(စစ်ကောင်စီက စစ်မှုထမ်းဥပ​ဒေ လက်ကမ်းစာဆောင်များ လိုက်ဝေနေစဥ်။ ဓာတ်ပုံ-စကစ)

"ည​နေခင်းသတင်း"

ဒီနေ့ (ဖေဖော်ဝါရီ ၁၉ ရက်) ညနေခင်းသတင်းတွေကို People’s Spring က တင်ဆက်ပေးပါမယ်။

◾️မန္တလေး Passport ရုံးမှာ တန်းစီရာမှ လူများလွန်း၍ အသက်ရှုရပ်ပြီး အမျိုးသမီး ၂ ဦးသေဆုံး

မန္တလေးမြို့၊ နိုင်ငံကူးလက်မှတ်ထုတ်ပေးရေး Passport ရုံးမှာ တန်းစီရာမှ လူများလွန်းတာကြောင့် အသက်ရှုရပ်ပြီး အမျိုးသမီး ၂ ဦးသေဆုံးခဲ့တယ်လို့ မြို့ခံများက ပြောပါတယ်။ ဒီနေ့ မနက် ၂ နာရီခန့်မှာ မန္တလေးမြို့၊ အောင်မြေသာစံမြို့နယ်၊ ၁၂လမ်းရှိ နိုင်ငံရေးကူးလက်မှတ်ထုတ်ပေးရေးရုံး(Passportရုံး)မှာ တန်းစီတိုးကြရာမှ လူအုပ်ပိ၊ အသက်ရှုကြပ်ကာ သတိလစ်သွားတဲ့ အမျိုးသမီး ၃ဦးအား အရေးပေါ်ပို့ဆောင်ခဲ့ရာ ၂ ဦးသေဆုံးခဲ့တယ်လို့ သွားရောက်ကူညီခဲ့သူများက ပြောပါတယ်။ ဒါ့အပြင် လူငယ်အချို့လည်း လူအုပ်ပိကာ ဒဏ်ရာရခဲ့တယ်လို့ သိရပါတယ်။ သေဆုံးသူများမှာ ညောင်ကွဲရပ်ကွက်မှ အသက် ၃၉ နှစ်အရွယ် မခိုင်ဝေနဲ့ အသက် ၅၃ နှစ်အရွယ် မဌေးဌေးဝင်းတို့ဖြစ်ပါတယ်။

◾️စစ်မှုထမ်း ဥပဒေကို နည်းလမ်းမျိုးစုံဖြင့် ဆန့်ကျင်တိုက်ဖျက်ရာမှာ ပူးပေါင်းကြဖို့ KNU တိုက်တွန်း

အာဏာသိမ်းစစ်ကောင်စီက ထုတ်ပြန်တဲ့ ပြည်သူ့စစ်မှုထမ်းဥပဒေကို နည်းလမ်းမျိုးစုံဖြင့် ဆန့်ကျင်တိုက်ဖျက်ရာမှာ ပူးပေါင်းပါဝင်ကြဖို့ ကရင်အမျိုးသားအစည်းအရုံး(KNU)ဗဟိုက ဒီနေ့ ထုတ်ပြန်ပါတယ်။ အဲဒီဥပဒေဟာ တစ်နိုင်ငံလုံး စစ်နွှံအတွင်း နက်ရှိုင်းစွာ ကျရောက်စေဖို့ လုပ်ဆောင်တဲ့ လုပ်ရပ်ဖြစ်သကဲ့သို့ စစ်အာဏာရှင် သက်ဆိုးရှည်စေတဲ့ လုပ်ရပ်ဖြစ်တာကြောင့် KNUက ဆန့်ကျင်ကန့်ကွက်ကြောင်း ဖော်ပြပါတယ်။ မျိုးဆက်သစ်လူငယ်များနဲ့ တိုင်းရင်းသား ပြည်သူလူထုတရပ်လုံးက စစ်ကောင်စီရဲ့ မတရားထုတ်ပြန်ထားတဲ့ ဥပဒေ အကောင်အထည်ဖော်မှု လုပ်ငန်းမှာ မပါဝင်ခြင်း၊ နိုင်ငံရေးအံတုမှု လုပ်ငန်းများဖြင့် ဆန့်ကျင်ခြင်း၊ တော်လှန်ရေးအဖွဲ့အစည်းများမှာ ပါဝင်ဆောင်ရွက်ခြင်း၊ အချင်းချင်း အကာအကွယ်ပေးတဲ့ လုပ်ငန်းများ အပါအဝင် နည်းလမ်းမျိုးစုံဖြင့် ပြုလုပ်သော ဆန့်ကျင်တိုက်ဖျက်ရေး လုပ်ငန်းများမှာ ပူးပေါင်းလုပ်ဆောင်ကြဖို့ KNUက တိုက်တွန်းပါတယ်။ အခုလိုတရားမဝင်သော ဥပဒေများဖြင့် စစ်ကောင်စီက လူငယ်မျိုးဆက်နဲ့ လုပ်သားအရင်းအမြစ်မျိုးဆက်တစ်ခုကို အတင်းအကြပ် တပ်သားသစ်စုဆောင်းပြီး စစ်ပွဲနွံအတွင်းသို့ ဆွဲသွင်းခြင်းကို ပြည်သူလူထုက လိုက်နာဖို့ မလိုအပ်ဘူးလို့လည်း ဖော်ပြပါတယ်။

