■​ဆောင်းပါး

မင်းကင်းက အတွင်းလှိုက်လောင်နေတဲ့မီး
ဘယ်လိုငြှိမ်းမလဲ

ယောနသံ/People's Spring

အာဏာသိမ်းပြီးတဲ့နောက် အရပ်သားပြည်သူ ထောင်သောင်းချီပြီးသတ်ဖြတ်ထားတဲ့ စစ်တပ်ကို တော်လှန်ရေးအင်အားစုတွေက တိုက်ခိုက်နေကြပြီး တိုက်ပွဲတွေပြင်းထန်နေပါတယ်။ စစ်တပ်ကလည်း ပြိုလုပြိုခင်း အ​ခြေအ​နေက​နေ တရုတ်နဲ့ရုရှားအကူအညီ စစ်မှုမထမ်းမ​နေရ ဥပ​ဒေနဲ့ အဓမ္မစု​ဆောင်းထားတဲ့ စစ်သားသစ်​တွေနဲ့ဗုန်းဗုန်းလဲကျမသွားအောင် ရသမျှနည်းနဲ့တုံ့ပြန်ပြီးအသက်
ဆက် နေပါတယ်။

အခုလပိုင်းမှာ​တော့စစ်တပ်က​တော်လှန်​ရေးတပ်ဖွဲ့​တွေသိမ်းပိုက်ထိန်းချုပ်ထားတဲ့​ဒေသ​တွေကို အင်အားအများအပြားနဲ့တန်ပြန်ထိုးစစ်ဆင်လာ
တာမှာ ​တော်လှန်​ရေးတပ်​တွေရဲ့ခုခံတိုက်ခိုက်မှု​ကြောင့် ​ဒေသအနှံအပြားမှာတိုက်ပွဲ​တွေပြင်းထန်​နေပါတယ်။

ဒီအချိန်မှာ တော်လှန်ရေးအင်အားစုတွေအချင်း
ချင်း ပွတ်တိုက်မှုတွေ၊ သဘောထားကွဲလွဲမှုတွေကို လူထုက မတွေ့မမြင်လိုဘဲ စစ်တပ် အရုပ်ကြိုး
ပြတ်လဲကျသွားတဲ့အထိ ပူးပေါင်းတိုက်ပွဲဝင်ကြဖို့ ဆန္ဒပြင်းပြနေကြပါတယ်။ဒါပေမယ့် တော်လှန်
ရေးအင်အားစုအချင်းချင်းကြား ပွတ်တိုက်မှုအချို့ရှိနေဆဲဖြစ်ပါတယ်။

အခုနောက်ဆုံးထွက်ပေါ်လာတဲ့ပြဿနာကတော့ စစ်ကိုင်းတိုင်း၊မင်းကင်းမြို့နယ်ထဲက NUG အစိုးရရဲ့ ပြည်သူ့အုပ်ချုပ်ရေးအဖွဲ့၊ ပြည်သူ့ကာကွယ်ရေးအဖွဲ့တွေနဲ့ ကျောင်းသားတော်လှန်
ရေးတပ်ဖွဲ့ (SRF) လတ်တလောဖြစ်ပွားနေတဲ့ပြဿနာပါ။ နှစ်ဖက်တွေ့ဆုံညှိနှိုင်းပြီး ပြေလည်အောင်ဖြေရှင်းကြဖို့ ဒေသခံတွေကတိုက်တွန်းနေကြပါတယ်။

●NUGပအဖ၊ပကဖနဲ့SRFလက်ရှိနောက်ဆုံးအခြေအနေ

SRF ဗဟိုအလုပ်အမှုဆောင် ကော်မတီ ဥက္ကဋ္ဌ ကိုစံတင်ထွန်းကို မေလ၂၆ ရက်နေ့မှာ မင်းကင်းမြို့
နယ် ပအဖ၊ ပကဖက ဖမ်းဆီးထိန်းသိမ်းထားပါတယ်။ဒေသတွင်းမှာနှစ်ဘက်ဆက်ဆံရေးတင်း
မာမှု ဆက်လက်ဖြစ်ပေါ်နေပြီး ဒေသခံတွေက စိုးရိမ်နေကြပါတယ်။

၎င်းတို့ရဲ့ဥက္ကဋ္ဌကိုစံတင်ထွန်းရဲ့ အသက်အန္တရာယ်လုံခြုံမှုအတွက် အထူးစိုးရိမ်နေရတယ်လို့ SRFက ထုတ်ပြန်ထားပါတယ်။SRF တပ်စွဲထားတဲ့နေရာအချ်ို့ကို ပြည်သူ့ကာကွယ်ရေးအဖွဲ့ဝင်တွေက ဒီနေ့နေ့လယ်ပိုင်းမှာ ဒရုန်းနဲ့ တိုက်ခိုက်မှုတွေရှိနေတယ်လို့​ဒေသခံအချို့ကလူမှုကွန်ရက်မှာရေးသားထားကြပါတယ်။ ဒါပေမယ် အဲ့ဒီလိုတိုက်ခိုက်မှုဖြစ်စဉ် မကြားဘူးလို့ မင်းကင်းမြို့ခံအချို့ကပြောပါတယ်။

"SRF ကို NUG တပ်တွေက ဝိုင်းထားပြီး ဒရုန်းနဲ့တိုက်နေတယ်လို့ ရေးတာတွေ မှားယွင်းပါတယ်။ NUG တပ်ကလည်း SRF ကို ဝိုင်းမထားပါဘူး။ ​​ေးစစ်ကြောင်း ရှိနေတဲ့အတွက် လိုအပ်တဲ့အစီအမံများ ဆောင်ရွက်နေကြခြင်းသာ ဖြစ်ပါတယ်"လို့ ​တော်လှန်​ရေးတပ်​တွေနဲ့ နီးစပ်သူတဦးကလူမှုကွန်ရက်မှာရှင်းပြထားပါတယ်။

●မဖြေရှင်းနိုင်ခဲ့တဲ့ ကာလရှည်တင်းမာမှု

ကျောင်းသားတော်လှန်ရေးတပ်ဖွဲ့ (SRF)ဟာ ၂၀၂၁ စစ်တပ်အာဏာသိမ်းပြီးနောက်ပိုင်း မင်းကင်းမြို့နယ်မှာ အခြေချတပ်စွဲလာတဲ့တော်လှန်
ရေးတပ်ဖွဲ့ဖြစ်ပါတယ်။SRFကို ဆရာစံလို့လူသိများတဲ့ကိုစံတင်ထွန်းက ဦးဆောင်ပါတယ်။
အမျိုးသားညီညွတ်ရေးအစိုးရက တပ်ရင်းတပ်ဖွဲ့တွေဖွဲ့စည်းတဲ့အခါ SRFက သီးခြားရပ်တည်မယ်လို့ဆုံးဖြတ်ခဲ့ပါတယ်။ သဘောထားကွဲလွဲမှုတွေရှိပေမယ့်ဒေသတွင်းမှာ တင်းမာမှုတွေမဖြစ်ပေါ်စေဖို့အတွက် SRFကို မင်းကင်းမြို့နယ် ထန်းပင်ချောင် တိုက်နယ်မှာ အခြေချဖို့ သဘောတူညီခဲ့ကြတယ်လို့ ဒေသတွင်းတော်လှန်ရေးသတင်းရင်းမြစ်တွေကပြောပါတယ်။

နောက်ပိုင်းမှာSRFက တိုက်နယ်အတွင်း အုပ်ချုပ်ရေးယန္တရားဖော်ဆောင်လာတာတွေ၊ NUGအစိုးရက တာဝန်ပေးတဲ့ ပအဖအဖွဲ့ဝင်တွေကို ဖမ်းဆီးတာတွေ ရှိခဲ့တယ်လို့ ဒေသတွင်းတော်လှန်ရေးအင်အားစုအချို့ကပြောပါတယ်။ မင်းကင်းမြို့
နယ် ပကဖကလည်း အဲဒီအတိုင်းထုတ်ပြန်ထားပါတယ်

"သူတို့နယ်ကို NUGနဲ့ ပတ်သက်တဲ့သူတွေဘယ်သူမှမဖြတ်ရဘူးဆိုပြီးပစ်မိန့်ပေးထားလို့ အဲဒီရွာတွေကိုရှောင်ကွင်းပြီးသွားရတာမျိုးတွေရှိခဲ့ဖူးတယ်။ အခြေအနေတွေကမြေပြင်မှာတော်တော်လေး တင်းတင်းမာမာဖြစ်ခဲ့ကြတာ၂နှစ်မကတော့ဘူး"
လို့ ဒေသခံတစ်ဦးကပြောပါတယ်။

SRFကို မင်းကင်းမြို့နယ်ပြည်သူ့ကာကွယ်ရေးအဖွဲ့အောက်မှာ ထားရှိဖို့ဆွေးနွေးမှုတွေရှိခဲ့ပေမယ့် SRFက ငြင်းပယ်ပြီး ခရိုင်တပ်ရင်းတစ်ခုအနေနဲ့ရပ်တည်ဖို့ တောင်းဆိုခဲ့ဖူးတယ်လို့သိရပါတယ်။ အဲဒီလိုတောင်းဆိုမှုတွေကိုလည်း မြို့နယ်နဲ့ခရိုင်ပြည်သူ့ကာကွယ်ရေးအဖွဲ့တွေကိုဆွေးနွေးခဲ့ခြင်းမရှိဘဲနဲ့ NUG အစိုးရရဲ့ ဝန်ကြီးတချို့ကိုတိုက်ရိုက်တောင်းဆိုခဲ့တာတွေရှိတယ်လို့ ဒေသတွင်းသ
တင်းမြစ်တွေကပြောပါတယ်။

၂၀၂၆ နှစ်စပိုင်းမှာ မင်းကင်းမြို့နယ်ထဲက အောင်ချမ်းသာရွာ နဲ့ ကျော်ရွာကစစ်တပ်စခန်းကို ပြည်သူ့ကာကွယ်ရေးတပ်ဖွဲ့တွေကသိမ်းယူခဲ့ပါတယ်။ အဲဒီတိုက်ပွဲမှာပါဝင်တဲ့ရဲဘော်အချို့ နောက်တန်းကိုပြန်ချိန်မှာ SRFတပ်တွေက ဖမ်းဆီးသွားပြီး တစ်ဦးကိုသတ်ဖြတ်ပစ်ခဲ့တယ်လို့ ဒေသခံအချ်ို့ကပြောပါတယ်။

