▪︎အ​တွေးအမြင်​ဆောင်းပါး

"ချစ်ရဲဘော်များသို့ ပေးစာ"

-ရေဆန် (​​​ခေါ်) ပဒိုမန်းရှာလားဖန်း

ဒီစာမှာတော့ တော်လှန်ရေးခေါင်းဆောင်ကောင်း တစ်ယောက် ဖြစ်ဖို့ အခြေခံအားဖြင့် ဘာတွေ လိုအပ်ပါသလဲ၊ တော်လှန်ရေး ခေါင်းဆောင်ကောင်းတစ်ယောက်ကို ဘယ်ပေတံနဲ့ တိုင်းတာမလဲဆိုတဲ့ပြဿနာကို ဆွေးနွေးသုံးသပ်ကြည့်လိုပါတယ်။ ဘာ့ကြောင့်လဲဆိုရင် ကရင်လူ့အဖွဲ့အစည်းမှာ ခေါင်းဆောင်ကောင်းအများအပြားလိုနေလို့ပါပဲ။ အထူးသဖြင့်ကရင့်တော်လှန်ရေးကြီးအတွက် ခေါင်းဆောင်ကောင်းတွေ အထောင်အသောင်း လိုအပ်နေလို့ပါပဲ။

သာမန်ခေါင်းဆောင်ကောင်းတစ်ယောက် ဖြစ်ဖို့ဆိုတာ မလွယ်ဘူး။ တော်လှန်ရေး လှုပ်ရှားမှုတစ်ရပ်ကို ဦးဆောင်မှု ပေးနိုင်စွမ်းတဲ့ တော် လှန်ရေး ခေါင်းဆောင်ကောင်းတစ်ယောက်ဖြစ်ဖို့ဆိုတာ သာပြီးတောင် ခက်ခဲပါတယ်။ အထူးသဖြင့် အဆုံးအဖြတ်သဘောဆောင်တဲ့ သမိုင်း ကာလတစ်ခုမှာ တော်လှန်ရေးကို ဦးစီးခေါင်းဆောင်နိုင်စွမ်းရှိတဲ့ တော် လှန်ရေးခေါင်းဆောင်ကောင်း တစ်ယောက်ဖြစ်ဖို့ အခက်ခဲဆုံးပါပဲ။ တော်လှန်ရေးတစ်ရပ်မှာ ဒီလိုခေါင်းဆောင်မှုမျိုး ရရှိထားပြီဆိုရင် လည်း အလွန်တန်ဖိုး ရှိပါတယ်။ များသောအားဖြင့် လူတွေဟာ တန်ဖိုး ကြီးမားလှတဲ့ တော်လှန်ရေး ခေါင်းဆောင်ကောင်းတစ်ယောက်ကို လက်လွတ် ဆုံးရှုံးသွားပြီး နောက်မှသာ ဒီခေါင်းဆောင်ကောင်းရဲ့တန်ဖိုး ကြီးမားမှုကို သိကြပါတယ်။

ကရင့်တော်လှန်ရေးခေါင်းဆောင်ကြီး စောဘဦးကြီးရဲ့ သမိုင်းဖြစ်စဉ်ကို သေသေချာချာ ကြည့်ရင် ဒီအချက်ကိုမြင်နိုင်တယ်။ ကျွန်တော်တို့ဟာတော်လှန်ရေးကြီး ရှည်ကြာလာလေလေ၊ တော်လှန်ရေး အခက်အခဲများနဲ့ ကြုံရလေလေ၊ စောဘဦးကြီးရဲ့ အခြေခံမူတွေ စောဘဦးကြီးရဲ့ဂုဏ်ကျေးဇူးတွေ တန်ဖိုးကြီးမားမှုတွေကို ပိုပြီး သိမြင် လာလေလေပါပဲ။ ပွင့်လင်းဖြောင့်မတ်ခြင်းနှင့် သစ္စာစောင့်သိမှုဟာ တော်လှန်ရေးသမား တစ်ယောက်၊ တော်လှန်ရေးခေါင်းဆောင်ကောင်းတစ်ယောက်ရဲ့ မုချရှိရမည့် အရည် အချင်းတွေပါပဲ။

သမိုင်းမှာတွေ့ရတဲ့ တော်လှန်ရေးခေါင်းဆောင်ကောင်းတွေဟာ ဒီ အရည် အချင်းမျိုး ကိုယ်စီရှိကြတယ်။ ဒီအခြေခံအရည်အချင်း မရှိဘူးဆိုရင် ဘယ်လောက်ပဲ ပညာတတ်တတ်၊ ဘယ်အကြောင်းကြောင့်ပဲ တော်လှန်ရေးခေါင်းဆောင်ဖြစ်နေနေ၊ တော်လှန်ရေးကို ဆုံးခန်းတိုင်ခေါင်းဆောင်နိုင်မှာ မဟုတ်ဘူး။ ပြည်သူအပေါ်၊ မိမိ အမျိုး သားများအပေါ်၊ မိမိ ရဲဘော်ရဲဘက်များအပေါ်၊ ပွင့်လင်းဖြောင့်မတ်ခြင်းနဲ့ သစ္စာရှိခြင်း တို့ဟာ တော်လှန်ရေးခေါင်းဆောင်ကောင်းတို့ရဲ့ ထူးခြားချက်နဲ့ ဂုဏ်အရည်အသွေး တို့ပဲ ဖြစ်တယ်။

ဒုတိယအချက်ကတော့ ကိုယ်ကျိုးစွန့်အနစ်နာခံခြင်း ပါပဲ။ ပဓာနမထားဘဲ ကိုယ်ကျိုးစွန့် အနစ်နာခံလေ့ရှိပါတယ်။ သူတို့ဟာ မိမိအမျိုးသားအကျိုး၊ မိမိပြည်သူ များရဲ့အကျိုး၊ မိမိတော်လှန်ရေးရဲ့အကျိုးကို ဦးထိပ်ပန်ဆင်လေ့ ရှိပါတယ်။ တော်လှန် ရေး အကျိုးနဲ့ ပတ်သက်လာရင် မိမိတို့ အသက်ကိုပင် စွန့်ရဲသူများဖြစ်ပါတယ်။