◾️စစ်ကောင်စီက စစ်ရှုံးဖို့သေချာတဲ့ တပ်စခန်းများကို မီးရှို့ဖျက်ဆီးကာ ခွာစစ်ဆင်နေ

စစ်ကောင်စီဟာ စစ်ရေးအရ ရှုံးနိမ့်ဖို့ ရာနှုန်းပြည့် သေချာနေတဲ့ စစ်စခန်းများ၊ ပွိုင့်ကုန်းများကို မီးရှို့ဖျက်ဆီးကာ ခွာစစ်ဆင်နေခြင်းတို့ကို ညီနောင်မဟာမိတ်တပ်များ သိမ်းပိုက်ရယူဖို့ ကြိုးစားနေတဲ့ မြို့တွေမှာ အခုရက်များအတွင်း ခပ်စိပ်စိပ်ပြုလုပ်လာခဲ့တယ်လို့ မြောက်ပိုင်းညီနောင် မဟာမိတ်သုံးဖွဲ့က သတင်းထုတ်ပြန်ပါတယ်။ ရက္ခိုင်ပြည်နယ် မြေပုံမြို့နယ်၊ ဟင်းခရော်‌ကျေးရွာအနောက်မြောက်ဘက် တစ်မိုင်ခွဲကျော်ရှိ “ပွိုင့် (၄၀၂)” နဲ့ “ပွိုင့် (၄၀၈)” ကုန်းကို စစ်ကောင်စီက ဆုံးရှုံးလက်လွှတ်ဖို့ သေချာတာကြောင့် မနေ့ ညနေပိုင်းက စခန်းကို စွန့်ခွာသွားတယ်လို့ ဆိုပါတယ်။ စခန်းစွန့်ခွာရာမှာ ၎င်းတို့ရဲ့ ပွိုင့်ကုန်းရှိ စစ်လက်နက်ခဲယမ်းများ၊ လက်နက်ကြီးများကို ၎င်းတို့ကိုယ်တိုင် မီးရှို့ဖျက်ဆီးခဲ့ပြီး ၎င်းပွိုင့်ကုန်းမှ စစ်ကောင်စီတပ်ဖွဲ့ဝင်များ သယ်ယူလို့ရတဲ့ လက်နက်ခဲယမ်းများကို စစ်ရဟတ်ယာဉ်များဖြင့် လေးကြိမ်တိုင်တိုင် အမ်း၊ အနောက်ပိုင်းတိုင်းစစ်ဌာနချုပ်သို့ ရွေ့ပြောင်းသွားခဲ့တယ်လို့ ဖော်ပြပါတယ်။ မနေ့က ရက္ခိုင်ဒေသအတွင်း နှစ်ဖက်ရင်ဆိုင်တိုက်ပွဲများမှာ ပုံမှန်ရှိနေခဲ့ပြီး စစ်ကောင်စီဟာ အပြစ်မဲ့အရပ်သား ပြည်သူလူထုများကို ဖမ်းဆီးခြင်း၊ ရပ်ရွာများကို မီးရှို့ဖျက်ဆီးခြင်း၊ မြို့ရွာများကို လေကြောင်းမှ ဗုံးကြဲတိုက်ခိုက်ခြင်းတို့ကို ပုံမှန်ပြုလုပ်နေခဲ့တယ်လို့ အသိပေးပါတယ်။