"ကာကွယ်ရေးရဲဘော်ကလေး တစ်ယောက်က SRF တပ် အစည်းအဝေးလုပ်နေချိန်မှာ ချောင်းပြီး နားထောင်တယ်ဆိုပြီး ဖမ်းဆီးသတ်ဖြတ်ခံရတာ။ အဲဒီ နောက်ပိုင်းမှာ တင်းမာမှုတွေပိုဆိုးလာတာ" လို့ ဒေသခံက ပြောပါတယ်။

တဖက်မှာ ၂၀၂၅ ခုနှစ် ဩဂုတ်လနဲ့ ၂၀၂၆ မေလအတွင်း SRF တပ်ဖွဲ့ဝင် ခြောက်ဦးကို မင်းကင်းမြို့
နယ်ပကဖက ဖမ်းဆီးခဲ့တယ်လို့ SRFက ထုတ်ပြန်ခဲ့ဖူးပါတယ်။

●မင်းကင်းပကဖရဲ့ထုတ်ပြန်ချက်

မင်းကင်းမြို့နယ်မှာအခြေစိုက်ထားတဲ့ SRF တပ်ဖွဲ့ဟာစစ်အာဏာရှင်ကို လက်နက်ကိုင်ဆောင်တော်လှန် ရေးလုပ်ငန်းစဉ်တစ်ခု တည်း လုပ်ဆောင်ခြင်းမဟုတ်ဘဲလက်နက်ကိုင်တော်လှန်ရေးနဲ့ သက်ဆိုင်ခြင်းမရှိတဲ့ အုပ်ချုပ်ရေး၊ ပညာရေး၊ ကျန်းမာရေး၊ ဥပဒေပြုရေး အစရှိသော ယန္တရားတွေကို ဝင်ရောက်စွက်ဖက်နေတယ်လို့ မင်းကင်းမြို့နယ်ပြည်သူ့အုပ်ချုပ်ရေးအဖွဲ့က မေလ ၂၄ရက်နေ့က ထုတ်ပြန်ချက်မှာဖော်ပြထားပါတယ်။

SRFတပ်ဖွဲ့က NUGအစိုးရနဲ့စင်ပြိုင်အုပ်ချုပ်ရေးဖော်ဆောင်နေသလို ပအဖ၊ပကဖအဖွဲ့ဝင်တွေကို လက်နက်ကိုင်အင်အားသုံးဖမ်းဆီးသတ်ဖြတ်မှုတွေပြုလုပ်နေလို့ ပြစ်မှုကျူးလွန်ထားတဲ့ SRF
တပ်ဖွဲ့ဝင်တွေကို အရေးယူဖို့ လိုက်လံဖမ်းဆီး နေတယ်လို့မင်းကင်းမြို့နယ်ပြည်သူ့အုပ်ချုပ်ရေးအဖွဲ့က​ဖော်ပြထားပါတယ်။

NUG အစိုးရရဲ့ မြို့နယ်အဖွဲ့အစည်းတွေက မြို့
နယ်အတွင်း တိုက်နယ် တွေသတ်မှတ်ပြီး တိုက်နယ်/ရပ်ကျေး ပအဖ၊ပကဖတွေ ဖွဲ့စည်းထားပေမယ့် SRF တပ်ကလည်း နယ်မြေ၁/၂/၃အစရှိသဖြင့် နယ်မြေသတ်မှတ်ပြီး အုပ်ချုပ်ရေး၊ ကာ
ကွယ်ရေး အဖွဲ့တွေစင်ပြိုင်ဖွဲ့စည်းခဲ့တယ်လို့ဖော်ပြထားပါတယ်။

SRFဖွဲ့စည်းထားတဲ့ ပအဖ၊ပကဖတွေက NUG အစိုးရရဲ့ မြို့နယ်ပအဖ၊ပကဖတွေရဲ့ပညာရေး၊ကျန်းမာရေး၊တရားဥပဒေစိုးမိုးရေး လုပ်ငန်းတွေကို အမျိုးမျိုးဝင်ရောက်စွက်ဖက်နှောင့်ယှက်ခဲ့ပြီး အချို့သောပအဖ၊ ပကဖအဖွဲ့ဝင်တွေကို လက်နက်
ကိုင်အင်အားသုံး ဖမ်းဆီးသတ်ဖြတ်မှုအပြင် NUG
အစိုးရရဲ့ ပုံရိပ်ကျဆင်းအောင် ဒေသခံတွေကို စည်းရုံးလှုံ့ဆော်မှုတွေ ရှိခဲ့တယ်လို့ထုတ်ပြန်ထားပါတယ်။

SRFတပ်ဖွဲ့ဟာ ဥပဒေမဲ့ ကျူးလွန်ထားတဲ့အမှုပေါင်း (၈)မှုရှိလို့ တရားစွဲဆိုထားတယ်လို့ မင်းကင်းမြို့နယ်ဘက်ပကဖ ရဲ့ထုတ်ချက်မှာ​ဖော်ပြထားပါတယ်။

SRFအဖွဲ့ထဲက ပြစ်မှုကျူးလွန်ထားသူတွေကို ဥပ
ဒေအတိုင်း ဖြေရှင်းဖို့ ဆင့်ခေါ်ခဲ့ပေမယ့် ပူးပေါင်းဆောင်ရွက်ဖြေရှင်းဖို့ ငြင်းဆန်ခဲ့တဲ့အပြင် ဒေသတွင်းမှာစစ်ကောင်စီစခန်းတွေကိုတိုက်ခိုက်နေတဲ့ စစ်ရေးဖော်ဆောင်မှုတွေကိုအခွင့်ကောင်းယူပြီးမြို့နယ်ပကဖ အဖွဲ့ဝင်အချို့ကိုဖမ်းဆီးမှုတွေဆက်တိုက်ပြုလုပ်လာခဲ့တယ်လို့ ထုတ်ပြန်ထားပါတယ်။

လက်ရှိအချိန်မှာ ပြစ်မှုကျူးလွန်ထားတဲ့ SRF
တပ်ဖွဲ့ဝင်တရားခံတွေကို လိုက်လံဖမ်းဆီး နေပြီး NUG အစိုးရရဲ့ အဖွဲ့အစည်းတွေက တရားဥပဒေအတိုင်း ဆောင်ရွက်နေချိန် ဖြစ်တယ်လို့အသိပေးထားပါတယ်။ ဒေသခံပြည်သူလူထုအနေနဲ့ SRF
အဖွဲ့နဲ့ ပူးပေါင်းဆောင်ရွက်ခြင်း (လုံးဝ)မပြုလုပ်ကြဖို့၊ SRFအဖွဲ့ရှိတဲ့နေရာတွေမှာ နေထိုင်ခြင်းမပြုကြဖို့နဲ့ ဥပဒေကြောင်းအရ ပြစ်မှုကျူးလွန်သူ တွေကိုသာ ပြစ်မှတ်ထားဖမ်းဆီးထိန်းသိမ်းမှာဖြစ်လို့ ဒေသခံပြည်သူတွေ အထိတ်တလန့်မဖြစ်ဖို့ ထုတ်ပြန်ကြေညာထားပါတယ်။

●SRF ရဲ့ထုတ်ပြန်ချက်

SRFကလည်း၎င်းတို့ရဲ့ ဗဟိုအလုပ်အမှုဆောင် ကော်မတီ ဥက္ကဋ္ဌ ကိုစံတင်ထွန်းကို မေလ၂၆ ရက်နေ့မှာ လူချင်းတွေ့ဆုံမယ်ဆိုပြီး လုံခြုံရေးအာမခံချက်နဲ့ ချိန်းဆိုပြီးနောက် လမ်းခရီးမှာ ဖြတ်တောက် တိုက်ခိုက် ဖမ်းဆီးခြင်းခံခဲ့ရလို့ အသက်အန္တရာယ်လုံခြုံမှုအတွက် အထူးစိုးရိမ်နေရတယ်လို့ထုတ်ပြန်ထားပါတယ်။

မေ ၂၆ ရက်၊နေ့လည် ၂ နာရီအချိန်မှာ ကိုစံတင်ထွန်း၊ စစ်ကိုင်းယူနစ်ကြားကာလအစိုးရရဲ့ ကာ
ကွယ်ရေးဝန်ကြီး၊မင်းကင်းမြို့နယ် ပကဖ စစ်ရေးတာဝန်ခံတို့က Zoom ကနေ တဆင့် တွေ့ဆုံညှိနှိုင်းဆွေးနွေးပြီးနောက် တိုင်းတာဝန်ခံဒူဂျွန်နဲ့ဒူဝါတို့ရဲ့ လုံခြုံရေးအာမခံချက်နဲ့အတူ အညာလည်ရွာမှာ လူချင်းတွေ့ဆုံရန် ချိန်းဆိုခဲ့ပေမယ့် မင်းကင်းမြို့နယ် ပအဖ၊ ပကဖနဲ့ တပ်ရင်းတပ်ဖွဲ့တွေက လမ်းတ၀က်ကနေ ဖြတ်တောက်တိုက်ခိုက်ပြီး ဖမ်းဆီးခေါ်ဆောင်သွားခဲ့တာလို့ ဖော်ပြထားပါတယ်။ဖမ်းဆီးစဉ်အတွင်း ဒေသခံတွေက ဝိုင်းဝန်းကာကွယ်ခဲ့ကြချိန် ပစ်ခတ်ခံရပြီး အမျိုးသားတဦးနှင့် အမျိုးသမီးတဦး ကျည်ထိမှန်ဒဏ်ရာရရှိခဲ့တယ်လို့ ဆိုပါတယ်။ လုံခြုံရေးအာမခံချက်ပေးပြီး သဘောတူညီခဲ့တဲ့အတိုင်းသွားရောက်ခဲ့‌ ပေမယ့်လက်နက်သုံးပစ်ခတ်ဖမ်းဆီးခဲ့တဲ့ လုပ်ရပ်ကို အပြင်း အထန် ရှုတ်ချပြီး ဥက္ကဋ္ဌ ကိုစံတင်ထွန်းကိုလည်း ချက်ချင်းပြန်လွှတ်ပေးဖို့နဲ့ အင်အားသုံးဖြေရှင်းမှု‌တွေကိုဆန့်ကျင်ကြောင်း SRFက ထုတ်ပြန်တောင်းဆို ထားပါတယ်။

