(တီးတိန်မြို့ ခလရ(၂၆၉)တပ်ရင်းမှ စစ်ကောင်စီတပ်သားတစ်ဦး PDF ဇိုလဲန်းထံ အလင်းဝင်လာစဉ်။ ဓာတ်ပုံ - PDF ဇိုလဲန်း)

ရန်ကုန်မြို့လယ်ရှိ တိတ်ရှိန်ရွှေဆိုင် ဓားပြတိုက်ခံရ

မတ်လ-၂၃။၂၀၁၅။ သတိုး၊ရဲခေါင်/People's Spring

ရန်ကုန်မြို့လယ်ရှိ တိတ်ရှိန်ရွှေဆိုင် ယနေ့(မတ်လ ၂၃ ရက်) နံနက် ၈ နာရီခန့်က ဓားပြတိုက်ခံရကြောင်း သတင်းရရှိသည်။

ပန်းဘဲတန်းမြို့နယ်၊ဗန္ဓုလလမ်း၊ ၂၉လမ်းနှင့်လမ်း ၃၀ကြားရှိ တိတ်ရှိန်ရွှေဆိုင် ဓားပြတိုက်ခံရသည်မှာ မှန်ကန်ကြောင်းလည်း အဆိုပါ ဆိုင် ဝန်ထမ်းအချို့က အတည်ပြုသည်။

"ဖြစ်စဥ်က မှန်ပါတယ်။လောလောဆယ် ရုံးကိစ္စတွေလုပ်နေလို့ပါ"ဟု တိတ်ရှိန်ရွှေဆိုင်ဝန်ထမ်းတစ်ဦးက လူထုနွေဦးသို့ ပြောသည်။

သို့သော် ဓားပြတိုက်ခံရသည့် ဖြစ်စဥ် အသေးစိတ်ကိုမှု ဖြေကြားခြင်းမရှိပေ။

"ဆိုင်ဖွင့်ဖွင့်ချင်းပဲ တိုက်ခံရတာ။ အမျိုးသား လေးယောက် ပါတယ်ပြောတယ်။အခုတော့ စကစ ရဲတွေ ဖြစ်စဥ်နေရာအနီးတစ်ဝိုက်မှာရှိနေတယ်"ဟု တိတ်ရှိန်ရွှေဆိုင်အနီးရှိသူတစ်ဦးက ၎င်းကြားသိရသည့် ဖြစ်စဥ်ကို ရှင်းပြသည်။

ရန်ကုန်၊မန္တလေးကဲ့သို့ စစ်ကောင်စီထိန်းချုပ်ထားသည့် မြို့ကြီးများရှိ ရွှေဆိုင်နှင့်ရွှေဆိုင်များမကြာ ခဏ ဓားပြတိုက် လုယက်ခံရမှုဖြစ်နေသည်။

ထို့အပြင် ရန်ကုန်မြို့ရှိ တိုက်ခန်းများနှင့် ရပ်ကွက်စျေးဆိုင်အထိပါ အနုကြမ်းစီးခံရမှုဖြစ်ပြီး လူသတ်ခံရသည့် ဖြစ်စဥ်အချို့ပါ ခပ်စိပ်စိပ်ဖြစ်ပွားလာသည်။

Data For myanmarနှင့် People's Spring၏ အချက်အလက်များအရ စစ်တပ်အာဏာသိမ်းပြီး သုံးနှစ်ကျော်အတွင်း နိုင်ငံတစ်ဝန်း ရွှေဆိုင်ဓားပြတိုက်ခံရသည့်ဖြစ်စဥ် ၆၁ခု ထက်မနည်းရှိသည်။

ရွှေဆိုင် ဓားပြတိုက်၊ လုယက်မှုများအနက် ဖြစ်စဥ်များ၏ ၂၀ ရာခိုင်နှုန်းခန့်သာ စစ်ကောင်စီက ဖမ်းဆီးနိုင်ခဲ့သည်။

အဆိုပါဖြစ်စဉ်များသည် ရန်ကုန်နှင့် မန္တလေးမြို့တို့တွင် အများဆုံးဖြစ်ပွားခဲ့ပြီး စစ်ကိုင်းတိုင်း ကချင်နှင့် ရှမ်းပြည်နယ်တို့လည်း ဖြစ်စဉ်အချို့ရှိသည်။

အင်းတော်-ကသာကြားတိုက်ပွဲ သေဆုံးဒဏ်ရာ
ရသူများတွင် ပဲခူး နှင့် ဧရာဝတီတိုင်းမှ သင်တန်း
ဆင်းစစ်သားများပါဝင်

ကဖေး/People's Spring

အင်းတော်-ကသာလမ်းပိုင်းတိုက်ပွဲတွင် စစ်ကောင်
စီတပ်မှ သေဆုံး၊ ထိခိုက်ဒဏ်ရာရသူများအနက် အလုပ်မရှိ၍ငွေကြေးယူစစ်မှုထမ်းလိုက်သွားသည့် ပဲခူးတိုင်းနှင့် ဧရာဝတီတိုင်းမှအမျိုးသားအချို့ ပါ
ဝင်​နေသည်။

အင်းတော်မြို့သို့စစ်ကူသွားသည့် အင်အား၁၅၀ ခန့်ပါ စစ်ကြောင်းကို ကသာမြို့၊ ပင်လွတ်ရွာအနီး ပန်းတောင်ကြီး၊ ပန်းတောင်လေးတောင်၌ မတ်လ ၁၅ ရက်နေ့တွင် KIA နှင့်ပြည်သူ့ကာကွယ်ရေးပူးပေါင်းတပ်များကဖြတ်​တောက်ပိတ်ဆို့ တိုက်
ခိုက်ခဲ့ကြသည်။

ထိုစစ်ကြောင်းမှာပျက်သွားပြီး ၃၃ ဦးသေဆုံးကာ ဆယ်ဦးဒဏ်ရာရပြီး ၃၁ ဦး အရှင်ဖမ်းမိကြောင်း အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊ အမှတ်(၁)စစ်ဒေသက သတင်းထုတ်ပြန်ထားသည်။

အဆိုပါစစ်ကြောင်းတွင် စစ်မှုထမ်းဥပဒေဖြင့်စစ်
သားစုဆောင်းခံရသည့် သင်တန်းဆင်းအများအပြားပါဝင်​နေပြီး ပဲခူးတိုင်း ဒိုက်ဦးမြို့၊ ဧရာဝတီတိုင်း၊မြန်အောင်မြို့မှ စစ်သင်တန်းဆင်း အမျိုးသားအချို့ပါဝင်ကြောင်း ဒေသခံများထံမှစုံစမ်းသိရသည်။

"ကျနော်တို့မြို့ကနေပါသွားတာ ၂ယောက်။ ၂
ယောက်လုံးသေတယ်ကြားတယ်။သူတို့က တစ်ယောက် သိန်း ၅၀ယူပြီး လိုက်သွားတာ။ အခုတော့ အလောင်းပြန်မရဘဲနာရေးလုပ်ဖို့ပြင်နေကြတယ်"
ဟု မြို့ခံတဦးကပြောသည်။

တိုက်ပွဲအတွင်း ဒဏ်ရာရပြီး ပြန်ဆုတ်ခွာသွားသည့်ကောင်စီစစ်ကြောင်းတွင် ဧရာဝတီတိုင်း၊မြန်အောင်မြို့နယ်၊သပြေကုန်းရွာမှ အသက်၂၅နှစ်အရွယ်အမျိုးသားတစ်ဦးပါဝင်သည်။ အောင်သူဟု ခေါ်သည့်အဆိုပါအမျိုးသားသည် အလုပ်
လက်မဲ့တစ်ဦးဖြစ်ပြီး အရက်အလွန်အကျွံသောက်သူဖြစ်​ကြောင်း ​ဒေသခံအချို့က​ပြောသည်။

၎င်းကဒေသခံများထံမှ တစ်အိမ်လျှင် တစ်သိန်းကျပ်စီစု၍ ကျပ်သိန်း ၅၀ ယူကာ စစ်သင်တန်းတက်ခဲ့သူဖြစ်သည်။ ၂၀၂၄ နိုဝင်ဘာလတွင်
ကွင်းကောက်မြို့၊ အမှတ်(၅)လေ့ကျင့်ရေးတပ်၌ စစ်သင်တန်းတက်ပြီး ၂၀၂၅ မတ်လဆန်းတွင် ထောက်ကြံ့အခြေစိုက်စစ်ကောင်စီတပ်ရင်းသို့ ပို့ဆောင်ခံရပြီး ထိုမှတစ်ဆင့် ကသာမြို့ရှိ ခမရ(၃၀၉)သို့ ထပ်မံပို့ဆောင်ခံရသူဖြစ်သည်။

"ကသာကို သွားကာနီး အိမ်ကိုဖုန်းဆက်တယ်။ ဟတ်စကီးနဲ့ သူသွားရမယ်ဆိုပြီး။ ဟိုရောက်ပြီးနောက်တခါပြန်ဆက်လာတော့ ဒဏ်ရာရနေပြီတဲ့။ ကျတော်တို့က သူ့အတွက် တစ်သိန်းစီပေးလိုက်ကတည်းက ကူးတို့ခဆိုပြီး အပြီးထည့်လိုက်တော့တာ" ဟု သပြေကုန်းရွာမှ အမျိုးသားတစ်ဦးကပြောသည်။

စစ်ကောင်စီတပ်သည်စစ်မှုထမ်းဥပဒေဖြင့်ခေါ်ဆောင်သွားသူများကို သုံးလခန့် စစ်သင်တန်းပေးပြီး ရှေ့တန်းပို့ စစ်တိုက်ခိုင်းနေခြင်းဖြစ်သည်။ ထို​ကြောင့် စစ်မှုထမ်းဖြင့် စု​ဆောင်းခံရ​သောစစ်သားသစ်များ ​မှာ ​ဒေသအနှံတိုက်ပွဲများတွင် ​သေးဆုံး ဒဏ်ရာရသူများ​နေသည်။

