ယမန်နေ့ညက ကားဗုံးပေါက်ကွဲပြီးနောက် တွေ့ရစဉ်။ (ဓာတ်ပုံ - CJ)

"ပညာရှင်တွေ ၊အလုပ်သမားတွေကို ခေါ်တဲ့နေရာမှာ နိုင်ငံရေးနောက်ခံ သန့်ရှင်းရင်အားလုံးခေါ်ပါတယ်"

MNDAA ပြောရေးဆိုခွင့်ရှိသူ လီကျာဝင်းနဲ့ မေးမြန်းခန်း

ကိုးကန့်တပ်မတော်(MNDAA) အပါအဝင် ညီနောင်မဟာမတ် ၃ဖွဲ့ဟာ ကိုးကန့်ဒေသအပါအဝင် ရှမ်းမြောက်မှာ စစ်ကောင်စီတပ်ကို ၂၀၂၃ ​အောက်တိုဘာ ၂၇ ရက်ကစပြီး​တော့ထိုးစစ်ဆင်တိုက်ခိုက်တဲ့ ၁၀၂၇ စစ်ဆင်ရေးဟာ ၂၀၂၄ ဇန်နဝါရီ လဆန်းမှာပဲ ကိုးကန့်ဒေသ တစ်ခုလုံးကို MNDAAက ထိန်းချုပ်ထားနိုင်ပါတယ်။ တရုတ်နိုင်ငံရဲ့ ကြားဝင်မှု​ကြောင့် ၂၀၂၄ ဇန်နဝါရီ ၁၀ ရက်မှာ ဟိုက်ဂင်သ​​ဘောတူညီချက်နဲ့ ရှမ်း​မြောက်မှာတိုက်ပွဲ​တွေရပ်နားခဲ့ပါတယ် ။အပစ်ရပ်ထားတဲ့ကာလမှာ MNDAA ဟာ ကိုးကန့်​ဒေသမှာ ပြန်လည်ထူထောင်ရေး လုပ်ငန်းတွေ စတင်ဆောင်ရွက်နေပါတယ်။ ကိုးကန့်ဒေသပြန်လည်ထူထောင်ရေးအခြေအနေတွေနဲ့ပတ်သက်ပြီး ကိုးကန့်တပ်မတော်
(MNDAA) ပြောရေးဆိုခွင့်ရှိသူ လီကျာဝင်းကို People's Spring ကဆက်သွယ်မေးမြန်းထားတာကို ဖော်ပြလိုက်ပါတယ်။

▪︎ရန်ရန်/People’s Spring


မေး။ကိုးကန့်ဒေသ အလုပ်သမားတွေ ခေါ်ရာမှာ သူလျှိုတွေ အေးဂျင့်တွေ မပါလာဖို့ စိစစ်ဖို့ ထုတ်ပြန်ထားတာတွေ့ရတယ်။အဲဒီအပေါ်ရှင်းပြပေးပါလား။

ဖြေ။ကျနော်တို့က အလုပ်သမား အလုပ်အမှုဆောင် ကော်
မတီ ဖွဲ့မှာပေါ့နော်။ပြင်ပကလာတဲ့ အလုပ်သမား မှန်သမျှ အဲဒီ အလုပ်အမှုဆောင်ကော်မတီမှာ သွားပြီးတော့ အချက်
အလက်တွေ တင်ရမယ်။ သတင်းတွေ ပို့ရမယ်။ လိုအပ်တဲ့ စစ်ဆေးမှုတွေကိုလည်း အဲဒီကော်မတီမှာပဲ လုပ်သွားမှာ ဖြစ်တယ်။ အကယ်၍ လုပ်ငန်းပိုင်ရှင်တွေက အလုပ်သမားကို လိုချင်ရင်လည်း ဒီကော်မတီမှာ အလုပ်သမားကို လာပြီးတော့ ခေါ်လို့ရတာပေါ့။ အလုပ်အမှုဆောင်ကော်မတီက မခေါ်ချင်လည်းရတယ်။ မိမိကိုယ်ကိုယ် လမ်းကြောင်းရှိရင် မိမိ ကိုယ့်ဆန္ဒနဲ့ကိုယ် ခေါ်လို့ရတယ်။ ဒါပေမဲ့ ဒီခေါ်လာတဲ့သူက နိုင်ငံရေးနောက်ခံ မသန့်ရှင်းဘူး သို့မဟုတ် သူလျှိုတွေဖြစ်နေရင်တော့ ပိုင်ရှင်ကို ကျနော်တို့က အရေးယူမှာပေါ့။

မေး။ ဗမာလူမျိုးတွေ ကိုးကန့်ဒေသ ဝင်ရောက်နေထိုင်ခွင့်နဲ့ အလုပ်လုပ်ခွင့်နဲ့ ပတ်သတ်ပြီး မူဝါဒ ဘယ်ရှိရှိပါသလဲ။ဘာအသိပေးလိုပါသလဲ။

ဖြေ။ဗမာလူမျိုးအပေါ် မူဝါဒရယ်ဆိုတာ မရှိပါဘူး ကျနော်တို့က။ ပြင်ပကလာတဲ့ တိုင်းရင်းသားပြည်သူလူထုအားလုံး မှန်သမျှကို ကျနော်တို့က အလုပ်အမှုဆောင်ကော်မတီကနေ တဆင့်ပဲလုပ်သွားမှာ ဖြစ်တယ်။ ဒီလူမျိုး ခွဲခြားပြီးတော့ ပြဌာန်းထားတဲ့ မူဝါဒဆိုတာ မရှိပါဘူးဗျ။

မေး။MNDAA တပ်ဖွဲ့ဝင်အချို့ လူ့အခွင့်အရေး ချိုးဖောက်ခဲ့တဲ့ သတင်းတွေ တွေ့ရလို့ ဒါနဲ့ ပတ်သက်ပြီး ဘာပြောလိုပါသလဲ။

