စစ်မှုမထမ်းမ​နေရ ဝါဒဖြန့်စာရွက်များ
ရန်ကုန်တွင်စတင်ဖြန့်​ဝျေန

ရဲခေါင်/People's Spring

လူငယ်များ စစ်တပ်ထဲဝင်ရန် စစ်ကောင်စီကဝါဒဖြန့်​သော လက်ကမ်းစာစောင်များကို ရန်ကုန်မြို့တွင် စတင်ဖြန့်လာပြီ ဖြစ် ကြောင်း ဒေသခံများနှင့် ရပ်ကွက် အုပ်ချုပ်ရေးပိုင်းနှင့်နီးစပ်သူများက လူထုနွေဦးသို့​ပြောသည်။

"စိုးရိမ်ရန် မလိုပေ ပြည်သူ့စစ်မှု ထမ်းဥပဒေ"ဟူ သော ခေါင်းစဥ်ဖြင့် လက်ကမ်းစာစောင်အပြင် "နိုင် ငံသားတစ်ယောက်အနေနဲ့ ဂုဏ်တင့်တယ်စွာ ၂ နှစ် စစ်မှုထမ်းမလား.?တောထဲမှာ သူပုန်လုပ်ပြီး အဆုံးခံမလား..... ? "ဟူသော စစ်​ကောင်စီ ဝါဒဖြန့် လက်ကမ်းစာစောင်နှစ်ခု ကို လိုက်လံဝေငှလျှက်ရှိသည်ဟု ပြည်သူအချို့က​ပြောသည်။

"ဒီနေ့ အပြင်ကပြန်လာတော့ အိမ်တံခါးမှာ တွေ့တဲ့ စာရွက်နှစ်ရွက်ကို ကြည့်လိုက်တော့ စစ်မှုထမ်းရမယ့် ကိစ္စတွေ ဖြစ်နေတာ။အိမ်မှာလူမရှိတော့ ဒီအတိုင်း တံခါးမှာ ညှပ်သွားတယ် ထင်တယ်။ကျွန်တော်တို့ကတော့ သူတို့ လက်ထဲမှာတော့ အသေမခံနိုင်ဘူး"ဟု မရမ်းကုန်းမြို့ နေသူတစ်ဦးက ပြောသည်။

ပြည်သူ့ စစ်မှုထမ်းဥပဒေ အတည်ပြုပြီးနောက်ပိုင်း ရပ်
ကွက်များအတွက် ဧည့်စာရင်းပိုမိုတင်ကြပ်ရန် နှင့် လုံခြုံရေး တိုးမြှင့်ရန် တိုင်းအစိုးရက အမိန့်ပေးထား​ကြောင်းလည်း ဒဂုံမြို့သစ်မြောက်ပိုင်းရှိ ရာအိမ်မှူးတစ်ဦးက အသိပေးသည်။

"ပုံမှန်ဆို ရပ်ကွက် နှစ်ခုလောက်စစ်ပြီးရင် ပြီးပြီ။ အခုက ရပ်ကွက်ကို ကွက်ပြည့်နင်းခိုင်းတာ။ပြီးတော့ လမ်းထိပ်တွေမှာ ည ၈ နာရီက စပြီး ကျွန်တော်တို့နဲ့ သင့်တင့်တဲ့သူတွေကို စောင့်ကြည့်ခိုင်းထားရတယ်။ဘယ်ရပ်ကွက်၊ဘယ်သူတွေ အဝင်၊အထွက်ရှိလည်းဆိုတာပေါ့။ ရှင်းရှင်းပြောရရင် အခုက တခြားနယ်တွေက ပါဝင်လာတာကို စိစစ်နေတယ်လို့ထင်တယ်"ဟု ၎င်းက ပြောသည်။