တတိယအချက်ကတော့ တော်လှန်ရေး ခေါင်းဆောင်ကောင်းတွေဟာ သူတို့ ရဲ့ ပြည်သူ၊ သူတို့ရဲ့အမျိုးသား၊ သူတို့ရဲ့ရဲဘော်ရဲဘက်တွေအပေါ်မှာ အထူးပင် ချစ်ခင် လေးစားကြတယ်။ တန်ဖိုးထားကြတယ်။ သူတို့ဘဝမှာ ပြည်သူသာအမိ၊ ပြည်သူသာ အဖဖြစ်တယ်။ တော်လှန်ရေးသာအမိ တော်လှန်ရေးသာအဖ ဖြစ်တယ်။ မိမိ ပြည်သူ၊ မိမိအမျိုးသား၊ မိမိတော်လှန်ရေးကို မွန်မြတ်စွာ အလုပ်အကျွေးပြုတတ်ကြတယ်။ ဒီ အချက်ကြောင့်လည်း သူတို့ရဲ့ဦးဆောင်မှုနောက်ကို ပြည်သူတွေ ရဲဘော်တွေက လိုက် ပါကြတာပါပဲ။

စတုတ္ထအချက်ကတော့ တက်တက်ကြွကြွ ဆည်းပူးလေ့လာခြင်းနှင့် တက် တက်ကြွကြွ အလုပ်လုပ်တတ်ခြင်းပါပဲ။ တော်လှန်ရေးကို လျှမ်းလျှမ်းတောက်ဦးဆောင် ပေးနိုင်သူများဟာ ကြားစရာတွေ၊ သင်စရာတွေ၊ မြင်စရာတွေဆီမှာပဲဖြစ်ဖြစ်၊ စာအုပ် စာပေများမှာဖြစ်ဖြစ်၊ လက်တွေ့အလုပ်ထဲမှာဖြစ်ဖြစ်၊ စိတ်ထားနှိမ့်နှိမ့်ချချနဲ့ လေ့လာ ဆည်းပူးလေ့ရှိကြတယ်။ ဝီရိယရှိစွာ လေ့လာဆည်းပူးလေ့ရှိပါတယ်။ လေ့လာရင်း လုပ်၊ လုပ်ရင်းလေ့လာလေ့ရှိတယ်။ အသက်ပါပါ လေ့လာဆည်းပူးလေ့ရှိပါတယ်။ တစ်နည်းအားဖြင့် သဘောတရားရေးနဲ့ လက်တွေ့ကို ပေါင်းစပ်လေ့ရှိတယ်။ အကန်း နဲ့ တူတဲ့ သဘောတရားရေးမပါတဲ့ လက်တွေ့သက်သက်မျိုး၊ အမြုံနဲ့တူတဲ့ လက်တွေ့ မပါတဲ့ သဘောတရားရေး သက်သက်မျိုးကို ဆန့်ကျင်လေ့ရှိတယ်။ ဒီလို အသက် ပါပါ ဆည်းပူးလေ့လာရင်း လက်တွေ့အသုံးချနိုင်ကြလို့ သူတို့ဟာ လက်တွေ့လုပ်ငန်း တာဝန်များကို အခြေအနေနဲ့အညီ ချမှတ်ကျင့်သုံးနိုင်ကြတယ်။ လေ့လာမှုကောင်းလို့ ဉာဏ်ပညာအရာမှာ၊ ဆင်ခြင်တုံတရားအရာမှာ ရန်သူထက် သာလွန်ကြပါတယ်။ တချို့ တော်လှန်ရေးခေါင်းဆောင်များဟာ ဒီလို ဉာဏ်ပညာကြီးမားကြလို့ သူတို့ရဲ့ရန်သူတွေ ကတောင် လေးစားချီးကျူးကြရတဲ့အထိ အလွန်ကြီးကျယ် ခန့်ညားသူတွေဖြစ်ကြ တယ်။

ပဉ္စမအချက်ကတော့ သူရသတ္တိနဲ့ ယုံကြည်စိတ်ရှိခြင်းပဲ။ တော်လှန်ရေး ခေါင်းဆောင်ကောင်းတွေဟာ အမှန်တရားနှင့် တရားမျှတမှုကိုလည်းကောင်း၊ မိမိ အမျိုးသားနှင့် မိမိပြည်သူတွေကိုလည်းကောင်း၊ မိမိကိုယ်ကိုယ်လည်းကောင်း၊ မိမိတော် လှန်ရေး လှုပ်ရှားမှုကိုလည်းကောင်း၊ ထူးထူးခြားခြား ယုံကြည်စိတ် ရှိကြတယ်။ ဒီလို ယုံကြည်စိတ်ကို အခြေပြုပြီး ထူးထူးခြားခြားကို သူရသတ္တိတွေရှိကြပါတယ်။ မိမိကိုယ်တိုင်ရဲ့ အမှားတွေ၊ ချို့ယွင်းမှုတွေ၊ ချို့တဲ့

အားနည်းချက်တွေကို တွေ့ရှိရရင် သတ္တိ ရှိရှိ ပြုပြင်ရဲကြသူတွေ ဖြစ်တယ်။ သူတို့ဟာ အမှန်တရားတွေ၊ ပြည်သူတွေ၊ မိမိ အမျိုးသား တော်လှန်ရေးတွေနဲ့ပတ်သက်လာရင် သူတို့ရဲ့ဦးခေါင်းတွေမှာ သွေးချင်းချင်းနီနေသည့် တိုင်အောင် ဘယ်သောခါမှ ဦးညွှတ်လေ့မရှိဘူး။ အထူးသဖြင့် တော်လှန်ရေးရဲ့ အခက် ခဲဆုံး၊ အကြမ်းတမ်းဆုံး ကာလများမှာ ပြည်သူတွေရဲ့ ရှေ့ဆုံးတန်းက မားမားမတ်မတ် ရပ်တည်ပြီး ဦးဆောင်မှုတာဝန်တွေကို မမှိတ်မသုန် ထမ်းဆောင်လေ့ရှိကြပါတယ်။

