နှမ်းခါးရွာ CDM ဆရာဝန်မိသားစုသေဆုံးမှုအတွက် ဝမ်းနည်းခြင်း သပိတ်ပြုလုပ်

မတ်လ-၂၅၊၂၀၂၅။

ကလေးမြို့လူထုတိုက်ပွဲဦးဆောင်ကော်မတီက ဂန့်​ဂေါမြို့နယ် နှမ်းခါးရွာတွင် မတ်လ ၂၂ ရက်​က
စစ်ကောင်စီ၏ လေ​ကြောင်း ဗုံးကြဲမှုကြောင့် CDM ဆရာဝန်ကြီး ဒေါက်တာမြစိုးအောင်၏ တစ်မိသားစုလုံး အသက်ဆုံးရှူံးခဲ့ရသည့် ဖြစ်စဉ်အတွက် ဝမ်းနည်းခြင်း သပိတ်ကို မတ်လ ၂၄ရက်၌ ပြုလုပ်ခဲ့သည်။

"အကြမ်းမဖက်အာဏာဖီဆန်ကြရင်း အကြမ်းဖက်သတ်ဖြတ်ခံရသူတွေ၊ တပါးသူရဲ့အသက်ကို ကယ်တင်ရင်း မိမိအသက်ကို ပေးဆပ်ခဲ့ကြရသူတွေအားလုံးရဲ့ ရဲစွမ်းသတ္တိနဲ့ပြတ်သားခိုင်မာတဲ့ စိတ်ဓါတ်၊ ခံယူချက်နဲ့ လုပ်ရပ်တွေအပေါ် CDM အားလုံးနဲ့ထပ်တူလေးစားဂုဏ်ယူပါကြောင်း၊ စစ်ရေးပစ်မှတ်မဟုတ်သည့် နှမ်းခါးရွာဆေးပေးခန်းကို စစ်ကောင်စီက လေကြောင်းဖြင့် အကြမ်းဖက်ဗုံးကြဲတိုက်ခိုက်ခဲ့သည့်ဖြစ်စဉ်အပေါ် ပြည်သူ
လူထုမှ နည်းလမ်းပေါင်းစုံနဲ့ ဝိုင်းဝန်းရှုတ်ချကြပါရန်" ဟု ကလေးမြို့လူထုတိုက်ပွဲဦးဆောင်ကော်မတီမှ တိုက်တွန်းထားသည်။

မတ်လ ၂၂ ရက်တွင် စစ်တပ်က ဂန့်​ဂေါမြို့နယ်အတွင်းရှိ နှမ်းခါးရွာ​​ဆေးခန်း ကိုဗုံးကြဲသတ်ဖြတ်မှု​ကြောင့်​​ဒေါက်တာမြစိုး​အောင်၊ ဇနီးသည် အထက်တန်းသူနာပြု ​ ​လေးလသား ကိုယ်ဝန်​ဆောင်ထား​သောဒေါ်ခိုင်နှင်း​ဝေ ၊ အသက် ၅ နှစ်အရွယ်သားငယ် တို့ မိသားစု နှင့် နှင်းခါးရွာ​ဆေးခန်းလာ လူနာနဲ့ လူနာ​စောင့် ပြည်သူ ၈ ဦး စုစု​ပေါင်း ၁၁ ဦး​သေဆုံးခဲ့ပြီး ၊ ၆ ဦးဒဏ်ရာရခဲ့သည်။ ​သေဆုံးသူ များထဲတွင် က​လေးငယ် ၅ ဦးပါဝင်သည်။

ညနေခင်းသတင်း/ People's Spring

https://youtu.be/agLKwUsjQqs

ပခုက္ကူ - ရေစကြိုလမ်းပိုင်းတိုက်ပွဲ စစ်ကောင်စီတပ် အထိနာဟု PDFပြော

မတ်-၂၅၊ ၂၀၂၅။ ရဲခေါင်/People's Spring

မကွေးတိုင်း၊ ပခုက္ကူ - ရေစကြိုလမ်းပိုင်းတိုက်ပွဲအတွင်း စစ်ကောင်စီတပ်သားနှင့် ရဲ ၁၀ဦးထက်မနည်း သေဆုံးကြောင်း Southern YSO PDF တာဝန်ရှိသူ ကိုအောင်မောင်းက လူထုနွေဦးသို့ပြောသည်။

အင်အား ၂၀ ကျော်ပါသည့် စစ်ကောင်စီ၏ ဂျန်ဘာ(ဒရုန်းဖျက်ကိရိယာ) တပ်ဆင်ထားသော သံပြားကာယာဉ်အား မတ်လ ၁၇ရက် ညနေပိုင်းတွင် ကြားဖြတ်တိုက်ခိုက်ခဲ့ခြင်းဟု Southern YSO PDF က အသိပေးသည်။

