“ဒီနေ့ဘာဖြစ်ခဲ့လဲ”

ဒီနေ့(ဖေဖော်ဝါရီ ၁၇ ရက်) တစ်ရက်တာအတွင်း ဖြစ်ပျက်ခဲ့တဲ့ သတင်း​​တွေထဲက ထူးခြားတဲ့ သတင်းတွေကို People’s Spring က စုစည်းဖော်ပြလိုက်ပါတယ်။

◾️မံစီရှိ စစ်ကောင်စီဗျူဟာတပ်စခန်းတစ်ခုကို KIA၊ AAနဲ့ KPDF ပူးပေါင်းထိုးစစ်ဆင်

ကချင်ပြည်နယ် မံစီမြို့နယ်ရှိ စစ်ကောင်စီရဲ့ ဂျယ်ခမ်း(စီခန်းကြီး)တပ်စခန်းကို ကချင်လွတ်လပ်ရေးတပ်မတော်(KIA)နဲ့ ကချင်ဒေသပြည်သူ့ကာကွယ်ရေးတပ်(KPDF)ပူးပေါင်းအဖွဲ့က ဒီနေ့မနက်က စတင်ထိုးစစ်ဆင်ခဲ့တယ်လို့ ကချင်စစ်ရေးသတင်းရင်းမြစ်က ပြောပါတယ်။ ပူးပေါင်းအဖွဲ့ရဲ့ ထိုးစစ်ဆင်မှုကို စစ်ကောင်စီက လေကြောင်းပစ်ကူပေး တိုက်ခိုက်ခဲ့ရာ ဂျက်ဖိုက်တာဖြင့် ၁၄ ကြိမ် ဗုံးကြဲချခဲ့တယ်လို့ ဆိုပါတယ်။ ဒီနေ့ညနေပိုင်းအထိ စစ်ရေးပြင်းထန်နေဆဲဖြစ်ပြီး အဲဒီတပ်စခန်းမှာ မြောက်ပိုင်းတိုင်း စစ်ဌာနချုပ်လက်အောက်ခံ ခလရ(၁၅)၊ ခလရ(၁၂၁)၊ ခလရ(၂၇၆)နဲ့ ခလရ(၂၂၃) တပ်များပူးပေါင်းတပ်စွဲတယ်လို့ သိရပါတယ်။

◾️ရှားတောမြို့အသိမ်းခံရပြီးနောက် စစ်ကောင်စီ ရှေ့တန်းစခန်းနှစ်ခု ဆုတ်ခွာသွား၊ ရဟတ်ယာဉ်များဖြင့် သယ်ထုတ်သွားဟုဆို

ကရင်နီပြည်နယ် သံလွင်မြစ်အရှေ့ဖက်ကမ်းရှိ စစ်ကောင်စီရဲ့ တပ်စခန်းနှစ်ခု ဆုတ်ခွာသွားတယ်လို့ ကရင်နီအမျိုးသားများကာကွယ်ရေးတပ်(KNDF)က ဒီနေ့ ထုတ်ပြန်ပါတယ်။ ရှားတောမြို့နယ် သံလွင်မြစ်အရှေ့ဖက်ရှိ စစ်ကောင်စီရဲ့ ရှေ့တန်း အထိုင်တပ်စခန်းများဖြစ်တဲ့ ဟွေအွန်တပ်စခန်းနဲ့ ကျားပါးစပ်ကြီး တပ်စခန်းတို့ဟာ ဖေဖော်ဝါရီ ၁၃ရက်မှာ စခန်းများကို စွန့်ခွာသွားတာပါ။ ကရင်နီတပ်မတော်(KA)၊ KNDF ပူးပေါင်းတပ်များဟာ ဖေဖော်ဝါရီ ၁၂ရက် မနက်ပိုင်းက ရှားတောမြို့ရှိ စစ်ကောင်စီ ဗျူဟာကုန်းကို တိုက်ခိုက်သိမ်းပိုက်ခဲ့ပါတယ်။ ရှားတောမြို့သိမ်းတိုက်ပွဲကာလ တစ်လခန့်ကြာမြင့်ခဲ့ပြီး စစ်ကောင်စီတပ်မှ အရာရှိ အပါအဝင် ၁၆၀ ဦးကျော်ကို ချေမှုန်းနိုင်ခဲ့တယ်လို့ KNDFက ဖော်ပြပါတယ်။