ဆဋ္ဌမ အချက်ကတော့ စည်းကမ်းနဲ့ စည်းစနစ်ရှိခြင်းပါပဲ။ ၁၉ ရာစုခေတ် အစကနေ ယနေ့အထိ နှစ်၂ဝဝ ခန့် အတွင်းမှာ ပေါ်ပေါက်ခဲ့တဲ့ အထူးချွန်ဆုံးသော တော်လှန်ရေးခေါင်းဆောင်များဟာ သူတို့ရဲ့နေထိုင်မှု၊ သူတို့ရဲ့လုပ်ငန်းလုပ်ဆောင်မှု တွေကိုကြည့်ရင် စည်းကမ်းနဲ့ စည်းစနစ်ကြီးသူများ ဖြစ်ကြပါတယ်။ သူတို့ရဲ့ နေထိုင် ဆောင်ရွက်ချက်တွေဟာ အမှုမဲ့ အမှတ်မဲ့ မဟုတ်ဘူး။ ပေါ့ပေါ့ပျက်ပျက် မဟုတ်ဘူး။ အပေါ်ယံကြော မဟုတ်ဘူး။ နေချင်သလိုနေ၊ ပြောချင်သလိုပြော၊ လုပ်ချင်သလိုလုပ် သူများဟာ တော်လှန်ရေးခေါင်းဆောင်ကောင်း ဖြစ်မလာနိုင်ဘူး။ မိမိချမှတ်တဲ့ လမ်းစဉ် အတိုင်းလုပ်မှ၊ စည်းကမ်းအတိုင်းလုပ်မှ၊ အများဆုံးဖြတ်ချက်အပေါ်လုပ်မှ၊ အများ တကာရဲ့ လေးစား ယုံကြည် အားကိုးမှုကို ခံရတဲ့ တော်လှန်ရေး ခေါင်းဆောင်ကောင်း တစ်ယောက် ဖြစ်လာနိုင်မှာ ဖြစ်တယ်။
သတ္တမအချက်ကတော့ တာဝန်ခံမှုပါပဲ။ တော်လှန်ရေးခေါင်းဆောင်ကောင်း တွေဟာ မိမိအဖွဲ့အစည်း မိမိပြည်သူ၊ မိမိအမျိုးသား၊ မိမိလမ်းစဉ်နှင့် လုပ်ငန်းစဉ်တွေ ကို တာဝန်ခံလေ့ရှိကြတယ်။ မိမိချို့ယွင်းချက်နဲ့ အားနည်းချက်တွေ အမှားတွေကို ရဲဝံ့စွာ တာဝန်ခံကြတယ်။ ဒီအမှားတွေ ချို့ယွင်းအားနည်းချက်တွေကို ရိုးရိုးသားသား ပြုပြင်တတ်ကြတယ်။
ရဲဘော်တို့...
သာမာန် အရပ်သားတစ်ယောက်ကနေ တော်လှန်ရေးသမားတစ်ယောက် ဖြစ်လာဖို့ဆိုတာ လွယ်ကူတဲ့ကိစ္စ မဟုတ်ဘူး။ တော်လှန်ရေးခေါင်းဆောင်ကောင်း တစ်ယောက် ဖြစ်လာဖို့ဆိုတာ သာလို့တောင် လွယ်ကူတဲ့ကိစ္စ မဟုတ်ဘူး။ ကြီးမားတဲ့ စွန့်လွှတ်မှုတွေ၊ ပေးဆပ်မှုတွေကို လုပ်ကြရတယ်။ လေ့လာမှုနဲ့ လက်တွေ့အတွေ့အကြုံ လိုတယ်။ သစ္စာရှိမှု၊ သတ္တိရှိမှု၊ စည်းစနစ်ရှိမှု၊ တာဝန်သိမှု၊ တာဝန်ခံမှုတွေ လိုတယ်။ ဒါတွေရှိမှ စမ်းသပ်စိန်ခေါ်မှုမျိုးစုံကို ခံနိုင်ရည်ရှိတဲ့ တော်လှန်ရေး ခေါင်းဆောင်တွေ ဖြစ်လာနိုင်တယ်။
ကရင်အမျိုးသားများဟာ လူမျိုးတစ်မျိုးအဖြစ် လုံခြုံစွာရပ်တည်နိုင်ဖို့ အခြား အမျိုးသားများနည်းတူ နိုင်ငံရေးအရ ကိုယ့်ကံကြမ္မာကိုယ်ဖန်တီးခွင့်ရှိဖို့ လိုအပ်တယ်။ ဒီအခွင့်အရေးကို ရရှိဖို့ရာ တော်လှန်ရေးဆိုတဲ့ ကာလတစ်ခုကို အခြားအမျိုးသားများ နည်းတူ မလွဲမသွေ ဖြတ်သန်းနေကြရတယ်။ သမိုင်းမှာ တော်လှန်ရေးဆိုတာကို မဖြတ်သန်းဘဲ ကိုယ့်ကံကြမ္မာကိုယ်ဖန်တီးခွင့်ကို လွယ်လွယ်ကူကူရခဲ့တဲ့ သာဓကမျိုး မရှိဘူး။ ကမ္ဘာကိုစိုးမိုးခဲ့ကြတဲ့ အင်္ဂလိပ်လူမျိုးတွေတောင် ၁၆ရာစုက Glorious Revolution ဆိုတဲ့ တော်လှန်ရေးကာလကို ဖြတ်သန်းခဲ့ရတယ်။ လောလောဆယ် ပြိုင်ဘက် မရှိ၊ တစ်ခုတည်း ကျန်ရှိနေတဲ့ ကမ္ဘာ့ဗိုလ် အမေရိကန်ပြည်ထောင်စုတောင် ၁၇၇၆ ခုနှစ်က အမေရိကန်တော်လှန်ရေး American Revolution ဆိုတာကို ဆင်နွှဲ ခဲ့ရတယ်။ UN ရဲ့လုံခြုံရေးကောင်စီ အမြဲတမ်းအဖွဲ့ဝင် ပြင်သစ်လည်း ၁၉ရာစု အတွင်း မှာ ပြင်သစ်တော်လှန်ရေးဆိုတာကို လုပ်ခဲ့ရတယ်။ အာရှ၊ အာဖရိကနှင့် လက်တင် အမေရိကတိုက်မှာရှိတဲ့ နိုင်ငံအားလုံးက လွတ်လပ်တဲ့နိုင်ငံများဟာ တော်လှန်ရေးကို လုပ်ခဲ့ကြ၊ လုပ်နေကြရပါတယ်။
တော်လှန်ရေးဆင်နွှဲကြရာမှာ၊ တော်လှန်ရေးဆိုတဲ့ ထူးခြားတဲ့သမိုင်းကာလ တစ်ခုကို ဖြတ်သန်းကြရာမှာ တော်လှန်ရေးခေါင်းဆောင်ကောင်းတွေ လိုအပ်ပါတယ်။ သူတို့ဟာစိတ်ဓာတ်အရ၊ တွေးခေါ်မှုအရ၊ နိုင်ငံရေးအရ၊ စည်းရုံးရေးအရ၊ အလံကိုင်တွေ ဖြစ်ကြတယ်။ ဆရာမြသန်းတင့်ရဲ့ စကားနဲ့ဆိုရင် သူတို့ဟာ ဓားတောင်တွေကို ကျော် ပြီး မီးပင်လယ်ကို တွေဝေခြင်း အလျှင်းမရှိ၊ ဖြတ်ရဲကြသူတွေ ဖြစ်တယ်။ တော်လှန်တဲ့ စာရေးဆရာကြီးဗန်းမော်တင်အောင်ရဲ့ စကားနဲ့ဆိုရင် သူတို့ဟာ မုန်တိုင်းထဲက လူတွေ ဖြစ်တယ်။ ကရင့်တော်လှန်ရေးခေါင်းဆောင်ကြီး စောဘဦးကြီးရဲ့ စကားနဲ့ဆိုရင် Surrender is out of Question သူတို့ရဲ့ခေါင်းထဲမှာ၊ အဘိဓမ္မာထဲမှာ လက်နက်ချ အညံ့ခံရေး ဆိုတဲ့စာလုံး လုံးဝ မရှိသူတွေ ဖြစ်တယ်။

