PHOTO NEWS

မြို့ပျက်ကြီးသဖွယ်မြင်တွေ့ရသည့် ကော့ကရိတ်မြို့

ကရင်ပြည်နယ်၊ ကော့ကရိတ်မြို့တွင် ဖေဖော်ဝါရီ ၂၁ ရက်က တိုက်ပွဲဖြစ်ပွားပြီးနောက် နေအိမ် များ မီးလောင်ပျက်စီးခဲ့ပြီး မြို့ပျက်ကြီးသဖွယ်မြင်တွေ့ရသည်။ ဖေဖော်ဝါရီ ၂၁ရက် ညနေ ၅ နာရီမှစ၍ ည ၁၀နာရီဝန်းကျင်အထိ ကော့ကရိတ်မြို့ အမှတ် (၇) ရပ်ကွက်အနီးတွင် စစ်ကောင်စီတပ်နှင့် ကရင်အမျိုးသားလွတ်မြောက်ရေးတပ်မတော်(KNLA) ပူးပေါင်းတပ်အကြား တိုက်ပွဲဖြစ်ပွားခဲ့ပြီး အဆိုပါတိုက်ပွဲအတွင်း လက်နက်ကြီးများဖြင့် ပစ်ခတ်ရာမှ အမှတ် (၄)ရပ်ကွက်၊ အထက်ရွာ၊ ရှုခင်းသာလမ်း၊ တောင်သူစုနှင့် အမှတ်(၇)ရပ်ကွက်တို့မှ နေအိမ်များပျက်စီးခဲ့ရသည်။ အဆိုပါ တိုက်ပွဲဖြစ်ပြီးနောက် မြို့ပျက်ကြီးသဖွယ်ဖြစ်နေသော ကော့ကရိတ်မြို့၏ ယမန်နေ့(ဖေဖော်ဝါရီ ၂၃ရက်)က တွေ့ရသည့်မြင်ကွင်းများကို ဖော်ပြလိုက်ပါသည်။


ဓာတ်ပုံ - Yebaw Shanlay/FB

ငါန်းဇွန်တွင် PDF ရှိ၊မရှိ တစ်အိမ်တက်ဆင်း လိုက်ရှာနေသည့် စစ်ကောင်စီတပ်အား PDFများ တိုက်ခိုက်

အင်ကြင်း/People's Spring

မန္တလေးတိုင်း၊ ငါန်းဇွန်မြို့နယ်တွင် တစ်အိမ် တက်ဆင်း PDF ရှိ၊မရှိ လိုက်ရှာနေသည့် စစ် ကောင်စီတပ်အား PDFများက မိုင်းဆွဲတိုက်ခိုက်ခဲ့ကြောင်း သတင်းရရှိသည်။

ယမန်နေ့ (ဖေဖော်ဝါရီ၂၃ ရက်) နံနက် ၇ နာရီ မိနစ် ၂၀ခန့်က ငါန်းဇွန်မြို့နယ်၊ ဆင်တပ်ကျေးရွာမှ ထွက်လာသော အင်အား၄၀ပါ စစ်တပ်နှင့်ပျူစောထီးများအား မိုင်းဆွဲတိုက်ခိုက်ခဲ့ခြင်းဖြစ်သည်။

"ငါန်းဇွန်နယ် ထိုးလာတဲ့ ပျူစစ်ကြောင်းပါ။ မိုင်းမိလို့ ၇ကောင်လွင့်သွားတယ်။"ဟု CDSOM အဖွဲ့မှ ကိုနွေဦး(မြောင်)က ဆိုသည်။

မိုင်းဆွဲတိုက်ခိုက်မှုကြောင့် လေးဦးထက်မနည်း သေဆုံးနိုင်ကြောင်း ပြည်တော်ဝင်ပျောက်ကြားတပ်ဖွဲ့က ခန့်မှန်းသည်။ စစ်အုပ်စု၏ ထိခိုက်သေဆုံးမှုကိုမူ လူထုနွေဦးက သီးခြားအတည်ပြုနိုင်ခြင်း မရှိသေးပေ။