အာပီဂျီ၊၄၀ မမ နှင့် ကျည်ငယ်တို့ကို အချိုးကျပစ်ခတ်ခဲ့ပြီး သံပြားကာယာဉ်အား စီးနင်းနိုင်ရန်ကြိုးပမ်းချိန်တွင် Southern YSO ၏ စစ်ကြောင်းမှူးမှာ လက်နက်ချို့ယွင်းပြီး ပြင်းထန်ဒဏ်ရာရှိခဲ့သည်ဟု ဆိုသည်။

"ဗျူဟာအရတော့ စစ်ကြောင်းမှူးထိတာနဲ့ ဒုစစ်ကြောင်း မှူးတက်ရမှာ ဗျူဟာအရမှန်ပေမယ့် မြောက်ဘက်မှာလည်း GTC ဂိတ်ရှိတယ်။မီတာ ၅၀၀ လောက်ပဲဝေးတယ်။တောင်ဘက်မှာလည်း ပန်းတိုင်ခြုံဂိတ်ရှိတယ်။အဲဒါလည်း မီတာ ၄၀၀ လောက်ပဲဝေးတယ်။မီတာ ၉၀၀ နဲ့ ၁၀၀၀ ကြားထဲမှာ ဝင်တိုက်ရတဲ့အခြေအနေ။စစ်ကြောင်းမှူးကလည်း အသက်အန္တ ရာယ်စိုးရိမ်ရလို့ နောက်ဆုတ်လိုက်တာပေါ့"ဟု ကိုအောင်မောင်းက တိုက်ပွဲ ဖြစ်စဥ်ကိုရှင်းပြသည်။

ထို့အပြင် တိုက်ပွဲဖြစ်စဥ်ထုတ်ပြန်မှု နောက်ကျရခြင်းမှာလည်း စစ်ကြောင်းမှူး၏ ကျန်းမာရေးကို အလေးထား ဆောင်ရွက်ရသည့် အခြေအနေကြောင့်ဟု သိရသည်။

"ပြန်ဆုတ်တာမှန်သွားတယ် ပြောရမယ်။လက်နက် သိမ်းရလိုက်တာမရတာထက် စစ်ကြောင်းမှူး အသက် ကို ကယ်တင်လိုက်နိုင်ခဲ့တယ်။ဝမ်းသာစရာတစ်ခုပါပဲ"ဟု Southern YSO PDF တာဝန်ရှိသူက ပြောသည်။

အဆိုပါတိုက်ပွဲအတွင်း ပခုက္ကူအခြေစိုက် ခြေမြန်တပ်မဌာနချုပ်(၁၀၁)မှ တပ်ကြပ်ကြီးနိုင်လင်း၊ခလရ (၂၃၅)တပ်ရင်းမှ တပ်ကြပ်ကြီး နေဝင်း၊ခလရ (၂၅၉)တပ်ရင်းမှ တပ်သားနှစ်ဦးနှင့် မကွေးတိုင်းအခြေပြု ရဲ ၁၀ဦးထက်မနည်း သေဆုံးကြောင်းလည်း Southern YSO PDF က ယနေ့ (မတ်လ ၂၅ ရက်)တွင် ထုတ်ပြန်သည်။

သို့သော် စစ်ကောင်စီတပ်၏ ထိခိုက်သေဆုံးမှုနှင့်ပတ်သက်ပြီး လူထုနွေဦးက သီးခြားအတည်မပြုနိုင်ပေ။

နတ်မိကျောင်းစစ်ဆင်ရေးဖြင့် Southern YSO PDF ၊ ပြည်သူ့အားမာန် PDF ၊Yesagyo Revolutin Group (YRG)၊ ဒေါင်းညီနောင်၊ဒေါင်းစစ်သည်၊King Cobraနှင့် ရေစကြိုမြို့နယ် ပလဖတို့ ပူးပေါင်းတိုက်ခိုက်ခဲ့ ခြင်းဟု ဖော်ပြသည်။

ဖေဖော်ဝါရီ ၁၁ရက်ကလည်း ရေစကြိုမြို့နယ် ပခန်းမြို့မြောက်ဘက်တွင် စစ်ကောင်စီစစ်ကြောင်းကို နတ်မိကျောင်းစစ်ဆင်ရေးဖြင့် တိုက်ခိုက်ရာ MA 3သေနတ်တစ်လက်နှင့် MA 1 သေနတ် လေးလက် သိမ်းဆည်းရရှိခဲ့ကြောင်း Southern YSO PDF အသိပေးထားသည်။

(Southern YSO PDF မှ ရဲဘော်များအား တွေ့ရစဉ်။ ဓာတ်ပုံ - Southern YSO PDF)