ဖြေ။ကျနော်တို့ MNDAA တပ်ဖွဲ့ဝင်တွေ လူ့အခွင့်အရေးချိုးဖောက်တယ်ဆိုတာ ကျနော်ကတော့ လုံး၀ မယုံဘူးဗျ။ ဘာဖြစ်လို့လဲဆိုရင် ကျနော်တို့ ဒီတော်လှန်ရေးတလျှောက်
လုံးမှာ ရောက်တဲ့နေရာတိုင်း ကျနော်တို့ ပြည်သူလူထုရဲ့ ကြိုးတမျှင် အပ်တစ်ချောင်းကိုမှ ကျနော်တို့ ယူတာမရှိပါဘူး။ ကျနော်တို့ ရောက်တဲ့နေရာတိုင်း ရောက်တိုက်ရွာတိုင်း သွားပြီး စုံစမ်းကြည့်လို့ရပါတယ်။ ကျနော်တို့ ပစ္စည်းလုယက်တာတို့ ခိုးယူတာတို့ ဆိုတာ လုံး၀မရှိဘူး။ ကျနော်တို့ လိုချင်တဲ့ အရာတွေကို ကျနော်တို့က ပိုက်ဆံပေးပြီး ဝယ်တယ် အမြဲတမ်း။ ဒါကတော့ ကျနော်တို့ တော်လှန်ရေးတလျှောက်မှာ ဒီလိုပဲ လာခဲ့တာဖြစ်တယ်။ ကျနော်တို့က စည်းကမ်းကြီး သုံးရပ်နဲ့ မူဝါဒ ၈ရပ်ကို တစိုက်မတ်မတ်လိုက်နာဆောင်ရွက်ခဲ့တဲ့ စစ်မှန်တဲ့ ပြည်သူ့စစ်သားဖြစ်တယ်။

မေး။ကိုးကန့်ဒေသ ပြန်လည်ထူထောင်ရေးလုပ်နေတာ ဘယ်အဆင့်လောက်ရောက်ပြီလဲ။ပြန်လည်ထူထောင်ရေးကာလမှာ ကြုံနေရတဲ့ အခက်အခဲက ဘာတွေရှိနေပါသလဲ။

ဖြေ။ပြန်လည်ထူထောင်ရေးမှာတော့ အခက်အခဲတော့ရှိမှာပဲ။ အခုလမ်းကြောင်းတွေ ပိတ်နေတယ်။ ဖုန်းလိုင်းတွေ အင်တာနက်လိုင်းတွေ မီးတွေ အကုန်လုံး ပြတ်တောက်ခံနေရတယ်။ ဒီလို အခြေအနေမျိုးမှာ ကျနော်တို့ ပြန်လည်ထူ
ထောင်နေရတယ်ဆိုတော့ အခက်အခဲ ပေါင်းစုံတော့ ရင်
ဆိုင်နေရပါတယ်။ ဒါပေမဲ့ တဖြည်းဖြည်း ပြန်ကောင်းသွားမှာပါ။ ဒါကျနော်တို့လည်း တောက်လျှောက်ကြိုးစားနေပါတယ်။

မေး။ပြန်လည်ထူထောင်ရေးကာလမှာ လူသားအရင်းမြစ် လိုအပ်ချက်ရှိတဲ့အခါ တော်လှန်ရေးထဲကလူတွေကို ခေါ်ဖို့ရှိပါသလား။ အထူးသဖြင့် CDMတွေကို နေရာပေးဖို့ အလုပ်ပေးဖို့ရှိပါသလား။

ဖြေ။ပညာရှင်တွေ ၊အလုပ်သမားတွေကို ခေါ်တဲ့နေရာမှာ နိုင်ငံရေးနောက်ခံ သန့်ရှင်းရင်အားလုံးခေါ်ပါတယ်နော်။

မေး။ဟိုင်ဂင် သဘောတူညီချက်နဲ့ အပစ်ရပ်ထားတော့ တစ်ဖက်မှာလည်း ပြည်သူတွေကလည်း စစ်အာဏာရှင်ဖြုတ်ချရေးတိုက်ပွဲအတွက် ညီနောင်သုံးဖွဲ့ကိုမျှော်လင့်နေတော့ ဒီအပေါ်ဘာပြောပေးလို့ရမလဲ။

​ဖြေ-ဟိုင်ဂင်သဘောတူညီချက်က ကျနော်လည်း ပြောစရာမရှိဘူး။ ကျနော်လည်း ကောင်းကောင်းမသိတာပါနော်။

-ကျေးဇူးတင်ပါတယ်။

ပြန်လည်ထူ​​ထောင်​ရေးကာလကိုဖြတ်သန်း​နေပြီဖြစ်တဲ့ ကိုးကန့်​ဒေသ ။ဓါတ်ပုံ- The Kokang

တာဟန်းရပ်ကွက်အပါအဝင် ကလေးမြို့ရှိ စစ်ကောင်စီစခန်းများကို PDFများ တိုက်ခိုက်

စောနွေဦး/People's Spring

စစ်ကိုင်းတိုင်း၊ ကလေးမြို့ပေါ်တွင် ယနေ့နံနက် ၄နာရီကစတင်ပြီး တိုက်ပွဲဖြစ်ပွားနေကြောင်း အဆိုပါမြို့ခံများက ပြောသည်။

ကလေးမြို့ပေါ်ရှိ စစ်ကောင်စီ စစ်ဆေးရေးဂိတ်ဖွင့်ထားသည့် တာဟန်းရပ်ကွက်အပါအဝင် စက္ကန့်၊မြို့လှ၊ အင်ဒိုင်းကုန်း၊ ကံကြီးကျေးရွာများရှိ စစ်ကောင်စီစခန်းများကို ကာကွယ်ရေးအဖွဲ့များက တပြိုင်နက်တည်း ဝင်ရောက်တိုက်ခိုက်ခဲ့ခြင်းဖြစ်သည်။

"တိုက်ပွဲတွေဖြစ်နေတုန်းပါပဲ။ အခြေအနေတွေက ထုတ်ပြန်ဖို့ ခဏစောင့်ပါဦး"ဟု အဆိုပါတိုက်ပွဲတွင် ပါဝင်တိုက်ခိုက်နေသော CDF-KKG ပြန်ကြားတာဝန်ခံက ပြောသည်။

ကလေးမြို့ပေါ်ရှိ စစ်ကောင်စီ စခန်းနှင့် ကလေးမြို့မြောက်ပိုင်း ကံကြီးကျေးရွာရှိ စစ်ကောင်စီစခန်းတို့ကို အဓိကဝင်ရောက်တိုက်ခိုက်ခဲ့ခြင်းဖြစ်သည်ဟု ကာကွယ်ရေးတပ်ဖွဲ့ဝင်များထံမှ သိရသည်။

ယနေ့နံနက်ပိုင်းတွင် စစ်ကောင်စီတပ်စွဲထားသည့် ကံကြီးကျေးရွာစခန်းကို ကာကွယ်ရေးတပ်များက သိမ်းပိုက်နိုင်ပြီဖြစ်ဟုလည်း ဒေသခံတစ်ဦးက ပြောသည်။

အဆိုပါစခန်းသည် စစ်ကောင်စီတပ်နှင့် ပျူစောထီးများ အထိုင်ချထားသည့်နေရာ ဖြစ်သည်။

တိုက်ခိုက်မှုကို ချင်းတော်လှန်ရေးတပ်များဖြစ် သည့် CDF-KKG၊ CNDFနှင့် ဒေသခံကာကွယ်ရေးတပ်များဖြစ်သည့် RKDF၊ ကလေးမြို့ခံကာကွယ်ရေးတပ်များနှင့် ကလေး(ပကဖ) များက!ဆောင်ရွက်ခဲ့ခြင်း ဖြစ်သည်။