ငါန်းဇွန်မြို့မှ အင်အား ၈၀ ခန့်နှင့် (၆၀)မမ အထိုင်ပါ ကားတစ်စီးဆင်းလာ၍ ပြန်လည် ဆုတ်ခွာခဲ့ရကြောင်း ဒေသကာကွယ်ရေးအဖွဲ့များက ပြောသည်။

အဆိုပါ စစ်ဆင်ရေးကို ပြည်တော်ဝင် ပြောက်ကျားတပ်ဖွဲ့၊ CDSOM-ငါန်းဇွန်တပ်ခွဲ (NRF)၊ ငါန်းဇွန် ပကဖတို့ ပူး‌ပေါင်း တိုက်ခိုက်ခဲ့ခြင်းဖြစ်သည်။

စစ်ကောင်စီတပ်သည် ဖေဖော်ဝါရီ ၁၉ ရက်မှစတင်ကာ ငါန်းဇွန်မြို့နယ်အတွင်းရှိ နတ်စိမ်း၊ ရွာသာ၊ ၊ ဂျို၊ သံကုန်း၊ ငါန်းလွန့်သပြေသာ၊ ကုလ၊ ရွာသစ်၊ ဆင်တပ် စသည့် ကျေးရွာများအား ဝင်ရောက်ကာ တစ်အိမ်တက်ဆင်း PDF ရှိ၊မရှိ၊ PDFများအား ဆက်သွယ်ခြင်း၊ ထောက်ခံခြင်း၊ ထောက်ပံ့ခြင်းများ မပြုလုပ်ရန် ပြောဆိုသွားကြောင်း ဒေသခံများက ပြောသည်။

(တိုက်ခိုက်ရာတွင် အသုံးပြုခဲ့သောမိုင်းများအား တွေ့ရစဥ်။ ဓာတ်ပုံ-ပြည်တော်ဝင်ပျောက်ကြားတပ်ဖွဲ့)

| ကဗျာ |

“လူဖြစ်ဖို့ အလံဖြူ”

▪︎မောင်မိုးအေး

အလံဖြူထောင်ပါ
လက်နက်ချပါ
လူသားဆန်မှုကို
ထိတွေ့ခံစားပါ
ကြောက်ရွံ့ခြင်းဆီက
လွတ်ကင်းရမှုဟာ
သိပ်အဓိပ္ပါယ်ရှိတယ်
ငါတို့က လူသားဆန်ပြီး
မင်းတို့ကိုလည်း
လူဖြစ်ခွင့် ရစေချင်တယ်
အမှန်တရားရှေ့မှာ
လက်နက်ချခြင်းဟာ
သတ္တိရှိခြင်း
လူစစ်စစ်ဖြစ်ခြင်းပါပဲ
လက်နက်ချပြီး
သတ္တိရှိပြလို့ရတဲ့ ကာလမှာ
လူသားဆန်မှုကို
ထိတွေ့ခံစားပါ
ငါတို့က လူသားဆန်ပြီး
မင်းတို့ကိုလည်း
လူဖြစ်ခွင့် ရစေချင်တယ်။

( "The Call - ​ခေါ်သံ" အွန်လိုင်းမဂ္ဂဇင်းမှာ ဖော်ပြခဲ့တဲ့ ​
​မောင်မိုး​အေး ရဲ့ "လူဖြစ်ဖို့ အလံဖြူ" ကဗျာကို People's Spring က ပြန်လည်​ဖော်ပြ​ပေးတာ ဖြစ်ပါတယ်။ ​အနုရသကဲပြီး တော်လှန်​ရေးအတွက် အ​ထောက်အကူပြုတဲ့ စာ​ပေကဏ္ဍမျိုးစုံကို "The Call - ​ခေါ်သံ" အွန်လိုင်းမဂ္ဂဇင်းရဲ့ ​Facebook Page ဖြစ်တဲ့ -
https://www.facebook.com/profile.php?id=100087677882749&mibextid=2JQ9oc မှာလည်း သွား​ရောက်ဖတ်ရှုနိုင်ပါတယ်။)