နွားထိုးကြီးနယ်မှာ စစ်တပ်က လေကြောင်းတိုက်ခိုက်ခဲ့လို့ မိသားစုဝင်သုံးဦး သေဆုံး

မတ် ၂၅၊ ၂၀၂၅။ ရှိန်း/People’s Spring

မန္တလေးတိုင်း၊ နွားထိုးကြီးမြို့နယ် မာန်လည်ကျေးရွာကို စစ်တပ်က လေကြောင်းတိုက်ခိုက်ခဲ့တာမို့ မိသားစုဝင်သုံးဦး သေဆုံးခဲ့တယ်လို့ နွားထိုးကြီးမြို့နယ်က တော်လှန်ရေးတပ်ဖွဲ့ဝင်တွေက ပြောပါတယ်။

မတ်လ၂၅ရက် ဒီနေ့ နေ့လည် ၁နာရီခွဲအချိန်မှာ မာန်လည်ကျေးရွာကို စစ်တပ်က ဂျက်ဖိုက်တာနဲ့ လာရောက်ဗုံးကြဲခဲ့တာဖြစ်ပြီး နေအိမ်ပေါ်ကျကာ ၉နှစ်အရွယ် မိန်းကလေးအပါအဝင် မိသားစုဝင်သုံးဦး သေဆုံးခဲ့တာလို့ သိရပါတယ်။

"မျက်နှာတွေက မပီတော့ဘူးဗျာ။ ရက်ရက်စက်စက်ပါ။ အိမ်လည်း စိစိညက်ညက်ကိုကြေလို့ပဲ"လို့ ရဲဘော်တစ်ဦးက ပြောပါတယ်။

မာန်လည်ရွာရဲ့အရှေ့ဘက်က တဲပေါ်ကို ဗုံးချသွားတာဖြစ်တယ်လို့ အဲဒီကာကွယ်ရေးရဲဘော်ကပြောပါတယ်။

စစ်ကောင်စီတပ်က နွားထိုးကြီးနဲ့ တောင်သာမြို့နယ်တို့ကို အခုရက်ပိုင်းအတွင်း ဆက်တိုက် လေကြောင်းတိုက်ခိုက်တာတွေ ပြုလုပ်နေပြီး မနေ့ မနက် အစောပိုင်းက တိုက်ခိုက်မှုမှာလည်း ရဲဘော်တစ်ဦးကျဆုံးခဲ့ပါတယ်။

ဒါ့အပြင် ပြီးခဲ့တဲ့ မတ်လ ၂၂ရက် ည ၁၂နာရီကျော်မှာလည်း တောင်သာမြို့နယ်နဲ့ကပ်လျက်က နွားထိုးကြီးမြို့နယ် လက်ဝဲ+မြင်းနီကျေးရွာကို ဂျက်ဖိုက်တာ၊ Mi-35 ရဟတ်ယာဥ်၊ စက်တပ်လေထီးတို့နဲ့ လေကြောင်းတိုက်ခိုက်ခဲ့တာမို့ ပြည်သူ ၂ဦး ဒဏ်ရာရပြီး နေအိမ် ၁၀လုံးကျော် မီးလောင်ပျက်စီးမှုတွေ ရှိခဲ့တယ်လို့ သိရပါတယ်။

စစ်​မြေပြင်က CDM ကထိက ​ဒေါ်ရတီအုန်းနဲ့​မေးမြန်းခန်း | People's Spring

https://youtu.be/BdHn6zwpEPE

ပုဏ္ဏားကျွန်းမြို့နယ် ယနေ့ည လေကြောင်းတိုက်ခိုက်ခံရ၊ စစ်ရှောင်များအပါအဝင် ထိခိုက်မှုရှိ

မတ်-၂၅၊ ၂၀၂၅။ကဖေး/People's Spring

ရခိုင်ပြည်နယ်၊ ပုဏ္ဏားကျွန်းမြို့နယ်၊ အောင်ဖြူပြင်ကျေးရွာကို ယနေ့(မတ်လ၂၅ရက်) ည၇ နာရီခန့်တွင် စစ်ကောင်စီက လေကြောင်းမှ ဗုံးကြဲတိုက်ခိုက်ရာ စစ်ဘေးရှောင်များအပါအဝင် အရပ်သားထိခိုက်သေဆုံးမှုများရှိကြောင်း သတင်းရရှိသည်။

" အောင်ဖြူပြင်ကို ပစ်သွားတာပါ။ မနက်ပိုင်းက လက်နက်ကြီးတွေပစ်ခဲ့ပြီး အခုညနေမှာလေကြောင်းကနေ လာပစ်တာပါ။ စစ်ဘေးရှောင်တွေနေတဲ့နေရာကို ထိတာလို့သိရတယ်။ ညဘက်ဆိုတော့ သွားလို့လာလို့ မရဖြစ်နေတယ်။ ထိခိုက်သေဆုံးတာတွေက ရှိတယ်"ဟု ဒေသခံသတင်းရင်းမြစ်က ပြောသည်။