တိုက်ခိုက်မှုကြောင့် စစ်ကောင်စီဘက်က လက်နက်ကြီးများဖြင့် ပစ်ခတ်နေပြီး စစ်ကောင်စီတပ်က ပစ်ခတ်သည့် လက်နက်ကြီးကြောင့် အရပ်သားပြည်သူများထိခိုက်မှုများရှိသည်ဟုလည်း ကာကွယ်ရေးတပ်များက ပြောသည်။

"မနက်ကတည်းက သေနတ်သံတွေကော၊ လက်နက်ကြီးသံတွေကော ကြားနေရတယ်"ဟု ကလေးမြို့ခံတစ်ဦးက ပြောသည်။

စစ်ကောင်စီကတပ်က ကလေးမြို့အနီးအနားကို လေကြောင်းမှ တိုက်ခိုက်မှုများပြုလုပ် နေသည်ဟုလည်း ဒေသခံများက ပြောသည်။

၂၀၂၁ မတ်လအတွင်းက နာမည်ကျော် တာဟန်းရပ်ကွက်သပိတ်အား စစ်ကောင်စီတပ်က အကြမ်းဖက်ဖြိုခွင်းနေစဥ်။(ဓာတ်ပုံ - CJ)

KNUတပ်မဟာ(၆)နယ်မြေတွင် စစ်ကောင်စီ ဗုံးကြဲ၍ အမျိုးသမီးတစ်ဦး သေဆုံး

မောင်မောင်/People’s Spring

ကရင်အမျိုးသားအစည်းအရုံး(KNU) တပ်မဟာ (၆)နယ်မြေ ဒူးပလာယာခရိုင် ဝင်းရေးမြို့နယ် အတွင်း စစ်ကောင်စီ၏ ဒရုန်းဖြင့် ဗုံးသီးချတိုက်ခိုက်မှုကြောင့် (၅၀)ကျော်အရွယ် အမျိုးသမီးတစ်ဦး သေဆုံးခဲ့ကြောင်း KNU ဗဟိုက ထုတ်ပြန်ထားသည်။

ဖေဖော်ဝါရီ ၁၆ရက် နံနက်တွင် စစ်ကောင်စီ၏ အမြောက်တပ်(၃၁၅)တပ်ရင်းမှ ဒရုန်းဖြင့် ဗုံကြဲလာ၍ လို့ရှားရွာနေ အမျိုးသမီးတစ်ဦးမှာ ဦးခေါင်း ကျည်ထိဒဏ်ရာဖြင့် သေဆုံးခဲ့ရသည်ဟု ဆိုသည်။

ထို့ပြင် စစ်ကောင်စီ၏ ဒရုန်းဖြင့်တိုက်ခိုက်မှုကြောင့် စံပြရွာမှအမျိုးသမီးတစ်ဦး ကျည်ထိ ဒဏ်ရာရရှိခဲ့သည်ဟု ဖော်ပြထားသည်။

ဗုံးသီး ကျရောက်ပေါက်ကွဲမှုကြောင့် ကွမ်းသီးပင်နှင့် ရာဘာပင်များ ပျက်စီးမှုများရှိခဲ့ကြောင်း ထုတ်ပြန်သည်။

စစ်ကောင်စီတပ်မှ တိုက်ပွဲဖြစ်ပွားခြင်းမရှိသော ပြည်သူနေ ကျေးရွာအတွင်းသို့ လက်နက်ကြီးဖြင့် ရမ်းသမ်းပစ်ခတ်ခြင်း ၊ ရုန်းဖြင့် တိုက်ခိုက်ခြင်းများ လုပ်ဆောင်လျက်ရှိကြောင်း ဖော်ပြသည်။

စစ်ကောင်စီသည် KNU နယ်မြေများ၌ လက်နက်ကြီးပစ်ခတ်ခြင်း၊ လေကြောင်း တိုက်ခိုက်ခြင်းများ မကြာခဏ ပြုလုပ်ခဲ့၍ အရပ်သားသေဆုံးထိခိုက်မှုများ ဖြစ်ပေါ်လျက်ရှိရာ ၂၀၂၃အတွင်း လက်နက်ကြီး၊လေကြောင်း တိုက်ခိုက်မှုအပါအဝင် စစ်ကောင်စီ၏ လက်ချက်ကြောင့် KNUနယ်မြေရှိ အရပ်သား ၂၀၀ခန့် သေဆုံးခဲ့ရကြောင်း အသိပေးထားသည်။

စစ်ကောင်စီ ဒရုန်းဖြင့် ဗုံးသီးချတိုက်ခိုက်ခဲ့သည့် အပိုင်းအစများအား တွေ့ရစဉ်။(ဓာတ်ပုံ - KNU)

ရေးအခြေစိုက် စစ်ကောင်စီပစ်မှတ်နေရာများအား တော်လှန်ရေးပူးပေါင်းတပ် တိုက်ခိုက်

▪️စစ်ကောင်စီတပ် အထိနာဟုဆို

ထားမြတ်/People’s Spring

မွန်ပြည်နယ် ရေးမြို့နယ်ရှိ ရေးတံတားကြီး ဂိတ်စခန်းကို တော်လှန်ရေးပူးပေါင်းတပ်က ဖေဖော်ဝါရီ ၁၉ရက်ကတိုက်ခိုက်ရာ အထိနာခဲ့သည်ဟု မွန်ပြည်တော်လှန်ရေးတပ်(MSRF)က အသိပေး ထုတ်ပြန်သည်။

MSRF ၊ Dawns Wings ၊ Ye Air Force - YAF၊ ဝေဟင်တပ်ခွဲ ဒေါနတပ်ခွဲ - ၆ ၊ ကံပေါက်တပ်ခွဲ ဒေါနတပ်ခွဲ - ၄ ၊ YGF ရေးပြောက်ကျားတပ် ဒေါနတပ်ခွဲ - ၃၊ ရေးသိမ်းငှက်၊ ABSDF တပ်ရင်း - ၁ ၊ မွန်ပြည်နယ်အခြေပြုတော်လှန်ရေးအဖွဲ့အစည်း - MSRO ၊ Ye Defense Force - YDF ၊ DDT စသည့် တော်လှန်ရေးမဟာမိတ်ပူးပေါင်းတပ်ဖွဲ့များက ရေးမြို့နယ်ရှိ စစ်ကောင်စီ ပစ်မှတ် များအား တိုက်ခိုက်ခဲ့မှုကို MSRFက အသိပေးထားခြင်းဖြစ်သည်။