မေလ ၂၇ရက်မှာတော့ SRF တပ်ရင်းမှူးအပါအ
ဝင် ဖမ်းဆီးခံထားရသူတွေကိုပြန်လွှတ်ဖို့ ဒေသခံအချို့ကဆန္ဒပြနေကြပါတယ်။SRF ဥက္ကဌစံတင်ထွန်းကို ဖမ်းဆီးပြီးနောက်ပိုင်း SRF တပ်ရင်းမှူးတစ်ဦးကို လာ ရောက်ဖမ်းဆီးစဉ်မမိတဲ့အတွက် အမျိုးသမီးဖြစ်သူကို ဖမ်းခေါ်သွားတယ်လို့ SRF ပြောခွင့်ရ မသူသူက သတင်းမီဒီယာ အချို့ကို ဖြေကြားထားပါတယ်။

ဖမ်းဆီးထားသူတွေကိုပြန်လွတ်ပေးဖို့ မသူသူကတောင်းဆိုထားပြီး ဆွေးနွေးညိုနှိုင်းမှူးနဲ့ပဲဖြေရှင်းသွားမယ်လို့ ၎င်းက ပြောဆိုထားပါတယ်။

အမျိုးသားညီညွတ်​ရေးအစိုးရ(NUG )ကတာဝန်ရှိသူက မင်းကင်းမြို့နယ်မှာ SRF နဲ့ ပသုံးလုံးယန္တရား​တွေ စစ်​ရေးအရပွတ်တိုက်မှုမရှိခဲ့ပဲ ၊အုပ်ချုပ်​ရေးပိုင်းတွင်ပွတ်တိုက်မှုများရှိခဲ့​ကြောင်း၊
သို့​သော် ဒီလပိုင်းမှာပကဖအချို့ကို ဖမ်းဆီးသတ်ဖြတ်ခံရတာ၊ပြန်​ပေးဆွဲခံရတာ အပါအဝင်
SRF တပ်ဖွဲ့ဝင်အချို့ကပြစ်မှု​တွေကျူးလွန်ခဲ့ပြီးကျူးလွန်ခဲ့​တယ်ဆိုတာအ​ထောက်အထား​တွေလည်းရှိတယ်လို့​ပြောပါတယ်။ဒါ​ကြောင့် ပြစ်မှုကျူးလွန်သူ​တွေကို အ​ရေးယူနိုင်ဖို့ ပသုံးလုံးနဲ့ ခရိုင်စစ်ဘက်မှ စစ်ဖက်အရပ်ဖက်ပူး​ပေါင်း​ဆောင်ရွက်တာလို့ သူက​ပြောပါတယ်။

"မှန်ပါတယ်။ ဆယ်ယောက်ကျော်ဖမ်းဆီးထားတယ်။ ထပ်ပြီးတော့ ဒီအမှုနဲ့ပတ်သက်ပြီးတော့ တိုင်ကြားထားတာ ပေါ်ပေါက်ထားတဲ့သူတချို့ကိုလည်း ထပ်ပြီး‌ တော့ဖမ်းဆီးဖို့ရှိတယ်။အဲဒီတော့ ဖမ်းဆီးတဲ့ သူ တွေ ပူးပေါင်းဆောင်ရွက်မယ်ဆိုလို့ရှိရင် ကျန်တဲ့သူတွေလည်း တော်လှန်ရေးမှာ စနစ်တကျနဲ့ တကယ်ကို ဂုဏ်သိက္ခာရှိရှိနဲ့ တော်
လှန်ရေးမှာဆက်ပြီးတော့ ပြည်သူလူထုလည်း လိုလားထောက်ခံတဲ့ တော်လှန်ရေးသမားပီသစွာနဲ့ ဆက်ပြီးတော့ တော်လှန်ရေးမှာပါဝင်နိုင်မယ့် အခြေအနေမျိုး ဆက်သွားလို့ရပါတယ်"လို့
NUG ကတာဝန်ရှိသူတဦးက​ပြောပါတယ်။

●နှစ်ဖက်​နောက်ဆက်တွဲ ထုတ်ပြန်ချက်များ

ပြစ်မှုကျူးလွန်ထားတဲ့ (SRF) တပ်ဖွဲ့အဓိကတာဝန်ရှိသူကို ဖမ်းမိထားပြီး ကျန်ရှိနေသေးတဲ့ ပြစ်မှုကျူးလွန်သူတွေကို ဆက်လက်ဖမ်းဆီးမှာဖြစ်သလို SRFတပ်ဖွဲ့မှာ လက်ရှိတာဝန်ထမ်းဆောင်နေတဲ့ ရဲဘော်တွေအနေနဲ့ NUGအစိုးရ ယန္တရားအောက်မှာ ပူးပေါင်းဆောင်ရွက် ကြဖို့ မင်းကင်းမြို့နယ်ပြည်သူ့ အုပ်ချုပ်ရေးအဖွဲ့
(မင်းကင်းပအဖ)ကမေလ ၂၇ရက်ညနေမှာ နောက်ဆက်တွဲထပ်မံထုတ်ပြန်လာပါတယ်။

မင်းကင်းမြို့နယ်မှာအခြေစိုက်ထားတဲ့ SRF တပ်ဖွဲ့ရဲ့ဗဟိုအလုပ်အမှုဆောင် ကော်မတီ ဥက္ကဋ္ဌ ကိုစံတင်ထွန်းကို မေလ၂၆ ရက်နေ့မှာ ဖမ်းဆီးခဲ့ပြီးနောက်မေလ ၂၇ရက်ညနေမှာ နောက်ဆက်တွဲသတင်းထုတ်ပြန်အသိပေးလာတာဖြစ်ပါတယ်။

ဖမ်းမိထားသူကို တရားဥပဒေအတိုင်း ဆက်လက်ဆောင်ရွက်သွားမှာဖြစ်ပြီး ကျန်ရှိနေသည့် တိုင်ကြာ ခံထားရတဲ့ ပြစ်မှုကျူးလွန်သူတွေကိုလည်း ဖမ်းဆီးရမိရေး ဆက်လက်ဆောင်ရွက်သွားမယ်လို့ဆိုပါတယ်။အ ခုလို ဖမ်းဆီးထိန်းသိမ်းခြင်းမှာလည်း (SRF)တပ်ဖွဲ့အား ဖြိုခွဲခြင်းမဟုတ်ဘဲ ပြစ်မှုကျူးလွန်ထားတဲ့တရားခံတွေကိုသာ ဖမ်းဆီး
ခြင်းဖြစ်ကြောင်း ​ဆိုပါတယ်။

SRFဟာ ၎င်းတို့အခြေစိုက်ရာ နယ်မြေဒေသတွေမှာ ပြည်သူတွေကို ဥပဒေမဲ့ဖမ်းဆီးခြင်း၊ သတ်
ဖြတ်ခြင်း ရပ်ကျေး(ပအဖ/ပကဖ)များအား ဖမ်းဆီးသတ်ဖြတ်ခြင်း၊ ၎င်းတို့၏ကိုယ်ပိုင်တရားစီရင်ရေးများနဲ့ စီရင်ပြီး ပြစ်ဒဏ်ချမှတ်ခြင်း၊ အသက်(၁၈)နှစ် မပြည့်သေးတဲ့ ပြည်သူ တွေကို အတင်းအဓမ္မ စစ်မှုထမ်းခိုင်းခြင်း၊ လက်နက်ကိုင်ပြီး ပြည်သူ တွေကို ညှင်းပန်းနှိပ်စက်ခြင်း စတဲ့ တရားဥပဒေမဲ့လုပ်ဆောင်နေမှုတွေ ရှိနေကြောင်း နစ်နာသူပြည်သူတစ်ဦးချင်းစီက တရားစွဲဆိုတိုင်ကြားလာမှုပေါင်း (၈)ခုကျော်အထိ ရှိခဲ့တယ်လို့လည်း ဆိုပါတယ်။

ဒါကြောင့် ကလေးခရိုင်ကွပ်ကဲရေးအဖွဲ့နဲ့ မင်းကင်းမြို့နယ်အဖွဲ့အစည်းများ ညှိနှိုင်းဆွေးနွေးပြီး ဒေသတွင်းတရားဥပဒေစိုးမိုးရေးနဲ့ ကျူးလွန်သူတွေကိုအရေးယူနိုင်ရေးအတွက် ဆောင်ရွက်ခဲ့တာလို့ ​ဖော်ပြထားပါတယ်။။

ပြစ်မှုကျူးလွန်ထားသူ တွေကိုဥပဒေအတိုင်း လာရောက်ဖြေရှင်းဖို့ အကြိမ်ကြိမ် အကြောင်းကြား ခဲ့ပေမယ် လာရောက်ဖြေရှင်းခြင်း မရှိခဲ့တာကြောင့် မေလ၂၅ရက်နေ့မှာဖမ်းဆီးဖို့ဆောင်ရွက်စဉ်
SRFအဖွဲ့ဝင်တွေက ဒေသခံပြည်သူတွေကို လူသားဒိုင်းသဖွယ် ခေါ်ယူဝန်းရံထားခဲ့ခြင်းကြောင့် ဖမ်းဆီးနိုင်ခြင်းမရှိခဲ့ကြောင်း၊ မေလ၂၆ရက်နေ့မှာလည်း SRFအဖွဲဝင်တွေအနီးက ပြည်သူတွေကို လူစုခွဲပေးဖို့တောင်းဆိုခဲ့ပေမယ့် မရလို့ပစ်ခတ်ဖမ်းဆီးခဲ့ရတယ်လို့ ထုတ်ပြန်ထားပါတယ်။