မတ်လ ၂၂ရက်ကလည်း ပုဏ္ဏားကျွန်းမြို့နယ်၊ ကျော်ဇံကျေးရွာနှင့် ပေါက်တောမြို့နယ် သဲခုံကျေးရွာကို စစ်ကောင်စီက လေကြောင်းမှ ‌ဗုံးကြဲတိုက်ခိုက်ခဲ့သည်။ အဆိုပါတိုက်ခိုက်မှုအတွင်း လူထိခိုက်မှုမရှိသော်လည်း အဆောက်အအုံအချို့ ပျက်စီးခဲ့သည်။

စစ်တွေမြို့အား သိမ်းယူရေး အာရက္ခတပ်တော်(AA)က ထိုးစစ်ဆက်လက်ပြင်းထန်နေပြီး မြို့အနီးဝန်းကျင်နေရာများကို စစ်ကောင်စီက လေကြောင်း၊ လက်နက်ကြီးနှင့် ဒရုန်းအသုံးပြု၍ ပစ်ခတ်တိုက်ခိုက်နေကြောင်း စစ်ရေးသတင်းရင်းမြစ်များက ပြောသည်။

ဖေဖော်ဝါရီ၂၀ရက်ကလည်း ပေါက်တောမြို့ကို စစ်ကောင်စီက လေကြောင်းတိုက်ခိုက်ရာ က‌လေးငယ်နှစ်ဦးအပါအဝင် ၄ဦးသေ‌ဆုံးပြီး ၁၇ဦး ဒဏ်ရာရခဲ့သည်။

ထို့အပြင် စစ်တွေနှင့် ပုဏ္ဏားကျွန်းမြို့ကြား ဝါဘိုကျေးရွာတွင်လည်း တိုက်ပွဲများဖြစ်ပွားနေကြောင်း AA ‌ပြောရေးဆိုခွင့်ရှိသူ ခိုင်သုခ ပြောကြားထားသည်။

(ပုဏ္ဏားကျွန်းမြို့အား AAသိမ်းပြီးနောက် စစ်ကောင်စီလက်နက်ကြီးဖြင့် ပစ်ခတ်၍ မီးလောင်ပျက်စီးနေသည်ကို ၂၀၂၄ မတ်လက တွေ့ရစဉ်။ ဓာတ်ပုံ - CJ)

■အ​တွေးအမြင်

"ပထမဆု"

-သစ်ရွက်​ရေးသားသည်

မြန်မာက ကမ္ဘာမှာဗိုလ်စွဲပါပြီ။ ဘိတ်ချီးနေရာကိုထာဝရ ကန်ထရိုက်စွဲထားခဲ့တဲ့နိုင်ငံ၊ ဘယ်သွားသွား မျက်နှာအောက်ချရတဲ့နိုင်ငံ၊ တစ်ဦးချင်းဝင်ငွေကြည့်လည်းအောက်ဆုံးကနိုင်ငံ၊ ကျန်းမာ
ရေး အခြေအနေကြည့်လည်း အောက်ဆုံးကနိုင်ငံ အခုတော့နံပါတ်တစ် နေရာကိုပိုင်ပိုင်နိုင်နိုင်ကြီး
ရသွား ပါပြီ။

“မြန်မာနိုင်ပြီ၊ ဒို့မြန်မာနိုင်ပြီ”ဆိုတဲ့သီချင်းကို ဖွင့်ပြီးမှ အသာပြန်ပိတ်ခဲ့ရတဲ့ နှစ်တွေကိုနာကျည်းစွာနဲ့ အခုတော့ ဟစ်ကြွေးခွင့်ရပြီမဟုတ်လား။ မြန်မာပတ်စ်ပို့စာအုပ်အနီကို ဝင့်ဝင့်ကြွားကြွားကိုင်ပြီး နိုင်ငံတကာ လေဆိပ်တွေမှာ ဝင်ထွက်ကြပါတော့။ မြန်မာဆိုတာနဲ့ ကြောက်ရွံ့သွားမယ့်လူတွေကို ရှုစားပါတော့။

ဘာဖြစ်လို့လဲဆိုတော့ မြန်မာနိင်ငံက ကမ္ဘာ့နိုင်ငံအသီးသီးရဲ့ “စနစ်တကျ ကျူးလွန်တဲ့ ရာဇဝတ်မှု”
(Global Organized Crime Index) ဇယားထဲက Criminality စာရင်းမှာနံပါတ်တစ်ချိတ်စွဲ ထားလို့ပါပဲ။ ကမ္ဘာ့နိုင်ငံပေါင်း ၁၉၃နိုင်ငံမှာ နံပါတ်တစ်ချိတ်ပါတယ်၊ အာရှတိုက်ရဲ့ချန်ပီယံလည်း ဖြစ်ပါတယ်။