အဆိုပါ တိုက်ခိုက်မှုများအနက် ဖေဖော်ဝါရီ ၁၉ရက် နံနက်တွင် ရေးတံတားကြီးတွင် တပ်စွဲထားသော ရန်သူစစ်ကောင်စီများအား ဗုံးသီး များဖြင့် ဗုံးကြဲတိုက်ခိုက်ခဲ့ကြောင်း၊ ထို့ပြင် ရေးမြို့အခြေစိုက် စကခ - ၁၉ နှင့် ခလရ - ၆၁ တို့အား လက်နက်ကြီးဖြင့် သုံးကြိမ် ပစ်ခတ်တိုက်ခိုက်ခဲ့ကြောင်း ထုတ်ပြန်သည်။

ထို့ပြင် ရေးမြို့တံတားကြီးဂိတ်၌ တပ်စွဲထားသည့် ရဲကင်းကို လက်နက်ကြီးဖြင့် ပစ်ခတ်ရာ ရဲနှစ်ဦး သေဆုံးခဲ့ကြောင်း ဖော်ပြသည်။

ထိုသို့တိုက်ခိုက်ခံရသည့် စစ်ကောင်စီတပ်သည် ခလရ - ၆၁မှ အိမ်စီးကား ၆စီးဖြင့် ထိခိုက်ဒဏ်ရာရသူများအား သယ်ထုတ်သွားကြောင်း MSRFက ထုတ်ပြန်သည်။

ပူးပေါင်းတပ်ဖွဲ့သည် ဖေဖော်ဝါရီ ၁၉ရက် ညနေပိုင်း၌ စကခ(၁၉) တပ်ကိုလည်း တိုက်ခိုက်ခဲ့ကြောင်း အသိပေးသည်။

စစ်ကောင်စီဘက်ကလည်း ဖေဖော်ဝါရီ ၁၉ရက် တစ်ရက်အတွင်း လက်နက်ကြီး ပစ်ခတ်မှု အကြိမ် ၃၀ထက်မနည်း ပြုလုပ်ခဲ့သည်ဟု ဆိုသည်။

ဖေဖော်ဝါရီ ၁၂ရက်တွင်လည်း တော်လှန်ရေးမဟာမိတ်ပူးပေါင်းတပ်သည် ရေးမြို့အခြေစိုက် စကခ(၁၉) လက်အောက် ခလရ(၆၁)နှင့် ရေးမြို့နယ်အထွေထွေအုပ်ချုပ်ရေးမှူးရုံးသို့ ဗုံးသီးချ တိုက်ခိုက်ခဲ့ဟု ဖော်ပြသည်။

ထို့ပြင် ရေးတံတားအနီးရှိ ဘောင်ဘုတ်ရွာထိပ် ဝင်းဆီဆိုင်နောက်ကျော၌ စစ်ကောင်စီတပ် အင်အား ၆၀ခန့် တပ်စွဲလာကြောင်း သတင်းရ၍ SF-Z fixed wings drone အသုံးပြု ၆၀မမ ဗုံးသီးဖြင့် သွားရောက်ဗုံးကြဲတိုက်ခိုက်ခဲ့ကြောင်းလည်း အသိပေးထားသည်။

အဆိုပါ တိုက်ခိုက်ခံရပြီးနောက် ရန်သူ စစ်ကောင်စီဘက်မှ လူနာတင်ယာဉ် ၃စီး ဖြင့်လာရောက်သယ်ဆောင်သွားကြောင်း ပြည်သူများထံမှ သိရသည်ဟု MSRFက ဖော်ပြသည်။

ဖေဖော်ဝါရီ ၁၄ရက် နံနက်ကလည်း တော်လှန်ရေးမဟာမိတ် ပူးပေါင်းတပ်ဖွဲ့များမှအဖွဲ့များမှ စကခ - ၁၉ရှိ ခရိုင်အုပ်ချုပ်ရေးရုံးသို့ SF-Z Fixed Wings Drone သုံးပြီး ဗုံးသီးဖြင့် သွားရောက်ဗုံးကြဲတိုက်ခိုက်ခဲ့ပါသည်ဟု ထုတ်ပြန်သည်။

အဆိုပါတိုက်ခိုက်မှုများ၌ ပါဝင်ခဲ့သည့် ABSDF ကလည်း တိုက်ပွဲသတင်းများ ဖော်ပြအသိပေးထားရာ ABSDF တပ်ရင်း(၁)နှင့် မဟာမိတ်ပူးပေါင်းအဖွဲ့များ ရေးမြို့အခြေစိုက် စကခ - ၁၉၊ ရေးတံတားကြီးရှိ စစ်ကောင်စီတပ်များကို ဒရုန်း(Drone) ၊ လက်နက်ကြီးများဖြင့် တိုက်ခိုက်ခဲ့ဟု ဖော်ပြထားသည်။

ဒေါနစစ်ကြောင်း တောင်ပိုင်းတိုင်း စစ်ဒေသ ရုံးကလည်း ရေးမြို့နယ် တိုက်ပွဲသတင်းဖော်ပြရာ
ရေးမြို့နယ်တောင်ပိုင်းနှင့် ပြည်ထောင်စုလမ်းမအား စိုးမိုးနိုင်ရေးအတွက် ပူးပေါင်းတပ်များက
စကခ(၁၉) စစ်ရေးဌာနချုပ် လက်အောက်ခံ တပ်များနှင့် စကစ ထောက်တိုင်များကို အမြဲချေမှုန်းတိုက်ခိုက်လျက်ရှိသည်ဟု ဖော်ပြသည်။

ဖေဖော်ဝါရီ ၁၉ရက်တိုက်ပွဲ၌ ရဲ ၂ဦး သေဆုံးခဲ့ကြောင်း၊ ခလရ(၆၁) အတွင်းသို့ ဒဏ်ရာရသူများအား Mini Bus ဖြင့် သယ်သွားသည့်သတင်းရသော်လည်း ထိခိုက်သေဆုံး စုံစမ်းဆဲဖြစ်ကြောင်း အသိပေးသည်။

ခရိုင်ရုံးအတွင်း ဗိုလ်ချုပ်အဆင့်အပါအဝင် အရာရှိ(၆) ဦး နှင့် ဝန်ထမ်းများရှိနေကြောင်း စုံစမ်းသိရှိရသဖြင့် ခရိုင်ရုံးအားလည်း ဗုံးကြဲတိုက်ခိုက်ခဲ့ကြောင်း၊ ပူးပေါင်းတပ်များက တိကျသေချာသော စုံစမ်းမှုများနှင့် စစ်ရေးပစ်မှတ်များထိရောက်စွာ ပစ်ခတ်တိုက်ခိုက်ခဲ့သော်လည်း စစ်ကောင်စီက ကျေးရွာများအတွင်းသို့ လက်နက်ကြီးဖြင့် ပြန်လည်ပစ်ခတ်မှုများစွာပြုလုပ်ခဲ့သည်ဟု ဖော်ပြသည်။