"ဧရာဝတီတိုင်းထဲကတိုက်ပွဲတွေမှာလည်း စစ်သင်
တန်းဆင်တွေကိုသုံးတာ။ အခုစစ်ကိုင်းတိုင်းထဲအထိဧရာဝတီကနေပို့နေရတယ်ဆိုတော့ စစ်ကောင်စီဘက်မှာ လူအင်အားလုံးဝရှိမနေတော့ဘူး။ အခုလိုချိန်မှာ တပြိုင်နက်ထိုးစစ်တွေလုပ်လိုက်ရင် စစ်ကောင်စီပြုတ်ကျမှာ" ဟု စစ်ကိုင်း
တိုင်း ပုလဲမြို့မှ PDF တစ်ဦးကပြောသည်။

မန္တ​လေးတိုင်းတွင် မတ်လ ဒုတိယပါတ်၌ စစ်တပ်စစ်​ကြောင်း ပျက်​အောင်တိုက်ခိုက်ခံရ​​သောတိုက်ပွဲများတွင်လည်း သင်တန်းဆင်းစစ်သားသစ်များစွာပါဝင်​ခဲ့သည်။ထိုတိုက်ပွဲများတွင် ​သေဆုံး၊ဒဏ်ရာရသူ ၊ စစ်သုံ့ပန်းအဖြစ်အဖမ်းခံရသူများတွင် သင်တန်းဆင်းစစ်သားသစ်များစွာပါဝင်​နေ​ကြောင်း တိုက်ခိုက်ခဲ့​သော PDF စစ်​ကြောင်းများမှ တာဝန်ရှိသူများက​ပြောသည်။

နွားထိုးကြီးမြို့နယ်တွင်မတ်လ ၉ ရက်​နေ့က တပ်မ ၁၀၁ လက်​အောက်ခံ တပ်ရင်း​တွေနဲ့ ​လေ​ကြောင်းရန်ကာကွယ်​ရေးတပ် ၊ရဲ ​များပူး​ပေါင်းလာ​သောအင်အား ၂၀၀ ခန့်ပါစစ်​ကြောင်းကို မြင်းခြံ ခရိုင်တပ်ရင်း ၄ ၊ ၁၀ (နွားထိုးကြီး PDF ) ၊ နွားထိုးကြီးပကဖ တို့က တိုက်ခိုက်ခဲ့ရာ စစ်​ကောင်စီတပ်မှ ၄၀ ​ကျော်​သေဆုံး ၊ ၁၅ ​ဦးဒဏ်ရာရပြီး စစ်သုံ့ပန်း ၁၄ ဦး ဖမ်းဆီးနိုင်ခဲ့​ကြောင်း နွားထိုးကြီး PDF မှတာဝန်ရှိသူက​ပြောသည်။စစ်သုံ့ပန်းထဲတွင် စစ်သားသစ် ၃ ဦးပါပြီး ၊​သေဆုံး ဒဏ်ရာရသူများတွင်လည်း သင်တန်းဆင်းစစ်သားသစ်များပါဝင်​ကြောင်း ၎င်းကဆက်​ပြော​သေည်။

ညောင်ဦးမြို့နယ်ငါးသရောက်ဒေသသို့ဝင်ရောက်
လာသည့် စစ်တပ်စစ်ကြောင်းကိုမတ်လ ၁၄ ရက်က​​ဒေသခံကာကွယ်​ရေးတပ်များကတိုက်ခိုက်ခဲ့ရာ စစ်ကောင်စီတပ် စစ်ကြောင်းမှူး အပါအဝင် သေ
ဆုံးထိခိုက်သူများပြားခဲ့ပြီးစစ်ကြောင်းပျက်သွား​
ကြောင်းညောင်ဦးမြို့နယ် ပြည်သူ့ကာကွယ်ရေးတပ်(ပကဖ) တာဝန်ခံက ပြောသည်။သေဆုံးသူများထဲတွင် သင်တန်းဆင်းပြည်သူ့စစ်များပြား
သည်ဟု ၎င်းက ပြောသည်။

“ပုဂံဘက်က ပြည်သူ့စစ်တွေတော်တော်များများပါတယ်။ ကျသွားတာလည်း အဲဒီကောင်တွေ ကျတာများတယ်” ဟု၎င်းကဆိုသည်။ တိုက်ပွဲအတွင်း စစ်ကောင်စီတပ်ထံမှလက်နက်ခဲယမ်းသိမ်းရခြင်း
ရှိမရှိအခြေအနေအ​သေးစိပ်ကိုမူပကဖတာဝန်ခံက ပြောဆိုခြင်းမရှိပေ။

အာရက္ခတပ်တော်(AA)က တိုက်ခိုက်သိမ်းယူခဲ့သည့် ဂွမြို့သိမ်းတိုက်ပွဲတွင်လည်း စစ်ကောင်စီက ဧရာဝတီတိုင်းမှ စစ်သင်တန်းစစ်များကို ပို့ခဲ့ရာ အများအပြားသေဆုံး၊ဒဏ်ရာရခဲ့ဖူးသည်။

၂၀၂၄ ဒီဇင်ဘာလ၂၇ရက်က စစ်ကောင်စီဒုတိယခေါင်းဆောင် ဒုတိယဗိုလ်ချုပ်မှူးကြီးစိုးဝင်းဦး
ဆောင်သည့် ကြည်းရေလေ ထိပ်ပိုင်းခေါင်းဆောင်များသည် ပုသိမ်မြို့သို့လာရောက်ပြီး စစ်မှုထမ်းသင်တန်းဆင်းများနှင့်တွေ့ဆုံခဲ့ပြီး တိုက်ပွဲများအတွင်း လက်နက်မချရန် ၊မကြောက်လန့်ရန် ပြောသွားခဲ့ဖူးသည်။ သို့သော် စစ်မှုထမ်းစစ်သင်တန်းဆင်းများသည် တိုက်ပွဲအတွင်း သေဆုံးမှုများနေသလို ထွက်ပြေးမှုများရှိနေသည်။

အောင်သူသည် ယခုအခါ ကသာမြို့ ခမရ(၃၀၉)
၌ရှိနေပြီး မိသားစုဝင်များက လိုက်လံတွေ့ဆုံရန်ကြိုးစားနေသည်။ သို့သော် စစ်ကောင်စီက ကသာမြို့အထိ လိုက်ခွင့်မပေး၍ မည်သို့ဆက်လက်လုပ်ဆောင်ရမည်ကိုမသိဖြစ်နေ​ကြောင်းစုံစမ်းသိရသည်။

အင်း​တော်-ကသာလမ်းတိုက်ပွဲတွင်​တော်လှန်​ရေးတပ်များဖမ်းမိ​သောစစ်သုံ့ပန်းများ၊ သိမ်းဆည်းရရှိ​သော လက်နက်ခဲယမ်းများနှင့် သိန်း ၅၀ ယူ စစ်သင်တန်းတက်ခဲ့​သော ​အောင်သူ ။
ဓါတ်ပုံ-NUG-MOD၊ ​ပေးပို့

ကနီမြို့ကို စစ်ကောင်စီက စက်တပ်လေထီး ၆စီးနှင့် ဒရုန်းကျွမ်းကျင်သူ ၂၀ ပို့ဆောင်

◾️လေကြောင်းအန္တရာယ်နှင့် ဗုံးခိုကျင်းများတူးထားကြရန် သတိပေး

မတ်-၂၃၊၂၀၂၅။ကဖေး/People's Spring

စစ်ကိုင်းတိုင်း၊ ကနီမြို့ပေါ်သို့ စက်တပ်လေထီး ၆စီးနှင့် ဒရုန်းကျွမ်းကျင်သူ ၂၀ဦးအား စစ်ကောင်စီက လေကြောင်းမှပို့ဆောင်သွားပြီး ယနေ့ (မတ်လ ၂၃ရက်)နံနက်ပိုင်းတွင် ဒရုံးဖြင့် ဗုံးကြဲတိုက်ခိုက်သွားကြောင်း သတင်းရရှိသည်။

စက်တပ်လေထီး ၆စီးနှင့် ဒရုန်းကျွမ်းကျင်သူ ၂၀ဦးအား မတ်လ ၁၉ရက်တွင် စစ်ကောင်စီက ရဟတ်ယာဉ်ဖြင့် ပို့ဆောင်သွားခြင်းဟု ဒေသခံသတင်းရင်းမြစ်က ပြောသည်။

" သူတို့ရောက်လာတဲ့ညနေမှာပဲ ရပ်ကွက်(၃)ကို မီးရှို့တယ်။ အခုရက်ပိုင်း လေကြောင်းကနေ တောက်လျှောက်ပတ်ပြီး ကင်းထောက်တယ်။ ဗုံးခိုကျင်းတွေ အသစ်တူးသူကတူး၊ ကျင်းဟောင်းတွေ ပြန်ပြင်သူကပြင်တဲ့ လေကြောင်းအန္တရာယ်ကာကွယ်ဖို့လုပ်နေရတယ်"ဟု ဒေသခံတစ်ဦးကပြောသည်။

စစ်ကောင်စီသည် ၎င်းတို့ထိန်းချုပ်နိုင်ခြင်းမရှိသည့်ဒေသများကို လေကြောင်းအကူအညီဖြင့် အင်အားဖြည့်တင်းမှုများပြုလုပ်လာပြီး ကနီမြို့ပေါ်ကိုလည်း အပြည့်အဝပြန်လည်ထိန်းချုပ်ရေးကြိုးပမ်းလာသည်ဟု ကာကွယ်ရေးရဲဘော်တစ်ဦးက ပြောသည်။