ဆွစ်ဇာလန်နိုင်ငံ၊ဂျီနီဗာမြို့မှာအခြေစိုက်တဲ့ Global Initiative Against Transnational Organized Crime – GI-TOC)က၂၀၂၃မှာထုတ်ပြန်တဲ့ အစီရင်ခံစာဖြစ်ပါတယ်။ မြန်မာက ၈.၁၅မှတ်နဲ့ အဆင့်တစ် ရတာပါ။

တချိန်က ကမ္ဘာကိုကိုင်လှုပ်ခဲ့တဲ့ ကုက္ကင်းရာဇာကြီး အက်စ်ကိုဘာရဲ့ ကိုလံဘီယာဟာမြန်မာနဲ့ ယှဉ်တော့ နံပါတ်နှစ်သာချိတ်ရှာပါတော့တယ်။

နံပါတ်၃ကတော့ မူးယစ် Cartel ဂိုဏ်ကြီးတွေ မင်းမူတဲ့ မက္ကဆီကိုပဲဖြစ်ပါတယ်။ စနစ်တကျ
ကျူးလွန်တဲ့ ရာဇဝတ်မှု (Organized Crime) ဆိုတာက ရုတ်တရက်၊ပျံကျ တစ်စုံတစ်ယောက်ကကျူးလွန်တဲ့ ရာဇဝတ်မှုမျိုးမဟုတ်ပါဘူး။

အစုနဲ့အဖွဲ့နဲ့သေသေချာချာပြင်ဆင်ပြီး ကျူးလွန်တဲ့ ရာဇဝတ်မှုကြီးတွေဖြစ်ပါတယ်လို့ ကုလသမဂ္ဂ မူးယစ်ဆေးဝါးနဲ့ ရာဇဝတ်မှုဆိုင်ရာရုံး (United Nations Office on Drungs and Crime – UNODC) ကဆိုပါတယ်။

မြန်မာရဲ့ရာဇဝတ်မှုကြီးတွေကတော့ အများသူငါ ရင်သပ်ရှုမောဖြစ်ကြရတဲ့ကျားဖြန့်အပြင် လူကုန်ကူးမှု၊ မူးယစ်ဆေးဝါးနဲ့ အခြားဂုဏ်ယူစရာလုပ်
ရပ်များစွာဖြစ်ကြောင်းပါ။

ကိုဗစ် - ၁၉နဲ့ ၂၀၂၁ အာဏာသိမ်းမှုတွေကလည်းမြန်မာကို ကမ္ဘာ့ချန်ပီယံဖြစ်ဖို့တွန်းပို့ခဲ့ကြတာပါ။ လူပေါင်းများစွာကို လူကုန်ကူးအဖွဲ့တွေလက်ထဲကိုဆိုက်ရောက်စေခဲ့ပါတယ်။အစိုးရအဖွဲ့အစည်းတွေ
နဲ့ဝန်ထမ်းတွေရဲ့ စံပြအမူအကျင့်တွေဖြစ်တဲ့ လာဘ်စားမှုကလည်း မီးလောင်ရာလေပင့်ရုံမက ဓါတ်ဆီပါလောင်းပေးကြတာဖြစ်တယ်လို့ အစီရင်
ခံစာကဆိုပါတယ်။

လူကုန်ကူးမှုနဲ့ပက်သက်ရင် မြန်မာဟာ အရှေ့
တောင်အာရှနဲ့ မဲခေါင်ရပ်ဝန်းရဲ့ အဓိက ရင်းမြစ်နိုင်ငံ (Source Country) ဖြစ်ပါသတဲ့။'လက်နက်
မှောင်ခိုကူးမှု’ (Arms Trafficking) မှာ‌တော့မြန်မာဟာ ဝယ်သူဖြစ်သလို ရောင်းသူလည်း ဖြစ်ပါတယ်။ အတော်အလုပ်ကြိုးစားကြရှာတာပါ။ ပြည်ပကတင်သွင်းသလိုပြည်တွင်းမှာလည်း ထုတ်လုပ်ကြပါတယ်။ ‘ကုန်ပစ္စည်းအတု’ ထုတ်
လုပ်ရာမှာလည်း မာမာချာချာရှိလှပါတယ်။

မြန်မာထဲကိုလည်းအတုတွေဝင်နေကြပါတယ်။ အိန္ဒိယကဝင်တဲ့ ကိုဗစ်ကာကွယ်ဆေးအတုတွေကစလို့ တရုတ်ကဝင်တဲ့ အခြားဆေးအတုတွေနဲ့ စီးကရက်နဲ့အခြားကုန်ပစ္စည်းများအထိဖြစ်ပါတယ်။