တော်လှန်ရေးအင်အားစုများ နေရာအတွင်းသိူ့ ပြန်လည်ပစ်ခတ်ချင်းမျိုးမဟုတ်ဘဲ ပြည်သူ့လူထုအပေါ် အကြောက်တရားကြီးစိုးစေရန်အတွက် ကျေးရွာများအတွင်းသို့ ပစ်ခတ်ခဲ့ခြင်းဖြစ်ကြောင်း ထုတ်ပြန်ထားသည်။

မွန်ပြည်တော်လှန်ရေးတပ်(MSRF)မှ ရဲဘော်များအား တွေ့ရစဉ်။ (ဓာတ်ပုံ - MSRF)

စစ်မှု မထမ်းချင်လို့ ထွက်ပြေးလာတဲ့ မြန်မာတွေကို အလုပ်လုပ်ခွင့်ပေးဖို့ ထိုင်းအမတ် တိုက်တွန်း

-People's Spring

စစ်မှုမထမ်းချင်လို့ ထိုင်းနိုင်ငံကို ထွက်ပြေးလာတဲ့ မြန်မာ ဒုက္ခသည်တွေကို လက်ခံပေးပြီး ပြည်တွင်းမှာ အလုပ်လုပ်ခွင့် ပေးသင့်ကြောင်း ထိုင်းအတိုက်အခံ လွှတ်တော် အမတ်တဦးက အစိုးရက တိုက်တွန်းလိုက်ပါတယ်။

စစ်မှုထမ်း ဥပဒေကို တိမ်းရှောင်ချင်လို့ အပါအဝင် မြန်မာဖက်ကနေ အကြောင်းအမျိုးမျိုးနဲ့ တရားမဝင် ဝင်ရောက်လာသူတွေကို ဥပဒေကြောင်းအရ အရေးယူမယ်လို့ ထိုင်းဝန်ကြီးချုပ် ဆရက်သာ သာဗီဆင်က ပြောကြားခဲ့ပြီး မကြာခင်မှာပဲ FAIR ပါတီ ကိုယ်စားပြု လွှတ်တော်အမတ် ကန်နာဗီ ဆူယက်ဘ်ဆန်က အခုလို တိုက်တွန်းခဲ့တာ ဖြစ်ပါတယ်။

သူက နှစ်ဖက် ညှိနှိုင်းသဘောတူညီမှု ရယူပြီး အာဏာသိမ်း မြန်မာစစ်တပ်ဟာ ထိုင်းနိုင်ငံကို လုပ်သားတွေ တင်ပို့မှု ယာယီ ရပ်တန့်ထားတယ်လို့ ပြောပါတယ်။ မူလက မြန်မာနိုင်ငံသား ၇၀၀၊ ၈၀၀ လောက်ဟာ နယ်စပ်ဖြတ်ကျော်ပြီး ထိုင်းကို အလုပ်အကိုင်အတွက် လာရောက်နေကြကြောင်း၊ ရွှေ့ပြောင်း လုပ်သားတွေ ထိုင်းကို လာရောက်မှု ဆိုင်းငံ့ခြင်းဟာ မြန်မာဖက်က နိုင်ငံရေး အခြေအနေတွေနဲ့ ဘယ်လို ဆက်နွှယ်သလဲ ဆိုတာကို အတိအကျ မပြောနိုင်ပေမယ့် ထိုင်းကို ရောက်လာပြီးသူတွေကို အစိုးရက အတင်းအကျပ် ပြန်ပို့မယ် ဆိုရင်တော့ စိုးရိမ်စရာ ကိစ္စလို့ သတ်မှတ်သင့်ကြောင်း ကန်နာဗီက မှတ်ချက် ပေးခဲ့ပါတယ်။

မြန်မာနိုင်ငံသားတွေ ထိုင်းကို အလုံးအရင်း ဝင်ရောက်လာတယ် ဆိုတာဟာ တရားမဝင် ဥပဒေ ချိုးဖောက် ဝင်ရောက်ဖို့ ဆိုတာထက် သေဘေးကနေ တိမ်းရှောင်လာကြတာ ဖြစ်ကြောင်း၊ စစ်မြေပြင်ကို အတင်းအကျပ် တွန်းပို့ခံရပြီး ကိုယ်တိုင် သေမလား၊ သူတပါးကို သတ်ဖြတ်ရမလား ဆိုတာကို ရွေးချယ်ရမယ့် ကိစ္စကနေ ရှောင်တိမ်းလာကြတာသာ ဖြစ်ကြောင်းလည်း သူက ဆိုပါတယ်။

လုပ်သား တင်ပို့မှု ဆိုင်းငံ့ထားချိန်မှာ အခုလိုမျိုး စစ်မှုထမ်း ဥပဒေကြောင့် ထွက်ပြေးလာတဲ့ တရားမဝင် ခိုလှုံသူတွေကို အလုပ်အကိုင်တွေ ဖန်တီးပေးမယ်ဆိုရင် လူသားချင်း စာနာမှု ရှုထောင့်အရ အကျိုးရှိသလို လုပ်သား ပြတ်လပ်မှု ပြဿနာကိုလည်း ကုစား ဖြေရှင်းနိုင်မယ်လို့ ကန်နာဗီက အကြံပြုသွားခဲ့ပါတယ်။

လက်ရှိ အခြေအနေမှာတော့ စစ်မှုထမ်း ဥပဒေကို ရှောင်ရှားလိုတဲ့ လူငယ် အများအပြားဟာ အိမ်နီးချင်း ထိုင်းနိုင်ငံဆီ ထွက်ခွာဖို့ စိုင်းပြင်းနေပြီး နယ်စပ်မှာလည်း တရားမဝင် ဖြတ်ကျော်လာတဲ့ မြန်မာလူငယ်တွေကို နေ့စဉ်လိုလို ဖမ်းမိနေတယ်လို့ ထိုင်း လူဝင်မှု ကြီးကြပ်ရေးဌာန တာဝန်ရှိသူတွေက ပြောပါတယ်။

စစ်မြေပြင်တွေမှာ ဆက်တိုက် အရေးနိမ့်နေတဲ့ အာဏာသိမ်း စစ်ကောင်စီတွေဟာ လူငယ်တွေကို အဓိက ပစ်မှတ်ထားပြီး အတင်းအကျပ် စစ်ထဲဆွဲသွင်းမယ့် စစ်မှုထမ်း ဥပဒေကို လက်တွေ့ ကျင့်သုံးတော့မယ်လို့ ဖေဖော်ဝါရီ ၁၀ ရက်နေ့မှာ ကြေညာခဲ့တာ ဖြစ်ပါတယ်။