ကနီမြို့ရှိ ရဲစခန်း၊ ထွေအုပ်ရုံးနှင့် ဌာနဆိုင်ရာရုံးချို့၌သာ စစ်ကောင်စီက တပ်စွဲထားနိုင်ပြီ ဘေးပတ်ဝန်းကျင်ကျေးရွာများအား တော်လှန်ရေးတပ်ဖွဲ့များက ထိန်းချုပ်ထားသည်။

ယနေ့ နံနက်ပိုင်းတွင် ကနီမြို့နယ် နတ်ကြီးရွာ ကူးတို့ဆိပ်ကို စစ်ကောင်စီတပ်က ဒရုန်းဖြင့်ဗုံးကြဲတိုက်ခိုက်ခဲ့သည်။ သို့သော် ထိခိုက်မှုအခြေနေကိုမသိရသေးပေ။

ချင်းတွင်းမြစ်ကမ်းဘေး ကျေးရွာဖြစ်သည့် နတ်ကြီးကျေးရွာကို မတ်လဆန်းတွင် စစ်ကောင်စီက ဗုံးကြဲတိုက်ခိုက်ခဲ့ဖူးသည်။

စစ်ကောင်စီသည် ဖေဖော်ဝါရီ ၇ရက်ကစ၍ ကနီမြို့နယ်အတွင်း ပစ်မှတ်ထားထား၍ လေကြောင်းတိုက်ခိုက်မှုများပြုလုပ်နေသည်။ ဖေဖော်ဝါရီ ၁၇ရက်တွင် မု‌ဌောရွာအနီး ချင်းတွင်းမြစ်ဆ်ိပ်ကမ်းတနေရာကို စစ်ကောင်စီက ဂျက်ဖိုက်တာဖြင့် လေကြောင်းမှတိုက်ခိုက်ရာ ခရီးသွားသံဃာတော်တစ်ပါးနှင့် အရပ်သားတစ်ဦး ဒဏ်ရာရရှိခဲ့သည်။

ဆိပ်ကမ်းအနီးရှိ ကားနှင့်မော်တော်အချို့လည်း မီးလောင်ပျက်စီးခဲ့သည်။

ဖေဖော်ဝါရီ ၁၁ရက်နှင့် ဖေဖော်ဝါရီ ၇ရက်ကလည်း ကနီမြို့နယ်အတွင်း စစ်ကောင်စီက စက်တပ်လေထီးနှစ်စီးဖြင့် လေကြောင်းမှတိုက်ခိုက်ရာ အရပ်သား သုံးဦးသေဆုံးပြီး နေအိမ်အချို့ပျက်စီးခဲ့သည်။

ကနီမြို့နယ်သည် မုံရွာမြို့အခြေစိုက် အနောက်မြောက်တိုင်းစစ်ဌာနချုပ်(နမခ)နှင့် မဝေးသောကြောင့် လေကြောင်းအန္တရာယ်နှင့် စက်တပ်လေထီးအသုံးပြုတိုက်ခိုက်နိုင်သည့် ဖြစ်စဉ်မျိုးမကြာခဏကြုံတွေ့လာနိုင်ပြီး ဒေသခံပြည်သူများအနေဖြင့် အထူးသတိပြုနေထိုင်ကြရန် ကနီမြို့နယ်ပြည်သူ့ကာကွယ်ရေးအဖွဲ့(ပကဖ)က သတိပေးထားသည်။

ဒေသခံများ ဘေးကင်းလုံခြုံစေရေးအတွက် လိုအပ်သော အဖွဲ့အစည်းများနှင့်ပူးပေါင်းဆောင်ရွက်သွားမည်ဖြစ်ပြီး ပြည်သူများအနေဖြင့် လေကြောင်း(လေယာဉ်)သတင်း၊စက်တပ်လေထီး(para motor)သတင်းများကို အထူးအလေးထား သတိပြုကြရန်၊ ထူးခြားပါက မိမိ၏မိသားစုအပါဝင် လက်လှမ်းမှီသည့် ဘေးကင်းလုံခြုံရာ၌ခိုလှုံနိုင်ရေးဆောင်ရွက်ကြရန်၊ နေထိုင်ရာ နေအိမ်များတွင် ဗုံးခိုကျင်းများမဖြစ်မနေတူးကြရန် ကနီမြို့နယ်ပြည်သူ့ကာကွယ်ရေးအဖွဲ့က သတိပေးထားသည်။

(ကနီမြို့မှ နေအိမ်တစ်အိမ်တွင် ဗုံးခိုကျင်းတူးနေစဉ်။ ဓာတ်ပုံ - ပေးပို့)

■ Short Story

"အိမ်မရှိ ခွေးမွေး"

◼️တာပလု

"အိမ်မရှိ ခွေးမွေး"တဲ့။ ခွေးပိုင်ရှင်က ဘယ်လိုစိတ်ကူးနဲ့ ပြောတာလဲတော့ မသိပါဘူး။ တကယ်လည်း ခွေးပိုင်ရှင်က ဒီနိုင်ငံမှာ လှည့်လည်သွားလာနေသူတွေ၊ တဘက်နိုင်ငံကနေ ထွက်ပြေးလာခဲ့ရသူတွေလို့ ပြောလို့ရတယ်။ ခွေးပိုင်ရှင်က မြန်မာနိုင်ငံသား၊ ခွေးတွေကတော့ ထိုင်းခွေးတွေပါ။

ခွေးပိုင်ရှင်နဲ့ ခွေးနှစ်ကောင်ဇာတ်လမ်းက မဲဆောက်က စခဲ့ကြတယ်။ လမ်းဘေးခွေးတကောင်ကို ကောက်ယူမွေးစားရာကနေ အစပြုခဲ့ကြတယ်လို့ ပြောတယ်။ ပိုင်ရှင်မဲ့ လမ်းဘေးခွေးတွေက ပိုင်ရှင်သခင်မရှိတာက သူတို့မှာ မြေမရှိလို့ဘဲဆိုတာ ပြောလို့ရသလား။ မြန်မာနိုင်ငံသားတွေရဲ့ အယူအဆကတော့ ခွေးတကောင်ကို စမွေးပြီဆိုတာနဲ့ ဒီခွေးဟာ ဒီသခင်နဲ့ အခုလိုလာဆုံတာ သူ့မှာ မြေရှိလို့ပဲဆိုပြီး ပြောတတ်ကြတယ်။ အခုတော့ မဲဆောက်က ထိုင်းခွေးတကောင်ကို မြန်မာနိုင်ငံသား မိသားစုက ကောက်ယူမွေးစားလိုက်တာဟာ ခွေးအဖို့တော့ မြေရှိသွားပြီလို့ ပြောလို့ရမလားပဲ။

အနက်ရောင် ခွေးမလေးတကောင်ကို ဇူဇူးလို့ နာမည်ပေးလိုက်တယ်။ သူ့ကိုစတွေ့တော့ တပိုက်စာရယ်ပါ။ ရင်ခွင်ထဲထည့်ပြီး ပိုက်လိုက်ရင် တကောင်‌လုံးပျောက်သွားရော။ အကောင်လေး သေးသေးလေးနဲ့ ချစ်မွေးပါတယ်ပြောရမယ်။

မဲဆောက်နေ့ရက်တွေကို ဖြတ်သန်းနေရင်းနဲ့ ဇူဇူးမှာ ကိုယ်လေးလက်ဝန်ရှိလာတယ်။ မျိုးဆက်တဆက်ကို မွေးဖွားသန့်စင်ပေးမယ့်တာဝန်ကို သူလုပ်တော့မှာပါ။ သူမွေးဖွားပေးလိုက်တဲ့ မျိုးဆက်က တဘက်နိုင်ငံကူးပြီး မတရားမှုကို တော်လှန်တိုက်ပွဲဝင်ကြတဲ့သူတွေနဲ့အတူ သွားရောက် တာဝန်ထမ်းဆောင်မှာဆိုတဲ့ အတွေးမျိုး ရှိချင်လည်း ရှိလောက်ပါတယ်။

တနေ့ ကိုယ်ဝန်လစေ့လာတော့ မျိုးဆက်တခုကို မွေးဖွားခြင်းအလုပ် လုပ်နေရပါပြီ။ ဇူဇူးကို တခုခုကူညီဖို့အတွက်လည်း စောင့်ကြည့်ပေးကြတယ်။အကောင်နဲ့ ခွန်အားနဲ့ မမျှလို့နေမယ်။ မွေးဖွားခြင်းအလုပ်ကို တဝက်တပျက်နဲ့ ရပ်နေတယ်။ သူ့မှာ မွေးဖွားခြင်းအလုပ်ကို ဆက်ပြီး မလုပ်နိုင်တော့ပါဘူး။အကူအညီမပါဘဲ ကလေးဆက်မွေးဖို့ မဖြစ်နိုင်တော့မှန်းသိတော့ ဇူဇူးကို ဆေးခန်းပို့ဖို့ လုပ်ရပါတော့တယ်။

ဇူဇူးမီးဖွားတဲ့အချိန်က အကောင်ကသေးလို့ မမွေးနိုင်ဘူး။ ဆေးခန်းပို့တော့ ညသန်းခေါင်ကြီး အရေးပေါ်ပို့ရတာပါ။ နှစ်ကောင်ပဲမွေးပေးနိုင်တယ်။ ဆေးခန်းရောက်တော့ ဗိုက်ထဲမှာ လေးကောင်ကျန်တယ်။ အဲဒီလေးကောင်ထဲက တကောင်ကတော့ အဖိတ်အစင်ဖြစ်သွားလို့ သုံးကောင်ပဲ ရလိုက်ပါတယ်။

ဆရာဝန်အကူအညီနဲ့ ဗိုက်ထဲကျန်နေသေးတာတွေ အပြင်ကို ရောက်လာတယ်။ မိခင် ဇူဇူးရော ကလေးတွေအကုန်လုံးရော ကျန်းမာရေးကောင်းကြပါတယ်။

