မောင်တော ရန်အောင်ပြင် စစ်ကောင်စီစခန်းကို AA ထပ်မံ သိမ်းပိုက်

▪︎မင်းပြားတိုင်းဗဟို လေ့ကျင့်ရေးကျောင်း၊ ပုဏ္ဏားကျွန်း ခမရ(၅၅၀) တို့အား ရရှိရေးဆက်လက် ထိုးစစ်ဆင်နေဟု အသိပေး

ရှိုင်း/People’s Spring

ရက္ခိုင်ပြည်နယ် မောင်တောမြို့နယ်ရှိ စစ်ကောင်စီ စခန်းတစ်ခုကို ဖေဖော်ဝါရီ ၂၃ရက်တွင် ထပ်မံ သိမ်းပိုက်ခဲ့ကြောင်း ရက္ခိုင့်တပ်တော်(AA)က သတင်းထုတ်ပြန်သည်။

ယမန်နေ့၌ ရက္ခိုင်ဒေသအတွင်း တိုက်ပွဲများ ဆက်ရှိနေခဲ့ပြီး AAက သတ်မှတ်ထားသော စစ်ဆင်ရေးပစ်မှတ်များကို ဆက်လက်ချေမှုန်း ထိုးစစ်ဆင် တိုက်ခိုက်ခဲ့ကြောင်း၊ လက်နက်ချအညံ့မခံသေးသော ကျန်ရှိနေသေးသည့် စခန်းများကို ဆက်လက် သိမ်းပိုက်ရယူရေး ကြိုးပမ်းနေကြောင်း ဖော်ပြသည်။

AA အနေဖြင့် ပုဏ္ဏားကျွန်း၊ ရသေ့တောင်၊ ဘူးသီးတောင်၊ မောင်တော၊ မင်းပြား မြို့များ၌ရှိသော လက်နက်ချအညံ့မခံသည့် အကြမ်းဖက် စစ်ကောင်စီ၏ စစ်စခန်းများကို ထိုးစစ်ဆင်လျက်ရှိရာ မောင်တောမြို့၊ ရန်အောင်ပြင် ကင်းစခန်း အား ဖေဖော်ဝါရီလ (၂၃) ရက် နေ့လည်ပိုင်း၌ သိမ်းနိုင်ခဲ့သည်ဟုသိရသည်။

အဆိုပါ တပ်စခန်းကို မနက် ၇နာရီခွဲတွင် စတင်ထိုးစစ်ဆင်ခဲ့ရာ ၅နာရီခန့်အကြာ၌ သိမ်းနိုင်ခဲ့ကြောင်း၊ အဆိုပါ စခန်း ပတ်ဝန်းကျင်ရှိ လက်ကျန်စခန်းများကိုလည်း ဆက်လက်ထိုးစစ်ဆင် တိုက်ခိုက်သိမ်းပိုက်သွားမည်ဖြစ်ကြောင်း AAက ထုတ်ပြန်သည်။

မင်းပြားမြို့နယ်၌ တစ်ခုတည်းသော စစ်​ကောင်စီ၏ လက်ကျန်စခန်းဖြစ်သော ကမ်းနီရွာအနီးရှိ စစ်ကောင်စီ ၏ အမှတ် (၉) တိုင်းဗဟိုလေ့ကျင့်ရေး သင်တန်းကျောင်း ကို AAက ဆက်လက် ထိုးစစ်ဆင်နေကြောင်း အသိပေးသည်။ အဆိုပါ တပ်စခန်းကို တိုက်ခိုက်နေသည်မှာ တစ်ပတ်နီးပါးကြာပြီဖြစ်သည်။

ပုဏ္ဏားကျွန်းမြို့မှ ခမရ (၅၅၀) ကိုလည်း ရက္ခိုင့်တပ်တော်မှ ထိုးစစ်ဆင်တိုက်ခိုက်လျက်ရှိသည်ဟု အသိပေးသည်။

