لمّة الخلان"

"أعرفك.. و أعرف إني معك ما شكيت العوز
‏و أعرف إن الحياة أصغر من ضلوعك الرحبة "

‏"يا الله بصبحٍ مختلف في ثناياه
‏يستبشر اللي ما تحقق طموحه"

‏" من تعنى لوصلك لاترده كسير
‏ومن تباهى بهجرك أتركه للعنا "

‏“يا رب خارجني إذا خاطري طاب
‏وأطفت رياح الياس هقوة سراجي"

‏"أجيلك والليالي جزرها يسبق هجير المدّ
‏فداك المُغرم اللي ضيّعت مسراه نجمَة ليل"

"لاتحسّـف لو تحسّف وش بتنفعك الحسوف
‏خيبة الآمال تحصل دامنا في هالحياه

‏قمّ وناظر في المرايا أنت أجمل ماتشوف
‏تستحق إنك تسافر بـ الامل لاخر مـداه

‏يارفيق الصبر هّون كلها حزن ويطـوف
‏لاتضايق منت أول من عرف دربه وتاه"

‏"ليّنت لك قلب لغيرك ما يلينه الحديد
‏ولديت لك عينٍ لغيرك مابعد لديتها "

" تلمست الحشا يمكن ألقى له عذر ثاني
‏لقيت إن الجروح بداخلي أكبر من الأعذار"

‏"مشكلة وجهك عطوف ومشكلتنا
‏ما لقينا في الوطن وجهة عطوفة "

" مشكله لما تحس انك بـحيره
‏بين انك ثم انك ثم انك ..

‏كلهم ضدك و اشواقك كسيره..
‏كلهم باعوك ما يدرون عنك..!

‏ولما تتزايد مشاعرك الكبيره
‏و يختلط ما بينهم فعلك و ظنك

‏و تكتشف في اخر فصول المسيره
‏كل شي تعاني منه .. ( جاك منك ) "

‏" وين اروح ان ما لقيتك
‏وين اهيم ؟
‏كنّ قلبي حطّ بايدك
‏وجهته !
‏و ماهدا الا معك ، من رجفته
‏فاقدك والله العظيم .. "

" شرهة الطيّب على الطيّب محبة ..
وشرهة الطيّب على المقفي خسارة "

" من راح لا تكثر عليه الحسايف
ما يروح إنسان بالرّوح شاريك"

نايف صقر يقول:
‏"أنا اللي لا ضميتي تبشرين
‏ بـ زمزم اعماقه"
‏
‏و في بيت مشابه له
‏يقول مساعد الرشيدي:
‏"و ان جفّ الوجد بمكنونك
‏دنق بين ضلوعي و أشرب"

أحب هذا البيت لسليمان المانع :
‏ "وزّعي عمري لك أخوان وقرايب
بس لا تشكين من قولة وحيدة "
‏- هذا أحنّ طلب مرّ علي

" اذا تقدر على المطلوب بادر
ترى من يستعين الله يعينه
قبل ما ينكسر للحب خاطر
تذكر لهفه القلب وحنينه "