“(SRF) အဖွဲ့အား ဖြိုခွင်းဖျက်ဆီးရန် မဟုတ်ကြောင်း၊ ပြစ်မှု ကျူးလွန်သူများကိုသာ ဖမ်းဆီးပြီး ဥပဒေအတိုင်း အရေးယူမည် ဖြစ်သောကြောင့် လူစုခွဲပေးရန်" ဟောပြော တောင်းဆိုခဲ့ပါသည်။ (SRF)အဖွဲ့များအားလည်း ပြစ်မှုကျူးလွန်သူများအား ညနေ(၅းဝဝ)နာရီ အချိန် နောက်ဆုံးထား အပ်နှံပေးရန် အကြောင်းကြားခဲ့သော်လည်း ၎င်းအဖွဲ့မှ အပ်နှံပေးခြင်း မရှိခဲ့သည့်အတွက် သွားရောက်၍ ဖမ်းဆီးထိန်းသိမ်းခဲ့ပါသည်။ ၎င်းကဲ့သို့ ဖမ်းဆီးထိန်းသိမ်းရာတွင် ပြည်သူအချို့မှ တားဆီးနှောင့်ယှက်ခြင်းကြောင်း သေနတ်များ မိုးပေါ်သို့ချိန်ရွယ်ပစ်ဖောက်ကာ အခြေအနေအား ထိန်းသိမ်းခဲ့ရပြီး မည်သည့်ပြည်သူ တစ်ဦးတစ်ယောက်ကိုမျှ ချိန်ရွယ်၍ သေနတ်ပစ်ဖောက်ခဲ့ခြင်း မရှိခဲ့ပါ"လို့ ထုတ်ပြန်ချက်မှာဖော်ပြထားပါတယ်။

SRF ကလည်း၎င်းတို့ရဲ့ ဗဟိုအလုပ်အမှုဆောင် ကော်မတီ ဥက္ကဋ္ဌ ကိုစံတင်ထွန်းကို မေလ၂၆ ရက်နေ့မှာ လူချင်းတွေ့ဆုံမယ်ဆိုပြီး လုံခြုံရေးအာမခံချက်နဲ့ ချိန်းဆိုပြီးနောက် လမ်းခရီးမှာ ဖြတ်တောက် တိုက်ခိုက် ဖမ်းဆီးခြင်းခံခဲ့ရလို့ အသက်အန္တရာယ်လုံခြုံမှုအတွက် အထူးစိုးရိမ်နေရတယ်လို့ ထပ်မံထုတ်ပြန်ပါတယ်။

မင်းကင်းမြို့နယ်ပြည်သူ့ အုပ်ချုပ်ရေးအဖွဲ့က ဒီနေ့ သတင်းထုတ်ပြန်ပြီး သုံးနာရီခန့် အကြာမှာ SRFက ကြေညာချက်တစ်စောင်ထုတ်ပြန်လာတာပါ။

မေလ (၂၆)ရက်နေ့မှာ SRF စစ်ရေးနယ်မြေ ဒေသ(၄)က ပွိုင့်ကုန်းကို မင်းကင်းမြို့နယ် ပကဖ မှ အင်အားသုံး ပစ်ခတ်စီးနင်းမှု ပြုလုပ်ခဲ့ကြောင်း၊ ရဲဘော်ကိုးဦးကို ဖမ်းဆီးသွားခဲ့ပြီး လက်နက်ခဲယမ်း တွေကိုလည်း သိမ်းဆည်းယူဆောင်သွားတယ်လို့ ​ဖော်ပြထားပါတယ်။ ဒေသ(၄)မှာ လုံခြုံ
ရေးတာဝန်ထမ်းဆောင်နေတဲ့ ကျန်ရဲဘော် တွေလည်း တိမ်းရှောင်နေရပြီး အဲဒီရဲဘော်တွေရဲ့မိသားစုဝင်တွေကိုဖမ်းဆီးဖို့ ခြိမ်းခြောက်ခံနေရတဲ့အတွက်မိသားစုဝင်တွေ စိုးရိမ်ထိတ်လန့်နေကြတယ်လို့​ဖော်ပြထားပါတယ်။

ထွက်ပြေးတိမ်းရှောင်နေတဲ့ ရဲဘော် တွေကိုလည်း ဝေဟင်မှ ဒရုန်းများအသုံးပြု၍ လိုက်ရှာခြင်း ၊‌ မြေပြင်မှ နယ်မြေနင်းရှာဖွေမှုများဖြင့် ရန်သူသ
ဖွယ်လုပ်ဆောင်နေသလို ဒေသတွင်းဆက်သွယ်ရေးကိုလည်းဖြတ်တောက်ထားတယ်လို့ ဆိုပါတယ်။

ပြစ်မှုကျူးလွန်ထားသူဟု ဆိုထားသူများကိုသာ ဖမ်းဆီးမယ်လို့ ထုတ်ပြန်ထားပေမယ့်လက်ရှိအ
ခြေအနေမှာ ရန်သူသဖွယ်သဘောထား၍ ပစ်ခတ်ဖမ်းဆီးချေမှုန်းလာခြင်းတယ်လို့ ထုတ်ပြန်ထားပါတယ်။ ဥက္ကဋ္ဌ အပါအဝင်ဖမ်းဆီးခံရသူ ၁၆ ဦးအထိ ရှိနေပြီလို့ လည်း​ဖော်ထားပါတယ်။

ကြားကာလ အမျိုးသားညီညွတ်ရေး အစိုးရ (NUG) အနေဖြင့် အမှန်တကယ်ညီညွတ်ရေးကို ရှေးရှုပါက မိတ်ဖက် ပဋိပက္ခကို စားပွဲဝိုင်းတွင်သာ ငြိမ်းချမ်းစွာ ဆွေးနွေးညှိနှိုင်း ဖြေရှင်းပေးပါရန် တောင်းဆိုထားပြီး SRF အနေဖြင့် NUG ၏ ကြားဝင်ဖြေရှင်းပေးမှုကို လိုလားလက်ခံပြီး သမာ
သမတ် ကျတဲ့ နည်းဥပဒေအတိုင်း စေ့စပ်ညှိနှိုင်းမှုများပြုလုပ်ရန် အသင့်ရှိတယ်လို့ လည်း​ဖော်ပြထားပါတယ်။

●ဒေသခံပြည်သူ နဲ့ တော်လှန်ရေးအင်အားစုတွေရဲ့ဆန္ဒ

NUG အစိုးရဟာ စစ်တပ်အာဏာသိမ်းပြီးနောက်
ပိုင်းပေါ် ပေါက်လာတဲ့ ဒေသအသီးသီးကတော်လှန်ရေးတပ်ဖွဲ့တွေကို စုစည်းနေပြီးကာကွယ်ရေးဝန်ကြီးဌာန(MOD)ရဲ့ ကွပ်ကဲမှုခံယူဖို့ ညှိနိုင်း နေပါတယ်။ အဖွဲ့အစည်းအချို့ကိုတော့ စစ်ရေးအရ ဖိအားပေးအရေးယူတာတွေရှိနေပါတယ်။ ၂၀၂၆
နှစ်စပိုင်းမှာ စစ်ကိုင်းတိုင်း ပုလဲမြို့နယ်ထဲက ဗိုလ်နဂါးဦးဆောင်တဲ့ BNRA တပ်ဖွဲ့ကို စစ်ရေးအရအရေးယူခဲ့ပြီး ပြစ်မှုကျူးလွန်သူတွေကိုဖမ်းဆီးထိန်းသိမ်းထားပါတယ်။ ဗိုလ်နဂါးကတော့စစ်တပ်ထံထွက်ပြေးသွားပြီး စစ်တပ်နဲ့ပူး​ပေါင်းသွားပါတယ်။

တမူးမြို့နယ်မှာဆိုရင် ဒေသကာကွယ်ရေးတပ်ဖွဲ့ဖြစ်တဲ့ အမျိုးသားလွတ်မြောက်ရေးတပ်တော် (NLA)ဟာ MOD အမှတ်(၁) စစ်ဒေသရဲ့ကွပ်ကဲမှုခံယူခဲ့ပြီး တမူးခရိုင်ထဲတပ်ရင်း(၆)အဖြစ် ဖွဲ့စည်းနိုင်ခဲ့ပါတယ်။ မန္တလေးတိုင်းမတ္တရာရာမြို့နယ်က အင်အားကြီးတော်လှန်ရေးတပ်ဖွဲ့ဖြစ်တဲ့ မတ္တရာမျိုးမှန်တပ်ဖွဲ့ကလည်း အမျိုးသားညီညွတ်ရေးအစိုးရ၊ကာကွယ်ရေးဝန်ကြီးဌာန၊အထူးလှုပ်ရှားတပ်မရဲ့ ကွပ်ကဲမှုခံယူခဲ့ပါတယ်။

NUG အစိုးရရဲ့ ပြည်သူ့အုပ်ချုပ်ရေးအဖွဲ့၊ ပြည်သူ့ကာကွယ်ရေးအဖွဲ့တွေနဲ့ ကျောင်းသားတော်လှန်
ရေးတပ်ဖွဲ့ (SRF) အနေနဲ့လည်း မင်းကင်းဒေသတွင်းမှာ ကာလရှည်ဖြစ်ပွားနေတဲ့ဆက်ဆံရေးတင်းမာမူကိုလျှော့ချပြီး အဖြေပေါ်အောင် ဆွေး
နွေးညှိနှိုင်းဖြေရှင်းကြဖို့ ဒေသခံတွေကတောင်းဆိုပါတယ်။

စစ်အာဏာရှင်တော်လှန်ရေးမှာပါဝင်နေတဲ့ တော်
လှန်ရေးအင်အားစုအချို့ကလည်း မင်းကင်းဒေသမှာလက်ရှိဖြစ်ပွားနေတဲ့အခြေအနေတွေကို ပြေ
လည်အောင်ညှိနှိုင်းကြဖို့တောင်းဆိုထားပြီး ပစ်
ခတ်မှုဖြစ်ခဲ့တဲ့အပေါ် ပြစ်တင် ဝေဖန်ထားကြပါတယ်။