◾️လောင်းလုံးနဲ့ ကျွန်းစုမြို့နယ်မှာ စစ်ကောင်စီတပ်နဲ့ ပျူစောထီးအဖွဲ့ကို PDF တိုက်ခိုက်

တနင်္သာရီတိုင်း၊ လောင်းလုံးမြို့နယ်နဲ့ ကျွန်းစုမြို့နယ်တို့မှာ စစ်ကောင်စီတပ်နဲ့ ပျူစောထီးအဖွဲ့များကို မိုင်းဆွဲတိုက်ခိုက်ခြင်းနဲ့ ပစ်ခတ်တိုက်ခိုက်ခြင်းများ လုပ်ဆောင်ခဲ့တယ်လို့ သက်ဆိုင်ရာ တော်လှန်ရေးတပ်ဖွဲ့များက ပြောပါတယ်။ လောင်းလုံးနယ်၊ ကျောက်နီမော်ကျေးရွာရှိ စစ်ကောင်စီတပ်များ စစ်ဆေးရေးလုပ်ဆောင်လေ့ရှိတဲ့ ရဲချောင်းလမ်းဆုံမှာ လောင်းလုံးမြို့နယ် ပြည်သူ့ကာကွယ်ရေးတပ်ဖွဲ့ (LLPDF)က ဖေဖော်ဝါရီ ၁၅ ရက်မှာ မိုင်းကွင်းများချကာ စောင့်ဆိုင်းနေစဥ် ညနေပိုင်း လာရောက်စုံစမ်းတဲ့ ပျူစောထီးတစ်ဦးကို လက်ရဖမ်းဆီးဖို့ ကြိုးပမ်းခဲ့ပေမယ့် ပြန်လည်ခုခံခဲ့လို့ အသေဖမ်းမိခဲ့တယ်လို့ သိရပါတယ်။ အလားတူ ကျွန်းစုမြို့နယ်မှာလည်း စစ်ကောင်စီတပ်ကို ကျွန်းစု(ပကဖ)နှင့် ပူးပေါင်းတပ်များက တစ်ပတ်ကျော်ကြာ ပြောက်ကျားစနစ်ဖြင့် တိုက်ခိုက်ခဲ့တယ်လို့ ကျွန်းစု(ပကဖ)က ပြောပါတယ်။

◾️မန္တလေး၊ စစ်ကိုင်းနဲ့ မကွေးတို့မှာ စစ်တပ်က စစ်မှုထမ်းဥပဒေလက်ကမ်းစာစောင်များ လိုက်ဝေနေ

မန္တလေး၊ စစ်ကိုင်းနဲ့ မကွေးတိုင်းတို့ရှိ မြို့နယ်အချို့မှာ စစ်ကောင်စီက စစ်မှုထမ်းဥပဒေနဲ့ပတ်သက်တဲ့ လက်ကမ်းစာစောင်များ လိုက်ဝေနေတယ်လို့ ဒေသခံတွေက ပြောပါတယ်။ ဖေဖော်ဝါရီ ၁၀ ရက်မှာ အာဏာသိမ်းစစ်တပ်က ထုတ်ပြန်အသက်သွင်းလိုက်တဲ့ စစ်မှုထမ်းဥပဒေကြောင့် ဒေသအသီးသီးရှိ PDF တပ်ရင်းတပ်ဖွဲ့များထံ ဆက်သွယ်ဝင်ရောက်သူများပြားလာခဲ့ရာ ပြည်သူများ မစိုးရိမ်ကြဖို့ဆိုကာ စစ်ကောင်စီက လက်ကမ်းစာစောင်များ လိုက်ဝေဝါဒဖြန့်နေတာပါ။ မန္တလေးမြို့ပေါ်နဲ့ သပိတ်ကျင်း၊ စစ်ကိုင်းတိုင်း မုံရွာနဲ့ မကွေးတိုင်း မြို့နယ်အချို့မှာ စစ်မှုထမ်းဥပဒေနှင့်ပတ်သက်တဲ့ ပြည်သူများကို ဖြောင်းဖျထားတဲ့ လက်ကမ်းစာစောင်များကို မနေ့ကနဲ့ ဒီနေ့မှာ လက်လံဖြန့်ဝေနေတာပါ။ လက်ကမ်းစာစောင်များကို လုံခြုံရေးအပြည့်ချကာ လမ်းသွားလမ်းလာများကို ဖြန့်ဝေခဲ့တာလို့ ဒေသခံများက ပြောပါတယ်။