မကြာသေးမီရက်ပိုင်းကလည်း ဧရာဝတီ၊ပဲခူးတိုင်းနှင့် မန္တလေး တိုင်းရှိ ဒေသခံများ၏ ပြောဆိုချက်အရ စျေးများ အပါအဝင် လူစည်းကားရာ နေရာများ၌ စစ်ကောင်စီ လက်ဝေခံများက လက်ကမ်းစာစောင်များကို ဖြန့်ဝေခဲ့ကြောင်းသိရသည်။

လွန်ခဲ့သော ၁၄ နှစ်က စစ် အစိုးရ ပြဌာန်းခဲ့သည့် ပြည်သူ့
စစ်မှုထမ်း ဥပ‌ဒေကို ​ဖေ​ဖော်ဝါရီလ ၁၀ ရက်တွင် အာဏာသိမ်း စစ်ကောင်စီ က ထုတ်ပြန်ခဲ့သည်။

စစ်ကောင်စီ၏ ထုတ်ပြန်ချက်အရ အသက် ၁၈ နှစ်ပြည့်ပြီးသူ အမျိုးသမီး၊ အမျိုးသား တိုင်းကို ၂ နှစ် စစ်မှုထမ်းဖို့ ဆင့်ခေါ် နိုင်ပြီး တိုင်းပြည် အရေးပေါ်အခြေအနေဆိုပါက ၅ နှစ် အထိ ၎င်းတို့လိုသလို ခိုင်းစေနိုင်သည်။

နိုင်ငံတစ်ဝန်းတိုက်ပွဲများတွင် ​သေဆုံးဒဏ်ရာရသူ ၊ ထွက်​ပြေးသူ ၊လက်နက်ချသူ ၊​တော်လှန်​ရေးအဖွဲ့များထံအလင်းဝင်သူ စသဖြင့် စစ်​ကောင်စီ တပ်အင်အား နည်းလာ​သော်လည်း စစ်တပ်ထဲ ဝင်လိုသူ နည်းလာ​သော​ကြောင့် စစ်​ကောင်စီက ၎င်းတို့အသက်ဆက်နိုင်​ရေး စစ်မှု မထမ်းမ​နေရ ဥပ​ဒေ ဖြင့် လူငယ်များကို စစ်တပ်အတွင်းဝင်ရန် ကြံစည်လာခြင်းဖြစ်​ကြောင်း နိုင်ငံ​ရေး ၊စစ်​ရေး​လေ့လာသူများကသုံးသပ်ကြသည်။

ရေတာရှည်မြို့နယ်ရှိ ရွာသုံးရွာ လေကြောင်း တိုက်ခိုက်ခံရပြီး ကလေးငယ် နှစ်ဦးအပါအဝင် ပြည်သူ လေးဦးသေဆုံး၊ ငါးဦးဒဏ်ရာရ

▪️တိုက်ပွဲမရှိဘဲ အကြောင်းမဲတိုက်ခိုက်လာခြင်းဖြစ်

ထားမြတ်/People’s Spring

ပဲခူးတိုင်း တောင်ငူခရိုင် ရေတာရှည်မြို့နယ်ရှိ ကျေးရွာ သုံးရွာကို စစ်ကောင်စီက ယနေ့ နေ့လယ်ပိုင်းက လေကြောင်းတိုက်ခိုက်ခဲ့၍ ကလေးငယ် နှစ်ဦးအပါအဝင် အရပ်သားသေဆုံးမှု၊ ထိခိုက်ဒဏ်ရာရမှုများ ဖြစ်ခဲ့ကြောင်း ဒေါင်းမင်းသားရှေတာရှည် PDF မှ တာဝန်ရှိသူက ပြောသည်။

တောင်ငူ ကေတုမတီမြို့သစ်အခြေစိုက် လေတပ်က ရဟတ်ယာဉ်ဖြင့် ၈၁ မမ ဗုံးသီးများ ကြဲချပြီး စက်လက်ဖြင့် ပစ်ခတ်ခြင်းဖြစ်သည်ဟု ဒေါင်းမင်းသား ရေတာရှည် ပြည်သူ့ကာကွယ်ရေးတပ်မတော်(PDF)က ထုတ်ပြန်သည်။