◾️IEC က ဒီးမော့ဆို-မော်ချီး-မယ်စဲ့ယာဥ်လိုင်း စတင်​ပြေးဆွဲ

ကရင်နီ​ပြည်မှာ တော်လှန်​ရေးအဖွဲ့များထိန်းချုပ်​ဒေသများတိုးလာပြီး​နောက် ဒီးမော့ဆို-မော်ချီး-မယ်စဲ့ယာဥ်လိုင်းကို ကရင်နီပြည်ကြားကာလအုပ်ချုပ်​ရေးကောင်စီ(IEC)က စတင်ပြေးဆွဲနေပြီလို့ ထုတ်ပြန်ပါတယ်။ IEC ရဲ့ ကုန်သွယ်ရေး၊ ရင်းနှီးမြုပ်နှံမှုနှင့် ပို့ဆောင်ဆက်သွယ်ရေးဌာနရဲ့ သယ်ယူပို့ဆောင်ရေးဌာနခွဲမှ ယာဥ်လိုင်းပြေးဆွဲတာလို့ သိရပါတယ်။ IEC သယ်ယူပို့ဆောင်ရေးဌာနခွဲမှ ယာဥ်လိုင်းတာဝန်ရှိသူများကိုလည်း ပူးတွဲထုတ်ပြန်ခဲ့ပြီး ညွှန်ကြားရေးမှူးအဖြစ် သံချောင်း၊ ဒုတိယညွှန်ကြားရေးမှူးအဖြစ် တိမ်တိုက်၊ တူ့တူနဲ့ ဦးစီးမှူးအဖြစ် ရန်ပြုံး(နိုနို့)တို့ ဖြစ်တယ်လို့ ဖော်ပြပါတယ်။

◾️ရွှေကျင်မြို့နယ် နှစ်ရက်ဆက်တိုက်ပွဲ စစ်ကောင်စီတပ် လေးဦးသေ

ကရင်အမျိုးသားအစည်းအရုံး(KNU) ညောင်လေးပင်ခရိုင်တပ်မဟာ(၃)နယ်မြေ ဆောထိ(ရွှေကျင်)မြို့နယ်မှာ နှစ်ရက်ဆက်တိုက်ပွဲဖြစ်ခဲ့ပြီး စစ်ကောင်စီတပ်မှ သေဆုံးထိခိုက်ရှိခဲ့တယ်လို့ KNUက သတင်းထုတ်ပြန်ပါတယ်။ ဖေဖော်ဝါရီ ၁၃ရက်က စစ်ကောင်စီနဲ့ KNLA ပူးပေါင်းတပ်များ မိနစ်အနည်းငယ်ကြာ တိုက်ပွဲဖြစ်ခဲ့ရာ စစ်ကောင်စီတပ်မှ နှစ်ဦးသေဆုံးကာ ပူးပေါင်းတပ်မှ နှစ်ဦး ဒဏ်ရာရခဲ့တယ်လို့ ဖော်ပြပါတယ်။ တိုက်ပွဲဖြစ်ပွားစဉ် ပိန်းဇလုပ် အခြေစိုက် ခလရ(၂၆၄)တပ်က လက်နက်ကြီးဖြင့် ပစ်ခတ်ခဲ့လို့ ဂွင်းကုန်းကျေးရွာ၊ ပုဇွန်မြောင်း၊ အင်းဝိုင်းကျေးရွာနဲ့ ညောင်ပင်ကြီးရွာဟောင်းကျေးရွာသို့ ကျရောက်ပေါက်ကွဲခဲ့ပါတယ်။ ဖေဖော်ဝါရီ ၁၄ရက်မှာလည်း စစ်ကောင်စီရဲ့ ခမရ-၂၀ကို KNLA လက်အောက်ခံ တပ်ဖွဲ့များနဲ့ ပူးပေါင်းတပ်များက တိုက်ခိုက်ခဲ့တယ်လို့ အသိပေးပါတယ်။ တိုက်ခိုက်မှုအတွင်း စစ်ကောင်စီတပ်မှ နှစ်ဦးသေဆုံးကာ ပူးပေါင်းတပ်မှ နှစ်ဦး ဒဏ်ရာရခဲ့တယ်လို့ KNU က ထုတ်ပြန်ပါတယ်။

◾️မောင်တော ဗောဓိကုန်းစခန်းကို AA သိမ်းပိုက်၊ ရသေ့တောင်မြို့နယ် တိုက်ပွဲများမှာ စစ်ကောင်စီတပ် သေဆုံးထိခိုက်မှုရှိ

ရက္ခိုင်ပြည်နယ် မောင်တောမြို့နယ်ရှိ စစ်ကောင်စီရဲ့ ဗောဓိကုန်းတပ်စခန်းကို မနေ့မနက်ပိုင်းက သိမ်းပိုက်နိုင်ခဲ့​တယ်လို့ ရက္ခိုင့်တပ်တော်(AA)က သတင်းထုတ်ပြန်ပါတယ်။ ဗောဓိကုန်းစခန်းကို ဖေဖော်ဝါရီ ၁၅ရက် မနက်ကတည်းက စတင်ထိုးစစ်ဆင်ခဲ့ပြီး စစ်ကောင်စီတပ်က လေကြောင်း၊ လက်နက်ကြီးအမြောက်အများ ပစ်ခတ်တိုက်ခိုက်မှုများကြားမှ အပြီးသတ်သိမ်းပိုက်ရယူနိုင်ခဲ့တာပါ။ ရန်သူ့အလောင်း(၁၄)လောင်းအပါအဝင် လက်နက်ခဲယမ်းအချို့ကို သိမ်းဆည်းရမိခဲ့တယ်လို့ AAက ထုတ်ပြန်ပါတယ်။ ဒါ့အပြင် ရသေ့တောင်မြို့နယ်၊ ခနောင်းကြီးရွာ အနီး တောင်ကြောမှာ စစ်ကောင်စီ တပ်ရဲ့ ခမရ (၅၃၆) တပ်ရင်းနဲ့ ရက္ခိုင့်တပ်တော်တို့ နှစ်ဖက်ရင်ဆိုင်ထိတွေ့တိုက်ပွဲဖြစ်ပွားခဲ့ရာ စစ်ကောင်စီဘက်မှ လေးဦးသေဆုံးကာ ၁၀ဦးခန့် ဒဏ်ရာရခဲ့တယ်လို့ ဖော်ပြပါတယ်။

