၂၀၂၅နှစ်သစ်တွင် လူထုဆန္ဒ အခြေခံသည့် လူထုအုပ်ချုပ်မှုအစိုးရ ပေါ်ပေါက်လာရန် ကြိုးပမ်းမည်ဟု PSLF/TNLA ထုတ်ပြန်

▪️ငြိမ်းချမ်းစွာ အတူယှဉ်တွဲနေထိုင်မည့် ဖက်ဒရယ်ဒီမိုကရေစီ နိုင်ငံကို အားလုံးစုပေါင်း ရုန်းကန်တည်ဆောက်ရန် အချိန်အခါသင့်နေပြီဟုပြော

ထားမြတ်/People’s Spring

၂၀၂၅ နှစ်သစ်တွင် လူထုဆန္ဒ အခြေခံသည့် လူထုအုပ်ချုပ်မှုအစိုးရ ပေါ်ပေါက်လာရန် ကြိုးပမ်းဆောင်ရွက်မည်ဖြစ်ကြောင်း တအာင်းအမျိုးသားလွတ်မြောက်ရေးတပ်မတော်(TNLA) က ထုတ်ပြန်သည်။

ပလောင်ပြည်နယ်လွတ်မြောက်ရေးတပ်ဦး(PSLF/TNLA)၏ နှစ်ပတ်လည် အစည်းအဝေးကို ဖေဖော်ဝါရီ ၁၇ရက်မှ ၂၁ရက်အထိ ကျင်းပခဲ့ရာ အစည်းအဝေးအပြီး ကြေညာချက်၌ ထိုသို့ ဖော်ပြထားခြင်းဖြစ်သည်။

ပလောင်ပြည်နယ်လွတ်မြောက်ရေးတပ်ဦးက ၁၀၂၇ စစ်ဆင်ရေးတွင် ထိန်းသိမ်းရရှိခဲ့သည့် မြို့ ၇မြို့ အပါအဝင် TNLAအခြေစိုက်ထားသည့် နယ်မြေဒေသများကို လုံခြုံရေး တရားဥပဒေ စိုးမိုးရေး ပညာရေး၊ ကျန်းမာရေးနှင့် လူမှု ဘ၀ ဖွံ့ဖြိုးရေးကိစ္စရပ်များကို ပိုမို တိုးတက်ကောင်းမွန်လာစေရန် ဦးဆောင်စီမံ အုပ်ချုပ်သွားမည်ဖြစ်ပြီး ၂၀၂၅ နှစ်သစ်တွင် လူထုဆန္ဒ အခြေခံသည့် လူထုအုပ်ချုပ်မှု အစိုးရ ပေါ်ပေါက်လာရန် ကြိုးပမ်းဆောင်ရွက်မည်ဟု ထုတ်ပြန်ခဲ့ခြင်းဖြစ်သည်။

ထို့ကြောင့် ၂၀၂၅ နှစ်သစ်တွင် လူထုအုပ်ချုပ်မှု အစိုးရ ပေါ်ပေါက်လာရန် ကြိုးပမ်းမည်ဆိုခြင်းမှာ မြန်မာတစ်နိုင်ငံလုံးအတိုင်းအတာကို ရည်ရွယ်ခြင်းလား သို့မဟုတ် တအာင်းဒေသ ကို ရည်ရွယ်ခြင်းလား ဆိုသည်ကို TNLA သတင်းပြန်ကြားရေး အရာရှိနှင့် ထိပ်ပိုင်းခေါင်းဆောင် အချို့အား ဆက်သွယ်မေးမြန်းထားဆဲဖြစ်သည်။