ဖေဖော်ဝါရီ ၂၁ ရက် မွန်းလွဲ ၂ နာရီ ၁၅ မိနစ်ခန့်တွင် ရေတာရှည်မြို့နယ်၊ မြစ်အရှေ့ဘက်ကမ်းရှိ ထိတွေ့တိုက်ပွဲဖြစ်ပွားခြင်းမရှိသော ပိတောက် ကုန်းကျေးရွာ၊ စည်ပိုင်းကျေးရွာနှင့် မိချောင်းအိုင်ကျေးရွာများကို စစ်ကောင်စီတပ်က ရဟတ်ယာဥ်ဖြင့် ၈၁ မမ ဗုံးသီး ၁၂လုံးခန့် ကြဲချပြီး ပွိုင့် ၅ စက်လက်ကျည်များဖြင့် ပစ်ခတ်ခဲ့ခြင်းဖြစ်သည်ဟု ဖော်ပြသည်။

ထိုသို့ အရပ်သားပြည်သူများနေထိုင်ရာ ကျေးရွာသုံးရွာကို ပစ်ခတ်ခဲ့သောကြောင့် စည်ပိုင်းကျေးရွာနှင့် ပိတောက်ကုန်းကျေးရွာမှ အသက် (၁၀)နှစ် အရွယ် ကလေးငယ်တစ်ဦး၊ အသက်(၈) နှစ် အရွယ် ကလေးငယ် တစ်ဦးအပါအဝင် ပြည်သူ လေးဦး လက်နက်ကြီးကျည် ထိမှန်ကာ သေဆုံးခဲ့ပြီး ထိခိုက်ဒဏ်ရာရရှိသူ ငါးဦးရှိကြောင်း အသိပေးသည်။

"ဒဏ်ရာရသူကတော့ တစ်ဦး စိုးရိမ်ရဆဲ အခြေအနေ ဖြစ်ပြီး ကျန်သူများကတော့ မစိုးရိမ်ရပါ။ ကုသမှု အပိုင်းကတော့ ကျေးရွာက တာဝန်ရှိသူတွေ အနေနဲ့ ဆက်လက် ဆောင်ရွက် နေပါတယ်"ဟု ဒေါင်းမင်းသားရှေတာရှည် PDF ဘဏ္ဍာရေးနှင့်ထောက်ပို့တာဝန်ခံ ရဲဘော်ဒေါင်းဖြူက ပြောသည်။

စစ်ကောင်စီအနေဖြင့် ပြီးခဲ့သည့် ရက်အနည်းငယ်ကတည်းက အကြောင်းအရင်း တစုံတရာ ထူးခြားမှုမရှိဘဲ မြို့ပေါ်တိုက်ပွဲဖြစ်သယောင်ဖန်တီးနေသည်ဟု ၎င်းက ပြောပြသည်။

"သူတို့ ပြည်သူ့ကာကွယ်ရေးတပ်ဖွဲ့တွေ မြို့ပေါ် မလာရဲအောင် တမင်လုပ်နေတယ်လို့ထင်တယ်။စစ်ရေးအခြေအနေတွေကတော့ စစ်တောင်းမြစ် တလျှောက်က ခုလောလောဆယ်တော့ ခဏငြိမ်နေ ပြီးတော့ ရေတာရှည်မြို့အဝင်ပေါက်တွေမှာ ကင်းပုန်းတွေချပြီး အရမ်းအစစ်အဆေးကြမ်းနေတယ်ဗျ"ဟု ရဲဘော် ဒေါင်းဖြူက ပြောကြားသည်။