မကြာခင်မှာပဲ ကလေးတွေ အရွယ်ရောက်လာတယ်။ သူမွေးဖွားပေးလိုက်တဲ့ ၄ ကောင်က တော်လှန်ရေးသမားဆီကို ရောက်သွားကြတယ်။ အရွယ်ရောက် လာသူတွေ တဘက်နိုင်ငံကိုကူးပြီး တော်လှန်ရေးအလုပ် သွားလုပ်ကြတာပါ။ သူဟာ ထိုင်းခွေးတကောင်ဖြစ်လင့်ကစား မြန်မာနိုင်ငံက တော်လှန်ရေးမှာ ပါဝင်ကြဖို့ မျိုးဆက်တခုကို မွေးဖွား စောင့်ရှောက်ပေးလိုက်တဲ့အတွက် တော်လှန်မိခင်စာရင်း ဝင်သွားပါတယ်။

ဒါဟာ ပိုင်ရှင်မဲ့ဘဝကနေ ကောက်ယူမွေးစားတဲ့ မြန်မာနိုင်ငံသားကို ပြန်ပြီး ကျေးဇူးတုန့်ပြန်တာမျိုးလည်း ဖြစ်မှာပါ။ နောက်ဆုံးမှာတော့ ဇူဇူးဘေးမှာ ရွှေညိုရောင်သန်းတဲ့ အမွှေးအရောင်ကို ပိုင်ဆိုင်ထားတဲ့ သားဖြစ်သူ ဘရောင်နီတကောင်သာ ကျန်ပါတော့တယ်။ ဇူဇူးတို့ ဘရောင်နီတို့ သားအမိလည်း တနေ့ကျရင် မဲဆောက်ကနေ နှုတ်ဆက် ထွက်ခွာသွားကြမယ်လို့ ကြိုတွေးရင်လည်း တွေးကြမှာပါ။ တကယ်လည်း တရက်မှာတော့ မဲဆောက်မြေကို ကျောခိုင်းလာခဲ့ကြပါတော့တယ်။

"ခွေးလို့ပြောရမှာတောင် ခပ်ခက်ခက်ပဲ ကားမူးပြီးအန်လို့ သန့်ရှင်းရေး လုပ်ပေးရသေးတာ"

မဲဆောက်ကို ကျောခိုင်းလာတဲ့နေ့က သူတို့တွေအဖို့ ခရီးဝေးကို ကား စပြီး စီးဖူးကြတာပါ။ ခရီးဝေးသွားနေကျ အတွေအကြုံမရှိလို့ ကားမူးပြီး အန်တဲ့အကြောင်းကို ပိုင်ရှင်ဖြစ်သူက ပြောပြပါတယ်။

ဇူဇူးနဲ့ ဘရောင်နီက အိမ်ကို ဧည့်သည်တယောက်လာတာနဲ့ ဖက်လဲတကင်း နှုတ်‌ဆက်တတ်ပါတယ်။ မျက်နှာစိမ်းဧည့်သည် ဖြစ်ပါစေ တရင်းတနှီးကို နှုတ် ဆက် ဧည့်ခံတတ်ပါတယ်။ စိမ်းစိမ်းကျက်ကျက် အခုလိုပဲ တပြေးညီ နှုတ်ဆက် ဧည့်ခံတတ်တာပါ။ ဘယ်သူ့ကိုတော့ဖြင့် ပိုပိုသာသာလေး ဧည့်ခံလိုက်တာ၊ ဘယ်သူ့ကိုတော့ဖြင့် တော်ရုံလေးသာ ဧည့်ခံလိုက်တာမျိုး မရှိပါဘူး။

ဇူဇူးက အိပ်ရင် ကြက်အိပ်ကြက်နိုး အိပ်တတ်တယ်။ အသံတခုခု ကြားလိုက်တာနဲ့ ခေါင်းထောင်ပြီး ထကြည့်တယ်။ အခင်းအကျင်းရဲ့ အတိမ်အနက်ပေါ်မူတည်ပြီး သူကိုယ်တိုင် ခြံစည်းရိုးနားအထိ ထသွားပြီး ကြည့်တာမျိုးလည်း လုပ်တတ်‌သေးတယ်။

သားအမိတွေဖြစ်ပေမယ့် ဘရောင်နီကတော့ သူ့သခင်ကို လူသားတယောက်လို ပတ်ချွဲနပ်ချွဲ လုပ်တတ်တယ်။ အိပ်ရင်တောင်မှ ခေါင်းအုံးနဲ့ အိပ်တတ်တာမျိုးပါ။ ခေါင်းအုံးနဲ့ အိပ်တတ်တာ သားအမိနှစ်ကောင်လုံးလို့ ပြောလို့ရတယ်။ အလေ့အကျင့်ရှိလာတဲ့အရာကို သူတို့ ကောင်းကောင်းလုပ်နိုင်ကြတယ်။

ဘရောင်နီက ရေချိုးတဲ့အခါ ငြိမ်ပြီးနေတယ်။ ရေချိုးပြီးလို့ သူ့ခန္ဓာကိုယ် ခြောက်သွားအောင် ဒရိုင်ယာ (Dryer) နဲ့ မှုတ်ပေးတဲ့အခါ ဇိမ်ကျကျ နေတတ်တယ်။ နယ်မြေသစ်ကို ရောက်လာချိန်မှာတော့ နေသားကျအောင် အချိန်မပေးလိုက်ရဘူး ထင်ပါတယ်။ အထိုက်အလျောက်ကျယ်တဲ့ ခြံနဲ့ဝင်းနဲ့ နေရာကို ရောက်လာကြတာဖြစ်လို့ပါ။

သူတို့တွေမှာ အသံနဲ့ပတ်သက်ပြီး ထရော်မာရှိပုံရတယ်။ အသံကျယ်ကျယ်တခုခု ကြားလိုက်ရပြီဆို အိမ်ထဲကနေ အိမ်ပြင်ကို မထွက်တော့ဘူး။ အသံတွေကမရပ်ဘဲ ဆက်တိုက် ထွက်ပေါ်လာတာမျိုးဆို အခန်းထောင့်တခုမှာ သွားကပ်နေကြတယ်။

လွိုင်ကထုန်ပွဲတော်က ဗြောက်ဖောက်သံတွေအပြင် မီးရှူးမီးပန်းဖောက်သံတွေက မရပ်မနား ဖောက်ကြတာပါ။ တနေရာက ဖောက်လို့မပြီးခင်မှာဘဲ နောက်ထပ်တနေရာမှာ ဖောက်ခွဲသံအသစ်တခု ပေါ်လာပါတယ်။ ဒီလိုနဲ့ ဖောက်ခွဲသံ အသစ်အသစ်တွေနဲ့ အုံးအုံးကျက်ကျက်အသံတွေ ထွက်ပေါ်လာပါတယ်။သူ့အရပ်နဲ့သူ့ဇာတ်၊ ပွဲတော်တခုရဲ့ သင်္ကေတခုလည်း ဖြစ်မှာပါ။ ဖောက်ခွဲသံ၊ ပေါက်ကွဲသံတွေဆိုတာ မြန်မာနိုင်ငံက လာတဲ့သူအဖို့တော့ ပျော်ရွှင်စရာ အမှတ်အသားတခု မဟုတ်ဘူး ဆိုတာပါပဲ။

ပေါက်ကွဲသံတခု ကြားရပြီဆိုရင် တော်လှန်ရေးအတွက် တယောက်ယောက်က အသက်ပေးလိုက်ရပြီလား။ ပေါက်ကွဲသံနဲ့ ဆက်စပ်ပြီးတော့ အနီးအနားက ဘယ်သူတွေက သံသယနဲ့ ဖမ်းဆီးခံရတော့မှာလဲ ဆိုတဲ့ စိုးရိမ်စိတ်တွေက တခုပြီးတခု တန်းစီပြီး ပေါ်လာတာမျိုးပါ။ ပေါက်ကွဲသံဆိုတာ မဲဆောက်က ပြောင်းလာတဲ့ ခွေးတွေအဖို့ ကြောက်စိတ် ဖြစ်လာ‌နိုင်စေသလို မြန်မာပြည်က ထွက်လာတဲ့သူတွေအဖို့လည်း သက်သောင့်သက်သာ ဖြစ်စေမှာတော့ မဟုတ်ပါဘူး။

သူတို့တွေ ဘာကြောင့် အသံတွေကို ကြောက်ရတာလဲ၊ ပေါက်ကွဲသံတွေကို ကြောက်တတ်တဲ့ ထရော်မာတခုခု ရလာတာမျိုးလည်း ဖြစ်နိုင်ပါတယ်။ သူတို့ရဲ့ ငယ်ဘဝက မဲဆောက်နေ့ရက်တွေကို ဖြတ်သန်းလာခဲ့ကြသူတွေပါ။ အဲဒီနေ့ရက်တွေမှာ မဲဆောက်တဘက်ကမ်း ထိတွေ့တိုက်ပွဲတွေကြားက ပစ်ခတ်သံတွေကို ကြားမိတာမျိုး ရှိခဲ့ဖူးကြမယ် ထင်ပါတယ်။ သောင်ရင်းမြစ်တဘက်ကမ်းက လက်နက်ကြီး ပစ်ခတ်သံတွေကို သူတို့ကြားရနိုင်ပါတယ်။ ပေါက်ကွဲပစ်ခတ်သံ‌တွေဆိုတာ စိတ်ဒဏ်ရာတခုခုကို ဖြစ်ပေါ်စေတဲ့အရာလို့ပဲ ကောက်ချက်ချရမှာပါ။