❝
ရဲဘော်တို့ ...
တော်လှန်ရေး ခေါင်းဆောင်ကောင်းဆိုတာ ရေစုန်မှာ လှေကြုံ လိုက်ပါလာ တဲ့သူတွေ မဟုတ်။ ရေစီးကို ဆန်တက်ရဲကြတဲ့သူတွေသာ ဖြစ်တယ်။ တိုက်စစ်မှာ ရှေ့ဆုံးတန်းက နေတတ်ကြသလို ခံစစ်မှာလည်း သံမဏိကတုတ်ကြီးတွေ ဖြစ်တတ် ကြတယ်။ လက်ရှိ ကရင့်တော်လှန်ရေးရဲ့ ဂန္တ၀င်
တိုက်ပွဲကာလမှာ ကရင်ပြည်သူတွေ ရဲ့အကျိုးကို ကြည်ဖြူစွာထမ်းဆောင်ကြမည့် သံမဏိသူရဲကောင်း အထောင်အသောင်း လိုအပ်နေတယ်။ ကရင့်တော်လှန်ရေးသမိုင်းရဲ့လိုအပ်ချက်ကို ဘယ်ပုံဘယ်နည်း ဖြည့် ကြမလဲ။ ရဲဘော်တို့ လွတ်လွတ်လပ်လပ် ဆုံးဖြတ်ကြ။ အဖြေပေးကြ။

-ရေဆန်

(ပဒိုမန်းရှာလာဖန်းက ​'ရေဆန်' က​လောင်အမည်နဲ့
သနူးထူးဂျာနယ် မှာ ၂ဝဝ၂ခုနှစ်က ​ရေးသား​ခဲ့တဲ့
"ချစ်ရဲဘော်များသို့ ပေးစာ အမှတ် (၁၁)ကို မိသားစုရဲ့ ခွင့်ပြုချက်နဲ့ People's Spring သတင်းဌာနက​ဖော်ပြ​ပေးလိုက်ပါတယ် ။ KNU အ​ထွေ​ထွေအတွင်း​ရေးမှူးချုပ်​ဟောင်း
ပဒိုမန်းရှာလားဖန်း ဟာ '​ရေဆန်' ၊ '​တော်လှန်​ရေးရဲ​ဘော်
တစ်ဦး '၊ 'ဇိုယာဖန်း' ၊ 'ဆာလားက​ပေါ' စတဲ့​က​လောင်​တွေနဲ့ ​ဆောင်းပါး ၊ကဗျာ​တွေ ​ရေသားခဲ့ပါတယ် ။ KNU အ​ထွေ​ထွေအတွင်း​ရေးမှူးချုပ် ပဒိုမန်းရှာလားဖန်း ဟာ ၂၀၀၈ ​ဖေ​ဖော်ဝါရီ ၁၄ ရက်မှာ မသမာသူ​တွေရဲ့ လုပ်ကြံမှု​ကြောင့် ကျဆုံးခဲ့ရပါတယ် )

“ဒီနေ့ဘာဖြစ်ခဲ့လဲ”

ဒီနေ့(ဖေဖော်ဝါရီ ၁၈ ရက်) တစ်ရက်တာအတွင်း ဖြစ်ပျက်ခဲ့တဲ့ သတင်း​​တွေထဲက ထူးခြားတဲ့ သတင်းတွေကို People’s Spring က စုစည်းဖော်ပြလိုက်ပါတယ်။