TNLAသည် ၁၀၂၇ စစ်ဆင်ရေးအတွင်း စစ်ကောင်စီ တပ်စခန်း ၈၀ ကျော်နှင့် နမ့်ဆန်၊ နမ့်ခမ်း၊ မန်တုံ၊ ကွတ်ခိုင်၊ နမ္မတူ၊ မိုင်းလုံ၊ မိုင်းငေါ့ မြို့များကို သိမ်းပိုက်ထားပြီး ယခုနှစ် ဇန်နဝါရီ ၁၁ရက်တွင် တရုတ်နိုင်ငံ၏ ကြားဝင်မှုဖြင့် စစ်ကောင်စီနှင့် အပစ်ရပ်စဲခဲ့သည်။

နှစ်ပတ်လည် အစည်းအဝေးတွင် စစ်အာဏာရှင် စနစ်ဆိုးမှ လွတ်မြောက်ရန် ကြိုးပမ်းနေသည့် လက်ရှိ မြန်မာနိုင်ငံ၏ အခြေအနေများကို သုံးသပ်ခြင်း၊ မြောက်ပိုင်း မဟာမိတ် ၃ဖွဲ့ စတင်ဖော်ဆောင်ခဲ့သည့် ၁၀၂၇ စစ်ဆင်ရေးကို သုံးသပ်ခြင်း၊ အဖွဲ့အစည်း၏ တစ်နှစ်တာ လုပ်ငန်းများ သုံးသပ်ခြင်း နှင့် အဖွဲ့၏ လုပ်ငန်းဌာနများအား အားဖြည့် ပြင်ဆင်ခြင်းများ လုပ်ဆောင်ခဲ့သည်ဟု အသိပေးသည်။

မြောက်ပိုင်း မဟာမိတ် ၃ဖွဲ့မှ အခြေအနေ ဖိအားပေါင်းစုံကြောင့် အပစ်ရပ်စဲခဲ့သော်လည်း ဒေသတွင်း ပြည်သူလူထုများ စစ်ပွဲ၏ နောက်ဆက်တွဲ ဆိုးကျိုးများကို ဆက်တိုက်ခံစားနေရကြောင်း၊ တိုက်ပွဲများမှာလည်း မြန်မာနိုင်ငံ အနှံ့အပြားတွင် ဖြစ်ပွားလျက်ရှိကြောင်း TNLAက ထုတ်ပြန်သည်။

မြန်မာပြည်သူလူထု တစ်ရပ်လုံး စစ်အာဏာရှင်စနစ်ဆိုးမှ လွတ်မြောက်ပြီး ငြိမ်းချမ်းစွာ အတူယှဉ်တွဲနေထိုင်မည့် ဖက်ဒရယ်ဒီမိုကရေစီ နိုင်ငံကို အားလုံးစုပေါင်း ရုန်းကန် တည်ဆောက်ရန် အချိန်အခါသင့်နေပြီဖြစ်သည်ဟုလည်း အစည်းအဝေးက ရှုမြင်သုံးသပ်ခဲ့သည်ဟု အသိပေးသည်။

တအာင်းဒေသတွင်းရှိ အခြားလူမျိုး အဖွဲ့အစည်းများနှ အတင်းအဓမ္မ စစ်သားစုဆောင်းခြင်း၊ အခွန်ကောက်ခံခြင်း၊ လူထုစီမံအုပ်ချုပ်ရေး လုပ်ငန်းများကို ဝင်ရောက်စွက်ဖက်နှောက်ယှက်ခြင်းများ မပြုနိုင်အောင် တအာင်းဒေသရှိ လူမျိုးစုံ ပြည်သူများနှင့်အတူ လက်တွဲ ကာကွယ်ပြီး ပြည်သူလူထုများ၏ နိုင်ငံရေးရည်မှန်းချက် ပန်းတိုင် အမြန်ဆုံး အောင်မြင်ရောက်ရှိစေရန် ဦးဆောင်သွားမည်ဖြစ်ကြောင်းလည်း PSLF/TNLAက ထုတ်ပြန်ခဲ့သည်။