ခွေးတွေဆိုတာ လူသားတွေနဲ့ အနီးဆုံးနေရာမှာ နေကြသူတွေပါ။ လူသားတွေရဲ့ မိတ်ဆွေအရင်းအချာတွေလို့ ပြောလို့ရနိုင်သလို ရဲဘော်ရဲဘက်တွေလို့ ပြောရင်လည်း ရနိုင်ပါတယ်။ လူသားတွေနဲ့အတူ အေးအတူပူအမျှ အရာရာကို ရင်ဆိုင်ကြသူတွေလို့ ပြောလို့ရပါတယ်။ သူတို့တွေ အနားမှာရှိနေတာက လုံခြုံမှုတခုခုကို ရစေပါတယ်။ အနားမှာ သူတို့ရှိနေတာက ကိစ္စတချို့ကို မကြောက်မရွံ့ ဆောင်ရွက်သွားလို့ ရနိုင်တာမျိုးပါ။

မကြာသေးတဲ့ရက်ပိုင်းက လူမှုကွန်ရက်ပေါ်မှာ လူကြည့်များခဲ့တဲ့ ၁ မိနစ်ရုပ်သံမှာ စိတ်ဖိစီးမှုကို လျှော့ချပေးတဲ့ ခွေးကလေးအကြောင်း သတင်းဌာနတခုမှာ ဖော်ပြသွားပါတယ်။ အမေရိကန်နိုင်ငံ လော့စ်အိန်ဂျလိစ် ကမ်းခြေမှာတော့ ကြီးမားတဲ့ ရွာကြီးတရွာ ပေါ်ထွက်လာပါတယ်။ ပေါ်ထွက်လာတဲ့အကြောင်းရင်းက တောမီးငြိမ်းသတ်ဖို့အတွက် ရောက်လာကြတဲ့သူတွေ ယာယီတဲထိုးပြီး နေထိုင်ကြလို့ပါပဲ။ ရောက်လာကြသူတွေက မီးသတ်သမားတွေနဲ့ ကူညီသူ‌တွေ ဖြစ်ပါတယ်။ ဒီလူတွေအတွက် ခဏတာ စိတ်ဖိစီးမှုကို လျှော့ချပေးဖို့ အန်ဘာဆိုတဲ့ ခွေးလေး‌တကောင် ပို့ထားပါတယ်။ စိတ်ပိုင်းဆိုင်ရာ ကုစားပေးတဲ့ အန်ဘာက ကမ်းခြေမှာ လမ်းလျှောက်နေပါတယ်။ သူ့ကို ပွတ်သပ်ချင်တဲ့သူတွေကိုလည်း နှုတ်ဆက်နေပါတယ်။ မီးသတ်တပ်ဖွဲ့ဝင်တွေ မီးဘေးကူညီပေးသူတွေ အနားယူချိန်မှာ ခွေးတွေကို ပွတ်သပ်ပေးရင် သွေးပေါင်ချိန်ကျပြီး ခဏတာ စိတ်သက်သာရာ ရစေတယ်လို့ ဆိုပါတယ်။

ဘရောင်နီတို့ ဇူဇူးတို့ဆီ ရောက်လာကြသူတွေက စိတ်သက်သာရတခုခု ရသွားစေမှာပါ။ သ‌တင်းထောက်တွေ၊ စာရေးဆရာတွေ၊ တော်လှန်ရေးဆောင်ရွက် နေသူတွေက မကြာခဏဆိုသလို သူတို့ဆီ ရောက်လာတတ်ကြပါတယ်။ ရောက်လာကြသူတိုင်းကိုလည်း သူတို့သခင်ကို နှုတ်ဆက် ခရီးဦးကြိုပြုတဲ့အတိုင်းကို လွန့်လူးလွန်းထိုးပြီး အမြီးတနှံ့နှံ့နဲ့ နှုတ်ဆက်ကြလေ့ရှိပါတယ်။ သူတို့နဲ့တွေ့တဲ့ ခဏတာလေးအတွင်းမှာပဲ စိတ်ပူပင်စရာတချို့ကို မေ့ပျောက်သွားစေမှာပါ။ ။

(The Call - ​ခေါ်သံ"အွန်လိုင်းမဂ္ဂဇင်းမှာ 'တာပလု'
ရေးဖွဲ့ခဲ့တဲ့ "​အိမ်မရှိ ခွေးမွေး" ဝတ္ထုတိုကို People's Spring က ပြန်လည်​ဖော်ပြ​ပေးတာ ဖြစ်ပါတယ်။အနုရသကဲပြီး တော်လှန်​ရေးအတွက် အ​ထောက်အကူ ပြုတဲ့ စာ​ပေကဏ္ဍမျိုးစုံကို "The Call - ​ခေါ်သံ" အွန်လိုင်းမဂ္ဂဇင်းရဲ့ ​Facebook Page ဖြစ်တဲ့ https://www.facebook.com/profile.php?id=100087677882749&mibextid=2JQ9oc မှာလည်းသွား​ရောက်ဖတ်ရှုနိုင်ပါတယ်)

■ကဗျာ

“ချိတ်”

◼️မောင်မိုးအေး

နေညိုရင် ငါးမျှားမယ်
ချိတ်မှာ
ဘဝနဲ့ မျှော်လင့်ချက်
တွဲလဲကြီး
ဝေးဝေးကိုပစ်ကွာ
ကြီးကြီးကိုဆွဲ

ဘဝနဲ့ရင်းပြီးမျှားတာပဲ
ကြီးကြီးရသင့်တယ်မလား

ပန်းပွင့်တာတွေလှလား
နေဝင်ချိန်လှလား
မီးသင့်ဒဏ်ရာကို
တက်တူးနဲ့ ဖုံးလိုက်တယ်
လှသလား

ဒီလိုပဲ တူရာစုကြ
ဒဏ်ရာနဲ့လူ
လေးငါးခြောက်ယောက်
ခုနှစ်ယောက်
ဆက်မရေတွက်တော့ဘူး

တွဲလဲတွေရော့
တေ့လွဲတွေရော့
အများကြီးပဲ ဟရောင်
အများကြီးပဲ

ရင်ဘတ်တွေဖွင့်ပြီး
ရေဆင်းကူးကြတယ်
ခေတ်နဲ့ငြိပြီး မြုပ်သွားတယ်
အသက်ရှုချိန်ကိုမရဘူး
ကူးကြခတ်ကြရ

အသက်တောင်
ဝဝမရှုနိုင်ခင်
အော်ဟစ်ဆဲကြတာပဲ

မောလား ဟရောင်
အကုန်လုံးဟာ
မျက်နှာသေတွေနဲ့
နေလုံးကြီးက နီနေပြီ
ငါးမျှားချိတ်တွေ တွဲလဲ
ပိုက်မပစ်တတ်
ကွန်မပစ်တတ်
ငါတို့ဘာတွေမိခဲ့ကြသလဲ

(The Call - ​ခေါ်သံ"အွန်လိုင်းမဂ္ဂဇင်းမှာ '​မောင်မိုး​အေး' ရေးဖွဲ့ခဲ့တဲ့ "​ချိတ်" ကဗျာကို People's Spring က ပြန်လည်​ဖော်ပြ​ပေးတာ ဖြစ်ပါတယ်။အနုရသကဲပြီး တော်လှန်​ရေးအတွက် အ​ထောက်အကူ ပြုတဲ့ စာ​ပေကဏ္ဍမျိုးစုံကို "The Call - ​ခေါ်သံ" အွန်လိုင်းမဂ္ဂဇင်းရဲ့ ​Facebook Page ဖြစ်တဲ့ https://www.facebook.com/profile.php?id=100087677882749&mibextid=2JQ9oc မှာလည်းသွား​ရောက်ဖတ်ရှုနိုင်ပါတယ်)

ဧရာဝတီတွင်ရေကြည်၊ငါးသိုင်းချောင်း၊လေးမျက်
နှာထိစပ်​ဒေသများအထိ့တိုက်ပွဲပြင်းထန်လာ

မတ်-၂၃၊၂၀၂၅။မိထက်/People's Spring

ဧရာဝတီတိုင်း၊ ရေကြည်၊ ငါးသိုင်းချောင်း၊ လေး
မျက်နှာမြို့နယ်ထိစပ်​ဒေသများတွင်မတ်လ၂၃
ရက်နံနက်ပိုင်း၌ တိုက်ပွဲပြင်းထန်နေပြီး စစ်ကောင်စီက ဂျက်ဖိုက်တာဖြင့်ရော စက်တပ်လေထီးဖြင့်ပါ တိုက်ခိုက်နေကြောင်း သတင်းရရှိသည်။

အဆိုပါဒေသတဝိုက်မှ ချင်းလယ်၊ တုံးတော၊ ဝတ်ကုန်း၊ ကညင်တိုင်းရွာများကို စစ်ကောင်စီတပ်က လေကြောင်းမှဗုံးကြဲတိုက်ခိုက်နေခြင်းဖြစ်သည်။

"တိုက်ပွဲတွေတော်တော်ကိုပြင်းပြင်းထန်ထန်ဖြစ်နေတယ်။ ရေကြည်၊ ငါးသိုင်းချောင်း ဘက်ကိုလည် ဖြတ်ပြီး ဟက်စကီးတွေတောက်လျှောက်တတ်နေတယ်။ စက်တပ်လေထီး‌‌တွေလည်း ပျံတက်တယ်။ တိုက်ပွဲသံတွေ ကြားနေရတယ်" ဟု လေးမျက်နှာမြို့ခံတစ်ဦးကပြောသည်။

အာရက္ခတပ်တော်(AA) နှင့် PDF ပူးပေါင်းတပ်များကမတ်လ ၁၅ရက်မှစ၍ရေကြည်မြို့၊ မြောက်
စမ်းရွာအခြေစိုက် အမြောက်တပ်အမတ(၃၄၄)
နှင့် သာပေါင်းမြို့နယ် ရှိခမရ(၃၀၈)ကို ဦးတည်၍ စစ်ရေးဖော်ဆောင်မှုအရှိန်မြှင့်လိုက်ပြီးနောက် ဒေသတွင်း၌ တိုက်ပွဲများပြင်းထန်လာခြင်းဖြစ်သည်။