မင်းတပ်မြို့ ရပ်ကွက်တစ်ခုလျင် လူ ၁၁၅ဦးစစ်မှုထမ်းခိုင်းရန် စစ်ကောင်စီ လုပ်ဆောင်နေဟုဆို

မောင်မောင်/People’s Spring

ချင်းပြည်နယ် မင်းတပ်မြို့ရှိ ပြည်သူများကို စစ်မှုထမ်းခိုင်းရန် စစ်ကောင်စီက ဆောင်ရွက်နေပြီး ရပ်ကွက်တစ်ခုလျင်လူဦးရေ ၁၀၀ကျော်စီစာရင်း ကောက်ခံရန်ရှိနေကြောင်း မင်းတပ် ဒေသခံ သတင်းရင်းမြစ်က အသိပေးသည်။

မင်းတပ်မြို့ရှိ စံပြရပ်ကွက်၊ အနောက်ရပ်ကွက်၊ အရှေ့ပြင်ရပ်ကွက်၊ ဘဝသစ်ရပ်ကွက်တို့တွင် နေထိုင်သော ပြည်သူများအား အကြမ်းဖက် စကစအုပ်စုမှ စစ်မှုထမ်းရန် တစ်ရပ်ကွက်အမျိုးသား ၇၀ ဦး၊ အမျိုးသမီး ၄၅ ဦး ပါဝင်နိုင်ရန် စတင်စာရင်းကောက်ခံကြတော့မည်ဟု မင်းတပ်သတင်းများကို ပုံမှန်ဖော်ပြနေသည့် သတင်းရင်းမြစ်က လူမှုကွန်ရက်တွင် ရေးသားထားသည်။

"အသက်ကန့်သတ်ချက်ကို အဓိကမထားဘဲ လူဦးရေ ပြည့်မှီဖို့ဘဲလိုတယ်လို့ကြားရပါတယ်။ အမျိုးတွေအနေနဲ့ ဂရုစိုက်သွားလာသတိထားကြဖို့လိုအပ်ပါမယ်”ဟုလည်း သတင်းရင်းမြစ်က သတိပေးထားသည်။

စစ်ကောင်စီအနေဖြင့် စစ်မှုထမ်းရန် စာရင်းကောက်ရုံမျှဖြင့် ပြည်သူလူထုကပါဝင်မည်မဟုတ်ကြောင်း ဒေသခံက ပြောသည်။

"အကြမ်းနည်းသုံးရင်တော့ တွေ့ရာလူစွဲရင်တော့ လူရနိုင်ပေမယ့် သာမန်စာရင်းကော်ကရုံနဲ့တော့ မရဘူး ဟုတ်တယ်။ ခုချိန်တောင် ရွာဘက်တွေ ရှောင်နေကြပြီ” ဟု မင်းတပ်ဒေသခံ တစ်ဦး
က ပြောသည်။



ပြီးခဲ့သည့် ရက်ပိုင်းက စစ်ကောင်စီက ကုန်တင်လေယာဉ်ဖြင့် လေထီး အသုံးပြု ပို့လာသည့် အထုပ်များတွင် ကျည်၊ရိက္ခာများအပြင် ယူနီဖောင်းများလည်းပါဝင်ကြောင်း

သတင်းရင်းမြစ်ကပြောပြထားပြီး အသေးစိတ် အတည်ပြုနိုင်ရန် စုံစမ်းနေသည်ဟု ဆိုသည်။

စစ်ကောင်စီသည် ဖေဖော်ဝါရီ ၁၄ရက်က မင်းတပ်မြို့ (၂၇၄)တပ်သို့ လေထီးဖြင့်အထုပ် ၁၀ထုပ်ခန့် ပစ်ချသွားသည်ဟုဒေသခံက ပြောသည်။