◾️ဖာပွန်ခရိုင် ဒီလဝက်တိုက်ပွဲများအတွင်း အရာရှိအပါအဝင် စစ်ကောင်စီတပ် ၁၇ဦးသေဟု KNU အသိပေး

ကရင်အမျိုးသားအစည်းအရုံး(KNU) ဖာပွန်(မူတြော်)ခရိုင်မှာ အခု ဖေဖော်ဝါရီလဝက်အတွင်း တိုက်ပွဲပေါင်း ၄၅ကြိမ်ဖြစ်ပွားခဲ့ပြီး စစ်ကောင်စီတပ်မှ သေဆုံးထိခိုက်ရှိခဲ့တယ်လို့ KNU တပ်မဟာ(၅)က သတင်းထုတ်ပြန်ပါတယ်။ လဝက်တိုက်ပွဲများမှာ စစ်ကောင်စီဘက်က ၁၇ဦးသေဆုံးကာ ၃၉ဦး ဒဏ်ရာရရှိခဲ့ပြီး KNU လက်အောက်ခံ ကရင်အမျိုးသားလွတ်မြောက်ရေးတပ်မတော် (KNLA) တပ်မဟာ(၅)ဘက်မှ ၇ဦး ဒဏ်ရာရခဲ့တယ်လို့ ဖော်ပြပါတယ်။ စစ်ကောင်စီဘက်မှ သေဆုံးသူတွေထဲ တပ်ခွဲမှူးအဆင့် အရာရှိတစ်ဦးပါဝင်တယ်လို့ ဆိုပါတယ်။ ဒါ့အပြင် ဖာပွန်ခရိုင်ရှိ စစ်ကောင်စီတပ်စခန်း နှစ်ခု စခန်းစွန့် ခွာ ရုတ်သိမ်းသွားခဲ့တယ်လို့ KNU က အသိပေးပါတယ်။

◾️ပိတ်မိနေတဲ့ ပြည်သူများကို ကယ်ထုတ်ဖို့လာတဲ့ PDF ရဲဘော်နှစ်ဦးသတ်ဖြတ်ခံရ

မန္တလေးတိုင်း၊ မတ္တရာမြို့နယ်ရှိ အောက်တောင်ကိုင်းကျေးရွာမှာ စစ်ကောင်စီစစ်ကြောင်းဝင်ရောက်စဥ် ပိတ်မိနေတဲ့ ပြည်သူများကို ကယ်ထုတ်ဖို့လာတဲ့ PDF ရဲဘော်နှစ်ဦးကို စစ်ကောင်စီတပ်က သတ်ဖြတ်သွားတယ်လို့ သိရပါတယ်။ ဖေဖော်ဝါရီ ၁၅ ရက် မနက်ပိုင်းက မတ္တရာမြို့ပေါ်နဲ့ မြို့နယ်ရှိ ရွှေချောင်းကျေးရွာတို့မှ အင်အား ၁၀၀ခန့်ပါ စစ်ကောင်စီတပ်စစ်ကြောင်းနှစ်ခုဟာ အောက်တောင်ကိုင်းကျေးရွာသို့ စစ်ကြောင်းထိုး ဝင်ရောက်ခဲ့ပါတယ်။ အဲဒီအချိန် ဒေသခံပြည်သူများပိတ်မိနေတာကြောင့် ကယ်ထုတ်ဖို့ ရောက်ရှိလာတဲ့ PDF ရဲဘော်နှစ်ဦးကို စစ်ကောင်စီတပ်က ပစ်ခတ်သတ်ဖြတ်ခဲ့တာလို့ မတ္တရာ(ပကဖ)အဖွဲ့ရဲ့ ပြန်ကြားရေးတာဝန်ခံက ပြောပါတယ်။