မန္တလေးပတ်စ်ပို့ရုံး ပြည်သူနှစ်ဦးသေဆုံးပြီးနောက် အွန်လိုင်းဘွတ်ကင်စနစ် ပြောင်းလဲ

အင်ကြင်း/People's Spring

မန္တလေးမြို့ရှိ နိုင်ငံကူးလက်မှတ်ထုတ်​ပေး​ရေးရုံး(ပတ်စ်ပို့ရုံး)တွင် ပြည်သူနှစ်ဦး လူပိ၍ သေဆုံးပြီးနောက် အွန်လိုင်းဘွတ်ကင်စနစ် ပြောင်းလဲအသုံးပြုမည်ဟု သတင်းရရှိသည်။

ဖေဖော်ဝါရီ ၁၉ ရက်က မန္တလေးမြို့ပတ်စ်ပို့ရုံး၌ တန်းစီရင်း အမျိုးသမီးနှစ်ဦး လူပိသေဆုံးပြီးနောက် ၆ရက်အကြာတွင် အွန်လိုင်းဘွတ်ကင်စနစ် ပြောင်းလဲအသုံးပြုမည်ဟု စစ်ကောင်စီ၏ ပတ်စ်ပို့ရုံးဝက်ဘ်ဆိုက်က ကြေညာသည်။

မနက်ဖြန် ဖေဖော်ဝါရီလ ၂၅ ရက်နေ့ နံနက် ၉ နာရီမှစ၍ ပတ်စ်ပို့ရုံး၏ အင်တာနက်ဝက်ဘ်ဆိုက်တွင် အွန်လိုင်းဘွတ်ကင်စနစ်ဖြင့် ကြိုတင်စာရင်းသွင်းနိုင်မည်ဟု အသိပေးသည်။

သို့သော် လက်ရှိတွင် ရောက်လက်စ လူတန်းကြီးမှာ တန်းစီနေ​ဆဲဖြစ်ကြောင်း ရုံးအနီးရောက်ရှိနေသူများက ပြောသည်။

"ညကို ရုံးထဲသွင်းမယ်တဲ့။ခု ၄၀၀လောက်ရှိတယ်။ ၆၀၀ လောက် သွင်းမယ်ကြားတယ်။"ဟု ပတ်စ်ပို့လုပ်ကိုင်နေသူတစ်ဦးက ဆိုသည်။

မန္တလေးမြို့အပြင် ပုသိမ်၊ နေပြည်တော်၊ ပဲခူးရုံးခွဲတို့၏ ပတ်စ်ပို့လုပ်ငန်းများကိုလည်း ဝက်ဘ်ဆိုက်၌ ကြိုတင် စာရင်းသွင်းနိုင်သည်ဟု စစ်ကောင်စီက ဆိုသည်။

သို့သော် သက်ဆိုင်ရာ ပြည်နယ်နှင့်တိုင်း အိမ်ထောင်စု စာရင်းဝင်သူများမဟုတ်ပါက ဘွတ်ကင်ရသော်လည်း ဆောင်ရွက်ပေးမည် မဟုတ်ဟု သိရသည်။

အာဏာသိမ်းပြီးနောက် ပြည်တွင်း၌ အကျပ်အတည်းမျိုးစုံ ရင်ဆိုင်နေရသည့် လူငယ်များသည် ပြည်ပနိုင်ငံများသို့ထွက်ကာအလုပ်လုပ်​နိုင်ရေး ပတ်စ်ပို့ရရှိရန် စစ်​ကောင်စီ၏ နိုင်ငံကူးလက်မှတ်ထုတ်​ပေး​ရေးရုံးများ၌​ နေ့စဥ် လူ​ထောင်ချီ တန်းစီတိုးဝှေ့ကာ ဝင်နေရသည်။