စစ်ကောင်စီသည် ရမ်းဗြဲမြို့အား လေကြောင်းမှ ဗုံးကြဲတိုက်ခိုက်ခြင်းများကို ယခင်နေ့များနည်းတူ ဆက်လက်ပြုလုပ်နေခဲ့သည်ဟုလည်း ဖော်ပြသည်။ စစ်ကောင်စီသည် ရမ်းဗြဲမြို့ကို လေကြောင်း ၊ လက်နက်ကြီး တိုက်ခိုက်မှုများ နေ့စဉ် ပြုလုပ်နေခြင်းဖြစ်ပြီး စျေး၊ ဆေးရုံ အပါအဝင် နေအိမ် အဆောက်အဦးများစွာ ပျက်စီးမှု ဖြစ်ခဲ့သည်ဟု AAက အသိပေးထားသည်။

ရက္ခိုင့်တပ်​တော်က ပလက်ဝ​ဒေသ တစ်ခုလုံးနှင့်​ပေါက်​တော၊ ​မြောက်ဦး၊​ကျောက်​တော်၊ မင်းပြား၊ ​မြေပုံမြို့များကို သိမ်းပိုက်ထိန်းချုပ်ထားသည်။

ထိုအပြင် ပုဏ္ဏားကျွန်း ၊ရ​သေ့​တောင် ၊​ဘူသီး​တောင် ၊မောင်​တော မြို့များရှိ စစ်​ကောင်စီတပ်စခန်းများကို AAကထိုးစစ်ဆင်တိုက်ခိုက်​နေသည်။ ရမ်းဗြဲ ၊ကျောက်ဖြူ ၊စစ်​တွေ ၊ အမ်း မြို့နယ်တို့တွင်လည်းတိုက်ပွဲ​များဖြစ်​​နေပြီး စစ်​ကောင်စီခွာစစ်ပြင်​လာ​နေ​ကြောင်းအသိ​ပေးထားသည်။

“ထွက်လာမယ့်သူတွေအနေနဲ့ တရားဝင်နည်းလမ်းနဲ့ လာဖို့ အရင်ဆုံးစဥ်းစားသင့်ပါတယ်”ဟုထိုင်းရောက်မြန်မာလုပ်သားများအရေးဆောင်ရွက်နေသူ ထိုင်းနိုင်ငံတောင်ပိုင်းခြေစိုက် ပညာရေးနှင့် ဖွံ့ဖြိုးတိုးတက်ရေးဖောင်ဒေးရှင်း(FED)ဒါရိုက်တာဦးထူးချစ်က ပြောသည်။ တရားဝင်နည်းလမ်းဖြင့် လာရောက်ရန် အခွင့်အရေးမရှိပါက တရားမဝင်လုပ်သားများခေါ်ဆောင်ပေးသည့် ယုံကြည်စိတ်ချရသော ပွဲစားဆိုသူများနှင့် ချိတ်ဆက်ဆောင်ရွက်သင့်ကြောင်း ဦးထူးချစ်က အကြံပြုသည်။

“ထိုင်းနိုင်ငံထဲမှာ အထောက်အထားရှိပြီး အလုပ်လက်မဲ့ဖြစ်နေတဲ့သူတွေ သိန်းနဲ့ချီရှိတယ်။ အထောက်အထား မရှိတဲ့ လူဦးရေကလည်း တစ်သန်းကျော်ရှိနေတယ်”ဟု ကိုရဲမင်းက လည်းပြောသည်။ ထို့အပြင် တရားဝင်အထောက်အထားဖြင့် လာရောက်ပါကလည်း အလုပ်ရရန် မသေချာ​ကြောင်း ကိုရဲမင်းက ပြောသည်။“တရားဝင်တွေတောင် သိန်းနဲ့ချီ အလုပ်လက်မဲ့တွေဖြစ်နေတာ” ဟုဦးရဲမင်းက ဆက်ပြော
သည်။

အလုပ်အကိုင်အတွက် ခက်ခဲမှုရှိနိုင်ပြီး အလုပ်မရွေးပါကမူ အဆင်ပြေနိုင်ဟုလည်း ဦးထူးချစ်က ဆိုသည်။