◾️ဆီဆိုင်နဲ့ ဟိုပုန်းမြို့နယ်တိုက်ပွဲမှာ စစ်ကောင်စီတပ်ဖွဲ့ဝင်တစ်ဦး အရှင်မိ

ပအိုဝ်းဒေသ ဆီဆိုင်မြို့နယ်နဲ့ ဟိုပုံးမြို့နယ်အတွင်း ပအိုဝ်းအမျိုးသားလွတ်မြောက်ရေးတပ်မတော်(PNLA)က လုံခြုံရေးဆိုင်ရာ လှုပ်ရှားမှုဆက်လက်ပြုလုပ်ရာ မနေ့က စစ်ကောင်စီတပ်ဖွဲ့ဝင်တစ်ဦးကို အရှင်မိပြီး လက်နက်အချို့ရခဲ့တယ်လို့ PNLA ပြောရေးဆိုခွင့်ရှိသူ ခွန်ရိန်းယံက ပြောပါတယ်။ စစ်ကောင်စီနဲ့ လက်အောက်ခံပြည်သူ့စစ်များမှ ချောင်းမြောင်းပစ်ခတ်ခြင်းကြောင့် မနေ့က ထိတွေ့မှုအချို့ရှိခဲ့ပြီး PNLAက နယ်မြေရှင်းလင်းရာ စစ်ကောင်စီလက်အောက်ခံ တပ်ဖွဲ့ဝင်တစ်ဦးကို လက်နက်နှင့်အတူ ဖမ်းဆီးရမိခဲ့တယ်လို့ PNLAက အသိပေးထားပါတယ်။ မနေ့က ဆီဆိုင်မြို့မြောက်ဘက် တနေရာမှာလည်း စစ်ကြောင်းထိုးဖို့ ကြိုးပမ်းနေတဲ့ စစ်ကောင်စီနဲ့ လက်အောက်ခံပြည်သူ့စစ်အဖွဲ့ကို တားဆီးရာမှ ထိတွေ့တိုက်ပွဲဖြစ်ပွားခဲ့တယ်လို့ PNLAက ထုတ်ပြန်ခဲ့ပြီး တိုက်ပွဲအတွင်း (၆၀)မမပြောင်းတို တစ်လက်နဲ့ လက်နက်ခဲယမ်းများကို သိမ်းဆည်းရမိခဲ့တယ်လို့ ဆိုပါတယ်။

◾️ဆောမြို့မှ စစ်ကောင်စီတပ်ကြပ်ကြီးတစ်ဦး လက်နက်နှင့်အတူ CDMဝင်

မကွေးတိုင်း၊ ဆောမြို့မရဲစခန်းမှ စစ်ကောင်စီတပ်ကြပ်ကြီးတစ်ဦး လက်နက်နှင့်အတူ ဂန့်ဂေါခရိုင်၊ အမှတ်(၃)တပ်ရင်းကို လက်နက်ခဲယမ်းများနှင့်အတူ CDM ဝင်လာတယ်လို့ မကွေးတိုင်းကွပ်ကဲရေးရုံးက သတင်းထုတ်ပြန်ထားပါတယ်။ အင်အား ၈၀ကျော်ဖြင့် တပ်စွဲထားတဲ့ ဆောမြို့မရဲစခန်းမှ စစ်ကောင်တပ်မှ တပ်ကြပ်ကြီးဟာ ဖေဖော်ဝါရီ ၁၁ ရက်က CDMဝင်ရောက်ခဲ့ပြီး ၎င်းနှင့်အတူ MA-2အမျိုးအစားသေနတ်နဲ့ လက်နက်ခဲယမ်းများပါဝင်လာတယ်လို့ အသိပေးပါတယ်။ ပုံမှန်အချိန်မှာ စခန်းမှ မြို့ထဲကို မထွက်ရဲတဲ့ စစ်ကောင်စီတပ်သားများဟာ အဲဒီနေ့က CDMဝင်လာတဲ့ တပ်ကြပ်
ကြီးနောက်ကို လိုက်ဖို့ ပြင်ဆင်မှုများကြောင့် ကာကွယ်ရေးရဲဘော်များနဲ့ ဆောမြို့အတွင်း လုံခြုံယူရတဲ့အခြေအနေများရှိတယ်လို့ ဆောမြို့ခံတစ်ဦးကပြောပါတယ်။

◾️စစ်ကိုင်းတိုင်းမှာ မြို့နယ်လေးခုထက်မနည်း စစ်ရေးတင်းမာ

စစ်ကိုင်းတိုင်းအတွင်း နယ်မြေချင်းထိစပ်နေတဲ့ ယင်းမာပင်၊ ဘုတလင်၊ ကနီနဲ့ မင်းကင်းမြို့နယ်တို့မှာ စစ်ရေးတင်းမာနေပြီး နေရာအချို့မှာ တိုက်ပွဲဖြစ်ပွားနေပါတယ်။ မင်းကင်းမြို့နယ်မှ ပျူစောထီးစခန်းများကို ဖေဖော်ဝါရီ ၇ရက်ကစလို့ ပြည်သူ့ကာကွယ်ရေးတပ်ဖွဲ့များက တိုက်ခိုက်နေခြင်းဖြစ်ပြီး ဒီနေ့ မနက်ပိုင်းအထိ တိုက်ပွဲဆက်ဖြစ်နေတာပါ။ မင်းကင်းမြို့နှင့်ထိစပ်နေတဲ့ ကနီမြို့မှာလည်း မနေ့က စစ်ကောင်စီမှ လေကြောင်းတိုက်ခိုက်မှုပြုလုပ်ခဲ့ပြီး တနေကုန် လေကြောင်းမှကင်းထောက်ခဲ့တယ်လို့ ဒေသခံများက ပြောပါတယ်။ ဘုတလင်မြို့မှာလည်း မုံရွာမြို့အနောက်မြောက်တိုင်းစစ်ဌာနချုပ်(နမခ)မှ ထွက်လာတဲ့ စစ်ကောင်စီစစ်ကြောင်းက ဖေဖော်ဝါရီ ၁၂ရက်မှ စတင်ဝင်ရောက်လာတာကြောင့် ဒေသခံများထွက်ပြေးတိမ်းရှောင်နေကြရပါတယ်။ ယင်းမာပင်မြို့မှ ခရိုင်တပ်ရင်း(၃၇)နဲ့ ဒေသကာကွယ်ရေးတပ်ဖွဲ့အချို့ကလည်း နမခကို ‌ဖေဖော်ဝါရီ ၁၅ရက်မှာ လက်နက်ကြီးများဖြင့် ပစ်ခတ်တိုက်ခိုက်ခဲ့တယ်လို့ သတင်းရင်းမြစ်တွေက ပြောပါတယ်။