ယခင်က ပခုက္ကူမြို့ဘက်မှ မော်တော်ယာဉ်ဖြင့် ရိက္ခာခဲယမ်းများပို့ဆောင်လေ့ရှိသော်လည်း လက်ရှိတွင် စစ်ကောင်စီ အင်အားလျော့နည်းမှုနှင့်ဒေသတွင်း ကာကွယ်ရေးတပ်များ အားကောင်းလာမှုကြောင့် မင်းတပ်ကိုလေထီး အသုံးပြု ရိက္ခာထုပ်များပို့လာခြင်းဖြစ်သည်ဟု ဒေသခံက ပြောသည်။

စစ်မှုထမ်းဥပ‌ဒေနှင့်ပတ်သက်ပြီး စစ်ကောင်စီက ကျေးရွာနှင့် ရပ်ကွက်များတွင် လက်ကမ်းစာစောင်များဖြန့်ဝေ လိုက်လံစည်းရုံးနေကြောင်း ဒေသခံပြည်သူများက လူထုနွေဦးသို့ ​ပြောသည်။

မန္တလေး၊ ဧရာဝတီ၊ပဲခူးတိုင်းနှင့် မကွေးတိုင်းရှိ ဒေသခံများ၏ပြောဆိုချက်အရ စျေးများ အပါအဝင် လူစည်းကားရာ နေရာများ၌ စစ်ကောင်စီ လက်ဝေခံများက လက်ကမ်းစာစောင်များဖြန့်ဝေခြင်းဟု ဆိုသည်။

"စျေးထဲမှာကို တရားဝင် ဖြန့်နေတာ။မယူရင် ယူတဲ့အထိကို လိုက်ပေးတာ။အဲဒါ လူတိုင်းစေ့ပေးနေတာ။ အစတော့ လက်ကမ်းကြော်ငြာ ထင်တာ။နောက်မှ အဲဒီစာရွက်မှန်းသိတာ"ဟု ယနေ့ နံနက်ပိုင်းက ဧရာဝတီတိုင်း၊ ကျိုက်လတ်မြို့စျေးသို့ ရောက်ရှိခဲ့သူက ရှင်း​ပြသ​ည်။

ထို့အတူ မကွေး၊ ပဲခူးနှင့် မန္တလေးတိုင်းတို့တွင်လည်း ယမန်နေ့ညပိုင်းကစပြီး စစ်ကောင်စီခန့်အုပ်ချုပ်ရေးမှူးများက ကျေးရွာအချို့တွင် စစ်မှုထမ်းဆောင်ရေး လက်ကမ်းစာစောင်များဖြန့်ဝေခဲ့ကြောင်း သိရသည်။

)

မင်းတပ်မြို့ ကျန်းမာရေးဌာနရုံး၌ တွေ့ရသော စစ်ကောင်စီတပ်သားများ။ (ဓာတ်ပုံ - CJ)

ပဲခူးရိုးမအတွင်းတိုက်ပွဲ စစ်ကောင်စီ​သေဆုံးထိခိုက်မှုများ

ယောနသံ/People's Spring

မင်းလှမြို့နယ်တွင် ​ဖေ​ဖော်ဝါရီ ၁၈ ရက်ကဖြစ်ပွားသောတိုက်ပွဲလေးကြိမ်၌ စစ်‌ ကောင်စီဘက်မှ ၄၀ဦးခန့်သေဆုံးပြီး ၁၆ဦး ဒဏ်ရာရကာ ပြည်သူ့ကာကွယ်ရေးရဲဘော်တစ်ဦးကျဆုံးခဲ့ကြောင်း သာယာဝတီခရိုင် တပ်ရင်း(၃၈ဝ၂) တပ်ခွဲ (၅) နှင့် အမှတ်(၂) စစ်ဒေသခွဲ မှ တာဝန်ရှိသူတို့ကအတည်ပြု
သည်။

ပဲခူးတိုင်း၊ သာယာဝတီခရိုင်၊ မင်းလှမြို့နယ်အပိုင် ပဲခူးရိုးမအတွင်းရှိ မြို့ချောင်း - စိန်ကန့်လန့် ရိုးမဖြတ်ကျော်လမ်း ခါချဉ်တောင်နှင့်အနီးတဝိုက်တွင်​ဖေ​ဖော်ဝါရီ ၁၈ ရက် တိုက်ပွဲများအတွင်း စစ်ကောင်စီတပ်ဖွဲ့ဝင်၄၀ဦးထက်မနည်းသေဆုံးသည့်သတင်းမှန်ကန်ကြောင်း အမှတ်(၂) စစ်ဒေသခွဲ ဒုတိယစစ်ဒေသခွဲမှူးရဲဘော်တင်ဦးက People's Spring အား အတည်ပြု​ပြောကြားသည်။