သစ်တောထွက်ကုန်ပစ္စည်းတွေမှောင်ခိုရောင်းချရာမှာလည်း မြန်မာကဆရာကျပြန်ပါတယ်။ တရားမဝင်ကျွန်းသစ်ရောင်းချမှုကတော့ ကမ္ဘာ့ထိပ်သီးပါပဲ။ တပ်မတော်ကြီးက အမြင်မတော်လို့ အာဏာ
သိမ်းအပြီးမှာတော့ “ဘာပြောကောင်းမလဲ” အဆင့်ကိုရောက်သွားပါတော့တယ်။ အိမ်နီးချင်း ကောင်းတွေဖြစ်တဲ့ တရုတ်နဲ့အိန္ဒိယတို့က အကြီးမားဆုံးဖေါက်သည်တွေပါ။

ရှမ်းပြည်နယ်အရှေ့ပိုင်း’မုန်းလား’ကတော့ ကျားကစလို့ သင်းခွေချပ်အထိရောင်းချတဲ့ တောရိုင်းတိရိစ္ဆာန်ဈေးကွက် ဖြစ်ပါတယ်။ မြန်မာဟာဒီဈေးကွက်မှာအိမ်ရှင်နိုင်ငံ (Host Country) ဖြစ်သလို အကူးအပြောင်း (Transit) နိုင်ငံလည်းဖြစ်ပါတယ်။ တိရိစ္ဆာန်အရှင်တွေတင်မကပဲ သူတို့အစိတ်အပိုင်းတွေကိုပါရောင်းချနေကြတာပါ။

အာဏာသိမ်းပြီးနောက်ပိုင်း စားဝတ်နေရေး ပိုမိုကျပ်တည်းလာမှုက တောနယ်တွေမှာနေထိုင်တဲ့ပြည်သူတွေကို ဒီလုပ်ငန်းထဲကိုတွန်းပို့ခဲ့ပါတယ်။
မြန်မာက ကျောက်မျက်မှောင်ခိုရောင်းဝယ်မှုမှာလည်း ဈေးသည်ကြီးဆန်နီပါတဲ့။ ဒီလုပ်ငန်းဟာ တပ်မတော်ကြီးရဲ့အဓိကဝင်ငွေထဲကတစ်ခုပါလို့ အစီရင်ခံစာကမှတ်ချက်ပြုပါတယ်။ ပြည်သူ့စစ်တွေ ကလည်းဒီဝင်ငွေကိုပဲမှီခိုကြတာဖြစ်ပြီး၊ အဖွဲ့တွေကြားထဲမှာ အကျိုးစီးပွားအခြေခံတဲ့ သစ္စာခံနိုင်ငံရေးကို ပိုအရှိန်ကောင်းစေတာပါ။

အာဏာသိမ်းအပြီးမှာ ‘မြေရှား’ထုတ်လုပ်မှုကလည်း ပိုမြင့်တက်လာနေပါတယ်။ အားလုံးရဲ့ဂိတ်ဆုံးမှတ်တိုင်ကတော့ တရုတ်ပဲဖြစ်ပါတယ်။

မူးယစ်ဆေးမှာတော့ မြန်မာက ကမ္ဘာ့ဖလားကိုနှစ်စဉ်ကန်ထရိုက်ဆွဲထားတာပါ။ မက်သာဖီတာမင်းနဲ့ ဘိန်းထုတ်လုပ်မှုက ချန်ပီယန်ခါးပတ်ကို
မဖြုတ်တမ်းရစေခဲ့ပါတယ်။ အိမ်နီးချင်းတွေမှာ မြန်မာက အလုံးအရင်းနဲ့ရှယ်ပို့တဲ့ အရှိန်ကြောင့် ဆေးပြားတွေဈေးတောင်ကျတယ်လို့ဆိုပါတယ်။အာဏာသိမ်း ပြီးနောက်မှာတော့ ‘သဘောရှိကလောဟိ’ ဖြစ်သွားခဲ့ပါပြီ။

ဒီနှစ်ပိုင်းဟိုးလေးတကျော်အဖြစ်ဆုံးကတော့ ဆိုက်ဘာရာဇဝတ်မှုတွေပါပဲ။ အွန်လိုင်းလောင်း
ကစားနဲ့ လိမ်လည်မှုတွေကို မြို့ကြီးတွေတည်
ဆောက်ပြီးဗြောင်ကျကျ လုပ်ကြတာပါ။ အကျိုးစီးပွါးတွေ ဘယ်လောက်ပါဝင်ကြတယ်ဆိုတာ ခန့်မှန်းကြည့်ရင်သိနိုင်တဲ့အရာပါ။

စစ်တပ်က အာဏာသိမ်းအပြီးမှာ အရပ်ဖက်လူ့အဖွဲအစည်းတွေကို နှိပ်ကွပ်လို့ စောင့်ကြည့်မှုအား
နည်းပြီး ထောက်ပြနိုင်တဲ့ အသံတိုးတိတ်လာတဲ့ ဒဏ်ကို လူ့အဖွဲ့အစည်းကခံရတာပဲဖြစ်ပါတယ်။ သတင်းစာဆရာတွေကို ဖမ်းဆီးအရေးယူတာတွေကလည်း မကောင်းမှုတွေကို ကျူးလွန်ကြဖို့ အ
ချက်ပေးခြင်းဖြစ်ပါတယ်။