ထိုအ​ခြေအ​နေတွင် အာဏာသိမ်းစစ်​ကောင်စီက စစ်မှုမထမ်းမ​နေရ ဥပ​ဒေထုတ်ပြန်လိုက်​သောအခါ နိုင်ငံမှ လူငယ်များ ပြည်ပသို့သွား​ရောက်ရန် အလုအယက်ကြိုးစား​နေကြပြီး ပတ်စ်ပို့ရုံးများတွင် နေစဥ်လူ​ထောင်ချီ တိုး​​ဝှေ့​လျှောက်ထား​နေကြသည်ဟု ပက်စ်ပို့ဝန်​ဆောင်မှု​ပေး​နေသူအချို့က​ ပြောသည်။

(၂၀၂၄ ဇန်နဝါရီ ၈ရက်က မန္တလေးမြို့ပတ်စ်ပို့ရုံး​ရှေ့၌ စောင့်ဆိုင်းခဲ့သူများအား တွေ့ရစဥ်။ ဓာတ်ပုံ - CJ)

ကလေးမြို့တိုက်ပွဲကာကွယ်ရေးတပ်များ စခန်းသုံးခု သိမ်းပိုက် ၊နှစ်ဖက် ထိခိုက်ကျဆုံးမှုများ

စောနွေဦး/People's Spring

စစ်ကိုင်းတိုင်း၊ ကလေးမြို့တွင် ဖေဖော်ဝါရီ ၂၁ရက်က စတင်သောတိုက်ပွဲအတွင်း ကာကွယ်ရေးတပ်ဖွဲ့များက စခန်းသုံးခုသိမ်းပိုက်နိုင်ခဲ့ပြီး နှစ်ဖက်ထိခိုက်ကျဆုံးမှုများရှိခဲ့သည်။

ကလေးမြို့တောင်ပိုင်းနှင့် မြောက်ပိုင်းရှိ စစ် ကောင်စီစခန်း သုံးခုကို ကာကွယ်ရေးတပ်ဖွဲ့ ၁၆ဖွဲ့က ဖေဖော်ဝါရီ ၂၁ရက်တွင် စတင်တိုက်ခိုက်သိမ်းပိုက်ခဲ့ပြီး စစ်ကောင်စီတပ်ဘက်မှ ဗိုလ်ကြီးအဆင့်အပါအဝင် စစ်သားအများအပြားသေဆုံးခဲ့ကြောင်း ကာကွယ်ရေးတပ်ဖွဲ့ဝင်များထံမှ သိရသည်။

ထို့အပြင် စစ်ကူလာသည့် စစ်ကောင်စီတပ်များကိုလည်း မိုင်းဆွဲခြင်းနှင့် ဒရုန်းဖြင့် ဗုံးသီးချ တိုက်ခိုက်ခဲ့၍ စစ်ကောင်စီတပ်သား ၄၀ကျော် သေဆုံးခဲ့သည်ဟု ကာကွယ်ရေး ရဲဘော်များက ပြောသည်။

တိုက်ပွဲအတွင်း အရပ်သား ၆ ဦးလည်း စစ်ကောင်စီလက်နက်ကြီးထိမှန်၍ သေဆုံးခဲ့ကြောင်းလည်း ဒေသခံများထံမှ သိရသည်။ အဆိုပါ အရပ်သား ၆ဦးတွင် ကလေးငယ် နှစ်ဦးနှင့် မိသားစု သုံးဦးပါဝင်ကြောင်း ကလေးမြို့ခံတစ်ဦးက ပြောသည်။

ကလေးမြို့နယ်ရှိ စက္ကန့်ကျေးရွာရှိ စစ်ကောင်စီစခန်းကို ဖေဖော်ဝါရီ ၂၂ရက်တွင် တော်လှန်ရေးပူးပေါင်းတပ်များက တိုက်ခိုက် သိမ်းပိုက်နိုင်ခဲ့ပြီး ကျေးရွာတွင် စစ်ကောင်စီတပ်နှင့် ပျူစောထီးများစခန်းချထားသည့် ကျေးရွာတစ်ရွာ ဖြစ်သည်။ကလေးမြို့မြောက်ပိုင်းရှိ ကံကြီးရွာစခန်းနှင့် ကံသာယာရွာ စခန်းတို့ကိုလည်း ကာကွယ်ရေးတပ်များက တိုက်ခိုက်သိမ်းပိုက်ခဲ့သည်။