TNLAလှုပ်ရှားရာ နယ်မြေဒေသများ၌ ကချင်လွတ်လပ်ရေးတပ်မတော်(KIA)၊ ရှမ်းပြည်တိုးတက်ရေးပါတီ(SSPP/SSA) တပ်များအပြင် ညီနောင်မဟာမိတ် သုံးဖွဲ့၌ ပါဝင်သည့် ကိုးကန့်တပ်မတော်(MNDAA)လည်း လှုပ်ရှားမှုရှိသည်။

ပြီးခဲ့သည့် လပိုင်းများအတွင်း နယ်မြေအတွင်း သွားလာလှုပ်ရှားမှု ၊ ဂိတ်ချထားမှုနှင့်ပတ်သက်ပြီး TNLAနှင့် SSPP အကြားသော်လည်းကောင်း၊ TNLAနှင့် KIA အကြားသော်လည်းကောင်း ပြဿနာ အချို့ရှိခဲ့ပြီး SSPP တပ်နှင့်အပြန်အလှန် ပစ်ခတ်ကာ သေဆုံးထိခိုက်မှုများ ဖြစ်ပေါ်သည်အထိ ပြဿနာဖြစ်ခဲ့သည်။

အဆိုပါ အဖွဲ့အစည်းများသည် ယခင်က မဟာမိတ်များအဖြစ် စစ်ရေးအတူတကွ လှုပ်ရှားဖူးသည့် အဖွဲ့အစည်းများလည်းဖြစ်သည်။

KIO/KIA ဥက္ကဋ္ဌ ဗိုလ်ချုပ်ကြီးအင်ဘန်လကမှု လက်ရှိ တော်လှန်ရေးကာလအတွင်း နယ်မြေ တစ်ခုတည်း၌ တိုင်းရင်းသားတပ်များ လှုပ်ရှားရာမှ ဖြစ်ပေါ်လာသည့် ပြဿနာများကို စစ်ရေးအရ ဖြေရှင်းရန် ဆန္ဒမရှိဘဲ ဆွေးနွေးညှိနှိုင်းသည့်နည်းဖြင့်ဖြေရှင်းရန်သာ ဆန္ဒရှိကြောင်း အသိပေးပြောကြားထားသည်။

(တအာင်းတပ်မတော်(PSLF/TNLA) ထိပ်ပိုင်းခေါင်းဆောင်များ နမ့်ဆန်မြို့နယ် ကုန်းသာရွာသို့ သွားရောက်တွေ့ဆုံခဲ့ပြီး ကျေးရွာများနှင့် စစ်ဘေးသင့် ပြည်သူများအား တွေ့ဆုံနေစဥ်။ ဓာတ်ပုံ - news & information department)

ရွှေဘို - စဉ့်ကူးလမ်းပိုင်းရှိ စစ်ဆေးရေးဂိတ် ပါဆယ်မိုင်းဖြင့် တိုက်ခိုက်ခံရ

အင်ကြင်း/People's Spring

မန္တလေးတိုင်း၊ ရွှေဘို-စဥ့်ကူးလမ်းပိုင်းရှိ စစ်ဆေးရေးဂိတ် ပါဆယ်မိုင်းဖြင့် တိုက်ခိုက်ခံရကြောင်း သတင်းရရှိသည်။

ယနေ့ (ဖေဖော်ဝါရီ ၂၂ ရက်)နံနက် ၈ နာရီခန့်က စဥ့်ကူးမြို့နယ်၊ ရွှေဘို-ကျောက်မြောင်း-စဥ့်ကူးလမ်းပေါ်ရှိ သီလကျေးရွာထိပ်တွင် ဂိတ်ကြေးကောက်နေသော စစ်ကောင်စီတပ်အား ပါဆယ် မိုင်းဖြင့် တိုက်ခိုက်ရာ တစ်ဦးသေဆုံးပြီး လေးဦး ပြင်းထန်ဒဏ်ရာရရှိကြောင်း ပြည်သူ့ကာကွယ် ရေးတပ်ဖွဲ့-စဥ့်ကူးက သတင်းထုတ်ပြန်သည်။