​ဖေ​ဖော်ဝါရီ ၁၈ ရက် နံနက် ၁၀နာရီခန့်က ခါချဉ်တောင်ပေါ်သို့အင်အား၄၀ခန့်ဖြင့် တက်လာသောစစ်ကောင်စီစစ်ကြောင်းကို (၄၈)ပေါက် ဖုတ်တက်ကြီးအဆင်းတွင် မိုင်းဆွဲတိုက်ခိုက်ခဲ့ရာ ၌ စစ်‌ကောင်စီဘက်မှ ၁‌၅ဦးသေဆုံးပြီး ခုနစ်ဦး ဒဏ်ရာရခဲ့သည်ဟုဆိုသည်။ ထို့အပြင် မွန်းတည့် ၁၂နာရီခန့်တွင် စစ်ကူလာသည့် အင်အား ၂၅ဦးပါ ဖောကားအား ဟိုင်းယုလမ်းဆုံနှင့် ပျ ဉ်းကတိုးခင်းကြား၌ ၄၀မမများဖြင့် စောင့်ကြို ပစ်ခတ်သဖြင့် စစ်‌ကောင်စီဘက်မှ ၁၀ဦးသေဆုံးပြီး ခုနစ်ဦး ဒဏ်ရာရခဲ့ကြောင်း သာယာဝတီခရိုင် တပ်ရင်း(၃၈ဝ၂) တပ်ခွဲ (၅)က သတင်းထုတ်ပြန်သည်။

ညနေ ၃နာရီနှင့် ၅နာရီခွဲခန့်တွင်လည်း ခါချဉ် တောင်ပေါ်သို့ စစ်ကောင်စီတပ်ဖွဲ့ဝင်များ ထပ်တက်လာရာပက်ကွေ့
ကြီးအဆင်းနှင့် ရှောက်ပင်ချောင်းအနီးမှစောင့်ကြိုတိုက်
ခိုက်ခဲ့ရာ တိုက်ပွဲဖြစ်ပွားခဲ့သည်ဟုသိရသည်။ထိုတိုက်ခိုက်မှုနှစ်ကြိမ်၌ စစ်ကောင်စီတပ်ဖွဲ့ဝင်၁၅ဦးသေဆုံးပြီး နှစ်ဦး ဒဏ်ရာရရှိခဲ့သည်ဟုလည်းဆိုသည်။ စစ်​ကောင်စီတပ်​သေဆုံးထိခိုက်မှုများကို People's Spring ကသီးခြားအတည်မပြုနိုင်ပါ ။

မြို့ချောင်း - စိန်ကန့်လန့် ရိုးမဖြတ်ကျော်လမ်းသည် ပြည်သူ့ကာကွယ်ရေးတပ်ဖွဲ့များ ထိန်းချုပ်ထားသည့်နေရာဖြစ်သည်။တိုက်ပွဲဆက်လက်ဖြစ်ပွားနိုင်၍ပြည်သူများအနေဖြင့် ပဲခူးရိုးမ အတွင်း သွားလာမှုများ မပြုလုပ်ကြရန် သာယာဝတီခရိုင် တပ်ရင်း(၃၈ဝ၂) တပ်ခွဲ (၅)ကအသိပေးထားသည်။

ပဲခူးတိုင်းအတွင်းရှိ PDF တပ်ဖွဲ့ဝင်အချို့ ။
ဓါတ်ပုံ-NUG-MOD

မုံရွာမြို့၌ စစ်ကောင်စီတပ်သားများ ပစ်ခတ်ခံရပြီး သေနတ်နှစ်လက်သိမ်းဆည်းခံရ

အောင်ဇေယျ/People's Spring

စစ်ကိုင်းတိုင်း၊ မုံရွာမြို့၊ အောင်ချမ်းသာရပ်ကွက်ရှိ စစ်ကောင်စီတပ်သားများ ပစ်ခတ်တိုက်ခိုက်ခံရပြီး သေနတ်နှစ်လက်သိမ်းဆည်းခံလိုက်ရကြောင်း အဆိုပါမြို့ခံများက ပြောသည်။