ထို့အပြင် ချင်းအမျိုးသားအဖွဲ့ချုပ်/ချင်းအမျိုးသားကာကွယ်ရေးတပ်ဖွဲ့(CNO/CNDF)မှ ဒုစစ်ဦးစီးချုပ်အပါအဝင် ရဲဘော် သုံးဦးကမှာ စစ်ကောင်စီတပ်နှင့်ပျူစောထီးများ​၏ ဖမ်းဆီးသတ်ဖြတ်မှုခံရကြောင်း အဆိုပါတပ်ဖွဲ့တာဝန်ရှိသူများထံမှ သိရသည်။

ဒုစစ်ဦးချုပ်နှင့်ရဲဘော်များသည် ဖေဖော်ဝါရီ ၂၃ ရက် နံနက် ၉ နာရီကျော်က ကလေးမြို့၊အောင်သာယာကျေးရွာအနီးတွင် စစ်ကောင်စီစစ်ကြောင်းနှင့် တိုး၍ ဖမ်းဆီးသတ်ဖြတ်မှု ခံလိုက်ရခြင်းဖြစ်သည်။

“သူတို့ကျတာ မှန်ပါတယ်။ အခြားရဲဘော်တစ်ဦးလည်းတိုက်ပွဲမှာ ကျပါသေးတယ်”ဟု CNO/CNDF တာဝန်ရှိသူတစ်ဦးက ပြောသည်။

ကျဆုံးခဲ့သူများမှာ CNDFစစ်ဦးချုပ် ဆလိုင်းဒေးဗစ်နယူး၊ ရဲမေ ရွှေနွမ်ကိမ်နှင့် ရဲဘော် အေမောစ်ဗန်နိုက်လျန်ဖြစ်သည်ဟု Falam Regional Committeeက အသိပေးထုတ်ပြန်ထားသည်။

လက်ရှိအချိန်ထိ ၎င်းတို့ရုပ်အလောင်းများပြန်လည်ရရှိခြင်းမရှိသေးကြောင်းလည်း CNDF တာဝန်ရှိသူများက ပြောသည်။ အောင်သာယာကျေးရွာသည် ပျူစောထီးနှင့် စစ်ကောင်စီတပ်များ ကြီးစိုးထားသည့် ကျေးရွာတစ်ရွာ ဖြစ်သည်။

ထို့အပြင် ဖေဖော်ဝါရီ ၂၂ရက်က စက္ကန့်ရွာတိုက်ပွဲတွင် CNDFမှရဲဘော် ဆလိုင်းမန်ပူသည် မိုင်းနင်းမိ၍ ကျဆုံးခဲ့ရကြောင်းလည်း CNDFတာဝန်ရှိသူများက ပြောသည်။

စစ်ကောင်စီတပ်က ဖေဖော်ဝါရီ ၂၁ ရက်မှစတင်ပြီး ကလေးမြို့ တာဟန်းရပ်ကွက်၊ ကြို့သုံးပင်၊မွန်းလိုင်ရပ်ကွက် စသည့်တို့ကို လက်နက်ကြီးများဖြင့် ရမ်းသမ်းပစ်ခတ်နေသည်။

ထပ်မံရရှိ​သော သတင်းများအရ ကလေးမြို့နယ်အတွင်း ​ဖေ​ဖော်ဝါရီ ၂၄ ရက်ညအထိ တိုက်ပွဲဆက်ဖြစ်နေပြီး နယ်မြေချင်းထိစပ်နေသော ဂန့်ဂေါမြို့နယ်မှ ပြည်သူ့ကာကွယ်ရေးတပ်ဖွဲ့များကပါ ပူး​ပေါင်းတိုက်ခိုက်နေကြောင်း သိရသည်။