စစ်ကောင်စီတပ်က မတ်လ ၁၇ ရက်က ဝတ်ကုန်းရွာကိုလေကြောင်းမှတိုက်ခိုက်ခဲ့ပြီးနောက်လေ
ကြောင်းအသုံးပြုမှုပိုများလာသည်ဟု ဒေသခံများကပြောသည်။

"ကျတော်လည်းရွာကိုထားခဲ့ပြီ။ နေလို့မရတော့ဘူး။ တိုက်ပွဲမှာက AAက ဖိတိုက်နေတာ။ မြေပြင်မှာစစ်တပ်အထိနာလေ လေကြောင်းကနေ ပစ်လေပဲ။ မနေသင့်‌တော့ဘူး"ဟု ဒေသခံတဦးက
People's Spring သို့ပြောသည်။

ဒေသကိုစွန့်ခွာခဲ့သောစစ်ဘေးရှောင်ပြည်သူ ၅၀၀၀ ခန့်ရှိနေပြီး အကူအညီများပေးကြရန် အရပ်ဘက်အဖွဲ့များက တိုက်တွန်းထားသည်။

တိုက်ပွဲနေရာများသည် ပုသိမ်-မုံရွာလမ်းနှင့်လည်း နီးသည်။ ပုသိမ်-မုံရွာလမ်းသည် ဧရာဝတီ၊ ပဲခူး၊
မကွေး နှင့် စစ်ကိုင်းတိုင်းအထိ ဖောက်လုပ်ထားပြီး AA အပါအဝင်တော်လှန်ရေးတပ်များကလမ်း
ပိုင်းကို ထိန်းချုပ်နိုင်ရေး ကြိုးစားနေသည်။တိုက်ပွဲကြောင့် ဒေသခံများ၏ လုံခြုံရေးအန္တရာယ်များ စိုးရိမ်ရသည့်အတွက်အသွားအလာများ သတိ
ထားကြရန်ရေကြည်ပကဖအပါအဝင်ကာကွယ်
ရေးတပ်များက သတိပေးထားသည်။

တိုက်ပွဲပြင်းထန်နေသည့် မိုးဗြဲမြို့တွင် စစ်ကောင်စီတပ်သားတစ်ဦး အလင်းဝင်လာ

မတ်-၂၃၊၂၀၂၅။ရဲခေါင်/People's Spring

တိုက်ပွဲပြင်းထန်နေသည့် မိုးဗြဲမြို့တွင် စစ်ကောင်စီတပ်သားတစ်ဦး ယနေ့(မတ်လ ၂၃ ရက်) အလင်းဝင်လာကြောင်း မိုးဗြဲပြည်သူ့ကာကွယ်ရေးတပ်(MBPDF)က ထုတ်ပြန်သည်။

စစ်ကောင်စီ၏ ခမရ (၅၀၈)တပ်ရင်းမှ စစ်ကောင်စီတပ်သားတစ်ဦးသည် ရှမ်း - ကရင်နီပြည်နယ်အစပ် မိုးဗြဲအခြေစိုက် ခမရ(၄၂၂)တပ်ရင်းရောက်ရှိနေစဥ် MA1 လက်နက်တစ်လက်နှင့်အတူ အလင်းဝင်လာခဲ့ခြင်းဟု ဆိုသည်။

"မိုးဗြဲတိုက်ပွဲအတွင်းကျနော်တို့ MBPDFမှာတော့ နှစ်ယောက်ရှိတယ်။ KNDFနဲ့ အခြားတပ်ရင်းတွေမှာများတယ်။ တိုက်ပွဲကြားကဝင်လာတဲ့သူရှိသလို တပ်အပြောင်းအရွေ့လုပ်တဲ့ချိန် ထွက်ပြေးလာသူတွေလည်းရှိတယ်"ဟု MBPDF တာဝန်ရှိသူက လူထုနွေဦးသို့ ပြောသည်။

အလင်းဝင်တပ်သားသည် စစ်မှုထမ်းဥပဒေအရ တပ်သားသစ်ဆောင်းခံရသူဖြစ်ပြီး စစ်ကောင်စီ၏ မတရားစေခိုင်းမှု မခံနိုင်သောကြောင့် ထွက်ပြေးလာခြင်းဖြစ်ကြောင်း ဖော်ပြသည်။

မိုးဗြဲတိုက်ပွဲအတွင်း စစ်ကောင်စီဘက်မှ သေဆုံးမှုများပြားနေကြောင်းလည်း ၎င်းက MB PDF ထံထွက်ဆိုသည်။

အဆိုပါတပ်သားအား ဆုကြေးငွေများ‌ပေးအပ်ပြီး ဘေးကင်းလုံခြုံသည့် ထိန်သိမ်းရေးဌာနသို့ လွှဲပြောင်းရန်စီစဥ်လျက်ရှိပြီး စစ်ကောင်စီတပ်သားများအနေဖြင့် အလင်းဝင်ရောက်လိုပါက အစဥ်အမြဲကြိုဆိုလျက်ရှိကြောင်းလည်း MBPDFက အသိပေးသည်။

တိုက်ပွဲပြင်းထန်နေသည့် မိုးဗြဲမြို့တွင် စစ်ရေးလို အပ်ချက်များစွာရှိနေသည့်အတွက် ပြည်သူများအနေဖြင့် တတ်နိုင်သ၍ ထောက်ပို့ကူညီ‌ပေးရန်လည်း တိုက်တွန်းထားသည်။

ထို့အပြင် မြေပြင်ထိုးစစ်တိုင်းတွင် သေဆုံးမှုများနေသည့် စစ်ကောင်စီသည် မိုးဗြဲမြို့ကိုနေ့စဥ်နှင့်အမျှ မီးလောင်ဗုံး အသုံးပြု၍ ဒရုန်း၊လက်နက်ကြီးများဖြင့် တိုက်ခိုက်နေသည်။

"ဒီနေ့(မတ်လ ၂၃ ရက်)လည်း အိမ်ကြီး၊အိမ်ကောင်း နှစ်လုံးမီးလောင်းသွားတယ်။ဒရုန်းနဲ့ လာကြဲသွားတာ"ဟု မိုးဗြဲမြို့စစ်မြေပြင်ရှိ ရဲဘော်တစ်ဦးက ပြောသည်။

ရှမ်း-ကရင်နီပြည်နယ်အစပ်ရှိ မိုးဗြဲမြို့အား ပြာကျအောင် စစ်ကောင်စီက မီးလောင်ဗုံးများဖြင့် နေ့စဥ်ပစ်ခတ်နေကြောင်း ရှမ်းတောင်စစ်ဒေသခွဲ၊ အမှတ် (၁)ဗျူဟာက ထုတ်ပြန်ထားသည်။

မဟာမိတ်တပ်ပေါင်းစု၏ စိုးမိုးထိန်းချုပ်ထားသော မိုးဗြဲမြို့ကို စစ်ကောင်စီက ပြန်လည်ထိန်း ချုပ်နိုင်ရန် စစ်ကြောင်းသုံးကြောင်းနှင့်အတူ နည်းလမ်းမျိုးစုံဖြင့် တိုက်စစ်ဖွင့်ထိုးစစ်ဆင်လာသည်မှာ ၄ လ ကြာရှိလာသည်။

ယခု မတ်လအတွင်း စစ်ရေးပိုပြီးပြင်းထန်ကာ ကာကွယ်ရေးတပ်ဖွဲ့များနှင့် တိုက်ပွဲကြီးငယ်များ နေ့စဥ်ဖြစ်ပွားပြီး စစ်ကောင်စီဘက်က ထိနာသူများသောကြောင့် ဖယ်ခုံနှင့် လွိုင်ကော်မှ လက်နက်ကြီးအကူ ၊ လေကြောင်းအကူ၊ အပြင်တိုက်ခိုက်ရေးဒရုန်းနှင့် ကာမီကာဇေ(အသေခံ)ဒရုန်းတို့ဖြင့်ပါ တိုက်ခိုက်နေသည်။

(ယနေ့ အလင်းဝင်လာသည့် စစ်ကောင်စီတပ်သားနှင့် ၎င်းယူဆောင်လာသော လက်နက်ခဲယမ်းများ ကို မိုး​ဗြဲ PDFထံပေးအပ်နေစဥ်။ဓာတ်ပုံ - MBPDF)

ကာကွယ်ရေးဝန်ကြီး မြေပြင်၌ ရှိနေခြင်း တစ်ခုတည်းဖြင့်အထက်ကို ယုံကြည်ပြီးရှေ့ဆက်နေ
​ကြောင်းPDF ကလေးခရိုင် တပ်ရင်း(၄) တပ်မှူးပြော

မတ်-၂၃၊၂၀၂၅။ဟန်နွေ/People’s Spring

အမျိုးသားညီညွတ်ရေးအစိုးရကာကွယ်ရေးဝန်
ကြီးဌာနဝန်ကြီးဦးရည်မွန်ကိုယ်တိုင်ပြည်သူ့ကာ
ကွယ်ရေးတပ်မတော်(PDF)ရဲဘော်များ နှင့်အတူ မြေပြင်၌ ရှိနေခြင်း တစ်ခုတည်းဖြင့် အထက်ကို ယုံကြည်ပြီး တော်လှန်ရေးကို ရှေ့ဆက်နေခြင်းဖြစ်ကြောင်း PDF ကလေးခရိုင် အမှတ်(၄) တပ်ရင်းမှတပ်မှူးကိုမုန်ပီးက ပြောသည်။