SRF အနေနဲ့ စစ်ပြိုင်အုပ်ချုပ်ရေး ယန္တရားဖော်ဆောင်ခြင်းမလုပ်ဘဲ စစ်အာဏာရှင်တော်လှန်ရေးတိုက်ပွဲမှာပူးပေါင်းပါဝင်ဖို့မေတ္တာရပ်ခံလိုကြောင်း မင်းကင်းမြို့ခံတစ်ဦးကပြောပါတယ်။

"တော်လှန်ရေးဘက်တော်သားအချင်းချင်းအား
ပြိုင်နေတာကို ပြေလည်အောင်ဖြေရှင်းပြီး စစ်တပ်ကိုပဲတိုက်ခိုက်ဖို့ ပြောချင်တယ်။ အတွင်းထဲမှာ လှိုက်ပြီးလောင်နေတဲ့ဖရောင်းတိုင်လို ဖြစ်နေလို့
မရဘူး။ ဒီမီးကိုငြှိမ်းရမယ်" ။ ။

ကျောင်းသားတော်လှန်ရေးတပ်ဖွဲ့ (SRF)မှတပ်ဖွဲ့ဝင်များနဲ့ ​ဒေသခံများ။ဓါတ်ပုံ-SRF

ငါ့သရောက်နယ် စစ်​ကြောင်းထိုးတဲ့တပ်
တိုက်ခိုက်ခံရပြီ စစ်သား ၂၀ခန့်ထွက်​ပြေး​

မေ-၂၇၊၂၀၂၆။ဒီဒီး/People’s Spring

ရှေးဟောင်းယဉ်ကျေးမှုမြို့တော် ပုဂံ၊ညောင်ဦးမြို့နယ်က ငါ့သရောက်နယ်မြေမှာ စစ်ကြောင်းထိုးနေတဲ့ စစ်တပ် တိုက်ခိုက်ခံရပြီးနောက် စစ်သား ၂၀ လောက်ဟာ လက်နက်တွေယူပြီးထွက်ပြေးနေ
တယ်လို့ ပုဂံဘီလူးတပ်လို့ခေါ်တဲ့ ညောင်ဦးမြို့နယ်ပြည်သူ့ကာကွယ်ရေးအဖွဲ့(ပကဖ) တာဝန်ရှိသူက လူထုနွေဦးကို ပြောပါတယ်။

ပြီးခဲ့တဲ့ မေလ ၂၄ရက်က ငါ့သရောက်နယ်မြေမှာ အင်အား ၃၀၀ လောက်နဲ့ စစ်ကြောင်းထိုးနေတဲ့ စစ်တပ်ကို ညောင်ဦးမြို့နယ်ပြည်သူ့ကာကွယ်ရေးအဖွဲ့(ပုဂံ-ဘီလူး)၊ Popa Production and Guerrila Force (PPGF)၊ညောင်ဦးခရိုင်တပ်ရင်း
၁၊ ညောင်ဦးခရိုင် တပ်ရင်း ၅၊ ညောင်ဦးခရိုင်အထူးတိုက်ခိုက်ရေး၊ People Democratic Army(PDA) ၊ငါ့သရောက်တိုက်နယ်ပြည်သူ့ကာကွယ်ရေးအဖွဲ့(ပုဂံကြီးအဖွဲ့) နဲ့ ညောင်ဦးခရိုင်ပြည်သူ့ကာကွယ်ရေးအဖွဲ့ (မိုးမခ ​ပြောက်ကျား
တပ်) တို့က ပူးပေါင်းတိုက်ခိုက်ခဲ့ကြပါတယ်။

အဲဒီတိုက်ပွဲအတွင်းမှာ စစ်တပ်က စစ်သား ၇ဦးဟာ လက်နက်​တွေယူပြီးထွက်ပြေးသွားကြတာလို့ ညောင်ဦး ပကဖက ပြောပါတယ်။ အဲဒီနောက် စစ်တပ်က နောက်ပြန်ဆုတ်ပြီး ကျေးရွာတွေအတွင်း နားနေချိန် စစ်သား ၁၀ ဦးကျော်လောက်ဟာ ထပ်မံထွက်ပြေးသွားကြတာလို့ ညောင်ဦး ပကဖက ပြောပါတယ်။

" စစ်ကြောင်းကအယောက် ၂၀ လောက်ထွက်ပြေးနေတာ။ တိုက်ပွဲဖြစ်တဲ့နေ့က ၇ ယောက်ထွက်ပြေးတယ်။ နောက်ဆုတ်ပြီး ရွာတွေမှာနေနေတာ။ အဲဒီမှာ ထပ်ပြီး ထွက်ပြးတာ။ စစ်တပ်က တက်မလာဘဲ ရွာတွေမှာ ခဏနားတဲ့အချိန် ထွက်ပြေးသွားကြတာ"လို့ ညောင်ဦး ပကဖ တာဝန်ရှိသူက ပြောပါတယ်။

ထွက်ပြေးကြတဲ့ စစ်သားတွေဟာ စစ်မှုထမ်းတပ်
သားသစ်တွေ အများစုဖြစ်တယ်လို့ စုံစမ်းသ်ိရပြီး ၅ ဦးလောက်လို့ မဟာမိတ်တပ်တွေက လက်နက်တွေနဲ့အတူ ဖမ်းမိထားတယ်လို့လည်း ဆက်ပြောပါတယ်။

"စစ်တပ်က သူ့လူတွေ လိုက်ရှာနေတာနဲ့ လော
လောဆယ်စစ်ကြောင်းမထိုးနိုင်သေးဘူး"လို့ ညောင်ဦး ပကဖ တာဝန်ရှိသူက ပြောပါတယ်။

မေလ ၂၄ရက်က ငါ့သရောက်နယ်မြေ ဖလန်ကန်ကျေးရွာနားမှာ ဖြစ်ပွားခဲ့တဲ့ တိုက်ပွဲမှာလည်း စစ်
တပ်က ထိခိုက်သေဆုံးမှုရှိခဲ့တယ်လို့ ၎င်းက ဆက်ပြောပါတယ်။

"ဖလန်ကန်ရွာနားမှာထိခိုက်မှုများတယ်ကြား
တယ်။ဖလန်ကန်ရွာက ဖောကား ၃စီးနဲ့ ဆေးရုံတွေသယ်သွားတယ်ကြားတယ်။ သူတို့က ဒရုန်းအားနဲ့ သုံးနေတာ။ သူတို့က အင်အား ၃၀၀ လောက်နဲ့ ထိုးနေတာ"လို့ ညောင်ဦး ပကဖ တာဝန်ရှိသူက ပြောပါတယ်။

ဒါ့အပြင် ပုပ္ပါးဒေသဘက်က စစ်တပ်ကလည်း စစ်ရေးလှုပ်ရှားမှု လုပ်နေတယ်လို့ ၎င်းကဆက်ပြောပါတယ်။

ပုဂံ၊ညောင်ဦးမြို့နယ်က ငါ့သရောက်နယ်မြေမှာ စစ်တပ်က မကြာခဏစစ်ကြောင်းထိုးနေပြီး ကျေးရွာတွေ မီးရှို့ဖျက်ဆီးနေပါတယ်။

ပုဂံ၊ညောင်ဦးမြို့နယ်က ငါ့သရောက်နယ်မြေတိုက်ပွဲမှာ စစ်တပ်ကျန်ခဲ့တဲ့ စစ်အသုံးအဆောင်တွေ။ ဓာတ်ပုံ - ညောင်ဦး ပကဖ

“ဒီနေ့ဘာဖြစ်ခဲ့လဲ”

ဒီနေ့(မေလ ၂၇ ရက်) တစ်ရက်တာအတွင်း ဖြစ်ပျက်ခဲ့တဲ့ သတင်း​​တွေထဲက ထူးခြားတဲ့ သတင်းတွေကို People’s Spring က စုစည်းဖော်ပြလိုက်ပါတယ်။

◾️NUG နဲ့ တိုင်းရင်းသားလက်နက်ကိုင် ၄ဖွဲ့က စစ်ရေးခေါင်းဆောင် ၁၀ဦးပါ ကော်မတီရဲ့ဆုံးဖြတ်ချက်နဲ့ စစ်ရေးဖော်ဆောင်မယ်

ဖက်ဒရယ်ဒီမိုကရေစီပြည်ထောင်စုပေါ်ထွန်းရေးဦးဆောင်ကောင်စီ(SCEF)မှာ စစ်မဟာဗျူဟာ ပေါင်းစပ်ညှိနှိုင်းရေးကော်မတီကို ဖွဲ့စည်းထားပြီး အဲဒီ ကော်မတီမှာ အမျိုးသားညီညွတ်ရေးအစိုးရ(NUG)ကာကွယ်ရေးနဲ့ တိုင်းရင်းသား လက်နက်ကိုင်တပ်ဖွဲ့ ၄ ဖွဲ့က စစ်ရေးခေါင်းဆောင် ၂ဦးစီ စုစုပေါင်း ၁၀ဦး ပါဝင်တယ်လို့ SCEF အဖွဲ့ဝင် ချင်းအမျိုးသားတပ်ဦး(CNF) ပြောရေးဆိုခွင့်ရှိသူ ဆလိုင်းထက်နီက ပြောပါတယ်။ SCEFကို အမျိုးသားညီညွတ်ရေးအစိုးရ(NUG)၊ ပြည်ထောင်စုလွှတ်တော်ကိုယ်စားပြုကော်မတီ (CRPH)နဲ့ ကရင်အမျိုးသားအစည်းအရုံး(KNU)၊ ကချင်လွတ်လပ်ရေးအဖွဲ့(KIO)၊ ကရင်နီအမျိုးသားတိုးတက်ရေးပါတီ(KNPP)နဲ့ CNF တို့နဲ့ ကနဦး စုဖွဲ့ထားရာ အဲဒီထဲက CRPHမှ အပ ကျန် အဖွဲ့ ၅ခုက စစ်ရေးခေါင်းဆောင်တွေက စစ်ရေးဆိုင်ရာ ဆုံးဖြတ်ချက်တွေချမှတ်ဖို့ ကော်မတီ ဖွဲ့စည်းထားတာ လို့ ဆိုပါတယ်။ ထိပ်ပိုင်းခေါင်းဆောင်တွေက တိုက်ရိုက်ချိတ်ဆက်ပြီးတော့ စစ်ရေးအစီအမံကို လုပ်ဆောင်ခြင်းဖြစ်တယ်လို့လည်း ပြောပြပါတယ်။ ဒါ့အပြင် SCEF မူဝါဒရေးရာ ဦးဆောင်အဖွဲ့ကို NUG ယာယီသမ္မတ ဒူဝါလရှီးလ၊ ပြည်ထောင်စုဝန်ကြီးချုပ် မန်းဝင်းခိုင်သန်း၊ CRPH ဥက္ကဋ္ဌ ဦးအောင်ကြည်ညွန့်၊ KIO ဥက္ကဋ္ဌ ဗိုလ်ချုပ်ကြီးအင်ဘန်လ၊ KNU ဥက္ကဋ္ဌ ပဒိုစောကွယ်ထူးဝင်း၊ KNPP ဥက္ကဋ္ဌ ခူဦးရယ်၊ CNF ဥက္ကဋ္ဌ ပူးဇင်ကျုံး စုစုပေါင်း ၇ဦးနဲ့ ဖွဲ့စည်းထားတယ်လို့ သိရပါတယ်။