​ဆောင်းပါးအပြည့်အစုံ >>>


https://www.ludunwayoo.com/feature-mm/2024/02/23/89590/

"အဲဒါ ပြည်သူလူထုက မြေပြင်ပေါ်က ထိတွေ့နေတဲ့ သူများ သက်သေဖြစ်ပါတယ်။ ကျနော်တို့က ပါတယ်၊ မပါဘူး မပြောချင်ပါဘူး။ ကျနော်တို့က ပါလို့ရှိရင် အားလုံးပါမှာ။ အနည်းအကျဉ်းကတော့ ပါမှာ မဟုတ်ဘူး။ အားလုံး တစ်နိုင်ငံလုံးအတိုင်းအတာ အဆင့်နဲ့ ကျနော်တို့ ပါမယ်"။

"ကျနော်တို့က အတူယှဉ်တွဲနေထိုင်ရေး၊ စစ်မှန်တဲ့ဖက်ဒရယ်ဒီမိုကရေစီ ပြည်ထောင်စု ပေါ်ထွန်းရေး၊ အာဏာရှင်စနစ်ကို အမြန်ဆုံးပြုပြင်ပြောင်းလဲရေးပေါ့ အဲဒါကို ကျနော်တို့ လိုလားတယ်။ တစ်နိုင်ငံလုံးအတိုင်းအတာ နိုင်ငံရေးနဲ့ပတ်သက်ပြီး အပြုသဘောဆောင်တဲ့ဟာကိုပဲ လုပ်သွားချင်တယ်။ ဘာမဆိုပေါ့"

အပြည့်အစုံ >>>

-SSPPပြောရေးဆိုခွင့်ရှိသူဗိုလ်မှူးကြီးစိုင်းဆုနှင့်မေးမြန်ခန်း


https://www.ludunwayoo.com/interviews-mm/2024/02/23/89598/

ကံထူးမရွာနယ်​မြေရဲစခန်းသိမ်း တိုက်ပွဲတိုက်ခိုက်ခံရပြီးနောက် စစ်တပ်က ရွာကို မီးရှို့ဖျက်ဆီး

အောင်ဇေယျ/People's Spring

စစ်ကိုင်းတိုင်း၊တန့်ဆည်မြို့နယ်ရှိ ကံထူးမကျေးရွာစခန်းသိမ်းတိုက်ပွဲပြီးနောက် စစ်ကောင်စီတပ်က ရွာကို မီးရှို့ဖျက်ဆီးခဲ့ကြောင်း သတင်းရရှိသည်။

ပြီးခဲ့သည့် ဖေဖော်ဝါရီ၂၁ ရက် နံနက်အ​စောက တန့်ဆည် မြို့နယ်၊ ကံထူးမကျေးရွာရဲစခန်းကို ဒေသကာကွယ်ရေးအဖွဲ့များက သွားရောက်တိုက်ခိုက်သိမ်းပိုက်ခဲ့သည်။ စစ်​ကောင်စီက ​လေ​ကြောင်းပစ်ကူ​ပေးသည့်ကြားမှ ​တော်လှန်​ရေးအဖွဲ့များကစခန်းကို သိမ်းပိုက်နိုင်ခဲ့သည်။

စခန်းအား ကာကွယ်ရေးတပ်ဖွဲ့များက နံနက် ၂ နာရီမှစတင်တိုက်ခိုက်သိမ်းပိုက်ပြီး မီးရှို့ဖျက်ဆီးခြင်းဖြစ်သည်။စစ်ကောင်စီကလည်း ​ဖေ​ဖော်ဝါရီ ၂၁ ရက် နံနက် ၈ နာရီ ၁၂ မိနစ်အထိ ဂျက်ဖိုက်တာ နှစ်စီးဖြင့် အကြိမ်​ရေများစွာပစ်ခတ်၊ဗုံးကြဲတိုက်ခိုက်ခဲ့ ကြောင်းPDF တစ်ဦးက​ပြောသည်။