တိုက်ခိုက်မှုကြောင့် စဉ့်ကူးမြို့နယ်၌ တာဝန်ကျနေသော ရဲ မြင့်လွင်ဆိုသူ သေဆုံးကြောင်း ကင်းထောက်မြေပြင်သတင်းအဖွဲ့က ပြောသည်။

"တံတားဘက် အသွားဖြစ်တာနေမယ်။ အဲ့ရွာက စဥ့်ကူးမြောက်ဘက်မှာရှိတယ်။ စဥ့်ကူးအမှတ်(၁)ရပ်ကွက်ထဲမှာ စာရင်းပါတယ်။"ဟု
ကင်းထောက်မြေပြင်သတင်းအဖွဲ့ဝင်တစ်ဦးက ပြောသည်။

သို့သော် ထိခိုက်သေဆုံးမှုအား လူထုနွေဦးက သီးခြားအတည်ပြုနိုင်ခြင်း မရှိသေးပေ။ ဖြစ်စဥ်နှင့်ပတ်သက်၍ စဥ့်ကူး(ပကဖ)အဖွဲ့ ဆက်သွယ်မေးမြန်းထားပြီး ပြန်လည်ဖြေကြားခြင်း မရှိသေးပေ။

စဥ့်ကူးမြို့နယ်သည် မန္တလေးတိုင်းအတွင်း တော်လှန်ရေးအင်အားကောင်းသောဒေသတစ်ခုဖြစ်ပြီး တိုင်းအတွင်းရှိ မတ္တရာ၊ သပိတ်ကျင်း၊ မိုးကုတ်မြို့နယ်များ၊ စစ်ကိုင်းတိုင်းရှိ ဝက်လက်၊ရွှေဘိုမြို့နယ်များနှင့် စစ်ရေးအရ ဆက်စပ်မှုရှိသည်။

စစ်အာဏာရှင်၏ဖိနှိပ်မှု တော်လှန်လိုသူများအား အမြဲကြိုဆိုနေမည်ဟု SSPP ဖိတ်ခေါ်

ဟန်နွေ/People’s Spring

စစ်အာဏာရှင်တို့၏ ဖိနှိပ်မှုကို တော်လှန်လိုသည့် လူမျိုးဘာသာမရွေးအား အမြဲကြိုဆိုနေမည်ဖြစ်ကြောင်း ရှမ်းပြည်တိုးတက်ရေးပါတီ(SSPP/SSA)က ယနေ့ (ဖေဖော်ဝါရီ ၂၂ရက်)တွင် ပန်ကြားချက် ထုတ်ပြန်သည်။

လူမျိုးပေါင်းစုံ ပြည်သူလူထုအပေါင်းတို့အား ပန်ကြားချက်ကို SSPPက ထုတ်ပြန်ရာ ယခုကဲ့သို့ ဖိတ်ခေါ်လိုက်ခြင်းဖြစ်သည်။

"ကျနော်တို့ ထုတ်ပြန်ရတဲ့ အကြောင်းကိစ္စက ယနေ့မှာ ကျနော်တို့ နိုင်ငံမှာ စကစမှာလည်း စုဆောင်းရေး ဥပဒေတွေ ပြဌာန်းတယ်။ ဟိုအဖွဲ့ထုတ်တယ် ဒီအဖွဲ့ထုတ်တယ်ပေါ့။ ကျနော်တို့မှာ ဟိုလို ဒီလို ထမ်းရမယ်ဆိုပြီး အဲဒီလိုမျိုး ထုတ်ပြန်တာမျိုး မလုပ်ဘူး။ ကျနော်တို့က တန်းတူရေး၊ဖက်ဒရယ်ဒီမိုကရေစီ ပြည်ထောင်စုကို လက်ခံတဲ့ တိုင်းရင်းပြည်သူတွေအားများလုံး အတွက် တစ်နိုင်ငံလုံးအတိုင်းအတာနဲ့ ထုတ်ပြန်တာဖြစ်ပါတယ်။ အဓိက အဲဒီလိုပါပဲ။ ကျနော်တို့က လူမျိုးဘာသာပေါင်းစုံ တစ်နိုင်ငံလုံး အတိုင်းအတာနဲ့ ထုတ်ပြန်ထားတာရှိပါတယ်"ဟု SSPP/SSA ပြောရေးဆိုခွင့်ရှိသူ ဗိုလ်မှူးကြီး စိုင်းဆုက ပြောသည်။