◾️နိုင်ငံတဝန်းဆန္ဒပြပွဲ

စစ်ကိုင်းတိုင်း ယင်းမာပင်မြို့နယ်မှာ အောင်လံလွှင့်မည်ဒေါင်းသွေးနီ သပိတ်စစ်ကြောင်းက ဒေသခံပြည်သူတွေနဲ့ ပူးပေါင်းကာ စစ်အာဏာရှင် ဆန့်ကျင်ရေးသပိတ် ဆင်နွှဲခဲ့ပါတယ်။
ယင်းမာပင်မြို့နယ် မြောက်ခြမ်းမှာလည်း နောက်ပြန်မလှည့်ကြေး ဒီတော်လှန်ရေး သပိတ်စစ်ကြောင်းက ဦးဆောင်ကာ စစ်အာဏာရှင်ကို ဆန့်ကျင်ဖို့နဲ့ စစ်ကောင်စီဝင်များအနေနဲ့ ပြည်သူ့ရင်ခွင်ကို ခိုလှုံဖို့ နှိုးဆော်ဆန္ဒပြခဲ့ပါတယ်။

ဆားလင်းကြီးမြို့နယ်မှာ အားမာန်သစ်လူထုသပိတ်စစ်ကြောင်းနဲ့ ယင်းမာပင်-ဆားလင်းကြီးရွာပေါင်းစုံသပိတ်စစ်ကြောင်းတို့ ပူးပေါင်းကာ အကြမ်းဖက်စစ်တပ်၊ မီးရှို့စစ်တပ် အလိုမရှိကြောင်း ကြွေးကြော်ဆန္ဒပြခဲ့ကြပါတယ်။
မြင်းမူမြို့နယ်မှာ မုံရွာလူထုသပိတ်တိုက်ပွဲ ဦးဆောင်ကော်မတီက ဒေသခံပြည်သူများကို တော်လှန်ရုပ်ရှင်ပြသခြင်းနဲ့ လူထုဟောပြောပွဲတွေ ပြုလုပ်ခဲ့ပါတယ်။

မံစီတွင် စစ်ကောင်စီ လေကြောင်းတိုက်ခိုက်၍ ပြည်သူ ၆ဦးထက်မနည်းသေဆုံး

ဆန်အောင်/People’s Spring

ကချင်ပြည်နယ် မံစီမြို့နယ်တိုက်ပွဲအတွင်း စစ်ကောင်စီက လေကြောင်းမှ ဗုံးကြဲတိုက်ခိုက်၍ ဒေသခံပြည်သူ ၆ဦးထက်မနည်း သေဆုံးခဲ့ကြောင်း စစ်ရေးသတင်းရင်းမြစ်က ပြောသည်။

မံစီမြို့နယ် ဂျယ်ခမ်း စစ်ကောင်စီဗျူဟာစခန်းကို ကချင်လွတ်လပ်ရေးတပ်မတော်(KIA)၊ ရက္ခိုင့်တပ်တော်(AA)၊ ကချင်ဒေသ ပြည်သူ့ကာကွယ်ရေးတပ်(KPDF) ပူးပေါင်းအဖွဲ့က ဖေဖော်ဝါရီ ၁၇ရက် နံနက်က ထိုးစစ်ဆင်တိုက်ခိုက်ခဲ့ရာ စစ်ကောင်စီက လေကြောင်းမှ ဗုံးကြဲတိုက်ခိုက်ခဲ့ခြင်းဖြစ်သည်ဟု ဆိုသည်။

"ဂျယ်ခမ်းရွာထဲကို စကစ လေယာဉ် ဗုံးကြဲတာ ပြည်သူ ၅ဦးသေသွားတယ်။ သံတံတားရွာမှာလည်း ဗုံးကြဲတာ ပြည်သူတစ်ဦးသေတယ်"ဟု စစ်ရေးသတင်းရင်းမြစ်က ပြောသည်။

ယမန်နေ့တွင် စစ်ကောင်စီတပ်က လေကြောင်း ပစ်ကူ ၁၄ကြိမ်ထက်မနည်း ပြုလုပ်ခဲ့သည်ဟုဆိုသည်။

KIA ပူးပေါင်းတပ်၏ စခန်းသိမ်းတိုက်ပွဲမှာလည်း ညနေပိုင်းအထိ တိုက်ပွဲပြင်းထန်နေဆဲဖြစ်သည် ဟု စစ်ရေးသတင်းရင်းမြစ်က ပြောသည်။