စစ်​ကောင်စီတပ်မှ ၃၀ ဦးဝန်းကျင်​သေဆုံးပြီး လက်နက် ၂၀ ခန့်သိမ်းဆည်းရရှိ​ကြောင်း ​တော်လှန်​ရေးအဖွဲ့များက​ပြောသည်။အဆိုပါတိုက်ပွဲအတွင်း ပြည်သူ့ကာကွယ်ရေးရဲဘော်အချို့လည်း ထိခိုက်ဒဏ်ရာရရှိခဲ့ရာ ဒဏ်ရာပြင်းထန်သည့် ရဲဘော် လေးဦး ကျဆုံးခဲ့ကြောင်း တန့်ဆည်အခြေစိုက်(ပကဖ) ရဲဘော်တစ်ဦးက ပြောသည်။

"စခန်းက ရတယ်။ ရတဲ့အချိန်မှာဒိီကောင်တွေက မြေပြင်စစ်ကြောင်းကော ဝေဟင်ကော ကံထူးမကိုလာတာ။ အဲအချိန်မှာ တိုက်ပွဲအပြင်းအထန် ဆက်ဖြစ်တာ။ သူတို့ဘက်ကလည်း အကျအဆုံးများတယ်။ ကျွန်တော်တို့ဘက်ကတော့ ဒဏ်ရာရပြီး ကျဆုံးတာအပါအဝင် ရဲဘော် လေးဦးကျတယ်။ အဲစစ်ကြောင်းက အခုကံထူးမမှာပဲရှိသေးတယ်။"ဟု ပကဖရဲဘော်က ​ပြောသည်။

ကံထူးမကျေးရွာသို့ စစ်ကောင်စီစစ်ကြောင်းအပြင် ကန့်ဘလူနယ်ဘက်မှ သင်္ကန်းဝတ် လက်နက်ကိုင် ဝါသဝ၏ ပျူစောထီးအဖွဲ့များလည်း ရောက်ရှိနေကြောင်း ဒေသတွင်းတော်လှန်ရေးအင်အားစုများထံမှ သိရသည်။

အဆိုပါ စစ်ကြောင်းများသည် ဖေဖော်ဝါရီ ၂၃ ရက် ညနေပိုင်းတွင် ကံထူးမကျေးရွာရှိ နေအိမ်အများအပြားအား နှစ်ဖွဲ့ခွဲကာ မီးရှို့ဖျက်ဆီးခဲ့ကြောင်း ဒေသခံများက ပြောသည်။

ကံထူးမနယ်မြေရဲစခန်းရှိသည့် ကံထူးမရွာသည် တန်ဆည်နှင့် ရေဦး မြို့ကြား၌ သည်ရှိသည်။

ထို့ကြောင့် တန့်ဆည်နယ်ရှိ ကျေးရွာ ၂၀ ကျော်မှ ပြည်သူထောင်နှင့်ချီ ထွက်ပြေးတိမ်း​ရှောင်နေရကြောင်း သတင်းရရှိသည်။ ရဲစခန်းသိမ်းတိုက်ပွဲဖြစ်ပွားစဥ်ကတည်းက ​ကျေးရွာ ၁၀ ရွာခန့်ထွက်​ပြေးရာမှ စစ်တပ်နှင့် ပျူစစ်​ကြောင်း​ထပ်မံရောက်လာပြီး အကြမ်းဖက်​နေ​သော​ကြောင့် ပြည်သူများထပ်မံထွက်​ပြေး​နေရခြင်းဖြစ်​ကြောင်း ​ဒေသခံအချို့က​​ပြောသည်။

(ကံထူးမရွာရှိ နေအိမ်များအား စစ်တပ်က မီးရှို့ဖျက်ဆီးသွားစဥ်။ (ဓာတ်ပုံ-Local PDF)

ကံထူးမရွာရှိ နေအိမ်များအား စစ်တပ်က မီးရှို့ဖျက်ဆီးသွားစဥ်။ (ဓာတ်ပုံ-Local PDF)

ဟိုပုံးမြို့နယ်ရှိ စစ်ကောင်စီ စခန်းတစ်ခုကို PNLA သိမ်းပိုက်၊ RPG၊ ပစ္စတို နှင့်ခဲယမ်းအချို့သိမ်းဆည်းရရှိ