စစ်ကိုင်းတိုင်း ကလေးနှင့်တမူးခရိုင်ရှိတော်လှန်
ရေးတပ်ဖွဲ့များအတွက်ရန်ပုံငွေရှာဖွေမည့်ကဘော်
ညီနောင် ကမ်ပိန်းဖွင့်ပွဲအခမ်းအနားကိုမတ်လ ၂၂
ရက်ညက ပြုလုပ်ခဲ့သည်။ အခမ်းအနားမှူး ဒေါက်တာဖြိုးသီဟက အွန်လိုင်းတွင် NUGကို အပြုသဘော ဝေဖန်မှုများ ပြုလုပ်နေသည့် PDF တပ်မှူး တစ်ဦးဖြစ်သည့် ကိုမုန်ပီးကို တော်လှန်
ရေး၌ဝေဖန်ရေး လိုအပ်သကဲ့သို့ အပြစ်ရှာခြင်း သို့မဟုတ် ပြည်သူစိတ်ဓာတ်ကျအောင် လုပ်ခြင်း
များ ရှိနေသည့် အပေါ် သုံးသပ်ပြောကြားပေးရန် မေးမြန်းချက်အား ကိုမုန်ပီးက ပြန်လည်ဖြေကြားရာ၌ NUG ယန္တရားအောက်ရှိ PDF ကဏ္ဍအပေါ် ပြန်လည်ဆွေးနွေးခဲ့သည်။

NUG ကို ဝေဖန်မှုများ ပြုလုပ်သကဲ့သို့ အပြုသ
ဘော ရေးသားချက်များအပေါ် NUGကို ဖားသည်ဟု ပြောဆိုမှုများ ကြုံရကြောင်း ကိုမုန်ပီးကပြောပြသည်။

“ကျနော်မဆဲခဲ့တာ မဟုတ်ပါဘူး။ဖာနေတာလည်း မဟုတ်ပါဘူး။ အဓိကတော့ ကျနော်တို့ ကိုယ်၌က ထဲထဲဝင်ဝင် အလုပ်လုပ်နေရတော့ ကျနော်တို့ ဘာလုပ်နေရတယ်ဆိုတာ ကျနော်တို့သိတယ်။ ကျနော်တို့ဘာလုပ်နေတယ် ကျနော်တို့ ဘယ်လောက်ရွေ့နေတယ်ဆိုတာကျနော်တို့ သိတယ်။တကယ်က
တော့ အခု ကျနော်တို့ ပြောနေတဲ့ ကဏ္ဍတွေဆိုတာ ကျနော်တို့သာရန်ပုံငွေလုံလောက်တယ်ဆိုရင် လျှို့
ဝှက်သင့်တဲ့ကိစ္စတွေပါ။ ဒါပေမဲ့ တော်လှန်ရေးဟာ လူထုအားနဲ့ သွားနေရတဲ့ကဏ္ဍမှာအားလုံးမြင်သာ
တာပေါ့။” ဟု ကိုမုန်ပီးက ပြောသည်။

NUG အစိုးရယန္တရားပဲဖြစ်ဖြစ်တော်လှန်ရေးဦး
ဆောင်သူများ၊ တပ်ဖွဲ့အချင်းချင်းများဖြစ်ဖြစ် လိုအပ်သည်များကိုအများပြည်သူရှေ့မှောက်၌ ပြောဆိုခြင်းထက် အတွင်းပိုင်း၌သာ ​တော်လှန်​ရေးရဲ​ဘော်ချင်းအဓိထား ပြောဆိုဖြစ်ကြကြောင်း ၎င်းကဆက်​ပြောသည်။

“ကျနော် ကျန်တဲ့ ကဏ္ဍတွေမပြောတက်ဘူး။ ကျနော်မသိ ၊ နားလည်မလည်လို့ ။ ဒါပေမဲ့ PDF
ကဏ္ဍအနေနဲ့ ပြောရမယ်ဆိုရင် ပြည်သူ့ကာကွယ်
ရေးတပ်မတော် ဟာ ကျနော်တို့ရဲ့ ဝန်ကြီး ၊ ကျနော်တို့ရဲ့ စစ်ဦးစီးချုပ်ကိုယ်တိုင် ကျနော်တို့နဲ့အတူ မြေပြင်မှာ ရှိနေတယ် ။ဒီတခု နဲ့တင် ကျနော်တို့က တော်တော်လေး ယုံကြည်အားကိုးလို့ ရပြီပေါ့။ဒါနဲ့
ပဲ ကျနော်တို့ PDFက ကိုယ့်ရဲ့အထက်ကိုယုံကြည်
ပြီး ရှေ့ဆက်နေတာဖြစ်တယ်” ဟုကိုမုန်ပီးက ပြောသည်။

လက်ရှိစစ်ရေးတွင် တောင်တန်းဒေသများကိုတော်
လှန်ရေးအင်အားစုများက ခြုံငုံထိန်းချုပ်နိုင်ခဲ့ပြီဟု ၎င်းကသုံးသပ်ပြောသည်။

“တောင်တန်းဒေသတွေကိုဒီပြည်နယ်တွေကို အမှီ
ပြုပြီးသူတို့ရဲ့ထောက်ပံ့မှုသူတို့ရဲ့ကူညီမှုကို အား
ယူပြီး တော့ ကျနော်တို့ ရှေ့တလှမ်းကို တဆင့်တက်လှမ်းနေကြတာဖြစ်တယ်။ အရင်တုန်းက
တော့ ပြောက်ကျားတို့လူအင်အားဆယ်ဂဏန်း၊ ရာဂဏန်းနဲ့ တိုက်ပွဲဝင်တယ်။ ရှေ့ဆက်မှာတော့ ထောင်သောင်း နဲ့ ချီတဲ့ တိုက်ပွဲဝင်မှုတွေ ပြုလုပ် နိုင်ဖို့၊ ပြုလုပ်လည်းပြုလုပ်နေနိုင်တယ် ပိုမိုအား
ကောင်း အောင်ဆိုတာ ကျနော်တို့ ပြုလုပ်နိုင်ဖို့ အားစိုက်နေကြတာဖြစ်တယ်”ဟုလည်း ကို
မုန်ပီးကပြောသည်။

ကာကွယ်ရေးဝန်ကြီးက ထိုးစစ်ကြီးတရပ်ကို အင်အားထောင်သောင်းချီဖြင့် ပြုလုပ်ကာ စစ်အာဏာရှင်အဆုံးသတ်နိုင်ရေး လုပ်ဆောင်ရန် ရှိကြောင်း မတ်လ ဒုတိယပတ်တွင်တပ်မှူး သင်တန်းတစ်ခုမိန့်ခွန်း၌ ထည့်သွင်း ပြောကြားခဲ့သည်။

လက်ရှိတော်လှန်စစ်ရေးအခြေအနေများကိုသေ
ချာစွာ စူးစမ်းလေ့လာကြည့်ပါကအရမ်းမြင်သာကြောင်း၊ တော်လှန်ရေးသည်ဝှက်ထား၍မရဘဲ အလွန်ပွင့်လင်းမြင်သာကြောင်းကိုမုန်ပီးကဆို
သည်။

“တကယ်ကတော့ ဒီထက်လျှို့ဝှက်သင့်တာတွေအများကြီးပေါ့။ ကျနော်အနေနဲ့ကတော့ NUG ယန္တရားကြီးတခုလုံးမဟုတ်ရင်တောင်မှ ပြည်သူ့ကာကွယ်ရေးတပ်မတော် NUG ယန္တရားတော့ ကျနော်အားလုံးနားမလည်လို့ ပြောတာပါ။ ပြည်သူ့ကာကွယ်ရေးတပ်မတော် PDFဟာ အရှိန်နဲ့သွားနေတယ်။ရှေမှာပိုပြီးတော့ အားကောင်းမောင်းသန်နဲ့သွားနိုင်ဖို့ အားစိုက်နေတယ်ရုန်းနေတယ်။မနားမနေ အားစိုက်နေတယ်ဆိုတာတော့ သေချာတယ်။ ဒါကိုတော့ ကျနော်တို့ လုံး၀ အာမခံတယ်” ဟုကို
မုန်ပီးက ပြောကြားသည်။

သို့ရာတွင်၂၀၂၅ ပြီးရင်ဘာဖြစ်မည်ဆိုသည့် မျှော်
လင့်ချက်ကြီးကြီးမားမား မပြောလို​ကြောင်း ၎င်းက ဆိုသည်။

“ဒါပေမဲ့ သေချာတာကတော့တဆင့်ပြီးတဆင့်တရွေ့ပြီးတရွေ့ရွေ့သွားမယ်ဆိုတာလုံး၀သေချာတယ်”ဟု ကိုမုန်ပီးက ပြောသည်။

အားနည်းချက်များ အားမရခြင်းများရှိသော်လည်း ယခုထက်ပိုအားကောင်းအောင်ကြိုးစားရမည်ဖြစ်
ကြောင်း၎င်း၏ ခံယူချက်ကို​ပြောသည်။

“ပြည်သူ့ကာကွယ်ရေးတပ်မတော်PDF နဲ့ကျန်တဲ့ တိုင်းရင်းသားတပ်ဖွဲ့တွေဟာကျနော်တို့ရဲ့စစ်အရှိန်ကတော့ဘယ်လိုမှ ရပ်တန့်သွားစရာမရှိဘူး။တရွေ့ပြီးတရွေ့ ရွေ့နေတယ်လို့ ယုံကြည်ပါတယ်” ဟု ကိုမုန်ပီးက ပြောပြသည်။

ယခုပြုလုပ်နေသည့် ကဘော်ညီနောင် ကမ်ပိန်းသည် ကလေး၊ တမူးခရိုင်အတွင်းရှိ PDFအဖွဲ့ ၁၄ဖွဲ့အတွက် ရန်ပုံငွေ ရှာဖွေခြင်းဖြစ်ကြောင်း
ရှင်းပြသည်။