◾️စစ်တပ်က လူအင်အားရင်းပြီး နယ်မြေ ထိန်းချုပ်ထားမှု အဆုံးသတ်မဟုတ်ဘူးလို့ CNF ပြော

အာဏာသိမ်းစစ်တပ်က လတ်တလော ပြန်လည်စိုးမိုးထိန်းချုပ်ထားတဲ့ နယ်မြေဒေသ မြို့ရွာတွေဟာ အဆုံးသတ်တိုက်ပွဲမဟုတ်ဘဲ တော်လှန်ရေးဘက်က ပြန်လည်တုံ့ပြန်သွားဖို့ရှိတယ်လို့ ချင်းအမျိုးသားတပ်ဦး(CNF)ပြောရေးဆိုခွင့်ရှိသူ ဆလိုင်းထက်နီက ပြောပါတယ်။ စစ်တပ်က ချင်းပြည်နယ်မြောက်ပိုင်းက ဖလမ်းမြို့၊ တွန်းဇံမြို့ အပါအဝင် နယ်မြေအချို့ ပြန်လည်ထိန်းချုပ်သွားနိုင်တဲ့ အခြေအနေ နောက်ပိုင်း ဒေသတွင်း စစ်ရေးနဲ့ပတ်သက်လို့ ဆလိုင်းထက်နီက အခုလို ရှင်းပြတာဖြစ်ပါတယ်။ လက်ရှိမှာ အာဏာသိမ်းစစ်တပ်ဟာ ပြန်လည်စိုးမိုးထားတဲ့ နေရာတွေကို အထိုင်ချဖို့ လုပ်ဆောင်နေပြီး မြေပြန့်ကနေ လေကြောင်းကဖြစ်စေ၊ ကုန်းကြောင်းကဖြစ်စေ ရိက္ခာခဲယမ်းတွေ စုနေတဲ့ အနေအထားဖြစ်တယ်လို့ ပြောပါတယ်။ စစ်တပ်ရဲ့ အခုလိုတန်ပြန်ထိုးစစ်ကို မျှော်လင့်ပြီးသားဖြစ်သလို တိုက်ပွဲဟာ အဆုံးသတ်မဟုတ်ကြောင်း ဆက်ပြောပါတယ်။

◾️စစ်တွေ ရွှေမင်းဂံရေတပ်စခန်းအနီး တိုက်ပွဲဖြစ်နေ

စစ်တွေမြို့နဲ့အနီးဆုံးမှာ တည်ရှိတဲ့ ရွှေမင်းဂံရေတပ်စခန်းကို အာရက္ခတပ်တော်(AA)က အဝေးပစ်၊ အနီးပစ်လက်နက်တွေနဲ့ တိုက်ခိုက်နေပြီး နှစ်ဖက်တိုက်ပွဲဖြစ်ပွားနေတယ်လို့ စစ်ရေးသတင်းရင်းမြစ်တွေက ပြောပါတယ်။ ရွှေမင်းဂံရေတပ်စခန်းနဲ့ကပ်လျက် ရွှေမင်းဂံရွာရှိ အာဏာသိမ်းစစ်တပ်တပ်စခန်းကို တိုက်ခိုက်နေတာဖြစ်ပြီး ရေတပ်စခန်းဝင်းထဲကိုလည်း အဝေးပစ်လက်နက်ကြီးတွေနဲ့ နေ့စဉ်ပစ်ခတ်တိုက်ခိုက်နေတာပါ။ ရွှေမင်းဂံရွာထဲက စခန်းကို AAက တိုက်ခိုက်နေတာဖြစ်ပြီး လက်နက်ကြီးနဲ့လည်း နေ့တိုင်းပစ်တယ်လို့ စစ်တွေဒေသခံစစ်ရေးသတင်းရင်းမြစ်တစ်ဦးက ပြောပါတယ်။ AAရဲ့ ပစ်ခတ်မှုကြောင့် ရေတပ်ဝင်းထဲက အဆောင်ကို ထိသွားကာ အထဲမှာ အထိအခိုက်လည်း များတယ်လို့ ကြားသိရကြောင်း အဲဒီသတင်းရင်းမြစ်က ဆိုပါတယ်။ ရွှေမင်းဂံရေတပ်စခန်းအနီးဝန်းကျင်အပြင် ဒေသကွပ်ကဲမှုစစ်ဌာနချုပ် ဒကစ-စစ်တွေနဲ့ အနီးဆုံးမှာရှိတဲ့ ကျားမသောက်ရွာမှာရှိတဲ့ စစ်တပ် တပ်ရင်းတွေကိုလည်း အဝေးပစ်လက်နက်ကြီးနဲ့ တပြိုင်နက်တိုက်ခိုက်နေပြီး ကျားမသောက်တပ်ရင်း အနီးတောကန်ရွာနားမှာတော့မြေပြင်တိုက်ပွဲရှိနေတယ်လို့ သတင်းရင်းမြစ်တွေက ဆိုပါတယ်။ အာရက္ခတပ်တော်က ပတ်ပတ်လည်ကနေပြီးတော့ လက်နက်ကြီးနဲ့ရော၊ ဒရုန်းနဲ့ပါ တိုက်ခိုက်နေတာကြောင့် စစ်တွေအနီးတဝိုက်မှာ ဒီရက်ပိုင်း တိုက်ပွဲတွေ ဖြစ်နေတယ်လို့ AA နဲ့ နီးစပ်တဲ့အခြားစစ်ရေး သတင်းရင်းမြစ်တစ်ဦးက ပြောပါတယ်။

◾️ငါ့သရောက်နယ် စစ်​ကြောင်းထိုးတဲ့တပ် တိုက်ခိုက်ခံရပြီး စစ်သား ၂၀ခန့် ထွက်​ပြေး​

ရှေးဟောင်းယဉ်ကျေးမှုမြို့တော် ပုဂံ-ညောင်ဦးမြို့နယ်က ငါ့သရောက်နယ်မြေမှာ စစ်ကြောင်းထိုးနေတဲ့ စစ်တပ် တိုက်ခိုက်ခံရပြီးနောက် စစ်သား ၂၀ လောက်ဟာ လက်နက်တွေယူပြီး ထွက်ပြေးနေတယ်လို့ ပုဂံဘီလူးတပ်လို့ခေါ်တဲ့ ညောင်ဦးမြို့နယ်ပြည်သူ့ကာကွယ်ရေးအဖွဲ့(ပကဖ)တာဝန်ရှိသူက ပြောပါတယ်။ မေလ ၂၄ရက်က ငါ့သရောက်နယ်မြေမှာ အင်အား ၃၀၀ လောက်နဲ့ စစ်ကြောင်းထိုးနေတဲ့ စစ်တပ်ကို ညောင်ဦးမြို့နယ်ပြည်သူ့ကာကွယ်ရေးအဖွဲ့(ပုဂံ-ဘီလူး)၊ Popa Production and Guerrila Force (PPGF)၊ညောင်ဦးခရိုင်တပ်ရင်း

၁၊ ညောင်ဦးခရိုင် တပ်ရင်း ၅၊ ညောင်ဦးခရိုင်အထူးတိုက်ခိုက်ရေး၊ People Democratic Army(PDA) ၊ငါ့သရောက်တိုက်နယ်ပြည်သူ့ကာကွယ်ရေးအဖွဲ့(ပုဂံကြီးအဖွဲ့) နဲ့ ညောင်ဦးခရိုင်ပြည်သူ့ကာကွယ်ရေးအဖွဲ့ (မိုးမခ ​ပြောက်ကျားတပ်) တို့က ပူးပေါင်းတိုက်ခိုက်ခဲ့ကြပါတယ်။ အဲဒီတိုက်ပွဲအတွင်းမှာ စစ်တပ်က စစ်သား ၇ဦးဟာ လက်နက်​တွေယူပြီး ထွက်ပြေးသွားကြတာလို့ ညောင်ဦး ပကဖက ပြောပါတယ်။ အဲဒီနောက် စစ်တပ်က နောက်ပြန်ဆုတ်ပြီး ကျေးရွာတွေအတွင်း နားနေချိန် စစ်သား ၁၀ ဦးကျော်လောက်ဟာ ထပ်မံထွက်ပြေးသွားကြတာလို့ ညောင်ဦး ပကဖက ပြောပါတယ်။