ကိုးကား: Bangkok Post

တာချီလိတ်မြိုတွင် ရဲအရာရှိကို အိုင်ဖုန်းလက်ဆောင်​ပေးပြီးပါဆယ်ဗုံးဖြင့်လုပ်ကြံ

ယောနသံ/People's Spring

ရှမ်းပြည်နယ်အရှေပိုင်းတာချီလိတ်မြို့၌ယမန်နေ့(ဖေဖော်
ဝါရီလ ၂၀ရက်)ညက စစ်ကောင်စီလက်အောက်ခံရဲအရာရှိတစ်ဦးသည် အိုင်ဖုန်းလက်ဆောင်ပါသည့် ပါဆယ်ဗုံးဖြင့် ဖောက်ခွဲလုပ်ကြံခံလိုက်ရကြောင်း People's Spring က စုံစမ်းသိရှိရသည်။

တာချီလိတ်မြို့ ဝိန်းကျောက်ရပ်ကွက်၊ ဗိုလ်ချုုပ်အောင်ဆန်းလမ်းမကြီးအနီး၊ ရွှေလင်းယုန် ဂေါက်ကွင်းအနီးတွင်ရပ်ထားသည့် Isuzu Double Cap ကားတစ်စီးသည် ယမန်နေ့ ည ၁၀ နာရီခန့်၌ ပေါက်ကွဲခဲ့သည်။ ထိုပေါက်ကွဲမှုသည်တာချီလိတ်မြို့ ဟောင်လိတ်နယ်မြေရဲစခန်းမှ နယ်ထိန်းရဲအရာရှိ ရာဆူဆိုသူကို အိုင်ဖုန်းလက်ဆောင်​ပေး၍ လုပ်ကြံတိုက်ခိုက်ခြင်းဟု ဒေသခံများကပြောသည်။

"ရာဆူကဒီမှာ ဂွင်မိထားတာ။ အထက်ကလည်း သူ့ဆို လွှတ်ထားတယ်။ လူမုန်းများတယ်။ရဲအချင်းချင်းလည်း ကြည့်မရတဲ့သူ။ သူ့ကို အိုင်ဖုန်းနောက်ဆုံး‌မော်ဒယ်လက်ဆောင်ဗူးပေးပြီး ဗုံးခွဲတာ"ဟု တာချီလိတ်မြို့မှ ရဲအရာရှိတဦးကပြောသည်။

ပေါက်ကွဲချိန်တွင် ကားအတွင်း၌ ရာဆူနှင့်အတူ ၎င်း၏အမျိုးသမီးလည်းရှိနေပြီး နှစ်ဦးစလုံးဒဏ်ရာအပြင်းအထန်ရသွားကာ တာချီလိတ်ဆေးရုံ၌ကုသ
နေကြောင်းရဲတပ်ဖွဲ့နဲ့နီးစပ်သူတစ်ဦးကပြောသည်။

ပေါက်ကွဲမှုဖြစ်ပွားသည့်နေရာသည် စစ်ကောင်စီတပ်စွဲထားသည့်နေရာနှင့်နီးသလို လောင်းကစားရုံများနှင့်လည်းနီးကြောင်း မြို့ခံများကပြောသည်။

တာချီလိတ်မြို့သည် ထိုင်း၊လာအိုနိုင်ငံတို့နှင့် ထိစပ်နေပြီးနာမည်ကျော် ရွှေတြိဂံဒေသ၌ပါဝင်နေသည်။လောင်းကစားဝိုင်းများ၊ ကျားဖြန့်လုပ်ငန်းများ၊ မူးယစ်ဆေးဝါးလုပ်ငန်းအများအပြားရှိပြီး စစ်ကောင်စီတပ်ဖွဲ့ဝင်များ၊ရဲတပ်ဖွဲ့ဝင်များနှင့် ဌာနဆိုင်ရာဝန်ထမ်းများသည် ယင်းလုပ်ငန်းများ၌ပါဝင်ပတ်သက်နေကြောင်း မြို့ခံများကပြော
သည်။ ထိုအပြင် ၁၀၂၇ စစ်ဆင်​ရေး​ကြောင့် ကိုးကန့်​​ဒေသမှ ​ရွေ့​ပြောင်းလာ​သော ကျားဖြန့်လုပ်ငန်းများလည်းရှိ​ကြောင်း​ဒေသခံအချို့က​ပြောသည်။

ရှမ်းပြည်နယ်ရဲတပ်ဖွဲ့၏ အကြီးဆုံးရာထူးဖြစ်သည့် ပြည်နယ်ရဲတပ်ဖွဲ့မှူးသည် ရဲမှူးချုပ်တင်ကိုကိုဖြစ်သည်။ စစ်တပ်မှအသွင်ပြောင်းဖြစ်သည့် ရဲမှူးချုပ်တင်ကိုကိုသည် ကျားဖြန့်လုပ်ငန်းများ၊ မူးယစ်ဆေးဝါးလုပ်ငန်းများ၌ ပါဝင်ပတ်သက်နေကြောင်း သတင်းများထွက်ပေါ်နေသည်။

ယခု ရဲအရာရှိတစ်ဦး ပါဆယ်ဗုံးဖြင့် တိုက်ခိုက်ခံရသည့်ဖြစ်စဉ်ကိုလည်း ပြင်ပသို့ပေါက်ကြားမှုမရှိစေရေး အထက်အရာရှိအဆင့်ဆင့်က နှုတ်ဖြင့် သတိ‌​ပေးထားကြောင်း စုံစမ်းသိရသည်။

ဗုံး​ပေါက်ကွဲပြီး​နောက်​ မြင်ကွင်း။ဓါတ်ပုံ-CJ

“ညနေခင်းသတင်းလွှာ”