▪︎တိုက်ပွဲမဖြစ်ဘဲ ဆီဆိုင်မြို့ကို လေကြောင်း တိုက်ခိုက်၊ဟိုပုံးမဲနယ်တောင်ဒေသကို စစ်​ကောင်စီကလက်နက်ကြီးဖြင့် အကြိမ် ၁၀၀နီးပါးပစ်ခတ်

ဟန်နွေ/People’s Spring

ရှမ်းတောင် ပအိုဝ်းဒေသ ဟိုပုံးမြို့နယ် ရှိ စစ်ကောင်စီတပ်စခန်းတစ်ခုကို ယမန်နေ့(​ဖေ​ဖော်ဝါရီ ၂၃)တွင် တိုက်ခိုက်သိမ်းပိုက်နိုင်ခဲ့ကြောင်း ပအိုဝ်းအမျိုးသားလွတ်မြောက်ရေးတပ်မတော်(PNLA) ၊သတင်းပြန်ကြားရေးဌာနတာဝန်ခံခွန်ရိန်းယံက​ပြောသည်။

ဟိုပုံးမြို့နယ် အရှေ့ဘက်ခြမ်းတနေရာတွင် စစ်ကောင်စီနှင့် လက်အောက်ခံ ပြည်သူ့စစ် ပူးတွဲအဖွဲ့သည် ပအိုဝ်းဒေသလုံခြုံရေးဆိုင်ရာလှုပ်ရှားနေသည့် PNLA စစ်ကြောင်းကို တိုက်ခိုက်လာ၍ တိုက်ပွဲဖြစ်ခဲ့ကြောင်း၊ တိုက်ပွဲဖြစ်သည့်နေရာကို PNLAက ရှင်းလင်းရာ စစ်ကောင်စီနှင့်ပြည်သူ့စစ်များ ပူးတွဲတပ်စွဲထားသည့် လွယ်ဝိုးတုတ်ကျေးရွာအနီးရှိ စခန်း၁ခုကို သိမ်းပိုက်ရရှိခဲ့ကြောင်း PNLA က
ယ​နေ့ထုတ်ပြန်ထားသည်။

“အဲဒီ လွယ်၀ိုးတုတ်ရွာနဲ့နည်းနည်းနီးတာပေါ့။ အဲဒီစခန်းကို သိမ်းပိုက်ရရှိခဲ့တယ်။ အဲဒီမှာ RPG ၁ လက်၊ ပစ္စတို ၁ လက်ရတယ်။ တိုက်ပွဲဖြစ်ပွားတဲ့ အချိန်မှာ စစ်ကောင်စီနဲ့ ပြည်သူ့စစ် တွေက အကုန်လုံးထွက်ပြေးသွားတာပေါ့” ဟု PNLA သတင်းပြန်ကြားရေးဌာနတာဝန်ခံခွန်ရိန်းယံက ပြောသည်။

ထို့အပြင် ယမန်နေ့တွင် တိုက်ပွဲဖြစ်ပွားခြင်းမရှိပဲ စစ်ကောင်စီသည် ဆီဆိုင်မြို့ကို လေယာဉ်ဖြင့် ဗုံးကြဲတိုက်ခိုက်မှု ၃ ကြိမ်ပြုလုပ်ခဲ့သည့်အပြင် ဟိုပုံးမြို့နယ် မဲနယ်တောင်ဒေသကိုလည်း စစ်ကောင်စီက လက်နက်ကြီးများဖြင့် အကြိမ် ၁၀၀ နီးပါး ပစ်ခတ်တိုက်ခိုက်ခဲ့သည်ဟု PNLAက ထုတ်ပြန်သည်။

စစ်ကောင်စီသည် ထမ်းဆန်းဂူဒေသနှင့် ထမ်းဆန်းရွှေတိဂုံ
စေတီတော်တွင် လက်နက်ကြီးများအထိုင်ချကာ မဲနယ်တောင်ဒေသကို ဆက်လက်ပစ်ခတ်တိုက်ခိုက်ခြင်း၊ ခရီးသွားပြည်သူများ၏ ကားများအား ပစ်ခတ်ခြင်းများကိုလည်း ဆက်လက်ပြုလုပ်နေဆဲဖြစ်သည်ဟု ဆိုသည်။