စစ်ကောင်စီသည် တိုက်ပွဲများ ဖြစ်ပွားပါက မြေပြင်စစ်ကူပေးနိုင်ခြင်းမရှိတော့ဘဲ လေကြောင်းတိုက်ခိုက်မှုများသာ ပြုလုပ်နေရသည်။ ထိုသို့ တိုက်ခိုက်ရာ၌ အရပ်သားပြည်သူများနေထိုင်ရာများကိုပါ ဗုံးကြဲတိုက်ခိုက်မှုများ လုပ်ဆောင်နေသည်ကို ဒေသအသီးသီး၌ တွေ့ရပြီး စစ်ကောင်စီ၏ လေကြောင်း၊ လက်နက်ကြီး တိုက်ခိုက်မှုကြောင့် အရပ်သားသေဆုံးထိခိုက်မှုများ မကြာခဏ ဖြစ်ပေါ်လျက်ရှိသည်။

မုံရွာမြို့နယ်တွင် ကျောက်စစ်ပုံအမြှောက်တပ်က လက်နက်ကြီးပစ်ခတ်ခဲ့၍ ပြည်သူ ၅ဦးဒဏ်ရာရ

အောင်ဇေယျ/People's Spring

စစ်ကိုင်းတိုင်း၊ မုံရွာမြို့နယ်၊ ညောင်ပင်ကျေးရွာကို ကျောက်စစ်ပုံအမြှောက်တပ်က လက်နက်ကြီးဖြင့်ပစ်ခတ်ခဲ့၍ ပြည်သူ ၅ဦး ဒဏ်ရာရရှိပြီး နေအိမ်တစ်လုံးပျက်စီးခဲ့ကြောင်း ဒေသခံများက ပြောသည်။

ယမန်နေ့ (ဖေဖော်ဝါရီ၁၇ ရက်)နေ့လယ် ၁ နာရီခန့်က မုံရွာမြို့နယ်၊ ညောင်ပင်ကျေးရွာသို့ လက်နက်ကြီးကျည်များကျရောက်ပြီး ပြည်​သူ ၅ ဦး ထိခိုက်ဒဏ်ရာရရှိခဲ့သည်။

"ကျောက်စစ်ပုံအမြှောက်တပ်ကနေ လက်နက်ကြီး ၇ လုံးပစ်တာ။ ပြည်သူ့ရွာတွေဘက်ကို သေချာပစ်တာ"ဟု ဒေသခံတစ်ဦးက ပြောသည်။ တိုက်ပွဲဖြစ်ပွားခြင်းမရှိဘဲ အကြောင်းမဲ့ပစ်ခတ်ခြင်းဟု ဒေသခံများက ပြောသည်။

ထို့အပြင် နေအိမ်တစ်လုံးလည်းပျက်စီးပြီး အိမ်မွေးတိရိစ္ဆာန် နွားနှင့်ကြက် ၅ ကောင်ထက် မနည်းသေဆုံးကြောင်း မုံရွာရပ်ကွက်ကင်းထောက်များအဖွဲ့က ပြောသည်။

အလားတူ ဖေဖော်ဝါရီ ၁၆ ရက် ညနေပိုင်းကလည်း ထီးတော်တင်ကျေးရွာ၌ စစ်တပ်ကဝင်ရောက်ပစ်ခတ်၍ ပြည်သူတစ်ဦး ထိခိုက်ဒဏ်ရာ ရရှိသွားကြောင်း သိရသည်။

မုံရွာဝန်းကျင်၌ စစ်တပ်က လက်နက်ကြီးဖြင့်အကြောင်းမဲ့ပစ်ခတ်နေ၍ ပြည်သူထိခိုက်သေဆုံးမှု လစဥ်နီးပါးရှိနေသည်။

ဖေဖော်ဝါရီ၁၂ ရက် နေ့လယ် ၁၂ နာရီခန့်ကလည်း စစ်ကောင်စီတပ်က လက်နက်ကြီးဖြင့်ပစ်ခတ်ခဲ့၍ မုံရွာမြို့နယ်၊ ထနောင်းတော (တောင်)ရွာရှိ လက်ဖက်ရည်ဆိုင်သို့ ကျရောက်ပေါက်ကွဲပြီး အမျိုးသားလေးဦး သေဆုံးကာ လေးဦးထက်မနည်း ထိခိုက်ဒဏ်ရာရရှိခဲ့သေးသည်။

(စစ်ကောင်စီတပ် ပစ်ခတ်လိုက်သော လက်နက်ကြီးကျည်များအား တွေ့ရစဥ်။ ဓာတ်ပုံ - မုံရွာရပ်ကွက်ကင်းထောက်များ)

တော်လှန်​ရေးတပ်ဖွဲ့များ၏ ထိုးစစ်ကိုတားဆီးရန်
စစ်ကောင်စီတပ် တံတားဖျက်ဆီးမှု ပိုလုပ်​နေ

▪︎ရသေ့တောင်၌ တိုက်ပွဲဆက်ဖြစ်၊ ရမ်းဗြဲကို စစ်ကောင်စီ လေကြောင်း တိုက်ခိုက်၍ မြို့ကို ဆက်တိုက်ဖျက်ဆီးနေဟု AA ထုတ်ပြန်