စစ်ကောင်စီတပ်သည် ဖေဖော်ဝါရီ ၁၀ရက်ကလည်း ရေတာရှည်မြို့နယ် ကံလှကျေးရွာသို့အင်အား ၇၀ခန့်ဖြင့် စစ်ကြောင်းထိုး ဝင်ရောက် လာ၍ သံတောင်မြောက်ပိုင်း အထူးဒေသ တပ်ခွဲများ ပါဝင်သည့် ပူးပေါင်းတပ်များနှင့် တိုက်ပွဲဖြစ်ခဲ့သည်။

အဆိုပါတိုက်ပွဲ၌ စစ်ကောင်စီတပ်က သေဆုံးထိခိုက်များပြားခဲ့ရာ တိုက်ပွဲဖြစ်သည့် ညနေပိုင်း၌ စစ်ကောင်စီက ကံလှရွာမှ နေအိမ် ၆၀နီးပါးကို မီးရှီု့ဖျက်ဆီးခဲ့သည်။

ထို့ပြင် ကျွဲ၊နွား တိရစ္ဆာန်များကိုလည်း ပစ်ခတ်သတ်ဖြတ်ခဲ့ပြီး ပြန်လည်ဆုတ်ခွာသွားသည်ဟု ဒေါင်းမင်းသားရေတာရှည် PDFက အသိပေးထားသည်။

(စစ်ကောင်စီတပ် ပစ်ခတ်မှုကြောင့် ထိခိုက်သူများနှင့် နေအိမ်ပျက်စီးနေသည်ကို တွေ့ရစဉ်။ ဓာတ်ပုံ - ဒေါင်းမင်းသား ရေတာရှည်PDF)

စစ်ကိုင်းတိုင်းအတွင်းက ပြည်သူတွေ စစ်အာဏာရှင်ဆန့်ကျင်ရေးသပိတ် ချီတက်ဆန္ဒပြ

သုည/People's Spring

စစ်ကိုင်းတိုင်းအတွင်းက သပိတ်အဖွဲ့တွေ၊ ဒေသခံပြည်သူတွေက စစ်အာဏာရှင်ဆန့်ကျင်ရေးသပိတ်တွေ ဒီနေ့ (ဖေဖော်ဝါရီ ၂၁) အသီးသီး ချီတက်ဆန္ဒပြခဲ့ပါတယ်။

စစ်ကိုင်းတိုင်း ယင်းမာပင်မြို့နယ်မှာ ကယ်တင်ရှင်မရှာ ဒို့ကျေးရွာသပိတ်စစ်ကြောင်းနဲ့ အောင်လံလွှင့်မည်ရွှေရေကြည်သပိတ်စစ်ကြောင်းတို့က ဒေသခံပြည်သူတွေနဲ့ ပူးပေါင်းကာ စစ်အာဏာရှင်ဆန့်ကျင်ရေးသပိတ် ဆင်နွှဲခဲ့ပါတယ်။

အလားတူ ယင်းမာပင်မြို့နယ်မြောက်ခြမ်း ကျေးရွာတစ်ရွာမှာလည်း သပိတ်အင်အားစုတွေက ဦးဆောင်ကာ တော်လှန်ရုပ်ရှင်ပြသပွဲနဲ့ လူထုနိုင်ငံရေးတရားဟောပြောပွဲ ပြုလုပ်ခဲ့ပါတယ်။

ဆားလင်းကြီးမြို့နယ်မှာလည်း အားမာန်သစ်လူထုသပိတ်စစ်ကြောင်းက ဦးဆောင်ကာ ဒေသခံကာကွယ်ရေး ရဲဘော်မင်းမင်းထက် (ခ) ဖက်တီး ကျဆုံးခြင်း (၈)လပြည့် ဝမ်းနည်းခြင်း အခမ်းအနား ကျင်းပပြီး အကြမ်းဖက်စစ်တပ်၊ မီးရှို့စစ်တပ်ကို အလိုမရှိကြောင်း ကြွေးကြော်ဆန္ဒပြခဲ့ကြပါတယ်။

ဓာတ်ပုံ - ရွာပေါင်းစုံသပိတ်၊ အားမာန်သစ်သပိတ်