ဒီနေ့ (ဖေဖော်ဝါရီ ၂၁ ရက်) ညနေခင်းသတင်းတွေကို People’s Spring က တင်ဆက်ပေးပါမယ်။

◾️စစ်ကောင်စီ တပ်စခန်းများကို AA ဆက်လက်ထိုးစစ်ဆင်နေ၊ အမြန်လက်နက်ချဖို့ သတိပေး

ရက္ခိုင်ပြည်နယ် မင်းပြားမြို့နယ် ကမ်းနီရွာအနီးရှိ စစ်ကောင်စီရဲ့ အမှတ်(၉)တိုင်းဗဟိုလေ့ကျင့်ရေးသင်တန်းကျောင်းကို ရက္ခိုင့်တပ်တော်(AA)ကို ထိုးစစ်ဆင်တိုက်ခိုက်နေတယ်လို့ ညီနောင်မဟာမိတ်သုံးဖွဲ့က သတင်းထုတ်ပြန်ပါတယ်။ အလားတူ အခြားသောမြို့များရှိ စစ်ကောင်စီရဲ့တပ်စခန်းများထဲမှ အချို့ကိုလည်း စတင်ထိုးစစ်ဆင်တိုက်ခိုက်နေတယ်လို့ ဆိုပါတယ်။ ရက္ခိုင့်တပ်တော်က အဲဒီရန်သူ့စခန်းများကို စောစီးစွာ လက်နက်ချအညံ့ခံဖို့ ထပ်မံသတိပေးလိုက်ပါတယ်။ စစ်ကောင်စီအနေဖြင့် ခုခံစစ်၊ ခွာစစ်မှ လွဲလို့ ရွေးချယ်စရာမရှိဘဲ ၎င်းတို့ရဲ့အထိုင်စခန်းများကို အသည်းအသန်ခုခံကာကွယ်နေရတယ်လို့ ညီနောင်သုံးဖွဲ့က ထုတ်ပြန်ပါတယ်။

◾️ကရင်လက်နက်ကိုင်များ ပြန်စုပြီး ဦးဆောင်မှု တစ်ခုတည်းအောက်မှ လုပ်ဆောင်သွားဖို့ KNU ဥက္ကဋ္ဌတိုက်တွန်း

ပြည်သူလူထုများရဲ့ လိုလားချက်များ ပြည့်စုံအောင်ဆောင်ရွက်နိုင်ဖို့ ကရင်လက်နက်ကိုင်များ ပြန်လည်စုစည်းပြီး အဖွဲ့တစ်ခုရဲ့ ဦးဆောင်မှုအောက်မှ လုပ်ဆောင်သွားဖို့ ကရင်အမျိုးသားအစည်းအရုံး(KNU)ဥက္ကဋ္ဌ ပဒိုစောကွယ်ထူးဝင်းက မနေ့က တိုက်တွန်းလိုက်ပါတယ််။ ကရင်အမျိုးသားအစည်းအရုံးမှ ထုတ်ပယ်ထားခံရတဲ့အဖွဲ့အစည်းဖြစ်စေ၊ ခွဲထွက်သွားတဲ့ အဖွဲ့အစည်းများ ဖြစ်စေ ကွဲပြားနေတဲ့ ကရင်အဖွဲ့အစည်း လက်နက်ကိုင်များ ပြန်လည်ပြီး စည်းစည်းလုံးလုံး၊ စုစုဝေးဝေး လုပ်ကိုင်ဆောင်ရွက်သွားဖို့ ကရင်အမျိုးသားအစည်းအရုံးရဲ့ စိတ်သဘောထားဆန္ဒ အစီအစဉ် တစ်ခုဖြစ်တယ်လို့ KNU ဥက္ကဋ္ဌက ဆိုပါတယ်။

◾️တာဟန်းရပ်ကွက်အပါအဝင် ကလေးမြို့ရှိ စစ်ကောင်စီစခန်းများကို PDFများ တိုက်ခိုက်

စစ်ကိုင်းတိုင်း၊ ကလေးမြို့ပေါ်မှာ ဒီနေ့ မနက်ပိုင်းကစလို့ တိုက်ပွဲဖြစ်ပွားနေတယ်လို့ မြို့ခံများက ပြောပါတယ်။ ကလေးမြို့ပေါ်ရှိ စစ်ကောင်စီ စစ်ဆေးရေးဂိတ်ဖွင့်ထားတဲ့ တာဟန်းရပ်ကွက်အပါအဝင် စက္ကန့်၊ မြို့လှ၊ အင်ဒိုင်းကုန်း၊ ကံကြီးကျေးရွာများရှိ စစ်ကောင်စီစခန်းများကို ကာကွယ်ရေးအဖွဲ့များက တပြိုင်နက် ဝင်ရောက်တိုက်ခိုက်ခဲ့တာလို့ သိရပါတယ်။ တိုက်ပွဲတွေ ဆက်ဖြစ်နေပြီး ဒီနေ့ မနက်ပိုင်းမှာ စစ်ကောင်စီတပ်စွဲထားတဲ့ ကံကြီးကျေးရွာစခန်းကို ကာကွယ်ရေးတပ်များက သိမ်းပိုက်နိုင်ပြီလို့ ဒေသခံတစ်ဦးက ပြောပါတယ်။ တဖက်မှာလည်း စစ်ကောင်စီက လက်နက်ကြီးများဖြင့် ပစ်ခတ်နေပြီး စစ်ကောင်စီတပ် ပစ်ခတ်တဲ့ လက်နက်ကြီးကြောင့် အရပ်သားပြည်သူများ ထိခိုက်မှုများရှိတယ်လို့ ကာကွယ်ရေးတပ်များက ပြောပါတယ်။

◾️တန့်ဆည် ကံထူးမနယ်မြေရဲစခန်းကို လေကြောင်းပစ်ကူများကြားမှ PDFများ တိုက်ခိုက်သိမ်းပိုက်မီးရှို့

စစ်ကိုင်းတိုင်း တန့်ဆည်မြို့နယ်မှာ စစ်ကောင်စီတပ်နဲ့ ပျူစောထီး အင်အား ၃၀ ခန့် တပ်စွဲထားတဲ့ ကံထူးမနယ်မြေရဲစခန်းကို လေကြောင်းတိုက်ခိုက်မှုများကြားမှ ပြည်သူ့ကာကွယ်ရေးပူးပေါင်းတပ်ဖွဲ့များက ဒီနေ့မနက် တိုက်ခိုက်သိမ်းယူပြီး စခန်းကို မီးရှို့ဖျက်ဆီးလိုက်တယ်လို့ သိရပါတယ်။ စခန်းကို ကာကွယ်ရေးရဲဘော်များက တိုက်ခိုက်နေရင်း တပြိုင်နက် မီးရှို့ဖျက်ဆီးခဲ့တာဖြစ်ပြီး စစ်ကောင်စီကလည်း ဂျက်ဖိုက်တာ နှစ်စီးဖြင့် ပစ်ခတ်နေတယ်လို့ ပြည်သူ့ကာကွယ်ရေးရဲဘော်တစ်ဦးက ပြောပါတယ်။ တိုက်ပွဲအတွင်း ကာကွယ်ရေးရဲဘော်များ ထိခိုက်မှုမရှိဘူးလို့ ကနဦးသိရပါတယ်။