ချင်းတွင်းမြစ်နှင့် အိန္ဒိယနယ်စပ်အကြားချိုင့်ဝှမ်းလွင်ပြင်ဒေသဖြစ်သောကဘော်ဒေသသည်အမှတ်
(၁) စစ်ဒေသ၏ အရေးကြီးသည့်ဒေသဖြစ်ပြီး ယင်းဒေသ၌ ကလေးနှင့် တမူးမြို့များ ပါဝင်ကြောင်းဝန်ကြီး ဦးရည်မွန်ကလည်းပြောသည်။ နိုင်ငံရေး၊ နိုင်ငံခြားရေး၊ ကုန်သွယ်ရေးနှင့် စစ်ရေးအရ သမိုင်းတလျှောက် အရေးပါခဲ့သည့် ယင်းကဘော်ဒေသကို လွတ်မြောက်နယ်မြေ ဖြစ်ရေး ဦး
စားပေးဆောင်ရွက်ရန်ရှိကြောင်း ၎င်းက ဆိုသည်။

ကဘော်ချိုင့်ဝှမ်းသည် စစ်ကိုင်းတိုင်းဒေသကြီး အနောက်ပိုင်းတွင်တည်ရှိသည့်ကုန်းမြင့်ချိုင့်ဝှမ်းတစ်ခု ဖြစ်သည်။ အိန္ဒိယနိုင်ငံ၊ မဏိပူရပြည်
နယ်၏ နယ်နိမိတ်နှင့် နီးကပ်စွာ တည်ရှိသည်။

"ကာကွယ်ရေးဝန်ကြီးဌာန အမှတ်(၁)စစ်ဒေသအ
နေနဲ့လည်း ဒီဒေသ ဒီနယ်မြေ လွတ်မြောက်ရေးကို အထူးဦးစားပေးအနေနဲ့ စဉ်းစားဆောင်ရွက်နေတာလည်းရှိတယ်လို့ ပြောရပါမယ်"ဟု ဦးရည်မွန်ကဆို
သည်။

တော်လှန်ရေးအ​စောပိုင်းကတည်းကကာကွယ်ရေး
ဝန်ကြီးဌာန နှင့် မဟာမိတ်တိုင်းရင်းသားတော်လှန်
ရေးအဖွဲ့များဖြစ်သော ကချင် KIA၊ ချင်း CNF/CNA၊ ကရင်နီ KNPP/KA၊ ABSDF တို့ ပါဝင်သော ဗဟိုကွပ်ကဲရေးနှင့် ပေါင်းစပ်ညှိနှိုင်းရေးကော်မတီ(C3C)၏ သဘောတူဆုံးဖြတ်ချက်အရ အမှတ်(၁) စစ်ဒေသကို ၂၀၂၂ နှစ်လယ်ပိုင်း၌ စတင်ဖွဲ့စည်းခဲ့ခြင်းဖြစ်ဟု ရှင်းပြသည်။

ကလေးခရိုင်နှင့် တမူးခရိုင် နှစ်ခုလုံးတွင်နယ်မြေစိုးမိုးထိန်းချုပ်မှုကို PDF တပ်မတော်က အဓိက ရယူထားကြောင်း၊ စစ်ကောင်စီ လုံး၀ ကင်းစစ်ခြင်းမရှိသေးသော်လည်း တနယ်လုံးကို PDFများ ထိန်းချုပ်ထားသည်ဟု ကာကွယ်​ရေးဝန်ကြီးက ရှင်းပြသည်။

PDF ကလေးခရိုင် အမှတ်(၄) တပ်ရင်းတပ်မှူးကိုမုန်ပီး၏ ရှင်းပြချက်တွင်လည်း PDFနှင့် ပကဖ၊ ပလဖ၊ ဒေသကာကွယ်ရေးတပ်ဖွဲ့များ၊ တိုင်းရင်း
သား တော်လှန်ရေးတပ်များ အတူတကွ တိုက်ပွဲဝင်နေကြသည့် လက်နက်ကိုင်တော်လှန်ရေးသည် အရှိန်အဟုန်တဖြည်းဖြည်း မြင့်သထက်မြင့်လာသည်ဟု အသိပေးသည်။

ယခင်ကလက်နက်ဆယ်ဂဏန်းဖြင့် ပြောက်ကျား တိုက်ပွဲများ ဝင်ခဲ့ကြရသော်လည်း ပြီးခဲ့သည့်နှစ်နှစ်တာအတွင်းလူအင်အားရာဂဏန်းအချို့ အသုံး
ပြုပြီး ရန်သူ့စခန်းအချို့ကို သိမ်းနိုင်ခဲ့ဟု ကိုမုန်ပီးက ပြောသည်။

"ဒါပြည်နယ်ဒေသတွေမှာ ဖြစ်ရိုးဖြစ်စဉ်တခုသာဖြစ်ပေမယ့် ၂၀၂၁မှ စပြီးပြန်တော်လှန်ရတဲ့ ပြည်မဒေသ မြေပြန့်ဒေသ လွင်ပြင်ဒေသတွေအတွက်ဆိုရင်တော့ အဆင့်ဆင့်ပြောင်းလဲတိုးတက်မှုပဲဖြစ်တယ်။ ပြီးခဲ့တဲ့ တနှစ်တာကာလလောက်က စပြီး အထူးသဖြင့် စစ်ကိုင်းတိုင်း အမှတ်(၁) စစ်ဒေသနဲ့ ရှမ်းမြောက်ကို အခြေပြုတဲ့ မန္တလေးတိုင်းအတွင်းမှာဆိုရင်လူအင်အားထောင်နဲ့ချီ ၊လက်နက်အင်
အား ထောင်နဲ့ချီ ပါဝင်တဲ့ မြို့သိမ်းတိုက်ပွဲကြီးတွေကို စစ်နယ်ဝန်းတွေကို သိမ်းပိုက်နိုင်တဲ့ တိုက်ပွဲကြီးတွေကို ကျနော်တို့ စတင်ဖော်ဆောင်နိုင်ခဲ့တယ်။ ဒါတွေက ကျနော်တို့ တော်လှန်ရေးရဲ့ အဆင့်ဆင့် တိုးတက်ပြောင်းလဲမှုဖြစ်တယ်”ဟု ကိုမုန်ပီးက ပြောသည်။

၂၀၂၅တွင်လည်း မြေပြန်လွင်ပြင်ဒေသ၌လည်း ရန်သူကိုပြောက်ကျားတိုက်ခိုက်နိုင်ရုံသာမက စစ်ကြောင်းလိုက် ဖြုတ်နိုင်သည့်ဖြစ်စဉ်များ မ
ကြာခဏ မြင်တွေ့ရသည်မှာ အားလုံးအသိပင်ဖြစ်ပြီး မြန်မာပြည်တောင်ဘက်ခြမ်း၌လည်း စစ်တောင်းမြစ်ကို ကျော်လွန်ပြီးရန်သူ့ စခန်း ၅ ခု၊၆ခုကို တပြိုင်တည်း စီးနင်း တိုက်ခိုက်နိုင်သည့် အနေ
အထား မြင်တွေ့ရပြီဖြစ်ကြောင်း၎င်းကပြောသ
ည်။ တချိန်တည်း၌ ရခိုင်ရိုးမကိုကျော်ပြီး မကွေး
တိုင်းထဲ၌ ထင်မှတ်မထားသည့် တိုက်ခိုက်မှုများ ဖော်ဆောင်နိုင်​နေပြီဖြစ်ကြောင်းလည်း တမူးခရိုင်အမှတ်(၄) တပ်ရင်းမှတပ်မှူးကပြောသည်။

စခန်းသိမ်းတိုက်ပွဲတစ်ခုမှ တမူးခရိုင်မှ PDF များ။ဓါတ်ပုံ-တမူးခရိုင်တပ်ရင်း(၄)

■Breaking News

ဇွဲကပင်တောင် တောမီးလောင်​နေ

မတ်-၂၃၊၂၀၂၅။စောတာရာ/People's Spring

ကရင်ပြည်နယ် ၊ဘားအံမြို့မှ နာမည်ကျော် ဇွဲကပင်တောင်တွင် ယနေ့ မတ်လ ၂၃ရက်ညနေမှစ၍ တောမီးလောင်ကျွမ်းပြီး ညအထိ ဆက်လောင်နေသည်။

ဇွဲကပင်တောင်မှ ဝိဇ္ဇာညီနောင် နှင့် နွားလဘို့လျှိုထဲမှ ညနေ ၃နာရီခန့်တွင် စတင်းလောင်ကျွမ်းခြင်းဖြစ်ကြောင်း ဒေသခံတစ်ဦးကပြောသည်။

"အခုထိလောင်နေတယ်။မီးပိုများလာတယ်။တောင်ပေါ်ကို ဖုန်းဆက်တာလည်း မရဘူးဖြစ်နေတယ်။အဝေးကလှမ်းမြင်ရတာ ကြောက်စရာပဲ"ဟု ယင်းဒေသခံက ပြောသည်။

ဒေသခံက လူမှုကွန်ရက်တွင် တင်ထားသည့် ဓာတ်
ပုံ၌ တောမီးမှာ မီးများနေသည်ကို တွေ့ရသည်။

ဇွဲကပင်တောင်သည် ၂၃၇၂ ပေအမြင့်ရှိပြီး ခရီး
သွားများအပြားလာရောက်လေ့လာလည်ပတ်သည့်နေရာဖြစ်သည်။ နှစ်စဉ်တောမီးလောင်ကျွမ်း​​​လေ့ရှိပြီး ယခုမီးလောင်ကျွမ်းမှုသည် ဆိုးရွားနေ
သည်ဟု ဒေသခံတစ်ဦးကပြောသည်။ ညနေ ၃နာရီခန့်မှစတင်လောင်ကျွမ်းခြင်းဖြစ်သော်လည်း မတ်လ ၂၃ ရက်ည ၉နာရီခန့်အထိ မြန်မာနိုင်ငံမီးသတ်တပ်ဖွဲ့က သတင်းထုတ်ပြန်ထားခြင်းမရှိသေးပေ။

တောင်ပေါ်တွင် တောင်တက်ခရီးသွားအချို့ရှိနေပြီး ၎င်းတို့၏အခြေအနေကိုမသိရသေးကြောင်း ဒေသခံတစ်ဦးကပြောသည်။