ယခု လက်ရှိအခြေအနေတွင် အဖိနှိပ်ခံလူမျိုးပေါင်းစုံ ပြည်သူလူထုများသည် စစ်အာဏာရှင် တို့၏ နည်းလမ်းပေါင်းစုံဖြင့် ပိုမိုဖိနှိပ်လာခြင်းကိုခံနေရသည့်သတင်းများ နေ့စဉ်နားမဆံ့အောင်ပင် ကြားသိနေရကြောင်း၊ ဖိနှိပ်မှုရှိလျင် တော်လှန်မှုရှိသည် ဆိုသည့် တော်လှန်ရေး၏ နိယာမ တရားအတိုင်း အဖိနှိပ်ခံ လူမျိုးပေါင်းစုံ ပြည်သူလူထုများ တော်လှန်သော လမ်းအသီးသီးကို ရှာကြံနေကြသည်ကိုလည်း ကြားသိနေရကြောင်း SSPPက ဆိုသည်။

ထို့ကြောင့် SSPP/SSAသည် တော်လှန်သော လမ်းစကို ရှာကြံနေကြသည့် ဘ၀တူ အဖိနှိပ်ခံလူမျိုးပေါင်းစုံ ပြည်သူလူထုများအတွက် SSPP/SSA၏ ဦးတည်ချက် မူဝါဒနှင့် စည်းမျဉ်းစမ်းကမ်းတို့ကို လက်ခံယုံကြည်လိုက်နာမည်ဆိုပါက လူမျိုးဘာသာမရွေး အမြဲပင် လက်ခံကြိုဆိုနေမည်ဖြစ်ကြောင်း ပန်ကြားထားသည်။

SSPP/SSAသည် ရှမ်းပြည်လက်နက်ကိုင်တော်လှန်ရေး၏ တောင်းဆိုတိုက်တွန်းချက် အရ ရှမ်းပြည်လက်နက်ကိုင်တော်လှန်ရေးကို ဦးဆောင်၍ ရှမ်းပြည်လူမျိုးပေါင်းစုံ ပြည်သူလူထုအား အလုပ်အကျွေးပြုသွားနိုင်ရန် ရှမ်းပြည်လူမျိုးပေါင်းစုံ ပြည်သူလူထု အတွင်းမှ ထွက်ပေါ်လာသည့် ပါတီအဖွဲ့အစည်းနှင့် တပ်မတော် ဖြစ်ကြောင်း ထုတ်ပြန်သည်။

ထို့ပြင် SSPP/SSA သည် လူမျိုးကြီး ဝါဒနှင့် ကျဉ်းမြောင်းသော အမျိုးသားရေးဝါဒတို့ကို ဆန့်ကျင်ပြီး လူမျိုးပေါင်းစုံ ငြိမ်းချမ်းစွာ အတူယှဉ်တွဲနေသွားနိုင်ရေးအတွက် အာဏာရှင်စနစ် ကျဆုံးရေး၊ တန်းတူရေး နှင့် ကိုယ်ပိုင်ပြဌာန်းခွင့်ကို အပြည့်အ၀ အာမခံသည့် ဖက်ဒရယ်ဒီမိုကရေစီ ပြည်ထောင်စု ပေါ်ထွန်းလာရေးတို့ကို အစဉ်တစိုက် ဦးတည်ပြီး ရှေရည် လက်နက်ကိုင် တော်လှန်တိုက်ပွဲဝင်ခဲ့သည့် အစဉ်အလာရှိသော ပါတီ အဖွဲ့အစည်းနှင့် တပ်မတော်ဖြစ်ကြောင်း ဖော်ပြထားသည်။