◾️ဟိုပုံးမြို့နယ်တိုက်ပွဲအတွင်း စစ်ကောင်စီနဲ့ PNOပြည်သူ့စစ် ငါးဦးသေဆုံး

ရှမ်းပြည်တောင်ပိုင်း၊ ဟိုပုံးမြို့နယ်မှာ မနေ့ကတိုက်ပွဲအတွင်း စစ်ကောင်စီနဲ့ ပြည်သူ့စစ်ပူးပေါင်းတပ်ဖွဲ့မှ ငါးဦးသေဆုံးပြီး သေနတ်လေးလက်နဲ့ လက်နက်ခဲယမ်းများ သိမ်းဆည်းရရှိတယ်လို့ ပအိုဝ်းအမျိုးသားလွတ်မြောက်ရေးတပ်မတော်(PNLA)ပြော​ရေးဆိုခွင့်ရှိသူ ခွန်ရိန်းယံက​ပြောပါတယ်။ မနေ့က ဟိုပုံးမြို့နယ် တနေရာမှာ လုံခြုံရေးဆိုင်ရာလှုပ်ရှားနေတဲ့ PNLAစစ်ကြောင်းကို စစ်ကောင်စီနဲ့ လက်အောက်ခံပြည်သူ့စစ်များက လာရောက်တိုက်ခိုက်သဖြင့် နေ့တဝက််နီးပါး တိုက်ပွဲဖြစ်ပွားခဲ့တာပါ။ ဆီဆိုင်မြို့နဲ့ PNLA လှုပ်ရှားရာ နယ်​မြေများမှာ ​​ဇန်နဝါရီလမှ စတင်ဖြစ်ပွား​တဲ့ တိုက်ပွဲများမှာ စစ်​ကောင်စီတပ်နဲ့ PNO ပြည်သူ့စစ်များ​သေဆုံးဒဏ်ရာရသူ ၁၀၀ကျော်ရှိ​နေပြီလို့ သိရပါတယ်။

◾️တာချီလိတ်မြို့မှာ ကားဗုံးပေါက်၊ လူတစ်ဦးဒဏ်ရာပြင်းထန်

ရှမ်းပြည်နယ်အရှေ့ပိုင်း တာချီလိတ်မြို့မှာ မနေ့ညက ကားဗုံးပေါက်မှုဖြစ်ပွားခဲ့ပြီး လူတစ်ဦး ဒဏ်ရာအပြင်းအထန်ရရှိခဲ့တယ်လို့ မြို့ခံများက ပြောပါတယ်။ ည ၁၀နာရီခန့်က တာချီလိတ်မြို့ ဝိန်းကျောက်ရပ်ကွက်၊ ဗိုလ်ချုုပ်အောင်ဆန်းလမ်းမကြီးအနီး၊ ရွှေလင်းယုန် ဂေါက်ကွင်းအနီးမှာ ရပ်ထားတဲ့ Isuzu Double Capယာဉ်တစ်စီးအတွင်း ပေါက်ကွဲခဲ့တာလို့ ဆိုပါတယ်။ ပေါက်ကွဲမှုဖြစ်ပွားတဲ့နေရာဟာ စစ်ကောင်စီတပ်စွဲထားတဲ့ နေရာနှင့်နီးသလို လောင်းကစားရုံများနှင့်လည်းနီးတယ်လို့ မြို့ခံများက ပြောပါတယ်။

◾️မြိုင်မှာ လက်နက်ခဲယမ်းနှင့်အတူ အလင်းဝင်လာတဲ့ ရဲတပ်သားကို ကျပ်သိန်း၅၀ ချီးမြှင့်

မကွေးတိုင်း၊ မြိုင်မြို့နယ်မှာ ရဲတပ်သားတစ်ဦး လက်နက်ခဲယမ်းများယူလာပြီး အလင်းဝင်လာလို့ မြိုင်(ပကဖ)အဖွဲ့က ကျပ်သိန်း၅၀ ချီးမြှင့်ခဲ့ပါတယ်။ မြိုင်မြို့နယ်၊ ကန်နီပျူစောထီးကျေးရွာမှာ ၂နှစ်နီးပါး တာဝန်ကျခဲ့တဲ့ ရဲတပ်သားရဲအောင်ဟာ ဖေဖော်ဝါရီ ၁၉ ရက်က အူစီသေနတ် (၁)လက်၊ ကျည်ဘောက် (၂)ခု ၊ ၉ မမကျည် ၁၇တောင့်ဖြင့် အလင်းဝင်လာလို့ ကျပ် သိန်း ၅၀ ချီးမြှင့်ခဲ့တာလို့ မြိုင်(ပကဖ)အဖွဲ့ တာဝန်ရှိသူက ပြောပါတယ်။ ကာကွယ်ရေးတပ်များရဲ့ ပိတ်ဆို့ဖြတ်တောက်မှုများကြောင့် ကန်နီပျူစောထီးရွာမှာ စားနပ်ရိက္ခာခက်ခဲကာ ဆန်ပြုတ် သုံးလနီးပါးသောက်ခဲ့ရတယ်လို့ အလင်းဝင်လာတဲ့ ရဲတပ်သားက ဆိုပါတယ်။

◾️မန္တလေးကျောက်ဝိုင်း အသံတိတ်သပိတ်ပါဝင်ပြီးနောက် စစ်ကောင်စီက စည်းကမ်းချက် ၂၀ကျော် ထပ်ထုတ်

မန္တလေးမြို့၊ မဟာအောင်မြေကျောက်ဝိုင်းရှိ ဆိုင်ခန်းများ အသံတိတ်သပိတ် ပါဝင်ပြီးနောက် စည်းကမ်းချက် အချက် ၂၀ကျော်ထပ်ထုတ်ကာ မလိုက်နာပါက ဆိုင်ခန်းသိမ်းထောင်ချမယ်လို့ စစ်ကောင်စီက ခြိမ်းခြောက်ပါတယ်။ ဖေဖော်ဝါရီ ၁ ရက်က အာဏာသိမ်းမှု (၃)နှစ်ပြည့် အသံတိတ်သပိတ်မှာ မဟာအောင်မြေကျောက်ဝိုင်းမှ ဆိုင်ခန်းများ ပိတ်ထားမှုကြောင့် ရက်နှစ်ပတ်အကြာ ဖေဖော်ဝါရီ ၁၄ ရက်မှာ အချက် ၂၃ ချက်ပါ စည်းကမ်းချက်များကို ထုတ်ပြန်ခဲ့ပါတယ်။ စည်းကမ်းချက်များမှာ အကြောင်းပြချက်် မယ်မယ်ရရမရှိဘဲ ထုတ်ပြန်ခြင်းသာဖြစ်တယ်လို့ ကျောက်ဝိုင်းအတွင်း အလုပ်လုပ်နေသူများက ပြောပါတယ်။