◾️မံစီမြို့နယ် စီခမ်းကြီးစခန်းသိမ်းတိုက်ပွဲ ဒီနေ့ ဆက်လက်ပြင်းထန်

ကချင်ပြည်နယ် ဗန်းမော်ခရိုင် မံစီမြို့နယ် စီခမ်းကြီးရွာ စစ်ကောင်စီစခန်းကို ကချင်လွတ်လပ်ရေးတပ်မတော်(KIA) ပူးပေါင်းတပ်က စခန်းသိမ်းတိုက်ပွဲဆင်နွှဲလျက်ရှိရာ ဒီနေ့ တိုက်ပွဲဆက်လက်ပြင်းထန်နေတယ်လို့ ကချင်စစ်ရေးသတင်းရင်းမြစ်က ပြောပါတယ်။ စီခမ်းကြီး စစ်ကောင်စီဗျူဟာစခန်းကို မနေ့ မနက်ကတည်းက KIA၊ ရက္ခိုင့်တပ်တော်(AA)၊ ကချင်ဒေသ ပြည်သူ့ကာကွယ်ရေးတပ်(KPDF)ပူးပေါင်းတပ်က စခန်းသိမ်းတိုက်ပွဲဆင်နွှဲလျက်ရှိရာ စစ်ကောင်စီက လေကြောင်း ပစ်ကူပေးခုခံနေရပါတယ်။ ဒီနေ့ တိုက်ပွဲမှာ စစ်ကောင်စီတပ်က ဂျက်ဖိုက်တာနဲ့ ၂၆ ကြိမ် ဗုံးကြဲတိုက်ခိုက်ခဲ့တယ်လို့ သတင်းရင်းမြစ်က ပြောပါတယ််။ နေအိမ်တွေမှာ ပြည်သူတွေ မရှိတော့ပေမယ့် နေအိမ် တော်တော်များများ ပျက်စီးသွားပြီလို့ သိရပါတယ်။ မနေ့ကလည်း စစ်ကောင်စီတပ်ဟာ ၁၄ ကြိမ်ထက်မနည်း လေကြောင်းပစ်ကူသုံးတိုက်ခိုက်ခဲ့ပြီး ဒေသခံပြည်သူ ၆ ဦးထက်မနည်း သေဆုံးခဲ့ပါတယ်။

◾️ပြင်ပအလုပ်သမားများခေါ်ယူရာမှာ သူလျှိုများပါမလာရေး ကုမ္ပဏီများတာဝန်ယူရမယ်လို့ MNDAA သတိပေး

ဒေသပြန်လည်တည်ဆောက်ရေးအတွက် အလုပ်သမားများနဲ့ နည်းပညာရှင်အမြောက်အများ လိုအပ်ကြောင်း ကိုးကန့်တပ်မတော်(MNDAA)က ထုတ်ပြန်ခဲ့ပြီး ပြင်ပမှရောက်ရှိလာတဲ့ အလုပ်သမားတွေထဲ သူလျှိုနဲ့ ရန်သူ့အေးဂျင့်များ ရောနှောပါဝင်မလာစေရေး စိစစ်ဖို့ အသိပေး ထုတ်ပြန်ပါတယ်။ အထူးဒေသ(၁) အုပ်ချုပ်ရေးကော်မတီမှ အလုပ်သမား ဝန်ဆောင်မှုကုမ္ပဏီများကို တည်ထောင်ဖွင့်လှစ်ဖို့ ခွင့်ပြုလိုက်ပြီး အဲဒီကုမ္ပဏီများမှ ပြည်ပအလုပ်သမားနဲ့ နည်းပညာရှင်များ ခေါ်ဆောင်ပေးဖို့ တာဝန်ပေးလိုက်ပါတယ်။ လုပ်ငန်းပိုင်ရှင်က မိမိသဘောဖြင့် အလုပ်သမားများကို ခေါ်ယူခွင့်ပြုပေမယ့် ခေါ်လာတဲ့ အလုပ်သမားများအနက် ရန်သူသူလျှိုများတွေ့ရှိပါက ခေါ်ယူတဲ့ ကုမ္ပဏီ သို့မဟုတ် လုပ်ငန်းပိုင်ရှင်များကို အရေးယူမယ်လို့ MNDAAက သတိပေးထားပါတယ်။

◾️စစ်မှုထမ်းဥပဒေကို ပြည်သူများဆန့်ကျင်ဖို့နဲ့ တော်လှန်ရေးအဖွဲ့များက ကာကွယ်ကူညီမှု လုပ်ဆောင်ဖို့ MSFCတိုက်တွန်း

စစ်ကောင်စီထုတ်ပြန်ခဲ့တဲ့ ပြည်သူ့စစ်မှုထမ်းဥပဒေကို ပြည်သူများအနေဖြင့် ကိုယ့်နည်းကိုယ်ဟန်ဖြင့် ဆန့်ကျင်ဖို့နဲ့ စစ်ကောင်စီကို တော်လှန်နေတဲ့ တိုင်းရင်းသားအင်အားစုများ၊ တော်လှန်ရေးအဖွဲ့အစည်းများနှင့်ပူးပေါင်းကာ လိုအပ်တဲ့ ကာကွယ်မှုများ၊ ကူညီပံ့ပိုးမှုများကို လုပ်ဆောင်သွားဖို့ တိုက်တွန်းကြောင်း မွန်ပြည်ဖက်ဒရယ်ကောင်စီ(MSFC)က ဒီနေ့ အသိပေးထုတ်ပြန်ပါတယ်။ မြန်မာစစ်တပ်ဟာ သမိုင်းတစ်လျှောက်မှာ မကြုံစဖူး အရေးနိမ့်မှုများဖြစ်နေပြီး ၎င်းတို့ရဲ့ အင်အားချိနဲ့နေချိန် ပြည်သူ့စစ်မှုထမ်းဥပဒေ(စစ်မှုမထမ်းမနေရဥပဒေ)ကို အတင်းအကြပ် အသက်သွင်း အကောင်အထည်ဖော်တာလို့ ဖော်ပြပါတယ်။ အဲဒီလို အကောင်အထည်ဖော်ရာမှာ အထောက်အကူပြုတဲ့ လူပုဂ္ဂိုလ်မှန်သမျှနဲ့ သက်ဆိုင်ရာ အဖွဲ့အစည်း အဆင့်ဆင့်ကို စစ်ရာဇဝတ်မှုကျူးလွန်တဲ့ ပြည်သူ့ရန်သူများ အဖြစ် သတ်မှတ်ကာ ပြင်းပြင်းထန်ထန် ထိရောက်စွာ အရေးယူဆောင်ရွက်သွားရမယ်လို့ ထုတ်ပြန်ပါတယ်။ စစ်ကောင်စီဟာ ၎င်းတို့ရဲ့ အာဏာနဲ့ ကိုယ်ကျိုးစီးပွားကို အကာအကွယ်ရယူနိုင်ဖို့ ပြည်သူကို လူသားဒိုင်းအဖြစ် အသုံးချဖို့ စီမံခြင်းသာဖြစ်တယ်လို့ MSFCက ဆိုပါတယ်။