စစ်ကောင်စီက စစ်မှုမထမ်းမနေ့ ပြည်သူ့စစ်မှုထမ်းဥပေဒကို ဖေဖော်ဝါရီ ၁၀ရက်တွင် ပြဌာန်းလိုက်ပြီး ယင်းနောက်ပိုင်း၌ ရှမ်းပြည်ပြန်လည်ထူထောင်ရေးကောင်စီ(RCSS/SSA)ကလည်း ရှမ်းပြည်အတွင်းနေထိုင်သူ အသက် ၁၈နှစ်မှ ၄၅နှစ်အကြားရှိသူအားလုံး စစ်မှုထမ်းရမည်ဖြစ်ကြောင်း ထုတ်ပြန်ကာ မလိုက်နာပါက အရေးယူမည်ဖြစ်ကြောင်း ခြိမ်းခြောက်ထားသည်။

(ရှမ်းပြည်တိုးတက်ရေးပါတီ(SSPP/SSA)မှ ရဲဘော်များအား တွေ့ရစဉ်။ ဓာတ်ပုံ - SSPP Info)

NUGနှင့် NMSP ကနဦးတွေ့ဆုံမှု နိုင်ငံရေး၊ စစ်ရေးအပါအဝင် ကဏ္ဍစုံပူးပေါင်းဆောင်ရွက်ရန် သဘောတူ

မောင်မောင်/People’s Spring

အမျိုးသားညီညွတ်ရေးအစိုးရ (NUG) မဟာမိတ်ဆက်ဆံရေးကော်မတီအဖွဲ့တာဝန်ခံ ၊ နိုင်ငံခြားရေးဝန်ကြီး ဒေါ်ဇင်မာအောင်နှင့်
မွန်ပြည်သစ်ပါတီ(NMSP)-စစ်အာဏာရှင်တိုက်ဖျက်ရေး အဖွဲ့ခေါင်းဆောင်များဆွေးနွေးခဲ့ကြောင်း NUGက အသိပေးထုတ်ပြန်သည်။

စစ်ကောင်စီကို တိုက်ခိုက်သွားမည်ဖြစ်ကြောင်း ထုတ်ပြန်ကြေညာခဲ့သည့် NMSP (စစ်အာဏာရှင် တိုက်ဖျက်ရေး)၏ နိုင်ငံရေးစစ်ရေးကော်မတီအဖွဲ့ ခေါင်းဆောင် နိုင်ဇေယျ ဦးဆောင်သည့် အဖွဲ့ဝင်များနှင့် ဒေါ်ဇင်မာတို့သည် တော်လှန်ရေးလုပ်ငန်းစဉ်များအတွင်း လက်တွဲဆောင်ရွက်နိုင်ရေး အွန်လိုင်းမှ ကနဦးတွေ့ဆုံဆွေးနွေးခဲ့ခြင်းဖြစ်သည်ဟု ဆိုသည်။

ဆွေးနွေးပွဲတွင် မွန်ပြည်သစ်ပါတီ(စစ် အာဏာရှင်တိုက်ဖျက်ရေး)မှ အဖွဲ့ခေါင်းဆောင် နိုင်ဇေယျ၊ ဒုခေါင်းဆောင် - ၁ နိုင်ဗညားလယ်၊ ဒုအဖွဲ့ခေါင်း ဆောင် ၂- ဗိုလ်ချုပ် လယိကောင်းနှင့် မဟာမိတ် ဆက်ဆံရေးတာဝန်ခံ နိုင်ဗညားမွန်တို့ တက်ရောက်ခဲ့ပြီး NUGဘက်က ဝန်ကြီးဒေါ်ဇင်မာအောင်နှင့် အဖွဲ့၊ ကာကွယ်ရေးဝန်ကြီးဌာနမှ အမြဲတမ်းအတွင်းဝန် ဦးနိုင်ထူးအောင်နှင့် တာဝန်ရှိသူများ တက်ရောက်ခဲ့သည်ဟု ဖော်ပြထားသည်။