အခုတော့ မြန်မာကပထမဆုကြီးကို လက်ဝယ်ပိုင်ပိုင်ရရှိသွားပါပြီ။ အဆိုတော်ဇော်ဝင်းထွဠ်အသံနဲ့ “ပထမဆုရယူဖို့ဟေ့”လို့ကြွေးကြော်နိုင်ပါပြီ။

ပတ်စ်ပို့စာအုပ်အနီကိုတွေ့ရင် သူများနိုင်ငံသားတွေ ဖြုံကြမှာပါ၊ အနည်းဆုံးတော့ ပိုက်ဆံအိတ်တို့၊နာရီတို့ကို ကသောကမျော သိမ်းဆည်းကြမယ်ထင်ပါရဲ့။ ။

စစ်ခေါင်းဆောင်များ သစ္စာလေးချက်ဖောက်ဖျက်ပြီး နိုင်ငံတော်ဖျက်ဆီးနေဟု ဗန်းမော်တိုက်ပွဲ KIAထံ အလင်းဝင်လာသည့် စစ်ကောင်စီတပ်ကြပ်များ ပြော

မတ်-၂၅၊ ၂၀၂၅။ဟန်နွေ/People’s Spring

အာဏာသိမ်းစစ်ကောင်စီခေါင်းဆောင်နှင့် အရာရှိများသည် တပ်မတော်၏ သစ္စာလေးချက်ကို ဖောက်ဖျက်ခြင်း၊ ပြည်သူ့အသက်အိုးအိမ်စည်းစိမ်ကို ကာကွယ်စောင့်ရှောက်ရမည့် ကျင့်ဝတ်များကို ဖောက်ဖျက်ခြင်းများလုပ်နေသည်ဟု ဗန်းမော်မြို့သိမ်းတိုက်ပွဲတွင် ကချင်လွတ်လပ်ရေးတပ်မတော်(KIA)ထံ အလင်းဝင်ခဲ့သည့် စစ်ကောင်စီတပ်ကြပ်များက ပြောသည်။

ဗန်းမော်တိုက်ပွဲအတွင်း အမှတ်(၃)ဝန်တင်တပ်ရင်း ဗန်းမော်တပ်ဆွယ်မှ အလင်းဝင်လာသည့် လုပ်သက်ရင့် တပ်ကြပ်အဆင့်ရှိသူများနှင့် မေးမြန်းချက်ကို ကချင်စစ်ရေးသတင်းရင်းမြစ်က အသိပေး ဖော်ပြခဲ့ရာ တပ်ကြပ်သန်းဇော်၊ တပ်ကြပ်အောင်အောင်နှင့် တပ်ကြပ်ဇော်မင်းနိုင်တို့က တပ်တွင်းအခြေအနေနှင့် ၎င်းတို့၏ အမြင်သုံးသပ်ချက်များကို ပြောကြားခဲ့သည်။

"တပ်မတော်မှာ သစ္စာလေးချက်ရှိပါတယ်။ သစ္စာလေးချက်ရှိတဲ့အထဲမှာ ပထမဦးဆုံးအချက်တော့ နိုင်ငံတော်နဲ့ နိုင်ငံသားတို့ရဲ့ သစ္စာကို စောင့်သိရိုသေပါမည်ဆိုတာ။ အခုဖြစ်နေတဲ့ဟာနဲ့ သစ္စာလေးချက်နဲ့က လုံး၀ ကိုက်ညီမှုမရှိဘူးလို့ ယူဆပါတယ်”ဟု တပ်ကြပ်အောင်အောင်က ပြောသည်။

စစ်ကောင်စီ၏ လက်ရှိလုပ်ရပ်များသည် တပ်မတော်၏ သစ္စာလေးချက်နှင့် တလွဲစီဖြစ်နေသည်ဟု ၎င်းက ပြောသည်။

" ကျနော်တို့ဆိုထားတဲ့သစ္စာလေးချက်က နိုင်ငံတော်နဲ့ နိုင်ငံသားတို့ရဲ့ သစ္စာစောင့်သိရိုသေပါမယ်ဆိုတာ ဒါပေမဲ့အခုက နိုင်ငံတော် နဲ့ နိုင်ငံသား စောင့်သိဖို့ နေနေသာသာ အခုက နိုင်ငံတော်ကိုဖျက်ဆီးသလိုဖြစ်နေတာ"ဟု တပ်ကြပ်အောင်အောင်က ပြောသည်။