ပအိုဝ်းလူမျိုးများ အထွဋ်အမြတ်ထားသည့် ဘာသာရေးဆိုင်
ရာ မြင့်မြတ်သော နေရာများကို စစ်ကောင်စီနှင့်ပြည်သူ့စစ်များသည် ၎င်းတို့၏ အာဏာရှင်စနစ် သက်ဆိုးရှည်ရေးအတွက် အကာအကွယ်ယူခြင်း၊ တိုက်ခိုက်ဖျက်ဆီးခြင်းများ ပြုလုပ်နေလျက်ရှိကြောင်း၊ ဘာသာရေးလွတ်လပ်ခွင့်ကိုပါ ထိပါးဖျက်ဆီးနေခြင်းဖြစ်ကြောင်း PNLAက ထုတ်ပြန်
သည်။

လက်ရှိအချိန်သည် စစ်အာဏာရှင်စနစ်ကို ပြည်သူလူထုတရပ်လုံးက ဝိုင်းဝန်း တိုက်ဖျက်နေသည့်အချိန်ဖြစ်သည်။ စစ်ကောင်စီလက်အောက်ခံ ပြည်သူ့စစ်များအနေဖြင့် စစ်အာ
ဏာရှင်ကို ကာကွယ်ပေးနေရသည့် လုပ်ရပ်ကို ဦးနှောက်ကြီးကြီးဖြင့် သေချာသုံးသပ်စဉ်းစားပြီး စစ်အာဏာရှင်စနစ်လက်အောက်မှ ရုန်းထွက်ကာ အမျိုးသားလွတ်မြောက်ရေးလမ်းကြောင်းပေါ်သို့ အမြန်ဆုံးကူးပြောင်းကြရန် ထပ်မံတိုက်တွန်းထားသည်။

ထို့အပြင် PNLA လူမှုကွန်ယက်စာမျက်နှာ (Facebook Page)သို့ လာရောက်ဆက်သွယ်ပြီး လိုအပ်ချက်များစွာရှိနေသည့် တော်လှန်ရေးလုပ်ငန်းစဉ်အတွင်း အသုံးပြုနိုင်ရန် ငွေကြေးအင်အားဖြင့် ပါဝင်ကြသည့် မိဘပြည်သူများကိုလည်း ပအိုဝ်းအမျိုးသားလွတ်မြောက်ရေးတပ်မတော်
(PNLA)မှ အထူးကျေးဇူးတင်ကြောင်း ထုတ်ပြန်သည်။

ဆင်ဘိုမြို့ အနီးရှိ ခလရ(၁၄၁) တပ်ရင်းကို ယနေ့မနက်တွင် KIA/KPDF ပြန်လည်ထိုးစစ်ဆင်

▪︎KIA သတိပေးချက်ကြောင့် တပ်စခန်းစွန့်သွားသည့်
မြို့လှဒေသကို တော်လှန်ရေးတပ်ဖွဲ့များ ထိန်းချုပ်ထား

ထားမြတ်/People’s Spring

ကချင်ပြည်နယ် မြစ်ကြီးနားမြို့နယ် ဆင်ဘိုမြို့အနီးရှိ စစ်ကောင်စီတပ်ရင်း ခလရ(၁၄၁)ကို ကချင်လွတ်လပ်ရေးတပ်မတော်(KIA) ပူးပေါင်းတပ်က ယနေ့မနက်တွင် ထိုးစစ်ဆင်တိုက်ခိုက်လျက်ရှိဟု စစ်ရေးသတင်းရင်းမြစ်က ပြောပြသည်။

ဖေဖော်ဝါရီ ၂၄ရက် မနက် ၇နာရီမှစတင်ပြီး ခလရ(၁၄၁) တပ်ရင်းကို KIA၊ KPDF ပူးပေါင်းတပ်က ပြန်လည်တိုက်ခိုက်နေကြောင်း ၎င်းက အသိပေးသည်။