ထိုသို့ တွေ့ဆုံစဉ် စစ်အာဏာရှင်စနစ်နှင့် အာဏာရှင်စနစ်များအပြီးတိုင် တိုက်ဖျက်နိုင်ရေးကိစ္စကို ဆွေးနွေးခဲ့ပြီး ဖက်ဒရယ်ဒီမိုကရေစီပြည်ထောင်စုတည်ဆောက်ရေးတို့အတွက် ခိုင်မာသောမဟာ မိတ်အဖြစ် နိုင်ငံရေး၊ စစ်ရေး၊သံတမန်ရေး စသည့်ကဏ္ဍအားလုံးတွင် ပူးပေါင်းဆောင်ရွက်ရေးအတွက် သဘောတူခဲ့ကြောင်း ထုတ်ပြန်သည်။

မဟာမိတ်ဆိုင်ရာပူးပေါင်းဆောင်ရွက်မှုအားလုံးအတွက် စဉ်ဆက်မပြတ် ဆွေးနွေးဆောင်ရွက် သွားကြရန်လည်း သဘောတူညီခဲ့ကြောင်း အသိပေးထားသည်။

NMSP စစ်အာဏာရှင်တိုက်ဖျက်ရေးအဖွဲ့သည် စစ်ကောင်စီနှင့် နိုင်ငံရေးဆွေးနွေးအဖြေရှာရန် မဖြစ်နိုင်တော့ဟုဆိုကာ စစ်ကောင်စီကို ပြန်လည် တိုက်ခိုက်သွားမည်ဖြစ်ကြောင်း ဖေဖော်ဝါရီ ၁၄ရက်တွင် ထုတ်ပြန်ကြေညာခဲ့သည်။

NUGနှင့် NMSP မှ တာဝန်ရှိသူများ အွန်လိုင်းမှ တွေ့ဆုံဆွေးနွေးနေစဉ်။(ဓာတ်ပုံ - PVTV)

ဖားကန့်မြို့နယ်ပြည်သူများ​၏ စစ်အာဏာရှင် ဆန့်ကျင်ရေး သပိတ်

သုည/People's Spring

ကချင်ပြည်နယ် ဖားကန့်မြို့နယ်တွင် မှော်လှည့်သပိတ်အင်အားစုနှင့် ဒေသခံပြည်သူများ ပူးပေါင်း၍ စစ်အာဏာရှင်ဆန့်ကျင်ရေးသပိတ်ကို ယနေ့ (ဖေဖော်ဝါရီ ၂၂) ချီတက်ဆန္ဒပြခဲ့ကြသည်။

ဆန္ဒပြပြည်သူများက "ဘယ်အာဏာရှင်စနစ်မှ အလိုမရှိ" ၊ "စစ်ခွေးထွက်ပြေး ၂၀၂၄ အောင်လံလွှင့်ထူ PDF မူ" ၊ "တော်လှန်မှာလား ကျွန်ခံမှာလား ကြိုက်တဲ့လမ်းကိုရွေး"၊ "လက်တွဲညီညီ ရှေ့သို့ချီ အဆုံးထိနွှဲဒို့အောင်ပွဲ"၊ "နိုင်ငံရေးကစားကွက်ကို ရိုက်ချိုးပြီး ငါတို့ပန်းတိုင် ငါတို့အရောက်လှမ်းမည် ကမ္ဘာမကြေဘူး" စသည့် စာသားများ ကိုင်ဆောင်ကာ ဆန္ဒထုတ်ဖော်ခဲ့ကြသည်။

ဓာတ်ပုံ - ပေးပို့