စစ်ကောင်စီက တပ်မတော်သစ္စာကို ပြောင်းပြန် ကျင့်သုံးနေခြင်းဖြစ်သည်ဟု ဆိုသည်။

အထက်ကပေးအပ်သည့် တာဝန်ကိုကျေပွန်စွာ ထမ်းဆောင်ပါမည်ဆိုသည့် အချက်ကိုလည်း စစ်ကောင်စီ အရာရှိများက ကိုယ်ကျိုးအတွက်သာလုပ်ဆောင်နေပြီး အောက်ခြေရဲဘော်များအား ဖိနှိပ်နေသည်ဟု တပ်ကြပ်ဇော်မင်းနိုင်က ပြောသည်။

နိုင်ငံတော် အချုပ်အခြာအာဏာတည်တံ့ခိုင်မြဲရေး နှင့်ပတ်သက်ပြီးလည်း စစ်ကောင်စီက ၎င်းတို့ အာဏာခိုင်မြဲရေးကိုသာ လုပ်ဆောင်နေသည်ဟု ၎င်းက ပြောသည်။

"အောက်က စစ်သည်ကိုမငဲ့တော့ဘူး"ဟု တပ်ကြပ် ဇော်မင်းနိုင်က ပြောသည်။

ကျဆုံးလေပြီးသော တပ်မတော်သားများ၏ သစ္စာကိုစောင့်သိရိုသေပါမည်ဆိုသည့် အချက်နှင့်ပတ်သက်၍ သစ္စာစောင့်သိရန် မပြောနှင့်ရှေ့တန်း၌ အမိန့်စာပင်မပြန်ဘဲ စောင်ကြားပတ် မြောင်းထဲ ပစ်ထားခဲ့ခြင်းအပါအဝင် ကောင်းမွန်စွာ သင်္ဂြိုလ်ခြင်းမရှိဘဲ ပစ်ထားသည်ကို ကြားသိရကြောင်း အလင်းဝင်လာသည့် တပ်ကြပ်များက ပြောသည်။

ထို့ပြင် ငါ့နိုင်ငံတော် ငါ့နိုင်ငံသား ငါ့တပ်မတော်အတွက် ငါ၏အသက်ကို စွန့်လွှတ်ရန်အဓိဌာန်ပြုပါသည်ဆိုသည့်အချက်နှင့်လည်း ကိုက်ညီခြင်းမရှိဟု ပြောသည်။

"တပ်မတော်အတွက်ကိုမပြောနဲ့ သူတို့မိသားစုအတွက် သူတို့ကာကွယ်စောင့်ရှောက်သွားတာရှိတယ်" ဟု တပ်ကြပ်ဇော်မင်းနိုင်က ပြောသည်။

တိုက်ပွဲဖြစ်မည့်သတင်းများကြောင့် စစ်ကောင်စီအရာရှိ ဇနီးများကို ဘေးကင်းရာသို့ ပို့ဆောင်ခဲ့သော်လည်း စစ်သည်ရဲဘော်များ၏ ဇနီးများကိုမူ တပ်ထဲ၌သာနေထိုင်ခိုင်းသည်ဟု ပြောသည်။

"တိုက်ပွဲတွေလည်း ဖြစ်တယ် အသံကြားတဲ့အခါကျတော့ သူတို့ အရာရှိကတော်တွေကို သူတို့ နီးစပ်ရာ လွတ်ရာကျွတ်ရာ သူတို့ရဲ့အိမ်တွေသူတို့ရဲ့ ဌာနေကို ပြန်ပို့လိုက်ကြတယ်"ဟု တပ်ကြပ် ဇော်မင်းနိုင်က ပြောသည်။

ပြည်သူလူထု အသက်အိုးအိမ်စည်းစိမ်ကို ကာကွယ်စောင့်ရှောက်ရမည်ဖြစ်သော်လည်း ကျေးရွာများကို လေယာဉ်များဖြင့် ဗုံးကြဲခြင်းများ လုပ်ဆောင်နေကြောင်းလည်း တပ်ကြပ်အောင်အောင်က ဆွေးနွေးသည်။

"ပြည်သူလူထုကို အသက်အိုးအိမ်ကာကွယ်ဖို့ မပြောနဲ့ အခုလို ဖျက်ဆီးနေတော့ ဘယ်လိုကိုက်ညီတော့မလဲ"ဟု တပ်ကြပ်အောင်အောင်က ပြောသည်။

ပြည်သူများအနေဖြင့် နေအိမ်တစ်လုံးရရန်များစွာ ရုန်းကန်နေကြရကြောင်း ၎င်းက ဆိုသည်။

စစ်ကောင်စီအနေဖြင့် ပြည်သူကို ပြန်ကြည့်ရမည်ဖြစ်သော်လည်း ပြန်မကြည့်ဘဲ ကျေးရွာများကို ဗုံးကြဲတိုက်ခိုက်နေသည်ဟု တပ်ကြပ်အောင်အောင်က ပြောသည်။