◾️အင်းလေးတောင်ပိုင်းမှာ PNO ပြည်သူ့စစ်အဖွဲ့က တပ်သား အဓမ္မစုဆောင်းနေ

ရှမ်းပြည်နယ်တောင်ပိုင်း၊ အင်းလေးတောင်ပိုင်းရှိ ကျေးရွာများမှာ စစ်ကောင်စီလက်ပါးစေ PNO ပြည်သူ့စစ် ဦးဆောင်ကာ အတင်းအဓမ္မခေါ်ဆောင် တပ်သားစုဆောင်းမှုများပြုလုပ်နေတယ်လို့ ဒေသခံသတင်းရင်းမြစ်များက ပြောပါတယ်။ လတ်တလောစာရင်းများအရ ထီရီးကျေးရွာမှ ၁၅ ဦး၊ ထီဟန်းတားကျေးရွာမှ ခုနစ်ဦး၊အောင်ချမ်းသာကျေးရွာမှ ငါးဦး၊ ဟူရမ်းကျေးရွာမှ ၁၁ဦးနဲ့ စံကားလွယ်ခေါ် ကျေးရွာမှ ၁၀​ဦးကို PNO က ခေါ်ဆောင်သွားတယ်လို့ သိရပါတယ်။ PNO ပြည်သူ့စစ်ဟာ စစ်ကောင်စီနှင့် တရားဝင်ပူးပေါင်းကာ တော်လှန်ရေးအင်အားစုများကို ပြန်လည်ခုခံနေပြီး ၎င်းတို့နယ်မြေအတွင်း စစ်ကောင်စီအတွက် စစ်သားကောက်ပေးနေတယ်လို့ ဒေသခံတော်လှန်ရေးအင်အားစုများက အသိပေးထားပါတယ်။

◾️တော်လှန်​ရေးတပ်ဖွဲ့များရဲ့ ထိုးစစ်ကို တားဆီးဖို့ စစ်ကောင်စီတပ် တံတားဖျက်ဆီးမှု ပိုလုပ်​နေ

ရက္ခိုင်ပြည်နယ် တောင်ကုတ်မြို့နယ် မအီမြို့အနီးရှိ တံတား အချို့ကို စစ်ကောင်စီက ဖျက်ဆီးလိုက်တယ်လို့ ရက္ခိုင့်တပ်တော်(AA)က အသိပေးထုတ်ပြန်ခဲ့ပြီး အဲဒီလုပ်ရပ်ဟာ AA တပ်များ ကုန်းလမ်းမှ အလွယ်တကူဝင်ရောက်လာနိုင်ခြင်းမရှိစေဖို့ လုပ်ဆောင်ခြင်းဖြစ်တယ်လို့ ဆိုပါတယ်။ မအီတံတားကို မိုင်းဖောက်ခွဲဖျက်ဆီးခဲ့စဉ် မိုင်းပေါက်ကွဲမှုပြင်းအားကြောင့် မအီမြို့အထက်တန်းကျောင်း အပါအဝင် လူနေအိမ်အချို့ ထိခိုက်ပျက်စီးခဲ့ရပါတယ်။ ခုခံစစ်ကို တစ်ဆင့်ချင်း ပြင်ဆင်နေတဲ့ စစ်ကောင်စီဟာ ရက္ခိုင့်တပ်တော်ကို ကုန်းလမ်းများမှ အလွယ်တကူဝင်ရောက်လာနိုင်ခြင်းမရှိစေဖို့အပြင် အခြားယုတ်မာသောရည်ရွယ်ချက်များကို အကောင်အထည်ဖော်သောအနေဖြင့်လည်း တံတားများကို ဖောက်ခွဲဖျက်ဆီးတဲ့လုပ်ငန်းများ လုပ်ဆောင်နေတယ်လို့ AAက ထုတ်ပြန်ပါတယ်။

◾️ပုလဲမြို့နယ်ရှိ ပျူစောထီးရွာနှစ်ရွာမှ ပြည်သူ ၂၃ ဦး ထပ်မံထွက်ပြေးလာ

စစ်ကိုင်းတိုင်း၊ ပုလဲမြို့နယ်ရှိ စစ်ကောင်စီတပ် လက်အောက်ခံ ပျူစောထီး ကျေးရွာနှစ်ရွာမှ ပြည်သူ ၂၃ဦး ထပ်မံထွက်ပြေးလွတ်မြောက်လာပါတယ်။ ဖေဖော်ဝါရီ ၁၆ရက်က ဇီးဖြူကုန်းပျူစောထီးရွာမှ ခုနစ်ဦး၊ ဖေဖော်ဝါရီ ၁၇ရက်မှာ အင်မထီးပျူစောထီးရွာမှ ၁၆ဦး ထပ်မံထွက်ပြေးလွတ်မြောက်လာကာ အလင်းဝင်ခိုလှုံခွင့်တောင်းခံလာတယ်လို့ ပုလဲ(ပအဖ)အဖွဲ့ တာဝန်ရှိသူက ပြောပါတယ်။ စားနပ်ရိက္ခာအခက်အခဲနဲ့ ဖိနှိပ်မှုများကြောင့် ပျူစောထီးရွာများမှ ရွာသူ၊ ရွာသားများ ခပ်စိတ်စိတ် ထွက်ပြေးလာရာ ဒီတကြိမ်မှာ အများဆုံးထွက်ပြေးလွတ်မြောက်လာတာပါ။ ပုလဲ(ပအဖ)အဖွဲ့က အလင်းဝင်လာသူများကို စစ်ဆေးမေးမြန်းပြီး စစ်တပ်၊ ပျူစောထီးများနှင့် ဆက်သွယ်သတင်းပေးခြင်း၊ သူလျှိုဒလန်ပြုလုပ်ခြင်း၊ တော်လှန်ရေးအင်အားစုများကို ထိခိုက်နစ်နာစေမယ့် အပြုအမူများ ပြုလုပ်ခြင်းများ လုံးဝမပြုလုပ်ဖို့ ခံဝန်ထိုးခိုင်းခဲ့ပြီး သူတို့ကို ပုလဲပအဖအဖွဲ့က ထောက်ပံ့ငွေများနဲ့ မိုးကာများ ပေးအပ်ခဲ့တယ်လို့ သိရပါတယ်။