ယနေ့ (ဖေဖော်ဝါရီ ၁၉ ရက်) နံနက် ၉နာရီခန့်က မုံရွာမြို့ပေါ်၊ အောင်ချမ်းသာရပ်ကွက်ရှိ အ.ထ.က ဂိတ်၌ တပ်စွဲထားသော စစ်ကောင်စီတပ်ကို PDF ရဲဘော်များက ဝင်ရောက်ပစ်ခတ်တိုက်ခိုက်ခဲ့ခြင်းဖြစ်ကြောင်း မြို့ခံများက ပြောသည်။

"ဂိတ်တဲထဲ ရေနွေးသောက်နေတုန်း ဝင်ပစ်သွားတာ။ ပစ်တာ ‌‌ခြောက်ချက်။ အသက်ငယ်တဲ့သူက တပ်ရင်း(၁၆)ထဲက နေရာတင် အသက်ငင်။ အသက်ကြီးတဲ့တစ်ယောက်က နည်းနည်းပြေးနိုင်သေးတယ်။ လက်နက်နှစ်လက် ရသွားတယ်။"ဟု မုံရွာရပ်ကွက် ကင်းထောက်များကပြောသည်။

ထို့အပြင် စစ်ကောင်စီတပ်သား နှစ်ဦးဒဏ်ရာရရှိကာ MA3အမျိုးအစား သေနတ်နှစ်လက်အား သိမ်းဆည်းနိုင်ခဲ့ကြောင်းသလ္လာဝတီကာကွယ်ရေးတပ်ဖွဲ့ - TLWDFက အသိပေးသည်။

"နေရာက မုံရွာမြို့ပေါ်တနေရာပါ။ ဖြစ်စဉ်ကတော့ စစ်ဆေးရေးလုပ်နေတဲ့ အကြမ်းဖက်စစ်သား ၂ ယောက်ကို ရဲဘော်၃ ယောက်နဲ့ ပြောက်ကျားနည်းဗျုဟာအတိုင်း ရုတ်တရက်တိုက်ခိုက်ပစ်ခတ်ပြီး သေနတ်သိမ်းယူခဲ့တာပါ။ပစ်ခက်ခံရတဲ့ စစ်သား ၂ယောက်ကတော့ သေဆုံးခြင်းမရှိပါဘူး။ မသေအောင်ပစ်ခက်ပြီး အဓိကရည်ရွယ်ချက်ဖြစ်တဲ့ ရန်သူ့လက်နက်ကိုယ့်လက်နက်ဆိုတဲ့ ရည်မှန်းချက်ကို အကောင်အထည်ဖော်ခဲ့တာပါ။"ဟု သလ္လာဝတီ ကာကွယ်ရေးတပ်ဖွဲ့ - TLWDF၏ တာဝန်ရှိသူက ပြောသည်။

အဆိုပါပစ်ခတ်မှုကို သလ္လာဝတီ ကာကွယ်ရေးတပ်ဖွဲ့ - TLWDFနှင့် Monywa M4 တပ်ဖွဲ့မှ ရဲဘော်များပူးပေါင်းတိုက်ခိုက်ခဲ့ခြင်း ဖြစ်သည်။

ဇန်နဝါရီ ၂၁ ရက်ကလည်း မုံရွာမြို့၌ လက်ဖက်ရည်ဆိုင်ထိုင်နေသည့် ဒုရဲအုပ် ကျော်ဇင်ဦး ပစ်ခတ်ခံရပြီး သေဆုံးခဲ့သေးသည်။

(သိမ်းဆည်းရမိ​သော သေနတ်နှစ်လက်အား တွေ့ရစဥ်။ ဓာတ်ပုံ-သလ္လာဝတီ ကာကွယ်ရေးတပ်ဖွဲ့ - TLWDF)

မံစီမြို့နယ် စီခမ်းကြီးဗျူဟာစခန်းကို KIA ပူးပေါင်းတပ် သုံးရက်ကြာထိုးစစ်ဆင်ပြီး​နောက်သိမ်းပိုက်ရရှိ

▪︎စစ်ကောင်စီက လေကြောင်း ပစ်ကူ အကြိမ် ၈၀ ခန့်အသုံးပြု ခုခံခဲ့သော်လည်း စခန်းလက်လွှတ်ဆုံးရှုံး