ရှိုင်း/People’s Spring

ရက္ခိုင်ပြည်နယ် တောင်ကုတ်မြို့နယ် မအီမြို့အနီးရှိ တံတား အချို့ကို စစ်ကောင်စီက ဖျက်ဆီးလိုက်ကြောင်း ရက္ခိုင့်တပ်တော်(AA)က အသိပေးထုတ်ပြန်ခဲ့ပြီး ယင်းလုပ်ရပ်သည် AA တပ်များကုန်လမ်းမှ အလွယ်တကူဝင်ရောက်လာနိုင်ခြင်းမရှိစေရန် လုပ်ဆောင်ခြင်းဖြစ်ဟုဖော်ပြခဲ့သည်။

ဖေဖော်ဝါရီလ (၁၆) ရက်ညတွင်မအီမြို့အနီးရှိ မအီတံတား ၊ ဖေဖော်ဝါရီလ (၁၇) ရက် နံနက်တွင် မအီ-ကျောက်ဖြူကားလမ်းမထက်ရှိ မအီမြို့အနီးရှိ ကျောက်ကြီးပေါက်တံတား အား စစ်ကောင်စီက ဖောက်ခွဲဖျက်ဆီးခဲ့သည်ဟုဆိုသည်။

“မအီတံတား”အား မိုင်းဖောက်ခွဲဖျက်ဆီးခဲ့စဉ် မိုင်းပေါက်
ကွဲမှုပြင်းအားကြောင့် မအီမြို့အထက် တန်းကျောင်း အပါ
အဝင် လူနေအိမ်အချို့ ထိခိုက်ပျက်စီးခဲ့ဟုသိရသည်။

"AAက စစ်တပ်ကားကို ကြားဖြတ်တိုက်သေးတယ်။ စစ်သားနဲ့ ရဲ‌တချို့ မအီကနေ ဆုတ်သွားပြီး ချိုးသွားတာ" ဟု ဒေသခံတစ်ဦးကပြောသည်။

တစ်ပြိုင်နက်တည်းတွင် ခုခံစစ်ကို တစ်ဆင့်ချင်း တစ်ဆင့်ချင်း ပြင်ဆင်နေသောစစ်ကောင်စီသည် ရက္ခိုင့်တပ်တော်အား ကုန်းလမ်းများမှနေ၍ အလွယ်တကူဝင်ရောက်လာနိုင်ခြင်းမရှိစေရန်အပြင် အခြားယုတ်မာသောရည်ရွယ်ချက်များကို အကောင်အထည်ဖော်သောအနေဖြင့်လည်း တံတားများအား ဖောက်ခွဲဖျက်ဆီးသည့်လုပ်ငန်းများ လုပ်ဆောင်လျက်ရှိဟု AAက ထုတ်ပြန်သည်။

" ဇီးဇံတောင်ဗျူဟာမှာ စစ်ကောင်စီဟာ ခံစစ်အခိုင်အမာပြင်ဆင်နေပုံရတယ်။ တဖက်ကလည်း AA ဟာ ဇီးဇံတောင်ဗျူဟာကို မဖြစ်မနေသိမ်းမယ့်အခြေအနေမှာရှိတယ်။ ဇီးဇံတောင်ဗျူဟာကို သိမ်းရင် စစ်တပ်က ကလိန်တောင်မြစ်နဲ့ သံဇစ်မြစ်ထဲက နေဗီတွေနဲ့ ပစ်ပါလိမ့်မယ်။ ဇီးဇံတောင်အောက်ခြေက မြို့ဟာလည်း လက်နက်ကြီး ပစ်ကွင်းထဲမှာ ရှိနေတာပါ။ ဒါကြောင့် မအီမြို့ဟာ လက် ရှိ အ​ခြေအနေမှာ လုံးဝနေလို့မရနိုင်တဲ့အနေအထားပါ"ဟု AAနှင့် နီးစပ်သည့်သတင်းရင်းမြစ်ကပြောသည်။

ထိုသို့လုပ်ဆောင်မှုများကို ရက္ခိုင်ပြည်နယ်၌ သာမက ရှမ်းမြောက်ဒေသနှင့် အခြားသောနေရာများ၌ပါ ခပ်စိပ်စိပ်လုပ်ဆောင်လာခဲ့ဟု ဖော်ပြသည်။စစ်ကောင်စီ အနေဖြင့် မြန်မာနိုင်ငံအနှံ့ ၎င်းတို့နှင့် ဖြစ်ပွားလျက်ရှိသောစစ်ပွဲတိုင်းတွင် ရှုံးနိမ့်နေသည်များ ပေါ်လွင်နေခြင်းပင် ဖြစ်ဟု AAက ထုတ်ပြန်သည်။

ဖေဖော်ဝါရီလ (၁၂) ရက်နေ့တွင်လည်း စစ်တွေ-ရန်ကုန်
ကားလမ်းမပေါ်အနီး အမြင့်ကျွန်းကျေးရွာနားရှိ စစ်တွေမြို့အဝင် မင်းချောင်း (ခေါ်) အမြင့်ကျွန်းတံတားကိုလည်း စစ်ကောင်စီမှ ဖောက်ခွဲဖျက်ဆီးခဲ့ကြောင်း၊ ယင်းတံတားများ မှာ အရပ်သားပြည်သူများမှ ကုန်စည်သယ်ယူပို့ဆောင်ရေးအတွက် အဓိကအားကိုးအားထားသွားလာနေရသည့် တံတား များ ဖြစ်ကြောင်း ဖော်ပြသည်။