◾️CDM ဆင်စခန်းကို မီးရှို့ပြန်လာတဲ့ တောအုပ်နဲ့အဖွဲ့ ပစ်ခတ်ခံရပြီး သေဆုံး

ပဲခူးတိုင်း၊ သာယာဝတီခရိုင်၊ ကြို့ပင်ကောက်မြို့နယ်မှာ စစ်ကောင်စီလက်အောက်ခံ သစ်တောဦးစီးဌာနဝန်ထမ်းလေးဦးနဲ့ ပျူစောထီးတစ်ဦးကို ဆင်ဝိုင်းများမီးရှို့ပြီးအပြန်လမ်းမှာ စောင့်ကြိုပစ်ခတ်ခဲ့တယ်လို့ သာယာဝတီခရိုင် တပ်ရင်း (၃၈၀၁)၊ တပ်ခွဲ ၁(Yoma GBK)တာဝန်ရှိသူတစ်ဦးက ပြောပါတယ်။ မနေ့ မနက်ပိုင်းက ဆင်ဝိုင်းရွာရှိ CDM ပြုလုပ်သွားတဲ့ ဆင်စခန်းကို မီးရှို့ပြီးပြန်လာကာ ကွင်းချောင်းအုပ်စု၊ ကုန်အနီးဝါးတောမှာ သောက်စားမူးယစ်နေတဲ့ သစ်တောအုပ်နဲ့အဖွဲ့ကို ဝင်ရောက်ပစ်ခတ်ခဲ့တာလို့ ဆိုပါတယ်။ ပစ်ခတ်ခံရမှုကြောင့် သစ်တောအုပ် ကျော်ဆန်းဝင်း၊ ကျော်စွာဝင်း၊ ခင်ရင်၊ ဇော်ဝင်းနဲ့ သက်နိုင်ထွန်းတို့ ငါးဦး နေရာမှာ သေဆုံးသွားတယ်လို့ Yoma GBK တာဝန်ရှိသူက ပြောပါတယ်။

◾️လှိုင်သာယာ ရပ်ကွက်ရုံးနှစ်ခုအနီး ဗုံးများဆက်တိုက် ပေါက်ကွဲ

ရန်ကုန်မြို့ လှိုင်သာယာအနောက်ပိုင်းမြို့နယ် (၁၂)ရပ်ကွက်ရုံးနဲ့ (၉)ရပ်ကွက်ရုံးအနီးမှာ ဒီနေ့ ဗုံးများ ဆက်တိုက်ပေါက်ကွဲခဲ့တယ်လို့ ဒေသခံပြည်သူများက ပြောပါတယ်။ ဒီနေ့ မနက်အစောပိုင်းမှာ လှိုင်သာယာအနောက်ပိုင်းမြို့နယ် အမှတ် (၁၂)ရပ်ကွက်အုပ်ချုပ်ရေးမှူးရုံးအနီးနဲ့ အမှတ် (၉) ရပ်ကွက် အုပ်ချုပ်ရေးမှူးရုံး အနီးတို့မှာ ဗုံးပေါက်ကွဲမှုများ ဆက်တိုက်ဖြစ်ပွားခဲ့တာလို့ သိရပါတယ်။ ပေါက်ကွဲမှုများ ဖြစ်ပွားပြီးနောက် စစ်ကောင်စီဝင်များက (၁၂)ရပ်ကွက်နဲ့ (၉) ရပ်ကွက်ကြား စုဆောင်းရေးဝင်းအနီး ခုံးတံတားပေါ်၊ စစ်ကိုင်းလမ်းနဲ့ ဖားအံလမ်း လမ်းဆုံတို့ကို ပိတ်ဆို့ စစ်ဆေးမှုများပြုလုပ်ခဲ့တယ်လို့ ရပ်ကွက်နေ ပြည်သူတွေက ပြောပါတယ်။

◾️မိုးမိတ်ရှိနေအိမ်များကို စစ်တပ်က မူးယစ်ဆေးသုံးစွဲသူများကို မီးရှို့ဖျက်ဆီးခိုင်း

ရှမ်းပြည်နယ်မြောက်ပိုင်း၊ မိုးမိတ်မြို့မှာ တပ်စွဲထားတဲ့ စစ်ကောင်စီတပ်ဖွဲ့ဝင်များက မူးယစ်ဆေးသုံးစွဲနေသူများကို ဆိုင်ကယ်များပေးကာ ဒေသခံများရဲ့ နေအိမ်များကို လိုက်လံမီးရှို့ဖျက်ဆီးခိုင်းနေတယ်လို့ ဒေသခံများက ပြောပါတယ်။ မိုးမိတ်မြို့မှာ တောင်ပိုင်း၊ မြောက်ပိုင်း၊ လက်ခုပ်တန်းနဲ့ ဟော်နန်းရပ်ကွက်များရှိပြီး ဇန်နဝါရီလတိုက်ပွဲများအတွင်း စစ်ကောင်စီလေကြောင်းတိုက်ခိုက်မှုကြောင့် ရပ်ကွက်တိုင်းမှာ အပျက်အစီးအလွန်များပြားခဲ့ပါတယ်။ တိုက်ပွဲများရပ်တန့် သွားပြီးနောက်ပိုင်း စစ်ကောင်စီတပ်ဖွဲ့ဝင်များနဲ့ မူးယစ်ဆေးသုံးစွဲနေသူများက ပြည်သူများရဲ့ နေအိမ်များကို ဖောက်ထွင်းခိုးယူပြီး မီးရှို့ဖျက်ဆီးနေတယ်လို့ ဒေသခံများက ပြောပါတယ်။

◾️ဆီဆိုင်မြို့နယ်မှာ စစ်ကောင်စီတပ် လက်နက်ကြီးပစ်ခတ်လို့ ကလေးငယ်အပါအဝင် အရပ်သား နှစ်ဦးသေ၊ ခုနစ်ဦးဒဏ်ရာရ