ဆန်အောင်/People’s Spring

ကချင်ပြည်နယ် မံစီမြို့နယ် စီခမ်းကြီး(ဂျယ်ခမ်း)စစ်ကောင်
စီ စခန်းကို ကချင်လွတ်လပ်ရေးတပ်မတော်(KIA) ပူးပေါင်းတပ်က ယနေ့ ညနေပိုင်း၌ သိမ်းယူနိုင်ခဲ့ကြောင်း ကချင်စစ်ရေးသတင်းရင်းမြစ်က ပြောသည်။

စစ်ကောင်စီ၏ ဗျူဟာစခန်းတစ်ခုဖြစ်သည့် အဆိုပါ တပ်စခန်းကို KIA၊ ရက္ခိုင့်တပ်တော်(AA)၊ ကချင်ဒေသ ပြည်သူ့ကာကွယ်ရေးတပ်(KPDF) တို့က ဖေဖော်ဝါရီ ၁၇ရက် မနက်တွင် စတင်ထိုးစစ်ဆင်ခဲ့ရာ စစ်ကောင်စီကလေ
ကြောင်း ပစ်ကူသုံးအပြင်းအထန် ခုခံခဲ့သော်လည်း ယနေ့ (ဖေဖော်ဝါရီ ၁၉ရက်) ညနေ ၅နာရီ ၄၅၌ သိမ်းနိုင်ခဲ့သည်ဟု စစ်ရေးသတင်းရင်းမြစ်က ပြောသည်။

“စခ(ကျဆုံးနဲ့ လက်နက်ခဲယမ်း သိမ်းဆည်းရရှိမှု စာရင်း အသေးစိတ် မသိရသေးဘူး။ ဒီနေ့တိုက်လေယာဉ်မျိုးစုံနဲ့ ၃၇ကြိမ် ဗုံးလာကြဲတယ်။ (စီခမ်းကြီး)စခန်းက စခန်းအကြီး၊ အင်အားများတယ်။ “ ဟု စစ်ရေးသတင်းရင်းမြစ်က ပြော
သည်။

စစ်ကောင်စီသည် ဖေဖော်ဝါရီ ၁၈ရက်တွင် လေကြောင်း ပစ်ကူ ၂၆ကြိမ်ထက်မနည်း၊ ဖေဖော်ဝါရီ ၁၇ရက်တိုက်ပွဲတွင်လေကြောင်း ပစ်ကူ ၁၄ကြိမ်ထက်မနည်း ပစ်ကူပေးခဲ့သည်ဟုဆိုသည်။ထို့ကြောင့် တိုက်ပွဲသုံးရက်အတွင်း လေကြောင်း ပစ်ကူ အကြိမ် ၈၀ ခန့် အသုံးပြု ခုခံခဲ့သော်လည်း အရေးပါသည့် ဗျူဟာစခန်းကို ဆုံးရှုံးခဲ့ရသည်။

စစ်ကောင်စီ၏ လေကြောင်းတိုက်ခိုက်မှုများကြောင့် စီခမ်းကြီးရွာရှိ ပြည်သူလူထုနေအိမ်များ၊စာသင်ကျောင်းများပျက်စီးခဲ့ရပြီး အရပ်သားသေဆုံးထိခိုက်မှုများလည်း ရှိသည်။ အနည်းဆုံး အရပ်သား ၆ဦးသေဆုံးပြီး ၃၀ကျော်ဒဏ်ရာရရှိခဲ့သည်ဟု ဆိုသည်။

KIAသည် မံစီမြို့နယ်ရှိ စစ်ကောင်စီ၏ မံဝိန်းကြီးတပ်စခန်း၊ ကိုက်ထိပ် တပ်စခန်း တို့ကိုလည်း ဇန်နဝါရီလအတွင်းက တိုက်ခိုက်သိမ်းပိုက်ထားသည်။

စီခမ်းကြီး စခန်းသိမ်းတိုက်ပွဲနှင့်ပတ်သက်ပြီး KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူအား မေးမြန်းရာ “စခန်း သိမ်းနိုင်အောင် ဆက်လက်တိုက်ပွဲဝင်နေတုန်းပါ”ဟု ​ဖေ​ဖော်ဝါရီ ၁၉ ရက် ညနေပိုင်းက ပြောကြားထားသည်။