စစ်ကောင်စီသည် ကချင်၊ကရင်၊ ပအိုဝ်း ဒေသများ၌လည်း ထိုသို့ လမ်းတံတားများဖျက်ဆီးခြင်းများ ပြုလုပ်ခဲ့ကြောင်း သက်ဆိုင်ရာဒေသရှိ တိုင်းရင်းသားတပ်များက အသိပေးထားသည်။

AA အနေဖြင့် ကချင်ပြည်နယ် မံစီမြို့နယ်တိုက်ပွဲအခြေ
အနေ အကျဉ်းကိုလည်း ထုတ်ပြန်အသိပေးသည်။

မံစီ မြို့နယ်၌ မဟာမိတ် KIA နှင့် ပူးပေါင်း၍ စစ်ကောင်
စီ၏ "စီခမ်းကြီးစခန်း"အား ဖေဖော်ဝါရီလ (၁၇) ရက် မနက်မှစတင် ထိုးစစ်ဆင်လျက်ရှိရာ စစ်ကောင်စီက လေကြောင်း ပစ်ကူပေး တိုက်ခိုက်ခြင်းအပြင်အရပ်သားများကို ပစ်မှတ်ထားတိုက်ခိုက်ခဲ့၍ စီခမ်းကြီးရွာမှ ပြည်သူ ၅ဦး သေဆုံးကာ ၃၀ကျော် ဒဏ်ရာရခဲ့သည်ဟု ထုတ်ပြန်သည်။


စစ်ကောင်စီ၏ စခန်းအား အပြီးသတ် သိမ်းပိုက်ရယူနိုင်ရေးအတွက် ဆက်လက်ထိုးစစ်ဆင်တိုက်ခိုက်လျက်ရှိသည်ဟု အသိပေးထားသည်။

ရက္ခိုင်ပြည်နယ် ရသေ့တောင်မြို့မြောက်ဘက်၊ ခနောင်းကြီးကျေးရွာအနီးပတ်ဝန်းကျင်တွင်လည်း စစ်ကောင်စီ၏ ရသေ့တောင်မြို့အခြေစိုက် ခမရ (၅၃၆) တပ်ရင်းနှင့် AAတို့တိုက်ပွဲဖြစ်ခဲ့ပြီး တိုက်ပွဲ အသေးစိတ် အခြေအနေများ မသိရသေးဟု ထုတ်ပြန်သည်။

ထို့ပြင် ရမ်းဗြဲမြို့အား အလုံးစုံပျက်စီးစေရန် ရည်ရွယ်ချက်ဖြင့် စစ်ကောင်စီက ရေကြောင်း၊ လေကြောင်းဖြင့် ပစ်ခတ်တိုက်ခိုက်မှုများကို ဖေဖော်ဝါရီလဆန်းကတည်းက ဆက်တိုက်ပြုလုပ်လျက်ရှိရာ ရမ်းဗြဲမြို့အား ယမန်နေ့တွင် Mi-35 စစ်ရဟတ်ယာဉ်၊ ဂျက်ဖိုက်တာတို့ဖြင့် လာရောက် တိုက်ခိုက်ခဲ့ဟု ဖော်ပြသည်။ ထို့အပြင် ကလိန်တောင်မြစ်ထဲရှိ ရန်သူ့နေဗီ သင်္ဘောမှလည်း မြို့ပေါ်ရပ်ကွက်များအား လက်နက်ကြီးဖြင့် ပစ်ခတ်ခဲ့ဟု ဆိုသည်။

လေကြောင်းမှ တိုက်ခိုက်မှုကြောင့် အမှတ် (၄) ကင်းတဲရပ်ကွက်ရှိ လူနေအိမ် (၆၀) ကျော်ခန့် မီးလောင်ပျက်စီးခဲ့ရသည့်အပြင် နေအိမ် အများအပြားမှာလည်း ထိမှန်ပျက်စီးခဲ့ရကြောင်းဖော်ပြထားသည်။

ညီနောင်မဟာမိတ် သုံးဖွဲ့ကတိုက်ပွဲ သတင်းဖော်ပြရာ
ရှမ်းမြောက်ဒေသ၌ လတ်တလောအခြေအနေအရ တိုက်ပွဲများ ငြိမ်သက်နေခဲ့သော်လည်း ရက္ခိုင်ဒေသတွင်မူ ရက္ခိုင့်တပ်‌တော်၏ထိုးစစ်နှင့် စစ်ကောင်စီ၏ ကြည်း၊ ရေ၊ လေ ခုခံစစ်တို့အကြား ရက္ခိုင်ပြည်နယ် မြို့နယ်အချို့နှင့် နေရာသစ်တချို့တွင်ပါ တိုက်ပွဲများဆက်လက်ရှိနေခဲ့သည်ဟုထုတ်ပြန်ခဲ့သည်။