◾️စစ်ရှောင်မိသားစု ရွာထဲပြန်ဝင်ချိန် မိုင်းမိပြီးမိသားစုလိုက်သေဆုံး

စစ်ကိုင်းတိုင်း၊ မုံရွာမြို့နယ် ကံသစ်ကျေးရွာမှာ ပြီးခဲ့တဲ့မေလ ၂၂ ရက် မနက်ပိုင်းက စစ်ရှောင်မိသားစုတစု ရွာကို ပြန်လည်ဝင်ရောက်ချိန်မှာ မိုင်းနင်းမိပြီး ကလေးငယ်အပါအဝင် သုံးဦးသေဆုံးခဲ့တယ်လို့ ဒေသခံတွေက ပြောပါတယ်။ စစ်တပ်စစ်ကြောင်းကြောင့် ရွာကနေ တိမ်းရှောင်ခဲ့ရတဲ့ ကံသစ်ရွာက မိသားစုသုံးဦး ရွာထဲ ပြန်လည်ဝင်ရောက်ချိန်မှာ မိုင်းနင်းမိတာပါ။ သေဆုံးသွားတဲ့ သုံးဦးဟာ သားမိသားဖတွေလို့ ဒေသခံအမျိုးသားက ပြောပါတယ်။ အဲဒီဖြစ်စဉ်မှာ အသက် ၅နှစ်အရွယ် ယောကျ်ားလေးအပြင် အဲဒီကလေးရဲ့ ဖအေနဲ့ မအေတို့ပါသေဆုံးခဲ့ရတာပါ။ စစ်တပ်ထောင်ထားခဲ့တဲ့ မိုင်းနင်းမိပြီး သေဆုံးခဲ့ကြတာဖြစ်တယ်လို့ ဒေသခံက အသိ ပေးပါတယ်။

◾️ရေးဘီလူးတပ်စခန်းကို စစ်တပ် လေကြောင်းတိုက်ခိုက်

မွန်ပြည်နယ်၊ ရေးမြို့နယ်က ရေးဘီလူးတပ်စခန်း လေကြောင်းတိုက်ခိုက်ခံရပြီး ရဲဘော် ၁၀ ဦးထက်မနည်းထိခိုက် သေဆုံးတယ်လို့ သိရပါတယ်။ ဒီနေ့ မေလ ၂၇ ရက် မနက်အစောပိုင်းက ကင်ပွန်းကျေးရွာအနီးက ရေးဘီးလူတပ်စခန်းနေရာကို အာဏာသိမ်းစစ်တပ်က ဗုံးအလုံးရေ ဆယ်နဲ့ချီသုံးပြီး လေယာဉ်နဲ့ ဗုံးကြဲတိုက်ခိုက်ခဲ့တာပါ။ လေကြောင်းတိုက်ခိုက်ခံရတာနဲ့ပတ်သက်လို့ ရေးဘီလူးအဖွဲ့ ခေါင်းဆောင်က သူ့ရဲ့လူမှုကွန်ယက်ကတဆင့် ဓာတ်ပုံမှတ်တမ်းတွေနဲ့တကွ အတည်ပြုထားပါတယ်။ ထိခိုက်သေဆုံးမှု အရေအတွက်နဲ့ ပျက်စီးမှုအခြေအနေ အသေးစိတ်ကို‌ သီးခြားဆက်သွယ်မေးမြန်းဆဲ ဖြစ်ပါတယ်။ ရေးဘီလူးတပ်ဖွဲ့နဲ့ နီးစပ်သူတစ်ဦးကတော့ ဒီမနက် စစ်တပ်ရဲ့လေကြောင်းတိုက်ခိုက်မှုကြောင့် သေဆုံးသူ ၆ဦးရှိတယ်လို့ ကနဦးသိထားရပြီး ထိခိုက်သူတွေလည်းရှိတာကြောင့် ထိခိုက်သေဆုံး ၁၀ဦးကျော်တယ်လို့ ပြောပါတယ်။

◾️ကျိုက်ဒုံမြို့ကို စစ်တပ် ဗုံးကြဲလို့ အမျိုးသမီး ၃ဦး သေဆုံး

ကရင်အမျိုးသားအစည်းအရုံး(KNU) တပ်မဟာ(၆) ဒူးပလာယာခရိုင် ကျိုက်ဒုံမြို့ကို အာဏာသိမ်းစစ်တပ်က လေကြောင်းကနေ ဗုံးကြဲတိုက်ခိုက်ခဲ့လို့ အမျိုးသမီး ၃ဦးသေဆုံးကာ မိန်းကလေးငယ် ၁ဦး အပါအဝင် ၂ဦး ဒဏ်ရာရရှိခဲ့ကြောင်း KNUက ထုတ်ပြန်ပါတယ်။ ကရင်ပြည်နယ် ကြာအင်းဆိပ်ကြီးမြို့နယ် ကျိုက်ဒုံမြို့ကို KNUက ၂၀၂၄ မတ်လကတည်းက သိမ်းပိုက်ထားတာဖြစ်ပြီး အဲဒီဒေသမှာ တိုက်ပွဲမရှိဘဲ စစ်တပ်က အခု မေလမှာ လေကြောင်းတိုက်ခိုက်မှု ထပ်မံ ပြုလုပ်ခဲ့တာပါ။ ကျိုက်ဒုံမြို့အဝင် တံတားရဲ့ တဖက်ကမ်း နို့တကောမြို့နယ်(KNUအုပ်ချုပ်နယ်မြေ သတ်မှတ်ချက်) အတွင်းရှိ ပြည်သူနေအိမ်များကို မေလ ၂၄ရက်မှာ စစ်တပ်က တိုက်လေယာဉ်နဲ့ ရည်ရွယ်ချက်ရှိရှိ တိုက်ခိုက်လာရာ အရပ်သား ပြည်သူ အမျိုးသမီး (၃) ဦး ထိမှန် သေဆုံးခဲ့ပြီး အသက် (၁၆) နှစ်အရွယ် မိန်းကလေး တစ်ဦး အပါအဝင် (၂) ဦး ထိခိုက်ဒဏ်ရာရခဲ့ကာ လူနေအိမ် (၂) လုံးနဲ့ အိမ်စီးကား ပျက်စီးခဲ့တယ်လို့ အသိပေးထားပါတယ်။ ဒီတိုက်ခိုက်မှုဟာ အာဏာသိမ်းစစ်တပ်ရဲ့ လူမျိုးတုံးသတ်ဖြတ်မှုနဲ့ စစ်ရာဇဝတ်မှုများ ကျူးလွန်ခြင်းလုပ်ရပ်ဖြစ်ကြောင်း KNUက ဖော်ပြထားပါတယ်။

◾️မြန်မာ့ပဋိပက္ခနဲ့ ဒေသတွင်းအပေါ် သက်ရောက်မှုကို Quad နိုင်ငံခြားရေးဝန်ကြီးတွေ စိုးရိမ်

မြန်မာနိုင်ငံမှာ ဆက်လက်ဖြစ်ပွားနေတဲ့ ပဋိပက္ခတွေနဲ့ ဒေသတွင်းအပေါ် သက်ရောက်မှုကို စိုးရိမ်ပူပန်နေဆဲဖြစ်ကြောင်း အမေရိကန်၊ သြစတြေးလျ၊ အိန္ဒိယ၊ ဂျပန် တို့ပါဝင်တဲ့ လေးနိုင်ငံ လုံခြုံရေးဆွေးနွေးဖက်နိုင်ငံများအဖွဲ့ Quad က ပူးတွဲထုတ်ပြန်ပါတယ်။ အိန္ဒိယနိုင်ငံ၊ နယူးဒေလီမြို့မှာ Quad အဖွဲ့ဝင် နိုင်ငံခြားရေးဝန်ကြီးလေးဦးတို့ တွေ့ဆုံဆွေးနွေးအပြီး မေလ ၂၆ရက်မှာ ပူးတွဲကြေညာချက်ထုတ်ပြန်ခဲ့ရာမှာ မြန််မာ့အရေးကို ထည့်သွင်းဖော်ပြပါတယ်။ အမေရိကန်၊ သြစတြေးလျ၊ အိန္ဒိယ၊ ဂျပန်တို့ရဲ့ နိုင်ငံခြားရေးဝန်ကြီးတွေက မြန်မာ့အရေးနဲ့ပတ်သက်လို့ အာဆီယံရဲ့ ကြိုးပမ်းဆောင်ရွက်မှုတွေကို ထောက်ခံပံ့ပိုးကြောင်း ထပ်လောင်းအတည်ပြုပါတယ်။ မြန်မာနိုင်ငံမှာ အကြမ်းဖက်မှုတွေ ချက်ချင်းရပ်တန့်ဖို့၊ မတရားဖမ်းဆီးထိန်းသိမ်းထားသူတွေကို ပြန်လွှတ်ပေးဖို့၊ လူသားချင်းစာနာမှုအကူအညီတွေ ပေးအပ်နိုင်ရေး ပတ်ဝန်းကျင်ကောင်းတရပ်ဖန်တီးပေးဖို့နဲ့ ပဋိပက္ခမှာ ပါဝင်ပတ်သက်သူ အဖွဲ့အစည်းအားလုံးအကြား ဆွေးနွေးပွဲပြုလုပ်ဖို့ အချက်တွေကိုလည်း Quad နိုင်ငံခြားရေးဝန်ကြီးတွေက တောင်းဆိုထားပါတယ်။ ဒါ့အပြင် မြန်မာ့အကျပ်အတည်းရဲ့သက်ရောက်မှုကြောင့် ဒေသတွင်းလုံခြုံရေးနဲ့ နိုင်ငံဖြတ်ကျော်ရာဇဝတ်မှုတွေ ပျံ့နှံလာခြင်းအပေါ် စိုးရိမ်ကြောင်းလည်း Quad က ပူးတွဲထုတ်ပြန်ပါတယ်။