ပအိုဝ်းဒေသ ဆီဆိုင်မြို့နယ်မှာ စစ်ကောင်စီနဲ့ ပြည်သူ့စစ်များက တိုက်ပွဲတုဖန်တီးပြီး လက်နက်ကြီးဖြင့် ပစ်ခတ်ခြင်းကြောင့် လသားအရွယ်ကလေးငယ်နဲ့ ဒေသခံ တစ်ဦးသေဆုံးခဲ့တယ်လို့ ပအိုဝ်းအမျိုးသားလွတ်မြောက်ရေးတပ်မတော်(PNLA)က သတင်းထုတ်ပြန်ပါတယ်။ မနေ့ ညပိုင်းက ဆီဆိုင်မြို့နယ် ဘန်းယဉ်မြို့ရှိ စစ်ကောင်စီရဲ့ ခမရ (၄၂၅)နဲ့ (၄၂၆)တပ်က တိုက်ပွဲအတု ဖန်တီးပြီး ပအိုဝ်းကျေးရွာများကို လက်နက်ကြီးများဖြင့် အချက်ပေါင်း ၄၀ ကျော်ပစ်ခတ်ခဲ့တယ်လို့ ဖော်ပြပါတယ်။ ပစ်ခတ်မှုကြောင့် ထမ်းယံရွာမှ (၆)လသားအရွယ် ကလေးငယ်တစ်ဦးနဲ့ ထီတမ်ရွာမှ ဒေသခံအမျိုးသားတစ်ဦး စုစုပေါင်း နှစ်ဦး သေဆုံးပြီး ဒေသခံပြည်သူ ခုနစ်ဦး ထိခိုက်ဒဏ်ရာရရှိခဲ့ကာ ပြည်သူလူထု နေအိမ်များလည်း ပျက်စီးခဲ့ရတယ်လို့ PNLA က အသိပေးပါတယ်။

◾️ရေဦးမြို့နယ်မှာ ရွာပေါင်း ၂၀ကျော်မှ ‌ပြည်သူထောင်ချီထွက်ပြေးတိမ်းရှောင်၊ စားနပ်ရိက္ခာအခက်အခဲတွေ့နေ

စစ်ကိုင်းတိုင်း၊ ရေဦးမြို့နယ်မှာ စစ်ကောင်စီတပ်က တစ်ပတ်နီးပါး လှည့်လည်စစ်ကြောင်းထိုးနေလို့ ကျေးရွာပေါင်း ၂၀ ကျော်မှ ဒေသခံပြည်သူထောင်နှင့်ချီ ထွက်ပြေးတိမ်းရှောင်နေရပြီး စားနပ်ရိက္ခာအတွက် အခက်အခဲ ရှိနေတယ်လို့ ဒေသတွင်း သတင်းရင်းမြစ်တွေက ပြောပါတယ်။ ဖေဖော်ဝါရီ ၁၂ရက်မှ ဒီနေ့အထိ ရေဦးမြို့မှထွက်လာတဲ့ စစ်ကောင်စီတပ်စစ်ကြောင်းဟာ ရေဦးနယ်အနောက်ခြမ်းရှိ ကျေးရွာများသို့ စစ်ကြောင်းထိုးနေလို့ ကျေးရွာပေါင်း ၂၄ ရွာမှ ဒေသခံပြည်သူ ထောင်နှင့်ချီ ထွက်ပြေးတိမ်းရှောင်နေရတယ်လို့ ရေဦးမြို့နယ် စစ်ရှောင်ပြည်သူထောက်ပံ့ရေးအဖွဲ့က ပြောပါတယ်။ ရက်ရှည်စစ်ရှောင်နေရလို့ ပြည်သူများ စားသောက်နေထိုင်ရေး အခက်အခဲများရှိနေပြီး စစ်ရှောင်ပြည်သူများပြားနေကာ မလောက်ငှမှုများ တွေ့ကြုံနေရတယ်လို့ အဲဒီအဖွဲ့က ပြောပါတယ်။

◾️နိုင်ငံတဝန်းဆန္ဒပြပွဲတွေ

စစ်ကိုင်းတိုင်း ယင်းမာပင်မြို့နယ်မှာ အောင်လံလွှင့်မည်ဒေါင်းသွေးနီ သပိတ်စစ်ကြောင်းက ဒေသခံပြည်သူတွေနဲ့ ပူးပေါင်းကာ စစ်အာဏာရှင်ဆန့်ကျင်ရေး ညသပိတ် ဆင်နွှဲခဲ့ပါတယ်။
ယင်းမာပင်မြို့နယ်မြောက်ခြမ်း ကျေးရွာတစ်ရွာရှိ စာသင်ကျောင်းတစ်ကျောင်းမှာလည်း ရွာပေါင်းစုံ သပိတ်ကော်မတီက စစ်အာဏာရှင် ဆန့်ကျင်ရေး လူထုနိုင်ငံရေးတရား ဟောပြောပွဲ ပြုလုပ်ခဲ့ပါတယ်။
ပုလဲမြို့နယ် ကျေးရွာတစ်ရွာမှာ လူထုသပိတ်ဦးဆောင်ကော်မတီက ဒေသခံပြည်သူတွေကို The Way အပါအဝင် တော်လှန်ရုပ်ရှင်တွေ ပြသခဲ့ပြီး လူထုနိုင်ငံရေးတရား ဟောပြောပွဲခြင်းကိုလည်း ပြုလုပ်ခဲ့ပါတယ်။

တနင်္သာရီမြို့နယ်မှာလည်း ကျောင်းသားများသမဂ္ဂ (ဗကသများအဖွဲ့ချုပ်)က ဒေသတွင်းလူထုကို ဖက်ဆစ်တပ်ရဲ့ လေကြောင်းတိုက်ခိုက်မှု အန္တရာယ်ကာကွယ်ခြင်းနည်းလမ်းတွေကို ဆွေးနွေးတင်ပြခဲ့ပြီး ပန်းဖလက်တွေ ဖြန့်ဝေကာ အသိပညာပေးလှုပ်ရှားမှုတစ်ရပ် လုပ်ဆောင်ခဲ့ပါတယ်။