KIA ပူးပေါင်းတပ်သည် ဆင်ဘိုမြို့ ကို ဖေဖော်ဝါရီ ဒုတိယ ပတ်တွင် တိုက်ခိုက်ခဲ့ရာ မြို့ကို သိမ်းပိုက်ထားနိုင်ခဲ့သည်။ ထို့ပြင် မြို့နှင့်မိုင်အနည်းငယ်အကွာရှိ ခလရ(၁၄၁) စစ်ကောင်စီတပ်ရင်းကို တိုက်ခိုက်ခဲ့သော်လည်း တစ်ရက်အကြာ တွင် ထိုးစစ်ဆင်မှုကို ရပ်ကာ ယနေ့ မနက်တွင် ပြန်
လည် ထိုးစစ်ဆင်ခြင်းဖြစ်သည်။

ထိုစဉ်ကတည်းက ဆင်ဘိုမြို့ကို KIAက သိမ်းပိုက်ထိန်းချုပ်ထားခြင်းဖြစ်သည်။မြစ်ကြီးနားမြို့နယ်အတွင်းရှိ ဆင်ဘိုမြို့သည် ၂၀၀၂ ခုနှစ်တွင်မှ ရွာအဖြစ်မှ မြို့အဖြစ် သတ်မှတ်ခဲ့ခြင်းဖြစ်ပြီး ၂၀၁၄ သန်း​ခေါင်စာရင်းအရ လူဦး​ရေ တစ်​သောင်း​ကျော်​နေထိုင်သည်။

ယ​နေ့ နံနက်တွင် စစ်​ကောင်စီတပ်၏ တံတားဦး ၊​နေပြည်​တော် ​လေတပ်၊ မိတ္ထီလာ ရှမ်းတဲ​လေတပ်စခန်းများမှ တိုက်​လေယာဥ်များ အလုပ်များ​နေ ပျံသန်းမှုများ​နေ​ကြောင်း ​စစ်​ကောင်စီ၏လေ​ကြောင်းပျံသန်းမှုသတင်းများကို ​သတိ​ပေး​ဖော်ပြ​နေ​သော Enemy Air Route Channel
(EAR ) မှသိရသည်။ ​နေပြည်​တော်​လေတပ်မှ တိုက်​လေယာဥ်အချို့ အ​နောက်​တောင်ဘက်သို့ ပျံသန်းသလို ၊ရှမ်းတဲ​လေတပ်မှ ​​သယ်ယူပို့​ဆောင်​ရေးရဟတ်ယာဥ်အချို့ အ​နောက်​တောင်သို့ပျံသန်းသည်။ တံတားဦးမှ တိုက်​လေယာဥ်အချို့ အ​နောက်ဘက်နှင့် အ​နောက်​မြောက်ဘက်သို့ ပျံသန်းခဲ့သည်။ယ​နေ့နံနက် ၁၀ နာရီ ၄၄ မိနစ်တွင် ဂျက်ဖိုက်တာတစ်စင်း အ​နောက်​​မြောက်ဘက်သို့ ပျံသန်းပြီး ၊ထို​လေယာဥ်မှာ ​နောက် ၅ မိနစ်အကြာတွင် စစ်ကိုင်းကိုဖြတ်သန်း၍ ​မြောက်ဘက်သို့ဦးတည်​နေ၍ ကချင်ပြည်နယ်သို့ ပျံသန်းခြင်းဖြစ်နိုင်ဖွယ်ရှိသည်။

KIA အနေဖြင့် ပြီးခဲ့သည့် ရက်ပိုင်းကလည်း မံစီမြို့နယ် စီခမ်းကြီး စစ်ကောင်စီစခန်းကို တိုက်ခိုက်သိမ်းပိုက်ခဲ့ရာ လက်နက်မျိုးစုံ အလက် ၅၀ကျော်နှင့် ခဲယမ်း၊ ကျည်များစွာ သိမ်းရခဲ့ပြီး စစ်ကောင်စီတပ်ဖွဲ့ဝင် အများအပြား သေဆုံးထိခိုက်ခဲ့သည်။