◾️မြစ်ခြေမြို့မဈေးနဲ့ လူနေရပ်ကွက်တွေကို စစ်တပ် မီးရှို့ဖျက်ဆီး

မကွေးတိုင်း၊ ပခုက္ကူမြို့နယ် မြစ်ခြေမြို့ပေါ်ကို အာဏာသိမ်းစစ်တပ်က မီးရှို့ဖျက်ဆီးသွားပြီး ပြည်သူအချို့ ဖမ်းဆီးသတ်ဖြတ်ခံထားရကြောင်း ဒေသခံတွေက ပြောပါတယ်။ မေလ ၂၆ ရက် နေ့လယ်ပိုင်းက မြစ်ခြေမြို့ရောက်ရှိနေတဲ့ စစ်တပ်စစ်ကြောင်းက မြို့မစျေးအပါအဝင် လူနေရပ်ကွက်တွေကို မီးရှိ့ဖျက်ဆီးသွားကြောင်း ဒေသခံတွေက ပြောပါတယ်။ မြစ်ခြေမြို့ပေါ်နေရာ တော်တော်များများကို လိုက်လံ မီးတင်ရှို့သွားတယ်လို့ ဒေသခံတစ်ဦးက ပြောပါတယ်။ မြို့မစျေး မီးရှို့ခံရတယ်လို့ သိရပြီး စစ်တပ်စစ်ကြောင်းရှိနေတဲ့အတွက် အတည်ပြုလို့ မရသေးပါဘူး။ အဲဒီ စစ်ကြောင်းဟာ ပြီးခဲ့တဲ့ မေလ ၉ ရက်ကစပြီး အောင်သာပျူစောထီးကျေးရွာက ထွက်လာတဲ့ စစ်ကြောင်းနဲ့ ညောင်ဦးမြို့နယ်ဘက်ကလာတဲ့ စစ်ကြောင်း ၂ကြောင်း ပေါင်းထားတာဖြစ်ပြီး အင်အား ၅၀၀ ခန့်ရှိကြောင်း သိရပါတယ်။ စစ်ကြောင်းကြောင့် မြစ်ခြေမြို့ပေါ်က ပြည်သူတွေနဲ့ အနီးအနားကျေးရွာတွေက ပြည်သူ ၂သောင်းခန့် စစ်ဘေးရှောင်နေရပြီး သီတင်းနှစ်ပတ်ကျော်ကြာလာလို့ အစားအသောက်ရိက္ခာနဲ့ မိုးကာတွေ အထူးလိုအပ်နေကြောင်း စစ်ရှောင်ကူညီသူတွေက ပြောပါတယ်။

◾️ရေစကြိုမှာ ပျူစောထီးတွေက ပြည်သူတွေဖမ်းပြီး ရိက္ခာနဲ့ ပြန်ရွေးခိုင်းနေ

မကွေးတိုင်း၊ ရေစကြိုမြို့နယ်မှာ စစ်တပ်လက်နက်တပ်ဆင်ပေးထားတဲ့ ပျူစောထီးတွေက ပြည်သူတွေကိုဖမ်းဆီးပြီး ရိက္ခာနဲ့ပြန်ရွေးခိုင်းနေတယ်လို့ သတင်းရရှိပါတယ်။ ပြီးခဲ့တဲ့ မေလ ၂၂ရက် မနက် ၈နာရီခန့်က ရေစကြိုမြို့နယ်၊ မင်းရွာက ပျူစောထီးတွေဟာ ကိုင်းရွာနဲ့ ငတရော်ကျေးရွာကြားကို ရောက်ရှိလာပြီး တောင်ယာလုပ်‌နေတဲ့ ပြည်သူတွေဖမ်းဆီးခေါ်ဆောင်သွားကြောင်း ရေစကြိုသတင်းအချက်အလက်ကော်မတီရဲ့တာဝန်ရှိသူက ပြောပါတယ်။ အဲဒီဖြစ်စဥ်မှာ တောင်ယာလုပ်နေတဲ့ မင်းရွာက အမျိုးသား ၁ ဦး၊ အမျိုးသမီး ၄ ဦး၊ ကိုင်းရွာက အမျိုးသမီး ၁ ဦးနဲ့ ငတရော်ရွာက အမျိုးသား ၂ ဦး စုစုပေါင်း ၈ ဦး ဖမ်းဆီးခံလိုက်ရတယ်လို့ သူက ဆိုပါတယ်။ မင်းရွာက ပျူစောထီးတွေဟာ ရိက္ခာပြတ်ရင် အနီးဝန်းကျင်ရွာတွေကိုသွားပြီး တောင်ယာလုပ်ငန်းလုပ်ကိုင်သူတွေကို ဖမ်းဆီးကာ မိသားစုဝင်တွေကို ဆန်အိတ်တွေ၊ ဆီပုံးတွေ၊ ငွေကြေးတွေနဲ့ ပြန်ရွေးခိုင်းတယ်လို့ ဒေသခံတွေက ပြောပါတယ်။

◾️မင်းတုန်းမြို့နယ်က စစ်တပ်စစ်ကြောင်း ရခိုင်ရိုးမတောင်ခြေအထိရောက်လာ

မကွေးတိုင်း၊ မင်းတုန်းမြို့နယ်က စစ်တပ်စစ်ကြောင်း ရခိုင်ရိုးမတောင်ခြေအထိ ရောက်လာတယ်လို့ ဒေသခံ စစ်ရေးသတင်းရင်းမြစ်က ပြောပါတယ်။ မေလ ၂၂ ရက်ကစပြီး သရက်မြို့နယ်ကတဆင့် မင်းတုန်းမြို့ကို စစ်တပ်စစ်ကြောင်း၀င်ရောက်ပြီးနောက် မြို့အနောက်ဘက်ခြမ်းက ကျေးရွာတွေကို ကနဦးစစ်ကြောင်းထိုးခဲ့တာလို့ ဆိုပါတယ်။ လက်ရှိအချိန်မှာ အဲဒီစစ်ကြောင်းက ရခိုင်ရိုးခြေဖြစ်တဲ့ ရင်းဂေါက်ကျေးရွာကို ရောက်ရှိနေပြီ ဖြစ်ပြီး လက်နက်ကြီးနဲ့ ပစ်တာတွေရှိတယ်လို့ သတင်းရင်းမြစ်က ပြောပါတယ်။ အင်အား ၁,၀၀၀ ၀န်းကျင်ပါတဲ့ မင်းတုန်းမြို့နယ်က စစ်တပ်စစ်ကြောင်းကနေ ထွက်ပြေးသူအချို့ရှိတယ်လို့လည်း စုံစမ်းသိရပါတယ်။

◾️ထိုင်းဆေးရုံကို မြန်မာရွာသားတွေ စုပေါင်း ငွေလှူတဲ့အပေါ် ထိုင်းပြည်သူတွေ ချီးကျူး

မြန်မာရွာသားတွေ စုပေါင်းပြီး ထိုင်းဆေးရုံတစ်ခုကို ငွေကြေးလှူဒါန်းခဲ့မှုဟာ ထိုင်းလူမှုကွန်ရက် သုံးစွဲသူတွေကြားမှာ ချီးကျူး ထောမနာပြုရမယ့် ကိစ္စတစ်ခု ဖြစ်လာပါတယ်။ တက်ခ်ခရိုင်ထဲမှာရှိတဲ့ အုန်းဖျံဆေးရုံကို မြန်မာနိုင်ငံဖက်ခြမ်း၊ ကရင်ပြည်နယ်၊ မြဝတီ မြို့နယ်ထဲကစုကလိရွာသားတွေ စုပေါင်းပြီး ​ဘတ်ငွေ ၁၄,၀၀၀လှူဒါန်းခဲ့တဲ့အကြောင်း ဆေးရုံက မေလ ၂၆ ရက်မှာ လူမှုကွန်ရက်မီဒီယာ Facebookကနေ ကြေညာခဲ့ပါတယ်။ အဲဒီကိစ္စဟာ ထိုင်းလူမှုကွန်ရက် အသုံးပြုသူတွေကို လျင်လျင်မြန်မြန် အာရုံစိုက်မိလာစေပြီး နယ်နိမိတ်တွေ မခြားတဲ့ လူသားချင်း ကြင်နာဖေးမမှု တစ်ခုအဖြစ် ချီးကျူးခဲ့ကြပါတယ်။ ဆေးရုံရဲ့ကျေးဇူးတင်ကြောင်း ထုတ်ပြန်ချက်ထဲမှာတော့ အဲဒီလှူဒါန်းငွေတွေကို လူနာတွေအတွက် လိုအပ်တဲ့နေရာတွေမှာအသုံးပြုသွားမယ်လို့ ဖော်ပြထားပါတယ်။

◾️စစ်ကိုင်းအထက်ပိုင်း ထိုးစိုက်ဇုန်မှာ ငလျင် ၂ကြိမ်ဆက်လှုပ်

စစ်ကိုင်းတိုင်းအထက်ပိုင်းက မြို့နယ် ၂ခုမှာ မေလ ၂၆ရက် ညပိုင်းက နာရီပိုင်းပဲခြားပြီး ရစ်ခ်တာစကေး ၄ ဒသမ ၅နဲ့ ၄ ဒသမ ၃အဆင့် ငလျင်လှုပ်ခတ်သွားပါတယ်။ မော်လိုက်မြို့မှာ ည ၈နာရီ ၃၈မိနစ်က ရစ်ခ်တာစကေး ၄ ဒသမ၃ အဆင့် ငလျင်လှုပ်ခတ်ခဲ့ပြီး ကလေးဝမြို့မှာ ည ၁၁နာရီခန့်က ရစ်ခ်တာစကေး ၄ ဒသမ၅ အဆင့် ငလျင်လှုပ်ခဲ့တာပါ။ငလျင် ၂ကြိမ်စလုံးဟာ မြေအောက်အနက် ၈၅ကီလိုမီတာနဲ့ ၉၀ ကီလိုမီတာခန့်ကိုဗဟိုပြုပြီး လှုပ်သွားတာဖြစ်ပါတယ်။ စစ်ကိုင်တိုင်းအထက်ပိုင်းဟာ စစ်ကိုင်းပြတ်ရွေ့အထက်ပိုင်းနဲ့ ဆက်စပ်နေသလို ထိုးစိုက်ဇုန် (Subduction Zone)ကြောင့်လည်း ငလျင်လှုပ်နိုင်တယ်လို့ ပညာရှင်တွေက ပြောပါတယ်။ ထိုးစိုက်ဇုန်ဟာ မြန်မာနိုင်ငံရဲ့ အနောက်ဘက် ရခိုင်ကမ်းရိုးတန်းနဲ့ ကပ္ပလီပင်လယ်ပြင်မှာ အိန္ဒိယမြေထုချပ်နဲ့ မြန်မာမြေထုချပ် ပွတ်တိုက်ပြီး လှုပ်ရှားမှုဖြစ်နေတာပါ။