စစ်ကောင်စီအနေဖြင့် လေကြောင်း ပစ်ကူများစွာပေး တိုက်ခိုက်နေသည့်ကြားမှ စီခမ်းကြီးကို ဆုံးရှုံးခဲ့ရခြင်းဖြစ်သည်။

ထို့အပြင် ရွှေကူမြို့နယ် မြို့လှ ဒေသအခြေစိုက် စစ်ကောင်စီ ဗျူဟာစခန်းသည်လည်း KIA ၏ သတိ​ပေးစာ​ပေးပို့ပြီး သုံးရက်အကြာ ဖေဖော်ဝါရီ ၂၂ရက်တွင်စခန်းကို စွန့်ခွာရုတ်သိမ်းသွားခဲ့သည်။ တပ်မ (၈၈) လက်အောက်ခံ ခမရ(၃၈၇) ဗျူဟာမှူး နှင့် စစ်ကောင်စီတပ်ဖွဲ့ဝင်များကို ပြည်သူ့ဘက်သို့ အလင်းဝင်ရန် KIAက ဖေဖော်ဝါရီ ၁၉ရက်တွင် သတိပေးစာ ပို့ခဲ့ပြီးနောက် ၃ရက်အကြာတွင် စစ်ကောင်စီတပ်က စခန်းစွန့်သွားခြင်းဖြစ်သည်။

ထို့ကြောင့် မြို့လှဒေသကို လက်ရှိတွင် KIAက ထိန်းချုပ်ထားနိုင်သည့် အခြေအနေဖြစ်ကြောင်း စစ်ရေးသတင်းရင်းမြစ်က ပြောသည်။KIA သတင်းရင်းမြစ်တစ်ဦးကလည်း မြို့လှ ဒေသကို သိမ်းလိုက်ပြီဖြစ်ကြောင်း ပြောပြသည်။

မြို့လှမြို့ သည် ​ရွှေကူမြို့နယ်အတွင်းတည်ရှိပြီး မြို့နယ်ခွဲ ဖြစ်ကာ ၊ ၂၀၁၄ သန်း​ခေါင်စာရင်းအရ လူဦး​ရေ ၄၀၀၀ ​ကျော်ရှိသည်။

PHOTO NEWS

မြို့ပျက်ကြီးသဖွယ်မြင်တွေ့ရသည့် ကော့ကရိတ်မြို့

ကရင်ပြည်နယ်၊ ကော့ကရိတ်မြို့တွင် ဖေဖော်ဝါရီ ၂၁ ရက်က တိုက်ပွဲဖြစ်ပွားပြီးနောက် နေအိမ် များ မီးလောင်ပျက်စီးခဲ့ပြီး မြို့ပျက်ကြီးသဖွယ်မြင်တွေ့ရသည်။ ဖေဖော်ဝါရီ ၂၁ရက် ညနေ ၅ နာရီမှစ၍ ည ၁၀နာရီဝန်းကျင်အထိ ကော့ကရိတ်မြို့ အမှတ် (၇) ရပ်ကွက်အနီးတွင် စစ်ကောင်စီတပ်နှင့် ကရင်အမျိုးသားလွတ်မြောက်ရေးတပ်မတော်(KNLA) ပူးပေါင်းတပ်အကြား တိုက်ပွဲဖြစ်ပွားခဲ့ပြီး အဆိုပါတိုက်ပွဲအတွင်း လက်နက်ကြီးများဖြင့် ပစ်ခတ်ရာမှ အမှတ် (၄)ရပ်ကွက်၊ အထက်ရွာ၊ ရှုခင်းသာလမ်း၊ တောင်သူစုနှင့် အမှတ်(၇)ရပ်ကွက်တို့မှ နေအိမ်များပျက်စီးခဲ့ရသည်။ အဆိုပါ တိုက်ပွဲဖြစ်ပြီးနောက် မြို့ပျက်ကြီးသဖွယ်ဖြစ်နေသော ကော့ကရိတ်မြို့၏ ယမန်နေ့(ဖေဖော်ဝါရီ ၂၃ရက်)က တွေ့ရသည့်မြင်ကွင်းများကို ဖော်ပြလိုက်ပါသည်။


ဓာတ်ပုံ - Yebaw Shanlay/FB